ဇွန်ဘီတွေပြည့်နှက်နေတဲ့လောကကြီးမှာ လက်တွေ့အဆန်ဆုံးဂိမ်းကစားဟန်နဲ့အတူ ခံစားမှုရသမျိုးစုံကိုပေးစွမ်းမယ့် State Of Decay 2

ဂိမ်းအမျိုးအစားတွေမှာ တစ်ကိုယ်တော်စွန့်စားခန်းထွက်တဲ့ဂိမ်းမျိုးတွေ၊ အက်ရှင်အပစ်အခတ်ဂိမ်းတွေ၊ သမိုင်းတစ်လျှောက်စစ်ပွဲတွေအပြင် ရင်ထိတ်သည်းဖိုဆော့ကစားရတဲ့ဂိမ်းတွေဟာ ဂိမ်မာတွေကြိုက်နှစ်သက်ကြတဲ့ဂိမ်းတွေပါပဲ။ အဲဒါကြောင့်ပဲ ဂိမ်းကုမ္ပဏီအများစုဟာ အဲဒီလိုတမူထူးတဲ့ဂိမ်းရသတွေပေးစွမ်းနိုင်မယ့်ဂိမ်းကောင်းတွေကိုဖန်တီးထုတ်လုပ်ခဲ့ကြပြီး ပေါ်မြောက်အောင်မြင်သွားကြတဲ့အခါ မူရင်းခွေရဲ့နောက်ဆက်တွဲဂိမ်းပေါင်းများစွာကို ခုနှစ်တွေအလိုက်ထုတ်လာခဲ့ကြပါတယ်။ အဲဒီလိုဂိမ်မာတွေရဲ့ကြိုက်နှစ်သက်မှုကို အများဆုံးရယူထားတဲ့ဂိမ်းတွေထဲမှာ ဇွန်ဘီအမျိုးအစားဂိမ်းတွေဟာလည်း အပါအဝင်ဖြစ်တယ်ဆိုတာ အားလုံးငြင်းမရတဲ့အချက်တစ်ခုပါ။ ဂိမ်မာတွေအားလုံးရဲ့မှတ်ဉာဏ်ထဲမှာစွဲကျန်ရစ်နေခဲ့တဲ့ CAPCOM ရဲ့ ၂၀၀၅ ခုနှစ်ထုတ် Resident Evil 4, ဒါမှမဟုတ်ရင် Valve Corporation ကထုတ်တဲ့ ၂၀၀၈ ခုနှစ်က Left 4 Dead တို့ဟာ အကောင်းဆုံးသက်သေတွေပါပဲ။ ဒါဆိုရင် ဇွန်ဘီတွေပြည့်နှက်နေတဲ့လောကထဲမှာအသက်ရှင်ရုန်းကန်ရတာကို ဂိမ်မာတွေ ဘာကြောင့်ကြိုက်ကြတာလဲ? အဖြေကတော့ရှင်းပါတယ်၊ ကြောက်ဖို့ကောင်းတဲ့ လူသားစားဖုတ်ကောင်တွေပြည့်နှက်နေတဲ့လောကကြီးကို လေ့လာချင်လို့ဖြစ်ကောင်းဖြစ်နိုင်သလို အဆမတန်များပြားလှတဲ့ဇွန်ဘီတွေကို တစ်ကောင်မကျန်အမြစ်ဖြတ်ချင်တာလဲဖြစ်နိုင်ပါတယ်။ လုံးဝသေချာတာတစ်ခုကတော့ တကယ်တမ်းလက်တွေ့ဘဝထဲ ဇွန်ဘီတွေပေါက်ဖွားလာတဲ့အချိန်မျိုးမှာ ဘယ်လိုနည်းလမ်းနဲ့အသက်ရှင်သန်မလဲဆိုတာကို လက်တွေ့စမ်းသပ်ကြည့်ချင်လို့ပဲဖြစ်ပါတယ်။ ဒါပေမယ့် တကယ်တမ်းလူသားအားလုံးဇွန်ဘီတွေအဖြစ်ပြောင်းလဲသွားခဲ့မယ်ဆိုရင်တော့ ရရာလက်နက်ကိုင်စွဲပြီးပစ်ခတ်တိုက်ခိုက်နေရုံနဲ့ ကိုယ့်အသက်ကိုယ်ကယ်တင်နိုင်မှာမဟုတ်ပါဘူး။ ကိုယ့်ရဲ့အသက်တည်မြဲဖို့အတွက် ပါးနပ်ရမယ်၊ ခိုလှုံမယ့်နေရာကိုရှာဖွေတတ်ရမယ်၊ ကိုယ့်ရဲ့မိတ်ဆွေသူငယ်ချင်းတွေနဲ့စည်းလုံးရမယ်၊ စားနပ်ရိက္ခာနဲ့လိုအပ်တဲ့ဆေးဝါးတွေကို စုဆောင်းထားရမယ်၊ အဲဒီလိုမျိုးခြေလှမ်းတိုင်းကိုသတိနဲ့လှမ်းမှသာ တကယ်တမ်းလက်တွေ့မှာအသက်ရှင်သန်နိုင်မှာဖြစ်ပါတယ်။ 

ဒါပေမယ့် အဲဒီလိုမျိုးအတွေ့အကြုံတွေကိုခံစားရဖို့အတွက် ဇွန်ဘီတွေကိုဒီကမ္ဘာကြီးရောက်လာဖို့ ဖိတ်ခေါ်နေစရာမလိုပါဘူး၊ ၂၀၁၃ ခုနှစ်ကထွက်ရှိခဲ့တဲ့ Undead Labs ရဲ့State Of Decay ဇွန်ဘီဂိမ်းကိုဆော့ကြည့်လိုက်ပါ။ ယုတ္တိအတန်ဆုံးဂိမ်းတွင်းလုပ်ဆောင်ချက်တွေနဲ့ ဇွန်ဘီလောကထဲမှာအသက်ရှင်သန်ဖို့အတွက် လိုအပ်တဲ့အရာတွေအားလုံးကို ဂိမ်းတစ်ခုတည်းမှာစုပေါင်းပေးထားတဲ့ ဇွန်ဘီဂိမ်းကောင်းလို့ဆိုရင်လည်းမမှားပါဘူး။ ဒါပေမယ့် State Of Decay ဂိမ်းဟာ ၂၀၁၃ ခုနှစ်မှာထွက်ရှိခဲ့တဲ့ဂိမ်းဖြစ်တဲ့အတွက် အခုဆိုရင် ၂၀၁၈ ခုနှစ်ကိုရောက်လာခဲ့ပြီဖြစ်ပြီး ၂၀၁၃ နှစ်ကတည်းကထွက်ရှိခဲ့တဲ့ State Of Decay ဂိမ်းပရိသတ်များဟာ နောက်ထပ်တစ်ခွေဘယ်အချိန်မှာထွက်ရှိမလဲဆိုပြီး စောင့်မျှော်နေကြပါတယ်။ Microsoft Studios ဟာလည်း ၂၀၁၆ နဲ့ ၂၀၁၇ E3 ပွဲနှစ်ပွဲမှာ State Of Decay ရဲ့နောက်ဆက်တွဲအခွေထွေလာနဲ့အတူ ထွက်ရှိမယ့်အချိန်ကိုအရိပ်အမြွုက်ချပြနေခဲ့တာ အခုဆိုရင် ၂၀၁၈ ကိုတောင်ရောက်ရှိလို့လာခဲ့ပါပြီ။ ဒါပေမယ့် Undead Labs ရဲ့ State Of Decay 2 ပရောဂျက်ဟာအဆုံးသတ်ပြီးစီးနေပြီလို့ သိရပြီး ၂၀၁၈ မှာထွက်ရှိမယ်ဆိုတာ သေချာနေပါပြီ။ ဒီတော့ ၂၀၁၃ ကတည်းကနေအခုချိန်ထိ အားလုံးနဲ့ကွဲထွက်တဲ့ ဇွန်ဘီဂိမ်းကောင်းတစ်ခုလို့ ဂိမ်မာတွေသတ်မှတ်ထားတဲ့ State Of Decay 2 မှာ ဘာတွေကိုမျှော်လင့်လို့ရမလဲ? ဘယ်လိုအရာတွေပါမလဲ? ဘယ်လိုမျိုးလုပ်ဆောင်ချက်အသစ်တွေထည့်သွင်းထားမလဲ? သိရသမျှအချက်အလက်တွေကို ဂိမ်မာများအားလုံးသိစေဖို့ ဒီကနေပြန်လည်မျှဝေသွားပါ့မယ်။

ပုိမုိကျယ်ပြန့်ကြီးမားတဲ့ဂိမ်းလောကနဲ့ ပြောင်းလဲသွားတဲ့ပတ်ဝန်းကျင်သစ်

ပထမ State Of Decay အခွေကို ထရန်ဘူး (Trumbull) လို့အမည်ရတဲ့ တောင်ပေါ်မြေပြန့်မြို့လေးမှာဇာတ်အိမ်တည်ထားပါတယ်။ တောင်ပေါ်မြေပြန့်ဒေသဖြစ်တဲ့အလျောက် ခြောက်သွေ့တဲ့အပူပိုင်းရာသီဥတုရှိပြီး ပတ်ဝန်းကျင်တစ်လျှောက်မှာ လယ်ကွင်းပြင်ကျယ်တွေ၊ တောင်ပတ်လမ်းတွေနဲ့ အဝေးပြေးလမ်းတွေကိုတွေ့မြင်ရမှာပါ။ လူတွေနေထိုင်တဲ့နေရပ်ဟာလည်း တစ်နေရာနဲ့တစ်နေရာ အနည်းငယ်ကွာဝေးတာကြောင့် ဒီထရန်ဘူးမြို့လေးကို ကျေးလက်အသွင်ဆောင်တဲ့မြို့လို့လည်း ဆိုနိုင်ပါတယ်။ ဒါပေမယ့် အခုနောက်တစ်ခွေဖြစ်တဲ့ State Of Decay 2 မှာ ဇာတ်အိမ်တည်ထားတဲ့မြို့ဟာ အရင်ခွေရဲ့ထရန်ဘူးမြို့ထက် ဆပေါင်းများစွာပိုမိုကြီးမားပြီး ကျယ်ပြန့်နက်ရှိုင်းတဲ့အပြင် ထရန်ဘူးမြို့နဲ့ကွဲပြားခြားနားစွာပဲ သာယာစိုပြေတဲ့ရာသီဥတုနဲ့အတူ စိမ်းလန်းတဲ့သဘာဝရှိတဲ့မြို့လေးတစ်မြို့လည်းဖြစ်ပါတယ်။ E3 ပွဲမှာနှစ်နှစ်ဆက်တိုက်ပြသခဲ့တဲ့ State Of Decay 2 ထွေလာမှာ အရင်ခွေနဲ့မတူဘဲ ပြောင်းလဲသွားတဲ့ပတ်ဝန်းကျင်အသစ်ကို အသားပေးထားတာတွေ့နိုင်ပါတယ်။

လက်တွေ့ဘဝကိုထင်ဟပ်တဲ့ ခံစားချက်ရသမျိုးစုံနဲ့ ဒရာမာအချိုးအကွေ့

State Of Decay အခွေ ၂၀၁၃ ခုနှစ်မှာ စစဦးဆုံးထွက်ရှိလာတုန်းက အဲဒီဂိမ်းကိုရိုးအီပြီးအပ်ကြောင်းထပ်နေတဲ့ သာမန်ဇွန်ဘီဂီမ်းလို့ ထင်မြင်ခဲ့ကြပါတယ်။ ကျွန်တော်ကိုယ်တိုင်လည်း အစကအဲလိုထင်မှတ်ခဲ့ပေမယ့် အချိန်ကြာလာတာနဲ့အမျှ ဆော့ကစားသူတွေတိုးပွားလာပြီး တစ်ယောက်ကနေတစ်ယောက် ကောင်းသတင်းတွေ လက်ဆင့်ကမ်းခဲ့ကြလို့ State Of Decay ဂိမ်းဟာ ၂၀၁၃ ခုနှစ်ရဲ့အကောင်းဆုံးဇွန်ဘီဂိမ်းဆိုတဲ့ နေရာကို ဆွတ်ခူးနိုင်ခဲ့ပါတယ်။ State Of Decay ဂိမ်းဟာ သီးသန့်ကြီးဖန်တီးထားတဲ့အကြောက်တရားကိုပေးစွမ်းတဲ့ တခြား survival ဇွန်ဘီဂိမ်းတွေနဲ့မတူဘဲ တမူထူးခြားကွဲထွက်နေတာဟာ လက်တွေ့ဘဝနဲ့ဆက်စပ်နေတဲ့ ခံစားချက်ရသတွေကို ဂိမ်းဇာတ်လမ်းရဲ့အခန်းကဏ္ဍတစ်ခုချင်းစီမှာ သဘာဝကျကျထည့်သွင်းထားလို့ဖြစ်ပါတယ်။ တကယ့်ရုပ်ရှင်ဇာတ်ကားတွေထဲကအတိုင်း ဇွန်ဘီအကိုက်ခံရတဲ့ဇာတ်ကောင်တွေဟာ တစ်ချိန်ချိန်မှာဇွန်ဘီအဖြစ်ကိုပြောင်းလဲသွားမှာဖြစ်တဲ့အတွက် သူတို့ရဲ့အသက်ကိုစတေးပြီး ဇာတ်ကိုရှေ့ဆက်မယ့်လုပ်ရပ်တွေကိုဆောင်ရွက်ရမယ်။ အဲဒီလိုအချိန်မျိုးမှာ ချစ်ရတဲ့မိသားစုဝင်တွေ၊ ခင်မင်ရတဲ့ မိတ်ဆွေအပေါင်းအဖော်တွေအတွက် အဲဒီဇာတ်ကောင်တွေချန်ရစ်ခဲ့မယ့်အမှတ်တရတွေ၊ နောက်ဆုံးသေတမ်းစာတွေ အစရှိတာတွေ ရင်နင့်ဖွယ်အတိုင်းသားကြုံတွေ့ရမယ့်အပြင် ဂိမ်းတွင်းဇာတ်ကောင်တစ်ကောင်ဟာ အန္တရာယ်နဲ့ရင်ဆိုင်ရပြီး အသက်ဆုံးရှုံးသွားတိုင်းမှာ ဂိမ်းထဲကိုပြန်လည်ပြီးရောက်ရှိလာတော့မှာမဟုတ်ပါဘူး။ ကိုယ့်ရဲ့အဓိကဇာတ်ကောင်အပါအဝင် အခြားဘယ်ဇာတ်ကောင်မဆို အကြောင်းတစ်စုံတစ်ရာကြောင့် သေဆုံးခဲ့မယ်ဆိုရင် အဲဒါဟာထာဝရဖြစ်ပါတယ်။

ၾကမ်းတမ်းခက်ထန်တဲ့ဇွန်ဘီလောကနဲ့ ဘဘာဝကျတဲ့ဂိမ်းကစားပုံစံ

State Of Decay ဂိမ်းဟာ တကယ်တမ်း လူတွေနေထိုင်ရာကမ္ဘာမှာ ဇွန်ဘီတွေအပြည့်ဖြစ်သွားခဲ့ရင် ဘယ်လိုမျိုးအသက်ရှင်အောင်နေမလဲဆိုတဲ့နည်းလမ်းကို ကိုယ်စွမ်းဉာဏ်စွမ်းရှိသလို ရှာဖွေရတဲ့ဂိမ်းဖြစ်တဲ့အလျောက် သူ့ရဲ့ဂိမ်းကစားဟန်ဟာလည်း သဘာဝကျပါတယ်။ ဂိမ်းအတွင်းမှာပုံမှန်ဇွန်ဘီတွေအပြင် အရွယ်အစားအဆမတန်ကြီးထွားပြီးအားကြီးတဲ့ Juggernaut, အဆိပ်ငွေ့တွေကိုခန္ဓာကိုယ်ထဲသိုလှောင်ထားတဲ့ Bloater, သားရဲတစ်ကောင်လိုလျင်မြန်တဲ့ Feral နဲ့ ကျယ်လောင်စူးရှတဲ့အော်သံနဲ့ အခြားဇွန်ဘီတွေကိုအော်ခေါ်တဲ့ Screamer ဆိုပြီး သာမန်မဟုတ်တဲ့ အသွင်ကွဲဇွန်ဘီလေးမျိုးရှိပါတယ်။ အဲဒီအသွင်ကွဲဇွန်ဘီတစ်မျိုးချင်းစီမှာ မတူညီတဲ့ဂုဏ်သတ္တိတွေရှိတဲ့အတွက် ကွဲပြားတဲ့နည်းလမ်းတွေကိုအသုံးချပြီး သူတို့ကိုပါးပါးနပ်နပ်နှိမ်နင်းရမှာပါ။ State Of Decay ဂိမ်းရဲ့အခရာကျတဲ့ဂိမ်းတွင်းလုပ်ဆောင်ချက်တွေထဲမှာ ကိုယ်ခိုလှုံရာနေရပ်ကိုပိုပြီးအင်အားတောင့်တင်းလာအောင် တည်ဆောက်မှုတွေ၊ အသက်ရှင်ကျန်ရစ်သူတွေကိုကူညီပြီး မိတ်ဖွဲ့တာတွေ၊ ဇွန်ဘီတွေကျူးကျော်ဝင်ရောက်လာတဲ့ကိုယ့်ရဲ့နေရပ်ကို အဖွဲ့သားတွေနဲ့အတူကာကွယ်တာတွေ အစရှိတာတွေနဲ့အပြင် တကယ့်လူ့သဘာဝဖြစ်တဲ့ အိပ်စက်အနားယူချိန်၊ အစာစားသောက်ချိန်နဲ့ နာမကျန်းဖြစ်ချိန်တွေကိုပါ ထည့်သွင်းထားပါတယ်။ ဇာတ်ကောင်တစ်ကောင်ချင်းမှာ သူနဲ့သက်ဆိုင်တဲ့ အားသာချက်၊ အားနည်းချက်တွေရှိပြီး ကြိုက်နှစ်သက်မှုတွေ၊ စိတ်နေစိတ်ထားတွေကိုပါ အသေးစိတ်ထည့်သွင်းပေးထားတဲ့အတွက် ဘယ်လိုဆော့ဟန်မျိုးနဲ့ ဘယ်လိုဇာတ်ကောင်ကိုကိုင်တွယ်ရမလဲဆိုတာကို ဂိမ်မာတွေက ကိုယ်တိုင်ကိုယ်ကျရှာဖွေရမှာဖြစ်ပါတယ်။ ဒီတော့အခုလာမယ့် State Of Decay 2 မှာ အဲဒီလိုဂိမ်းတွင်းလုပ်ဆောင်ချက်တွေအားလုံးကို ပိုမိုကောင်းမွန်တဲ့ရုပ်ထွက်ဂရပ်ဖစ်နဲ့ ကျယ်ပြန့်ကြီးမားလှတဲ့ဂိမ်းလောကသစ်အတွင်းမှာ ဂိမ်မာများအားလုံးက စိတ်လှုပ်ရှားဖွယ် မျက်ဝါးထင်ထင်တွေ့မြင်ရတော့မှာပါ။

ထွက်ရှိလာမယ့်ရက်စွဲအတိအကျနဲ့ အနှစ်ချူပ် 

Microsoft Studios ရဲ့ထုတ်ပြန်ချက်အရ State Of Decay 2 ဂိမ်းဟာ ၂၀၁၈ ခုနှစ်နွေဦးရာသီမှာ ထွက်ရှိလာမယ်လို့သိရပြီး ဂိမ်းဖန်တီးသူအဖွဲ့ဖြစ်တဲ့ Undead Labs ဟာ ဂိမ်းနဲ့ပတ်သက်တဲ့ထွေလာနှစ်ခုကို ၂၀၁၆ နဲ့ ၂၀၁၇ E3 ပွဲနှစ်ပွဲလုံးမှာ ပြသခဲ့ပါတယ်။ ဇွန်ဘီဂိမ်းကောင်းတွေကိုစောင့်မျှော်နေကြတဲ့ ဂိမ်းပရိသတ်တွေဟာ နောက်လာမယ့် State Of Decay အခွေသစ်ရဲ့ နက်ရှိုင်းကျယ်ပြန့်လှတဲ့ဂိမ်းလောလ၊ ပိုမိုထိတ်လန့်ဖို့ကောင်းလာတဲ့အသွင်ပြောင်းဇွန်ဘီတွေကြားမှာ ပြောင်းလဲသွားတဲ့ဇာတ်ကောင်အသစ်တွေနဲ့အတူ အသက်ရှင်သန်ရာလမ်းစကိုရှာဖွေဖို့အတွက် ဇွန်ဘီကမ္ဘာကြီးထဲကို ခြေစုံပစ်ဝင်ရောက်ချင်နေကြပါပြီ။ ဟုတ်ပါတယ်၊ Microsoft Studios ကထုတ်လုပ်ပြီး Undead Labs ဂိမ်းအဖွဲ့ရဲ့ပြောင်မြောက်တဲ့ဖန်တီးမှုတစ်ခုဖြစ်တဲ့ State Of Decay ဇွန်ဘီဂိမ်းဟာ ကျွန်တော်ဆော့ကစားခဲ့ဖူးသမျှ ဇွန်ဘီဂိမ်းတွေထဲမှာ လက်တွေ့အကျဆုံး၊ ယုတ္တိအတန်ဆုံး၊ ခံစားချက်ရသအပေးစွမ်းနိုင်ဆုံးနဲ့ စိတ်လှုပ်ရှားဖို့အကောင်းဆုံးဂိမ်းလည်းဖြစ်ပါတယ်။ ဒါ့အပြင် အရင်အခွေကိုတစ်ဦးတည်းသာဆော့ကစားနိုင်ပေမယ့် အခုလာမယ့် State Of Decay 2 မှာတော့ အွန်လိုင်းပေါ်ကကစားသမားများနဲ့ ချိတ်ဆက်ဆော့ကစားနိုင်မှာဖြစ်ပြီး ကိုယ်အပါအဝင်နောက်ထပ် ကစားသူသုံးယောက်အထိ စုစုပေါင်းလေးယောက် အတူတကွဆော့ကစားနိုင်ဦးမှာပါ။ ၂၀၁၈ ခုနှစ်ဟာ ဗီဒီယိုဂိမ်းလောကကိုဂယက်ရိုက်စေမယ့် ဂိမ်းပေါင်းများစွာထွက်ရှိလာမယ့်နှစ်ဖြစ်တဲ့အတွက် ဂိမ်မာတွေအတွက် ဝမ်းသာကျေနပ်စရာကြီးပါ။ အဲဒီလိုဂိမ်းတွေထဲမှာမှ State Of Decay 2 ဟာလည်း ၂၀၁၈ ခုနှစ်အတွက် ဂိမ်မာတော်တော်များများ မျှော်လင့်ထားတဲ့ဂိမ်းလည်းဖြစ်ပါတယ်။ ထွက်ရှိမယ့်ရက်ကိုအတိအကျမကြေညာသေးပေမယ့် ၂၀၁၈ ခုနှစ်မှာထွက်ရှိလာမယ်ဆိုတာ လုံးဝကိုသေချာနေတဲ့အတွက် ဘယ်ဂိမ်းကဘယ်အချိန်မှာထွက်လာမလဲဆိုတာကို ဂိမ်မာအားလုံးက ရင်ခုန်စိတ်လှုပ်ရှားစွာစောင့်ဆိုင်းရုံပါပဲလို့ပြောရင်း State Of Decay 2 နဲ့ပတ်သက်တဲ့အကြောင်းအရာတွေကို ဂိမ်းတွင်း screenshot တွေနဲ့အတူ ဒီကနေပြန်လည်မျှဝေလိုက်ရပါတယ်။

Yan
Ref: gamespot, outsidebox, wikia

ဂိမ်မာတွေရဲ့ အသံပိုင်းဆိုင်ရာလိုအပ်ချက်တွေကို ဖြည့်ဆည်းပေးမယ့် အရည်သွေးမြင့် Gaming Headphone 7 ခု

ဂိမ်းတွေကိုကျွန်တော်တို့ဂိမ်မာတွေဟာ စိတ်ကတောင့်တတဲ့လိုအင်ဆန္ဒတွေအလျောက် ဆော့ဖြစ်ကြပါတယ်။ အမျိုးအစားကွဲပြားတဲ့ဂိမ်းတွေအလိုက် ဂိမ်မာတွေဆော့ကစားကြတဲ့ဂိမ်းတွေ ခြားနားသွားကြသလို ကိုယ့်ရဲ့အကြိုက်နဲ့ကိုက်ပြီး ကိုယ်နဲ့လိုက်ဖက်ညီမယ့်ဂိမ်းကောင်းမျိုးကို ရွေးချယ်ဆော့ကစားလေ့ရှိကြပါတယ်။ အက်ရှင်ဆန်ဆန်ကြမ်းကြမ်းရမ်းရမ်းဂိမ်းမျိုးလား ဒါမှမဟုတ် ဒရာမာအချိုးနဲ့စိတ်ခံစားချက်ကို အဆုံးထိတင်ပေးမယ့်ဂိမ်းမျိုးလား၊ ရုပ်ရှင်တစ်ကားကြည့်နေရသလို နယ်မြေဒေသတစ်နေရာကိုခေါ်ဆောင်သွားမယ့် ဂိမ်းမျိုးလားဆိုတာ ဂိမ်မာများကိုယ်တိုင်ကိုယ့်အကြိုက်နဲ့ကိုယ် တစ်ယောက်တစ်မျိုးပါပဲ။ ဒါပေမယ့် အဲဒီလိုကွဲပြားခြားနားတဲ့အယူအဆတွေကိုယ်စီရှိတဲ့ ဂိမ်မာတွေကြားမှာ တူညီနေတဲ့အချက်တစ်ခုရှိပါတယ်၊ အဲဒါဘာလဲဆိုတော့ ဂိမ်မာတိုင်းဟာ အကောင်းဆုံးသောဂိမ်းတွင်းအတွေ့အကြုံတွေကို တွေ့ကြုံခံစားချင်ကြတယ်ဆိုတာပါပဲ။ ဟုတ်ပါတယ်၊ ဂိမ်းကောင်းတစ်ခုပေးစွမ်းတဲ့ အရည်အသွေးအပြည့်ဝဆုံး ဂိမ်းတွင်းအတွေ့အကြုံတွေကို အဆုံးစွန်အထိခံစားချင်တယ်ဆိုရင်တော့ ဂိမ်းစက်တစ်လုံးရှိရုံ၊ ကွန်ပျူတာတစ်လုံးရှိရုံနဲ့ မပြီးပါဘူး။ ရုပ်ပိုင်းအသံပိုင်းမှာ အထိရောက်ဆုံးပံ့ပိုးမှုအပြင် ဂိမ်းကစားဖို့အတွက်လိုအပ်တဲ့ အရည်အသွေးမြင့် အသုံးအဆောင်ပစ္စည်းတွေနဲ့ ချိတ်ဆက်ပြီးဆော့ကစားမှသာ ကိုယ့်ရဲ့စိတ်ကျေနပ်မှုထိပ်ဆုံးအထိ ရောက်ရှိမှာဖြစ်ပါတယ်။ 

အကြမ်းဖျင်းအားဖြင့်ပြောမယ်ဆိုရင် ဂိမ်းတစ်ခုကို Visual နဲ့ Audio ကဏ္ဍ၊ ရုပ်ပိုင်းနဲ့ အသံပိုင်းဆိုပြီး နှစ်မျိုးခွဲကြည့်လိုက်ပါ။ ရုပ်ပိုင်းမှာဘာတွေပါမလဲ? တီဗီပဲဖြစ်ဖြစ်၊ ကွန်ပျူတာမော်နီတာပဲဖြစ်ဖြစ် ရုပ်ပိုင်းကဏ္ဍမှာ ကြည်လင်ပြတ်သားတဲ့ဂိမ်းဂရပ်ဖစ်ရုပ်ထွက်၊ ကျယ်ပြန့်ကြီးမားတဲ့မြင်ကွင်း၊ ရှင်းလင်းတိကျတဲ့လှုပ်ရှားမှုသဏ္ဌာန် အစရှိသဖြင့် ဂိမ်းဖန်သားပြင်ပေါ်က ကိုယ့်မျက်စိနဲ့မြင်ရသမျှ အရာတွေကို ရုပ်ပိုင်းကဏ္ဍလို့ဆိုနိုင်ပါတယ်။ ဆိုလိုတာက နောက်ဆုံးပေါ်နည်းပညာတွေပါဝင်တဲ့မော်နီတာတွေ၊ FPS ဂိတ်ဆုံးနဲ့ 4K အထောက်အပံ့ပေးနိုင်တဲ့မော်နီတာမျိုးတွေအသုံးပြုမယ်ဆိုရင်တော့ အကောင်းဆုံးဂိမ်းတွင်းအတွေ့အကြုံတွေကို မျက်ဝါးထင်ထင်တွေ့မြင်ခံစားရမှာ ကြမ်းသေပါပဲ။ ရုပ်ပိုင်းကဏ္ဍဘက်က ဒီလိုမျိုးအချက်အလက်တွေကိုသိဖို့လိုတယ်ဆိုရင် အသံပိုင်းနဲ့ပတ်သက်ပြီးရော ဘာတွေလိုအပ်သလဲ? အရည်အသွေးပြည့်ဝတဲ့ဂိမ်းတွင်းအသံတွေကို ကြိမ်နှုန်းအကွာအဝေးတိုင်းမှာ ကြားနိုင်ဖို့အတွက် ဘယ်လိုမျိုးဂိမ်းဆက်စပ်ပစ္စည်းတွေရှိရမလဲ? ရုပ်ပိုင်းပဲအလေးထားပြီး အသံပိုင်းကိုဂရုမပြုမိကြတဲ့ဂိမ်မာများအတွက်ရော၊ အသံပိုင်းဟာအရေးမကြီးဘူးလို့ယူဆထားသူများအပါအဝင် အဲဒီမေးခွန်းကို သိချင်နေသူများအဖို့ရော၊ ဂိမ်းတစ်ခုမှာ ရုပ်ပိုင်းနည်းတူအသံပိုင်းကလည်း အရေးပါတယ်ဆိုတဲ့အကြောင်းကိုပြောကြားရင်း ဂိမ်မာတွေရဲ့မရှိမဖြစ် လိုအပ်ချက်ကိုဖြည့်ဆည်းပေးမယ့် အကောင်းဆုံးအရည်အသွေးနဲ့ Gaming Headphone 7 ခုကို ဒီကနေဖော်ပြပေးလိုက်ရပါတယ်။ စိတ်မပူပါနဲ့၊ ဂိမ်မာအားလုံးမှာယူလို့ရနိုင်လောက်မယ့် ဈေးနှုန်းမျိုးနဲ့ ဈေးကွက်ထဲမှာနာမည်ကောင်းတွေရရှိထားတဲ့ Gaming Headphone တွေကိုပဲ ပုံလေးတွေနဲ့တကွ ကောက်နှုတ်ပေးထားပါတယ်။

Corsair HS50

ပထမဦးဆုံးနေရာမှာတော့ ဈေးနှုန်းအလယ်အလတ်နဲ့ ကွာလတီအသင့်အတင့် headphone ကိုသုံးချင်သူ ဂိမ်မာများအတွက် Corsair HS50 နဲ့ စတင်မိတ်ဆက်ပေးလိုက်ပါတယ်။ အပြင်ပန်းဒီဇိုင်းပုံစံက ကိုယ့်ကိုဆွဲဆောင်ထားမှာမဟုတ်ပေမယ့် တကယ်တမ်းမှာ Corsair HS50 ဟာ ဂိမ်မာတော်တော်များများရဲ့ အသံပိုင်းလိုအပ်ချက်တွေကို ဖြည့်ဆည်းထားခဲ့ပြီဖြစ်ပါတယ်။ အရည်အသွေးမလျော့တဲ့အသံထွက်စနစ်၊ အသံဖမ်းမိုက်ကရိုဖုန်း၊ အတိုင်းအတာတစ်ခုအထိ အကြမ်းခံမယ့် headphone ပြုလုပ်ထားမှုတို့ကြောင့် သီးသန့်ကြီးအနေနဲ့ အထူးလုပ်ဆောင်ချက်တွေကို မထည့်သွင်းထားပေမယ့် ဂိမ်မာတွေအသုံးပြုသင့်တဲ့ ဈေးနှုန်းအသင့်ဆုံး  headphone တစ်ခုဖြစ်နေခဲ့တာပါ။ Corsair HS50 ကိုဝယ်ယူလိုသူဂိမ်မာများအတွက်ဆိုရင်တော့ လက်ရှိမှာပေါင်  £54.99 ကျပ်နဲ့ မှာယူနိုင်ပါတယ်။

Asus ROG Strix Fusion 500

အရည်အသွေးအကောင်းဆုံးပစ္စည်းအသုံးအဆောင်တွေဟာ သုံးရတာတန်လေ၊ ဈေးပိုများလေ လို့ဆိုရမလိုပါပဲ။ Asus ROG Strix Fusion 500 headphone မှာ ပိုမိုအဆင့်မြင့်တဲ့အသံထွက်စနစ်ကို အသုံးပြုထားပြီး အပြိုင်အဆိုင်တွေများတဲ့ဂိမ်မာတွေအတွက် ရွေးချယ်စရာ headphone ဖြစ်ခဲ့ပါတယ်။ အဆင့်မြင့်တဲ့အသံထွက်စနစ်၊ သက်တောင့်သက်သာရှိတဲ့အပြင်အဆင်၊ အနီ၊ အစိမ်း၊ အပြာအရောင်ပေါင်းစပ်ထားတဲ့ အရောင်ပြောင်းစနစ်၊ Surround Sound လို့လူတွေသိကြတဲ့ လက်တွေ့ဆန်ဆန်ပတ်ဝန်းကျင်အသံထွက်စနစ် အစရှိတဲ့အာမခံချက်တွေကိုပေးစွမ်းပြီး နာမည်တစ်ခုကိုဆွတ်ခူးထားတဲ့ headphone တစ်ခုလည်းဖြစ်ပါတယ်။ ဈေးနှုန်းအနေနဲ့ကတော့ သာမန်ဂိမ်မာတွေအတွက် အနည်းငယ်မြင့်နိုင်ပေမယ့် ကိုယ်ဟာပရိုဂိမ်မာတစ်ယောက်၊ နာမည်ရ Esport အသင်းသားတစ်ယောက်၊ ဂိမ်းအဖွဲ့အစည်းထဲမှာလှုပ်ရှားမှုပြုလုပ်သူတစ်ယောက်ဆိုရင်တော့ ကိုယ့်ရဲ့ဂုဏ်ပုဒ်နဲ့ကိုက်ညီအောင် အသုံးပြုသင့်တဲ့ headphone ကောင်းတစ်ခုပါပဲ။ Asus ROG Strix Fusion 500 ကိုဝယ်ယူလိုသူဂိမ်မာများအတွက်ဆိုရင်တော့ လက်ရှိမှာပေါင်  £150 ကျပ်နဲ့ မှာယူနိုင်ပါတယ်။

SteelSeries Artic 7

ဂိမ်မာတွေရဲ့လက်စွဲ ဂိမ်းအသုံးအဆောင်ပစ္စည်းတွေထဲမှာ SteelSeries ကိုလည်း လုံးဝမေ့ထားလို့မရပါဘူး။ လက်ရှိမှာ ကျွန်တော်ကိုယ်တိုင်လည်းအသုံးပြုနေတဲ့ SteelSeries အမှတ်တံဆိပ် ဂိမ်းအသုံးအဆောင်ပစ္စည်းတွေဟာ အရည်အသွေးပြည့်ဝပြီး အသုံးပြုသူဂိမ်မာတွေကို ထိုက်တန်တဲ့စိတ်ကျေနပ်မှုတွေ ပေးစွမ်းနေပါတယ်။ SteelSeries Artic 7 ဟာ SteelSeries Artic စီးရီးရဲ့နောက်ဆုံးထွက်မော်ဒယ်ဖြစ်ပါတယ်။ Siberia 150 ကနေ အခု Artic 7 အထိ ကွဲပြားခြားနားတဲ့မော်ဒယ်တွေနဲ့ SteelSeries အမှတ်တံဆိပ် headphone တွေမှာ ဝတ်ဆင်ချိန်ကြာလည်း သက်တောင့်သက်သာရှိမှု၊ Headphone အကျဉ်းအကျယ်ကိုလိုသလိုချိန်ညှိနိုင်မှု၊ အကောင်းဆုံးအသံထွက်စနစ်ကိုပေးစွမ်းထားမှု၊ ဈေးနှုန်းအစားစားနဲ့ ကိုယ့်အကြိုက်နဲ့ကိုက်ညှိ စိတ်ကြိုက်ဝယ်ယူရွေးချယ်နိုင်မှု အစရှိတဲ့ရွေးချယ်မှုအမျိုးမျိုးပေးပြီး တစ်ချက်ကြည့်လိုက်တာနဲ့ ကွာလတီထုတ်ကုန်ဆိုတာ သိနိုင်ပါတယ်။ ဒါတင်မကဘဲ RGB illumination လို့ခေါ်တဲ့ headphone ကို အရောင်သုံးရောင်ပြောင်းနိုင်တဲ့စနစ်၊ Virtual Surround Sound ဆိုတဲ့လက်တွေ့ပတ်ဝန်းကျင်အသံစနစ်တွေကိုလည်း ထည့်သွင်းပေးထားပါသေးတယ်။ SteelSeries Artic 7 အပါအဝင် SteelSeries အမှတ်တံဆိပ်ဂိမ်းအသုံးအဆောင်တွေကို ပြည်တွင်းမှာတင် လက်လီလက်ကားဝယ်ယူနိုင်ပြီး လက်ရှိအနေနဲ့ပေါင် £150 နဲ့ မှာယူနိုင်ပါတယ်။

Astro A40TR Headset

အသံဆိုရင်ကွာလတီအကောင်းစားမှ လိုချင်တယ်ဆိုတဲ့သူတွေအတွက် Astro A40TR headset ကို ညွှန်းချင်ပါတယ်။ ဒီဇိုင်းသွင်ပြင်ကတော့ လူတိုင်းအကြိုက်မဟုတ်ပေမယ့် အခိုင်အမာပြုလုပ်တပ်ဆင်ထားတာမို့ အကြမ်းခံပါ့မလားလို့ စိတ်ပူနေစရာမလိုတော့ပါဘူး။ ဒါ့အပြင် အသံကို ပိုပြီးပွင့်ပွင့်လင်းလင်း ကြားချင်တယ်ဆိုရင် earcup ဘေးကနားအုပ်အပိုင်းတွေကို လိုသလို အဖြုတ်အတပ်လုပ်နိုင်ပါသေးတယ်။

7.1 surround sound ရဖို့အတွက်တော့ MixAmp Pro ဆိုတဲ့ဆော့ဝဲကိုထည့်သွင်းပေးဖို့ လိုအပ်ပါလိမ့်မယ်။ ဒါပေမဲ့လည်း အဲဒါကိုသုံးသုံးမသုံးသုံး Astro ရဲ့အသံကွာလတီကတော့ စိတ်ချရသလို ပေးရတဲ့ဈေးကလည်း တန်ပါတယ်။ အသံအရည်အသွေးကိုထိန်းထားချင်တဲ့ gaming headset ကိုလိုချင်ရင်တော့ ဒါကိုရွေးချယ်သင့်တာအမှန်ပါ။ Astro A40 TR ရဲ့ကိုလက်ရှိဈေးနှုန်းကပေါင် £149.99 ဖြစ်ပါတယ်။

Logitech G433

ဘယ်နေရာမှာမဆို အများနဲ့မတူဘဲ ထိုးထွက်နေတတ်တဲ့အရာ ရှိစမြဲပါ။ ဒီတစ်ခါ Headset အုပ်စုမှာ အဲဒီလိုသူမတူဘဲ တမူထူးနေတာကတော့ Logitech G433 ပါပဲ။ Headset တစ်ခုတပ်ဆင်ရာမှာ အမြဲသုံးနေကျပစ္စည်းတွေထက် G433 ကတော့ အများနဲ့မတူအောင် အရောင်တောက်တောက်ပိတ်သားကို အသုံးပြုထားပါတယ်။ မျက်စိပသာဒတော့ရှိပေမယ့် လက်နဲ့ကိုင်ကြည့်တဲ့အခါမှာ ပိတ်သားအောက်ကဖရိန်တွေက သိပ်အကောင်းကြီးလို့မခံစားရတာ သူ့အားနည်းချက်ပါပဲ။ အသံကွာလတီကတော့ ဘယ်ဂိမ်းအမျိုးအစားမဆိုမှာ အသံထွက်ကောင်းနေတာကြောင့် ရှိသင့်ရှိထိုက်တာထက် ပိုကောင်းတယ်လို့ပြောနိုင်ပါတယ်။ ဖြုတ်တပ်နိုင်တဲ့မိုက်ခရိုဖုန်းကလည်း အသံကိုရှင်းလင်းကြည်လင်ပြတ်သားစေပြီး မိုက်ကွဲသံ၊ မိုက်ပေါက်သံ၊ လေကွဲသံတွေကို စစ်ထုတ်ပေးတဲ့ အသုံးတည့်  filter ပါဝင်တဲ့အတွက် ဒီလိုဈေးနှုန်းထဲမှာဆိုရင် အကောင်းဆုံးတွေထဲကတစ်ခုလို့ပြောရပါမယ်။ ဒီ Headset က မြင်တွေ့နေကျပုံစံမဟုတ်ပေမယ့်လို့ ကွဲပြားတဲ့အရသာကို ခံစားလိုသူတွေအတွက်တော့ စိတ်ကျေနပ်စေမှာ အသေအချာပါ။ Logitech G433 ကိုတော့လက်ရှိမှာပေါင်  £109.99 နဲ့ မှာယူနိုင်ပါတယ်။

Sennheiser GSP 300 

Sennheiser အမှတ်တံဆိပ် အသံပိုင်းဆိုင်ရာအသုံးအဆောင်ပစ္စည်းတွေကို အားလုံးတစ်ကွေ့မဟုတ် တစ်ကွေ့တော့ကြုံဖူးကြမှာပါ။ ဂိမ်းလောကမှာတင်မက ဂီတလောကနယ်ပယ်၊ ဖျော်ဖြေရေးပွဲတွေနဲ့ ပျော်ပွဲရွှင်ပွဲတွေရဲ့ အသံစနစ်တွေမှာပါ အသုံးပြုတတ်ကြတဲ့ Sennheiser အမှတ်တံဆိပ် အသံပိုင်းဆိုင်ရာအသုံးအဆောင်တွေဟာ ပရိုအသံပညာရှင်များ အားထားရာအရည်အသွေးပြည့်အမှတ်တံဆိပ်တစ်ခုပါပဲ။ Surround Sound စနစ်ကိုထုတ်ပေးနိုင်တိုင်း အကောင်းဆုံး headphone တစ်ခုဖြစ်မလာပါဘူး၊ အဲဒါကြောင့်ပဲ အခုဒီနေရာမှာ Sennheiser GSP 300 ကိုထည့်သွင်းထားတာဖြစ်ပါတယ်။ ဘာလို့လည်းဆိုတော့ ဒီ headphone ဟာ ဂိမ်းကစားခြင်းတင်မှာသာမက ဂီတပိုင်းဆိုင်ရာနဲ့ပတ်သက်ပြီး အသုံးပြုမယ်ဆိုရင်လည်း သူမတူတဲ့အရည်အသွေးကိုပေးစွမ်းနေလို့ဖြစ်ပါတယ်။ တချို့  gaming headphone များဟာ ဂိမ်းကစားမှုကိုပဲအသားပေးထားတဲ့ အသံစနစ်တွေကိုထည့်သွင်းထားကြလို့ သီချင်းတွေပြောင်းနားထောင်လိုက်ရင် ကိုယ့်အကြားအာရုံနဲ့မကိုက်ညီတာမျိုးဖြစ်တတ်ပါတယ်။ ဒါပေမယ့် ဒီ Sennheiser GSP 300 ကတော့ တစ်ချက်ခုတ်နှစ်ချက်ပြတ်သဘောကိုဆောင်တဲ့ headphone တစ်ခုဖြစ်ပါတယ်။ Sennheiser GSP 300 ကိုဝယ်ယူချင်သူများအတွက်တော့ လက်ရှိမှာ ပေါင် £89.99 နဲ့မှာယူနိုင်ပါတယ်။

Razor Kraken Pro V2

ဂိမ်းတွေနဲ့ သူတို့ရဲ့နောက်ကလိုက်ရမယ့် လိုအပ်တဲ့အသုံးအဆောင်ပစ္စည်းတွေကိုကြည့်လိုက်ရင် ဂိမ်မာတွေအသုံးပြုမှုအများဆုံးအမှတ်တံဆိပ်နေရာမှာ Razor တံဆိပ်က ထိပ်ဆုံးတက်ဆွတ်ခူးထားမှာအမှန်ပါပဲ။ ဒီ Kraken Pro V2 ဟာ ကြည့်လိုက်တိုင်းမှာစတိုင်ကျနေတယ်၊ လုပ်ပုံလုပ်နည်းသေသပ်တယ်၊ တန်ဖိုးမြင့်မားတယ်လို့ထင်မှတ်ရတယ်၊ အသံစနစ်ကလည်းပြောစရာလုံးဝမရှိအောင်ကောင်းတယ် အစရှိတဲ့ လူတွေကိုဆွဲဆောင်ထားနိုင်တဲ့အချက်တွေကြောင့် Razor အမှတ်တံဆိပ်ထုတ်ကုန်ပစ္စည်းတွေဟာ ဂိမ်းလောကတစ်ခုထဲမှာ မားမားမတ်မတ်ရပ်တည်နိုင်တာဖြစ်ပါတယ်။ Surround Sound ကိုခံစားချင်ရင် Kraken V2 ကိုဝင်ရောက်လေ့လာကြည့်ရှုနိုင်သေးတယ်။ ကမ္ဘာနံပါတ်တစ်ထိပ်တန်း YouTuber ဖြစ်တဲ့ Pewdiepie တောင် အခုလက်ရှိမှာအသုံးပြုနေရတဲ့ Headphone ဟာ Razor Kraken Pro V2 headphone ဖြစ်တယ်ဆိုတာကိုသိရင် အားလုံးအံ့သြရမှာပါ၊ ဒါပေမယ့် သူ့ဟာကတော့ သီးသန့်ပြုလုပ်ထားတဲ့ Pewdiepie Headset Kraken Pro V2 မော်ဒယ်ဖြစ်ပါတယ်။ ဒီ headphone ဟာပေးရတဲ့ဈေးနဲ့မကိုက်အောင်ပဲ ထည့်သွင်းထားတဲ့စနစ်တွေကကောင်းမွန်နေတယ်လို့ ဆိုရမလိုဖြစ်နေပါတယ်။ Razor Kraken Pro V2 ကိုဝယ်ယူလိုသူများကတော့ လက်ရှိမှာပေါင် £79.99 နဲ့ မှာယူနိုင်ပြီး Pewds မော်ဒယ်ကိုရယူလိုသူများကတော့ ဒေါ်လာ 99.99 ကျပ်နဲ့ မှာယူနိုင်ကြောင်းပြောရင်း ဂိမ်မာအားလုံးအတွက်လိုအပ်ချက်ကိုဖြည့်ဆည်းမယ့် headphone အကြောင်းတွေကို ဒီကနေမိတ်ဆက်ပေးလိုက်ပါတယ်။ ဒီတော့ အားလုံးကိုယ့်အကြိုက်နဲ့ ကိုယ်ရွေးလို့ရပြီနော်။

Yan
Ref: trustedreviews