တိတ်တဆိတ် ပျောက်ကွယ်သွားရတော့မယ့် Resident Evil 4 ထဲက ရွာငယ်လေးရဲ့ ရင်နင့်ကြေကွဲဖို့ကောင်းတဲ့သမိုင်းကြောင်း 🏚🥀

Resident Evil ဂိမ်းစီးရီးဟာ ဇီဝလက်နက်ဗိုင်းရပ်စ်တွေ၊ သန္ဓေပြောင်းသတ္တဝါတွေ၊ သွေးသံတရဲရဲဇွန်ဘီတွေကို အမြစ်ဖြတ်သွန်သင်ရတဲ့ဂိမ်းဆိုပေမယ့် သူ့ဟာနဲ့သူ ထွက်ခဲ့သမျှဂိမ်းအသီးသီးမှာ စိတ်ဝင်စားဖို့ကောင်းတဲ့ဖြစ်ရပ်တွေနဲ့ နောက်ခံဇာတ်ကြောင်းတွေရှိကြပါတယ်။ ဇာတ်ကြောင်းအရ အရေးပါတဲ့ဖြစ်ရပ်တွေကို စီးရီးချစ်ပရိသတ်တွေ အတော်အတန်သိကြပေမယ့် အခုအချိန်ထိ လူတွေမသိလိုက်ရပဲ တဖြည်းဖြည်းမှုန်ဝါးပျောက်ကွယ်သွားရတော့မယ့် ဖြစ်ရပ်ပေါင်းများစွာလည်း ရှိပါတယ်။ အဲဒီထဲမှာမှ စိတ်ထိခိုက်ဖို့ကောင်းတာတွေ၊ ရက်စက်ကြမ်းကြုတ်မှုတွေ၊ လူမဆန်ယုတ်မာမှုတွေ၊ ကြေကွဲဝမ်းနည်းရမှုတွေနဲ့ ပြည့်နှက်နေတဲ့ အေးစက်ခြောက်ခြားဖွယ်အဖြစ်အပျက်တွေလည်း အများကြီးပါပဲ။ ဒါကြောင့်မို့ပဲ RE ပရိသတ်တွေအားလုံးရဲ့ အသည်းစွဲ Resident Evil 4 ဂိမ်းထဲက လုံးဝကိုရင်နင့်စရာကောင်းတဲ့ ဖြစ်ရပ်သမိုင်းကြောင်းတစ်ခုကို အားလုံးသိစေဖို့ ဒီတစ်ခေါက်မှာ တင်ဆက်ပေးချင်ပါတယ်။ နောက်ပိုင်း Resident Evil ဂိမ်းတွေမှာ အက်ရှင်ကဏ္ဍတွေ အတော်များများပါဝင်လာလို့ ပရိသတ်တွေက ခြောက်ခြားမှုနဲ့ ဇာတ်ကြောင်းဇာတ်အိမ်တည်ဆောက်မှုအပိုင်းကို အထွေအထူးမလေ့လာဖြစ်ကြတာပါ၊ တကယ်တမ်းမှာ သေချာအနက်ထိသွားမယ်ကြည့်တဲ့အခါ RE စီးရီးထဲက တစ်ချို့သောဖြစ်ရပ်တွေဟာ မော်ဒန်ဂိမ်းလောကသမိုင်းရဲ့ သနားစရာအကောင်းဆုံး၊ စိတ်အနာရဆုံး၊ ရင်ကွဲဖို့အကောင်းဆုံးဖြစ်ရပ်တွေလို့တောင် သတ်မှတ်ထိုက်ပါတယ်။ ဆောင်းပါးမစတင်မှီ ကြိုတင်အသိပေးချင်တာတစ်ခုက ဒီဆောင်းပါးကိုဖတ်ပြီးသွားတဲ့အခါကျရင် Resident Evil 4 မှာပါဝင်တဲ့အချို့သောကဏ္ဍတွေကို စာဖတ်သူတွေက လုံးဝကိုပြောင်းလဲသွားတဲ့ရှုထောင့်ကနေ မြင်သွားပါလိမ့်မယ် 🌱🌳

ဆိုတော့ကာ အဆင်သင့်ဖြစ်ပြီဆို စလိုက်ကြရစို့ဗျာ။ အောက်ကပုံတွေကို ဆက်သွားပြီး ဖတ်ရှုနိုင်ပါတယ် ⬇️⬇️



Resident Evil 4 ကို ဆော့ကစားခဲ့ဖူးသူမှန်သမျှ ဇာတ်လမ်းအစမပျိုးခင်မှာတင် ကြုံရတဲ့ရွာလေးတစ်ရွာကို မှတ်မိကြဦးမယ်ထင်ပါတယ်။ အဲဒီရွာဟာ ဂိမ်းကိုစစချင်း မိနစ်အနည်းငယ်အကြာမှာပဲ ကိုယ်ရောက်သွားတဲ့နေရာတစ်ခုဖြစ်ပြီး ပါးနပ်မှုမရှိရင်လွန်စွာမှ အခက်တွေ့ရတဲ့နေရာတွေထဲက တစ်ခုလည်းဖြစ်ပါတယ်။ ကနဦးအစတည်းက ကိုယ့်ကိုရစရာမရှိအောင် ဦးချိုးခဲ့တဲ့နေရာမို့ ဂိမ်းကိုတစ်ခေါက်အောင်ပြီး နောက်တစ်ခေါက်ပြန်အဆော့မှာ လက်နက်အပြည့်အစုံနဲ့ တစ်ရွာလုံးကို ဝင်သမဦးမယ်လို့ အငြိုးအတေးထားရတဲ့ထိကို ကိုယ့်ကိုဒုက္ခပေးတဲ့နေရာလို့ ဆိုရင်လည်း မမှားပါဘူး။ ဒါပေမယ့် အဲဒီလို အရမ်းအစိုင်းဆန်ပြီး ကြမ်းကြုတ်လှတဲ့သူတွေဟာ တစ်ခါတုန်းက လူသားဆန်မှုအပြည့်နဲ့ တစ်ယောက်ကိုတစ်ယောက်ရိုင်းပင်းကူညီပြီး မိသားစုတွေစည်းစည်းလုံးလုံးနေတတ်ကြတဲ့ ဖြူစင်တဲ့ရွာသူရွာသားတွေဖြစ်တယ်လို့ ပြောရင် စာဖတ်သူအနေနဲ့ ယုံနိုင်ပါ့မလား? ဗိုင်းရပ်စ်ကူးခံရတဲ့ ဇွန်ဘီတွေလိုလည်းမဟုတ်၊ သန္ဓေပြောင်းသတ္တဝါတွေလည်း မဟုတ်တဲ့ လူအသွင်နဲ့ ရွာသားတွေဟာ ကိုယ့်ကိုတွေ့လိုက်ပြီဆိုတာနဲ့ ဘာကြောင့်အမြဲတမ်းရန်လိုပြီး သတ်ဖြတ်ဖို့ပြုမူရတာပါလဲ? အဲဒါကိုသိရှိဖို့ဆိုရင်တော့ စပိန်နိုင်ငံအစွန်အဖျားက တောင်တန်းတွေထူထောင်တဲ့နယ်မြေတစ်ဝိုက်မှာ တည်ထောင်ထားတဲ့ လူသူတွေနဲ့ကင်းဝေးရာအရပ်က ရွာလေးတစ်ရွာရဲ့အကြောင်းကို ပြောပြမှရပါလိမ့်မယ် 📖



ဘယ်အချိန်ကတည်းက အဲဒီနေရာမှာ လူသားတွေစုဖွဲ့နေထိုင်ပြီး ရွာလေးတစ်ရွာအဖြစ် ထူထောင်ခဲ့သလဲဆိုတဲ့ တိကျတဲ့အချက်အလက်မရှိပေမယ့် အဲဒီရွာလေးရဲ့ပထမဦးဆုံးမှတ်တမ်းဝင်သမိုင်းအရ မော်ဒန်ခေတ်အစောပိုင်းဖြစ်တဲ့ ၁၆ ရာစုနှစ်ကနေ ၁၈ ရာစုတစ်ဝိုက်မှာ ရွာလေးအဖြစ်ရှိနေပြီလို့ သိရပါတယ်။ ရာစုနှစ်အတော်ကြာဖြစ်တည်ခဲ့ပေမယ့် အဲဒီရွာမှာ အခုအချိန်ထိနာမည်အတိအကျမရှိပဲ "The Village" ဆိုပြီးတော့သာ လူတွေသိကြပါတယ်။ ဟိုးလွန်ခဲ့တဲ့ ၁၈ ရာစုကေနေ အစောပိုင်း ၁၉ ရာစုခေတ်ကာလက အဲဒီရွလေးဟာ Los Illuminados ဆိုတဲ့ အစွန်းရောက်ဘာသာရေးဂိုဏ်း တည်ထောင်ပြန့်ပွားရာအရပ်ဖြစ်ခဲ့ပြီး အဲဒီဘာသာရေးဂိုဏ်းဝင်များဟာ Las Plagas ဆိုတဲ့ ကပ်ပါးကောင်တစ်မျိုးကို အထွတ်အမြတ်ထား ကူးကွယ်ဆည်းကပ်ကြပါတယ်။ အဲဒီကာလတုန်းက ကျွန်တော်တို့ မြန်မာနိုင်ငံ၊ ပုဂံခေတ်က အရည်းကြီးအယူဝါဒလို Los Illuminados ဘာသာရေးဂိုဏ်းဝင်တွေဟာ အဲဒီရွာလေးကိုလွှမ်းမိုးထားတဲ့ အာဏာရှိအနေအထားမှာ ရှိခဲ့ပါတယ်။ ဒါပေမယ့် တော်ဝင်မျိုးနွယ် Salazar အုပ်ချူပ်တဲ့ခေတ်မှာတော့ ရဲရင့်တဲ့ Salazar ဟာ သူ့ရဲ့ကြီးမြတ်တဲ့စစ်တပ်နဲ့ သူအုပ်စိုးရာနယ်တစ်ဝိုက်မှာသောင်းကျန်းနေတဲ့ Los Illuminados ဂိုဏ်းကို ကက်သလစ်ကရူးဆိုက်ဘာသာရေးစစ်ပွဲ အပြင်းအထန်ဆင်နွှဲပြီး မျိုးဖြုတ်ခဲ့ပါတယ် ⚔️🛡



Salazar ဟာ Los Illuminados ဂိုဏ်းသားတွေကို တစ်ယောက်မကျန် အပြတ်အသတ်နှိမ်နင်းခဲ့ပြီး သူတို့ကိုးကွယ်တဲ့ Las Plagas ကပ်ပါးကောင်ကို ရွာနဲ့ မလှမ်းမကမ်းမှာ တည်ဆောက်ထားတဲ့ရဲတိုက်ရဲ့ မြေတိုက်ခန်းမှာ တစ်သက်လုံးပိတ်လှောင်ထားလိုက်ပါတယ်။ Salazar ကိုယ်တိုင်ဟာလည်း Las Plagas ကပ်ပါးကောင်ကို စောင့်ကြပ်တဲ့အနေနဲ့ အဲဒီရဲတိုက်မှာစံစားပြီး နယ်မြေနဲ့ပတ်သက်တဲ့ အချင်းအရာတွေကို ရဲတိုက်ကနေပဲ တာဝန်ပေးဆောင်ရွက်စေပါတယ်။ အုပ်ချူပ်ရေးကိစ္စအဝဝကိုတော့ တော်ဝင်မျိုးနွယ်ဖြစ်တဲ့ Salazar ဆောင်ရွက်တာမှန်ပေမယ့် ရပ်ရေးရွာရေးအဝဝကိုတော့ နှစ်အစဉ်အဆက်အလိုက်ထားရှိတဲ့ ရွာသူကြီးကနေပဲ လုပ်ဆောင်လေ့ရှိပါတယ်။ Salazar ရဲ့လက်ထက်ကစပြီး အဲဒီရွာလေးမှာ ပူပင်စရာမရှိအောင် အေးချမ်းသာယာခဲ့ပြီး အပြစ်ကင်းဖြူစင်တဲ့ရွာသူရွာသားတွေဟာ လယ်လုပ်ထွန်ယက်၊ မိုင်းတွင်းတူးရင်း၊ အိမ်မွေးတိရစ္ဆာန်လေးမွေးရင်း ကိုယ့်သားသမီးမိသားစုနဲ့အတူ မျိုးဆက်အလိုက် အေးချမ်းစွာနေထိုင်ခဲ့ကြပါတယ်။ အဲဒီခေတ်ကစပြီး Los Illuminados ဂိုဏ်းနဲ့ Las Plagas ကို ချေမှုန်းနိုင်ခဲ့တဲ့ လက်ရုံးရည်ပြည့်ဝသူ တာ်ဝင်မျိုးနွယ် Salazar ကို နယ်မြေတစ်ဝိုက်နဲ့တစ်ရွာလုံးကသူတွေဟာ ထင်ရှားကျော်ကြားတဲ့သမိုင်းပြယုဂ်အဖြစ် ၂၁ ရာစုအထိ လေးစားကြည်ညိုကြဆဲဖြစ်ပါတယ် 💐



အဲဒီလိုနဲ့အချိန်တွေဟာ တဖြည်းဖြည်းကုန်လွန်ခဲ့ပြီး တော်ဝင် Salazar ရဲ့မျိုးဆက်တွေဟာ သူ့အရိုက်အရာကို တစ်ယောက်ပြီးတစ်ယောက် ဆက်ခံခဲ့ကြတာ အဌမမြောက် (ရှစ်ဆက်မြောက်) ဖြစ်တဲ့ Ramon Salazar ခေတ်ကို ရောက်ရှိလို့လာခဲ့ပါပြီ (မြင်အောင်ပြောရရင် Ramon Salazar ဆိုတာ RE4 မှာ Leon ရင်ဆိုင်ရတဲ့ ခရမ်းရောင်တော်ဝင်ဝတ်စုံနဲ့ ဂျပုပါ) ခေတ်ကာလဟာ ၂၁ ရာစုဖြစ်သော်ငြားလည်း လူသူတွေနဲ့ကင်းကွာတဲ့အရပ်မှာ ကိုယ့်ဖြစ်တည်မှုနဲ့ကိုယ်အေးချမ်းစွာနေတဲ့ အဲဒီရွာလေးကတော့ ကမ္ဘာတစ်ဝှမ်းနဲ့အဆက်ဖြတ်ပြီး ပြင်ပစွက်ဖက်မှုကင်းစွာ နှစ်ရာနဲ့ချီ နေထိုင်ခဲ့ကြတပါ။ ဒါပေမယ့်လည်း ကြည်နူးဖွယ်ကောင်းတဲ့အဖြစ်အပျက်တွေဟာ ဘယ်သောအခါမှဇာတ်သိမ်းမဟုတ်တဲ့အတွက် ဖခင်ကြီး Salazar တည်ဆောက်ထိန်းသိမ်းထားခဲ့သမျှဟာ Ramon Salazar ရဲ့လက်ထက်မှာ ပြိုကျပျက်စီးဖို့ဖြစ်လာခဲ့ပါတယ်။ ၂၁ ရာစုအဝင်ကာလတစ်ဝိုက်မှာ Ramon ဟာ Neopagan ဆိုတဲ့ဘာသာရေးကို ပြောင်းလဲကူးကွယ်ခဲ့ပြီး Los Illuminados ဂိုဏ်းရှိစဉ်က ဘာသာရေးအစီအရင်တွေနဲ့ နာမည်ကို အသုံးပြုခဲ့ပါတယ် ⚰️👹



အဲဒီ Neopagan ဘာသာရေးဂိုဏ်းမှာ ခေါင်းဆောင်ပရောဖက်အဖြစ် Ramon ကို ဘာသာရေးထုံးတမ်းအစဉ်အလာနဲ့ အကြံလမ်းပြနေသူကတော့ RE4 မှာ ကျွန်တော်တို့နောက်ဆုံးရင်ဆိုင်ရတဲ့ Osmund Saddler ဖြစ်ပါတယ်။ အားလုံးပဲ ဖတ်ရင်းဖတ်ရင်း အရင်ကမသိခဲ့တဲ့ RE4 ဇာတ်ကြောင်းကို တဖြည်းဖြည်းချိတ်ဆက်မိနေပြီလို့ ထင်ပါတယ်၊ ဆက်သွားပါမယ်။ Saddler ဟာ Neopagan ဂိုဏ်းမှာ ခေါင်းဆောင်ပရောဖက်လုပ်နေတယ်ဆိုတာ တကယ်တမ်းတော့ သူ့ရဲ့မဟာစီမံကိန်းကို အကောင်အထည်ဖော်ဖို့အတွက်ပါ၊ Saddler ဟာ အမည်ဖော်ပြခြင်းမရှိတဲ့ကွန်ယက်တစ်ခုကနေ Las Plagas ကပ်ပါးကောင်ရဲ့သမိုင်းကြောင်းနဲ့ အချက်အလက်ကို သိရှိခဲ့တဲ့အတွက် အဲဒီ Las Plagas ကပ်ပါးကောင်ကို လူထုအမြောက်အမြားဆီ ကူးစပ်စေရင်း ကမ္ဘာ့ဇီဝအကြမ်းဖက်နယ်ပယ်မှာ အာဏာယူဖို့ စီမံကိန်းချထားခဲ့တာဖြစ်ပါတယ်။ အဲဒီစီမံကိန်းကို အကောင်အထည်ဖော်ဖို့အတွက် Neopagan ဘာသာရေးဂိုဏ်းရဲ့ခေါင်းဆောင်အဖြစ် တော်ဝင်အရိုက်အရာဆက်ခံတဲ့ Ramon Salazar ကို ဘာသာရေးမှိုင်းတိုက်သိမ်းသွင်းခဲ့ပြီး Ramon ရဲ့ယုံကြည်သစ္စာရှိမှုကိုရခဲ့ပါတယ်။ Saddler ရဲ့သိမ်းသွင်းမှုက ဘာလဲဆိုတော့ ဟိုးအတိတ်ကကျူးလွန်ခဲ့တဲ့ တော်ဝင် Salazar မျိုးနွယ်ရဲ့အပြစ်တွေကို ဆေးကြောဖို့ တစ်ချိန်ကသုတ်သင်ခဲ့တဲ့ Las Plagas ပိတ်လှောင်ရာ မြေတိုက်ခန်းကို ဖွင့်ပေးရမယ် ဆိုတာပါပဲ 🦠🦠



Ramon ရဲ့ဆင်ခြင်တုံတရားနည်းပါးပြီး ဘာသာရေးအယူသည်းမှုကြောင့် တော်ဝင်မျိုးဆက်ပါအပါအဝင် တစ်ရွာလုံး ကြမ္မာငင်မှုစတင်ခဲ့ပါပြီ။ Ramon ရယ်၊ Saddler ရယ် RE4 မှာ ကျွန်တော်တို့ရင်ဆိုင်ရတဲ့ ကျောက်မျက်လုံးနဲ့ ရွာသူကြီး Bitores Mendez တို့သုံးယောက်ဟာ ရွာသားအချို့နဲ့အတူ တော်ဝင်မျိုးနွယ် Salazar ပိတ်လှောင်ထားတဲ့ ရဲတိုက်အောက်က မြေတိုက်ခန်းကို ပြန်လည်ဖြိုဖျက်ဖွင့်လှစ်ခဲ့ပါတယ်။ နှစ်ပေါင်းများစွာကြာပြီဖြစ်တာကြောင့် Las Plagas ဟာ အောက်စီဂျင်နည်းပါးတဲ့မြေတိုက်ခန်းထဲမှာ ခြောက်သွေ့ဆွေးမွေ့လို့နေပါပြီ။ သို့ပေမယ့် Las Plagas ရုပ်ကြွင်းရဲ့ လက်ကျန်အမှုန်အမွှားတွေဟာ လာရောက်တူးဖော်တဲ့ရွာသားတွေရဲ့ အသက်ရှုလမ်းကြောင်းကနေတဆင့် ဦးနှောက်နဲ့ ခန္ဓာကိုယ်ထဲဝင်ရောက်သွားပြီး ကပ်ပါးကောင်များအဖြစ် ကိုယ်ခန္ဓာအတွင်း တွယ်ညှိရှင်သန်ခဲ့ကြပါတယ်။ နှစ်အနည်းငယ်အကြာမှာတော့ Las Plagas ကပ်ပါးကောင်ရဲ့ထိန်းချူပ်မှုဟာ ဝင်ရောက်ခဲ့တဲ့ခန္ဓာကိုယ်အတွင်း ရင့်သန်သွားခဲ့ပြီး ကူးစက်ခံတဲ့ရွာသူရွာသားတွေဟာ ကြောက်ခမန်းလိလိ ရောဂါအထူးအဆန်းတွေ စတင်ဖြစ်ပွားလာခဲ့ပါပြီ။ အဲဒီလိုရွာသားတွေရောဂါဖြစ်ပွားချိန်မှာ Saddler ဟာ ရောဂါအပြင်းအထန်ခံစားနေတဲ့ ရွာသားတွေဆီက Las Plagas ဒီအန်အေကိုထုတ်ယူပြီး ဆင့်ပွားနိုင်ခဲ့ပါတယ်။ ဒါ့အပြင် Saddler ဟာ ရွာနဲ့သိပ်မလှမ်းတဲ့ ကျွန်းတစ်ကျွန်းမှာ ကြီးမားလှတဲ့ လေ့လာရှာဖွေရေးနဲ့ တိုက်ခိုက်စစ်ဆင်ရေးစခန်းကို တည်ဆောက်ခဲ့ပြီး Las Plagas ကို ထပ်မံမျိုးစပ်စမ်းသပ်ပြုပြင်တဲ့အခါမှာ အဆင့်ပိုတတ်လေ၊ ပယ်ဖျယ်ရခက်လေဖြစ်တဲ့ Las Plagas အမျိုးအစားသုံးမျိုး ရရှိခဲ့ပါတယ်။ ရွာအပြင်ဘက်မှာ ဒီလိုကိစ္စတွေရှိနေပေမယ့် ပြင်ပဗဟုသုတနည်းပါးပြီး ဒီအရပ်မှာပဲ မျိုးဆက်အလိုက် တစ်သက်တာလုံးနေခဲ့တဲ့ ရွာသူရွာသားတွေဟာ အခုလိုဆိုးသွမ်းလှတဲ့အဖြစ်အပျက်မျိုး တစ်ခါမှမကြုံဖူးတာကြောင့် သွေးပျက်ထိတ်လန့်နေခဲ့ကြပါတယ် 🛌🚪



အဲဒီလိုအခြေအနေမှာ Saddler ရဲ့ညွှန်ကြားမှုအရ ရွာသူကြီး Bitores Mendez ဟာ တစ်ရွာလုံးကသူတွေ ဒီရောဂါမကူးရအောင် ကာကွယ်ဆေးထိုးပေးမယ်လို့ လှည့်ဖြားခဲ့ပြီး ရွာသားတစ်ယောက်ချင်းကို Las Plagas ကပ်ပါးကောင်တွေ အလှည့်ကျ ထိုးသွင်းခဲ့ပါတယ်။ အဲဒီနောက်မှာတော့ နှစ်ပေါင်းလေးရာနီးပါး အေးချမ်းတိတ်ဆိတ်စွာ နေထိုင်လာခဲ့တဲ့ အဲဒီရွာလေးဟာ အသက်ဝိညာဉ်မဲ့တဲ့ Las Plagas ကပ်ပါးကောင်ထိန်းချူပ်ရာအရုပ်တွေ ဖြစ်သွားကြပါပြီ။ ရွာအတွင်းက ကလေးငယ်လေးများဟာလည်း Las Plagas ထိုးသွင်းခဲ့ခံရပေမယ့် မဖွံဖြိုးသေးတဲ့ခန္ဓာကိုယ်နဲ့ မကိုက်ညီတဲ့ ဇီဝဓါတ်ပြုမှုများကြောင့် အတောမသတ်တဲ့ ဒုက္ခဝေဒနာများစွာခံစားရရင်း ရုပ်ပျက်ဆင်းပျက်ကို သေဆုံးခဲ့ရပါတယ်။ အဲဒီကလေးတွေ သေဆုံးချိန်မှာလည်း သူတို့ရဲ့မိဘများဟာ Las Plagas ကပ်ပါးကောင်များရဲ့ ဝါးမြိုမှုအောက်မှာ ခံစားချက်တစ်စိုးတစမှမရှိ ထုံထိုင်းပြီး သူတို့ကလေးများရဲ့အလောင်းကို ရပ်ကြည့်နေခဲ့ကြပါတယ်။ ဒါဟာ Resident Evil စီးရီးထဲက အဖြစ်အပျက်တွေထဲမှာမှ Baker Family တို့လို စိတ်ထိခိုက်ဖို့ကောင်းလှတဲ့ ရင်ကွဲစရာဖြစ်ရပ်ဖြစ်ပါတယ်။ ခေတ်မမှီပေမယ့် လူသားဆန်စွာ ပြုမူနေထိုင်ခဲ့ကြပြီး ဘယ်အရာမှာမဆို ရောင့်ရဲတင်းတိမ်ကြတဲ့ ရွာသူရွာသားများရဲ့ အဆုံးသတ်နိဂုံကတော့ ဒါပါပဲ။ တစ်ရွာလုံးကို Las Plagas ထိုးသွင်းအပြီးမှာ Saddler ဟာ သူ့ရဲ့စီမံကိန်းအတွက် နောက်တစ်ဆင့်တတ်ဖို့ အမေရိကန်သမ္မတရဲ့သမီးဖြစ်သူက ပြန်ပေးဆွဲရာကနေတဆင့် ကျွန်တော်တို့အားလုံးတွေ့ကြုံခံစားခဲ့ရတဲ့ Resident Evil 4 ဂိမ်းဇာတ်လမ်းကို ရောက်ရှိလာတာဖြစ်ပါတယ် 💉🧬

ကဲ ဒီလောက်ဆိုရင် အားလုံးလည်း Resident Evil 4 အပေါ်မှာထားရှိတဲ့အမြင်တစ်ချို့ ပြောင်းလဲသွားလိမ့်မယ်ထင်ပါတယ်။ ကိုယ်စိတ်ရှိလက်ရှိ သတ်နေခဲ့တဲ့ ရွာသူရွာသားတွေဟာ တကယ်တော့ တစ်ချိန်ကကိုယ့်လူပဲ တစ်သွေးတည်းတစ်သားတည်းဖြစ်တည်တဲ့ အေးချမ်းသူလူသားတွေဖြစ်ပါတယ်။ အားလုံးပဲ ဖတ်ရှုရင်းနဲ့ ဒီအထိတောင်ရောက်ရှိလာသူများကို ကျေးဇူးအထူးတင်ပါကြောင်း ပြောကြားလိုပါတယ်။ ဒီ RE4 ကရွာလေးအကြောင်းဆောင်းပါးနဲ့ ပတ်သက်ပြီး ဘယ်လိုခံစားမိလဲ? ကိုယ်မျှဝေချင်တာတွေကို အောက်မှာ ပြန်သွားခဲ့ပါဦး။ အခုလိုစိတ်ဝင်စားစရာဂိမ်းအကြောင်းအရာတွေနဲ့အတူ နောက်လာမယ့်ဆောင်းပါးတွေမှာ ပြန်ဆုံကြမယ်လို့ ပြောရင်း နှုတ်ဆက်လိုက်ပါတယ်။ အားလုံးပဲ မင်္ဂလာရှိတဲ့နေ့လေးတစ်နေ့ဖြစ်ပါစေ 🤓🌤

Yan