သေရွာပြန်ဖာရိုဘုရင်တွေ၊ ကြိမ်စာသင့်မာမီ Mummy တွေနဲ့ အီဂျစ်နတ်ဘုရားတွေအပါအဝင် စစ်အင်အားကြီးရိုမန်တွေနဲ့ရင်ဆိုင်ရမယ့် Assassin's Creed Origins ရဲ့ DLC အသစ်များ

Assassin's Creed စီးရီးရဲ့ဂိမ်းအသစ်ဖြစ်တဲ့ Assassin's Creed Origins ကို ဂိမ်မာများ အားလုံးကမျှော်လင့်ချက်ကြီးစွာ စောင့်မျှော်နေကြပါပြီ။ ရှေးကျလှတဲ့ခေတ်ဟောင်းအီဂျစ်ပြည်မှာ ဇာတ်အိမ်တည်ထားပြီး ဂိမ်းရဲ့အဓိကဇာတ်ကောင်ဖြစ်တဲ့ ဆူဒန်မြို့မြောက်ပိုင်းသား Bayek ကို အရာအားလုံးကိုစတင်ခဲ့တဲ့ Assassin Brotherhood ကြီးနဲ့အတူ တီဗီဖန်သားပြင်ပေါ်မှာ အားလုံးကမြင်နေကြပြီဆိုတာအသေအချာပါပဲ။ အရင်ခွေတွေနဲ့မတူဘဲ Assassin Brotherhood ကြီး ဘယ်လိုမျိုးဖြစ်ပေါ်လာသလဲဆိုတဲ့ဇာတ်ကြောင်းနဲ့ တစ်မူထူးခြားသွားတဲ့တဲ့ဂိမ်းကစားပုံစံ၊ ကွဲပြားတဲ့ဂိမ်းတွင်းလုပ်ဆောင်ချက်အသစ်တွေနဲ့ အနုပညာမြောက်စွာဖန်တီးထားတဲ့ Assassin Creed Origins ကို Ubisoft ကအရှိန်အဟုန်ကောင်းကောင်းနဲ့ ပရိသတ်တွေဆီတစ်ကျော့ပြန်တင်ဆက်လိုက်ပြန်ပါပြီ။

Ubisoft အနေနဲ့ AC စီးရီးရဲ့ထွက်ရှိခဲ့သမျှဂိမ်းတိုင်းအတွက် expansion တွေအမြဲတမ်းပေါင်းထည့်လေ့ထည့်ထမရှိခဲ့ပေမယ့် အမေရိကန်တော်လှန်ရေးစစ်သမိုင်းကိုအခြေခံထားတဲ့ Assassin's Creed 3 အတွက် King Of The Washington နဲ့ Tyranny Of The King, Assassin တစ်ဖြစ်လဲ၊ ပင်လယ်ဓါးပြတစ်ယောက်ရဲ့ဘဝကို လက်တွေ့ကျကျခံစားရမယ့် Assassin's Creed Black Flag အတွက်ဆိုရင် Freedom Cry, ဒုတိယမြောက်စက်မှုတော်လှန်ရေးဖြစ်ပွားနေတဲ့ကာလ၊ ၁၈ ရာစုနှောင်းလန်ဒန်မြို့နဲ့ အဲဒီအချိန်တဝိုက်ကလန်ဒန်မြို့အတွင်း ကြီးစိုးကျက်စားနေတဲ့လူဆိုးဂိုဏ်းတွေကိုပုံဖော်ပေးထားတဲ့ Assassin's Creed Syndicate အတွက်ဆိုရင်တော့ Jack The Ripper, အစရှိတဲ့ DLC (downloadable contents) ထပ်ပေါင်းဂိမ်းတွေပေါင်းထည့်ပေးပြီး မူရင်းဂိမ်းကိုအခြေခံထားတဲ့ ဂိမ်းတွင်းအတွေ့အကြုံသစ်တွေပေးစွမ်းခဲ့ပါတယ်။ AC ဂိမ်းတိုင်းရဲ့ဇာတ်ကြောင် း တွေဟာ နိုင်ငံအသီးသီး၊ ခေတ်အသီးသီးက တကယ့်ဖြစ်ရပ်မှန်သမိုင်းကြောင်းတွေအပေါ်မှာ အခြေခံထားတာဖြစ်တဲ့အတွက် AC ဂိမ်းတွေမှာ ထပ်မံပေါင်းထည့်ထားတဲ့ DLC တွေဟာလည်း သူတို့မူရင်းဂိမ်းရဲ့သမိုင်းကြောင်းတွေနဲ့ တစ်နည်းမဟုတ်တော့တစ်နည်း ဆက်နွယ်နေစမြဲပါ။ ဒီတော့ အခုနောက်ဆုံး Origins အခွေသစ်မှာရောဘယ်လိုမျိုး ထပ်ပေါင်း DLC တွေပါလာမလဲ? ထွက်လာဖို့ရောအစီအစဉ်ရှိရဲ့လား? အဲဒီလိုမေးခွန်းထုတ်နေသူများအတွက် အဖြေကရှိနေပါပြီ။ ဂိမ်မာများအားလုံးစိတ်ကြိုက် တစ်ဝကြီးအပိုဆောင်းဆော့ကစားနိုင်စေဖို့ Assassin's Creed Origins မှာမူရင်းဂိမ်းအပြင် Gold Edition, Deluxe Edition နဲ့နောက်ထပ် DLC နှစ်ခုကိုထပ်မံထည့်သွင်းပေးသွားမှာပါ။ ဒီတော့နောက်ထပ်ပေါင်းထည့်မယ့် DLC တွေကဘယ်လိုမျိုးလဲ? ဘယ်လိုမျိုးနောက်ခံသမိုင်းဇာတ်ကြောင်းတွေပါဝင်မလဲ? အစရှိနေတာတွေကိုစုစည်းပြီး ဂိမ်မာများအားလုံးသိရှိစေဖို့ ဒီကနေဖော်ပြလိုက်ရပါတယ်။

နယ်မြေသစ်ကိုကျူးကျော်ဝင်ရောက်လာတဲ့ အင်အာကြီးရိုမန်တွေရဲ့ရင်ဆိုင်ရမယ့် The Hidden Ones

သမိုင်းကြောင်းအရ ဘုရင်မကီလီယိုပတ်တရာရဲ့ချစ်သူ စစ်သူကြီးမက်ခ်အန်ထော်နီဟာ သူ့နဲ့အချစ်ပြိုင်ဖက်ဖြစ်တဲ့ အော်ခ်တဗီယန်ကိုရှုံးနိမ့်သွားပြီးနောက်ပိုင်းမှာ အီဂျစ်ပြည်ကြီးဟာရိုမန်တွေရဲ့သိမ်းပိုက်မှုကိုခံခဲ့ရပြီး ၃၀ ဘီစီနောက်ပိုင်းမှာတော့ အီဂျစ်ပြည်ကြီးကို ရိုမန်လက်အောက်ခံနယ်တစ်ခုအဖြစ် ပြန်လည်ထူထောင်လိုက်ပါတယ်။ အခုလည်းဒီ DLC မှာ Assassin ဖြစ်သူအဓိကဇာတ်ဆောင် Bayek ဟာ အဲဒီလိုကျူးကျော်ဝင်ရောက်လာတဲ့ အင်အားကြီးရိုမန်တပ်တွေရဲ့သိမ်းပိုက်မှုကနေ အီဂျစ်ပြည်ကြီးကိုဘယ်လိုမျိုးကာကွယ်သွားမလဲဆိုတာကို ဂိမ်မာများမျက်ဝါးထင်ထင်တွေ့မြင်ရုံတင်မက Bayek နေရာကနေဝင်ရောက်ပြီးခံစားနိုင်မှာပါ။ ပြင်းထန်လှတဲ့စစ်ပွဲတွေနဲ့ အီဂျစ်ပြည်၊ ရိုမန်စစ်တပ်အင်အားချင်းပြိုင်မှုတွေကြား တကယ့်သမိုင်းထဲကအတိုင်းရှုံးနိမ့်သွားမလား? ဒါမှမဟုတ် ဂိမ်မာတွေကပဲသမိုင်းကိုကိုယ်တိုင်ပြောင်းလဲနိုင်မလား? အဆုံးသတ်ကဘယ်လိုမျိုးဖြစ်သွားမလဲဆိုတာတော့ ဂိမ်မာတွေအပေါ်မှာမူတည်နေပါတယ်။ 

သမိုင်းတစ်ခေတ်ကသေရွာပြန်ဖာရိုဘုရင်တွေ၊ မာမီဖုတ်ကောင်တွေနဲ့ရင်ဆိုင်ရမယ့် The Curse Of The Pharoahs DLC

The Mummy ရုပ်ရှင်ဇာတ်ကားကို အားလုံးမှတ်မိကြမယ်ထင်ပါတယ်။ ရှေးခေတ်အီဂျစ်ပြည်မှာကျင့်သုံးခဲ့တဲ့ ရက်စက်ကြမ်းကြုတ်တဲ့ဘုရင်စနစ်၊ ကန္တာရကင်းမြီးကောက်ကြီးတွေနဲ့ အသက်ပြန်ဝင်လာတဲ့မာမီရုပ်အလောင်းတွေကို အတိုင်းသားတွေ့မြင်ခဲ့ရလို့ ပရိသတ်တွေလုံးဝအကြိုက်တွေ့ခဲ့တဲ့ရုပ်ရှင်ဖြစ်ပါတယ်။ ဒါပေမယ့်အခုဒီ The Curse Of The Pharoahs ဆိုတဲ့ DLC မှာ အဲဒါတွေအားလုံးကို Assassin တစ်ယောက်အနေနဲ့ဂိမ်မာတွေကရင်ဆိုင်ရမှာပါ။ အသက်ပြန်ဝင်လာတဲ့ဖာရိုဘုရင်ရုပ်အလောင်းတွေ၊ အဆမတန်ကြီးမားလှတဲ့ကင်းမြီးကောက်ကြီးတွေ၊ ပိရမစ်ထဲက မာမီအလောင်းကောင်တွေ အစရှိတဲ့ရန်သူသစ်တွေကို Assassin တစ်ယောက်ဖြစ်တဲ့အဓိကဇာတ်ကောင် Bayek အနေနဲ့ ချွပ်ချွပ်ချုံချုံရင်ဆိုင်တိုက်ပွဲရမှာပါ။ AC ဂိမ်းစီးရီးအနေနဲ့ အမြဲတမ်းလက်တွေ့ဆန်တဲ့ဇာတ်ကြောင်းမျိုးကိုသာ ဂိမ်းအတွင်းမှာဖော်ပြလေ့ရှိခဲ့ပေမယ့် အခုဒီမှာတော့ စိတ်ကူးယဉ်ဒဏ္ဍာရီတစ်ခုသဖွယ်လူတွေသမုတ်ကြတဲ့ ဟိုးသမိုင်းတစ်ခေတ်ကသေရွာပြန်ဖာရိုဘုရင်တွေနဲ့ မာမီအလောင်းကောင်တွေဆီပြန်လည်ခေါ်ဆောင်သွားတော့မှာပါ။

လက်နက်ဝတ်စုံသစ်တွေပါဝင်တဲ့ပက်ကေ့ချ်နှစ်မျိုးနဲ့ အီဂျစ်နတ်ဘုရားတွေနဲ့ကြုံတွေ့ရမယ့် Trial Of Gods

Assassin's Creed Origins ကိုမူရင်းဂိမ်းချည်းပဲမဟုတ်ပဲ Edition ဗားရှင်းတွေကိုဝယ်ယူသူများအဖို့တော့ ဝတ်စုံအသစ်နဲ့လက်နက်အသစ်တွေပါဝင်တဲ့ ပက်ကေ့ချ်နှစ်ခုကိုထပ်ဆောင်းရရှိသွားမှာပါ။ အဲဒီပက်ကေ့ချ်တွေကတော့ ရိုမန်စတိုင်လက်နက်နဲ့ဝတ်စုံတွေပါဝင်တဲ့The Roman Centurian Pack နဲ့ ကန္တာရလက်နက်ဝတ်စုံသစ်တွေကိုအသုံးပြုခွင့်ရမယ့် Horus Pack တို့ပဲဖြစ်ကြပါတယ်။ အဲဒီလိုအခကြေးငွေနဲ့ဝယ်ယူရမယ့် add-ons တွေအပြင် အခမဲ့ရရှိနိုင်မယ့်ကဏ္ဍတွေအနေနဲ့ ဂိမ်းစတင်ဖြန့်ချိပြီး အချိန်ဆယ့်ငါးရက်အကြာမှာဆော့ကစားခွင့်ရှိမယ့် အီဂျစ်နတ်ဘုရားဘော့စ်တွေနဲ့တိုက်ပွဲတွေပါဝင်တဲ့ Trail Of Gods ကဏ္ဍ၊ ဂိမ်းလောကကြီးထဲမှာလှည့်လည်သွားလာနေရင်းကနေ လျှိ့ဝှက် ကုန် သည်တစ်ယောက်ပေးအပ်တဲ့ နေ့စဉ်တာဝန်တွေကို ပြီးမြောက်အောင်ထမ် း ဆောင်သွားရင် တန်ဖိုးမြင့်ဆုပစ္စည်း တွေရရှိမယ့် The Nomad Bazaar's ကဏ္ဍ၊ ဒါ့အပြင်လူသတ်ကွင်းပြင်ကျယ်ကြီးထဲမှာ ရန်သူတွေကိုတစ်ကြော့ပြီးတစ်ကြော့ရင်ဆိုင်ရမယ့် Horde Mode နဲ့ဂိမ်းတွင်းပုံရိပ်တွေကို လိုသလိုဖမ်းယူရိုက်ကူးနိုင်မယ့် Photo Mode တွေကိုလည်း ဂိမ်မာတွေအတွက်ထည့်သွင်းပေးထားပါတယ်။

DLC များထွက်ရှိလာမယ့်ရက်စွဲအသီးသီး၊ သိရှိရသမျှနဲ့ အနှစ်ချူပ်

Assassin's Creed Origins ကို PC, PS4 နဲ့ Xbox ပလက်ဖောင်းများမှာ အသီးသီးဆော့ကစားနိုင်မှာဖြစ်တဲ့အတွက်ဂိမ်း DLC များဟာလည်း အလားတူပါပဲ။ PC ပလက်ဖောင်းမှာဆော့ကစားနိုင်မယ့် ဂိမ်းလိုအပ်ချက် Specs အပြည့်အစုံဟာလည်း မကြာသေးခင်ကမှအတိအကျထွက်ရှိလာခဲ့ပါပြီ။ ရက်စွဲတွေအနေနဲ့ အင်အားကြီးမားလှတဲ့ရိုမန်တွေရဲ့ကျူးကျော်မှုကို နယ်မြေသစ်မှာရင်ဆိုင်ရမယ့် The Hidden Ones DLC ဟာ ၂၀၁၈ ခုနှစ်၊ ဇန်နဝါရီလမှာထွက်ရှိဖြစ်ပြီး သမိုင်းတစ်ခေတ်ကသေရွာပြန်ဖာရိုဘုရင်တွေ၊ မာမီဖုတ်ကောင်တွေနဲ့ရင်ဆိုင်ရမယ့် The Curse Of The Pharoahs DLC ကိုတော့ ၂၀၁၈ ခုနှစ်၊ မတ်လမှာမှ ဂိမ်မာများကစတင်ဆော့ကစားနိုင်မှာပါ။ အထက်ဖော်ပြပါ DLC တွေအပြင် အီဂျစ်ပြည်ကြီးတစ်ခုလုံးရဲ့နက်ရှိုင်းလှတဲ့လျှို့ဝှက်ချက်တွေကို သိရှိနိုင်မယ့် Discovery Mode ကိုလည်းထည့်သွင်းပေးထားပါတယ်။ အဲဒီ Mode မှာတော့ ကိုယ့်ရဲ့ဂိမ်းတွင်းတိုက်ခိုက်မှုစနစ်ကိုပိတ်ပေးထားမှာဖြစ်ပြီး ဂိမ်မာတွေကိုလေ့လာရေးခရီးတစ်ခုသွားနေရသလိုခံစားရအောင် ဖန်တီးပေးထားမှာပါ။ အချိန်ကာလကိုကွက်တိကိုက်ညှိပြီး အားလုံးလက်ထဲအရောက်ထည့်ပေးမယ့် AC စီးရီးရဲ့နောက်ဆုံးဂိမ်းသစ်ဖြစ်တဲ့ Assassin's Creed Origins ဂိမ်းဟာ DLC တွေစုံစုံလင်လင်နဲ့ ဂိမ်းလောကကိုပြန်ပြီးဂယက်ရိုက်လာစေတော့မှာပါ။ ဒီတော့စိတ်ဝင်စားစရာတွေပြည့်နှက်နေတဲ့ ရှေးဟောင်းအီဂျစ်ပြည်ကြီးကို ကိုယ်တိုင်ကိုယ်ကျလေ့လာခွင့်ရမယ့်အပြင် Assassin Creed Brotherhood ကြီးဘယ်လိုမျိုးထွက်ပေါ်လာသလဲဆိုတာကိုလည်း သိရှိရမှာဖြစ်တဲ့အတွက် ဒီဂိမ်းဟာ AC ပရိသတ်များသာမက အခြားဂိမ်းချစ်သူပရိသတ်ဂိမ်မာများပါ လုံးဝကိုလက်မလွှတ်သင့်တဲ့ဂိမ်းတစ်ခုဖြစ်ပါတယ်လို့ပြောလိုက်ရပါတယ်။

Yan
Ref: Ign, Kotaku, Gamespot, Pastmagazine, Gamespot

ထိုင်းရိုးရာဒဏ္ဍာရီပုံပြင်တစ်ပုဒ်နောက်ကွယ်က သွေးပျက်စရာအမှန်တရားကိုရှာဖွေရမယ့် Home Sweet Home ဂိမ်း

ခြောက်ခြားဖို့ကောင်းလှတဲ့ ထိုင်းသရဲကားတွေ၊ ထိုင်းစုန်းအောက်လမ်းကားတွေကို အားလုံးအနည်းဆုံးတစ်ခေါက်လောက်တော့ ကြည့်ဖူးကြမှာပါ။ ငယ်စဉ်ဘဝကတည်းက ထိုင်းသရဲရုပ်ရှင်တွေနဲ့ တစ်ကွေ့မဟုတ်တစ်ကွေ့ရင်းနှီးခဲ့ဖူးသူအတွက်တော့ ထိုင်းတစ္ဆေသရဲတွေဟာ ဘယ်လောက်တောင်မှထိတ်လန့်ဖွယ်ရာအတိနဲ့ လူတွေကိုအန္တရာယ်ပြုခြောက်လှန့်နိုင်တယ်ဆိုတာ သိရှိကြပြီးဖြစ်မှာပါ။ လည်ပင်းကနေတောက်လျှောက်အောက်အထိ ဝမ်းတွင်းကလီစာတွဲလောင်းကျနေတဲ့သရဲမ Krasue, လူ့ဘဝမှာရှင်သန်နေထိုင်နိုင်အောင် စုန်းအတတ်ပညာနဲ့ အသက်ပြန်သွင်းထားတဲ့လူသားဖုတ်ကောင် Hun Phayon, မီးလောင်ထားတဲ့ဦးရေပြားထက်မှာဆံပင်ကျို့တို့ကျဲတဲနဲ့ ရိုးရာထိုင်းဝတ်စုံကိုဝတ်ဆင်ထားပြီး ကလေးတွေရဲ့စိတ်ဝိညာဉ်လိပ်ပြာကို အောက်လမ်းနည်းတွေနဲ့ညှင်းပန်းနှိပ်စက်တဲ့ Kuman Thang, မီးဖွားနေချိန်မှာအသက်ဆုံးရှုံးခဲ့ရတဲ့ နာကျည်းချက်အပြည့်နဲ့သရဲမ Phi Tai Thang Khom အစရှိတဲ့ထင်ရှားတဲ့တစ္ဆေသရဲဇာတ်ကောင်တွေအပြင် တချို့ပုံပြင်တွေကိုလည်းရုပ်ရှင်ဇာတ်ကားတွေအဖြစ်ပြန်လည်ဖန်တီးရိုက်ကူးခဲ့ကြလို့ မြန်မာနိုင်ငံပရိသတ်တွေကြားမှာတောင် ဓါတ်ပုံသရဲ၊ ပိန္နဲသီးသရဲ၊ ခေါင်းပြတ်သရဲဆိုပြီးတောင် အမည်တွင်ကျန်ရစ်ခဲ့ပါသေးတယ်။ ကျွန်တော်တို့ငယ်စဉ်ဘဝကကြားသိဖူးခဲ့တဲ့ ဖျာသရဲ၊ ခြေတစ်ပေါင်ကျိုးသရဲ၊ ဘုန်းကြီးသရဲ အစရှိတဲ့သရဲပုံပြင်တွေဟာ ထိုင်းနိုင်ငံမှာတင်မက အခြားအရှေ့တောင်အာရှအိမ်နီးချင်းနိုင်ငံများမှာပါ နာမည်ကျော်လူပြောများကြတဲ့ ရှေးရိုးရာသရဲပုံပြင်ဇာတ်လမ်းတွေဖြစ်ပါတယ်။

အရှေ့တောင်အာရှတဝှမ်းကပုံပြင်တွေအပြင် ကမ္ဘာနဲ့အဝှမ်းမှာရှိတဲ့ရှေးရာစုနှစ်တွေကသရဲတစ္ဆေပုံပြင်တွေကို အခုခေတ်အခုအချိန်ထိ လူတွေသိရှိနေကြတာဟာ အဲဒီဇာတ်လမ်းတွေကို ဝတ္ထုဇာတ်လမ်း၊ ရုပ်ရှင်ဇာတ်ကားတွေ၊ ဂိမ်းတွေအဖြစ် ပုံစံအမျိုးမျိုးပြန်လည်ပုံဖော်ပြီး အသက်သွင်းခဲ့ကြလို့ပါပဲ။ သွေးပျက်လောက်စရာ Horror ဂိမ်းပေါင်းမြောက်မြားစွာရှိပေမယ့် တကယ့်အစစ်အမှန်သရဲတစ္ဆေဇာတ်ကြောင်းနဲ့ဂိမ်းကောင်းဆိုတာ လက်ချိုးရေတွက်လို့ရတဲ့အပြင် အာရှတိုက်ထဲကဂိမ်းဆိုရင် ပိုပြီးတောင်ရွေးထုတ်ဖို့ခက်ပါသေးတယ်။ အာရှတိုက်အတွင်းမှာ ဂျပန်နိုင်ငံကလွဲရင် ဂိမ်းဖန်တီးထုတ်လုပ်တဲ့အဖွဲ့အစည်း၊ ဂိမ်းကုမ္ပဏီတွေဆိုတာမရှိသလောက် ရှားပါးတဲ့အပြင်ဂိမ်းချစ်သူပရိသတ်တွေကလည်း ဂျပန်နိုင်ငံရဲ့ horror ဂိမ်းတွေကို သိပ်အားပေးလေ့ပေးထမရှိတဲ့အတွက် ကမ္ဘာ့ဂိမ်းဈေးကွက်မှာဂျပန်နိုင်ငံဟာ horror ဂိမ်းထွက်ရှိမှုနည်းပါးလှပါတယ်။ ဒါပေမယ့် အာရှတိုက်ကသရဲဂိမ်းကောင်းတွေကိုမှ ကစားချင်သူများအဖို့ အခုဒီမှာ Horror ဂိမ်းသစ်တစ်ခုလာပါပြီ။ ထူးခြားတာက အဲဒီဂိမ်းကို ဂိမ်းဈေးကွက်မှာနှာတစ်ဖျားသာနှင့်ပြီးသား အရှေ့ပိုင်းအာရှတိုက်နိုင်ငံတွေက ဖန်တီးထုတ်လုပ်ခဲ့တာမဟုတ်ဘဲ အရှေ့တောင်အာရှနိုင်ငံတစ်နိုင်ငံအတွင်းက ဂိမ်းဖန်တီးသူများအဖွဲ့က ကိုယ်တိုင်ကိုယ်ကျဖန်တီးထုတ်လုပ်ခဲ့တာပါ။ လက်ရှိခေတ်ဂိမ်းဈေးကွက်ထဲကို တိုးဝင်လာတဲ့ အရှေ့တောင်အာရှနိုင်ငံထုတ် Horror ဂိမ်းသစ်က ဘယ်လိုဂိမ်းမျိုးလဲ? အားလုံးမျှော်လင့်ထားတဲ့အတိုင်းဖြစ်ပါ့မလား? အားလုံးကိုခြုံငုံပြီး သုံးသပ်နိုင်အောင်လို့ သိရှိရသမျှကိုဒီမှာစုစည်းပြီး ဖော်ပြပေးလိုက်ပါတယ်။

ဆန်းကြယ်စွာပျောက်ဆုံးသွားတဲ့ဇနီးနဲ့ လျှို့ဝှက်တဲ့အမည်မသိအိမ်ပျက်ကြီး

Tim နဲ့သူ့ရဲ့ဇနီးဖြစ်သူဟာ မအိုဟောင်းသွားတဲ့အချစ်မျိုးနဲ့ တစ်ယောက်ကိုတစ်ယောက်ချစ်ကြပြီး သာယာတဲ့အိမ်ထောင်ရေးတစ်ခုကို တည်ထောင်ထားတာပါ။ ဒါပေမယ့် တစ်ညမှာတော့သူ့ရဲ့ဇနီးဖြစ်သူဟာ ပျောက်ချင်းမလှပျောက်ဆုံးသွားခဲ့ပါတယ်။ ဘယ်လိုအကြောင်းမျိုးကြောင့်ပျောက်ဆုံးသွားလဲဆိုတာ အတိအကျမသိရပေမယ့် သူ့ရဲ့ဇနီးသည်နဲ့ပတ်သက်တဲ့သတင်းအစအနကို လုံးဝမကြားသိခဲ့ရပါဘူး။ လျှို့ဝှက်စွာပျောက်ဆုံးသွားတဲ့ ချစ်ရသူဇနီးသည်အပေါ်မှာ အချိန်အကြာကြီးလွမ်းဖျားလွမ်းနာကျနေတဲ့ Tim ဟာ ညတစ်ညမှာတော့ ထူးဆန်းစွာနဲ့အိမ်ပျက်ကြီးတစ်လုံးရဲ့အထဲမှာ နိုးလာခဲ့ပါတယ်။ သူရောက်နေတာနေရာက ဘယ်နေရာလဲ? ဒါသူ့ရဲ့အိမ်လား? ပျောက်ဆုံးသွားတဲ့ဇနီးသည်နဲ့ ဘယ်လိုမျိုးပတ်သက်နေမလဲဆိုတာကို ဂိမ်မာများကိုယ်တိုင် စတင်အဖြေရှာရတော့မှာပါ။

အိမ်ပျက်ကြီးထဲကမိန်းကလေးနဲ့ ကိုယ့်ရဲ့လွတ်မြောက်ရာလမ်းစ

ရုတ်တရတ်အိမ်ပျက်ကြီးထဲကနေ နိုးထလာတဲ့ Tim ဟာ ထွက်ပေါက်ကိုအရင်ဆုံးရှာဖွေရမှာပါ။ ကိုယ်ရောက်နေတဲ့အခန်းထဲကလှေကားတန်းကနေတဆင့် အောက်တစ်ထပ်ကိုဆင်းလိုက်တဲ့အခါမှာ မိန်းကလေးတစ်ယောက်ကိုတွေ့ရပါလိမ့်မယ်။ အမှောင်အတိဖုံးပြီး လူသူအရိပ်အယောင်သဲ့သဲ့တောင်မကြားရတဲ့အိမ်ပျက်ကြီးထဲက မိန်းကလေးက ဘယ်သူများပါလဲ? ထွက်ပေါက်ဟာဘယ်နားမှာရှိသလဲလို့ အဲဒီမိန်းကလေးကိုအကူအညီတောင်းဖို့ရည်ရွယ်လိုက်ပေမယ့် ကံဆိုးစွာနဲ့ပဲ အဲဒီမိန်းကလေးဟာ ကိုယ့်ကိုကူညီမဲ့သူတစ်ယောက်မဟုတ်ခဲ့ပါဘူး။ ခြောက်ခြားဖို့ကောင်းလှတဲ့အိမ်ပျက်ကြီး၊ လူသားမဟုတ်တဲ့မိန်းကလေးတစ်ယောက်နဲ့အတူ ဝေဝါးတဲ့အတွေးတွေနဲ့ဂယောင်ခြောက်ခြားဖြစ်နေတဲ့ Tim အတွက် လွတ်မြောက်ရာလမ်းစက ဘယ်မှာရှိနေတာလဲ? အခုအချိန်အထိ ဘယ်သူမှမဖော်ထုတ်ရသေးတဲ့ အနက်နဲဆုံးလျှို့ဝှက်ချက်တစ်ခုက သွေးပျက်ဖို့အကောင်းဆုံးအမှန်တရားလား?

ရှောင်ပြေးရမယ်၊ အဖြေရှာရမယ်၊ သွေးပျက်မှုတွေနဲ့ရင်ဆိုင်ရမယ်

နာရီပိုင်းအနည်းငယ်သာရှိတဲ့ဂိမ်းတစ်ခုဖြစ်ပေမယ့်လည်း ဂိမ်းဆော့နေရင်းကြုံရမယ့်အဖြစ်အပျက်တွေကြားမှာ စိတ်မမွန်းကြပ်သွားဖို့လိုပါတယ်။ ဘယ်လောက်ပဲအကြပ်ရိုက်နေတဲ့အခြေအနေကိုရောက်ရောက် ကိုယ်ဟာတစ်ဖက်သားကို ကိုယ်ထိလက်ရောက်ပြန်လည်တုံ့ပြန်နိုင်မှာမဟုတ်ပါဘူး။ ကိုယ်ရောက်နေတဲ့အခြေအနေကိုသိရမယ်၊ ကိုယ်လိုရာနေရာကိုသွားဖို့ အချိန်ကိုစောင့်ရမယ်၊ တစ်ခါတလေပုန်းခိုရမှာဖြစ်သလို တစ်ခါတလေလည်း ရှောင်ပြေးရမှာဖြစ်ပါတယ်။ မမျှော်လင့်ထားတဲ့အချိန်မျိုးမှာ ကျရောက်လာမယ့်သွေးပျက်မှုတွေကိုရင်ဆိုင်နိုင်အောင် စိတ်ကိုပြင်ဆင်ထားဖို့လိုပါတယ်။ ဒါ့အပြင်ဇာတ်လမ်းတောက်လျှောက်မှာ အဖြေရှာရမယ့်ပဟေဠိတွေ၊ ဉာဏ်စမ်းတွေကို စုံလင်အောင်ထည့်သွင်းပေးထားပြီး အဲဒါတွေကိုကျော်ဖြတ်နိုင်မှ ကိုယ်သွားလိုရာနေရာကို ရောက်ရှိမှာဖြစ်ပါတယ်။ အဓိကကတော့ Tim ရဲ့ဇနီးဘာကြောင့်ပျောက်သွားခဲ့လဲဆိုတဲ့ အဖြေကိုရှာရမှာပါ။ အခုသူရောက်နေတဲ့နေရာနဲ့ ကြုံခဲ့ရတဲ့ကြောက်မက်ဖွယ်မိန်းကလေး၊ အရာအားလုံးနဲ့ချိတ်ဆက်မှုနေတဲ့အမှန်တရားတွေကို မဝေးတော့တဲ့တစ်ချိန်မှာပေါ်ပေါက်လာအောင် ကြိုးစားရမှာပါ။

ထိုင်းနိုင်ငံအခြေစိုက်ဂိမ်းဖန်တီးသူများအဖွဲ့ရဲ့ ပြောင်မြောက်တဲ့ဖန်တီးမှု 

 Home Sweet Home ဂိမ်းတစ်ခုလုံးကို ထိုင်းနိုင်ငံ၊ ဘန်ကောက်မြို့အခြေစိုက်ဂိမ်းဖန်တီးသူအဖွဲ့ဖြစ်တဲ့ Yggdrazil အဖွဲ့က ဂုဏ်ယူစွာနဲ့ဖန်တီးထုတ်လုပ်ခဲ့တာဖြစ်ပြီး ဒီဂိမ်းကို ရှေးဟောင်းထိုင်းဒဏ္ဍာရီတစ္ဆေဇာတ်လမ်းအပေါ်မှာ အခြေခံထားတယ်လို့သိရပါတယ်။ ဒီဂိမ်းမှာနာမည်ကျော် Unreal အင်ဂျင်ကို အသုံးပြုထားပြီး လက်လီလက်ကားဝယ်ယူလို့ရသလို Steam ကနေတဆင့်လည်း ဒေါ်လာ ၁၇ ကျပ်နဲ့ ဝယ်ယူဆော့ကစားနိုင်ပါတယ်။ လက်ရှိအနေနဲ့ဆိုရင် Home Sweet Home ဂိမ်းအပြည့်အစုံထွက်ရှိပြီးတာ အချိန်ကာလနှစ်ပါတ်ရှိနေပြီဖြစ်ပြီး Steam review တွေအရတော့ ပြောစရာတကွက်မတွေ့ရဘဲ ကမ္ဘာနဲ့အဝှမ်းက စမ်းသပ်ဆော့ကြည့်ကြတဲ့ ဂိမ်မာတွေလက်မာထောင်ထားတာကို တွေ့မြင်ရမှာဖြစ်ပါတယ်။ ထိုင်းနိုင်ငံ၊ ဘန်ကောက်မြို့အခြေစိုက် Yggdrazil ဂိမ်းအဖွဲ့အတွက်တော့ ကျေနပ်အားရစရာပါပဲ။

ဂိမ်းတစ်လုံးမှာပါဝင်တဲ့ ထူးခြားချက်တွေ၊ ဆော့နိုင်မယ့်ပလက်ဖောင်းနဲ့ အနှစ်ချူပ်

ဂိမ်းတစ်ခုလုံးမှာ ကိုယ်ကျင်လည်ရမယ့်ပတ်ဝန်းကျင်ကို ထိုင်းရိုးရာအငွေ့အသက်တွေလွှမ်းခြုံဖန်တီးပေးထားပြီး ဇာတ်လမ်းတစ်လျှောက်မှာ ကိုယ်ကြားရမယ့်နောက်ခံစကားပြောတွေဟာ ထိုင်းနိုင်ငံရဲ့ရှေးဟောင်းဒဏ္ဍာရီတစ္ဆေဇာတ်လမ်းကို အခြေခံထားပါတယ်။ ဂိမ်းကစားမှုပုံစံဟာ စိန်ခေါ်မှုအပြည့်ရှိပြီး ကိုယ့်ရဲ့လျှို့ဝှက်စွာသွားလာနိုင်မှုအပေါ်မှာ မူတည်နေပါတယ်။ ကွဲပြားတဲ့ဂိမ်းကစားမှုအတွေ့အကြုံတွေကို ခံစားရစေဖို့အတွက် စူးစမ်းရှာဖွေတာတွေ၊ ပဟေဠိအဖြေရှာတာတွေ ထည့်သွင်းပေးထားတဲ့အပြင် အားလုံးထဲက အကောင်းဆုံးတစ်ချက်ကတော့ VR စနစ်ကိုထောက်ပံ့ပေးထားတဲ့အတွက် Oculus Rift တွေကိုအသုံးပြုပြီး လက်တွေ့အဆန်ဆုံး၊ ရင်ခုန်စရာဂိမ်းတွင်းအတွေ့အကြုံတွေကို ခံစားနိုင်ဦးမှာပါ။ လောလောဆယ်မှာတော့ ပလက်ဖောင်းအနေနဲ့ PC တစ်မျိုးတည်းမှာပဲ Home Sweet Home ဂိမ်းကိုဆော့ကစားနိုင်ဦးမှာဖြစ်ပြီး နောက်လာမယ့်အနာဂတ်မှာတော့ ပလက်ဖောင်းတွေတိုးချဲ့လာနိုင်ဖွယ်ရာရှိပေမယ့် သတင်းအစအနတော့ ဘာမှမကြားသိရသေးပါဘူး။ အရှေ့တောင်အာရှနိုင်ငံများဟာ ကိုယ့်ဖွံဖြိုးနှုန်းနဲ့ကိုယ်ရှေ့ဆက်နေပေမယ့် တိုးတတ်ပြီးအနောက်နိုင်ငံမာျးနဲ့ယှဉ်ရင် နယ်ပယ်အချို့မှာခြေလှမ်းများနောက်ကျနေဆဲဖြစ်ပါတယ်။ အဲဒီလိုနယ်ပယ်တွေထဲမှာ ဂိမ်းနယ်ပယ်ဟာလည်းအပါအဝင်ပါပဲ။ အခုလိုမျိုး ကိုယ့်နိုင်ငံရိုးရာကိုထင်ဟပ်စေတဲ့ နိုင်ငံတကာတန်းဝင်တဲ့ဂိမ်းတစ်ခုကို ကိုယ့်ခြေကိုယ့်လက်နဲ့ လွတ်လပ်စွာဖန်တီးခဲ့ပြီး နိုင်ငံတကာဂိမ်းဈေးကွက်မှာ အနေအထားတစ်ခုရအောင် စွမ်းဆောင်နိုင်ခဲ့တာဟာ ထိုင်းနိုင်ငံအခြေစိုက် Yggdrazil ဂိမ်းအဖွဲ့ရဲ့ပြောင်မြောက်တဲ့လုပ်ရပ်ပါပဲ။ ဘက်ပေါင်းစုံမှာစင်းလုံးချောပြီးပြည့်စုံတဲ့ ဂိမ်းတစ်ခုလို့မဆိုသာပေမယ့် အရည်အသွေးမှီတဲ့ဂိမ်းတစ်ခုအဖြစ် ကမ္ဘာအဝှမ်းကဂိမ်မာများတောင် လက်ခံခဲ့တဲ့အတွက် အရှေ့တောင်အာရှနိုင်ငံတစ်နိုင်ငံရဲ့အဲဒီလိုမျိုးဂိမ်းတစ်ခုကို အရှေ့တောင်အာရှသားတွေကိုယ်တိုင် စမ်းဆော့ကြည့်သင့်ကြောင်းကို ဒီကနေတဆင့် တိုက်တွန်းလိုက်ရပါတယ်။

Yan
Ref: Steam, Homesweethome, bloody-disgusting, oneangrygamer

ရင်သပ်ရှုမောဖွယ်ကောင်းတဲ့ ဒိုင်နိုဆောဥယျာဉ်မြို့တော်ကြီးကို ကိုယ့်စိတ်ကြိုက်တည်ဆောက်ခွင့်ရမယ့် Jurassic World Evolution

အမျိုးအစားပေါင်းစုံလှတဲ့ဒိုင်နိုဆောတွေ၊ ကမ္ဘာဦးခေတ်တိရစ္ဆာန်မျိုးနွယ်တွေနဲ့ မိုးပေါ်မှာပျံသန်းနေတဲ့ရှုးပျံကြီးတွေကို မျက်ဝါးထင်ထင်တွေ့မြင်ရမယ့် Jurassic Park စီးရီးကို အားလုံးကမှတ်မိကြမယ်ထင်ပါတယ်။ Jurassic Park ဟာ ထိန်းသိမ်းမှုအောက်ကနေလွတ်မြောက်သွားတဲ့ဒိုင်နိုဆောတွေတဆင့် လူသားတွေအပေါ်ကျရောက်လာမယ့် အနာဂတ်ရဲ့အန္တရာယ်ရန်စွယ်ကို ကျောရိုးခံထားတဲ့အမေရိကန်သိပ္ပံဝတ္တုပဲဖြစ်ပါတယ်။ Universal စတူဒီယိုဟာ Jurassic Park မူရင်းဝတ္တုရဲ့ လုပ်ပိုင်ခွင့်တွေကို ၁၉၉၀ ခုနှစ်က ဝယ်ယူခဲ့ပြီး ၁၉၉၃ ခုနှစ်မှာတော့ Jurassic Park ရုပ်ရှင်ဇာတ်ကားအဖြစ် ဖန်တီးအသက်သွင်းခဲ့ပါတယ်။ ၁၉၉၃ ခုနှစ်ရဲ့ Jurassic Park ရုပ်ရှင်ဟာ နောက်ဆက်တွဲသုံးခွေအထိထွက်ရှိခဲ့ပြီး လက်ရှိအချိန်မှာတောင် ငွေကြေးသုံးစွဲမှုအများဆုံးရုပ်ရှင် နံပါတ် ၁၇ မှာရပ်တည်နေပါတယ်။ ထွက်ရှိခဲ့တဲ့အချိန်ကစပြီး ကမ္ဘာနဲ့အဝှမ်း ပရိသတ်ပေါင်းများစွာရရှိခဲ့တဲ့ Jurassic Park ရုပ်ရှင်စီးရီးဟာ ဝတ္တု၊ ကာတွန်းရုပ်ပြဇာတ်လမ်းနဲ့ ရုပ်ရှင်ဇာတ်ကားတင်မကပဲ ဂိမ်းအနေနဲ့လည်း ဒိုင်နိုဆောများရဲ့စိတ်ကူးယဉ်လောကကို ပုံဖော်အသက်သွင်းခဲ့ဖူးပါတယ်။ ရုပ်ရှင်လောကမှာနာမည်တစ်လုံးနဲ့ရပ်တည်နိုင်နေတဲ့ စီးရီးဖြစ်ပေမယ့် ၂၀၀၃ ခုနှစ်နဲ့ ၂၀၁၁ ခုနှစ်တုန်းက အသီးသီးထွက်ရှိခဲ့ကြတဲ့ Jurassic Park: Operation Genesis နဲ့ Jurassic Park: The Game ဂိမ်းတို့ဟာ ဂိမ်းဈေးကွက်မှာထင်သလောက် အကျိုးသက်ရောက်မှုမဖြစ်ထွန်းခဲ့ပါဘူး။ လွန်ခဲ့တဲ့နှစ်နှစ် ၂၀၁၅ ခုနှစ်မှာ Jurassic World ဇာတ်ကားသစ်နဲ့ရုပ်ရှင်လောကကို တစ်ကျော့ပြန်လည်ရောက်ရှိလာတဲ့ Jurassic Park စီးရီးဟာ မကြာတော့တဲ့အချိန်ကာလမှာ Jurassic Park စီးရီးဂိမ်းသစ်ကို ထုတ်ပေးတော့မှာဖြစ်တဲ့အကြောင်းကို တရားဝင်ထွေလာနဲ့အတူအတိအလင်းကြေညာသွားခဲ့ပါတယ်။ ၂၀၁၁ ခုနှစ်ကနေအခု ၂၀၁၇ အထိ ငါးနှစ်တာကာလအတွင်းမှာ ဂိမ်းနဲ့ပတ်သက်တဲ့သတင်းအစအန တစ်ခုမှမကြားခဲ့ရတဲ့ Jurassic Park စီးရီးဟာ အခုအချိန်မှာတော့ Jurassic World Evolution ဆိုတဲ့အမည်နဲ့ ဂိမ်းအသစ်တစ်ခုထွက်ရှိလာတော့မှာဖြစ်ပါတယ်။ ဒီတော့အချိန်တော်တော်ကြာပျောက်နေတဲ့ Jurassic Park ရဲ့နောက်လာမယ့်ဂိမ်းသစ်ဟာ ဘယ်လိုဂိမ်းမျိုးလဲ? လူသားမျိုးနွယ်ကိုအန္တရာယ်ပေးမယ့် ဒိုင်နိုဆောတွေ၊ ဂေါ်ဇီလာတွေနဲ့ရော ဘယ်လိုမျိုးရင်ဆိုင်ကြုံတွေ့ရမလဲ? ဂိမ်းကိုစောင့်ဆိုင်းဖို့ရောသင့်ရဲ့လား? အစရှိတာတွေကို စုစည်းပြီး ဂိမ်မာများအားလုံးသိရှိနိုင်စေဖို့ ဒီကနေတင်ပြလိုက်ရပါတယ်။

၂၀၁၅ ခုနှစ်က Jurassic World ရုပ်ရှင်ဇာတ်လမ်းကို အခြေခံထားတဲ့ဇာတ်အိမ်

Jurassic World ဇာတ်ကားကိုကြည့်ဖူးသူများအဖို့ ကမ္ဘာဦးမျိုးစိတ်ဂေါ်ဇီလာတွေ၊ ဒိုင်နိုဆောတွေနဲ့ အခြားရှားပါးသတ္တဝါတွေဟာ လူသားတွေနေထိုင်ရာကမ္ဘာမြေကို ဘယ်လောက်ထိအန္တရာယ်ပေးနိုင်ကြောင်း အတိုင်းသားတွေ့မြင်ခဲ့ရပြီးပါပြီ။ အခု Jurassic World Evolution ဂိမ်းရဲ့ဇာတ်အိမ်ဇာတ်ကြောင်းနဲ့ပတ်သတ်ပြီး များများစားစားမသိရှိရသေးပေမယ့် ၂၀၁၅ ခုနှစ်ကထွက်ရှိခဲ့တဲ့ Jurassic World ရုပ်ရှင်ကို အခြေခံထားတယ်ဆိုတာကိုတော့ Frontier Developments က ပြောကြားခဲ့ပါတယ်။ ဒါ့အပြင် ၂၀၁၈ မှာထွက်ရှိမယ့် Jurassic Park စီးရီးရဲ့ဇာတ်ကားသစ်ဖြစ်တဲ့ Jurassic Park: Fallen Kingdom ထွက်လာမယ့်ကာလနဲ့ ကိုက်ညှိပြီး ဂိမ်းကိုအချိန်ကိုက်ထုတ်ပေးမှာဖြစ်ကြောင်းလည်း သိရပါတယ်။

ဂိမ်းဇာတ်အိမ်တည်ရာ Isla Nubar ကျွန်းနဲ့ကော်စတာရီကာကမ်းရိုးတန်းတစ်လျှောက်

Jurassic Park စီးရီးရဲ့ပရိသတ်များကိုတော့ Isla Nubar ကျွန်းစုနဲ့ အထူးတလည်မိတ်ဆက်ပေးစရာလိုမယ်မထင်ပါဘူး။ Isla Nubar ကျွန်းဟာ Jurassic Park စီးရီးကြီးဖြစ်တည်ရာ အမေရိကန်ပြည်ထောင်စုအတွင်းက စိတ်ကူးယဉ်ကျွန်းတစ်ကျွန်းဖြစ်ပါတယ်။ ၁၉၉၀ ခုနှစ်ကတည်းကစပြီး ၂၀၁၅ ခုနှစ်အထိ ခုနှစ်အလိုက်ထွက်ရှိခဲ့တဲ့ Jurassic Park ဝတ္တုဇာတ်လမ်း၊ ကာတွန်းရုပ်ပြနဲ့ ရုပ်ရှင်ဇာတ်ကားတွေအားလုံးဟာ Isla Nubar ကျွန်းမှာပဲ ဇာတ်အိမ်တည်ထားကြတာပါ။ အဲဒီကျွန်းကြီးကနေ အနောက်ဘက်ကော်စတာရီကာကမ်းရိုးတန်းတစ်လျှောက်ဟာ မြောက်မြားစွာသော ကမ္ဘာဦးမျိုးစိတ်သတ္တဝါများ ပျော်မွေ့စွာကျင်လည်ကျက်စားတဲ့နေရာဖြစ်ပါတယ်။ Isla Nubar ကျွန်းကနေ ကော်စကာရီတာကမ်းရိုးတန်းအထိဆိုရင် မိုင်ပေါင်း ၁၂၀ ကျယ်ပြန့်ပြီး Isla Nubar ကျွန်းတစ်ခုလုံးဟာ အရွယ်အစားမတူတဲ့တောင်တန်းတွေ၊ မြေပြန့်ဒေသကွင်းပြင်ကျယ်ကြီးတွေနဲ့ အပူပိုင်းမိုးသစ်တောတွေမြောက်မြားစွာပေါက်ရောက်နေတဲ့ စိတ်ကူးယဉ်ကျွန်းတစ်ကျွန်းဖြစ်ပါတယ်။

ကိုယ့်စိတ်ကြိုက်ဖန်တီးတည်ဆောက်နိုင်မယ့် ကိုယ်ပိုင်ဒိုင်နိုဆောဥယျာဉ်မြို့တော်

EA ကထွက်ရှိခဲ့တဲ့ Sim City ဂိမ်းကို အားလုံးကမှတ်မိကြမှာပါ။ အဲဒီဂိမ်းမှာမြေပုံတစ်ခုကနေတဆင့် ခေတ်မှီတိုးတတ်ပြီး လူတွေစည်းကားသိုက်မြိုက်တဲ့ မြို့ကြီးတစ်မြို့ဖြစ်သွားအောင် ဂိမ်မာတွေကတဆင့်ချင်းစီ တည်ဆောက်ကြရတာပါ။ ဂိမ်မာတွေရဲ့ငယ်စဉ်ဘဝမှာ Sim City ဂိမ်းကိုဆော့ပြီး ကိုယ်ပိုင်မြို့တွေကိုတည်ဆောက်ခဲ့ကြဖူးမှာ မလွဲမသွေပါပဲ။ အခုဒီ Jurassic World Evolution ဂိမ်းမှာ အဲဒီလိုအတိတ်ကအငွေ့အသက်တွေကို ပြန်လည်ခံစားရစေမယ့်အပြင် ဂေါ်ဇီလာတွေ၊ ဒိုင်နိုဆောတွေနဲ့ပြည့်နှက်နေတဲ့ လှပရှုမောဖွယ်ဥယျာဉ်ကြီးကို ကိုယ့်စိတ်တိုင်းကျတည်ဆောက်ခွင့်ပေးထားပါတယ်။ ဒီတော့ ကိုယ်ပိုင်တဲ့ဒိုင်နိုဆောဥယျာဉ်ကို ဘယ်လိုမျိုးအကြံဉာဏ်၊ စိတ်ကူးစိတ်သန်းတွေနဲ့ တည်ဆောက်မလဲ? အားလုံးထဲကကွဲထွက်အောင် ဘယ်လိုမျိုးဖန်တီးမလဲ? ကိုယ်ဟာကိုယ့်ဒိုင်နိုဆောဥယျာဉ်ရဲ့ အင်ဂျင်နီယာတစ်ယောက်ဖြစ်ပါတယ်။

သိပ္ပံဓါတ်ခွဲခန်းတွေကနေတဆင့် သုတေသနလုပ်ပြီး ဒိုင်နိုဆောမျိုးစိတ်သစ်တွေဖန်တီးနိုင်မယ်

ကမ္ဘာဦးမျိုးစိတ်သတ္တဝါတွေကို စိတ်တိုင်းကျ အကျအနဖန်တီးဖို့ ဂိမ်မာတွေအားလုံး စိတ်ကူးဖူးကြမှာပါ။ အခုဒီဂိမ်းမှာ ကိုယ်ဟာကိုယ့်ဒိုင်နိုဆောဥယျာဉ်ကြီးကို ဖွံဖြိုးတိုးတက်အောင်လုပ်ရမယ့် တစ်ဦးတည်းသောအင်ဂျင်နီယာတစ်ယောက်ဖြစ်တဲ့အပြင် သမိုင်းတွင်ကျန်ရစ်မယ့် သုတေသနတွေကိုလုပ်ရမယ့် သိပ္ပံပညာရှင်တစ်ဦးလည်းဖြစ်နေပြန်ပါတယ်။ ဒီဂိမ်းမှာ ရှိနှင့်ပြီးသားသတ္တဝါမျိုးစိတ်တွေကိုပေါင်းစည်းပြီး ထူးကဲတဲ့ဂုဏ်သတ္တိတွေနဲ့ သတ္တဝါမျိုးစိတ်သစ်တွေကို လွတ်လပ်စွာဖန်တီးနိုင်မှာပါ။ အဲဒီအတွက် သိပ္ပံဓါတ်ခွဲခန်းတွေတည်ဆောက်ဖို့ လိုအပ်သလို မျိုးစပ်စမ်းသပ်မယ့်ဒိုင်နိုဆောတွေကို ထိန်းသိမ်းထားဖို့အတွက် အားကောင်းတဲ့လုံခြုံရေးစနစ်၊ ထိန်းသိမ်းရေးစက်ရုံတွေကိုလည်း တည်ဆောက်ရဦးမှာပါ။ ဒါတွေတင်မက လာရောက်လည်ပတ်တဲ့ပြည်သူတွေကို ဆွဲဆောင်နိုင်ဖို့ အပန်းဖြေနေရာတွေနဲ့ မြို့ပြအင်္ဂါရပ်ကိုပါ ထပ်ဆောင်းဖြည့်စွက်သွားရဦးမှာဖြစ်ပါတယ်။ Jurassic World Evolution ဂိမ်းဟာ ဂိမ်မာတွေစိတ်ကူးဖူးထားသမျှ၊ ဆန္ဒရှိသမျှ အရာတွေအားလုံးကို တစ်စုတစည်းတည်းနဲ့ ဖြည့်ဆည်းပေးလိုက်သလိုပါပဲ။

ဆော့နိုင်မယ့်ပလက်ဖောင်းတွေ၊ ဂိမ်းထွက်ရှိမယ့်ရက်နဲ့ အနှစ်ချူပ်

၂၀၁၇ ခုနှစ်၊ သြဂုတ်လ ၂၀ ရက်နေ့က ကျင်းပခဲ့တဲ့ Gamescom ပွဲမှာ Jurassic World Evolution ဂိမ်းကို တရားဝင်ကြေညာခဲ့တာပဲဖြစ်ပါတယ်။ အောက်တိုဘာလ ၇ ရက်နေ့၊ လတ်တလောကမှပြီးဆုံးသွားတဲ့ Frontier Expo ပွဲမှာ ဂိမ်းတွင်းလုပ်ဆောင်ချက်တချို့နဲ့ အဓိကဆော့ကစားရမယ့်ဂိမ်းပုံစံတို့ကို ၁၇ မိနစ်စာဗီဒီယိုနဲ့အတူ ပြသခဲ့ပြီးပါပြီ။ ပလက်ဖောင်းတွေအနေနဲ့ PC, PS4 နဲ့ Xbox One တို့မှာ ဆော့ကစားနိုင်မှာဖြစ်ပြီး ၂၀၁၈ နွေရာသီတဝိုက်မှာ ထွက်ရှိလာမယ်လို့ သိရှိရပါတယ်။ Jurassic Park ဆိုရင် ပရိသတ်တွေက ဒိုင်နိုဆောတွေ၊ ဂေါ်ဇီလာတွေနဲ့ တိုက်ခိုက်တာတွေ၊ အသက်လုပြေးရတာတွေ၊ ရင်ဖိုဖို့ကောင်းတဲ့အက်ရှင်ခန်းတွေကိုပဲ ပြေးမြင်ကြတာပါ။ ဒါပေမယ့် ဒီအခွေမှာတော့ Frontier Developments က အားလုံးအံ့အားသင့်သွားအောင် ချပြလိုက်ပါပြီ။ ဒီဂိမ်းကိုဆော့ဖို့ ဂိမ်မာတွေက အင်ဂျင်နီယာတစ်ယောက်လိုထက်မြက်တဲ့ ဆောက်လုပ်ရေးအိုင်ဒီယာတွေ၊ သိပ္ပံပညာရှင်တစ်ယောက်ရဲ့ နက်နဲတဲ့ဗဟုသုတတွေအပြင် မြို့ပြဥယျာဉ်ကြီးတစ်ခုကို ဘယ်လိုထိန်းသိမ်းရမလဲဆိုတာကိုသိရှိပြီး လစ်ဟင်းလိုအပ်နေတာတွေကို ဖြည့်စွက်သွားရမှာပါ။ Jurassic World Evolution ရဲ့ဂိမ်းကစားမှုပုံစံနဲ့ ဂိမ်းဖန်တီးထားတဲ့ပုံစံဟာ အားလုံးကကွဲထွက်ပြီး ဂိမ်မာတွေကိုစိတ်ကျေနပ်မှုအပြည့်အဝပေးစွမ်းနိုင်မယ်လို့ မျှော်လင့်ရင်း ၂၀၁၈ နွေရာသီကို ဂိမ်မာများအားလုံးနဲ့အတူစောင့်မျှော်နေကြောင်း ဒီကနေပြောလိုက်ရပါတယ်။

Yan
Ref: theverge, wiki, polygon, thestar