ဇာတ်ကောင်စရိုက်ကိုထိမိစွာဖော်ကျူးထားတဲ့ နာမည်ကျော်အစွမ်းထက်ဂိမ်းဇာတ်ကောင်ခြောက်ယောက်

ကွဲပြားသွားတဲ့ဂိမ်းအမျိုးစားတွေအလိုက် ဂိမ်မာတွေရွေးချယ်ဆော့ကစားတဲ့ဂိမ်းဟာလည်း ကွာခြားသွားပါတယ်။ တချို့က တိုက်ပွဲတွေထဲမှာပြေးလွှားပစ်ခတ်နေရတာကိုကြိုက်သလို တချို့ကလည်း စစ်မြေပြင်ထဲမှာ ဓါးနဲ့ဒိုင်းကိုကိုင်ဆွဲပြီး ရှေးခေတ်စစ်သူရဲကောင်းတွေလို တိုက်ပွဲကိုကိုယ်တိုင်ကိုယ်ကျ ဝင်ဆင်နွှဲချင်ကြတာပါ။ ဂိမ်မာတစ်ယောက်ဟာ ဂိမ်းတစ်ခုကို အကြောင်းအမျိုးမျိုးကြောင့် နှစ်ခြိုက်သဘောတွေ့သွားနိုင်ပါတယ်။ ဂိမ်းရဲ့ဇာတ်ကြောင်းဇာတ်အိမ်၊ ဂိမ်းကစားပုံစံ၊ ဖန်တီးထားတဲ့ဂိမ်းလောက ဒါမှမဟုတ် ဂိမ်းထဲမှာပါတဲ့ဇာတ်ကောင်တွေကြောင့် အစရှိသဖြင့်ပါ။ ဂိမ်မာတွေဟာ ဂိမ်းဇာတ်ကောင်တွေကို သူတို့ရဲ့ပုံပန်းသွင်ပြင်၊ နောက်ခံဇာတ်ကြောင်းနဲ့ စွမ်းအင်ခွန်အားအရည်အသွေးတွေကိုကြည့်ပြီး ကြိုက်နှစ်သက်ကြပါတယ်။ ဂိမ်းဖန်တီးသူတွေကလည်း အမိုက်စားဂိမ်းဇာတ်ကောင်တွေကို အစွမ်းကုန်ဖန်တီးကြသလို တချို့ကကြမ်းပေ့၊ တမ်းပေ့ဆိုတဲ့ဇာတ်ကောင်မျိုးကိုမှ ကြိုက်ကြပြီး တချို့ကလည်း နူးညံ့သိမ်မွေ့ပြီးလှပကျော့ရှင်းတဲ့ဇာတ်ကောင်မျိုးကိုမှ ကြိုက်ကြပါတယ်။ အမျိုးအစားကွဲပြားသွားတဲ့ဂိမ်းတွေအလိုက် ဂိမ်မာတွေနှစ်ခြိုက်သဘောကျတဲ့ဂိမ်းဇာတ်ကောင်တွေဟာ ကွဲပြားနေဦးမှာပါပဲ။ ဒီတော့ ဒီမှာဇာတ်ကောင်စရိုက်ကိုထိမိစွာဖော်ကျူးထားတဲ့ နာမည်ကျော်ဂိမ်းဇာတ်ကောင်ခြောက်ဦးကို သူတို့ရဲ့ထူးခြားပြောက်မြောက်လှတဲ့အစွမ်းသတ္တိတွေနဲ့တကွ စာရင်းပြုစုပြီးဖော်ပြပေးလိုက်ပါတယ်။ အကြိုက်တူနေတဲ့သူတွေလည်း ပါကောင်းပါပါလိမ့်မယ်။

Kratos (God Of War)

Kratos ဟာဒီစာရင်းထဲမှာပါလာလိမ့်မယ်လို့ အားလုံးကကြိုတွက်ပြီးသားဖြစ်ရင်ဖြစ်မှာပါ။ ဟုတ်ပါတယ်၊ စပါတန်စစ်သူကြီးဟောင်းတစ်ယောက်လည်းဖြစ်တဲ့ Kratos ဟာ အိုလံပီယာနတ်ဘုရားများရဲ့ ဘုရင်ဖြစ်သူ ဇူးစ်ရဲ့သွေးပါတဲ့ နတ်လူတစ်ယောက်လည်းဖြစ်ပါတယ်။ Kratos ကို ၂၁ ရာစုရဲ့အစွမ်းအထက်ဆုံးဂိမ်းဇာတ်ကောင်တစ်ကောင်လို့တောင် တင်စားနိုင်ပါတယ်။ ဘယ် God Of War ဂိမ်းကို ကစားခဲ့ဖူးသူတွေမဆို Kratos ရဲ့ နတ်ဘုရားဆန်တဲ့ခွန်အားနဲ့ ထက်မြက်တဲ့ရဲစွမ်းသတ္တိတွေကို တွေ့မြင်ရမှာပါပဲ။ သမိုင်းတစ်လျှောက်မှာ Kratos ဟာ များပြားလှတဲ့ရန်သူ့စစ်တပ်တွေ၊ လူရိုင်းတွေ၊ နတ်ဆိုးမကောင်းဆိုးရွားတွေ၊ ဒဏ္ဍာရီမှော်ဝင်သတ္တဝါတွေ၊ နတ်ဘီလူးတွေနဲ့ အိုလံပီယာနတ်ဘုရားတွေအားလုံးနဲ့ ချွပ်ချွပ်ခြုံခြုံတိုက်ခိုက်ခဲ့ပြီး မျက်တောင်တစ်ချက်မခတ်ပဲ သူတို့ရဲ့ ဇီဝိန်ကိုချွေခဲ့တာပါ။ စစ်သမိုင်းတစ်လျှောက်မှာ သူသတ်ခဲ့တဲ့လူတွေရဲ့သွေးတွေဟာ သူ့ရဲ့ခန္ဓာကိုယ်မှာ သွေးစီးကြောင်းကြီးသဖွယ် ထင်ရှားစွာရစ်ပတ်နေပြီး နတ်မီးလျှံတွေတောက်ပနေတဲ့ Blades Of Anthena ဓားနှစ်လက်ကို မြဲမြံစွာဆုပ်ကိုင်ထားတာဟာ Kratos ရဲ့ပြယုဂ်ပုံစံပါပဲ။ Kratos ဟာဘာဖြစ်လို့ အစွမ်းအထက်ဆုံးဇာတ်ကောင်ဖြစ်နေရသလဲဆိုတော့ သူရင်ဆိုင်ရသမျှရန်သူတွေဟာ နတ်ဘုရားတွေကြီးဖြစ်တဲ့အပြင် ငရဲပြည်၊ နတ်ဆိုးတိုင်းပြည်နဲ့ အိုလီပီယာနတ်ပြည်ကိုအုပ်စိုးတဲ့ အစွမ်းထက်သူတွေအားလုံးကို နှိမ်နင်းခဲ့လို့ပါ။ Kratos ရဲ့အစွမ်းခွန်အားကြီးမားမှုတွေ ပြောရင်တော့ကုန်နိုင်မှာမဟုတ်တဲ့အတွက် အစွမ်းထက်ဆုံးဇာတ်ကောင်ဂိမ်းဇာတ်ကောင်တစ်ကောင်အဖြစ် ဒီစာရင်းထဲမှာထည့်သွင်းလိုက်ရပါတယ်။

Vergil (Devil May Cry Series)

Devil May Cry ဂိမ်းဟာ လူသားမျိုးနွယ်ကို နတ်ဆိုးတွေသိမ်းယူကျွန်ပြုခြင်းကနေပြီး ကယ်တင်ခဲ့တဲ့နတ်ဆိုးဘုရင် Sparda နဲ့ သူ့ရဲ့မျိုးဆက်ဖြစ်တဲ့ နတ်ဆိုးတစ်ပိုင်း၊ လူတစ်ပိုင်းအမြွာညီအစ်ကိုနှစ်ယောက်ရဲ့ဇာတ်ကြောင်းကို မီးမောင်းထိုးထားတဲ့ဂိမ်းဖြစ်ပါတယ်။ နတ်ဆိုးဘုရင် Sparda ဟာလူသားဖြစ်သူ Eve နဲ့ချစ်ကျွမ်းဝင်ရာကတဆင့် Dante နဲ့ Vergil ဆိုတဲ့ လူသားအမြွာညီအစ်ကိုနှစ်ဦးကို ကမ္ဘာမြေပေါ်မှာဖွားမြင်ခဲ့ပါတယ်။ အဲဒီထဲမှာမှ Vergil ဟာ Dante ရဲ့အစ်ကိုဖြစ်ပြီး ညီဖြစ်သူ Dante နဲ့ငယ်စဉ်ကတည်းက ဝေးကွာသွားခဲ့ကြတာပါ။ ငယ်စဉ်အရွယ်မှာအမြွာညီအစ်ကိုဖြစ်ပေမယ့်လည်း ကြီးပြင်းလာတဲ့အချိန်မှာတော့ စိတ်နေစိတ်ထားဗီဇတွေက လုံးဝကွဲပြားသွားပါတယ်။ Dante ဟာငယ်ရွယ်ပြီးဟော့ဟော့ရမ်းရမ်းနိုင်သလောက် Vergil ဟာတည်ငြိမ်တယ်၊ သွေးအေးတယ်၊ ဗဟုသုတကိုဆည်းပူးတယ်၊ သူ့ရဲ့ခန္ဓာကိုယ်ထဲမှာစီးဆင်းနေတဲ့နတ်ဆိုးဗီဇကို လူသားဗီဇထက်ရှေ့တန်းတင်တဲ့ ရက်စက်တဲ့ဇာတ်ကောင်တစ်ယောက်လည်းဖြစ်ပါတယ်။ ဂိမ်းစီးရီးတစ်လျှောက်မှာ Vergil ဟာလူသားတွေဘက်ကရပ်တည်တဲ့ Dante နဲ့အကြိမ်ပေါင်းများစွာ တိုက်ခိုက်ခဲ့ကြပေမယ့် ညီဖြစ်သူ Dante အပေါ်မှာ နက်ရှိုင်းတဲ့အစ်ကိုတစ်ယောက်ရဲ့ အချစ်ရှိနေပါတယ်။ Vergil ဟာဂျပန်ဆာမူရိုင်းဓါးအသွင်ရှိတဲ့ Yamato ဓါးကို လက်နက်အဖြစ်ကိုင်ဆောင်ပြီး ညီအစ်ကိုနှစ်ယောက်လုံးဟာ နတ်ဆိုးအသွင်ကို ပြောင်းလဲသွားလို့ရပါတယ်။ ဒါတင်မကသေးဘဲ Vergil ဟာဖခင်ဖြစ်သူ Sparda ကိုင်ဆောင်တဲ့ Demon Edge ဓါးနဲ့ Beowulf လက်အိတ်ကိုလည်းလက်နက်အဖြစ် အသုံးချပြီးတိုက်ခိုက်ပါတယ်။ ဂိမ်းစီးရီးတစ်လျှောက်မှာ Vergil ဟာ Dante ကိုအကြိမ်ပေါင်းများစွာအနိုင်ယူခဲ့ပြီး Dante နဲ့အတူတူခွန်အားကြီးမားတဲ့ Mundus လိုရန်သူတော်ကြီးကိုလည်း နှိမ်နင်းခဲ့ပါတယ်။ Vergil ဟာ နတ်ဆိုးဗီဇကိုရှေ့တန်းတင်တဲ့စိတ်နဲ့ ညီဖြစ်သူ Dante အပေါ်မှာရှိတဲ့အချစ်တို့ လွန်ဆွဲနေတဲ့ နတ်ဆိုးတစ်ပိုင်းလူတစ်ပိုင်းဇာတ်ရုပ်ကို ပြောင်မြောက်စွာသရုပ်ဖော်ထားတဲ့ ဇာတ်ကောင်ဖြစ်ပါတယ်။

 Sephiroth (Final Fantasy Vll)

လူအရပ်နှစ်ပြန်စာရှိတဲ့ဓါးရှည်ကိုကိုင်ဆောင်ထားပြီး ရှည်လျားလှတဲ့ငွေရောင်ဆံပင်ရှည်နဲ့ Sephiroth ဟာ ၁၉၉၆ ခုနှစ်မှာထွက်ရှိခဲ့တဲ့ Final Fantasy Vll ဂိမ်းရဲ့ အဓိကဗီလိန်ဇာတ်ကောင်ဖြစ်ပါတယ်။ Sephiroth ဟာဂိမ်းစီးရီးတစ်လုံးရဲ့ အစွမ်းထက်မြက်ဗီလိန်တစ်ယောက်ဖြစ်ပြီး ၂၀၀၅ ခုနှစ်မှာထွက်ရှိခဲ့တဲ့ Final Fantasy Vll Advert Children CGI ကာတွန်းဇာတ်ကားကနေတဆင့် ပရိသတ်တွေကြားထဲမှာ လူသိများရေပန်းစားလာခဲ့တဲ့ဇာတ်ကောင်ဖြစ်ပါတယ်။ Final Fantasy Vll ရဲ့အဓိကဇာတ်ကောင်ဖြစ်သူ Cloud Strife ထက်တောင် တိုက်ရည်ခိုက်ရည်သာလွန်နေတဲ့ Sephiroth ဟာ SOLIDER အဖွဲ့ရဲ့စွမ်းအားအကြီးဆုံးအဖွဲ့ဝင်လည်းဖြစ်သလို ဆပေါင်းများစွာသာလွန်တဲ့ခွန်အားတွေ၊ လျင်မြန်တဲ့တုံ့ပြန်နိုင်စွမ်း၊ တိကျထက်မြက်တဲ့ဓါးခုတ်ချက်တွေကြောင့် Final Fantasy စီးရီးဇာတ်ကောင်တွေထဲမှာ ပြောစမှတ်ပြုလောက်တဲ့ဇာတ်ကောင်လည်းဖြစ်ပါတယ်။ Final Fantasy Vll Crisis Core မှာ Genesis နဲ့ Angeal တို့နှစ်ယောက်ပေါင်းပြီး Sephiroth ကိုတိုက်တာတောင် အသာစီးမရဘဲအလူးအလဲခုခံနေရတာ တွေ့မြင်နိုင်ပါတယ်။ ဒါတွေတင်မကဘဲ Jenovah နဲ့ထိတွေ့ပေါင်းစည်းပြီးနောက်မှာ မှော်အစွမ်းတွေကို ကိုယ့်စိတ်တိုင်းကျထုတ်သုံးနိုင်သွားတဲ့အပြင် Jenovo ရဲ့ဆဲလ်တွေကိုလည်း လိုရာအသုံးပြုနိုင်သွားတဲ့ Sephiroth ဟာ ပရိသတ်ပေါင်းမြောက်မြားစွာရဲ့ အသည်းစွဲအစွမ်းထက်ဂိမ်းဇာတ်ကောင်တစ်ကောင်ဖြစ်နေပါတယ်။

Lu Bu (Dynasty Warriors)

Lu Bu ဆိုတာနဲ့ ချပ်ဝတ်တန်ဆာအပြည့်ဝတ်ထားတဲ့မြင်းနီကြီးကို တစ်ဟုန်ထိုးစီးပြီး လူ့တစ်ရပ်စာလှံပုဆိန်ရှည်ကြီးကိုင်ထားတဲ့ စစ်သူရဲကောင်းကြီးကိုပြေးမြင်ကြမှာပဲ။ ကျွန်တော်တို့ငယ်ငယ်က Dynasty Warrior စစ်ပွဲတွေမှာ Lu Bu ကိုတွေ့တာနဲ့ အရင်ရှောင်ပြေးကြပါတယ်၊ ပြီးမှ ဘယ်လိုရင်ဆိုင်ရမလဲဆိုတဲ့နည်းလမ်းကိုစဉ်းစားပြီး တိုက်စစ်သေချာဆင်ရတာပါ။ ဟုတ်ပါတယ်၊ Dynasty Warrior ဂိမ်းစီးရီးရဲ့ပြယုဂ်ဖြစ်တဲ့ Lu Bu ဟာ Dong Zhou ရဲ့လက်အောက်မှာစစ်မှုထမ်းခဲ့ပြီး ဘယ်သူရဲကောင်းနဲ့မဆို ပုခုံးချင်းယှဉ်တိုက်ခိုက်နိုင်တဲ့ ဟန်မျိုးဆက် စစ်သူကြီးတစ်ယောက်လည်းဖြစ်ပါတယ်။ Red Hare လို့အမည်ရတဲ့စီးတော်မြင်းနဲ့ ဦးခေါင်းထက်မှာ ရှည်လျားတဲ့တောင်မွှေးနှစ်ချောင်းကို ဝဲနေအောင်ချထားတာ Lu Bu ရဲ့ပုံစံဖြစ်ပြီး Lu Bu ဟာစစ်တပ်တစ်တပ်လုံးနဲ့ တစ်ယောက်ယှဉ်တိုက်နိုင်သလို တိုက်ရည်ခိုက်ရည်အစွမ်းကလည်း သမိုင်းတွင်လောက်အောင်အံ့မခန်းပါပဲ။ ကိုယ်ဟာဘယ်လိုဇာတ်ကောင်ကိုကိုင်ထားပါစေ၊ Dynasty Warrior ဂိမ်းတိုင်းမှာ Lu Bu ပေါ်လာတိုင်း အရင်ဆုံးတော့ ခြေသုတ်တင်ရှောင်ပြေးကြရတာကြီးပါပဲ။ Lu Bu ဟာခံနိုင်ရည်စွမ်းအဆမတန်မြင့်တယ်၊ တိုက်ခိုက်တဲ့လှံချက်အကွာအဝေးကကျယ်ပြန့်ပြီး အလဲဖြိုဖို့အတော်ခက်ပါတယ်။ Lu Bu ဟာသူ့ရဲ့ခွန်အားနဲ့ရဲစွမ်းသတ္တိကို အားလုံးကိုသက်သေပြချင်တဲ့စစ်သူကြီးတစ်ယောက်ဖြစ်ပြီး သူမတူနဲ့အရည်အသွေးတွေကြောင့် ဂိမ်းလောကမှာပါမက တရုတ်နိုင်ငံဟန်မျိုးဆက် စစ်သမိုင်းကြောင်းမှာပါ ထင်ရှားခဲ့တဲ့စစ်သူရဲကောင်းတစ်ဦးဖြစ်ပါတယ်။

Albert Wesker (Resident Evil)

Resident Evil ဂိမ်းစီးရီးတစ်ခုလုံးမှာ အရာအားလုံးကိုအမွှေနှောက်ခဲ့ဆုံးလူဆိုးကို ပြပါဆိုရင် Albert Wesker ကိုပြရမှာပါပဲ။ Resident Evil ဂိမ်းမှာ အမျိုးအစားကွဲပြားတဲ့ဗီလိန်ဇာတ်ကောင်တွေ အမျိုးမျိုးရှိပေမယ့် Albert Wesker ကတော့ အားလုံးထဲမှာထိပ်တန်းဗီလိန်ဇာတ်ကောင်ကြီးပါပဲ။ Wesker ဟာကိုယ်ခံပညာရပ်ကို တစ်ဖက်ကမ်းခပ်ကျွမ်းကျင်တဲ့အပြင် ခန္ဓာကိုယ်တွင်းမှာ ထူးကဲတဲ့သွေးအမျိုးအစားတစ်ခုစီးဆင်းနေတဲ့ အစွမ်းထက်ဗီလိန်တစ်ယောက်ဖြစ်ပါတယ်။ Prototype ဗိုင်းရပ်စ်တွေကို ခန္ဓာကိုယ်ထဲထိုးသွင်းထားတဲ့အတွက် Wesker ဟာ လူသားတစ်ယောက်ထက် ဆပေါင်းများစွာသာလွန်တဲ့စွမ်းရည်တွေရှိပြီး ကျည်ဆန်တွေကိုရှောင်နိုင်လောက်တဲ့အမြန်နှုန်းကို ပိုင်ဆိုင်ထားပါတယ်၊ ဒါတွေတင်မက ခန္ဓာကိုယ်မှာထိခိုက်ဒဏ်ရာတစ်ခုခုရသွားရင် ပြန်ပြီးကုစားနိုင်တဲ့နှုန်းကလည်း မြင့်မားပါတယ်။ BSAA လက်ရွေးစင်အေးဂျင့်တွေဖြစ်တဲ့ Chris Redfield နဲ့ Jill Valentine တို့နှစ်ယောက်နဲ့ထိပ်တိုက်တွေ့ပြီး နှစ်ယောက်လုံးကို အလဲတိုက်နိုင်ခဲ့တဲ့အပြင် ယာဉ်ပျံကြီးပေါ်မှာ Chris နဲ့ Sheva တို့နှစ်ယောက်နဲ့ တစ်ကျော့ပြန်တွေ့တုန်းကလည်း ပြောစရာတစ်ကွက်မရှိအောင် တိုက်ခိုက်မှုကိုအေးဆေးကိုင်တွယ်ခဲ့တာ အားလုံးကမြင်ရမှာပါ။

Alex Mercer (Prototype)

Prototype ပထမဦးဆုံးအခွေမှာကတည်းက Alex Mercer ရဲ့ရက်စက်ကြမ်းကြုတ်မှုနဲ့ အသွင်ပြောင်းသွားတဲ့စွမ်းရည်တွေကို မှတ်မိကြမှာပါ။ ဒါပေမယ့် Prototype ပထမအခွေထက် ဒုတိယအခွေမှာ Alex Mercer ဟာပိုပြီးရင့်ကျက်သွားသလို သူ့ရဲ့အစွမ်းသတ္တိတွေကလည်းပိုမိုကြီးထွားနေပါပြီ။ Blacklight ဗိုင်းရပ်စ်ရဲ့ဝါးမြိုခြင်းကိုခံခဲ့ရတဲ့ သိပ္ပံပညာရှင် Alex Mercer ဟာ သူ့ရဲ့ထူးခြားတဲ့အသွင်ပြောင်းမှုတွေ၊ လွန်ကဲတဲ့စွမ်းအားမြင့်လှုပ်ရှားမှုတွေနဲ့ အမျိုးမျိုးအသွင်ပြောင်းနိုင်တဲ့ပုံစံတွေကြောင့် ဂိမ်းလောကထဲမှာအများနဲ့မတူ ကွဲထွက်နေတဲ့ဇာတ်ကောင်တစ်ကောင်ဖြစ်ပါတယ်။ အဲဒီလိုမျိုးသူမတူကြမ်းကြုတ်တဲ့ခွန်အားတွေအပြင် ထက်မြက်တဲ့ပညာရှင်ဗဟုသုတကလည်းရှိနေတဲ့အတွက် အန္တရာယ်များတဲ့ဂိမ်းဇာတ်ကောင်လို့လည်းပြောရင် မမှားပါဘူး။ စစ်သားတွေ၊ ကူးစက်ခံထားရတဲ့သတ္တဝါကောင်တွေ၊ လေယာဉ်ပျံတွေတင့်ကားတွေ အစရှိတာတွေနဲ့ ရင်ဆိုင်ရတဲ့အချိန်မှာ အချိန်အနေနဲ့အချိန်ခါအလိုက် တိုက်ပွဲမှာအသာစီးရအောင် အနေအထားကိုပြောင်းလဲနိုင်စွမ်းရှိတဲ့ စွမ်းရည်ကလည်းရှိနေတဲ့အတွက် ပြောစရာမလိုအောင်အစွမ်းထက်မြက်တဲ့ ဂိမ်းဇာတ်ကောင်တစ်ယောက်ဖြစ်တယ်ဆိုတာ မငြင်းနိုင်ပါဘူး။

Yan
Ref: thegamer, wikia, fandom

ခြောက်ခြားဖို့အကောင်းဆုံး Survival Horror အတွေ့အကြုံတွေကိုပေးစွမ်းသွားမယ့် Visage

၂၀၁၄ ခုနှစ်တုန်းကထွက်ရှိခဲ့တဲ့ Silent Hills ဂိမ်းရဲ့ playable teaser ကို အားလုံးမှတ်မိကြမယ်လို့ထင်ပါတယ်။ သစ်လွင်ဆန်းပြားပြီး သူမတူတဲ့ survival horror ဂိမ်းအတွေ့အကြုံတွေကို ပေးစွမ်းခဲ့လို့ ဂိမ်မာအားလုံးမျှော်လင့်ချက်ကြီးစွာနဲ့ စောင့်ဆိုင်းခဲ့ရတဲ့ဂိမ်းတစ်ခုဖြစ်ပါတယ်။ အိမ်ကြီးထဲက ထူးဆန်းတဲ့အဖြစ်အပျက်တွေ၊ ခြောက်ခြားဖွယ်အတိရှိတဲ့ပတ်ဝန်းကျင်နဲ့ မသတီစရာကောင်းတဲ့မြင်ကွင်းတွေကို ထပ်ဆင့်ထပ်ဆင့်ပြန်လည်တွေ့မြင်ရတဲ့ပုံစံကြောင့် မိနစ်အနည်းငယ်သာဆော့ရပေမယ့် ဂိမ်မာတွေလုံးဝအကြိုက်တွေ့ခဲ့ပါတယ်။ ကံမကောင်းစွာနဲ့ အကြောင်းအမျိုးမျိုးကြောင့် ဂိမ်းကိုဖျက်သိမ်းလိုက်ပေမယ့် ဆန်းပြားတဲ့ survival horror ဂိမ်းအသစ်ကိုတောင့်တနေကြတဲ့ ဂိမ်မာတွေရဲ့မျှော်လင့်ချက်တွေကတော့ မပျောက်ဆုံးသွားပါဘူး။ အဲဒီမျှော်လင့်ချက်တောင့်တချက်တွေကို ဖြည့်စွက်လိုက်တဲ့အနေနဲ့ အခုဒီမှာ Visage ဆိုတဲ့ survival horror ဂိမ်းတစ်ခုလာပါပြီ။ ၂၀၁၇ ဇန်နဝါရီလကထည်းက ထွေလာနဲ့တကွ gameplay ဗီဒီယိုထွက်ရှိတဲ့ Visage ဂိမ်းဟာ SadSquare ဂိမ်းဖန်တီးသူများအဖွဲ့က လွတ်လပ်စွာဖန်တီးထားပြီး Unreal အင်ဂျင်ကိုအသုံးပြုထားတဲ့ ဂိမ်းတစ်ခုဖြစ်ပါတယ်။ Silent Hills ဂိမ်းရဲ့နေရာမှာဖြည့်စွက်အစားထိုးသွားမယ့် Visage ဂိမ်းက ဒါဆိုဘယ်လိုမျိုးလဲ? သိသင့်သိထိုက်တဲ့အချက်တွေကို ဒီမှာတစ်ချက်ကြည့်လိုက်ရအောင်။

လျှို့ဝှက်တဲ့အတိတ်သမိုင်းကြောင်း၊ ဖြစ်ရပ်ဆိုးတွေနဲ့အိမ်ကြီး

ဂိမ်းကို ၁၉၈၀ တဝိုက်က လူသူကင်းမဲ့တဲ့မြို့တစ်မြိုမှာရှိတဲ့အိမ်ကြီးတစ်လုံးထဲမှာ ဇာတ်အိမ်တည်ထားပါတယ်။ အဲဒီလူသူမရောက်အပျောက်နည်းလှတဲ့ ၁၉၈၀ ခုနှစ်ဝန်းကျင်ကအိမ်ကြီးထဲမှာ မိသားစုပေါင်း၊ လူပေါင်းများစွာ နေထိုင်ခဲ့ဖူးကြပါတယ်။ ဒါပေမယ့် ရာစုနှစ်အဆက်ဆက် နေထိုင်ခဲ့သူတို့တွေအားလုံးဟာ သွေးပျက်စရာဖြစ်ရပ်ဆိုးတွေနဲ့ ကြုံတွေ့ခဲ့ရပြီး အသက်ဝိညာဉ်ပေါင်းများစွာဆုံးရှုံးခဲ့ကြလို့ ကြိမ်စာသင့်အိမ်ကြီးတစ်လုံးဖြစ်ခဲ့တာပါ။ ဘယ်လိုအကြောင်းကြောင်းကြောင့် အဲဒီလိုခြောက်ခြားစရာအဖြစ်ဆိုးတွေ ဆက်တိုက်ဖြစ်ပေါ်နေလည်းဆိုတာ မသိရပေမယ့် လျှို့ဝှက်နက်နဲလှတဲ့အတိတ်သမိုင်းကြောင်းတွေက ကိန်းအောင်းတည်ရှိနေပါတယ်။ ဂိမ်းရဲ့ဇာတ်လမ်းက အဲဒီအိမ်ကြီးရဲ့လျှို့ဝှက်တဲ့ကြောက်မက်ဖွယ်အမှန်တရားကို တဖြည်းဖြည်းတစ်ဆင့်ချင်းရှာဖွေဖော်ထုတ်ရမယ့် အနေအထားမှာရှိနေပါတယ်။

အိမ်ကြီးထဲမှာကိန်းအောင်းနေကြတဲ့ မြောက်မြားစွာသောဝိညာဉ်တွေ

ရာစုနှစ်အဆက်ဆက်လူ့အသက်တွေဆုံးရှုံးခဲ့တဲ့အတွက် သေဆုံးသွားခဲ့ကြတဲ့လူတွေရဲ့ဝိညာဉ်တွေဟာ အဲဒီအိမ်ကြီးထဲမှာ အကြောင်းအမျိုးမျိုးသောအဖြစ်အပျက်ဆိုးတွေနဲ့အတူ တည်ရှိနေပါတယ်။ နာရီလေးတစ်လုံး၊ ထိုင်ခုံလေးတစ်ခုံ၊ ဘောပင်လေးတစ်ချောင်းကနေတဆင့် ဆက်ဆက်စူးစမ်းလေ့လာရင်းနဲ့ သူတို့ကြုံတွေ့ခဲ့ရတဲ့ဖြစ်ရပ်တွေကို ဂိမ်ာမတွေက မျက်ဝါးထင်ထင်တွေ့မြင်ကြရမှာပါ။ ဒါပေမယ့်အဲလိုဇာတ်လမ်းတွေနဲ့ မကြုံရခင် နာကျည်းချက်အပြည့်နဲ့ဝိညာဉ်တွေက ဇာတ်လမ်းတစ်လျှောက် ကိုယ့်ကိုဘယ်လိုမျိုးခြောက်လှန့်သွားမလဲဆိုတာကတော့ ဂိမ်မာများကိုယ်တိုင်ပဲ တွေ့မြင်ခံစားရမှာပါ။

Silent Hills (PT) နဲ့အသွင်တူတဲ့ ဂိမ်းကစားပုံစံ

 အရာအားလုံးကိုစူးစမ်းရမယ်၊ အဲဒီလိုမျိုးအိမ်ကြီးထဲမှာသွားလာရှာဖွေရင်းနဲ့ ထိတ်လန့်မှုတွေကဆီးကြိုနေပါတယ်။ ဘယ်လိုအချိန်မှာ ဘယ်လိုမျိုးသွေးပျက်စရာတွေနဲ့ တွေ့မလဲဆိုတာကတော့ လုံးဝအတပ်ပြောလို့မရပါဘူး။ ကိုယ်ကိုင်တွယ်ထိတွေ့လိုက်တဲ့အရာတွေကနေတဆင့် ကွင်းဆက်တွေနဲ့ တကယ့်အဖြစ်အပျက်ကပုံပေါ်လာအောင် ကြိုးစားရမှာပါ။ ဂိမ်းထဲမှာ သေလုဆဲဆဲပြေးလွှားတာတွေလည်းပါမှာဖြစ်သလို ရုတ်တရတ်ခြောက်လှန့်မှုတွေလည်း အမြောက်အမြားကြုံတွေ့ရမှာပါ။ ဘယ်လိုဇာတ်ကောင်မျိုးကိုကိုင်ပြီးဆော့ရမလဲဆိုတာတော့ အတိအကျမသိရသေးပေမယ့် လောလောဆယ်ကြည့်ရသလောက်တော့ တန်ပြန်တိုက်ခိုက်တာမျိုးအခန်းတွေ မတွေ့ရပါဘူး။ ဂိမ်းထဲမှာကျင်လည်ရင်းနဲ့မှ ဂိမ်းကစားပုံစံအသစ်တွေ ထပ်တိုးလာမလားဆိုတာကတော့ စောင့်ကြည့်ရဦးမှာပါ။

ဖြန့်ချိမယ့်ရက်နဲ့ ဆော့နိုင်မယ့်ပလက်ဖောင်းတွေ

၂၀၁၅ ခုနှစ်၊ စက်တင်ဘာလမှာ စတင်ကြေညာခဲ့တဲ့ဂိမ်းဖြစ်ပေမယ့်လည်း အားလပ်ရက်ရာသီနဲ့ခံသွားခဲ့တဲ့အတွက် ဂိမ်းဖန်တီးမှုအဆင့်တွေမှာ အချိန်အနည်းငယ်ကြာသွားခဲ့ပါတယ်။ ဒီလိုနဲ့အချိန်နှစ်နှစ်လောက်ကြာသွားပြီး ၂၀၁၇ ဇန်နဝါရီလမှာ alpha gameplay ဗီဒီယိုတွေထွက်ရှိခဲ့ပေမယ့်လည်း တကယ့်ဂိမ်းကတော့ ထွက်ရှိမလာခဲ့ပါဘူး။ ဒါပေမယ့် Visage ဂိမ်းကို ၂၀၁၇ နှစ်ကုန်ပိုင်းမှာ ထွက်ရှိမယ်လို့သုံးသပ်ကြပြီး ၂၀၁၇ အတွင်းမထွက်ခဲ့ဘူးဆိုရင်တော့ ၂၀၁၈ နှစ်ဆန်းပိုင်းကိုကူးသွားဖို့ အခြေအနေရှိပါတယ်။ ဂိမ်းပလက်ဖောင်းတွေအနေနဲ့ဆိုရင်တော့ PC, PS4 နဲ့ Xbox တို့မှာအသီးသီး ဆော့ကစားနိုင်မှာဖြစ်ပါတယ်။ ဒီတော့ survival horror အတွေ့အကြုံအသစ်တွေကိုမှ ကိုယ်တိုင်ကိုယ်ကျခံစားချင်ကြတဲ့ ပရိသတ်မာျးကတော့ ဇွဲရှိရှိစောင့်နေမှဖြစ်ပါလိမ့်မယ်။ အမိုက်စားဂိမ်းတွေကိုလည်း နောက်ပိုင်းမှညွှန်းပေးသွားမှာမို့လို့ နောက်တစ်ခေါက်မှ ပြန်ဆုံကြပါမယ်လို့ပြောရင်းနဲ့ SadSquare ဂိမ်းဖန်တီးသူများအဖွဲ့ရဲ့ အပြောင်မြောက်ဆုံးလက်ရာသစ်ဖြစ်တဲ့ Visage ဂိမ်းကို စောင့်နေကြပါလို့ပြောလိုက်ချင်ပါတယ်။

Yan
Ref: kotaku, ign, wikia

ပယ်ဖျက်ခဲ့ရတဲ့အလားအလာရှိ ဂိမ်း ၆ ခုနဲ့ သူတို့ရဲ့သမိုင်းကြောင်းတွေ

ငယ်စဉ်အရွယ်ကတည်းက ဂိမ်းတွေဆော့ပြီးကြီးပြင်းလာသူများအတွက် သူတို့စွဲစွဲမြဲမြဲနှစ်ခြိုက်တဲ့ဂိမ်းတွေဆိုတာရှိစမြဲပါ။ ဘယ်အရွယ်ကိုပဲရောက်ရောက် တီဗီရှေ့မှာထိုင်၊ ဂိမ်းခလုတ်ပြန်ကိုင်လိုက်တာနဲ့ ကိုယ်ဖြတ်သန်းလာခဲ့တဲ့ ငယ်ဘဝကာလလေးတွေကို လွမ်းဆွတ်အောက်မေ့အမှတ်ရကြပါတယ်။ Resident Evil, Dynasty Warriors ဂိမ်းစီးရီး၊ God Of War ဂိမ်းစီးရီးနဲ့ ဘောလုံးဂိမ်းတွေဟာ အကောင်းဆုံးဥပမာတွေပဲဖြစ်ပါတယ်။ ဒါပေမယ့် မြောက်မြားလှတဲ့ဂိမ်းတွေဟာ ဈေးကွက်ထဲကနေတဆင့် ကျွန်တော်တို့ဆီကိုဆိုက်ဆိုက်မြိုက်မြိုက်ရောက်လာဖို့အတွက် အဆင့်ပေါင်းများစွာဖြတ်ကျော်ခဲ့ရပါတယ်။ အဲဒီလိုမျိုးများစွာသောအဆင့်တွေထဲမှာ အခက်အခဲတွေ၊ အဆင်မပြေမှုတွေနဲ့ ပြသာနာပေါင်းသောင်းခြောက်ထောင်ကို ရင်ဆိုင်ခဲ့ရပြီးရောက်ရှိလာခဲ့လို့သာ ဂိမ်မာတွေကအဆင်သင့် စက်လေးဖွင့်၊ ခွေလေးသွင်းပြီး ဆော့နိုင်ကြတာပါ။ ဟုတ်ပါတယ်၊ အဲဒီလိုမျိုးမရေမတွက်နိုင်တဲ့အခက်အခဲတွေကို မကျော်လွန်နိုင်ခဲ့လို့ကံအကြောင်းမလှဘဲ ကျွန်တော်တို့နဲ့ ဝေးခဲ့ရတဲ့ဂိမ်းကောင်းတွေအများကြီးမှ အများကြီးပဲ။ ဒီတော့အခုဒီမှာ အဲလိုမျိုးပယ်ဖျက်ခဲ့ရတဲ့ဂိမ်းကောင်းတွေကို စာရင်းပြုစုပြီး ဗဟုသုတဖြစ်ဖွယ် ဂိမ်မာများအားလုံးအတွက် ဖော်ပြပေးလိုက်ပါတယ်။ တစ်ချက်လောက် ဆက်ကြည့်လိုက်ကြရအောင်။

Silent Hills

Silent Hills ဂိမ်းဟာ Silent Hill ဂိမ်းစီးရီးရဲ့ နောက်ဆက်တွဲခွေအဖြစ် Konami ကထုတ်လုပ်ဖြန့်ချိမယ့်ဂိမ်းဖြစ်ပါတယ်။ Silent Hills ဟာ ဂိမ်မာတွေတော်တော်များများမျှော်လင့်ချက်ထားပြီး စောင့်ဆိုင်းခဲ့ကြတဲ့ဂိမ်းဖြစ်သလို Survival Horror ဂိမ်းအမျိုးအစားကိုအခြေအနေတစ်ရပ် ပြောင်းလဲသွားစေမယ့် ဂိမ်းလည်းဖြစ်ခဲ့ပါတယ်။ ရုပ်ရှင်ဒါရိုက်တာ Guillerno Del Toro နဲ့ဗီဒီယိုဂိမ်းဒီဇိုင်နာ Hideo Kojima တို့နှစ်ယောက် ပူးပေါင်းပြီး အစွမ်းကုန်အားထုတ်ဖန်တီးထားတဲ့ Silent Hills ဂိမ်းဟာ Playable Teaser တောင်မှ ထွက်ရှိခဲ့ပြီး တကယ်တမ်း ပရိသတ်တွေလက်ထဲအရောက်ထည့်ဖို့ ခြေလှမ်းအနည်းငယ်ပဲလိုတော့တဲ့ဂိမ်းပါ။ Walking Dead ဇာတ်လမ်းတွဲရဲ့ အဓိကဇာတ်ဆောင်ဖြစ်သူ Norman Reedus ကိုပါ ဂိမ်းရဲ့အဓိကဇာတ်ဆောင်အဖြစ်ထည့်သွင်းဖန်တီးထားတဲ့ Silent Hills ဂိမ်းဟာ Metal Gear Solid V ဂိမ်းအချောသတ်အပြီး Konami ကနေ Hideo Kojima ထွက်ခွာသွားတဲ့နောက်မှာတော့ ရှေ့မဆက်ဖြစ်တော့ပဲ ရပ်တန့်သွားခဲ့ပါတယ်။ ဒီလိုနဲ့ ၂၀၁၅ ခုနှစ်၊ ဧပြီလ ၂၇ ရက်နေ့မှာ ဂိမ်းဖန်တီးရာမှာအချက်အခြာကျတဲ့လူတွေ နှုတ်ထွက်သွားတဲ့အတွက် ဂိမ်းထုတ်လုပ်မှုကို တရားဝင်ပယ်ဖျက်လိုက်ပြီးဖြစ်ကြောင်း ကြေညာချက်နဲ့ ဂိမ်မာတွေလက်ထဲကို Silent Hills ဂိမ်းဟာ ဘယ်တော့မှရောက်မလာတော့ပါဘူး။

Doom 4

Doom 4 ကို id Software ရဲ့ဦးဆောင်ဖန်တီးသူ developer John Carmack က ၂၀၀၈ ခုနှစ်၊ မေလမှာ ကျင်းပခဲ့တဲ့ QuakeCon ပွဲမှာ အမြည်းမိတ်ဆက်ပြသခဲ့တာ ဖြစ်ပါတယ်။ ဂိမ်းကတော့ ကမ္ဘာမြေပေါ်ကို ပေါ်ထွက်လာတဲ့ ငရဲ အကြောင်းဖြစ်ပြီး ဂိမ်းစတိုင်ကတော့ ဟိုးအရင်က Doom ဂိမ်းတွေရဲ့ပုံစံနဲ့အလားပဲ ဖြစ်ပါတယ်။ ဒီနှစ်တွေထဲမှာ ဂိမ်းကို ဆက်လက်ဖန်တီးနေသေးတယ်လို့ ယူဆရပြီး ဂိမ်းအကြောင်းကိုအနည်းငယ်ပဲ ဖော်ပြခဲ့တာကြောင့် ဂိမ်မာအများစုဟာ ဇဝေဇဝါဖြစ်ခဲ့ကြတဲ့ဂိမ်းပါ။ အင်တာဗျူးတစ်ခုမှာ Doom 4 ရဲ့ဖန်တီးတည်ဆောက်မှုအပိုင်းရဲ့ အဓိကအဖွဲ့ဝင်တွေဟာ Doom 4 ဟာဖန်တီးရင်းနဲ့ တဖြည်းဖြည်းလမ်းကြောင်းပြောင်းသွားပြီး ဇာတ်ညွှန်းပြောင်းလဲမှုတွေက Call of duty လိုမျိုးဖြစ်သွားခဲ့တယ်လို့ ဖွင့်ပြောခဲ့ပါတယ် ။ ၂၀၁၂ မှာ ဒီ project ကို reboot အနေနဲ့ ပြန်ပြီးအသက်သွင်းဖန်တီးဖို့လုပ်ခဲ့ပေမယ့် နောက်ဆုံးမှာတော့ပရောဂျက်ဟာ 2016 Doom အဖြစ်ပြောင်းလဲသွားခဲ့ပြီး Doom 4 ဂိမ်းဖန်တီးမှုလည်း အဆုံးသတ်သွားခဲ့ပါတယ်။

World of Darkness

World of Darkness ဟာသွေးပျက်စိတ်ခြောက်ခြားဖွယ် အမှောင်လောကအငွေ့အသက်တွေ ရောပြွန်းထားတဲ့ MMO ဂိမ်းတစ်ခုဖြစ်ပြီး EVE Online ဂိမ်းဖန်တီးသူများအဖွဲ့ CCP Games ကထုတ်လုပ်ဖန်တီးတဲ့ ဂိမ်းတစ်ခုဖြစ်ပါတယ် ။ သဘာဝလွန်ကမ္ဘာကြီးကို နောက်ခံပြုထားပြီး နက်နဲတဲ့နိုင်ငံရေး ပဋိပက္ခတွေ ၊ လောကပတ်ဝန်းကျင်က သက်ရှိသတ္တဝါတွေနဲ့ ထိတွေ့ဆက်ဆံရင်း တဖြည်းဖြည်းချင်းစီ ဇာတ်လမ်းမြုပ်ကွက်တွေသိလာအောင် လုပ်ထားတဲ့ RPG တစ်ခုဖြစ်ခဲ့ပါတယ်။ ဂိမ်းကို ၈ နှစ်အကြာကာလတောင် ဖန်တီးနေခဲ့ပြီး ၂၀၁၄ ဧပြီလ၊ ၁၄ ရက်နေ့မှာ CCP Games ကဂိမ်းပရောဂျက် မဆိုင်းမတွရုတ်ချည်း ဖျက်သိမ်းခဲ့တာဖြစ်ပါတယ်။

Tom Clancy's Rainbow 6 Patriots

Rainbow 6 Patriots Ubisoft Montreal ကဖန်တီးရေးဆွဲထားတဲ့ First Person Shooter ဂိမ်းအမျိုးအစားဖြစ်ပြီး ၂၀၁၁ ခုနှစ်မှာ ဂိမ်မာများနဲ့ စတင်ထိတွေ့ခဲ့တဲ့ဂိမ်းဖြစ်ပါတယ် ။ True Patriots အမည်ရတဲ့ အကြမ်းဖက်အုပ်စုနှိမ်နင်းရေးအဖွဲ့ဖြစ်တဲ့ Team Rainbow အသင်းရဲ့ အဖွဲ့သားတစ်ယောက်အနေနဲ့ ပြင်းထန်တဲ့တိုက်ပွဲတွေကြားမှာ ပစ်ခတ်တိုက်ပွဲဝင်ရင်းကစားရမယ့်ဂိမ်းတစ်ခုပါ။ ဒါပေမယ့် ၂၀၁၄ ဇွန် ၉ ရက်နေ့မှာ Ubisoft က နောင်ထွက်ရှိလာမယ့် Rainbow 6 ဂိမ်းကို နောက်ဆုံးပေါ်နည်းပညာတွေနဲ့ အကောင်းဆုံးဖန်တီးနိုင်ဖို့အတွက် Rainbow 6 Patriots ဂိမ်းကို ဖျက်သိမ်းလိုက်ပြီဖြစ်ကြောင်းကြေညာခဲ့တာ ဖြစ်ပါတယ်။

Scalebound

Scalebound ဂိမ်းဟာ Xbox One exclusive RPG အက်ရှင်ဂိမ်းတစ်ခုဖြစ်ပြီး ၂၀၁၄ ခုနှစ်က ကျင်းပခဲ့တဲ့ Microsoft E3 သတင်းစာရှင်းလင်းပွဲမှာ PlatinumGames က တရားဝင်ကြေညာခဲ့တဲ့ဂိမ်းလည်းဖြစ်ပါတယ်။ ဂိမ်းရဲ့အဓိကဇာတ်ကောင် စွန့်စားသူတစ်ယောက်လည်းဖြစ်တဲ့ Drew နဲ့ Thuban လို့အမည်ရတဲ့နဂါးတို့ဟာ မိတ်ဆွေသဖွယ်ဆက်ဆံရေးကိုတည်ထောင်ပြီး Land Of Draconis လို့အမည်ရတဲ့ကမ္ဘာမှာ ကြီးမားတဲ့သတ္တဝါကြီးတွေ၊ ထူးဆန်းတဲ့သားရဲကြီးကို အတူတကွရင်ဆိုင်ရတဲ့ဇာတ်လမ်းပဲဖြစ်ပါတယ်။ ဂိမ်းမှာ Drew ရဲ့နောက်ခံဘဝဇာတ်ကြောင်းကိုလေ့လာရမယ့်အပြင် Drew နဲ့ Thuban အကြားသခင်နဲ့တိရစ္ဆာန်သဖွယ် ဆက်ဆံရေးဖြစ်တည်လာပုံကို ဂိမ်မာများက ရင်သက်ရှုမောဖွယ် စိတ်ခံစားချက်အပြည့်နဲ့ တွေ့မြင်ရမဲ့ဂိမ်းပါပဲ။ ဂိမ်းကို ၂၀၀၆ ခုနှစ်ကတည်းကစတင်ပြီး ဖန်တီးခဲ့ကြပေမယ့် နောက်ပိုင်းမှာ Platinum ဂိမ်းရေးဆွဲသူများအဖွဲ့ဟာ Bayonetta ဂိမ်းကိုပိုပြီးဦးစားပေး လုပ်ဆောင်ခဲ့ကြပါတယ်။ ၂၀၁၆ ခုနှစ်မှာထွက်ရှိမယ်လို့ အရင်ကထုတ်ပြန်ခဲ့ပေမယ့် ၂၀၁၇ ခုနှစ်ကိုပြောင်းရွေ့ခဲ့ရပြီး ၂၀၁၇ ခုနှစ်ဇန်နဝါရီလမှာတော့ Scalebound ဂိမ်းကိုဖျက်သိမ်းတော့မှာဖြစ်ကြောင်းကို အတိအလင်းကြေညာခဲ့ပါတယ်။ ဒီလိုနဲ့ပဲ Scalebound ဂိမ်းမှာ ဂိမ်မာတွေနဲ့ ဝေးကွာခဲ့ရပါတယ်။

Prey 2

Prey 2 ဟာ first-person shooter ဂိမ်းအမျိုးအစားဖြစ်ပြီး Human Head Studios ကဖန်တီးရေးဆွဲထားတာဖြစ်ပါတယ် ။ Prey 2 ဟာ ၂၀၀၆ ခုနှစ်ကထွက်ရှိခဲ့တဲ့ Prey ဂိမ်းရဲ့နောက်ဆက်တွဲအခွေဖြစ်ပြီး Exodus ဆိုတဲ့ဂြိုလ်သားတွေရှိတဲ့ကမ္ဘာမှာ ကျင်လည်သွားလာရင်း ပျောက်ဆုံးနေတဲ့ မှတ်ဉာဏ်တွေကို ရှာဖွေနေတဲ့ကြေးစားမုဆိုးတစ်ယော်ကအနေနဲ့ ဝင်ရောက်ဆော့ကစားရမှာ ဖြစ်ပါတယ် ။ ဒါပေမယ့် ဂိမ်းထုတ်လုပ်သူဖြစ်တဲ့ Bethesda ဟာ Prey 2 ဟာ ကုမ္မဏီရဲ့စံနှုန်းထားနဲ့မကိုက်ညီတဲ့အတွက် ၂၀၁၄ ခုနှစ်၊ အောက်တိုဘာလ ၃၀ မှာဖျက်သိမ်းလိုက်ပြီဖြစ်ကြောင်း အတည်ပြုကြေညာခဲ့တာဖြစ်ပါတယ်။

Yan
Ref: Gamespot, MMGF