ရက်ကွန်းမြို့ထဲမှာ Mr.X နဲ့ Nemesis အပါအဝင် စုစုပေါင်း Tyrant ခြောက်ကောင် ရှိနေခဲ့တယ်ဆိုတာ သင်သိပါသလား?

Gamedia ပေ့ချ်ကနေ ပြန်လည်ကြိုဆိုလိုက်ပါတယ်။ ဂိမ်းချစ်သူများကို Resident Evil ဂိမ်းလောကထဲက စိတ်၀င်စားဖို့ကောင်းပြီးလူသိနည်းတဲ့ အ‌ကြောင်းအရာတစ်ခုကို ‌ပြောပြချင်ပါတယ်။ အဲဒါကတော့ ကြောက်မက်ဖွယ်ကောင်းပြီး အဖျက်စွမ်းအားကြီးဇီဝလက်နက်ဖြစ်တဲ့ Mr.X နဲ့ Nemesis အပြင် အခြားသော Tyrant လေးကောင်ကို ညွှန်ကြားချက်အသီးသီးနဲ့ ရက်ကွန်းမြို့ထဲမှာ စေလွှတ်ထားတယ်ဆိုတာပါပဲ။ Resident Evil ချစ်သူများအနေနဲ့ RE2 နဲ့ RE3 မှာ အသီးသီးပါဝင်ခဲ့တဲ့ Mr.X နဲ့ Nemesis ကိုသာ တွေ့ဖူးကြပေမယ့် Umbrella က အခြားသော Tyrant များကလည်း ရည်ရွယ်ချက်ကိုယ်စီနဲ့ ရက်ကွန်းမြို့ရဲ့ရှုထောင့်နေရာအသီးသီးမှာ လှုပ်ရှားနေခဲ့ကြပါတယ်။ အဲဒီတော့ ကျွန်တော်တို့ ကြုံတိုင်းဒူးတုန်အောင်‌ကြောက်ခဲ့ရတဲ့ Tyrant တွေ ဆိုတာဘာလဲ၊ ဘယ်ကစခဲ့လဲ၊ တစ်ဦးချင်းစီရဲ့ လှုပ်ရှားမှုအသီးသီးနဲ့ ရက်ကွန်းမြို့ပျက်သုန်းခြင်းနဲ့ တိုက်ရိုက်ဆက်နွယ်ပုံကို ဖော်ြပပေးသွားမှာဖြစ်ပါတယ်။ စာရေးသူ လေ့လာဆည်းပူးမိသမျှ ဂိမ်းကမ္ဘာများနဲ့ သူတို့နဲ့သက်ဆိုင်တဲ့ အကြောင်းအရာများကို စာဖတ်သူများဆီ အရောက်ပို့ပေးချင်တာကြောင့် ဂိမ်းဆောင်းပါးများကို အချိန်မှန်တင်ဆက်ပေးသွားမှာဖြစ်ပါတယ်။ ဒီလောက်ဆိုရင် ခေါင်းစဥ်ကိုလည်းဖတ်ပြီးလောက်ပြီထင်ပါတယ်၊ ကဲ ဒီတော့ Resident Evil ပရိသတ်တွေ၊ ဂိမ်းဝါသနာရှင်တွေအနေနဲ့ အဆင်သင့်ဖြစ်ပြီဆို စသွားလိုက်ကြရအောင်။

အဖျက်စွမ်းအားအကြီးမားဆုံးဇီဝလက်နက်များအဖြစ် Umbrella က ဖန်တီးထုတ်လုပ်ခဲ့တဲ့ စူပါစစ်သည် Tyrant များ

Resident Evil စီးရီးမှာ Jill တို့၊ Leon တို့လို ကမ္ဘာနဲ့အဝှမ်း လူကြိုက်များတဲ့ဇာတ်ကောင်တွေပြီးရင် ညီတူမျှတူ လူသိများကြတာဟာ ကြည့်လိုက်တာနဲ့ သာမန်အရပ်ထက်နှစ်ပြန်လောက် ပိုမိုထွားကျိုင်းပြီး ခံစားချက်တစ်စိုးတစင်းမှမရှိတဲ့ရုပ်တည်ကြီးတွေနဲ့ ကျွန်တော်တို့နောက်ကို ထပ်ချပ်မကွာ လိုက်တိုက်ခိုက်ကြတဲ့ Tyrant တွေပဲဖြစ်ပါတယ်။ ၁၉၉၆ ခုနှစ်မှာ ပထမဦးဆုံးထွက်ရှိခဲ့တဲ့ Resident Evil 1 မှာကတည်းက Tyrant များဟာ စီးရီးရဲ့ပင်တိုင်ဗီလိန်များဖြစ်ပြီး Wesker တို့ Birkin တို့လို ဂိမ်းပင်မရန်သူများထက် တစ်ဆင့်နိမ့်တဲ့ sub-villain နေရာကနေ ဂိမ်းထဲမှာပါ၀င်လေ့ရှိကြပါတယ်။ ပြိုင်စံရှားလူသားဇီ၀လက်နက်များအဖြစ် စစ်မြေပြင်နဲ့ တိုက်ပွဲများမှာ အသုံးပြုဖို့ရည်ရွယ်ချက်နဲ့ တီဗိုင်းရပ်စ်ကူးစက်မှုကို အသုံးပြုပြီး Tyrant များကို Umbrella က ၁၉၈၈ နဲ့ ၁၉၉၈ ခုနှစ်အတွင်း စတင်စမ်းသပ်ဖန်တီးခဲ့တာဖြစ်ပါတယ်။  Tyrant တွေမှာ သာမန်ဇွန်ဘီများနဲ့မတူတဲ့ ကွဲပြားခြားနားမှုများစွာရှိပါတယ်။ အဲဒီထဲကမှ ထင်သာမြင်သာရှိတဲ့အရည်အသွေးတွေကတော့ Tyrant များဟာ အရွယ်အစားပိုမိုကြီးမားခြင်း၊ ပြင်းထန်တဲ့တိုက်ခိုက်မှုနဲ့ ဒဏ်ရာများကို ကြံ့ကြံ့ခံနိုင်စွမ်းရှိခြင်း၊ အန္တရာယ်အပေါ်မူတည်ပြီး ဖိအားအောက်လျင်မြန်စွာ ပြောင်းလဲခြင်း၊ အသက်ဘေးကြုံရချိန်မှာ ပိုမိုစွမ်းအားမြင့်တဲ့ပုံစံတစ်ခုအဖြစ် ဆင့်ကဲ‌ပြောင်းလဲနိုင်ခြင်း၊ အသိဉာဏ်ပိုမိုမြင့်မားခြင်း၊ အမိန့်ကိုတစ်သွေမတိမ်းလိုက်နာနိုင်ခြင်းနဲ့ လက်နက်အမျိုးအစားမျိုးစုံကိုသုံးစွဲနိုင်ခြင်း စတာတွေပဲဖြစ်ပါတယ်။

Resident Evil 3 Remake ထဲမှာတွေ့နိုင်သလို Tyrant တွေ အ‌မြောက်အမြားထုတ်လုပ်တဲ့နေရာမှာ ရင်သွေးငယ်များမွေးသလိုပဲ မသန်စွမ်းခြင်း၊ ကိုယ်အင်္ဂါအပြည့်အစုံမပါခြင်း၊ အသိဉာဏ်ချို့ယွင်းခြင်း၊ လှုပ်ရှားသွားလာနိုင်မှုမရှိခြင်း အစရှိတဲ့ ပုံပျက် Tyrant များလည်း တွေ့ရတတ်ပါတယ်။ အဲတော့ ဂိမ်မာတိုင်း ကြက်သီးထရတဲ့ ဒီ Tyrant တွေဟာ ဘယ်ကလာသလဲ? ဘယ်သူတွေနဲ့ဆက်နွယ်နေလဲ? သူတို့ဆောင်ရွက်ရမယ့်မစ်ရှင်အသီးသီးက ဘာလဲ? ရက်ကွန်းမြို့ပျက်သုန်းခြင်းနဲ့ ဆက်နွယ်မှုအသီးသီးကို ဆက်ကြည့်လိုက်ကြရအောင်။ တစ်ပုံချင်းထောက်ပြီး ဖတ်ရှုပေးပါ။

Tyrant T-00 (သို့) မစ္စတာအိတ်စ် (Resident Evil 2)

ရှုပ်ထွေးလွန်းလှတဲ့ အမိန့်ညွန်ကြားချက်များကို ထပ်ချပ်မကွာ လိုက်နာဆောင်ရွက်နိုင်စွမ်းရှိပြီး သာမန်လူသားတစ်ယောက်နီးပါး ဉာဏ်ပညာရှိသော ဇီဝလက်နက်ဖြစ်ပါတယ်။ မစ္စတာအိတ်စ်ဟာ ယခင်မော်ဒယ်အဟောင်းများဖြစ်ကြတဲ့ T- 001 နဲ့ T-002 တို့အပေါ် ပြန်လည်မွန်းမံပြင်ဆင်ပြီး အရေအတွက်အများအပြားထုတ်လုပ်ခြင်းနဲ့ ဖြန့်ချိရေးအတွက် အသုံးပြုခဲ့တဲ့ T-003 ဗားရှင်းလည်းဖြစ်ပါတယ်။ T-003 ဟာ ယခင်ဖန်တီးခဲ့တဲ့မော်ဒယ်များထက် နေရာတိုင်းမှာ ပိုမိုသာလွန်တာကြောင့် 003 ဖြစ်ရမယ့်အစား အားလုံးထဲကကွဲပြားအောင် ကုဒ်နာမည် 103 အဖြစ် မှည့်တွင်ခဲ့တာဖြစ်ပါတယ်။ Tyrant တွေမှာ ယေယုယျအားဖြင့်  လျှို့ဝှက်ဖောက်ထွင်းဝင်ရောက်ရေးနဲ့ တိုက်စစ်ဆင်ရေးဆိုပြီး သတ်မှတ်ထားတဲ့ အမျိုးအစားနှစ်မျိုးရှိပါတယ်။ လျှို့ဝှက်ဖောက်ထွင်းဝင်ရောက်ရေး လုပ်ဆောင်ရတဲ့ Tyrant များဟာ လူအဖွဲ့အစည်းထဲ ဝင်ရောက်ရတာကြောင့် လူသားများဝတ်ဆင်တဲ့အဝတ်အစားနဲ့ အသုံးအဆောင်များကို ဝတ်ဆင်သုံးစွဲလေ့ရှိကြပါတယ်။ အဲဒီထဲမှာမှ ကုတ်အကျီရှည်အမည်းနဲ့ ဦးထုပ်ကိုအခန့်သားဆောင်းထားပြီး အားလုံးကြိုက်လည်းကြိုက်၊ ကြောက်လည်းကြောက်ရတဲ့ မစ္စတာအိတ်စ်ဟာ Sherry Birkin ရဲ့လည်ဆွဲထဲက ဂျီဗိုင်းရပ်စ်နမူနာကို ရယူဖို့နဲ့ ရက်ကွန်းမြို့ရဲတပ်ဖွဲ့က ရဲသားတွေအပြင် အသက်ရှင်ကျန်တဲ့ မျက်မြင်သက်သေမှန်သမျှကို အမြစ်ဖြတ်သုတ်သင်ဖို့ စေလွှတ်ခြင်းခံရတာဖြစ်ပါတယ်။ မစ္စတာအိတ်စ် ဝတ်ထားတဲ့ကုတ်အကျီရှည်ဟာ သူ့ရင်ဘတ်မှာပေါ်နေတဲ့ နှလုံးအားနည်းချက်ကို ဖုံးကွယ်ထားဖို့ဖြစ်ပြီး လူအုပ်ထဲဝင်ရောက်ချိန်မှာ အထူးတလည် သတိထားမိခြင်းမခံရအောင်ဖြစ်ပါတယ်။ မစ္စတာအိတ်စ်ဟာ ခန့်မှန်းခြေ အရပ် ၇ ပေခွဲလောက်ရှိပြီး သန်မာထွားကျိုင်းတဲ့ခန္ဓာကိုယ်အရ ပေါင်ချိန် ၄၀၀ လောက်ရှိပါတယ်။ Resident Evil 2 အဆုံးသတ်ခါနီး Leon နဲ့ ရင်ဆိုင်တိုက်ခိုက်နေချိန်မှာ Ada Wong ပစ်ချ‌ပေးလိုက်တဲ့ ဒုံးကျည်နဲ့ပစ်ခတ်ခံရပြီး Tyrant T-103 ခေါ် မစ္စတာအိတ်စ်ဟာ ပျက်စီးသေဆုံးခဲ့ပါတယ်။ 

Tyrant C (Resident Evil: Outbreak 2)

Tyrant C ကတော့ ဂိမ်မာများတွေ့ဖူးမြင်ဖူးနေကြဖြစ်တဲ့ Tyrant များလို စတိုင်မကျတဲ့ ကတုံး Tyrant များလိုမဟုတ်ပါဘူး။ Umbrella ကော်ပိုရေးရှင်းက အောင်မြင်စွာထုတ်လုပ်ပြီးသွားတဲ့ T-003 မော်ဒယ်အချောသတ်အပြီးမှာ ထပ်မံစမ်းသပ်ဖန်တီးထားတဲ့ အမျိုးအစားဖြစ်ပါတယ်။ Tyrant C ဟာ T-003 ရဲ့ အခြေခံမော်ဒယ်ထက် ပိုမိုခွန်အားကြီးပြီး ကျရောက်လာတဲ့ အခြေအနေအပေါ် လိုက်လျောညီထွေပြောင်းလဲနိုင်တဲ့ ခန္ဓာကိုယ်ကိုပိုင်ဆိုင်ထားပေမယ့် ရှိရင်းစွဲခုခံနိုင်စွမ်းကတော့ ပိုမိုနည်းပါးပါတယ်။  Tyrant C ဟာ မီးခိုးရောင်၊ အမည်းရောင်များပဲ ဆင်မြန်းလေ့ရှိတဲ့ Tyrant များနဲ့ ကွဲပြားခြားနားစွာပဲ ခရမ်းရောင်ကုတ်အကျီရှည်ကို ချုံမြန်းထားပြီး နှာဖူးထိပ်မှာဦးဂျိုနှစ်ချောင်းပါတဲ့ ပုံသဏ္ဍန်ရှိပါတယ်။ Tyrant C ဟာ ရက်ကွန်းမြို့ပျက်သုန်းခြင်းဖြစ်စဥ်မှာ တစ်ထောင့်တစ်ခန်းက ပါ၀င်ခဲ့ပေမယ့် အခုအချိန်ထိတော့သူ့ရဲ့ ရဲ့မူလစတင်ခဲ့ပုံ၊ စမ်းသပ်ဖန်တီးပုံအဆင့်ဆင့်နဲ့ စွမ်းအားအတိအကျကို မသိရသေးပါဘူး။ ဒါပေမယ့် သိရှိရသမျှအချက်တွေအရတော့ Resident Evil: Outbreak 2 မှာပါ၀င်ခဲ့တဲ့ Tyrant C ကို မြင်နေကျပုံစံတွေထဲကကွဲထွက်တဲ့ Tyrant လို့တော့ သုံးသပ်နိုင်ပါတယ်။ 

Parasite Tyrant (Resident Evil: Operation Raccoon City)

Resident Evil စီးရီးရဲ့ အကောင်းဆုံးဂိမ်းထွေလာတစ်ခုလို့‌‌ပြောလို့ရတဲ့ ၂၀၁၂ ခုနှစ်မှာထွက်ရှိခဲ့တဲ့ Resident Evil: Operation Raccoon City - Triple Impact ထွေလာကို မှတ်မိကြဦးမယ်ထင်ပါတယ်။ Resident Evil ဆိုတဲ့နာမည်တပ်မရလောက်အောင် ဂိမ်းကတော့စုတ်ပြတ်သတ်နေပေမယ့် တကယ့်အမိုက်စားထွေလာတစ်ခုကို ထုတ်ပေးခဲ့တဲ့ဂိမ်းဖြစ်တယ်ဆိုတာကိုတော့ ငြင်းပယ်လို့မရပါဘူး။ Parasite Tyrant ဟာလည်း အဲဒီဂိမ်းမှာ ကိုယ်နောက်ဆုံးတိုက်ခိုက်ရတဲ့ရန်သူတစ်ဦး ဖြစ်ပါတယ်။ ဂိမ်းတစ်ခုလုံးရဲ့ဇာတ်အိမ်တည်ရာ၊ တည်ဆောက်ထားရာဂိမ်းကမ္ဘာနဲ့ ပါ၀င်တဲ့ဇာတ်ကောင်အဖွဲ့တွေအရတော့ ဒီဂိမ်းဟာ လုံးဝဆွဲဆောင်မှုရှိတဲ့ ဇာတ်အိမ်ရှိပါတယ်။ Umbrella ကော်ပိုရေးရှင်းက ဂျီဗိုင်းရပ်စ်နမူနာကို ရသလိုသယ်ထုတ်လာဖို့နဲ့ သက်သေမှန်သမျှနှုတ်ပိတ်ဖျက်စီးဖို့ Umbrella လုံခြုံ‌‌ရေးအထူးတပ်ဖွဲ့ (Delta Team) ကို ရက်ကွန်းမြို့ထဲ စေလွှတ်ခဲ့ပါတယ်။ တစ်ချိန်တည်းမှာပဲ အမေရိကန်အစိုးရကလည်း တီဗိုင်းရပ်ပြန့်ပွားမှုဟာ Umbrella နဲ့ တိုက်ရိုက်သက်ဆိုင်တဲ့ ‌သက်သေအချက်အလက်များကိုရယူဖို့နဲ့ အသက်ရှင်ကျန်သူများကို ကယ်ထုတ်ဖို့  အမေရိကန်ကျည်းတပ် အထူးစစ်ဆင်ရေးတပ်ဖွဲ့  (Echo Six) ကိုစေလွှတ်ခဲ့ပါတယ်။ သာမန် T-003 Tyrant ဟာ Echo Six ရဲ့နှိမ်နင်းခံရပြီး မကြာခင်မှာပဲ Nemesis Beta ကပ်ပါးကောင်နဲ့ပေါင်းပြီး Parasite Tyrant အဖြစ်ကို အသွင်ပြောင်းသွားတာဖြစ်ပါတယ်။ အခြား Tyrant များနည်းတူ Parasite Tyrant ဟာ သမားရိုးကျတိုက်ခိုက်မှုများကို ခံနိုင်စွမ်းရှိပြီး ကပ်ပါးကောင်ဆိုတဲ့အတိုင်း မြေအောက်မှာ ကူးလူးသွားလာနိုင်စွမ်းနဲ့ ဇွန်ဘီများကိုအလိုရှိသလို ခေါ်ယူနိုင်စွမ်းရှိပါတယ်။ နောက်ဆုံးဗီလိန်ဖြစ်တာကြောင့် စီးရီးရဲ့ထုံးစံအရ အချိန်တစ်ခု‌တော့ပေးပြီး တိုက်ယူရမှာဖြစ်ပါတယ်။ Parasite Tyrant ဟာ Nemesis Beta နဲ့ပေါင်းထားတဲ့ T-003 မော်ဒယ်ကွဲဖြစ်ပေမယ့် နောက်ဆုံးမှာတော့ Echo Six အဖွဲ့သားများရဲ့လက်အောက်မှာ ကျဆုံးခဲ့ပါတယ်။

Tyrant R (Resident Evil: Outbreak 2)

 

Tyrant R ဟာ Resident Evil: Outbreak 2 မှာပါ၀င်တဲ့ Tyrant ဖြစ်ပြီး ရက်ကွန်းမြို့ပျက်သုန်းခြင်း စတင်ဖြစ်ပွားတဲ့ ၁၉၉၈ ခုနှစ်၊ အောက်တိုဘာလ ၁ ရက်နေ့မှာ သက်ဝင်လှုပ်ရှားခဲ့တာ ဖြစ်ပါတယ်။ Tyrant R ဟာ သမားရိုးကျ T-003 မော်ဒယ်ရဲ့ မျိုးစိတ်ခွဲတစ်ခုဖြစ်ပြီး NEST လို ဇီဝလက်နက်များကိုပြုလုပ်စမ်းသပ်တဲ့ Umbrella R&D Center မှာ သိုလှောင်သိမ်းဆည်းထားတဲ့ Tyrant ဖြစ်ပါတယ်။ အခြား Tyrant များနဲ့မတူတဲ့ကွဲပြားခြားနားချက်က Tyrant R ဟာ မူရင်း Tyrant အရည်အသွေးများနဲ့ သိပ္ပံနည်းပညာထည့်သွင်းမှုများကို ပေါင်းစပ်လိုက်တဲ့ နောက်ဆုံးရလဒ်ဖြစ်တယ်ဆိုတာပါ။ Tyrant R ရဲ့အဓိကတာဝန်ကတော့ Umbrella ဓါတ်ခွဲခန်းနဲ့ စက်ရုံကို ပြင်ပတိုက်ခိုက်မှုများမှ ကာကွယ်ရန်ဖြစ်ပါတယ်။ Resident Evil: Outbreak 2 မှာ Hunter များကို ပြန်လည်ခုခံဖို့ သိပ္ပံပညာရှင် Carter ဟာ Tyrant R ကို နှိုးထစေခဲ့ပြီး လွှတ်ပေးလိုက်တာဖြစ်ပါတယ်။ ကိုယ့်အသက်ကာကွယ်မှုရရှိဖို့ Tyrant R ကိုပြန်လည်ပရိုဂရမ်ဆွဲလိုက်ပေမယ့် Carter ကိုယ်တိုင် ပြန်အသတ်ခံခဲ့ရတဲ့အပြင် Tyrant R ဟာ တခြားအသက်ရှင်ကျန်ရှိနေသူများကို ဆက်လက်သတ်ဖြတ်ဖို့ ဦးတည်ချက်ပြောင်းပြီး နောက်မှာ Ada Wong နဲ့ တွေ့ရှိခဲ့ပါတယ်။ သူတစ်ပြန် ကိုယ်တစ်ပြန် အချိန်ကြာရှည်တိုက်ခိုက်အပြီးမှာတော့ Ada Wong ကအနိုင်ရရှိခဲ့ပြီး ရက်ကွန်းမြို့ကိုထိန်းချုပ်ဖို့ အမေရိကန်အစိုးရက ပစ်လွှတ်လိုက်တဲ့ စွမ်းအားမြင့်နျူဒုံးကျည် ထိမှန်ပြီး သေဆုံးခဲ့ပါတယ်။ 

Thanatos (Resident Evil: Outbreak)

Thanatos ဟာ Umbrella ကော်ပိုရေးရှင်းကသိပ္ပံပညာရှင် Greg Muller ဖန်တီးခဲ့တဲ့ Tyrant တွေထဲမှာမှ ထူးခြားတဲ့ မျိုးစိတ်တစ်ခုဖြစ်ပါတယ်။ ရက်ကွန်းမြို့ပျက်သုန်းခြင်းဖြစ်စဥ်မှာ Tyrant အများအပြားကို ထုတ်လုပ်လိုတဲ့ Umbrella ရဲ့ဆုံးဖြတ်ချက်ကို အာခံပုန်ကန်ပြီး Muller ဟာ Thanatos ကို ဖန်တီးထုတ်လုပ်ခဲ့တာဖြစ်ပါတယ်။ Greg Muller ဟာ T-002 ဆီကရရှိထားတဲ့ သုတေသနနဲ့ တိုက်ခိုက်ရေးအချက်အလက်တွေကို အသုံးပြုပြီး T-003 မော်ဒယ်အပေါ်အခြေခံထားတဲ့ Thanatos ကို ပြုလုပ်ခဲ့တာပါ။ တိုက်ခိုက်သတ်ဖြတ်မှုကို အထူးအသားပေးတဲ့ ဇီဝလက်နက်အဖြစ် ရည်ရွယ်ခဲ့ပေမယ့် Thanatos မှာ ပထမဆုံး Tyrant မော်ဒယ်နှစ်ခုလို အားနည်းချက်နှစ်ခုရှိနေတာကို တွေ့ရပါတယ်။ Umbrella ရဲ့ညွန်ကြားချက်ကြောင့် Nikolai ဦးဆောင်တဲ့ Umbrella ဇီဝလက်နက်တန်ပြန်တိုက်စစ်ဆင်ရေးအဖွဲ့ဟာ Thanatos ရဲ့နမူနာကို ရယူဖို့ ရက်ကွန်းမြို့တက္ကသိုလ်ကို ဝင်ရောက်ခဲ့ပါတယ်။ ဒီမစ်ရှင်ဟာ Thanatos ကိုထိန်းချုပ်ခေါ်ဆောင်လို့ရရင် ခေါ်ဆောင်လာဖို့နဲ့ မရခဲ့ရင် အင်အားသုံးဖြိုခွင်းပြီး ကျန်ရှိတဲ့ ရုပ်ကလပ်အကျွင်းအကျန်များကို သယ်ဆောင်လာဖို့ဖြစ်ပေမယ့် စစ်ဆင်ရေးဆောင်ရွက်နေတဲ့အချိန် သွေးနမူနာမရခင်မှာပဲ Thanatos ဟာ တပ်သားများအားလုံးကို သတ်ဖြတ်ခဲ့ပြီး အသက်ရှင်ကျန်သူများကို သုတ်သင်ဖို့  ရက်ကွန်းမြို့ရဲ့လမ်းမတွေဆီ ဦးတည်သွားခဲ့ပါတယ်။ Thanatos ဆီကရရှိတဲ့သွေးနမူနာကို အသက်ရှင်ကျန်သူအချို့က Daylight ဖြေဆေးအဖြစ် ဖော်ဆက်ထုတ်ယူနိုင်ခဲ့ပေမယ့် Thanatos ကိုယ်တိုင်ကတော့ ဘယ်နေရာ‌ရောက်သွားသလဲ မသိခဲ့ရပါဘူး။ အမေရိကန်အစိုးရက ပစ်လွှတ်လိုက်တဲ့ စွမ်းအားမြင့်နျူဒုံးကျည် ထိမှန်ပြီး Thanatos သေဆုံးသွားတယ်လို့ မှတ်ယူနိုင်ပေမယ့် အခုချိန်အထိတော့ တစ်ထစ်ချပြောနိုင်တဲ့ သက်သေအထောက်အထား ခိုင်ခိုင်လုံလုံမရှိသေးပါဘူး။ 

Nemesis T-Type (Resident Evil 3)

STARS ဆိုတဲ့စကားတစ်လုံးကို စွဲစွဲမြဲမြဲရေရွတ်ပြီး ရက်ကွန်းမြို့တစ်ခုလုံးမှာ ကျန်ရှိနေတဲ့ ထိပ်သီးနည်းဗျူဟာချကယ်ဆယ်ရေးတပ်ဖွဲ့ဝင် (S.T.A.R.S) တွေကို သားကောင်အမဲလိုက်သလို လိုက်လံသုတ်သင်တဲ့ Nemesis ဟာ ပရိသတ်တွေအထူးနှစ်သက်ကြတဲ့ Resident Evil ဗီလိန်တစ်ယောက်ဖြစ်သလို Jill ရဲ့ မဟာရန်သူတော်ကြီးလည်း ဖြစ်ပါတယ်။ Nemesis ဟာ ရက်ကွန်းမြို့ပျက်သုန်းမှုဖြစ်စဥ်မှာ တွေ့ရတဲ့ Tyrant ခြောက်ကောင်ထဲမှာ လိုလေသေးမရှိအောင် ပြီးပြည့်စုံတဲ့ အထူးဇီဝလက်နက်ဖြစ်ပါတယ်။ Nemesis ဟာ T-103 မော်ဒယ်နဲ့ Resident Evil 4 ထဲက အားလုံးသိရှိပြီးသား Amber Plagas နဲ့အရည်အသွေးဆင်တူတဲ့ Nemesis Alpha ကပ်ပါးကောင်တို့ ပေါင်းစပ်ထားတဲ့ ပြီးမြောက်သောြဖစ်တည်မှုတစ်ခုပါပဲ။ Resident Evil 1 မှာ Chris, Jill, Barry နဲ့ Rebacca တို့ပါ၀င်တဲ့ Alpha အဖွဲ့က Arklay ဓါတ်ခွဲခန်းကို ဖြိုခွင်းဖျက်ဆီးလိုက်တဲ့ နောက်ဆက်တွဲရလဒ်ကတော့ Umbrella က သာမန်လူတွေ ပုံမှန်နည်းနဲ့တိုက်ယူလို့မရတဲ့ အင်အားကြီးဇီဝလက်နက်အဖြစ် Nemesis ကို ဖန်တီးတည်ဆောက်ခဲ့တာပါပဲ။ ရက်ကွန်းမြို့မှာစေလွှတ်ထားတဲ့ အခြားသော Tyrant တွေဟာ ခွေးတစ်ကောင်၊ ကြောင်တစ်မြီးမကျန်အောင် အသက်ရှင်ကျန်တဲ့သတ္တဝါမှန်သမျှကို သုတ်သင်ရမှာဖြစ်ပေမယ့် အားလုံးထက်ပို အစစအရာရာသာလွန်တဲ့ Nemesis ရဲ့ ပိုမိုလေးနက်ရှုပ်ထွေးတဲ့ တစ်ခုတည်းသောညွန်ကြားချက်ကတော့ ကျန်ရှိသူ S.T.A.R.S အဖွဲ့ဝင်များကို တွေ့တဲ့နေရာမှာ တွေ့သလို ရှာဖွေသတ်ဖြတ်ဖို့ပဲ ဖြစ်ပါတယ်။ Nemesis ဟာ အခြားသော Tyrant များထက် ပိုလျင်မြန်တယ်၊ ခွန်အားကြီးတယ်၊ ပတ်ဝန်းကျင်ကိုအခြေအနေကို ဖတ်ရှုနိုင်စွမ်းရှိတယ်၊ ခံနိုင်ရည်ပိုမိုကောင်းမွန်ပြီး ဘယ်လိုအဆင့်မြင့်လက်နက်ကိုမဆို အလွယ်တကူ အသုံးပြုနိုင်တဲ့အပြင် အသက်သေဆုံးနိုင်တဲ့ဘေးအန္တရာယ်တစ်ခုခုကြုံတိုင်းမှာ တစ်ခေါက်ထပ်ပိုတဲ့ သန္ဓေပြောင်းနိုင်စွမ်းလည်းရှိပါတယ်။ Tyrant တွေထဲမှာ အထာအကျဆုံးနဲ့ ကြောက်ဖို့အကောင်းဆုံးဟာ Nemesis လို့ ကျွန်တော်ယူဆပါတယ် (ဂိမ်းဆော့ကစားပုံအရမဟုတ်ပဲ ဂိမ်းလောကတည်ဆောက်ထားပုံအရ) ကျွန်တော်ကိုယ်တိုင်လည်း Jill ရဲ့ အမာခံချစ်သူဖြစ်ပေမယ့် plot armor သာမပါခဲ့ရင် Jill ဟာ Nemesis အောက်မှာ Jill Sandwich ဖြစ်ရုံသာမက ဖျော်သောက်လို့ရတဲ့ အမှုန့်ပါဖြစ်နေလောက်မှာ သေချာပါတယ်။

ကဲ ဒီပို့စ်ကနေ ရက်ကွန်းမြို့ပျက်သုန်းခြင်းဖြစ်စဥ်မှာ တွေ့နိင်တဲ့ Tyrant ခြောက်ကောင်ကို ‌ဖော်ပြပေးလိုက်ပါတယ်။ နောက်လာမယ့်စာစောင်တွေမှာလည်း စာရေးသူ လေ့လာဖတ်ရှုမိတဲ့ ဂိမ်းအကြောင်းအရာများကို ပြန်လည်ဖော်ပြပေးသွားမှာမို့ ဒီအပါတ်အတွက် ဒီလောက်နဲ့ကျေနပ်ကြလိမ့်မယ်လို့ ထင်ပါတယ်။ ဖတ်ရှုသူတိုင်းကိုကျေးဇူးအထူးတင်လျက်ပါ၊ ဂိမ်မာများအားလုံး ကိုယ့်ဘဝတစ်လျှောက်မှာ စိတ်ကုန်အားလျော့ခြင်းမရှိဘဲ ကိုယ်ချစ်တဲ့ဂိမ်းတွေကို အချိန်မှန်ဆော့ကစားနိုင်ကြပါစေ။

Yan

ကျွန်တော်ကိုယ်တိုင် မြန်မာမှုပြုပြီး Localize လုပ်ထားသော ဂိမ်းစကားလုံးများနဲ့ ၂၀၂၄ မှာ Yan’s Gamedia ပေ့ချ်ကို ပြန်လည်အသက်သွင်းခြင်း

အားလုံးပဲမင်္ဂလာပါ။ Gamedia ကနေကြိုဆိုပါတယ်။ ဂိမ်းနဲ့ပတ်သက်တဲ့ဆောင်းပါးများကို ၂၀၂ဝ မှာနောက်ဆုံးတင်ခဲ့တာဖြစ်လို့ စာဖတ်သူအတော်များများက ပေ့ချ်နဲ့အဆက်ပြတ်နေကြမယ်၊ မေ့လျော့နေကြမယ်ဆိုတာ နားလည်ပါတယ်။ ဒီကြားနှစ်များမှာ ပေ့ချ်ကိုပြန်လည်အသက်သွင်းဖို့ အတွေးရခဲ့ပေမယ့် ဖြစ်ပျက်နေတဲ့ပြည်တွင်းအချင်းအရာများနဲ့ မအားလပ်ခဲ့တဲ့ ကိုယ်‌ရေးကိုယ်တာအလုပ်ကြောင့် အဲဘက်လှည့်ဖို့ အချိန်မပေးနိုင်ခဲ့ပါဘူး။ စာရေးပြီးသာ မတင်ဖြစ်ခဲ့ပေမယ့် ဂိမ်းတွေကိုအမြဲပုံမှန်ဆော့ဖြစ်နေသူမို့ ၂၀၂၄ မှာတော့ ကိုယ်လေ့လာသိရှိခဲ့တဲ့ ဂိမ်းအကြောင်းအရာများကို ဗဟုသုတဖြစ်ဖွယ်၊ မှတ်သားဖွယ်၊ စိတ်ဖျော်ဖြေမှုတစ်ခုအနေနဲ့ ဂိမ်းချစ်သူများဆီကို ပြန်လည်အရောက်ပို့ပေးသွားဖို့ ရည်ရွယ်ထားပါတယ်။

 

၂၀၁၉ ခုနှစ်မှာ ပေ့ချ်ကိုစထောင်ရတဲ့ရည်ရွယ်ချက်ကိုက ကျွန်တော်ဟာ ၂၀၁၇ ခုနှစ်လောက်တည်းက မြန်မာနိုင်ငံရဲ့တစ်ခုတည်းသော ဂိမ်းဂျာနယ်ဖြစ်တဲ့ Gamers Magazine မှာ ဂိမ်းနဲ့နိုင်ငံရေးအကြောင်းရေးသားနေတဲ့ ပင်တိုင်ဆောင်းပါးရှင်လည်းဖြစ်၊ ပြည်တွင်းမီဒီယာများမှာ ဂိမ်းနဲ့ပတ်သက်သမျှကို စာစောင်ပို့ပေးနေတဲ့ contributor ဖြစ်သူမို့ ကိုယ်ရေးသားခဲ့သမျှကို တစ်နေရာတည်းမှာ တစ်စုတစည်းတည်း ဖတ်လိုသူများ ဝင်ရောက်ဖတ်ရှုနိုင်စေချင်တာ ဖြစ်ပါတယ်။ ဒါ့အပြင် ကျွန်တော်နှစ်သက်တဲ့ဂိမ်းစီးရီးတွဲများနဲ့ အဲဒီဂိမ်းလောကထဲက လူသိနည်းတဲ့အ‌ကြောင်းအရာများကို ဆွဲဆောင်မှုရှိရှိ မြန်မာမှုပြုရင်း ပြည်တွင်းဂိမ်းလောကကို တစ်ဖက်တစ်လမ်းကအကျိုးပြုတဲ့ ဂိမ်းဆောင်းပါးများ ထုတ်နှုတ်ရေးသားသွားဖို့ ဖြစ်ပါတယ်။ ဂိမ်းအကြောင်းရေးသားခြင်းဟာ သာမန်သမားရိုးကျ အလုပ်တစ်ခုလို အကျိုးခံစားခွင့်တစ်ခုစိုးစင်းမျှမရှိတာကြောင့် ကျွန်တော့်ရဲ့ဆောင်းပါးများကို ဖတ်ရှုပြီး စာဖတ်သူဂိမ်မာတွေအနေနဲ့ ခံစားမှုရသတစ်ခု၊ မသိသေးတဲ့သုတတစ်ခု၊ စိတ်အပန်းပြေမှုတစ်ခု ရသွားပြီဆိုရင်ဖြင့် ရေးသားရကျိုးနပ်တယ်လို့ ယူဆပါတယ်။

ကဲ စကားဦးသန်းတာတွေလည်း စာနှစ်ပိုဒ်လောက်ရှည်ခဲ့ပါပြီ၊ ဆောင်းပါး ခေါင်းစဥ်ကိုဖတ်ရှုပြီးလောက်ပြီလို့လည်း ယူဆပါတယ်။ အဲဒါကြောင့် အလွမ်းသယ်မိတ်ဆက်တာတွေကို ခဏလျှော့ရင်း ကျွန်တော်ကိုယ်တိုင် မြန်မာမှုပြုထားသော ဂိမ်းစကားလုံးများကို ကျွန်တော့်လိုဂိမ်းချစ်သူ၊ ဂိမ်းဆောင်းပါးရှင်များ ချဲ့ထွင်ကိုးကားအသုံးပြုလို့ရအောင် ဒီကနေ ပြန်လည်မျှ‌ဝေလိုက်ပါတယ်။ ၂၀၁၇ ခုနှစ်ကတည်းက ရေးသားခဲ့သမျှကို ပြန်လည်ထိုးဖောက်ရှာဖွေရင်း ရယူခဲ့တဲ့စကားလုံးများဖြစ်လို့ ကျန်ရှိခဲ့တာတွေလည်း ရှိနိုင်ပါတယ်။ ဖေ့ဘုတ်မှာမဟုတ်ဘဲ ကျွန်တော့်ရဲ့ကိုယ်ပိုင်ဘလော့မှာ ဝင်ရောက်ဖတ်ရှုလိုသူများအတွက် ဘလော့လိပ်စာလေးကို အောက်မှာပေးထားပါတယ်။ စာဖတ်သူတစ်ယောက်ရဲ့အကြံပေးမှုကြောင့် ဘလော့ကဆောင်းပါးများအားလုံးကို ဇော်ဂျီဖောင့်ကနေ ယူနီကုတ်သို့ အားလုံးပြန်လည်ပြောင်းလဲထားပါတယ် (အချို့တစ်ဝက်ကျန်ရှိနေသေး) https://gamedia-myarchive.blogspot.com/

မြန်မာမှုပြုရခြင်း၏ ရည်ရွယ်ချက်

ဘာကြောင့်မို့ ရှိရင်းအတိုင်းမရေးဘဲ မြန်မာမှုပြုတာလည်းဆိုရင်တော့ အဖြေကရိုးရှင်းပါတယ်။ ဂိမ်းအကြောင်းရေးတဲ့ပို့စ်အတော်များများကို ကြည့်လိုက်ရင် မြန်မာစာတွေထဲ အင်္ဂလိပ်စကားလုံးအမြောက်အမြား ထည့်သွင်းသုံးစွဲတာကိုတွေ့ရမှာပါ။ (ဥပမာ ဒီဂိမ်းရဲ့ mechanic ကတော့ ဒီလိုရှိပြီး genre ဟာ first-person looter shooter ဖြစ်တဲ့အတွက် game store မှာ microtransaction အ‌‌မြောက်အမြား ပါဝင်တာကိုတွေ့ရမှာပါ စသဖြင့်) ဒီဝါကျကို ဗီဒီယိုဂိမ်းများနဲ့ရင်းနှီးသူတစ်‌ယောက်ယောက်က ဖတ်လိုက်မယ်ဆိုရင် ချက်ချင်းနားလည်နိုင်ပေမယ့် မရင်းနှီးသူတွေအနေနဲ့ဖတ်ရတာ လွန်စွာမှကသိကအောက်ဖြစ်ပါတယ်။ ကျွန်တော်ရေးတဲ့ပို့စ်အများစုမှာလည်း အင်္ဂလိပ်ဘာသာစကားသုံးစွဲခြင်းကို တက်နိုင်သမျှ ကန့်သတ်ထားတာကို သတိထားမိရင် တွေ့မြင်ရပါလိမ့်မယ်။ နောက်တစ်ခုကတော့ နိုင်ငံကြီးတိုင်းအတွက် သူတို့နဲ့သက်ဆိုင်တဲ့ဘာသာစကားများကို ဂိမ်းတွင်းမှာ အချောပြန်ဆိုပြီးသားဖြစ်ပါတယ် (ဥပမာ စပိန်၊ ပေါ်တူဂီ၊ တရုတ်၊ ဂျပန်၊ ရုရှား၊ ပြင်သစ် အီတလီ စသဖြင့်) အဆိုပါနိုင်ငံများက ဂိမ်းဆော့ကစားသူများဟာ ဂိမ်းတွင်းဖော်ပြပါဘာသာစကားနဲ့ စကား‌ပြောကို သူတို့ရဲ့မိခင်ဘာသာစကားအဖြစ် ဂိမ်း setting ထဲဝင်ပြီးပြောင်းလိုက်ရုံပါပဲ။ ဒါ့အပြင် မြန်မာနိုင်ငံသားများအနေနဲ့ ဂိမ်းများနဲ့ပတ်သက်တဲ့ဆောင်းပါးများကို စနစ်တကျရေးပုံရေးနည်း မသတ်မှတ်ထားဘဲ ကြုံသလိုရေးနေမယ်ဆိုရင် မြန်မာစာ၊ အင်္ဂလိပ်စာအရောကြီးဖြစ်နေတဲ့အတွက် ကြည့်ရတာ မြင်မကောင်းရှုမကောင်းလှပါဘူး။ အဲအတွေးနဲ့ ကျွန်တော်နားလည်တတ်ကျွမ်းသောဂိမ်းများထဲမှ စကားလုံးများကို မြန်မာပြုပြန်လည်ပြုရတာဖြစ်ပါတယ်။ ငယ်စဥ်အခါက စာစီစာကုံးတွေမှာတောင် အင်္ဂလိပ်စာသုံးစွဲခွင့်မရှိပါဘူး၊ ဒါကြောင့်မို့ ဂိမ်းဆောင်းပါးရှင်တစ်ယောက်ဖြစ်တဲ့အနေနဲ့ ဂိမ်းစာစောင်များမှာ တတ်နိုင်သမျှ မြန်မာစကားဖြင့်သာ ထည့်သွင်းရေးသားလိုတဲ့ ရည်ရွယ်ချက်နဲ့ ဒီဆောင်းပါးကိုအခုလိုရေးသားမျှ‌ဝေလိုက်ပါတယ်။

ကျွန်တော် မြန်မာမှုပြု၊ မြန်မာပြန်ထားသောဂိမ်းစကားလုံးများ

 

Game World = ဂိမ်းလောက (ဂိမ်းတစ်ခုရဲ့တည်ဆောက်ထားပြီး ရှိရင်းစွဲလောကကို ဆိုလိုခြင်းဖြစ်ပါတယ်)

Game Mechanics = ဂိမ်းဆော့ကစားပုံ

Game Style = ဂိမ်းဆော့ကစားဟန်

Game Character = ဂိမ်းဇာတ်ကောင်

Game Content = ဂိမ်းဆောင်းပါး၊ ဂိမ်းစာစောင်

Game Article = ဂိမ်းဆောင်းပါး၊ ဂိမ်းစာစောင်

Game Genre = ဂိမ်းအမျိုးအစား (သို့) ဂိမ်းရသ

Game Franchise = ဂိမ်းစီးရီး (သို့) ဂိမ်းတွဲ

Game Plot = ဂိမ်းဇာတ်ကြောင်း

Game Console = ဂိမ်းစက်

Game Engine = ဂိမ်းအင်ဂျင်

Game Designer = ဂိမ်းဒီဇိုင်းပညာရှင်

Game Developer = ဂိမ်းရေးဆွဲဖန်တီးသူ

Game Publisher = ဂိမ်းထုတ်လုပ်ဖြန့်ဝေသူ

Game Journalist = ဂိမ်းဂျာနယ်လစ်

Next Generation = မျိုးဆက်သစ်ဂိမ်းလောက

Microtransaction = ဂိမ်းတွင်းပစ္စည်းဝယ်ယူမှု

Story-driven Game, Linear Game = ဇာတ်လမ်းအသားပေးဂိမ်း

Single Player Game = တစ်ကိုယ်တော်ဇာတ်လမ်းသွားဂိမ်း

Multiplayer Game = နှစ်‌ယောက်ဆော့ဂိမ်း၊ ကစားသူတစ်ဦးထက်ပိုသောဂိမ်း

Live-service Game, Service-based Game = ဝန်ဆောင်မှုအခြေခံဂိမ်း

Action Game = အက်ရှင်ဂိမ်း

Adventure Game = စိတ်စွန့်စားလွတ်လပ်မှုကိုအခြေခံသောဂိမ်း

Strategy Game = ဗျူဟာဆွဲရသောဂိမ်း

Horror Game = ‌စိတ်ခြောက်ခြားစရာဂိမ်း (သို့) သရဲဂိမ်းး

Bioweapon = ဇီဝလက်နက်

Bioterrorism = ဇီဝအကြမ်းဖက်မှု

Mutation = သ‌န္ဓေပြောင်းခြင်း၊ မှု

Raccoon Destruction = ရက်ကွန်းမြို့ပျက်သုန်းခြင်း

Raccoon Destruction Incident = ရက်ကွန်းမြို့ပျက်သုန်းခြင်းဖြစ်ရပ်

R.P.D (Raccoon Police Department) = ရက်ကွန်းမြို့ရဲတပ်ဖွဲ့

S.T.A.R.S (Special Tactic and Rescue Squad) = ထိပ်သီးနည်းဗျူဟာချကယ်ဆယ်ရေးအဖွဲ့

B.S.A.A (Bio-terrorism Security Assessment Alliance) = ကမ္ဘာလုံးဆိုင်ရာဇီဝအကြမ်းဖက်မှုတိုက်ဖျက်ရေးမဟာမိတ်အဖွဲ့

U.B.C.S (Umbrella Biohazard Countermeasure Service) = ဇီဝလက်နက်တန်ပြန်စစ်ဆင်ရေးတပ်ဖွဲ့

Norse Mythology = နော့စ်ဒဏ္ဍာရီ

The Nine Realm = နော့စ်ဒဏ္ဍာရီလောကကိုးသွယ်

Fall of Olympus = အိုလံပက်စ်မြို့ကျဆုံးပျက်စီးခြင်း

ဒါတွေကတော့ ကျွန်တော် ရေးသားဖန်တီးခဲ့တဲ့ ၆ နှစ်အတွင်း ပြန်လည်ရှာဖွေလို့ရတဲ့စကားလုံးတွေကို စုစည်းဖော်ပြခြင်းဖြစ်ပါတယ်။ ကိုယ်ဝါသနာပါရာ၊ ပိုပြီးဗဟုသုတကြွယ်ဝရာ ဂိမ်းအမျိုးအစားအလိုက် မြန်မာမှုပြုရမယ့် စကားလုံးပေါင်းမြောက်မြားစွာ ကျန်ရှိနေပါတယ်။ ကျွန်တော့်လိုဂိမ်းဆောင်းပါးရှင်များအနေနဲ့ စာပေများရေးသားရာမှာ ပိုမိုလွယ်ကူချောမွေ့အောင်၊ ပြန်လည်ကိုးကားပြီးအသုံးပြုနိုင်အောင် ရည်ရွယ်သလို ကိုယ်ပိုင်စကားလုံးများရှိပါကလည်း အနှစ်ပြန်ချုပ်ဖို့ ပို့ပေးစေချင်ပါတယ်။ ဘလော့နဲ့ ပေ့ချ်မှာပြန်ပြီး တစ်ပါတ်တစ်ပို့စ်တင်နိုင်အောင် ကြိုးစားသွားပါမယ်။ စိတ်ဝင်စားဖို့ကောင်းပြီး ရင်ခုန်ရမယ့် ဂိမ်းအကြောင်းအရာများစွာနဲ့ စာဖတ်သူများစီ တစ်ကြော့ပြန်လာခဲ့ပါ့မယ်။ ဖတ်ရှုသူတစ်ယောက်ချင်းကို ကျေးဇူးအထူးတင်လျက်ပါ။

Yan