Horror ချစ်သူတွေရဲ့ဆန္ဒကိုဖြည့်ဆည်းပေးခဲ့ပြီး ပရိသတ်အကြိုက်ဇာတ်ကောင်တွေကို တစ်နေရာတည်းမှာနဂိုဟန်မပျက်တွေ့မြင်ရမယ့် Resident Evil: Vendetta 🏚🌒

Resident Evil လို့ပြောလိုက်တာနဲ့ သွေးပျက်စရာဇွန်ဘီတွေ၊ ရက်စက်ကြမ်းတမ်းတဲ့ သန္ဓေပြောင်းသတ္တဝါတွေ၊ အသက်လုပြီးပြေးရတာတွေ၊ မလောက်ငှတဲ့လက်နက်ကျည်ခဲယမ်းတွေ အစရှိတာတွေကို ပြေးမြင်ကြမှာပါပဲ။ Survival Horror ဆိုတာကြီးကို Capcom က Resident Evil နဲ့ ၁၉၉၆ ခုနှစ်မှာအဓိပ္ပါယ်ဖွင့်ဆိုခဲ့တာပါ။ ကမ္ဘာနဲ့အဝှမ်းနာမည်ကျော်ကြားတဲ့ ဂိမ်းစီးရီး Resident Evil ဟာ ၂၀၁၇ ဇန်နဝါရီလက Resident Evil: 7 Biohazard ဆိုတဲ့ franchise ရဲ့သတ္တမမြောက်အခွေကို စောင့်မျှော်နေကြတဲ့ပရိသတ်အားလုံးလက်ထဲအရောက်ထည့်ခဲ့ပါတယ်။ နောက်ဆုံးထွက်ခဲ့တဲ့ခွေဟာလည်း Resident Evil စီးရီးတစ်ခုလုံးကို ပြန်လည်ဆန်းသစ်စေခဲ့ပြီး ကဏ္ဍအသီးသီးမှာနာမည်ကောင်းတွေရစေခဲ့လို့ အညွှန့်တလူလူနဲ့အောင်မြင်ပြီးရင်အောင်မြင်နေတယ်လို့ဆိုရင်လည်း မှားမယ်မထင်ပါဘူး။ ဂိမ်းစီးရီးတင်မကဘဲ ရုပ်ရှင်ဇာတ်ကားစီးရီးနဲ့ပါ နယ်ပယ်အသီးသီးကိုထိုးဖောက်နေတဲ့ Resident Evil ဟာ ၂၀၁၇ ဇွန်လမှာ CGI animated ရုပ်ရှင်ဖြစ်တဲ့ Resident Evil: Vendetta ကိုထုတ်ဝေဖြန့်ချိခဲ့ပါတယ်။ မေလမှာ ဂျပန်၊ ဇွန်လမှာ UK နဲ့မြောက်အမေရိကမှာ အသီးသီးပြသခဲ့တဲ့ Resident Evil: Vendetta မှာ ဘယ်လိုမျိုးဇာတ်ကောင်တွေပါကြမလဲ၊ ဇာတ်လမ်းဇာတ်အိမ်ကရော ယုတ္တိတန်ရဲ့လား၊ အက်ရှင်ခန်းတွေနဲ့ animation ပိုင်းတွေကရောဘယ်လိုရှိလဲ၊ အစရှိတာတွေကိုအကျဉ်းချုံးပြီး ဒီမှာသုံးသပ်ထားပါတယ် 🤓➡️➡️

စီးရီးတစ်လျှောက်က ပရိသတ်အကြိုက်ဇာတ်ကောင်တွေကို တစ်စုတစည်းတည်းတွေ့မြင်ရမယ် 💐🧡

ရွှေအိုရောင်ဆံပင်ကို မျက်နှာအရှေ့မှာတစ်ခြမ်း ဝဲနေအောင်ချထားပြီး ပစ်စတိုတစ်လက်နဲ့အားလုံးကိုရင်ဆိုင်ခဲ့တဲ့ ခပ်ဖြောင့်ဖြောင့် အမေရိကန်အထူးအေးဂျင့် Leon S. Kennedy ဟာ Resident Evil 4 မှာပရိသတ်တွေ အားလုံးရဲ့အသည်းနှလုံးကိုကိုင်လှုပ်သူဖြစ်ခဲ့ပါတယ်။ RE ဂိမ်းစီးရီးရဲ့မင်းသားလို့တောင် တင်စားသုံးနှုန်းလို့ရတဲ့ Leon ကိုဒီဇာတ်ကားမှာ RE စီးရီးရဲ့နောက်ထပ်အခရာကျတဲ့ဇာတ်ကောင် BSAA ဇီဝလက်နက်တိုက်ဖျက်ရေးအထူးတပ်ဖွဲ့ဝင် Chris Redfield နဲ့အတူ အားလုံးကတွေ့မြင်ကြရမှာပါ။ RE စီးရီးရဲ့အခရာကျတဲ့နေရာမှာရှိနေတဲ့ Chris ကို RE 5 မှာထပ်မံပွဲထုတ်ခဲ့တဲ့အတွက် Chris ရဲ့ရဲစွမ်းသတ္တိ၊ တစ်မူထူးတဲ့အရည်အချင်းနဲ့ ဖြောင့်မတ်တဲ့စိတ်နေသဘောထားတို့ကို ပရိသတ်တွေကအကြိုက်တွေ့ခဲပြန်ပါတယ်။ အဲဒီလိုပရိသတ်အကြိုက်ဇာတ်ကောင်နှစ်ယောက်ကို ဒီဇာတ်ကားမှာပူးတွဲပြီးကြည့်ရှုကြရမယ့်အပြင် Raccoon မြို့ဇွန့်ဘီပေါက်ပွားခြင်းဖြစ်စဉ်ရဲ့ အသက်ရှင်ကျန်သူတွေထဲကတစ်ယောက်ဖြစ်တဲ့ S.T.A.R.S အဖွဲ့ဝင် Rebecca Chambers ကိုပါ သိပ္ပံပရောဖျက်ဆာမလေးတစ်ယောက်အနေနဲ့ တစ်တွဲတည်းမြင်တွေ့ရဦးမှာပါ။

Resident Evil 6 နဲ့ Resident Evil 7 ကြားမှာတည်ထားတဲ့ဇာတ်အိမ် 🚪🌫

RE 6 မှာ သန္ဓေပြောင်းသတ္တဝါတွေနဲ့ဇီဝလက်နက်တွေကြောင့် ပျက်သုန်းရတော့မယ့်ကမ္ဘာကြီးကို ကဏ္ဍစုံလင်စွာနဲ့ မြင်သာအောင်မီးမောင်းထိုးပြထားပြီး RE 7 ကတော့ ကြမ္မာငင်မှုကြောင့် ဇီဝလက်နက်ဖြစ်ရပ်တွေနဲ့ဆက်နွယ်သွားခဲ့ရတဲ့ မထင်မရှားသာမန်လူသားတစ်ယောက်ရဲ့ဘဝအကြောင်းပါ။ အခုဒီဇာတ်ကားဟာ အဲဒီနှစ်ခုကြားမှာဇာတ်အိမ်တည်ထားပြီး Glenn Arias လို့အမည်ရတဲ့ ဇီဝလက်နက်မှောင်ခိုအကြမ်းဖက်သမားရဲ့ ဆိုးရွားလှတဲ့ကြံစည်မှုနဲ့ ကမ္ဘာကြီးအပေါ်ကလဲ့စားချေမှုကို Leon, Chris နဲ့ Rebecca တို့က တက်ညီလက်ညီဘယ်လိုမျိုးနှိမ်နင်းကာကွယ်သွားမလဲဆိုတာ အက်ရှင်နဲ့ horror ရောနှောပြီးမြင်တွေ့ရမယ့်ဇာတ်ဖြစ်ပါတယ်။ Cathy နဲ့ Jack သားအမိနှစ်ယောက်ကိုကယ်ထုတ်ရင်း ဇီဝလက်နက်တွေကိုအမြစ်ဖြတ်ချေမှုန်းမယ့်ရည်ရွယ်ချက်နဲ့ BSAA စစ်ဆင်ရေးအဖွဲ့ဟာ မက်က္ကစီကိုက လူသူမဲ့စံအိမ်ကြီးကိုထိုးဖေါက်ဝင်ရောက်တိုက်စစ်ဆင်တဲ့အခန်းနဲ့ ဇာတ်လမ်းကိုရင်ဖိုဖွယ်အစပျိုးထားပါတယ်။

ဗိုင်းရပ်စ်ကိုဘယ်လိုကုသရမလဲရှာတွေ့ခဲ့တဲ့ Rebecca Chambers 👩‍🔬🧥

ဇာတ်တောက်လျှောက်အချက်အခြာတဲ့နေရာမှာရောက်နေတဲ့သူက Rebecca ပဲဖြစ်ပါတယ်။ Resident Evil စီးရီးနဲ့ရင်းနှီးပြီးသူများအဖို့တော့ Rebecca နဲ့အထွေအထူးမိတ်ဆက်ပေးစရာလိုမယ်မထင်ပါဘူး။ အကြမ်းဖျင်းပြောပြရမယ်ဆိုရင် Rebecca Chambers ဟာ Raccoon မြို့ဖြစ်စဉ်မှာ Leon နဲ့အတူ အသက်ရှင်ကျန်ခဲ့တဲ့သူတစ်ယောက်ဖြစ်တဲ့အပြင် S.T.A.R.S တပ်ဖွဲ့ရဲ့ ဆေးသူနာပြုအဖွဲ့ဟောင်းဖြစ်ခဲ့ပြီး အခုအချိန်မှာတော့ ပရောဖျက်ဆာတစ်ယောက်အနေနဲ့ ဗိုင်းရပ်စ်အသစ်ဖြစ်တဲ့ အေဗိုင်းရပ်စ် (Animality Virus) ရဲ့ ဖြေဆေးရှာဖွေဖန်တီးရေးကို အားသွန်ခွန်စိုက်လုပ်ဆောင်နေခဲ့တာပါ။ စမ်းသပ်ချက်တွေဆက်တိုက်လုပ်ပြီးအဖြေရှာရင်းနဲ့ အဲဒီအေဗိုင်းရပ်စ်မှာ အစပျိုးအဆင့်၊  ဖြစ်ပွားအဆင့်နဲ့ ကုသအဆင့် ဆိုပြီးအဆင့်သုံးဆင့်ရှိတယ်ဆိုတာကို ရှာတွေ့သွားခဲ့ပါတယ်။ တီဗိုင်းရပ်စ်နဲ့မတူကွဲပြားစွာပဲ အေဗိုင်းရပ်စ်ဟာ လူတွေကိုဖုတ်ကောင်တွေအဖြစ်ချက်ချင်းမပြောင်းသွားစေဘဲ ခန္ဓာကိုယ်အတွင်းမှာလျှို့ဝှက်နေထိုင်လို့ရတယ်တဲ့အပြင် ဖုတ်ကောင်ပြောင်းသွားတဲ့အချိန်မှာလည်း ရန်သူနဲ့မိတ်ဆွေခွဲခြားသိတယ်ဆိုတာပါပဲ။ အားလုံးကိုအမြဲတမ်းထောက်လှမ်နားစွင့်နေတဲ့ ရန်သူတော်ကြီး Arias က Rebecca ဖြေဆေးရှာတွေ့သွားတာကိုသိသွားခဲ့လို့ လက်ပါးစေဖြစ်တဲ့ Maria ကိုစေလွှတ်ပြီး Rebecca ရှိနေတဲ့သိပ္ပံဓါတ်ခွဲခန်းတစ်ခုလုံးကို ဇွန်ဘီဗိုင်းရပ်စ်တွေပြန့်နှံ့စေခဲ့တဲ့အပြင် သူမကိုပါတစ်ခါတည်းအပြတ်ရှင်းခိုင်းခဲ့တာပါ။

Horror ဘက်ကိုအလေးပေးထားတဲ့ဇာတ်လမ်းပတ်ဝန်းကျင်နဲ့ ကြည့်ကောင်းပြီးသွက်လက်တဲ့အက်ရှင်ဇာတ်ကွက်တွေ 🧟‍♂️🥊

Resident Evil 6 ထွက်ရှိအပြီးမှာ အက်ရှင်တွေကိုပဲအသားပေးပြီး Horror theme ပျောက်သွားတယ်လို့ပြစ်တင်ဝေဖန်ခံရတဲ့အတွက် Capcom ဂိမ်းဖန်တီးသူများအဖွဲ့ဟာ Horror အမျိုးအစားဘက်ကိုပြန်လှည့်ပြီး အထူးအားစိုက်လာခဲ့ပါတယ်။ ဒါကြောင့်မို့လို့ပဲနောက်ဆုံးထွက်ရှိခဲ့တဲ့ Resident Evil 7: Biohazard ဟာ ပြောင်မြောက်ဆန်းသစ်တဲ့ပုံစံနဲ့အကြောက်တရားတွေကိုပေးစွမ်းခဲ့တာပါ။ အဲဒီလိုဝေဖန်ချက်တွေခံခဲ့ရပြီးနောက်မှာတော့ RE နာမည်အောက်ကထွက်ရှိမယ့် ဂိမ်းတွေတင်မကဘဲ ရုပ်ရှင်တွေကိုလည်းရင်ခုန်စရာပိုကောင်းအောင်၊ ခြောက်ခြားဖို့ကောင်းအောင်ဖန်တီးမယ်လို့ အတွေးဝင်သွားတဲ့ပုံပါပဲ။ အဲဒါကိုကြည့်ရှုသူတွေက အစပိုင်းဇာတ်ဝင်ခန်းမှာတွေကတည်းက အလိုလျောက်ခံစားရမှာမို့လို့ အထွေအထူးမပြောပြတော့ပါဘူး။ ကြောက်စရာကောင်းပြီး သွေးသံရဲရဲနဲ့ခန္ဓာကိုယ်ချို့ယွင်းနေတဲ့ဇွန်ဘီတွေကို ဒီကားမှာတောက်လျှောက်တွေ့မြင်ရပါမယ်။ ဇွန်ဘီလည်းကြိုက်၊ ကာတွန်းကားလည်းကြိုက်သူများအဖို့တော့ ရွှေပါပဲ။

Resident Evil 6 ကိုဆော့ဖူးတဲ့သူတွေအနေနဲ့ မကောင်းဘူး၊ ကောင်းတယ်ဆိုတာ တရားသေသုံးသပ်လို့မရပါဘူး။ ဘာဖြစ်လို့လည်းဆိုတော့ အက်ရှင်ကဏ္ဍကိုအသားပေးပြီး ဇာတ်ကောင်စုံလင်စွာနဲ့ပျက်သုန်းလုနီးနီးကမ္ဘာကြီးကို ဖော်ကျူးပွဲထုတ်ထားတဲ့အတွက် အရင်ခွေတွေနဲ့မတူတစ်မူကွဲထွက်နေတာကတော့ အမှန်ပါ။ Resident Evil ဆိုတာ Survival Horror အမျိုးအစားကိုအဓိကကျောရိုးခံထားတဲ့ဂိမ်းအနေနဲ့ လူတွေကစသိခဲ့တာကြောင့်သာ RE 6 ဟာအခုလိုမျိုးပုတ်ခတ်ခံခဲ့ရတာပါ။ အခုဒီဇာတ်ကားမှာအားလုံးရှုမြင်ခံစားကြရမှာကတော့ ခြောက်ခြားဖွယ်ရာဇာတ်ဝင်ခန်းတွေနဲ့ ယုတ္တိတန်မှုကိုအနည်းငယ်ကျာ်လွန်နေတဲ့အက်ရှင်ခန်းတွေပါပဲ။ အရမ်းကြီးခြေလွန်လက်လွန်လို့တော့မဆိုသာပေမယ့် ကြည့်ကောင်းမှာကတော့ အသေအချာပါပဲ။ ကိုယ်ကြိုက်တဲ့ဇာတ်ကောင်တွေနဲ့ ကြမ်းကြုတ်ရက်စက်တဲ့ဇွန်ဘီတွေရဲ့တိုက်ပွဲကိုကြည့်ရင်း ကိုယ်ပြောနေစရာတောင်မလိုအောင် ဟင်ခနဲဟာခနဲ ပါးစပ်အဟောင်းသားဖြစ်သွားလိမ့်မယ်ဆိုတာ အာမခံပါတယ်။

Resident Evil: Vendetta သုံးသပ်ချက်နဲ့စာရေးသူအနှစ်ချူပ် ✍️🎨

အထက်ပါဖော်ပြခဲ့တဲ့အချက်တွေကိုထောက်ရှုပြီး ကျွန်တော့်ရဲ့ကိုယ်ပိုင်သုံးသပ်ချက်လေးကိုလည်း ပြောပြရမယ်ဆိုရင် ဇာတ်လမ်းအရကြည့်မယ်ဆိုရင်တော့ ဒီကားရဲ့ဇာတ်ကြောင်းကသစ်တယ်၊ ဇာတ်ဖွဲ့စည်းပုံနဲ့ ခြောက်ခြားဖွယ်ရာကဏ္ဍကိုပေါင်းစပ်ပေးထားတာလိုက်ဖက်တယ်။ တချို့အခန်းတွေကရင်ဖိုရသလို၊ တချို့နေရာတွေကအက်ရှင်ဇာတ်ကွက်တွေဖြစ်တဲ့အတွက် အရမ်းကြီးတစ်ဖက်စောင်းနင်းမဖြစ်ဘူး၊ မျှတပြီးဖက်ညီတယ်။ ပရိသတ်အကြိုက်ဇာတ်ကောင်တွေကိုတစ်စုတစည်းတည်းတွေ့မြင်ရမှာဖြစ်တဲ့အတွက် ကြည့်ရတာပိုပြီးအသက်ဝင်တယ်၊ ဒါတင်မကဘဲ အဲဒီဇာတ်ကောင်တွေကအချိတ်အဆက်မိမိနဲ့ တစ်ယောက်ကိုတစ်ယောက်ကာကွယ်ထောက်ပံ့ရင်း ရန်သူတွေကိုရင်ဆိုင်တိုက်ခိုက်တဲ့အခန်းတွေကိုကြည့်ရတာ လုံးဝကိုအားရပါတယ်။ ဒါပေမယ့် အေဗိုင်းရပ်စ်ဖြေဆေးကိစ္စက Rebecca အဖမ်းခံလိုက်ရတဲ့နောက်ပိုင်းမှာ ရပ်သွားတယ်၊ ဘာမှဆက်မဖြစ်တော့ဘူး၊ အက်ရှင်ခန်းတွေ၊ အရေးပေါ်ကယ်ဆယ်ရေးတွေ၊ စစ်ဆင်ရေးတွေအဖြစ် ဇာတ်ကပြောင်းသွားပြီး New York မြို့မှာဇွန်ဘီ Outbreak ဖြစ်တယ်။ Rebecca ကဇာတ်တောက်လျှောက်လုံးဝကိုအခရာကျတဲ့နေရာမှာပါဝင်ခဲ့ပြီး ပြန်ပေးဆွဲခံလိုက်ရတဲ့နောက်မှာ သူ့အခန်းတွေကိုသိပ်မမြင်ရတော့ဘူး။ ဒါပေမယ့် Leon ရဲ့ Chris ရဲ့အတွဲညီညီအက်ရှင်ခန်းတွေနဲ့ ပြန်ဖာထေးလိုက်သလိုခံစားရတယ်။ Animation အပိုင်းအရဆိုရင်လည်း တချို့အခန်းတွေမှာ တောင့်တင်းနေတာမျိုးတွေ၊ တုံ့တု့ံ့ကြီးဖြစ်နေတာတွေ၊ ပုံစံမကျတာတွေ၊ ဇာတ်ကွက်နဲ့ရုပ်ကွက်သိပ်မလိုက်တာတွေ ရှိတယ်ဆိုပေမယ့်လည်း အရမ်းကြီးတော့မပြောပလောက်ပါဘူး။ ကျွန်တော်ကတော့ Leon နဲ့ Chris နှစ်ယောက်ကိုတစ်တွဲတည်းကြည့်ရလို့ ကျေနပ်တယ်။ Rebecca ရဲ့နေရာကိုလည်း သဘောကျပါတယ်။ ပြီးတော့ ကားတစ်လျှောက်စကားပြောတွေ၊ ဒိုင်ယာလော့တွေက ထိရောက်တယ်၊ သဘောကျဖို့ကောင်းတယ်၊ ဖြစ်နေတဲ့အခြေအနေကို ဖော်ကျူးနိုင်ပါတယ်။ ဥပမာပြောရရင် Rebecca က Leon နဲ့ Chris ကိုပြောတယ်။ "ရှင်တို့နှစ်ယောက်ကိုကြည့်ရတာ တစ်ကိုယ်ကောင်းဆန်တဲ့ချစ်သူနှစ်ယောက် ရန်ဖြစ်နေသလိုပဲ၊ ဒါပေမယ့်ရှင်တို့နှစ်ယောက်လုံးက ဒီကမ္ဘာကြီးပျက်စီးတော့မယ့်ဆိုတဲ့အချိန်ကျရင် အေးဆေးလက်ပိုက်ကြည့်နေမယ့်လူစားမျိုးမဟုတ်ဘူးဆိုတာ ကျွန်မသိတယ်၊ ဒါမှမဟုတ် ကျွန်မထင်တာများမှားသွားတာလား"။ အစရှိတာတဲ့ဒိုင်ယာလော့တွေက ဇာတ်ကိုပိုမြောက်လာအောင်တင်ပေးပါတယ်။ ဒီတော့တစ်ကားလုံးကို ကျွန်တော့်ရဲ့ကိုယ်ပိုင်အမြင်နဲ့သုံးသပ်ချက်ပေးရမယ်ဆိုရင်တော့ 7.5. out of 10 ပေးချင်ပါတယ်လို့ပြောရင်းနဲ့ နောက်ထပ်ရုပ်ရှင်ဇာတ်ကားသုံးသပ်ချက်မှာ ကျွန်တော်တို့ပြန်လည်တွေ့ဆုံကြပါမယ်။

Resident Evil: Vendetta Review
Yan (30.6.2017)

Outsider ရဲ့နောက်ဆုံးနိဂုံးကိုတွေ့မြင်ရမယ့် Dishonored: Death Of The Outsider

Dishonored ဂိမ်းစီးရီးရဲ့နောက်ဆက်တွဲအခွေကိုတော့ စက်တင်ဘာလ ၁၅ ရက်နေ့မှာထွက်မယ်လို့ တရားဝင်ထွေလာနဲ့အတူ Bethesda ကအတိအလင်းကြေညာခဲ့ပြီးပါပြီ။ အခုလာမယ့်အခွေသစ်ကိုဆော့ကစားနိုင်ဖို့အတွက် ထွက်ရှိခဲ့ပြီးတဲ့ Dishonored 1 နဲ့ 2 ကိုပိုင်ဆိုင်စရာမလိုပါဘူး။ အဲဒါဘာကိုဆိုလိုသလဲဆိုတော့ အခုလာမယ့်နောက်ဆက်တွဲအခွေဟာ သူ့ဘာသာသူ သီးခြားတစ်ကိုယ်တော်ဇာတ်ကြောင်းရှိလိမ့်မယ်လို့ ဆိုလိုတာပါပဲ။ Dishonored 2 ဖြစ်ရပ်တွေအပြီး လအနည်းငယ်လောက်အကြာမှာ ဇာတ်အိမ်တည်ထားတဲ့ Dishonored: Death Of The Outsider မှာ ဘုရင်မ Jessamine Kaldwin ကိုရက်စက်စွာလုပ်ကြံသတ်ဖြတ်ခဲ့တဲ့ ဂန္တဝင်လူသတ်သမားကြီး Daud နဲ့သူ့ရဲ့အားအထားရဆုံးလူယုံတော်ဖြစ်တဲ့ Billie Lurk တို့အတူတူပေါင်းပြီး အရာအားလုံးကိုစတင်ခဲ့တဲ့ Outsider ရဲ့နိဂုံးကိုဘယ်လိုချူပ်ပေးမလဲဆိုတာကို အားလုံးကမျက်ဝါးထင်ထင်တွေ့မြင်ကြရမှာပါ။ လူသတ်သမားကြီး Daud နဲ့သူ့ရဲ့တပည့်ကျော် Billie Lurk တို့နှစ်ယောက်ဦးစီးတဲ့လူသတ်သမားအဖွဲ့အကြောင်းကို ဒီ့ထက်ပိုပြီးကျယ်ကျယ်ပြန့်ပြန့်သိရှိချင်တယ်ဆိုရင်တော့ Dishonored 1 ရဲ့ Knife Of Dunwall DLC ကိုဆော့ကစားကြည့်ကြဖို့တိုက်တွန်းရင်းနဲ့ Death Of The Outsider ကသိရှိရသမျှကိုစုစည်းပြီး ဒီမှာတင်ပြလိုက်ရပါတယ်။

Outsider ကိုသုတ်သင်မယ့်အဓိကအကြောင်းအရင်း

Dishonored စီးရီးရဲ့ဂိမ်းကစားပုံစံကို နာမည်ကျော်သွားစေတဲ့အဓိကအကြောင်းအရင်းက လျှို့ဝှက်နက်နဲတဲ့သဘာဝလွန်အစွမ်းတွေနဲ့ ဉာဏ်ရှိရင်ရှိသလိုဖြတ်ကျော်သွားလို့ရတဲ့အခန်းကဏ္ဍတွေပါပဲ။ ဒါပေမယ့် အဲဒီသဘာဝလွန်စွမ်းအားတွေမြစ်ဖျားခံရာအရင်းအမြစ်က Outsider လို့အမည်ရတဲ့ အကောင်အထည်သာမြင်နိုင်တဲ့လူသဏ္ဌာန်ပြရုပ်တစ်ခုပါ။ ဒီတော့ဂိမ်းရဲ့အဓိကဇာတ်ကောင်တစ်ဖြစ်လဲ လျှို့ဝှက်တဲ့ Outsider ရဲ့တကယ့်ရည်ရွယ်ချက်နဲ့ နောက်ကြောင်းဇာတ်လမ်းတွေကို ဘယ်သူမှဘာမှမသိရသေးပါဘူး။ ထိုက်တန်သူတွေသာရရှိခဲ့တဲ့ Outsider ရဲ့သဘာဝလွန်စွမ်းအင်တွေကို နည်းလမ်းမှားယွင်းစွာအသုံးချတဲ့လူနည်းစုကြောင့် Dunwall နဲ့ Karnaca မြို့တွေအပါအဝင် Dishonored ကမ္ဘာကြီးဟာလှိုက်စားပျက်စီးနေရတာမို့လို့ Billie Lurk နဲ့ Daud တို့နှစ်ယောက်ဟာ အားလုံးကိုအဆုံးသတ်မယ့်ရည်ရွယ်ချက်နဲ့ Outsider ကိုသုတ်သင်မှာပါ။

Outsider နဲ့ထိပ်တိုက်မတွေ့ခင်ဘာတွေဖြစ်မှာလဲ

ဂိမ်းရဲ့အဓိကဇာတ်ကောင်ဖြစ်တဲ့ Billie Lurk အနေနဲ့ ပြန်လမ်းမရှိတဲ့မြေအောက်လှောင်အိမ်လက်ဝှေ့ပွဲတွေကို ထိုးဖေါက်ဝင်ရောက်ရမယ်။ နတ်အယူဝါဒနဲ့မိန်းမပျိုတွေကို ရင်ဆိုင်ကျော်ဖြတ်ရမယ်။ သူမလိုပဲ Outsider ရဲ့သတင်းအစအနကို အသည်းအသန်လိုက်ရှာနေတဲ့ မျက်လုံးမဲ့ဂိုဏ်းနဲ့ Dishonored 2 မှာတွေ့ကြုံရင်ဆိုင်ခဲ့ရတဲ့ ယန္တရားစက်ရုပ်တွေကိုနှိမ်နင်းသုတ်သင်ရမယ့်အပြင် အရင်အခွေတွေမှာပါဝင်ခဲ့တဲ့ ရန်သူဟောင်းတွေနဲ့လည်း ပြန်လည်ကြုံတွေ့ရမှာဖြစ်ပါတယ်။ ဒါ့အပြင်ရှေးဟောင်းမှော်ဝင်ပစ္စည်းတွေကို အနုကြမ်းစီးပြီး ဝင်ရောက်လုယက်ရတဲ့အခန်းမျိုးလည်းပါဝင်မှာဖြစ်သလို ဘာမှမပြင်ဆင်၊ မမျှော်လင့်ထားတဲ့အချိန်မျိုးမှာလည်း Outsider နဲ့ထိပ်တိုက်တွေ့ဦးမှာဖြစ်ပါတယ်။

Outsider ကိုဘယ်လိုအစွမ်းတွေနဲ့ရင်ဆိုင်မလဲ

သဘာဝလွန်စွမ်းအင်အားလုံးရဲ့အရင်းအမြစ်ဖြစ်တဲ့ Outsider ကိုအမြစ်ဖြတ်သုတ်သင်ဖို့ဆိုတာ စာချူပ်အရသတ်ခိုင်းတဲ့သူကိုသတ်လိုက်ရသလို လွယ်ကူတဲ့ကိစ္စတော့မဟုတ်ပါဘူး။ ဂန္တဝင်လူသတ်သမားကြီး Daud နဲ့သူအားအထားရဆုံးလူယုံတော် Billie Lurk အပြင် ဘုရင်မရဲ့သက်တော်စောင့်ဖြစ်တဲ့ Carvo တို့သုံးဦးပေါင်းပြီး ရင်ဆိုင်မယ်ဆိုရင်တောင်မှ အချိန်ယူ၊ အကြံအစည်တွေကောင်းကောင်းချပြီး လုပ်ဆောင်ရမှာပါ။

Billie Lurk ရဲ့ဇာတ်ရုပ်ကိုမီးမောင်းထိုးပြမယ့်အခွေဖြစ်တဲ့အတွက် Billie Lurk မှာဘယ်လိုမျိုးအစွမ်းအစတွေရှိသလဲဆိုတာ တစ်ချက်ကြည့်ရပါမယ်။

Billie Lurk ရဲ့လျှို့ဝှက်တဲ့အစွမ်းတွေ

Carvo, Daud နဲ့ Emily တို့နဲ့ကွဲပြားခြားနားစွာဘဲ Outsider ရဲ့အမှတ်အသားကိုမရရှိခဲ့တဲ့ Billie Lurk ဟာငယ်စဉ်ကတည်းက လိမ္မာပါးနပ်တဲ့အပြင် တိုက်ရည်ခိုက်ရည်မှာထူးချွန်ခဲ့ပြီး လူသတ်သမားခေါင်းဆောင် Daud ရဲ့လက်တွေ့ဆန်ပြီးပြင်းထန်တဲ့လေ့ကျင့်မှုတွေအောက်မှာ အသွားထက်တဲ့ဓါးတစ်လက်လိုထက်မြက်လာခဲ့ပါတယ်။ ပုံထဲကအတိုင်းဆိုရင် Billie Lurk ရဲ့ညာဖက်မျက်လုံးမှာ အနီရောင်မှော်မျက်လုံးကို အစားထိုးထားတာ အားလုံးကတွေ့မြင်ရမှာပါ။ Arkane ကုမ္မဏီပိုင်ရှင် Harvey Smith ရဲ့ပြောပြချက်အရဆိုရင် အဲဒီမျက်လုံးဟာရှေးဟောင်းမှော်ဝင်ပစ္စည်းတစ်ခုဖြစ်ပြီး သေမင်းမျက်ရှင် (Eye Of The Dead God) လို့အမည်ရပါတယ်။ ဒါတွေတင်မကသေးပါဘူး၊ သူမရဲ့ညာဖက်လက်ကို တစ်ဖက်ကမ္ဘာကမှော်ဝင်အစိတ်အပိုင်းတွေနဲ့ဖန်တီးထားပြီး သူမ ကိုင်ဆောင်တဲ့ဓါးဟာ Outsider ရဲ့လူသားဘဝကို နှုတ်ယူစတေးခဲ့တဲ့ ကျိန်စာသင့်ဓါးပါ။ Carvo မှာ Blink, Emily မှာ Far Reach အစရှိတဲ့ ကိုယ်ပိုင်ပုံစံနဲ့သွားလာတဲ့အစွမ်းတွေအသီးသီးရှိကျသလိုပဲ Billie Lurk ရဲ့အစွမ်းကတော့ Displace လို့အမည်ရပါတယ်။ အဲဒီလုပ်ဆောင်ချက်က ကိုယ်သွားခဲ့တဲ့နေရာတိုင်းမှာ ကိုယ့်ရဲ့အမှတ်အသားချန်ခဲ့လို့ရမှာဖြစ်ပြီး ကိုယ့်အမှတ်ချန်ခဲ့တဲ့နေရာဆီပြန်ရောက်ချင်တဲ့အချိန်ကျရင် ချက်ချင်းလိုသလိုပြန်ရောက်နိုင်မှာပဲဖြစ်ပါတယ်။ ထွေလာမှာ အားလုံးကိုတွေ့မြင်နိုင်ပါတယ်။

အနှစ်ချူပ်

အခုလိုမျိုး Billie Lurk ရဲ့ထူးခြားဆန်းပြားတဲ့ဂုဏ်စွမ်းသတ္တိတွေဟာ Outsider ကိုအနိုင်ယူနှိမ်နင်နိုင်းနိုင်မလားဆိုတာ မေးခွန်းထုတ်စရာဖြစ်လာပါပြီ။ Dishonored 2 မှာ Billie Lurk ကိုအားလုံးက တွေ့မြင်ခဲ့ရပေမယ့် ဇာတ်ပို့သဘောမျိုး၊ ရာဇဝတ်မှုကျူးလွန်တဲ့သူထက်စာရင် အငှားယာဉ်မောင်းတဲ့သူမျိုးအဖြစ်နဲ့သာ ပြတ်တိပြတ်တောင်းနဲ့မြင်ခဲ့ရတာဖြစ်ပါတယ်။ ဒါပေမယ့် Outsider ရဲ့ပြောစကားအရဆိုရင်တော့ သူ့ကိုနှိမ်နင်းနိုင်တဲ့ လူတစ်ယောက်ရှိပါသေးတယ်။ Outsider ရဲ့အဆုံးသတ်ကို အခုတစ်ခွေမှာတွေ့မြင်ရမှာမို့လို့ Dishonored ဂိမ်းရဲ့ဆက်လက်ဖြစ်တည်မှုဟာလည်း ဒီခွေနဲ့တိုက်ရိုက်ဆက်နွယ်နေပါတယ်။  Dishonored :Death Of The Outsider ကိုစက်တင်ဘာလမှာဖြန့်ချိမှာဖြစ်ပြီး PC, PS4 နဲ့ Xbox ပလက်ဖောင်းအသီးသီးမှာ ဆော့ကစားနိုင်မှာဖြစ်ပါတယ်။ ဒီတော့ Outsider ကိုနိဂုံးချူပ်လိုက်နိုင်မလား၊ ဒါမှမဟုတ် ဇာတ်သိမ်းကအားလုံးကိုတုန်လှုပ်ချောက်ချားသွားစေမလားဆိုတာကတော့ ဒီနှစ်အကုန်ပိုင်းမှာထွက်ရှိမယ့် Death Of The Outsider ကိုကိုယ်တိုင်ကိုယ်ကျ ဆော့ကစားရင်းအဖြေရှာကြည့်ကြပါလို့ တိုက်တွန်းလိုက်ရပါတယ်။

Dishonored :Death Of The Outsider
Yan (28.6.2017)
Ref: Kotaku, vg247

အကြောက်တရားအစစ်အမှန်ကို ခံစားမိစေမယ့်ဂိမ်းများ

ဂိမ်းတွေကိုရည်ရွယ်ချက်အမျိုးမျိုးနဲ့လူတွေကဆော့ကြပါတယ်။ တချို့ကပျော်ရွှင်မှုတွေကိုခံစားချင်လို့၊ တချို့ကခဏတာလောက်ပဲဖြစ်ဖြစ် လက်ရှိဘဝထဲကရုန်းထွက်ချင်လို့၊ တချို့ကျေတာ့ဘဝအမောတွေပြေပျောက်ချင်လို့၊ တချို့ကတော့စိတ်ကူးယဉ်ကမ္ဘာလောကတစ်ခုမှာ သက်ဝင်စီးမျောချင်လို့ အစရှိသဖြင့်ပါ။ ရုပ်ရှင်တွေကို ကိုယ့်ရဲ့အကြိုက်အလိုက်ကြည့်ကြသလိုပဲ ဂိမ်းတွေမှာလည်းရွေးချယ်ဆော့ကစားနိုင်မယ့် အမျိုးအစားမျိုးစုံရှိပါတယ်။ ကျောချမ်းရတယ်ဆိုတဲ့ခံစားချက်၊ ထိတ်လန့်တုန်လှုပ်မှုနဲ့ ဖန်တီးထားတဲ့အကြောက်တရားကို လူတွေခံစားနိုင်အောင်ပေးစွမ်းဖို့အတွက် သရဲကားဆိုတာမျိုးကို ရိုက်ကူးတင်ဆက်ထုတ်လုပ်လာကျတာဖြစ်ပါတယ်။ အဲဒီလိုပဲ ဇာတ်လမ်းဇာတ်အိမ်ကောင်းကောင်း၊ ယုတ္တိတန်ပြီး ပြောင်မြောက်တဲ့သရုပ်ဆောင်ကွက်တွေနဲ့ ရသမြောက်လှတဲ့သရဲကားကောင်းများစွာရှိသလို ဂိမ်းတွေမှာလည်းအလားတူပါပဲ။ ဂိမ်းနဲ့ရုပ်ရှင် မတူတဲ့အချက်တစ်ချက်က ဂိမ်းတွေဟာ စိတ်နှစ်ပြီးကိုယ်တိုင်ကိုယ်ကျနဲ့ ဝင်ရောက်ခံစားလို့ရတာပါပဲ။ ကိုယ့်လုပ်ဆောင်ချက်ရဲ့နောက်ဆက်တွဲ ကောင်းကျိုး၊ ဆိုးကျိုးသက်ရောက်မှုကို ဂိမ်းတွေထဲမှာ ချက်ချင်းပြန်လည်ခံစားနိုင်ပါတယ်။ ဒီတော့အခုဒီမှာ တကယ့်အကြောက်တရားအစစ်အမှန်ကို ခံစားမိစေမယ့်ဂိမ်းများကို စုစည်းတင်ဆက်ပေးလိုက်ပါတယ်။ ပုံတွေကြည့်ပြီးတော့ ကြက်သီးတွေထမသွားကြနဲ့ဦး။

Dead Space

ထိတ်လန့်စက်ဆုပ်ဖွယ်ကောင်းတဲ့ပုံသဏ္ဌာန်၊ ခန့်မှန်းရခက်တဲ့သဘာဝရှိတဲ့ Necromophs တွေဟာ Dead Space ဂိမ်းရဲ့သွေးပျက်စရာကောင်းမှုကို ပိုမိုလေးနက်စေပါတယ်။ အခြား horror ဂိမ်းထဲက ယေဘုယျဖုတ်ကောင်တွေလို သူတို့ရဲ့ခေါင်းထဲကျည်ဆန်တစ်တောင့်ရောက်သွားတာနဲ့ မပြီးသွားပါဘူး။ တစ်ခါတလေဆိုရင် သူတို့ရဲ့ခေါင်းနဲ့ခြေလက်အင်္ဂါအစိတ်အပိုင်းတွေဟာ ရှိသင့်တဲ့နေရာတွေမှာတောင် ရှိမနကြပါဘူး။ အဲဒီလိုမျိုးပုံသဏ္ဌာန်ပျက်ယွင်းနေတဲ့ Necromophs တွေကို ကိုယ်ဉာဏ်ရှိရင်ရှိသလို သုတ်သင်အနိုင်ယူရမယ်ဆိုပေမယ့် အာကာသထဲ လွင့်မြောအထီးကျန်နေတဲ့သိပ္ပံယာဉ်ပျံကြီးရဲ့ စင်္ကလြမ်းတွေ၊ အခန်းတွေထဲမှာ မျှော်လင့်ချက်မဲ့စွာသွားလာနေရင်းနဲ့ ရုတ်တရတ်အမှောင်ထောင့်နားက ဘယ်လိုမှပုံမကျတဲ့ခန္ဓာနဲ့ မသတီစရာကောင်းတဲ့ Necromophs တွေကို ဘွားကနဲတွေ့မြင်လိုက်ရမယ်ဆိုရင်တော့ ကိုယ့်ရဲ့အကြောက်တရားကို ကိုယ်ပြန်ပြီးအိန္ဒြေဆည်လိုက်နိုင်မှာမဟုတ်ပါဘူး။

Outlast

ဒီဂိမ်းဟာ ဒီစာရင်းထဲမှာပါလာလိမ့်မယ်လို့ အားလုံးကတွေးထားမိပြီးသားဖြစ်မှာပါ။ ဟုတ်ပါတယ်။ Outlast ရဲ့ကြောက်စရာကောင်းချက်ကတော့ ဂန္တဝင်ဆန်တယ်လို့တောင် သုံးနှုန်းရမလိုပါပဲ။ မူမမှန်တဲ့သတင်းတွေအပြင် နာမည်ဆိုးတွေနဲ့ကျော်ကြားနေတဲ့ စိတ်ရောဂါကုဆေးရုံဂေဟာကြီးထဲမှာ အကာအကွယ်မဲ့တဲ့သာမန်အရပ်သားဇာတ်ကောင်တစ်ယောက်အဖြစ်နဲ့ ကင်မရာတစ်လုံးကိုသာအဖော်ပြုပြီး အမှန်တရားကဘာလဲဆိုတာကို ရှာဖွေရမယ့်ဂိမ်းပဲဖြစ်ပါတယ်။ ပုန်းနိုင်ရမယ်၊ ပြေးနိုင်ရမယ်၊ ပေးထားတဲ့အချိန်အတွင်းမှာ ဆုံးဖြတ်ချက်ချနိုင်ရမယ်၊ ကင်မရာဘက်ထရီကလည်း တဖြည်းဖြည်းကုန်ဆုံးနေပါတယ်။ ရက်စက်တဲ့အသတ်အဖြတ်တွေ၊ ကိုယ့်ကိုတရစက်လိုက်ဖမ်းမယ့်စိတ်ရူးနှမ်းနေသူတွေ၊ Camorder ရဲ့ night vision ကြောင့်ပြောင်းလဲသွားတဲ့အမြင်၊ ခန့်မှန်းလို့မရတဲ့ဇာတ်ကွက်တွေနဲ့ အမှောင်ထုကြီးစိုးနေတဲ့ဂိမ်းတစ်ခုလုံးဟာ Outlast ဂိမ်းကပေးတဲ့အကြောက်တရားရဲ့အနှစ်အရသာတွေပါပဲ။

ZombiU

လူဆော့နည်းတဲ့ ကြောက်ဖို့အကောင်းဆုံးဇွန်ဘီဂိမ်းထဲကတစ်ခုလို့တောင် ပြောလို့ရပါတယ်။ ဇွန်ဘီဂိမ်းတွေထဲမှာထည့်သွင်းလေ့မရှိတဲ့အိုင်ဒီယာတချို့ကို ZombiU ထဲမှာတွေ့မြင်နိုင်ပါလိမ့်မယ်။ ကိုယ်ဟာ အကြိမ်ပေါင်းမြောက်မြားစွာ သေလိမ့်မယ်ဆိုတာကိုတော့ နှလုံးသွင်းထားဖို့လိုပါတယ်။ ZombiU ထဲကဇွန်ဘီတွေဟာ ကြမ်းတမ်းတယ်၊ ရက်စက်တယ်၊ ထိတ်လန့်ဖွယ်ကောင်းပြီး အဆုံးသတ်မဲ့ပါတယ်။ အဲဒီလိုဇွန်ဘီတွေကိုရင်ဆိုင်ဖို့အတွက် ကိုယ့်မှာရှိတဲ့လက်နက်ကိရိယာတွေက သစ်သားတုတ်တစ်ချောင်းထက်တော့ပိုပါတယ်။ အကောင်းဆုံးတွေလုပ်ဆောင်နေရင်းနဲ့ ကံမကောင်းစွာနဲ့ ကိုယ်သေသွားတဲ့အချိန်မှာ အစနေရာကပြန်စရမှာပါ။ ဒါပေမယ့် ကိုယ်သွားခဲ့တဲ့လမ်းတလျှောက်စုဆောင်းခဲ့တဲ့ ပစ္စည်းနဲ့အသုံးအဆောင်တွေကတော့ ကိုယ်သေခဲ့တဲ့နေရာမှာ ကျန်ခဲ့ပါပြီ။ လက်နက်ပစ္စည်းတွေပိုရလေ၊ ဆုံးရှုံးရမယ့်အရာတွေက များလေလေပါပဲ။ ဒီတော့ ကိုယ်ကကြာကြာရှင်သန်လေ၊ ကိုယ်ခံစားရမယ့်ဖိစီးမှုကလည်းပိုပြီးတိုးလေလေပါပဲ။

Until Dawn

၂၀၁၅ ခုနှစ်ရဲ့စိတ်ကျေနပ်ဖို့အကောင်းဆုံးဂိမ်းလို့ဆိုကြပါတယ်။ Until Dawn ဟာ horror ဂိမ်းနဲ့ရင်းနှီးသူများအတွက်တော့ လက်လွှတ်မခံပဲဆော့ကြည့်ရမယ့် ဂိမ်းပါ။ ဂိမ်းကိုဖန်တီးထားတဲ့ပုံစံက ရုပ်ရှင်ဆန်တယ်၊ ခြောက်ခြားဖို့ကောင်းတယ်၊ ဇာတ်အိမ်ခိုင်ပြီးဆန်းပြားပါတယ်။ Until Dawn ဂိမ်းရဲ့ဇာတ်ကောင်တွေအားလုံးရဲ့ ကံကြမ္မာဟာကိုယ့်လက်ထဲမှာပါ။ ဂိမ်းတစ်ခုလုံးဘယ်လိုပြီးဆုံးသွားမလဲဆိုတာနဲ့ ဇာတ်ကောင်တစ်ကောင်ချင်းစီရဲ့အသက်ဝိညာဉ်ဟာ ကိုယ့်ရဲ့လုပ်ဆောင်ချက်၊ ဆုံးဖြတ်ချက်တစ်ခုအပေါ်မှာ မှီခိုနေလို့ရင်ခုန်ဖို့ကောင်းသလို တာဝန်လည်းကြီးပါတယ်။ ကိုယ့်ရဲ့ဆုံးဖြတ်ချက်တွေအပေါ်မှာမူတည်ပြီး တဖြည်းဖြည်းရှေ့ဆက်လာတဲ့ဇာတ်လမ်းရဲ့နောက်ဆုံးနိဂုံးဟာ ကောင်းသောအဆုံးသတ်ဖြစ်မလား၊ နာကျည်းကြေကွဲဖို့ကောင်းတဲ့အဆုံးသတ်ဖြစ်မလားဆိုတာကတော့ ကိုယ့်ရဲ့လုပ်ရပ်တွေကပဲ အဆုံးအဖြတ်ပေးသွားမယ့်ဂိမ်းပါ။

Resident Evil HD

Survival Horror ဆိုတာကြီးကို ၁၉၉၆ ခုနှစ်မှာ Capcom က Resident Evil နဲ့အဓိပ္ပါယ်ဖွင့်ဆိုခဲ့ပါတယ်။ ဗိုင်းရစ်ပ်တွေပြန့်နှံ့သွားတဲ့ကမ္ဘာကြီးကြောင့် ဗီဇပြောင်းသွားတဲ့သတ္တဝါပေါင်းများစွာနဲ့ ဖုတ်ကောင်တွေကြားထဲမှာ အသက်ရှင်နိုင်ဖို့ သေနတ်တစ်လက်၊ ဓါတ်မီးတစ်လက်နဲ့အားလုံးကိုရင်ဆိုင်ဖြတ်ကျော်ရမှာပါ။ ဆေးဝါးပစ္စည်းအထားအသိုနဲ့ ကျည်ဆန်ထိန်းသိမ်းသိုလှောင်မှုတို့ကို လိမ္မာပါးနပ်မှုစွာ စီမံခန့်ခွဲရမှာဖြစ်ပြီး တစ်ချိန်တည်းမှာပဲ ဇွန်ဘီဖုတ်ကောင်တွေကိုသုတ်သင်ရင်ဆိုင်သွားရမှာပါ။ ၂၀၀၂ ခုနှစ်မှာ update ထွက်ခဲ့ပြီး ၂၀၁၅ ခုနှစ် remaster မှာတော့ ပိုမိုအဆင့်မြင့်ပြီးတိကျသွားတဲ့အသေးစိတ်အချက်အလက်၊ ပတ်ဝန်းကျင်နဲ့ဂိမ်းဇာတ်ကွက်တို့ကြောင့် ရှိရင်းစွဲခွေရဲ့အောင်မြင်ကျော်ကြားမှုဂုဏ်ကိုဆက်လက်ထိန်းသိမ်းလာနိုင်ခဲ့တဲ့ ဂိမ်းပါ။

Silent Hill 2

အပြစ်တစ်ခုရဲ့နောက်ဆက်တွဲဖြစ်ရပ်တွေကို စစ်မှန်တဲ့ထိတ်လန့်မှုနဲ့သရုပ်ဖော်တဲ့နေရာမှာ Silent Hill 2 လောက်ဘယ်ဂိမ်းမှကြောက်ဖို့မကောင်းနိုင်ပါဘူး။ သမာရိုးကျဆန်တဲ့ဇာတ်ကောင်တစ်ယောက်ရဲ့ မဖော်ပြလိုတဲ့မသိစိတ်ကတဆင့် သွေးပျက်ခြောက်ခြားစရာကောင်းတဲ့ခရီးရှည်တစ်ခုနဲ့ အနှိပ်စက်ခံဝိညာဉ်ပေါင်းများစွာကို အားလုံးကတွေ့မြင်ခံစားကြရမှာပါ။ စိတ်ထိခိုက်စရာကြမ္မာဆိုးတွေ၊ ကျူးလွန်ခဲ့တဲ့အပြစ်၊ အမျက်ဒေါသ၊ လိင်ပိုင်းဆိုင်ရာစော်ကားမှုတွေ၊ အစရှိတဲ့စိတ်ရဲ့အစွန်တဒင်္ဂဖြစ်ရပ်တွေနဲ့ ဆိုးရွားလှတဲ့အဖြစ်သနစ်တွေကို အော့နှလုံးနာစရာမကောင်းအောင် တည်ငြိမ်ရင့်ကျက်မှုအပြည့်နဲ့ ဖန်တီးထားတာမို့ တနုံ့နုံ့ဖြစ်နေရမယ့် ဇာတ်လမ်းကို ပိုပြီးအားဖြည့်ပေးလိုက်သလိုပါပဲ။ အဓိကကတော့ ကိုယ်ဘယ်လိုမှမလွတ်မြောက်နိုင်တဲ့အပြစ်ကနေ ကိုယ်ရှောင်ပြေးနေရတဲ့အသိကကိုယ့်ကိုခြောက်လှန့်နေပြီး ဂိမ်းရဲ့အဆိုးရွားဆုံးဖြစ်တဲ့ရန်သူဇာတ်ဆောင်နဲ့ သူကြေကိုယ်ကြေတိုက်ခိုက်ပွဲဝင်ရတာပါ။

Fatal Frame 2: Crimson Butterfly

Fatal Frame ဂိမ်းကပေးတဲ့အကြောက်တရားဟာ နည်းပညာရဲ့အားသာချက်တွေနဲ့တည်ဆောက်ထားတဲ့ horror ဂိမ်းတွေကို ကျော်လွန်နေပါတယ်။ လက်ရှိခေတ်ပေါ် နာမည်ကျော်ပုန်းလိုက်၊ ပြေးလိုက် horror ဂိမ်းတွေနဲ့ကွဲပြားစွာပဲ Fatal Frame ဂိမ်းဟာ ကိုယ့်ကို ကိုယ့်ရဲ့အကြောက်တရားတွေနဲ့ပြန်ရင်ဆိုင်ခိုင်းမှာပါ။ အရှေ့မှာလည်း Fatal Frame ဂိမ်းပေါင်းများစွာထွက်ခဲ့ပြီးပါပြီ။ ဒါပေမယ့် ဒီတစ်ခွေကတော့မှတ်မှတ်ရရ သရဲဓါတ်ပုံရိုက်ယူရသလိုမျိုး အထင်ကရဖြစ်နေခဲ့တဲ့အခွေပါ။ Fatal Frame ဂိမ်းမှာရန်သူတွေဟာ နေရာတိုင်းမှာရှိနေတတ်ပါတယ်။ သူတို့ကအငြိုးကြီးတဲ့တစ္ဆေတွေ၊ မျှော်လင့်ချက်မဲ့နေတဲ့ဝိညာဉ်တွေ၊ နာကျည်းချက်တွေပြင်းထန်တဲ့သရဲတွေပါ။ တစ်ခါတလေမှာတော့ သူတို့ကိုမမြင်ရပေမယ့် သူတို့ရှိနေတာကိုခံစားရမှာပါ။ Fatal Frame ဂိမ်းရဲ့ထူးခြားတဲ့လုပ်ဆောင်ချက် မကောင်းဆိုးရွားဝိညာဉ်တွေကို နာကျင်စေနိုင်တဲ့ Camera Obscura ပါ။ ဂိမ်းတစ်ခုလုံးကို third person အမြင်နဲ့ဆော့ရမှာဖြစ်ပေမယ့် စတင်ရင်ဆိုင်လာရပြီဆိုတဲ့အချိန်မှာတော့ first person ကိုပြောင်းလဲရမှာဖြစ်ပြီး ဆိုးရွားအကျည်းတန်လှတဲ့ဝိညာဉ်တစ္ဆေပုံရိပ်တွေကို ဓါတ်ပုံရိုက်ယူရမှာပါ။

Silent Hill: PT (Playable Teaser)

Horror ဂိမ်းတွေရဲ့ဘုရင်လို့တင်စားသုံးနှုန်းခဲ့ကြတဲ့ ပယ်ဖျက်ခဲ့ပြီး Silent Hill ဂိမ်းရဲ့ playable teaser ဖြစ်ပါတယ်။ Hideo Kojima ရဲ့နာရီအနည်းငယ်သာဆော့ကစားနိုင်တဲ့ Silent Hill teaser ဟာ စိတ်ရှည်စွာဖန်တီးထားတဲ့လက်ရာနဲ့ နည်းပညာတိုးတက်မှုတို့ပေါင်းစည်းထားတဲ့ လက်ရာမြောက်ဂိမ်းတစ်ခုဖြစ်လာလိမ့်မယ်လို့ အားလုံးကခန့်မှန်းခဲ့ကြပါတယ်။ ဟုတ်ပါတယ်။ အားလုံးခန့်မှန်းခဲ့သလိုပဲ teaser အဖြစ်သာထွက်ရှိခဲ့ပေမယ့်လည်း ပရိသတ်တွေအားလုံးကို မေ့မရတဲ့ထိတ်လန့်ဖွယ်အတွေ့အကြုံတွေ ပေးစွမ်းသွားခဲ့ပါတယ်။ Teaser မှာဖော်ပြခဲ့တဲ့ ခြောက်ခြားစရာဟောခန်းလမ်းမကြီးနဲ့ အိမ်ပတ်ဝန်းကျင်တစ်ခုလုံးကို တကယ့်ပြင်ပဘဝမှာကြုံတွေ့နေရသလို ရင်းရင်းနှီးနှီးခံစားရပါတယ်။ စိတ်မကောင်းစွာနဲ့ပဲ ဂိမ်းကိုရုတ်တရတ်ဖျက်သိမ်းလိုက်တာကြောင့် အားလုံးရဲ့မျှော်လင့်ချက်တွေကိုရိုက်ချိုးလိုက်သလိုပါပဲ။

Games that will makes you feel your true fear
Yan (23.6.2017)
IGN, Kotaku

ကမ္ဘာ့အချမ်းသာဆုံးနာမည်ကြီးဂိမ်းကုမ္မဏီဆယ်ခု (၂၀၁၇)

ဗီဒီယိုဂိမ်းတွေစတင်တီထွင်လိုက်တဲ့ ၁၉၇၀ ခုနှစ်ကစပြီး အချိန်နဲ့အမျှတစတစ ဗီဒီယိုဂိမ်းဆော့ကစားမှုတွေဟာ ကမ္ဘာနဲ့အဝှမ်း လူသားတွေကြားမှာပြန့်နှံ့လို့လာခဲ့ပါတယ်။ Pacman ကိုဇာတ်လမ်းသွားကစားပြီး အစားမခံရအောင် အလုအယက်ပြေးခဲ့ရတာတွေ၊ မှိုရန်သူတွေကိုနှိမ်နင်းပြီး မင်းသမီးလေးကိုကယ်တင်မယ့် မာရီယို၊ အတွင်းအားတွေစုပြီးဟိုဖက်ဒီဖက်ပစ်၊ လေပေါ်ကန်ချက်တွေနဲ့ အဖြူအနီသိုင်းညီနောင်တို့အပြင် အရောင်စုံလင်တဲ့ပိုကီမွန်ကတ်တွေဟာ ကျွန်တော်တို့ရဲ့ငယ်ဘဝနေ့ရက်တွေကို မရိုးရစေဘဲ ပျော်ရွှင်စရာတွေချယ်မှုန်းပေးခဲ့တာပါ။ ဒီလိုမျိုးပြောင်းလဲလာတဲ့ခေတ်ကြီးနဲ့အတူ ဗီဒီယိုဂိမ်းတွေရဲ့သက်တမ်းဟာလည်း တဖြည်းဖြည်းကြီးမြင့်လာတာတဲ့အမျှ ဗီဒီယိုဂိမ်းရေးဆွဲတည်ဆောက်တဲ့ကုမ္မဏီတွေဟာလည်း အပြိုင်အဆိုင် ပေါ်ပေါက်လို့လာပါပြီ။ အဲဒီလိုဂိမ်းကုမ္မဏီတွေများပြားလာခဲ့တဲ့အတွက် အားလုံးအတွက် စီးပွားရေးအခွင့်အလမ်း၊ အလုပ်အကိုင်နဲ့အကျိုးတူပူးပေါင်းမှုတွေဆိုတာ ထွက်ပေါ်လာခဲ့ပါတယ်။ ဂိမ်းကုမ္မဏီတွေဟာ ရည်ရွယ်ချက်ကြီးမားစွာနဲ့ ကမ္ဘာနဲ့အဝှမ်းပရိသတ်တွေအကြိုက်တွေ့မယ့်ဂိမ်းတွေဖြစ်လာအောင်လို့ အစွမ်းကုန်အားထုတ်ပြီး ဖန်တီးလာကြပါတယ်။ အဲဒီလိုမျိုးမတူကွဲပြားတဲ့အကြံဉာဏ်တွေ၊ အတွေးအမြင်တွေကြောင့် အောင်မြင်သွားခဲ့ကြတဲ့ဂိမ်းတွေဟာလည်း ဘယ်ရှုထောင့်ကကြည့်ကြည့် စိန်တစ်ပွင့်လိုပဲ ပြောက်မြောက်ကောင်းမွန်တာကို အားလုံးကတွေ့မြင်ခံစားခဲ့ကြရမှာပါ။ အဲဒီတော့အခုဒီမှာ ကမ္ဘာ့ဂိမ်းဈေးကွက်မှာနာမည်တစ်လုံးနဲ့ရပ်တည်နေပြီး အကြွယ်ဝဆုံးဖြစ်နေတဲ့ဂိမ်းကုမ္မဏီဆယ်ခုကို ဖော်ပြပေးချင်ပါတယ်။ တကယ်လို့ကိုယ်ကဂိမ်းတွေနဲ့ အထိအတွေ့ရှိခဲ့ဖူးသူတစ်ယောက်ဆိုရင်တော့ အဲဒီကုမ္မဏီတွေကထုတ်ခဲ့တဲ့ဂိမ်းတွေကို ဆော့ခဲ့ဖူးမှာ အသေအချာပါပဲ။

10. Square Enix - ကြွယ်ဝမှု ၁.၂၆ ဘီလီယံ

 ဂျပန်နိုင်ငံအခြေစိုက်ဂိမ်းကုမ္မဏီဖြစ်တဲ့ Square Enix ဟာ Final Fantasy, Kingdom Hearts နဲ့ Dragon Quests ဂိမ်းတွေနဲ့ ဂိမ်မာတွေကြားမှာလူသိများတဲ့ဂိမ်းကုမ္မဏီတစ်ခုဖြစ်ပါတယ်။ Final Fantasy ဂိမ်းစီးရီးဟာ ၂၀၁၆ ဇွန်လမှာ ခွေပေါင်းသန်း ၁၁၀ ရောင်းချခဲ့ရပြီး Square Enix ရဲ့ရောင်းအားအကောင်းဆုံးဂိမ်းဖြစ်လာခဲ့ပါတယ်။ ဒါ့အပြင် Disney နဲ့အတူလက်တွဲပြီးရေးဆွဲဖန်တီးခဲ့တဲ့ Kingdom Hearts ဂိမ်းဟာလည်း ၂၀၁၄ မတ်လမှာ ခွေပေါင်းသန်း ၂၀ ရောင်းအားထွက်ခဲ့လို့ နာမည်ကိုဆက်လက်ထိန်းထားနိုင်ခဲ့တဲ့အပြင် ပြိုင်ဖက်ကုမ္မဏီဖြစ်တဲ့ Eidos ကို ၂၀၀၉ ခုနှစ်ကဝယ်ယူပြီး Tomb Rider ဂိမ်းစီးရီးကိုလည်း တစ်ဖက်ကနေ ဆက်လက်အသက်သွင်းနေခဲ့ပါတယ်။ လက်ရှိ Square Enix ရဲ့ကြွယ်ဝမှုဟာ ၁.၂၆ ဘီလီယံရှိနေပါတယ်။

9. Ubisoft - ကြွယ်ဝမှု ၁.၈၅ ဘီလီယံ

လွတ်လပ်တဲ့ဂိမ်းကုမ္မဏီကြီးတွေဆိုတာနဲ့ Electronics Art နဲ့ Activision ပြီးရင် Ubisoft ကို အားလုံးကပြေးမြင်ကြမှာပါပဲ။ ပြင်သစ်အခြေစိုက်ဂိမ်းကုမ္မဏီတစ်ခုဖြစ်တဲ့ Ubisoft ကို Guillemot ညီအစ်ကိုက ၁၉၈၆ ခုနှစ်မှာ စတင်တည်ထောင်ခဲ့ပါတယ်။ EA (Electronic Arts) အတွက်ဂိမ်းအကျိုးပြုကုမ္မဏီတစ်ခုအနေနဲ့ စတင်လာရာကနေ ၁၉၉၀ မှာတော့ Everquest ဆိုတဲ့ဂိမ်းနဲ့ ဂိမ်းလောကထဲကိုခြေစုံပစ်ဝင်ရောက်လာခဲ့ပြီး အခုဆိုရင် Assasin's Creed, Splinter Cell, Rainbow Six, Ghost Recon, Far Cry နဲ့ Prince Of Persia ဂိမ်းတို့ကိုပါထုတ်လုပ်ဖြန့်ချိပြီးသွားတဲ့ ဂိမ်းကုမ္မဏီကြီးတစ်ခုဖြစ်လာခဲ့ပါတယ်။ လက်ရှိမှာတော့ Ubisoft ရဲ့ကြွယ်ဝမှုဟာ ၁.၈၅ ဘီလီယံရှိပါတယ်။

8. Konami - ကြွယ်ဝမှု ၃.၂၄ ဘီလီယံ

ကတ်ဂိမ်း၊ အားကစားဂိမ်းနဲ့ ပြိုင်ပွဲဂိမ်း အများစု မြစ်ဖျားခံဆင်းသက်လာရာနေရာကတော့ Konami ဂိမ်းကုမ္မဏီပဲဖြစ်ပါတယ်။ Konami ဟာ ဂိမ်းထုတ်ကုန်တွေကိုထုတ်လုပ်တဲ့အပြင် ဂိမ်းတွေကို ရေးဆွဲတည်ဆောက်တဲ့ကုမ္မဏီတစ်ခုလည်းဖြစ်ပါတယ်။ ဒါ့အပြင် Konami ဟာကမ္ဘာကိုထိုးဖေါက်ခဲ့တဲ့ Horror ဂိမ်း Silent Hill, အက်ရှင်အသားပေး Metal Gear Rising ဂိမ်းနဲ့ Dance Revolution ဂိမ်းစီးရီးကို ပင်တိုင်ဦးစီးပြီးထုတ်လုပ်ခဲ့တဲ့ ဂိမ်းကုမ္မဏီလည်းဖြစ်သလို PES ဂိမ်းစီးရီးပြုလုပ်ဖန်တီးသူလည်းဖြစ်ပါတယ်။ လက်ရှိမှာတော့ Konami ဟာဈေးကွက်မှာကြွယ်ဝမှု ၃.၂၄ ဘီလီယံနဲ့ရပ်တည်နေပါတယ်။

7. Electronic Arts - ကြွယ်ဝမှု ၄.၁၄ ဘီလီယံ

EA လို့လည်းလူတွေသိကြတဲ့ Electronic Arts ဟာ Madden NFL လို အားကစားဂိမ်းတွေကိုတစ်ခဲနက်အားပေးကြတဲ့လူတွေရဲ့ အသည်းစွဲဂိမ်းကုမ္မဏီတစ်ခုပါ။ အခြားနာမည်ကြီးဂိမ်းစီးရီးတွေဖြစ်တဲ့ Need For Speed, NBA, Medal Of Honor နဲ့ဘောလုံးဂိမ်း FIFA တို့ဟာ EA ရဲ့လက်အောက်က ထွက်ရှိလာခဲ့ကြတာပါ။ EA ဟာ PC အခြေစိုက်ဂိမ်းတွေကိုဖန်တီးနေရာကနေ Console ပလက်ဖောင်းဖက်ကိုပြောင်းသွားပြီး နာမည်ကျော် Mass Effect လိုဂိမ်းမျိုးကို Xbox နဲ့ Playstation 4 ပလက်ဖောင်းအသီးသီးအတွက် ထုတ်လုပ်ခဲ့ပါတယ်။ Crysis ဂိမ်းဟာလည်း ဂိမ်မာတွေရဲ့တစ်ခဲနက်အားပေးမှုကိုခံခဲ့ရတဲ့ ဂိမ်းပါ။ လက်ရှိမှာတော့ EA ဟာ ကြွယ်ဝမှု  ၄.၁၄ ဘီလီယံနဲ့ရပ်တည်နေတဲ့ ဂိမ်းကုမ္မဏီတစ်ခုဖြစ်နေပါတယ်။

 6. Bandai Namco - ကြွယ်ဝမှု ၄.၇၄ ဘီလီယံ

Bandai Namco ဟာဂျပန်အခြေစိုက်ဂိမ်းကုမ္မဏီတစ်ခုဖြစ်ပြီး အဆင့်တက်ပြိုင်ပွဲဂိမ်းအမျိုးအစားတွေကို ဈေးကွက်ထဲမှာချူပ်ကိုင်ထားတာပဲဖြစ်ပါတယ်။ Namco ဟာ Pacman ဆိုတဲ့နာမည်နဲ့ အဆင့်တက်ဂိမ်းအမျိုးအစားတစ်ခုကို စတင်ထုတ်လုပ်ခဲ့ပြီး နာမည်ရလာခဲ့တဲ့နောက်မှာတော့ Atari, Nintendo တို့နဲ့လက်တွဲပူးပေါင်းပြီး ကမ္ဘာ့ဂိမ်းလောကရဲ့ထိပ်တန်းစာမျက်နှာကိုရောက်အောင်လို့ တက်လှမ်းလာခဲ့တာပါ။ ၂၀၀၅ ခုနှစ်မှာတော့ Tekken နဲ့ Naruto ဂိမ်းစီးရီးတွေကို စတင်အသက်သွင်းပြီး ဒုတိယအကြိမ်အောင်မြင်မှုကို အရဆွတ်ခူးနိုင်ခဲ့ပါတယ်။ Bandi Namco မှာလက်ရှိကြွယ်ဝမှု ၄.၇၄ ဘီလီယံနဲ့ ရပ်တည်နေတဲ့ဂိမ်းကုမ္မဏီဖြစ်ပါတယ်။

5. Activision Blizzard - ကြွယ်ဝမှု ၄.၈၅ ဘီလီယံ

Activision ကုမ္မဏီဟာ ၂၀၀၈ ခုနှစ်မှာ Vivendi နဲ့ပေါင်းစည်းပြီး Activision Blizzard ဖြစ်လာခဲ့ပါတယ်။ အဲဒီလိုပူးပေါင်းပြီး ဂိမ်းလောကထဲမှာ နာမည်ကျော်ပြိုင်စံရှားဂိမ်းအမြောက်အမြားကိုဖန်တီးခဲ့တဲ့အတွက် ဈေးကွက်ကို ပြန်လည်ဦးဆောင်ခဲ့ပြန်ပါတယ်။ စစ်ပွဲရာစုနှစ်တွေကို ဂိမ်မာများအားလုံး ကိုယ်တိုင်ကိုယ်ကျဝင်ရောက်ခံစားနိုင်အောင် ရသမြောက်စွာဖန်တီးထားတဲ့ Call Of Duty ဂိမ်းစီးရီးဟာ Activision ရဲ့အအောင်မြင်ဆုံးဂိမ်းစီးရီးဖြစ်ခဲ့ပြီး Halo ကတော့ ဒုတိယအအောင်မြင်ဆုံးဖြစ်ပါတယ်။ ဒါတွေတင်မကသေးပါဘူး၊ ကမ္ဘာနဲ့အဝှမ်း လူကြီးလူငယ်မရွေးတစ်ခဲနက်ကြိုက်နှစ်သက်အားပေးခဲ့ရတဲ့ Warcraft ဂိမ်းဟာ Activision Blizzard ကဂုဏ်ယူစွာနဲ့ထုတ်လုပ်ဖြန့်ချိခဲ့တဲ့ဂိမ်းပါပဲ။ ဈေးကွက်ထဲမှာ Activision Blizzard ရဲ့ကြွယ်ဝမှုဟာ ၄.၈၅ ဘီလီယံအထိရှိနေပြီး ၂၀၁၇ ခုနှစ်ရဲ့အချမ်းသာဆုံးဂိမ်းကုမ္မဏီတွေထဲက တစ်ခုအပါအဝင်ဖြစ်ခဲ့ပါတယ်။

4. SEGA - ကြွယ်ဝမှု ၄.၉ ဘီလီယံ

SEGA ဟာ အသံလိုလျင်မြန်တဲ့အစွမ်းနဲ့ ချစ်စဖွယ်အပြာရောင်ဖြူကောင်တဲ့ Sonic ဇာတ်ကောင်ကိုပွဲထုတ်ပြီး ဈေးကွက်ထဲမှာ နာမည်ရလာခဲ့တာပါ။ အခုဆိုရင် SEGA ဟာအရင်က စီးပွားပြိုင်ဖက်ဖြစ်တဲ့ Nintendo နဲ့လက်တွဲပြီး အိုလံပစ်ဂိမ်းပွဲက Mario နဲ့ Sonic တွဲဖက်စီးရီးပုံစံလို crossover ခေါင်းစဉ်နဲ့ စီးရီးမှန်သမျှကို ပရိသတ်တွေအကြိုက်တွေ့ဘဝင်ခိုက်အောင် ပုံစံအသစ်နဲ့ ဆက်တိုက်ဖန်တီးချပြနေခဲ့တာပါ။ လက်ရှိအချိန်မှာတော့ ဈေးကွက်မှာ နာမည်တစ်လုံးရှိတဲ့အပြင် ကြွယ်ဝမှု ၄.၉ ဘီလီယံနဲ့ ရပ်တည်နေပါတယ်။

3. Nintendo - ကြွယ်ဝမှု ၆.၂၈ ဘီလီယံ

Nintendo ရဲ့ဂိမ်းနဲ့ပတ်သတ်တဲ့ ၁၂၅ နှစ်တာသမိုင်းကြောင်းဟာ ဟိုတယ်ခန်းမှာအပျင်းပြေထိုင်ဆော့ကျတဲ့ကတ်ဂိမ်းတွေကနေ တီဗီဖန်သားပြင်မှာတွေ့မြင်ဆော့ကစားနိုင်မယ့် အခုလိုဂိမ်းတွေဖြစ်လာတဲ့အထိပါပဲ။ လူဆိုးဘုရင်ကြီး Koopa ဆီကနေ မင်းသမီးလေး Peach ကို သွားရောက်ကယ်တင်မယ့် ပိုက်ပြင်ဆရာ မာရီယိုလေးရဲ့စွန့်စားခန်းဇာတ်လမ်းဟာ ဂိမ်မာများအားလုံးရဲ့ဖြစ်တည်ရာဇစ်မြစ်လို့ဆိုမယ်ဆိုရင်လည်း မမှားပါဘူး။ အဲဒီလိုမျိုးကြည်နူးပြီးစိတ်လှုပ်ရှားဖို့ကောင်းတဲ့မာရီယိုပုံပြင်လေးကို အားလုံးက Nintendo ဂိမ်းစက်တွေအပေါ်မှာ ပထမဆုံးအနေနဲ့ ဆော့ခွင့်ရခဲ့ကြတာပါ။ Nintendo ဟာဂိမ်းလောကရဲ့ရှေ့မှာပဲရပ်တည်ချင်တဲ့ဆန္ဒရှိတဲ့အတွက် ဂိမ်းစက်တွေကိုပဲ ဦးစားပေးထုတ်လုပ်ဖြန့်ချိခဲ့ပါတယ်။ Nintendo Entertainment System ကနေတဆင့် Super Nintendo, Gamecube, Wii, Wii U အစရှိတဲ့ ပလက်ဖောင်းကွဲတွေနဲ့ ဂိမ်းစက်တွေဟာ ဂိမ်မာတွေကို မတူကွဲပြားတဲ့ဂိမ်းတွင်းအတွေ့အကြုံခံစားချက်ရသတွေ ပေးစွမ်းလို့နေခဲ့ပါပြီ။ ဒါတွေအပြင် မာရီယို၊ ပိုကီမွန်နဲ့ Legend Of Zelda ဂိမ်းတွေရဲ့အောင်မြင်ကျော်ကြားမှုဟာလည်းလက်ရှိမှာ Nintendo ကို ဈေးကွက်ထဲကြွယ်ဝမှု ၆.၂၈ ဘီလီယံမှာ ရပ်တည်နိုင်အောင်လို့ တစ်ဖက်ကနေ ပံ့ပိုးနေခဲ့တာပါ။

2. Microsoft - ကြွယ်ဝမှု ၁၂.၈၂ ဘီလီယံ

၂၀၀၂ ခနှစ်မှာ Xbox ဂိမ်းစက်တွေ ဈေးကွက်ကိုစတင်ထိုးဖေါက်ပြန့်နှံ့လာတဲ့အလျောက် Microsoft ကုမ္မဏီဟာ Xbox နဲ့အကျိုးတူလက်တွဲပူးပေါင်းပြီး စီးပွားရေးအကွက်မြင်ခဲ့ပါတယ်။ Microsoft ရဲ့အကြီးမားဆုံးအားသာချက်ကတော့ Microsoft ထုတ်ကုန်ပစ္စည်းတွေဟာ ဂိမ်းလောကတင်မက အခြားနယ်ပယ်တွေမှာပါ တွင်တွင်ကျယ်ကျယ်အသုံးပြုနိုင်တာပဲ ဖြစ်ပါတယ်။ Microsoft ဟာ Window PC နဲ့ Window Phone တွေအတွက်ရည်ရွယ်ပြီး ဂိမ်းအမြောက်အမြားထုတ်လုပ်ခဲ့ပါတယ်။ ယှဉ်ပြိုင်မှုတွေများလှတဲ့ဂိမ်းလောကမှာ Microsoft ကို နံပါတ်နှစ်နေရာရောက်အောင် တွန်းတင်ပေးလိုက်တဲ့ဂိမ်းကတော့ Halo ဂိမ်းစီးရီးပဲဖြစ်ပါတယ်။ Xbox ပလက်ဖောင်းဂိမ်းအနေနဲ့ ၂၀၀၁ ခုနှစ်ကထွက်ရှိခဲ့ပြီး Master Chief ပါဝင်တဲ့သိပ္ပံဆန်ဆန်၊ အာကာသ first shooter ဂိမ်း Halo ဟာ ပွဲဦးထွက်မှာပဲ သန်း ၆၀ ရောင်းထွက်ခဲ့တဲ့အတွက် Microsoft ကို ၃.၅ ဘီလီယံအမြတ်အစွန်းရအောင် စွမ်းဆောင်ပေးနိုင်ခဲ့ပါတယ်။ Microsoft ဟာ လက်ရှိကြွယ်ဝမှု ၁၂.၈၂ ဘီလီယံနဲ့ နံပါတ်နှစ်နေရာမှာ ရပ်တည်နေပါတယ်။

1. Sony Computer Entertainment - ကြွယ်ဝမှု ၁၃.၄ ဘီလီယံ

ဗီဒီယိုဂိမ်းတွေစတင်ခဲ့တဲ့ရာစုနှစ်ကနေ အခုချိန်ထိ Sony Computer Entertainment ကို ဂိမ်းလောကရဲ့ဘုရင်တစ်ပါးလို့ တင်စားသုံးနှုန်းကြပါတယ်။ တကယ်လည်း သက္ကရာဇ်အလိုက်ဗီဒီယိုဂိမ်းတွေရဲ့ ဆင့်ကဲပြောင်းလဲမှုဖြစ်စဉ်သမိုင်းမှာ Sony Computer Entertainment ကအချက်အခြာကျတဲ့နေရာကနေ ပါဝင်ခဲ့တာပါ။ God Of War နဲ့ Gran Turismo ဂိမ်းစီးရီးတွေကို အားလုံးနဲ့အထူးတလည်ပြန်ပြီး မိတ်ဆက်ပေးနေစရာမလိုတော့ဘူးလို့ထင်ပါတယ်။ God Of War ဂိမ်းဇာတ်လမ်းတွဲဟာ အောင်မြင်စွာနဲ့နောက်ဆက်တွဲခွေခြောက်ခွေထွက်ရှိခဲ့ပြီး ၁၉၉၇ ခုနှစ်ကပွဲဦးထွက်ဖြန့်ချိခဲ့တဲ့ Gran Turismo ဂိမ်းစီးရီးဟာလည်း Sony ရဲ့ရောင်းအားအကောင်းဆုံးဂိမ်းဆောင်ပုဒ်ကို ထိုက်ထိုက်တန်တန်ဆွတ်ခူးနိုင်ခဲ့ပါတယ်။ ခေတ်ရှေ့ပြေးသလို ရှေ့မှီနောက်မှီဂိမ်းဆော့ကစားမှုပုံစံနဲ့ ကားပြိုင်ဂိမ်း Gran Turismo မှာ လက်ရှိ Gran Turismo 6 နောက်ဆုံး edition အထိဆိုရင် ကားပေါင်း ၁၂၂၆ စီးကို အမျိုးအစားစုံလင်ကွဲပြားစွာ ရွေးချယ်နိုင်မှာဖြစ်ပါတယ်။ အဲဒီဥပမာနှစ်ခုလောက်နဲ့တင် Sony Computer Entertainment ဟာ ဘာကြောင့် ဂိမ်းလောကမှာမင်းမူနေတဲ့ဘုရင်ဖြစ်နေတာလည်းဆိုတာကို သိကြလောက်ပြီထင်ပါတယ်။ လက်ရှိမှာတော့ Sony Computer Entertainment ဟာကြွယ်ဝမှု ၁၃.၄ ဘီလီယံနဲ့နံပါတ်တစ်နေရာမှာ မားမားမတ်မတ်ရပ်တည်နေပါတယ်။

10 Richest Gaming Companies
Yan (20.6.2017)
Ref: therichest, trendingtopmost

ရှေးဟောင်းအီဂျစ်ပြည်မှာ ဂန္တဝင်ဆန်ဆန်တွေ့မြင်ရမယ့် Assassin's Creed: Origins

ဟိုတစ်စ ဒီတစ်စနဲ့ ကောလဟာလတွေပေါက်ကြားနေခဲ့တဲ့ နောက်လာမယ့် Assassin's Creed ခွေအသစ်ရဲ့ ပလူပျံနေတဲ့ သတင်းအစအနတွေဟာ အခုအချိန်မှာတော့ အားလုံးအနည်ထိုင်လို့ ပြန်လည်ငြိမ်သက်သွားခဲ့ရပါပြီ။ ဘာဖြစ်လို့လည်းဆိုတော့ မကြာသေးမှီကကျင်းပခဲ့တဲ့ E3 2017 ပွဲမှာ Ubisoft ကနေပြီး Assasin's Creed ဂိမ်းစီးရီးရဲ့နောက်လာမယ့်အခွေသစ်ကို အားလုံးရဲ့ရှေ့မှောက် ထုတ်ဖော်ပြသလိုက်လို့ပါပဲ။ ဂိမ်းလောကထဲကိုတစ်ကြော့ပြန်ခြေစုံပစ်ဝင်လာမယ့် Assassin's Creed စီးရီးရဲ့ဂိမ်းအသစ် Assasin's Creed:Origins ကိုရှေးဟောင်းအီဂျစ်ပြည်မှာ ဇာတ်အိမ်တည်ထားပြီး ဂန္တဝင်ဆန်ဆန်လက်ရာမြောက်စွာဖန်တီးထားတယ်လို့ သိခဲ့ရပါတယ်။ Assasin's Creed:Origins မှာဆန်းသစ်တဲ့ဂိမ်းတွင်းလုပ်ဆောင်ချက်အသစ်တွေအပြင် ပြောင်းလဲမှုအသစ်တချို့ကိုထည့်သွင်းထားတယ်လို့ Xbox One X gameplay ဗီဒီယိုအရသိနိုင်ပါတယ်။ အဲဒီတော့ Assassin's Creed:Origins နဲ့ပတ်သတ်ပြီး သိရှိရသမျှကို အခုဒီမှာဖော်ပြပေးလိုက်ပါတယ်။

ရှေးခေတ်အီဂျစ်ပြည်၊ ဆူဒန်မြို့မြောက်ပိုင်းသားဖြစ်တဲ့ဇာတ်ဆောင် Bayek

ဆူဒန်မြို့မြောက်ပိုင်းသားလည်းတစ်ဖြစ်၊ ရှေးခေတ်အီဂျစ်စစ်တပ်မျိုးနွယ်တစ်ယောက်လည်းဖြစ်တဲ့ Bayek ဟာ သူ့ရဲ့တိုင်းပြည်ကိုကျရောက်လာမယ့် အမျိုးမျိုးသောပြည်တွင်းပြည်ပအန္တရာယ်ရန်စွယ်တွေကို ရဲဝံ့တဲ့စစ်သူရဲကောင်းတစ်ယောက်အနေနဲ့ ခုခံကာကွယ်ရမှာပါ။ အရင်အခွေတွေနဲ့ကွဲပြားခြားနားစွာပဲ Origin ဆိုတဲ့နာမည်အရ ဒီခွေဟာ Assassin Brotherhood ကြီးဘယ်လိုမျိုးပေါ်ပေါက်လာသလဲဆိုတာကို ဟိုးအစကနေ မီးမောင်းထိုးပြတဲ့ဇာတ်ဖြစ်တာမို့လို့ Assassin's Creed ဂိမ်းနောက်ဆက်တွဲခွေဆိုတာထက် ဇာတ်လမ်းတွေအားလုံးရဲ့အစကို အနှစ်ချုပ်ပြီး အက်ရှင်ဆန်တဲ့စွန့်စားခန်းတွေနဲ့ နက်ရှိုင်းကျယ်ပြောလှတဲ့အီဂျစ်ပြည်မှာ active RPG ဂိမ်းအသစ်တစ်ခုအဖြစ် အားလုံးကသစ်လွင်စွာခံစားတွေ့မြင်ကြရမယ့် ပုံပါပဲ။

ခေတ်ပျက်အီဂျစ်ပြည်နဲ့ သမိုင်းကြောင်းအထင်ကရနေရာတွေ

အမှောင်ထုအင်အားစုတွေကြီးစိုးပြီး မင်းမဲ့ဆန်ဆန်ဒုစရိုက်မှုတွေ၊ မသမာမှုတွေ၊ လုယက်တိုက်ခိုက်သတ်ဖြတ်မှုတွေနဲ့လောင်မြိုက်ချစားနေတဲ့ ရှေးဟောင်းခေတ်ပျက်အီဂျစ်ပြည်ကြီးနဲ့ တည်ငြိမ်အေးချမ်းမှုကိုလိုလားတောင့်တတဲ့ Bayek တို့နှစ်ဖက်အကြား ပြင်းထန်ကြမ်းတမ်းလှတဲ့ပဋိပက္ခပေါင်းများစွာကို ဂိမ်မာများကကိုယ်တိုင်ကိုယ်ကျ ရင်ဆိုင်ဖြေရှင်းရမှာပါ။ အဲဒီလိုမျိုးရှုပ်ထွေးလှတဲ့ဇာတ်ထုပ်ကနေတဆင့် Assassin Brotherhood ကြီးကို ဘယ်ကနေဘယ်လိုစလို့ တည်ထောင်ဖြစ်ခဲ့တယ်ဆိုတာကို ဆော့ရင်းဆော့ရင်း ဇာတ်လမ်းရှေ့ဆက်တာနဲ့အမျှ အချိတ်အဆက်မိမိနဲ့ ဂိမ်မာတွေကဖြည်းဖြည်းချင်းနားလည်သဘောပေါက်သွားမယ့် ပုံပါပဲ။ ကမ္ဘာမြေပုံအရဆိုရင် အတ္တလန္တိတ်သမုဒ္ဒရာနဲ့ဆက်နွယ်နေပြီး မြောက်ဘက်မှာ တောင်ပိုင်းဥရောပနယ်၊ အန်နာတိုလီယာပြည်နဲ့ တောင်ဘက်ကနေဆိုရင် မြောက်ပိုင်းအာဖရိကနယ်တို့ ဝန်းရံထားတဲ့ Mediterranean ပင်လယ်ကနေ ဂီဇာနားခိုရာအုတ်ဂူထိတောက်လျှောက် ကျယ်ပြန့်နက်ရှိုင်းစွာကျင်လည်သွားလာနိုင်မှာပဲဖြစ်ပါတယ်။ ဒါ့အပြင် ဂိမ်းအတွက်အခရာကျတဲ့မြို့တွေကတော့ မန်းဖစ်စ်မြို့နဲ့အလက်ဇန်းဒရီးယားမြို့တွေပဲဖြစ်ပါတယ်။

တီထွင်ဆန်းသစ်လိုက်တဲ့ဂိမ်းကစားမှုပုံစံ

Gameplay ဗီဒီယိုမှာတော့ လေး၊ မြား၊ ဓါး၊ ပုဆိန်၊ ဒိုင်းအစရှိတဲ့လက်နက်တွေကို တိုက်ခိုက်မှုပုံစံစုံလင်စွာနဲ့ ဆော့ကစားပြထားတာကို အားလုံးကတွေ့မြင်နိုင်ပါတယ်။ Assassin's Creed ဂိမ်းစီးရီးရဲ့အတိုက်အခိုက်ဂိမ်းပုံစံဟာ အလိုလျောက်အက်ရှင်လှုပ်ရှားမှုကိုအသားပေးတဲ့ ရုပ်ရှင်ဆန်ဆန်တိုက်ခိုက်မှုပုံစံမျိုးပါ။ ဒါပေမယ့်အခုဒီအခွေမှာ တိုက်ခိုက်မှုစနစ်ကိုထီထွင်ဆန်းသစ်လိုက်တဲ့အနေနဲ့ အခရာကျတဲ့လုပ်ဆောင်ချက်တွေ အားလုံးကိုရောပြွန်းလိုက်ပါတယ်။ အဲဒါတွေကတော့ လက်နက်တွေကို ကိုယ့်ဘာသာကိုယ်ပြုလုပ်နိုင်သွားတယ်။ တိုက်ပွဲမှာဒိုင်းကိုအသုံးပြုလို့ရသွားတယ်။ လေထဲမှာမြားအသုံးပြုနိုင်သွားပြီး မြင်းစီးနေတဲ့အချိန်တွေမှာလည်း ဓား ဒါမှမဟုတ် မြားနဲ့ရန်သူတွေကို တိုက်ခိုက်နိုင်တာတွေအပြင် ကိုင်တွယ်အသုံးပြုနိုင်မယ့်လက်နက်ရှစ်မျိုးနဲ့ မြားလေးမျိုးပေးထားပါတယ်။ ဒါ့အပြင် ရန်သူတွေကိုမီးမြားနဲ့လောင်မြိုက်တိုက်ခိုက်နိုင်မယ့် တိုက်ခိုက်မှုပုံစံမျိုးကိုလည်း ထည့်သွင်းထားပါသေးတယ်။

ကင်းထောက်စွန်ရဲနဲ့ကောင်းကင်မြင်ကွင်းကျယ်

ဒါတွေတင်မကသေးပါဘူး၊ အရင်ခွေတွေလို ရန်သူ့မျှော်စင်တပ်စခန်းတွေကို လိုက်သိမ်းရတဲ့ဂိမ်းစနစ်ကို ထည့်မသွင်းထားဘဲ စွန်ရဲတစ်ကောင်အနေနဲ့ကောင်းကင်မှာပျံဝဲပြီး ကိုယ်သွားရမယ့်နယ်မြေတွေကို အပေါ်စီးကနေကျယ်ပြန့်တဲ့အမြင်နဲ့ အရင်ထောက်လှမ်းကြည့်ရှုနိုင်မယ့် ကင်းထောက်စွန်ရဲ (Overhead Hawk) လို့အမည်ရတဲ့ လုပ်ဆောင်ချက်အသစ်ကို ထည့်သွင်းမိတ်ဆက်ထားပါတယ်။ အဲဒီကင်းထောက်စွန်ရဲလုပ်ဆောင်ချက်အသစ်ဟာ Assasin's Creed: Origins အတွက်အရေးပါပြီးအချက်အချာကျတဲ့ဂိမ်းတွင်းလုပ်ဆောင်ချက်တစ်ခုဖြစ်လာမှာပါ။ ဒီတစ်ခွေမှာတော့ တိုက်ခိုက်မှုပုံစံအဆန်းအပြားတွေနဲ့ လုပ်ဆောင်ချက်အသစ်တွေကိုပေါင်းစည်းပြီး အတွေ့အကြုံအသစ်တွေကို ပေးစွမ်းသွားမယ်လို့ မျှော်လင့်ရပါတယ်။

နက်ရှိုင်းကျယ်ပြန့်လှတဲ့အီဂျစ်ပြည်ကြီးနဲ့သဘာဝပတ်ဝန်းကျင်

ဂိမ်းတောက်လျှောက် ကိုယ်ကျင်လည်သွားလာရမယ့်ပတ်ဝန်းကျင်နဲ့နယ်မြေတွေကို နက်ရှိုင်းကျယ်ပြောစွာနဲ့ အသက်ဝင်နေအောင်ဖန်တီးပေးထားပါတယ်။ ဇာတ်ကောင်တွေရဲ့တုံ့ပြန်မှုတွေ၊ သွားလာလှုပ်ရှားမှုပုံစံ၊ လူတွေရဲ့ဆက်ဆံမှု အစရှိတာတွေကို တကယ့်သက်ရှိပြင်ပအငွေ့အသက်တွေရအောင်လို့ သဘာဝကျကျတည်ဆောက်ဖန်တီးပေးထားပါတယ်။ Assasin's Creed ရဲ့ရှိရင်းစွဲမူကို ဆက်လက်ထိန်းသိမ်းထားတဲ့အနေနဲ့ သားရဲတိရစ္ဆာန်တွေနဲ့ဆက်စပ်လုပ်ဆောင်ချက်တွေကတော့ ပြန်လည်ပါဝင်သွားမှာပါ။ အီဂျစ်ပြည်ရဲ့နိုင်းမြစ်ဟာ ကမ္ဘာပေါ်မှာထင်ရှားလှတဲ့အတွက် ရေကြောင်းအရလည်း မြစ်အသီးသီးမှာ လှေစီးနင်းသွားလာနိုင်တဲ့ ဂိမ်းတွင်းလုပ်ဆောင်ချက်ကို မပျက်မကွက်ထည့်သွင်းထားတာတွေ့မြင်ရမှာပါ။ ကမ္ဘာ့အထင်ကရတိုင်းပြည်တစ်ပြည်ဖြစ်တဲ့ အီဂျစ်ပြည်မှာ ဘယ်လိုမျိုးစိတ်ဝင်စားစရာဇာတ်ကြောင်းတွေနဲ့ ဂိမ်းတစ်ခုလုံးကိုအချိတ်အဆက်မိမိ ရေးဆွဲတည်ဆောက်ထားတယ်ဆိုတာကတော့ ကျွန်တော်တို့အားလုံးစောင့်ကြည့်ရဦးမှာပါ။

အနှစ်ချုပ်

စတုတ္တမြောက်ခွေဖြစ်တဲ့ Black Flag ထွက်ရှိပြီးကတည်း Ubisoft Montreal ဟာ ဒီခွေအပေါ်မှာအာရုံအပြည့်အဝစိုက်ပြီး အားသွန်ခွန်စိုက်နဲ့ စတင်လုပ်ဆောင်နေခဲ့တာလေးနှစ်နီးပါးရှိခဲ့ပါပြီ။ အဲဒီလေးနှစ်တာပရောဂျက်ကြီးကို အခုအချိန်မှတော့ Assasin's Creed:Origins အဖြစ်နဲ့အားလုံးပါးစပ်အဟောင်းသားဖြစ်သွားအောင်လို့ မျက်ဝါးထင်ထင်ချပြခဲ့ပါပြီ။ Assassin Brotherhood ကြီးဘယ်လိုပေါ်ပေါက်လာတာလဲ။ ဘယ်လိုရည်ရွယ်ချက်တွေနဲ့တည်ဆောက်ခဲ့တာလဲ။ စတင်ဖွဲ့စည်းခဲ့တုန်းကအဖွဲ့ဝင်တွေက ဘယ်သူတွေလဲ။ အစရှိတာတွေကို လောလောဆယ်မှာ ကိုယ့်ဘာသာကိုယ်မေးခွန်းထုတ်ပြီးအဖြေရှာနေရုံကလွဲပြီး ဘာမှမတတ်နိုင်သေးပါဘူး။ ကဲ ဒီတော့ ဒီနှစ်ကုန်ပိုင်းမှာ ထွက်ရှိလာမယ့် Assasin's Creed:Origins အခွေကို ကိုယ့်လက်ထဲဆိုက်ဆိုက်မြိုက်မြိုက်ရောက်တော့မှ အားပါးတရဆော့ပြီး အဖြေရှာကြပါလို့ ဒီကနေနှိုးဆော်ပေးလိုက်ချင်ပါတယ် ဂိမ်မာများ။

Yan
Ref: Gamespot, Kotaku, Segmentnext