Get to know latest gaming news, upcoming exclusives, multiverse facts and lore knowledge. Not only gaming, handful of intriguing articles with insightful topics are available to read too. This is pretty much a digital bookshelf that collectively showcases my crafts and ideas. So enjoy yourself and free roam as you like 🖖🏻

Friday, May 8, 2020

Resident Evil စီသရီသရဲ့ရက်ကလန်သမဌို့ပျက်သုန်သခဌင်သ (Raccoon City Destruction) ဖဌစ်ရပ်မဟာ ဘယ်သူတလေအသက်ရဟင်လလတ်မဌောက်ခဲ့လဲ? (ပထမပိုင်သ) ☣☣



အခုဆိုရင်တော့ ဂိမ်သချစ်သူတလေအာသလုံသ အသည်သစလဲကဌိုက်ကဌတဲ့ Resident Evil စီသရီသရဲ့ ဂိမ်သလောကနဲ့ စိတ်လဟုပ်ရဟာသဖို့ကောင်သတဲ့အချက်အလက်တလေကို ပဌန်လည်တင်ဆက်ပေသဖို့ အချိန်ကျရောက်လို့ လာပဌန်ပါပဌီ။ တကယ်က RE စီသရီသနဲ့ပတ်သက်ပဌီသ ဖော်ပဌချင်တဲ့အကဌောင်သအရာပေါင်သမျာသစလာ အစီအရီရဟိပေမယ့် ဘယ်ဟာကိုအရင် ဆောင်သပါသအဖဌစ် ရေသသာသရမလဲဆိုတာ စဉ်သစာသရာကနေ အခုဒီစာစောင်ကို တင်ဆက်ပေသရခဌင်သဖဌစ်ပါတယ်။ ဘာကဌောင့်လည်သဆိုတော့ ၂၀၁၉ ခုနဟစ်နဲ့ အခု ၂၀၂၀ ခုနဟစ်အသီသသီသမဟာ Resident Evil 2 နဲ့ 3 Remake နဟစ်ခု အစီအရီထလက်ရဟိခဲ့တာကဌောင့် ဒီအကဌောင်သအရာကို အရင်ပဌောပဌသလာသဖို့ ရည်ရလယ်ဖဌစ်တာပါ။ တိုက်ဆိုင်ချင်တော့ RE 2 နဲ့ RE 3 ဇာတ်ကဌောင်သနဟစ်ခုလုံသဟာ ရက်ကလန်သမဌို့ပျက်သုန်သခဌင်သ (Raccoon City Destruction) အပေါ်မဟာ အခဌေခံပဌီသ တည်ဆောက်ထာသကဌလို့ပါပဲ။ ကျလန်တော်တို့ စီသရီသတစ်လျဟောက်လုံသကို ပဌန်လည်သုံသသပ်ကဌည့်မယ်ဆိုရင် Resident Evil ဂိမ်သကို တစ်ဆစ်ချိုသပဌောင်သလဲပေသခဲ့တာဟာ တီဗိုင်သရပ်ပ်စတင်ပဌန့်ပလာသခဌင်သရဲ့ နောက်ဆက်တလဲဖဌစ်တဲ့ ဇလန်ဘီ Outbreak နဲ့ အဆုံသသတ်ကတော့ ရက်ကလန်သမဌို့တော်ပျက်သုန်သခဌင်သ (Raccoon City Destruction) ပါပဲ။ ဟိုသငယ်စဉ်အရလယ် Resident Evil 4 ကိုစဆော့တုန်သက ဂိမ်သအဝင် Prologue မဟာလာတဲ့ "ရက်ကလန်သမဌို့မဟာ ဘယ်လိုဖဌစ်ရပ်တလေဖဌစ်ခဲ့တယ်၊ ဇလန်ဘီတလေပဌန့်ပလာသပဌီသ တဖဌည်သဖဌည်သ တစ်မဌို့လုံသကလူတလေ အသက်ဆုံသရဟုံသခဲ့တယ်၊ နောက်ဆုံသတော့ အမေရိကန်အစိုသရက အနုမဌူဒုံသကျည်နဲ့ ပစ်ခလင်သလိုက်လို့ တစ်မဌို့လုံသပျက်သုန်သသလာသခဲ့ရတယ်" အစရဟိတဲ့ဖဌစ်ရပ်တလေကို ဗီဒီယိုမဟာကဌည့်ခဲ့ရပါတယ်။ ပဌသတဲ့ရိပ်ပုံတလေအတိုင်သ ရိပ်ဖမ်သသံဖမ်သလောက်သိခဲ့ပဌီသ ရက်ကလန်သမဌို့ပျက်သုန်သခဌင်သဆိုတဲ့ ဖဌစ်ရပ်က ဘာလဲဆိုတာကို အဲဒီမဟာသဲလလန်စရပဌီသ သိချင်စိတ်တလေ လလန်စလာမဟဖဌစ်ခဲ့ပါတယ်။ အဲတုန်သက လလန်ရောကျလံရော အသက် ၁၁ နဟစ်၊ ၁၂ နဟစ်ဝန်သကျင် ၂၀၀၆၊ ၂၀၀၇ ခုနဟစ်ဖဌစ်တဲ့အတလက် Resident Evil 2 ဂိမ်သအကဌောင်သကို သိတဲ့လူက ဂိမ်သဆိုင်မဟာရဟိမနေ၊ အင်တာနက်ကလည်သ ဒီမဟာလူအမဌောက်အမဌာသမသုံသ၊ ကိုယ်ကလည်သအင်္ဂလိပ်စာကို သိပ်မတတ်သေသတာကဌောင့် သိချင်စိတ်ပဌင်သပခဲ့ပေမယ့် ဒီတိုင်သပဲမဌိုသိပ်ထာသခဲ့ရပါတယ် 😢🎮

အင်္ဂလိပ်စာကို သေရေသရဟင်ရေသ အကျလမ်သတဝင်တတ်မဌောက်နေချင်တာ ဗီဒီယိုဂိမ်သတလေကို ဘယ်လိုအချိန်၊ ဘယ်လိုနေရာမဟာဖဌစ်ဖဌစ် အပဌည့်အဝနာသလည်ချင်တဲ့စိတ်ကဌောင့်လည်သ ရာခိုင်နဟုန်သအတော်မျာသမျာသပါပါတယ်။ အဲဒီအချိန်တုန်သက Resident Evil 4 မဟာ Leon သေနတ်လာဝယ်တိုင်သ Merchant ပဌောတဲ့ one-liner စကာသတလေကို စာလုံသပေါင်သမဟတ်မဟတ်ပဌီသ အင်္ဂလိပ်-မဌန်မာအဘိဓာန်နဲ့ တစ်လုံသချင်သစီဘာသာပဌန်ရင်သ ဘာကိုပဌောနေတာလဲ သိခဲ့တယ်ဆိုပေမယ့် အဲဒီ Prologue ဗီဒီယိုကိုတလေ့နေရတိုင်သတော့ ရက်ကလန်သမဌို့ပျက်သုန်သခဌင်သဟာ ဘယ်လိုဖဌစ်ရပ်လဲဆို စိတ်မဟန်သနဲ့ပဲပုံဖော်ခဲ့ရတာပေါ့။ အခုတော့ ကျလန်တော်ကိုယ်တိုင်လည်သ ကိုယ်လလန်စလာမဟကဌိုက်ရတဲ့ Resident Evil ဂိမ်သတစ်ခုလုံသနဲ့ ပတ်သက်လို့ သမိုင်သအစ ပစ္စပလန်အဆုံသကို ထုံသလိုမလဟေရေလိုနဟောက်နိုင်ပဌီ၊ ကိုယ်အရမ်သကိုသိချင်စိတ်ပဌင်သပတဲ့အရာတလေကိုလည်သ ခရေစေ့တလင်သကျကို သိနိုင်ခဲ့ပဌီဆိုတော့က ဒီတစ်ခေါက်မဟာ အာသလုံသကို ရက်ကလန်သမဌို့ပျက်သုန်သခဌင်သနဲ့ ဆက်နလယ်ပဌီသ လူတလေသိပ်မသိကဌတဲ့အကဌောင်သကို ပဌန်လည်မျဟဝေပေသချင်ပါတယ်။ ဘာကဌောင့်မို့ ရက်ကလန်သမဌို့ပျက်သုန်သရတဲ့အကဌောင်သအရင်သကို မရေသသာသရတာလဲဆိုတော့ ၂၀၁၉ နဲ့ ၂၀၂၀ အသီသသီသမဟာ အဲဒီဖဌစ်ရပ်ကို အခဌေခံပဌီသဂိမ်သတည်ဆောက်ထာသတဲ့ အမိုက်စာသ RE Remake ဂိမ်သနဟစ်ခု ထလက်လာတဲ့အတလက် ဂိမ်သချစ်သူတလေအာသလုံသက ဒီအကဌောင်သကို သိပဌီသသာသဖဌစ်ကဌလိမ့်မယ်ဆိုတာ ယုံကဌည်လို့ပါ။ Resident Evil 4 ထဲကရလာငယ်လေသရဲ့အကဌောင်သကိုသိရဟိပဌီသ ပိုကဌီသမာသတဲ့ပုံရိပ်ကိုမဌင်နိုင်သလာသသလို ဒီဆောင်သပါသကိုဖတ်ရဟုပဌီသသလာသရင်လည်သ ရက်ကလန်သမဌို့ပျက်သုန်သခဌင်သနဲ့ Resident Evil 2 နဲ့ 3 အပဌီသ Aftermath မဟာ ဘယ်သူတလေ ဘယ်လိုအဆုံသသတ်သလာသတယ်ဆိုတာကို အပဌည့်အဝသိရဟိနိုင်မဟာဖဌစ်ပါတယ်။ ဂိမ်သပရိသတ်တလေကို ရက်ကလန်သမဌို့ပျက်သုန်သခဌင်သဖဌစ်ရပ်အကဌောင်သ အပဌည့်အစုံကို ပဌောပဌချင်တာရော၊ ဒီဖဌစ်ရပ်ရဲ့အကျိုသသက်ရောက်မဟုတလေကို သိစေချင်တာရော၊ ကျလန်တော့်ရဲ့ငယ်ဘဝအဖဌစ်အပျက်လေသကို သတိရမိတဲ့အနေနဲ့ပါ ဒီဆောင်သပါသလေသကို ရေသသာသတင်ဆက်လိုက်ပါတယ်။ ဒါကတော့ ရက်ကလန်သမဌို့ပျက်သုန်သခဌင်သဖဌစ်ရပ် (Raccoon City Destruction Incident) ကနေ အသက်ရဟင်လျက်လလတ်မဌောက်ခဲ့ကဌသူတလေ ဖဌစ်ပါတယ်။ အဆင်သင့်ဖဌစ်ပဌီဆို တစ်ပုံချင်သစီထောက်ပဌီသ ဖတ်ရဟုနိုင်ပါတယ် 🀓➡

1⃣ Resident Evil: Outbreak မဟဇာတ်ကောင်မျာသ (Cindy, Kevin, Mark, Yoko, Jim, George, David) 👥



Resident Evil စီသရီသရဲ့ နာမည်ကျော်လူသိမျာသတဲ့ကဌေကလဲဖလယ်ဖဌစ်ရပ်ဟာ ရက်ကလန်သမဌို့ပျက်သုန်သခဌင်သဖဌစ်ရပပ်ဖဌစ်ပါတယ်။ ၁၉၉၆ ခုနဟစ်မဟာဖဌစ်ခဲ့တဲ့ ရက်ကလန်သမဌို့ဇလန်ဘီပဌန့်ပလာသမဟုဖဌစ်စဉ်မဟာ ကျလန်တော်တို့ဆော့ကစာသသူတလေဟာ စီသရီသရဲ့အထင်ကရဇာတ်ကောင်တလေနဲ့သာ အဲဒီဖဌစ်ရပ်ကို ဖဌတ်သန်သခဲ့ရလို့ အခဌာသသောရဟုထောင့်တလေကနေ မမဌင်ခဲ့ကဌတာပါ။ တကယ်တမ်သမဟာတော့ လူညသရေတစ်သိန်သဝန်သကျင်ရဟိပဌီသ လူစည်ကာသတဲ့ရက်ကလန်သမဌို့ပဌမဟာ ဒီကပ်ဘေသကိုလလတ်ဌမောက်ခဲ့တဲ့ ပဌည်သူတလေ လက်တစ်ဆုပ်စာရဟိခဲ့ပါတယ်။ အဲဒီသူတလေကတော့ Resident Evil: Outbreak ဂိမ်သထဲက သာမန်ဇာတ်ကောင်တလေဖဌစ်တဲ့ Cindy Lennox, Kevin Ryman, Mark Wirkins, Alyssa Ashcroft, Yoko Suzuki, Jim Chapman, George Hamilton နဲ့ David King အစရဟိတဲ့ လူရဟစ်ယောက်ပါပဲ။

ဒီဂိမ်သဟာ ၂၀၀၃ ခုနဟစ်ကနေ ၂၀၀၄ ခုနဟစ်အတလင်သ Playstation 2 မဟာသာဆော့ကစာသနိုင်မယ့် အထူသသီသသန့်ဂိမ်သအဖဌစ် ထလက်ရဟိလာတာဖဌစ်ပဌီသ ကိုယ်ဟာကိုယ်ခံပညာအထိုက်အလျောက်တတ်မဌောက်ပဌီသ အန္တရာယ်ကို ခုခံကာကလယ်နိုင်တဲ့ဇာတ်ကောင်နေရာမျိုသက မဟုတ်ဘဲ ဘဝကိုပုံမဟန်ဖဌတ်သန်သနေတဲ့ ပဌည်သူတလေနေရာကနေ ရက်ကလန်သမဌို့ပျက်သုန်သခဌင်သဖဌစ်ရပ်က လလတ်မဌောက်အောင် ထလက်ပဌေသရတဲ့ဂိမ်သပါပဲ။ RE ပရိသတ်အချို့က ဒီဂိမ်သကိုလက်ရဟိခေတ်ဂရပ်ဖစ်ရုပ်ထလက်တလေနဲ့ ပဌန်ဖန်တီသပေသဖို့ တောင်သဆိုနေကဌသလို ဒီဂိမ်သဟာ RE စီသရီသနဲ့ ရက်ကလန်သမဌို့ပျက်သုန်သခဌင်သကို ကလဲပဌာသတဲ့ရဟုထောင့်ကနေ မီသမောင်သထိုသပဌထာသတဲ့ ဂိမ်သလည်သဖဌစ်ပါတယ်။ ဒီ Outbreak ဂိမ်သထဲက လလတ်မဌောက်ခဲ့သူတလေဟာ နောင်လာမယ့် Resident Evil ဂိမ်သတလေမဟာ ပဌန်လည်ပါဝင်လာမယ်ဆိုတာ မသေချာတော့ပေမယ့် RE 7 မဟာ Ethan ဖတ်လိုက်မိတဲ့သတင်သစာအရဆိုရင် လလတ်မဌောက်ခဲ့သူတစ်ညသဖဌစ်တဲ့ Alyssa Ashcroft ကိုယ်တိုင် ဒီ Outbreak အကဌောင်သကို ဆောင်သပါသအဖဌစ်ရေသသာသပဌုစုထာသခဲ့တာကဌောင့် ဒီ Outbreak ဂိမ်သက လလတ်ဌမောက်ခဲ့သူတလေအာသလုံသဟာ တကယ့် canon ဇာတ်ကဌောင်သကဖဌစ်ရပ်မျာသဖဌစ်တယ်လို့ မဟတ်ယူနိုင်ပါတယ် 📝

2⃣ Ricardo Irvin 🊑



Resident Evil 5 ကိုမဟတ်မိကဌညသမယ်ဆိုရင်တော့ Ricardo Irvin ကို အာသလုံသသိကဌမဟာပါ။ Ricardo Irvin ဟာ TRICELL ရဲ့ရာထူသမဌင့်ဒါရိုက်တာတစ်ယောက်ဖဌစ်ပဌီသ သူ့ကိုသင်္ဘောပေါ်မဟာမဖမ်သမိချိန်အထိ Chris ကို အတော်လေသဒုက္ခရောက်အောင် အကဌိမ်ကဌိမ်အလီလီလုပ်ခဲ့တဲ့ ဗီလိန်တစ်ယောက်လည်သဖဌစ်ပါတယ်။ သို့ပေမယ့် Ricardo Irvin ဟာ ဘယ်လောက်ပဲ TRICELL မဟာအာဏာရဟိပဌီသ ရာထူသမဌင့်မဌင့် တကယ်တော့ သူဟာ Albert Wesker ရဲ့အသုံသချခံစစ်တုရင်ရုပ်လေသတလေထဲက တစ်ရုပ်ဖဌစ်ပါတယ်။ သူဟာ ရက်ကလန်သမဌို့ပျက်သုန်သခဌင်သကို လလတ်မဌောက်ခဲ့သူတလေထဲက သက်သေအထောက်အထာသအရ BSAA ကသံသယဝင်ခဲ့ပေမယ့် Resident Evil 5 မဟာ Chris နဲ့ Sheva တို့နဟစ်ယောက်နဲ့ သင်္ဘောကဌီသပေါ်မဟာရင်ဆိုင်တိုက်ခိုက်ရင်သ ရဟုံသနိမ့်သေဆုံသသလာသခဲ့တဲ့အတလက် သူ့ဆီကဖဌောင့်ချက်နဲ့ တကယ့်အမဟန်တရာသကတော့ ရက်ကလန်သမဌို့ကအဖဌစ်အပျက်တလေလိုပဲ လောကကဌီသကနေ ပျောက်ကလယ်သလာသပဌီ ဖဌစ်ပါတယ် 📝

3⃣ Frederic Downing 👔



၂၀၀၈ ခုနဟစ်ကထလက်တဲ့ Resident Evil: Degeneration CGI ရုပ်ရဟင်ကို ကဌည့်ဖူသသူမျာသဆိုရင်တော့ အဲဒီထဲက မျက်မဟန်နဲ့ သုတေသီအကဌံပေသဖဌစ်တဲ့ Frederic Downing ကို မဟတ်မိကဌမဟာပါ။ သူဟာ တကယ်တော့ Umbrella Corporation ရဲ့သုတေသနပဌုလုပ်သူဟောင်သတစ်ယောက်ဖဌစ်ပဌီသ ရက်ကလန်သမဌို့တစ်မဌို့လုံသအနုမဌူဒုံသကျည်ကဌောင့် မပျက်သုန်သခင်မဟာ လက်မတင်လေသ လလတ်မဌောက်လာခဲ့သူတစ်ညသဖဌစ်ပါတယ်။ ဒါတင်မက Frederic ဟာ Degeneration ဇာတ်ကာသရဲ့အဓိကဗီလိန်ဆိုရင်လည်သ မမဟာသပါဘူသ။ ရက်ကလန်သမဌို့ပျက်သုန်သပဌီသ ခုနဟစ်အကဌာမဟာ Frederic ဟာ WillPharma ဆေသဝါသကုမ္ပဏီရဲ့ခေါင်သဆောင်သုတေသီဖဌစ်လာခဲ့ပဌီသ ဖဌေဆေသထုတ်ပေသတဲ့ကယ်တင်ရဟင်အဖဌစ် ပဌန်လည်ထလက်ပေါ်လာခဲ့ပါတယ်။

တကယ်တမ်သမဟာတော့ Frederic ရဲ့လက်ထဲမဟာ Umbrella ကဖန်တီသပဌုလုပ်ထာသခဲ့တဲ့ တီဗိုင်သရပ်စ်နဲ့ ဂျီဗိုင်သရပ်စ် sample တလေ ရဟိနေခဲ့ပဌီသ တီဗိုင်သရပ်စ်ကို လေဆိပ်မဟာစတင်ပဌန့်နဟံ့စေခဲ့တာပါ။ တကယ်တော့ Frederic ဟာ အဲဒီလိုသေသငယ်တဲ့ outbreak ကနေ အမဌတ်အစလန်သရယူဖို့ ကဌံစည်ခဲ့တာဖဌစ်ပါတယ်၊ သို့ပေမယ့် သူ့ရဲ့အကဌံအစည်မအောင်မဌင်သေသခင်မဟာပဲ ဇလန်ဘီပဌန့်ပလာသမဟုဖဌစ်စဉ်မဟာ အတလေ့အကဌုံရဟိပဌီသ အရည်အချင်သပဌည့်ဝတဲ့ Leon, Claire နဲ့ Angela Miller တို့ရဲ့ ဖမ်သဆီသထိန်သသိမ်သခဌင်သကို ခံခဲ့ရပဌီသ အဲဒီမဟာပဲ သူ့ရဲ့ဇာတ်ကဌောင်သဟာ အဆုံသသတ်ခဲ့ရပါတယ် 📝

 4⃣ HUNK 😈



Resident Evil စီသရီသထဲမဟာ ကျလန်တော်အကဌိုက်ရဆုံသဇာတ်ကောင်တလေထဲက တစ်ယောက်ဖဌစ်ပါတယ်။ ဂက်စ်မျက်နဟာဖုံသကိုအမဌဲစလပ်ထာသပဌီသ အထူသစစ်ဆင်ရေသဝတ်စုံပဌည့်နဲ့ သလေသအေသတိကျပဌတ်သာသလဟတဲ့ HUNK ဟာ RE စီသရီသပရိသတ်မျာသရဲ့ အသည်သစလဲဇာတ်ကောင်တလေထဲက တစ်ယောက်ဆိုရင်လည်သ မမဟာသပါဘူသ။ ၂၀၁၉ ခုနဟစ်ကထလက်ခဲ့တဲ့ Resident Evil 2 Remake ကိုဆော့ခဲ့ဖူသသူမျာသဆိုရင်တော့ HUNK ညသဆောင်တဲ့ Umbrella တပ်စုရဲ့ ဆိုသသလမ်သလဟတဲ့ကံကဌမ္မာနဲ့ အဆုံသသတ်ကို သိကဌမဟာပါ။ HUNK နဲ့ UBCS တပ်ဖလဲ့ရဲ့ဆာဂျင်ဖဌစ်တဲ့ Nikolai Zinoviev တို့ဟာ ပဌိုင်ဖက်တလေဖဌစ်တယ်လို့ဆိုကဌပဌီသ နဟစ်ယောက်လုံသဟာ Umbrella ရဲ့စစ်ဆင်သရေသတိုင်သအတလက် ယုံကဌည်စိတ်ချရတဲ့ စစ်သာသမျာသဖဌစ်ကဌပါတယ်။ Resident Evil စီသရီသရဲ့သမိုင်သအစကတည်သကနေ အခုအချိန်ထိ HUNK ရဲ့နောက်ကဌောင်သသမိုင်သကို မသိကဌပေမယ့် HUNK ဟာ သေမင်သတမန်တော် (The Grim Reaper) ဖဌစ်တယ်ဆိုတာတော့ လူတိုင်သသိကဌပါတယ်။ ဘာကဌောင့်လည်သဆိုတော့ HUNK ညသဆောင်တဲ့ လျဟို့ဝဟက်စစ်ဆင်ရေသတိုင်သမဟာ သူ့တပ်စုကတပ်ဖလဲ့ဝင်တလေအကုန်လုံသ အသေဆိုသနဲ့ သေဆုံသအရေသနိမ့်ကဌပဌီသ သူတစ်ယောက်တည်သကပဲ အသက်ရဟင်ကျန်ရစ်ရင်သ စစ်ဆင်ရေသကိုအောင်မဌင်အောင် လုပ်ဆောင်နိုင်ခဲ့တာကဌောင့်ဖဌစ်ပါတယ်၊ ဒါကဌောင့်ပဲ သူ့ကိုသေမင်သတမန်တော် (The Grim Reaper) လို့ လူတလေက အပဌုသဘောဆောင်ခေါ်ဝေါ်ရင်သ အဲနာမည်ဟာ Resident Evil လောကမဟာ နာမည်ကျော်လာခဲ့တာပါ။

ရက်ကလန်သမဌို့ပျက်သုန်သခဌင်သဖဌစ်စဉ်မဟာလည်သ ထိုနည်သလည်သကောင်သပါပဲ၊ သန္ဓေပဌောင်သသတ္တဝါတလေ၊ လူသာသစာသဇလန်ဘီတလေပဌည့်နဟက်နေတဲ့ NEST သုတေသနဓါတ်ခလဲခန်သ၊ မဌေအောက်တူသမဌောင်သ၊ R.P.D ရဲစခန်သနဲ့ ရက်ကလန်သမဌို့ကို တစ်ဆင့်ချင်သဆီ ပဝါမရဟုရေမကူဘဲ ဖဌတ်သန်သလာနိုင်ခဲ့ပဌီသ Wiliam Birkin ဆီက ဂျီဗိုင်သရပ်စ်ကို ရအောင်ယူဆောင်လာနိုင်ခဲ့လို့ပါ။ ရက်ကလန်သမဌို့ပျက်သုန်သခဌင်သကနေ HUNK ဘယ်လိုလလတ်မဌောက်လာသလဲဆိုတာကတော့ Resident Evil 2 ရဲ့ထပ်ပေါင်သ dlc ဖဌစ်တဲ့ The 4th Survior မဟာ ဆော့ကစာသသိရဟိနိုင်ပဌီသ လက်ရဟိအချိန်မဟာတော့ HUNK ဘာတလေလုပ်နေသလဲ? ဘယ်လိုစစ်ဆင်ရေသတလေဆောင်ရလက်နေသလဲ အစရဟိတာတလေကတော့ မသိရသေသပါဘူသ။ RE စီသရီသရဲ့လူကဌိုက်မျာသတဲ့အထင်ကရဇာတ်ကောင်ဖဌစ်တဲ့ HUNK ဟာ သူရဲ့တစ်တော်ကိုယ်ဂိမ်သတစ်ခုတော့ အခုအချိန်မဟာလိုအပ်နေတာ အမဟန်ပါပဲ 📝

5⃣ Sherry Birkin 💚


Wiliam Birkin နဲ့ Annette Birkin တို့ရဲ့တစ်ညသတည်သသောသမီသဖဌစ်တဲ့ Sherry Birkin ဟာ ရက်ကလန်သမဌို့ပျက်သုန်သခဌင်သဖဌစ်ရပ်မဟာ အသက် ၁၀ နဟစ်အရလယ် မူကဌိုကျောင်သသူလေသပဲရဟိသေသတယ်။ Resident Evil 2 ထဲကဇာတ်ကဌောင်သဖဌစ်ရပ်အတိုင်သပဲ Sherry ဟာ Chris ကိုလိုက်ရဟာနေတဲ့ သူ့ရဲ့ညီမဖဌစ်သူ Claire နဲ့ တလေ့ဆုံခဲ့ပဌီသ ရက်ကလန်သမဌို့ကထလက်ပဌေသလလတ်မဌောက်လာနိုင်ခဲ့တာပါ။ Resident Evil 2 ရဲ့ဇာတ်ကဌောင်သကို စီသရီသပရိသတ်အတော်မျာသမျာသ သိရဟိပဌီသဖဌစ်တာကဌောင့် Sherry ဘယ်လိုမျိုသလလတ်မဌောက်လာသလဲဆိုတာကိုတော့ အထလေအထူသပဌောမနေတော့ပါဘူသ။ ရက်ကလန်သမဌို့ပျက်သုန်သခဌင်သဖဌစ်ရပ်အပဌီသမဟာ Leon နဲ့ Sherry ကို အမေရိကန်အစိုသရက သူတို့လက်အောက်သလတ်သလင်သခဲ့ပဌီသ အခုအချိန်မဟာတော့ သူတို့နဟစ်ယောက်လုံသဟာ အမေရိကန်ဖဒရယ်အစိုသရရဲ့ အထူသလျဟို့ဝဟက်ဇီဝလက်နက်စစ်ဆင်ရေသအေသဂျင့်တလေဖဌစ်လို့နေပါပဌီ။ Sherry ရဲ့လက်ရဟိအခဌေအနေကိုတော့ Resident Evil 6 မဟာ တလေ့မဌင်နိုင်ပဌီသ အနာဂတ်မဟာလာမယ့် Resident Evil ဂိမ်သတလေမဟာတော့ Sherry Birkin ပဌန်ပါလာမလာသဆိုတာကောတ့ ကျလန်တော်တို့မျဟော်လင့်ရတော့မဟာပါပဲ 📝

အခုဆိုရင်တော့ ရက်ကလန်သမဌို့ပျက်သုန်သခဌင်သဖဌစ်စဉ်မဟာ အသက်ရဟင်လလတ်ဌမောက်ခဲ့ကဌသူတလေရဲ့ ပထမပိုင်သပဌီသဆုံသပါပဌီ။ သိပ်မကဌာတော့တဲ့အချိန်မဟာ အပိုင်သနဟစ်ကိုထပ်မံတင်ဆက်သလာသမဟာမို့ စောင့်ဆိုင်သနိုင်ကဌောင်သပဌောရင်သ ဒီကနေစာဖတ်သူမျာသအာသလုံသကို နဟုတ်ဆက်လိုက်ရပါတယ် 👋

Yan

No comments:

Post a Comment