ကမ္ဘာနဲ့တစ်ဝှမ်းကြိတ်ကြိတ်တိုးအားပေးသူတွေရှိပေမယ့် X Box ဟာ ဘာကြောင့် ဂျပန်မှာ မအောင်မြင်ခဲ့သလဲ? 🙅‍♂️

စာဖတ်သူဂိမ်းပရိသတ်များ အားလုံးပဲ မင်္ဂလာပါ။ ဒီတစ်ခေါက်မှာတော့ ကျွန်တော်တို့ကြိုက်ရတဲ့ စိတ်ဝင်စားစရာ ဂိမ်းဇာတ်ကြောင်းဇာတ်အိမ်၊ အထင်ကရဖြစ်ရပ်တွေကနေ ခေတ္တသွေဖယ်ပြီး ဂိမ်းလောကဈေးကွက်နဲ့ ဗီဒီယိုဂိမ်းစက်တွေဆီကို ခဏလောက်အလည်သွားဖို့ ရည်ရွယ်ထားပါတယ်။ ဒါဟာ ပုံမှန်တင်ဆက်ပေးနေကြဖြစ်တဲ့ ဂိမ်းဆောင်းပါးများနည်းတူ စိတ်ဝင်စားဖို့ကောင်းတဲ့အကြောင်းအရာလည်းဖြစ်သလို လေ့လာမယ်ဆိုရင် ဂိမ်းလောကဈေးကွက်ရဲ့ သဘောသဘာဝကိုပါ သိရှိရမှာမို့ တင်ဆက်ပေးသင့်တယ်ဆိုတဲ့အတွေးနဲ့ ဒီဆောင်းပါးကို ရေးသားရခြင်းဖြစ်ပါတယ်။ အားလုံးလည်းခေါင်းစဉ်ကိုဖတ်ပြီးသွားလောက်ပြီဖြစ်တာကြောင့် အထွေအထူးနှုတ်ခွန်းဆက်မနေတော့ပဲ အဆင်သင့်ဖြစ်ပြီဆိုဆက်သွားကြပါမယ်။ ဂိမ်းတွေကို စွဲမြဲနှစ်သက်ကြတဲ့ဂိမ်းချစ်သူတွေသာမက ဂိမ်းခလုတ်ဆိုတာ ဘယ်လိုမျိုးလဲမေးနေရသူတွေအထိ X Box လို့ဆိုလိုက်ရင် လူတိုင်းသိကြပါတယ်။ ကမ္ဘာ့အချမ်းသားဆုံးပုဂ္ဂိုလ်တစ်ဦးဖြစ်ခဲ့တဲ့ အမေရိကန်စွန့်ဦးတီထွင်နည်းပညာရှင် ဘီလီယျံနာ Bill Gates ကိုယ်တိုင် အားသွန်ခိုက်စွန်တည်ဆောက်ထားခဲ့တဲ့ ဗီဒီယိုဂိမ်းစက် အမှတ်တံဆိပ်ဖြစ်တာကြောင့် X Box ဂိမ်းစက်ဟာ တစ်ကမ္ဘာလုံးကအသိအမှတ်ပြုခြင်းကို ခံထားရတဲ့ စွမ်းအားမြင့်ဗီဒီယိုဂိမ်းစက်လည်းဖြစ်ပြန်ပါတယ်။ ယမန်နှစ် ၂၀၁၉ နှစ်ရဲ့ထုတ်ပြန်ချက်အရ X Box ဟာ စတင်ထွက်ရှိချိန် ၂၀၀၁ ခုနှစ်ကနေ ၂၀၁၉ ခုနှစ်အထိ ဂိမ်းစက်အလုံးပေါင်း ၄၆.၉ သန်းတိတိရောင်းအားရှိခဲ့ပြီး ဗီဒီယိုဂိမ်းလောကမှာ ဆယ်စုနှစ်နှစ်စုကြာ မားမားမတ်မတ် ရပ်တည်နိုင်ခဲ့တဲ့ပါတယ်။ ဒါကြောင့်မို့ပဲ အခုဆိုရင် X Box ဂိမ်းစက်ဟာ ၂၁ ရာစုရဲ့ဖျော်ဖြေရေးကဏ္ဍမှာ အရေးပါအရာရောက်တဲ့ ကမ္ဘာ့အင်အားကြီးအနောက်တိုင်းအမှတ်တံဆိပ်တစ်ခုဖြစ်လာခဲ့ပါတယ် 🕋

သို့ပေမယ့် X Box ဂိမ်းစက်ဟာ လွန်စွာမှကြီးကျယ်တာ၊ ခမ်းနားတာ၊ စွမ်းအားမြင့်တာမှန်သော်ငြား ဈေးကွက်အရကြည့်မယ်ဆိုရင် သူ့ရဲ့အရှေ့မှာ အရှေ့တိုင်းစီနီယာကြီးများဖြစ်တဲ့ Sony, Nintendo နဲ့ Sega တို့က လက်ပိုက်ပြီးမိန့်မိန့်ကြီးရှိနေပါတယ်။ အဲဒီလို နာမည်ကျော်ဂျပန်ဂိမ်းကုမ္ပဏီကြီးများနဲ့ ဂျပန်ဂိမ်းရေးဆွဲဖန်တီးသူတွေဟာ ရှိသမျှစည်းမျဉ်းတွေကိုချိုးဖြတ်တတ်ကြတဲ့ ကမ္ဘာဂြိုလ်ပေါ်ကအကောင်းဆုံးဂိမ်းရေးဆွဲသူတွေလို့ တစ်ကမ္ဘာလုံးကအသိအမှတ်ပြုထားရတဲ့အထိ ဂျပန်ရဲ့ဗီဒီယိုဂိမ်းတွေဟာ အင်အားကြီးမားလှပါတယ်။ Microsoft တည်ထောင်တဲ့ Bill Gates ကိုယ်တိုင် X Box ဂိမ်းစက်ကို စတင်တီထွင်ရတဲ့ရည်ရွယ်ချက်အမှန်ကိုက အရှေ့တိုင်းကကြီးစိုးတဲ့ဂိမ်းလောကနဲ့ ဗီဒီယိုဂိမ်းစက်တွေဟာ အနောက်တိုင်းကိုလွှမ်းမိုးအားကောင်းလာနဲ့တစ်ပြိုင်နက် တစ်ချိန်မှာ Microsoft ကွန်ပျူတာတွေအစား အိမ်တိုင်းလိုလို ဂျပန်ဗီဒီယိုဂိမ်းစက်တွေနဲ့ပြည့်လာမှာကို စိုးရိမ်တွေးပူတာကြောင့်ပါပဲ။ ကိုယ့်လက်ကိုယ့်ခြေနဲ့ ဂိမ်းစက်ထုတ်ဖို့ အကြံအစည်ရှိပေမယ့် ကွန်ပျူတာတီထွင်သူ Bill Gates တောင်မှ သူကျွမ်းကျင်တဲ့နယ်ပယ်မဟုတ်တဲ့ ဗီဒီယိုဂိမ်းဖန်တီးမှုနဲ့ ဂိမ်းရေးဆွဲထုတ်လုပ်မှုကို ဖြတ်ကျော်ဖို့ အတော်လေးအခက်တွေ့ခဲ့ပါတယ်။ Bill Gates ထုတ်တဲ့ အနောက်တိုင်းဂိမ်းစက် X Box ဟာ အခုလိုအလုံးအထည်ပေါ်မလာသေးခင်မှာ ဂိမ်းဆိုရင် Playstation နဲ့ Nintendo ဂိမ်းစက်များနဲ့သာ ဆော့ကစားဖူးတဲ့ ကမ္ဘာအနှံ့က ဂိမ်းပရိသတ်တွေဟာ ဒါဖြစ်ရောဖြစ်လာနိုင်ပါ့မလားဆိုပြီး မေးခွန်းထုတ်သံသယတွေ ဝင်ခဲ့ကြပါတယ်။ တကယ်တမ်းဆိုရင် software ပိုင်းမှာသာ တစ်ဖက်ကမ်းခတ်ကျွမ်းကျင်တဲ့ Bill Gates အနေနဲ့ အခုလိုဗီဒီယိုဂိမ်းစက် hardware ကို ကိုယ်ပိုင်နည်းပညာ၊ ကိုယ်ပိုင်ဒီဇိုင်း၊ ကိုယ်ပိုင်ထုတ်ပိုးမှုအပြင် ကိုယ်ပိုင်ဂိမ်းတွေနဲ့ ရော့ အင့်ဆိုပြီး ပရိသတ်ကိုအဆင်သင့်လေးထုတ်ဖို့ဆိုတာ လုံးဝကိုခက်ခဲလွန်းလှတဲ့အလုပ်ပါ။ ကနဦးအစကတော့ Bill Gates ဟာ သူကိုယ်တိုင် ဂျပန်ကိုသွားရောက်ပြီး Sony ရဲ့ Playstation ဂိမ်းစက်က hardware ပိုင်းတည်ဆောက်ပုံနည်းပညာနဲ့ Microsoft ရဲ့လူသိများပြီးသားဖြစ်တဲ့ software တွေကို ပေါင်းစည်းပြီး X Box ဆိုတဲ့ဂိမ်းသစ်ကိုပြုလုပ်ချင်ကြောင်း ကမ်းလှမ်းခဲ့ပေမယ့် Sony ဖက်က စိတ်ဝင်စားမှုလုံးလုံးလျားလျားမှ မပြခဲ့ပါဘူး။ တကယ်က Microsoft တည်ထောင်သူ Bill Gates အနေနဲ့ သူ့ကိုယ်ပိုင်ဂိမ်းစက် X Box ကိုထုတ်မယ်လို့ဆိုလိုက်တာဟာ ၁၉၉၀ ခုနှစ်ဝန်းကျင်ကတည်းက အရည်အသွေးမြင့်ဂိမ်းစက်တွေနဲ့ ဈေးကွက်တစ်ခုလုံးကိုပိုင်ဆိုင်ထားတဲ့ Sony ကိုစိန်ခေါ်တဲ့သဘောကို ဆောင်လိုက်သလိုပါပဲ 🎮💢

အဲဒီကာလတုန်းက Microsoft နဲ့အတူ လက်တွဲလုပ်ကိုင်ကြတဲ့ လုပ်ငန်းရှင်ကုမ္ပဏီတွေကိုယ်တိုင်ကလည်း ယုံကြည်မှုချိုးဖေါက်တဲ့အမှုကိစ္စရပ်တွေနဲ့ ရုံးရောက်ဂိတ်ရောက်ဖြေရှင်းနေရချိန်မို့ Microsoft ရဲ့နာမည်ဆိုးဟာ အဲလိုအချိန်ကောင်းမှာ တစ်ဝဲလည်လည်ဖြစ်နေခဲ့ပြန်ပါတယ်။ ဒါကြောင့်မို့ပဲ Microsoft ရဲ့ X Box ဂိမ်းစက်ထုတ်မယ့်စီမံကိန်းမှာ လက်တွဲရင်အကျိုးဖြစ်ထွန်းနိုင်ချေရှိတဲ့ စီးပွားရေးသမားများနဲ့ လုပ်ငန်းရှင်တွေကိုယ်တိုင် Microsoft နဲ့အတူ အလုပ်တွဲလုပ်ဖို့ကို လက်တွန့်နေခဲ့ကြပါတယ်။ X Box နဲ့ ပတ်သက်ပြီး ဂျပန်မှာ Microsoft အငြင်းပယ်ခံရတာဟာ Sony နဲ့မှမဟုတ်ပါဘူး၊ Playstation ဂိမ်းခလုတ်တွေရဲ့ ဆားကစ်ဘုတ်သန်းပေါင်းများစွာကို ဒိုင်ခံထုတ်လုပ်ပေးနေတဲ့ Mitsumi အစ်လက်ထရွင်းနစ်ကုမ္ပဏီကလည်း X Box ဂိမ်းစက်အတွက် ဆားကစ်ဘုတ်တွေ ထုတ်လုပ်ပေးပါဆိုတဲ့ Microsoft ရဲ့ တောင်းဆိုချက်ကို အတိအလင်းငြင်းပယ်ခဲ့ပြန်ပါတယ်။ ဘာကြောင့်လည်းဆိုတော့ Mitsumi ဟာ Microsoft နဲ့ ပူးပေါင်းလုပ်ကိုင်ပြီး တူညီတဲ့ဆားကစ်နည်းပညာကို X Box ထဲထည့်ပေးလိုက်ရင် နှစ်လကြာရှည်စီးပွားမိတ်ဖက်များဖြစ်ကြတဲ့ Sony နဲ့ ဆက်ဆံရေးပျက်ပြားသွားမှာဖြစ်တဲ့အတွက် Microsoft နဲ့ ပတ်သက်လို့ နည်းနည်းလေးမှ မလိုလားခဲ့ပါဘူး။ အဲဒီငြင်းပယ်မှုကနေ Microsoft အနေနဲ့ တခြားသောဆားကစ်ဘုတ်ကို X Box ဂိမ်းခလုတ်ထဲ ထည့်သွင်းခဲ့ရတာကြောင့် X Box ဂိမ်းခလုတ်ဟာ Playstation ဂိမ်းခလုတ်တွေထက်ကို ပိုမိုကြီးမားပြီးလေးလံနေခဲ့တာပါ။ X Box ဂိမ်းစက်နဲ့ ပတ်သက်ပြီး အချိန်အကြာကြီးဆွဲမနေချင်တဲ့ Bill Gates ဟာ ၂၀၀၁ ခုနှစ်၊ နိုဝင်ဘာလ ၉ ရက်နေ့မှာတော့ X Box ဂိမ်းကို ကမ္ဘာ့ဈေးကွက်မှာ စတင်ဖြန့်ချိရောင်းချခဲ့ပါတယ်။ ထွက်ရှိလာပြီးပြီးချင်း သိပ်မကြာလိုက်ပါဘူး၊ Microsoft ဟာ သူ့ရဲ့ရှေ့ကစီနီယာများနည်းတူ အရည်အသွေးကောင်းပြီး ပြောင်မြောက်တဲ့ဂိမ်းစက်တစ်ခုကို ထုတ်နိုင်ခဲ့တယ်ဆိုတာ X Box နဲ့ သက်သေပြနိုင်ခဲ့ပါတယ်။ X Box ဂိမ်းစက်ဟာ လက်ရှိအချိန်အထိ ဂိမ်းစက်စီးရီးအနေနဲ့ မော်ဒယ်အမျိုးအစားသုံးမျိုးထွက်ရှိထားပါတယ်၊ အဲဒါတွေကတော့ X Box, X Box 360 နဲ့ X Box One တို့ပဲဖြစ်ကြပြီး မော်ဒယ်သုံးမျိုးစလုံးဟာ တစ်ကမ္ဘာလုံးမှာကြိတ်ကြိတ်တိုး လူတွေ ဝယ်ယူရလောက်အောင်ကို အောင်မြင်သွားခဲ့တဲ့ Microsoft ရဲ့ဂိမ်းစက်ဖြစ်ပါတယ် 📊📈

X Box ဂိမ်းစီးရီးရဲ့ X Box, X Box 360 နဲ့ X Box One မော်ဒယ်သုံးမျိုးစလုံးဟာ ကမ္ဘာ့နိုင်ငံအနှံ့အပြားမှာ နှစ်ခြိုက်ဆော့ကစားသူပေါင်း သိန်းသန်းချီရှိနေပေမယ့် ကမ္ဘာ့အဓိကဂိမ်းဈေးကွက်ဖြစ်ပြီး ဂိမ်းဆော့ကစားသူရာခိုင်နှုန်းအများဆုံးရှိတဲ့ ဂျပန်မှာတော့ ခွက်ခွက်လန်အောင် ရှုံးခဲ့ပါတယ်။ X Box ဂိမ်းစက်ဖန်တီးသူ Seamus Blackley ကိုယ်တိုင်က "ကျွန်တော်တို့ တတ်ကစားနေတာ ဘယ်ကွင်းလဲဆိုတာ ကျွန်တော်တို့ အတိအကျသိတယ်။ X Box ကို ဂျပန်မှာ ပေါက်သွားမယ့်ထုတ်ကုန်တစ်ခုလို့လည်း မမျှော်လင့်ခဲ့ပါဘူး၊ တကယ်တမ်းမှာ ကျွန်တော်တို့ဟာ X Box နဲ့ပတ်သက်ပြီး ကိုယ့်အရှက်ကိုယ်ခွဲသလိုမဖြစ်အောင်ပဲ ကြိုးစားခဲ့တာပါ" လို့ အတိအလင်းပြောကြားခဲ့ပါတယ်။ အထက်မှာဆိုခဲ့တဲ့ ၂၀၀၁ ခုနှစ်ကနေ ၂၀၁၉ ခုနှစ်အထိ X Box ဂိမ်းစက်တွေရဲ့ ရောင်းအားဟာ ၄၆.၉ သန်းအရေအတွက်ရှိတယ်ဆိုပေမယ့် အဲဒီထဲမှာဂျပန်နိုင်ငံက ဝယ်ယူအားပေးမှုဟာ ဝ.၃ ရာခိုင်နှုန်းပျှမ်းပျှပဲ ရှိပါတယ်။ Microsoft မရောက်လာခင်အထိ Sony, Nintendo နဲ့ Sega ဟာ ကမ္ဘာ့ဂိမ်းဈေးကွက်ကို ၁၀၀ ရာခိုင်နှုန်းအပြည့် ပိုင်ဆိုင်ထားပါတယ်။ ဒါပေမယ့်လို့ Microsoft ဈေးကွက်ထဲကို ရောက်လာခဲ့ပေမယ့်လည်း အဲဒီ ၁၀၀ ရာခိုင်နှုန်းဟာ ရာနှုန်းပြည့်မှ ရာနှုန်းပြည့် အခုလက်ရှိ ၂၀၂၀ ခုနှစ်အထိ လုံးဝပြောင်းလဲခြင်းမရှိခဲ့ပါဘူး။ X Box ဂိမ်းစီးရီးဟာ X Box 360 ရဲ့ကောင်းမှုကြောင့် ၂၀၁၁ ခုနှစ်ကနေ ၂၀၁၂ အထိ ကမ္ဘာ့ရောင်းအားအကောင်းဆုံးဂိမ်းစက်ဖြစ်ခဲ့တာမှန်ပေမယ့် ယမန်နှစ် ၂၀၁၉ တစ်နှစ်တည်းမှာတင် ရောင်းရတဲ့ ဂိမ်းစက်အရေအတွက်အရ Playstation, Nintendo နဲ့ ယှဉ်မယ်ဆိုရင် စုစုပေါင်းရောင်းအားဟာဆပေါင်း ၆၀ နီးပါး မိုးနဲ့မြေလို ကွာခြားလွန်းလှပါတယ်။ ၂၀၁၉ နှစ်၊ အောက်တိုဘာလပိုင်းအထိ Sony ရဲ့ PS4 နဲ့ Nintendo Switch ဂိမ်းစက်တွေဟာ တစ်ကမ္ဘာလုံးအတိုင်းအတာနဲ့ ရောင်းအား ၉ သန်းဝန်းကျင်မှာရှိနေပေမယ့် Microsoft ရဲ့ X Box ကတော့ ရောင်းအား တစ်သိန်းခွဲဝန်းကျင်နဲ့ နောက်ဆုံးနေရာက ခြေကျင်ပြေးလိုက်လို့နေပါတယ်။ တကယ်က X Box ဟာ ဘာကြောင့် ဂျပန်မှာမအောင်မြင်ရတာလဲဆိုတာ အဖြေက ရိုးရှင်းပါတယ်။ ကမ္ဘာမှာ ဗီဒီယိုဂိမ်းရယ်လို့ ဖြစ်ပေါ်လာကတည်းကိုက ဂျပန်နိုင်ငံမှာ စတင်တီထွင်ခဲ့တဲ့အရာဖြစ်တဲ့အတွက် ဂျပန်တွေအတွက် Sony, Nintendo နဲ့ Sega ဟာ သူတို့ရဲ့သွေးသားရင်းချာမိတ်ဖော်တွေလို ဖြစ်နေပါပြီ။ ကိုယ့်ခြံနောက်ဖေး လေးငါးလှမ်းလှမ်းလိုက်တာနဲ့ ဖွံထွားပြီးတောက်ပြောင်တဲ့ နွားမကြီးရှိနေတာကို မလှမ်းမကမ်းက အိုးထမ်းပြီးအော်ရောင်းတဲ့ ကုလားလေးရဲ့နွားနို့ကို ဘယ်သူမှဝယ်မသောက်ကြတဲ့ သဘောလိုပါပဲ။ လက်ရှိမျိုးဆက်သစ်ဂိမ်းလောကမှာ Playstation နဲ့ X Box ဟာ ဘယ်လောက်ထိခေတ်ပြိုင်ပဲပြောပြော၊ တစ်ယောက်နဲ့တစ်ယောက် အသေအကြေအလဲထိုးနေတယ်ပဲပြောပြော တကယ်တမ်းမှာ X Box ကိုထုတ်တဲ့ Microsoft ကိုယ်တိုင်ကိုက သူတို့ဂိမ်းစက်ရဲ့ပေါက်မြောက်မှုနဲ့ ရောင်းအားအရေအတွက်ဟာ သူတို့ရဲ့အရှေ့စီနီယာများဖြစ်ကြတဲ့ Sony နဲ့ Nintendo ကို ဘယ်သောအခါမှ လိုက်မမှီနိုင်မှန်း စာရင်းဇယားနဲ့ကို တွက်ချက်ပြီး အတိအကျသိပါတယ်။ ဆိုတော့ကာ ကျွန်တော်တို့ကလည်း လမ်းထိပ်က မုန့်ဟင်းခါးသည် အရသာစောက်ရမ်းကောင်းတာကို ဈေးထဲက အစစ်အဟပ်မတည့်တဲ့ အုန်းနို့ခေါက်ဆွဲကို ဘာကြောင့်စားနေရမှာတုန်းနော့ 🤷‍♂️🤷‍♀️

ကဲ X Box အနေနဲ့ ဂျပန်မှာဘာကြောင့် မအောင်မြင်ခဲ့ရတာလဲဆိုတဲ့ အကြောင်းကတော့ ဒီလောက်ပါပဲ။ ဖတ်ရှုလာရင်း ဒီနေရာအထိ ရောက်လာသူတွေကိုတော့ ထုံးစံအတိုင်း ကျေးဇူးအထူးတင်ရှိလျက်ပါ။ အခုဆောင်းပါးလိုပဲ နောက်လာမယ့် စိတ်ဝင်စားစရာဂိမ်းအကြောင်းအရာတွေမှာ ကျွန်တော်တို့ ပြန်လည်ဆုံတွေ့ကြပါမယ်။ အခုတော့ ဒီစာစောင်လေးလည်းနဲ့အတူ ဂိမ်းချစ်သူများအားလုံးလည်း အဆင်ပြေချောမွေ့တဲ့နေ့လေးတစ်နေ့ကို ပိုင်ဆိုင်နိုင်ပါစေလို့ပြောကြားရင်း နှုတ်ဆက်လိုက်ပါတယ် 🦋🌹

Yan