⛩ ပ‌ဒေသရာဇ်ခေတ်ဂျပန်ပြည်ရဲ့ အပ်ကြောင်းထပ်နေတဲ့ပုံဖော်မှုတွေကို တစ်ဝကြီးရူစားပြီး ဂျပန်ပြည်က ဂျပန်လူမျိုးတွေကို လူမည်းတစ်ယောက်အနေနဲ့ သတ်ဖြတ်ရမယ့် Assassin’s Creed: Shadows ⛩

ကဲ ဂိမ်မာများအားလုံးကို ပေ့ချ်ကနေပြန်လည်ကြိုဆိုလိုက်ပါတယ်။ ဧပြီလ ၂၃ ရက်နေ့မှာ ဆောင်းပါးနောက်ဆုံးတင်ခဲ့ပြီး နှစ်လတာနီးပါး အဆက်ပြတ်သွားခဲ့တဲ့အတွက် အပါတ်စဥ်စောင့်မျှော်နေကြသူများကို ဦးစွာပထမတောင်းပန်လိုက်ပါတယ်။ ဒီနှစ်လတာအတွင်း ဘာကြောင့်စာမရေးဖြစ်သလဲဆိုတော့ အဓိကကစိတ်မပါပါတာရယ်၊ ရေးသားဖန်တီးရ‌လောက်တဲ့ အကြောင်းအရာမျိုးကို အားစိုက်လေ့လာချင်စိတ်မဖြစ်တာရယ်၊ ဘာကိုစိတ်တိုင်းမကျမှန်းမသိ ဖြစ်နေရတာရယ်၊ အခြားသောအနုပညာကိစ္စတွေနဲ့ အလုပ်ရှုပ်နေတာတွေရယ်ကြောင့် ဆောင်းပါးတစ်ခုကို စီစီရီရီလေး မရေးသားနိုင်ခဲ့ပါဘူး။ နောက်ပြီး vpn တွေအသုံးပြုဖို့ ပိုမိုခက်ခဲလာခြင်းကြောင့် အင်တာနက်ပေါ်တက်ဖြစ်ရင်တောင် YouTube နဲ့ reddit လောက်ကလွဲပြီး အခြားလူမှုကွန်ယက်များကို အ‌ထွေအထူးမသုံးခဲ့ပါဘူး၊ အလုပ်ရှုပ်မခံချင်တာလို့ ပြောရင်ပိုမှန်ပါလိမ့်မယ်။ ဒါပေမယ့် အခုတော့‌ပြောစရာကိစ္စတစ်ခု ရှိလာတာကတစ်ကြောင်း၊ စာရေးဖို့ စိတ်အနည်းငယ် တက်ကြွလာတာကတစ်ကြောင်း အကြောင်းကြောင်းကြောင့် ဒီစာစောင်ကိုရေးသားဖြစ်ခဲ့ပါပြီ။ ပေ့ချ်မှာ အပါတ်စဥ်ပို့စ်တင်ဖို့ကိုလည်း တတ်နိုင်သမျှကြိုးစားသွားပါ့မယ်။ ၂၀၁၉ ခုနှစ်ကတည်းကနေ အခု ၂၀၂၄ ခုနှစ်အထိပေ့ချ်ကို follow ထားပြီး တင်သမျှကိုဖတ်ရှု‌အားပေးခဲ့သူများကို ကျေးဇူးတင်မဆုံးဖြစ်ရပါတယ်။ ကဲ ဆိုတော့ကာ ခေါင်းစဥ်ကိုလည်း ဖတ်ပြီးလောက်ပြီလို့ယူဆပါတယ်။ မိုးလေးကလည်းရွာ၊ ရာသီဥတုလေးကလည်း ကိုယ့်ဘက်ပါနေတော့ ဒီဂိမ်းဆောင်းပါးလေးကို ဖတ်ပြီး အတွေးသစ်လေးတွေ တွေးကြည့်လိုက်ကြစို့ဗျာ။
တစ်ပုံချင်းစီထောက်ပြီးဖတ်ရှုပေးပါ။ ⬇️⬇️

Read it on Gamedia blog: 

စိတ်ကူးယဥ်ဖျော်ဖြေရေးနယ်ပယ်ထဲက အမျိုးသမီးပြယုဂ်ဇာတ်ကောင်များနဲ့ လက်တွေ့ပဒေသရာဇ်ခေတ်ဂျပန်ပြည်ရဲ့ အမျိုးသမီးနင်ဂျာများ 🎎

ဂျပန်နိုင်ငံရဲ့ နာမည်ကြီးသမိုင်းပြယုဂ်တစ်ခုဖြစ်တဲ့ နင်ဂျာတွေနဲ့ ကျွန်တော်တို့ဟာ ဟိုးငယ်ငယ်လေးကတည်းက ရင်းနှီးကျွမ်းဝင်ခဲ့ပြီးဖြစ်သလို အမျိုးသမီးနင်ဂျာများကိုလည်း ရုပ်ရှင်တွေ၊ ကာတွန်းတွေမှာ ကြိမ်ဖန်များစွာ တွေ့မြင်ခဲ့ပြီးပါြပီ။ ဖျော်ဖြေရေးနယ်ပယ်မှာ ထပ်ကြီးတလဲလဲကို ဖော်ြပထားခဲ့ပြီးဖြစ်တာကြောင့် ဆာမူရိုင်း၊ နင်ဂျာဇာတ်ကောင်မျိုးကို ဖန်တီးရာမှာ ဂိမ်းရေးဆွဲသူတွေအနေနဲ့ ဝေခွဲရာမရဘဲ ဟို‌မရောက်ဒီမရောက်ဖြစ်နေစရာ မလိုလောက်တော့ပါဘူး။ မှတ်တမ်းတင်ထားတဲ့ သမိုင်းကြောင်းအချက်အလက်တွေအရ ဂိမ်းဇာတ်အိမ်တည်ထားတဲ့ ၁၅၀၀ ခုနှစ်ဝန်းကျင်မှာ ဂျပန်နိုင်ငံရဲ့တစ်ဦးတည်းသော အမျိုးသမီးနင်ဂျာ မိုချီဇူကီချီရိုမီ ကိုယ်တိုင် သက်ရှိထင်ရှားရှိခဲ့ပြီး ချီရိုမီကို မြေလျှိုးမိုးပျံတဲ့ နင်ဂျာဆိုတာထက် လျှို့ဝှက်အေးဂျင့်လို့ဆိုရင် ပိုမှန်ပါလိမ့်မယ်။ ဘာကြောင့်လဲဆိုတော့ အမျိုးသမီးတွေရဲ့ ပကတိဖြစ်တည်မှုအရကိုက မိန်းမသားများဟာ လူ့အသိုင်းအဝိုင်းတစ်ခုနဲ့တစ်ခုဆီ ပျော်ဝင်လွယ်တယ်၊ ကူးလူးဆက်ဆံရပြေပြစ်တယ်၊ မိတ်ဖွဲ့ရလွယ်ကူတယ်၊ ဉာဏ်နီဉာဏ်နက်များတယ်၊ ကျရောက်နေတဲ့အခက်အခဲတွေအောက်ကနေ ကိုယ်လွတ်ရုန်းနိုင်စွမ်းရှိတယ် အစရှိတဲ့အရည်အသွေးတွေကြောင့် နင်ဂျာတစ်ယောက်ရဲ့အရည်အသွေးတွေနဲ့ ကိုက်ညီနေတာတော့ အမှန်ပါပဲ။ သို့ပေမယ့် ဟိုးယခင်ခေတ်တွေတည်းကနေ ယခုချိန်အထိ ဂျပန်လူ့အဖွဲ့အစည်းမှာ ကျား၊ မလိင်ခွဲခြားသတ်မှတ်ထားမှုများရှိတာကြောင့် အမျိုးသမီးတွေအနေနဲ့ ဓားကိုင်ပြီးတိုက်ခိုက်တဲ့ နင်ဂျာတစ်ယောက်ဖြစ်ဖို့မဖြစ်နိုင်သလို ဂျပန်တစ်ပြည်လုံးရဲ့သမိုင်းမှာ သိသာထင်ရှားတဲ့နင်ဂျာအမျိုးသမီးဟာလည်း မိုချီဇူကီချီရိုမီပဲ ဖြစ်ပါတယ်။ သမိုင်းတစ်ခေတ်ကိုမှီငြိမ်းထားတယ်ဆိုပေမယ့် ဗီဒီယိုဂိမ်းဖြစ်တာကြောင့် သမိုင်းကြောင်းဖော်ပြမှုမှန်ကန်ခြင်းဟာ သိပ်တော့အရေးမကြီးလှပေမယ့် AC စီးရီးရဲ့ ဟိုးယခင်တည်းက ချမှတ်ထားပြီး ယုတ္တိတန်မှုတွေအောက်က လွတ်ထွက်မသွားဖို့တော့လိုပါတယ်။ ဂိမ်မာများသတိထားမိမယ်ဆိုရင် ၂၀၁၇ ကစပြီး AC စီးရီးကို သွေးသစ်ပြန်လောင်းတဲ့ဂိမ်းငါးခုမှာ သုံးခုက အဓိကအမျိုးသမီးဇာတ်ကောင်များ ပါဝင်နေတာကိုတွေ့ရမှာပါ (Odessey, Valhalla, Shadows) တစ်ရံတစ်ရံမှာ ကျွန်တော်ကိုယ်တိုင်လည်း အမျိုးသမီးဇာတ်ကောင်များနဲ့ ဂိမ်းဆော့ကစားရတာ သဘောကျနှစ်သက်တယ်ဆိုပေမယ့် Ubisoft အနေနဲ့ အခုလိုအမျိုးသမီးဇာတ်လိုက်များကို သူတို့ရဲ့ခေတ်သစ်ဂိမ်းတွေထဲမှာ အားသွန်ခွန်စိုက် ပိုမိုထည့်သွင်းလာြခင်းဟာ အမှတ်မထင်တဲ့ တိုက်ဆိုင်မှုတစ်ခုတော့ မဟုတ်ခဲ့ပါဘူး။  (စာရေးသူအမြင်အရ တကယ်က အမျိုးသမီးဆာမူရိုင်းနဲ့ အမျိုးသားနင်ဂျာဆိုရင် ဂိမ်းဇာတ်ကြောင်းဟာပိုပြီး စိတ်ဝင်စားဖို့ကောင်းလိမ့်မယ်လို့ ထင်ပါတယ်)



ဂျပန်ရွာသူရွာသားများရဲ့ ရိုကျိုးဦးညွှတ်မှုကို သွားလေရာခံပြီး ဟစ်ဟော့ဂီတကိုကြိုက်တဲ့ ၁၆ ရာစုအတွင်းက လူမည်းဆာမူရိုင်း ရာဆူကဲ 👃🏿

မြန်မာတွေဟာ ငပိကြိုက်ပါတယ်၊ အာရှသားတွေဟာ ဆန်ကြိုက်သလို အနောက်တိုင်းသားတွေဟာ ဂျုံကြိုက်ကြပါတယ်။ လူမည်းတွေဟာလည်း ရေကြိုက်ပြီး ဟစ်ဟော့ဂီတကို သဘောကျနှစ်သက်သူများဖြစ်တယ်ဆိုတာ ဘယ်လိုမှငြင်းပယ်လို့မရတဲ့ အမှန်တရားတစ်ခုပါ။ ခင်ဗျားတို့ကတော့ ကမ္ဘာ့အနယ်နယ်အရပ်ရပ်က လူမျိုးနဲ့တိုင်းပြည်တွေကို ဘယ်လိုယေဘုယျအမြင်နဲ့ သုံးသပ်ထားသလဲမသိပေမယ့် အထက်ကပြောြပခဲ့တာတွေကတော့ ဘယ်လိုမှငြင်းပယ်လို့မရတဲ့ လောကအမှန်တရားတွေပါပဲ။ ဒါဟာ AC: Shadows ကိုဂိမ်းတစ်ခုအဖြစ် မဖန်တီးခင်မှာ Ubisoft ခေါင်းထဲရှိနေတဲ့ အမြင်ဖြစ်ကောင်းဖြစ်နိုင်ပါတယ်။ ဘာကြောင့်လဲဆိုတော့ ရှိနှင့်ပြီးသား stereotype တွေထဲကမှ တကယ့်လူကြားမကောင်းတဲ့ stereotype တွေကိုပဲ စုစည်းပြီး ဂိမ်းရဲ့အဓိကဇာတ်ကောင်တစ်ကောင်အဖြစ် ရုပ်လုံးပေါ်အောင် ဖန်တီးခဲ့လို့ပါပဲ။ အရမ်းလည်းချီးကျူးရသလို ကျေးဇူးတွေလည်းအရမ်းတင်မိနေပါပြီ။ ကိုယ့်ကိုယ်ကို ဂျပန်လူမျိုးတစ်ယောက်လို့ သတ်မှတ်ပြီး စာရေးသူ အခုပြောတာကို တွေးမြင်ကြည့်ပါ။ ခင်ဗျားရဲ့သွေးသားဖြစ်တဲ့ ဂျပန်လူမျိုးတွေဟာ သူတို့ထက်အရပ်တစ်ပြန်လောက်ရှည်ပြီး ဆာမူရိုင်းချပ်ဝတ်တန်ဆာအပြည့်ဝတ်ထားတဲ့ လူမည်းတစ်ယောက်ကို သွားလေရာ၊ မြင်လေရာမှာ ဦးညွှတ်ပြီး ရိုကျိုးခယတာကိုမြင်ရတဲ့အခါ ဘယ်လိုခံစားချက်မျိုးဖြစ်ပါသလဲ? ကိုယ်အကြိုက်ရဆုံးဂိမ်းစီးရီးဟာ နောက်ဆုံးမှာတော့ ကိုယ့်နိုင်ငံအတွင်းဇာတ်အိမ်တည်ခဲ့ပြီဖြစ်ပေမယ့် ကိုယ်ဟာ ကိုယ့်လူမျိုးအဖြစ်ဆော့ကစားခွင့်မရဘဲ အခြားအရပ်ကအပြင်လူအဖြစ် ကိုယ့်နိုင်ငံသားတွေကို ခုတ်ဖြတ်သတ်ရမယ်ဆိုတဲ့အနေအထားဟာ တကယ်တမ်း အထအနကောက်ကြည့်မယ်ဆိုရင် သွေးပွက်ပွက်ဆူစရာပါပဲ။ ‌သြော် နောက်တစ်ခုက အထာကျတဲ့လူမည်းဆာမူရိုင်း ရာဆူကဲဟာ ဟစ်ဟော့ဂီတကို ကြိုက်နှစ်သက်တဲ့ လူမည်းဇာတ်ကောင်တစ်ယောက်ဖြစ်တယ်ဆိုတာကိုလည်း ဂိမ်းချစ်သူတွေမမေ့ဖို့လိုပါတယ်။ ဘာကြောင့်လဲဆိုတော့ အလယ်ခေတ်၊ ၁၅၀၀ ခုနှစ်ဝန်းကျင်၊ အာဖရိကလူမျိုး၊ ပဒေသရာဇ်ခေတ်ဂျပန်ပြည်၊ ဆာမူရိုင်းယဥ်ကျေးမှုနဲ့ ဟစ်ဟော့ဂီတတို့ကို အချိုးကျရောမွှေလိုက်မယ်ဆိုရင် တကယ့်ကိုပြောင်မြောက်တဲ့ ဂိမ်းဇာတ်ကောင်တစ်ခုဖြစ်လာနိုင်လို့ပါပဲ။



ဂျပန်နိုင်ငံအဓွန့်ရှည်တည်မြဲဖို့အတွက် အရေးအကြီးဆုံးဖြစ်တဲ့ရာစုနှစ်၊ ဖန်တီးမှီငြမ်းလို့ကောင်းတဲ့ အလွယ်ဆုံးခေတ်ကိုမှ အားလုံးစားပွဲပြောင်းပြန်လှန်လိုက်တဲ့ Ubisoft 👎

၁၆ ရာစု၊ တစ်နည်းအားဖြင့် ၁၅၀၀ ရာစုနှစ်ဟာ အာရှတိုက်ရဲ့အင်အားစုများ၊ တိုင်းပြည်များ အထူးအားကောင်းပြီး ပြောင်မြောက်သောသမိုင်းဖြစ်ရပ်များဖြစ်ပွားခဲ့တဲ့ အချိန်ကာလလည်းဖြစ်ပါတယ်။ သမိုင်းချစ်သူတွေဆို သိကြမှာပါ၊ ၁၅၀၀ ရာစုနှစ်ဟာ မူဂေါအင်ပါယာ၊ အော်တိုမန်အန်ပါယာ၊ တရုတ်မင်းအင်ပါယာ၊ အီရန်ရဲ့ဆာဖာဗစ်အင်ပါယာ၊ မြန်မာတောင်ငူအင်ပါယာတို့ အင်အားဆတိုးကြီးထွားလာတဲ့ သက္ကရာဇ်အပိုင်းအခြားဖြစ်သလို ဆာမူရိုင်းတွေ အထူးလက်ဝါးစောင်းထက်တဲ့ ပဒေသရာဇ်ဂျပန်ခေတ်လည်း ဖြစ်နေပြန်ပါတယ်။ တစ်နည်းအားဖြင့်ဆိုရမယ်ဆိုရင် သမိုင်းကြောင်းမှာ တကယ့်နာမည်ကြီး ဂန္တဝင်ဆာမူရိုင်းဓားသမားတွေဖြစ်တဲ့ အိုဒါနိုဘူနာဂါတို့၊ မူဆာရှီမီရာမိုတို၊ တိုရိုတိုမီ ဟီဒဲရိုရှီတို့သက်ရှိထင်ရှားရှိခဲ့တဲ့ ခေတ်ကာလတစ်ဝိုက်ဖြစ်ပြီး အဲလိုမျိုးအချိန်မျိုးမှာမှ ဘယ်အရပ်ဘယ်ဒေသက ရောက်လာမှန်းမသိတဲ့ လူမည်းဆာမူရိုင်းကို ဂျပန်ပြည်ရဲ့အဓိကဇာတ်ဆောင်အဖြစ် နေရာပေးထားတယ်ဆိုတော့ကာ ဂျပန်တစ်နိုင်ငံလုံးကို တစ်ဖက်လှည့်နဲ့ မျက်နှာပြောင်တိုက် စော်ကားလိုက်သလိုပါပဲ။ အရှင်းဆုံး‌ပြောရရင် အိုဒါနိုဘူနာဂါဆိုတာ ဂျပန်ပြည်ဘုရင့်နောင်ပါ၊ လက်ရှိမျက်မှောက်အချိန်အထိ ဂျပန်လူမျိုးများအထူးလေးစားရတဲ့ သမိုင်းပြယုဂ်ဖြစ်သလို စစ်ဘုရင်တွေနဲ့မွှစာကြဲနေတဲ့ ဂျပန်ပြည်မကြီးကို တစ်စုတစည်းတည်း ပေါင်းစည်းပေးနိုင်ခဲ့တဲ့ သူရဲကောင်းတစ်ယောက်လည်းဖြစ်ပါတယ်။ AC: Shadows မှာ ဘယ်လိုဖော်ပြမှုပုံစံတွေနဲ့ အရေးကြီးသမိုင်းဇာတ်ကောင်တွေကို ဖော်ပြမလဲမသိပေမယ့် အနှစ်အရသာအရှိဆုံးခေတ်ကာလကိုမှ တစ်လွဲဆံပင်ကောင်း လုပ်ပစ်လိုက်တဲ့ Ubisoft ကို စာရေးသူအပါအဝင် ဂိမ်းလောကတစ်ဝှမ်းလုံးက အတိုင်းထက်အလွန် စိတ်ပျက်နေကြပါပြီ။ အခုထက်အဆပေါင်းများစွာ ပိုထိရောက်မှုရှိတဲ့ဇာတ်ကြောင်း၊ ဇာတ်ကောင်၊ နောက်ခံဇာတ်လမ်းတွေကို ဒီဂိမ်းမှာ ပြသလို့ရပါလျက်နဲ့ ဖြစ်တည်မှုပိုင်းဆိုင်ရာဝါဒနဲ့ ကွဲပြားခြားနားမှုကို အထူးလက်သင့်ခံထားပါတယ်ဆိုတဲ့ နာမည်ကောင်းလိုချင်မှုကြောင့် ကိုက်ညီမှုရှိရှိမရှိရှိ မျက်မှောက်ခေတ်စံနှုန်းနဲ့နှိုင်းယှဥ်ရေးဆွဲထားတဲ့ ဇာတ်ကောင်တွေကို ဂိမ်းထဲမှာ အစုလိုက်အပြုံလိုက် ထည့်သွင်းထားတော့တာပါပဲ။

AC: Shadows နဲ့ပတ်သက်ပြီး စာရေးသူ‌ပေးလိုတဲ့ အထိရောက်ဆုံးဥပမာနဲ့ ဆောင်းပါးအကျဥ်းချုပ် ✍️

ဒီဂိမ်းနဲ့ပတ်သက်ပြီး အထက်မှာလည်း ကိုယ်ဟာဂျပန်လူမျိုးတစ်ယောက်ဖြစ်မယ်ဆိုရင် အခုလိုမလေးမစားလုပ်မှုတွေအပေါ် ဘယ်လိုခံစားရမလဲလို့လည်း မေးခဲ့ပြီးပါြပီ။ ဒါပေမယ့် ကျွန်တော်တို့မြန်မာနိုင်ငံသားတွေအတွက် ပိုမိုထိရောက်မယ့် ဥပမာမျိုးကို ဖော်ပြပြီး AC: Shadows ဟာ ဘယ်လောက်တောင် လက်ရှိခေတ်အခါနဲ့ မျက်ချေပြတ်နေသလဲဆိုတာ ‌ပြောပြပါ့မယ်။ စိတ်ကူးခဏလောက် ယှဥ်ကြည့်ပါ၊ AC: Shadows မှာဂျပန်ပြည်ကိုဇာတ်အိမ်တည်ထားသလို မကြာခင်ထွက်လာမယ့် အမိုက်စားဂိမ်းတစ်ခုဟာလည်း မြန်မာနိုင်ငံမှာဇာတ်အိမ်တည်ထားတယ်လို့ စိတ်ထဲမှာ သဘောထားလိုက်ပါ။ အဲဂိမ်းဇာတ်အိမ်တည်ထားတာ ၁၅၀၀ ခုနှစ်ဝန်းကျင်ဖြစ်ပြီး ဒုတိယမြန်မာနိုင်ငံတော်ဖြစ်တဲ့ တောင်ငူခေတ်ရဲ့သမိုင်းဖြစ်ရပ်တွေ၊ စစ်ပွဲတွေ၊ ဘုရင်မင်းဆက်တွေ၊ ထိုင်းနဲ့လာအိုတို့ကိုသိမ်းတာတွေ အစရှိတာတွေကို နောက်ကျောခံထားမှာဖြစ်ပါတယ်။ ကိုယ့်တိုင်းပြည်နဲ့လူမျိုးကို ကိုယ်စားပြုထားတာကြောင့် မြန်မာပြည်က ဂိမ်မာတွေအားလုံး ရင်ခုန်စွာ အထူးစောင့်မျှော်နေကြတဲ့ ဂိမ်းသစ်တစ်ခုပါ။ တပင်ရွှေထီးနေရာကဆော့ရမလား? ဘုရင့်နောင်နေရာကဆော့ရမလား? နန္ဒဘုရင်နေရာကဆော့ရမလား? အစရှိသဖြင့် စိတ်လှုပ်ရှားစွာနဲ့ အားလုံးစိတ်ကူးယဥ်ကောင်းနေချိန်မှာ နောက်ဆုံးထွက်ရှိခဲ့တဲ့ ထွေလာအရ ကိုယ်တကယ်တမ်းဆော့ရမယ့် အဓိကဇာတ်ကောင်ဟာ ငဇင်ကာ ဖြစ်နေတယ်ဆိုတာပါပဲ။ ပေါ်တူဂီနိုင်ငံသား လူဖြူငဇင်ကာအဖြစ်နဲ့ ကိုယ်ဟာဂိမ်းထဲမှာ မြန်မာပြည်ကမြို့ရွာတွေကို တိုက်ခိုက်သိမ်းပိုက်ရမယ်၊ ခုခံတဲ့ရွာသူရွာသားတွေကို ရင်ဆိုင်သတ်ဖြတ်ရမယ်၊ ဘုန်းကြီးကျောင်းနဲ့ ဘာသာရေးအထင်ကရနေရာတွေကို လုယူရမယ်၊ ရခိုင်ပြည်ကအိမ်ရှေ့မင်းသားကို ခိုးယူဖမ်းဆီးပြီး ယိုးဒယားလက်အောက်ခံအဖြစ် ကိုယ့်နာမည်ကျော်ကြားမှုကို တဖြည်းဖြည်းတည်ဆောက်ရမယ်၊ ဂိမ်းဇာတ်ကြောင်းရဲ့ အရေးအကြီးဆုံးလုပ်ရပ်တစ်ခုအဖြစ် ရွှေတုဂံဘုရားမှာကပ်လှူထားတဲ့ ဓမ္မစေတီခေါင်းလောင်းကို သယ်ယူလာပြီး ရန်ကုန်မြစ်ထဲမှာ ထာဝရနှစ်မြှုပ်သွားတဲ့အထိလည်း ဆောင်ရွက်ရဦးမှာပါ။ မကြာခင်ထွက်ရှိလာမယ့် မြန်မာပြည်ကို ပထမဦးဆုံးသော နောက်ခံထားထားတဲ့ဂိမ်းဟာ ဒီလိုမျိုးသာဆို စာဖတ်သူများ ဘယ်လိုခံစားရမှာပါလဲ? ဒေါသထွက်မှာလား? စိတ်ပျက်မှာလား? အော့နှလုံးနာသွားမှာပါလား? ဒါဟာ အထိရောက်ဆုံးနဲ့ အနီးစပ်ဆုံးဥပမာပါ။ အားလုံးကွက်ကွက်ကွင်းကွင်း သဘောပေါက်သွားကျမယ်လို့ ထင်ပါတယ်။ ကလီယိုပတ်ထရာရဲ့ အထ္တိုပတ္တိစီးရီးကြောင့် အီဂျစ်နိုင်ငံက Netflix ကိုတရားစွဲသလို အဲလိုဂိမ်းမျိုးထွက်လာခဲ့ရင် မြန်မာပြည်က အဲဂိမ်းကုမ္ပဏီကို တရားမစွဲဆိုဘူးလို့ မပြောနိုင်ပါ။  AC: Shadows ကြောင့် စာ‌ရေးသူတောင် အတန်အတော်ဒေါသထွက်ရတာမို့ ဂျပန်နိုင်ငံကဂိမ်မာများလည်း လူမည်းဆာမူရိုင်းအဖြစ် ဆော့ကစားရတဲ့အပေါ်မှာ အတော်လေး အမျက်ထွက်နေကြလိမ့်မယ်လို့ထင်ပါတယ်။ Ubisoft ဘာလဲ? Ubisoft ဘယ်လဲ? ဆိုတာတောင် ကျွန်တော်တို့ဂိမ်းလောကသားတွေအနေနဲ့ စောင့်ကြည့်ဖို့ မတန်တော့ပါဘူး။ ဒီတစ်ဂိမ်းထဲနဲ့ ကျွန်တော်ရှိချင်တဲ့ AC ရဲ့မျှော်လင့်ချက်တွေကို Ubisoft ကဖျက်ဆီးသွားပါပြီ 😫

ကဲ ပြောစရာရှိတာတွေကို ထိရောက်အောင်ရေးသားတင်ဆက်ခဲ့ပြီမို့ ဒီစာစောင်ကို ထပ်ပြီးတော့လည်း ဆွဲမဆန့်ချင်တော့ပါ။ နှစ်လဝန်းကျင်ပျောက်သွားပြီးမှ ဒီဆောင်းပါးကိုတင်ပေးဖြစ်တဲ့အတွက်လည်း စာဖတ်သူဂိမ်းပရိသတ်များကို ထပ်ဆင့်တောင်းပန်လိုက်ပါရစေ။ နောင်လာမယ့်ဂိမ်းဆောင်းပါးတွေမှာ စိတ်ဝင်စားဖို့အကောင်းဆုံး အကြောင်းအရာမျိုးတွေကို တင်ဆက်ပေးသွားဖို့ ရည်ရွယ်ထားပါတယ်။ စောင့်မျှော်နေပေးကြဖို့ စကားပါးရင်း ဒီစာစောင်ကိုဒီနေရာမှာ အဆုံးသတ်လိုက်ချင်ပါတယ်။ အချိန်မှန်တင်ဆက်ပေးနိုင်ဖို့လည်း ကြိုးစားသွားပါမယ်။ ဖတ်ရှုပေးကြသူများအားလုံးကို အထူးကျေးဇူးတင်ပါတယ်။

Yan

အနောက်တိုင်းဗီဒီယိုဂိမ်းများက ‌ဖော်ြပကြတဲ့ ရုပ်ရည်ချောမောလှပမှုနဲ့ အရှေ့တိုင်း၊ အနောက်တိုင်း စံကွဲပြားခြားနားမှုများ 👸

မြန်မာ့သက္ကရာဇ် ၁၃၈၆ နှစ်သစ်နဲ့အတူ ဂိမ်မာများကိုပေ့ချ်ကနေ ပြန်လည်ကြိုဆိုလိုက်ပါတယ်။ သင်္ကြန်မတိုင်ခင်ကတည်းက ဆောင်းပါးများတင်ဆက်ပေးဖို့ အခွင့်အရေးမကြုံခဲ့ပဲ အခုမှသာပြန်လည်ရေးသားဖြစ်ခြင်းဖြစ်ပါတယ်။ ဖုန်းနဲ့စာရေးလေ့ရေးထမရှိတဲ့အပြင် အချက်အလက်များရှာဖွေခြင်း၊ စာစီခြင်း၊ သင့်တင့်တဲ့ဓာတ်ပုံများထည့်သွင်းခြင်းတို့အတွက် အင်တာနက်တစ်ခွင်မှာ လှန်လှောရှာဖွေရတာမို့ ကွန်ပျူတာရှေ့မှာ အချိန်တစ်ခုထိုင်မှသာလျှင် ဂိမ်းဆောင်းပါးများကို စိတ်တိုင်းကျသည်အထိ ရေးသားပြီးမြောက်တာဖြစ်ပါတယ်။ အခုပြောချင်တဲ့အကြောင်းအရာကို တင်ဆက်ပေးချင်နေတာ အတော်ကြာပြီဖြစ်ပါတယ်။ ဒီကိစ္စရပ်ဟာ အချိန်ကြာသည်နှင့်အမျှ ဂိမ်းလောကတစ်ခွင်မှာ ကြီးစိုးပြန့်နှံ့လာနေတဲ့အရာတစ်ခုဖြစ်ပြီး အနောက်တိုင်းဂိမ်းရပ်ဝန်းမှာဆိုရင် ခိုင်မာစွာအမြစ်တွယ်ထားနိုင်ပြီဖြစ်တဲ့ ကပ်ရောဂါဆိုးတစ်ခုလည်းဖြစ်ပါတယ်။ ခေါင်းစဥ်ကိုကြည့်ပြီး ဘာလဲဆိုတာ ခန့်မှန်းလို့ရလောက်မယ်လို့ ယူဆပါတယ်။ အဆင်သင့်ဖြစ်ပြီဆိုစလိုက်ကြပါမယ်။ ဒီနေရာမှာပထမဆုံးပြောချင်တာက ဗီဒီယိုဂိမ်းဆိုတာ ဖျော်ဖြေရေးကြားခံနယ်တစ်ခုဖြစ်ပြီး ဂိမ်းဆော့ကစားခြင်းဆိုတာဟာ ဖိအားတွေများလှတဲ့ လက်တွေ့ဘဝကနေ ခေတ္တခဏလွန်မြောက်ဖို့၊ စိတ်ကူးယဥ်ကမ္ဘာတစ်ခုမှာ ဝင်ရောက်အသက်ရှင်ဖို့ဖြစ်ပါတယ်။ ဂိမ်းဆော့ကစားခြင်းဆိုတာဟာ ရုပ်ရှင်ကားများလို ကတ်ဖြတ်ထားပြီးသား၊ မိမိလုပ်ဆောင်ရမယ့်အပြုအမူများကို သတ်မှတ်ထားပြီးသားမဟုတ်ဘဲ ကိုယ်လုပ်ချင်တဲ့အရာကို လုပ်ချင်တဲ့အချိန်မှာ ကြိုက်သလိုလုပ်နိုင်တဲ့အတွက် ဘယ်အရာနဲ့မှမတူတဲ့လွတ်လပ်မှုမျိုးကို ခံစားရစေပါတယ်။ ဗီဒီယိုဂိမ်းများဟာလည်း အနုပညာကြားခံနယ်တစ်ခုဖြစ်တဲ့အတွက် သီချင်း၊ စာအုပ်၊ ရုပ်ရှင်များလို ကျွန်တော်တို့ရဲ့ရသအာရုံကို အထူးနှိုးဆော်ပေးပါတယ်။ ဘယ်သူမှတော့ ကိုယ့်ရဲ့အခြေကျနေတဲ့ဘဝထဲက ရုန်းထွက်ပြီး သရဲခြောက်တဲ့ခံစားမှုကို ရချင်လို့ သချိုင်းကုန်းကို ညဘက် ၁၂ နာရီအတိမှာမသွားကြသလို တိုက်ပွဲထဲမှာပြေးလွှားပစ်ခတ်ချင်လို့ တပ်မတော်ထဲမဝင်ကြပါဘူး၊ ကိုယ်လိုချင်တဲ့အာရုံလှုံ့ဆော်မှုကို အထိရောက်ဆုံးပေးစွမ်းနိုင်တဲ့ ဗီဒီယိုဂိမ်းဆော့ခြင်းဆိုတဲ့လုပ်ရပ်ကိုပဲ လုပ်ကြပါတယ်။ အားလုံးနားလည်ပြီးသားဖြစ်တဲ့ အခုလိုရိုးရှင်းသောအရာများကို တစ်လုံးချင်းစီ စာစီပြရတာဘာကြောင့်လဲဆိုတော့ နောက်ဆက်ပြောမယ့်အရာအတွက် လိုအပ်တာမို့ အစပျိုးရခြင်းဖြစ်ပါတယ် 👂

တစ်ချက်လောက်စဥ်းစားကြည့်ပါ၊ ကိုယ်အချိန်ရရင်ရသလို ဝင်ရောက်အသက်ရှင်ရတဲ့ စိတ်ကူးယဥ်ကမ္ဘာလေးထဲမှာ ကိုယ်နဲ့လားလားမှမသက်ဆိုင်တဲ့ ရုပ်ဆိုးအကျည်းတန်သောဝါဒဖြန့်မှုမျိုး၊ အကျိုးအကြောင်းမသင့်တင့်သော ဇာတ်ကောင်ပုံစံမျိုးကို ဘယ်သူကများသည်းခံနိုင်မှာပါလဲ? အားလုံးလည်းသတိထားမိကြမှာပါ၊ လက်ရှိခေတ်မှာ အနောက်တိုင်းဘက်ကလာတဲ့ဂိမ်းများရဲ့ ဇာတ်ကောင်များ (အထူးသဖြင့်မိန်းမသားများ) ဟာ ရုပ်ပိုင်းဆိုင်ရာမှာ တဖြည်းဖြည်းယိုယွင်းချို့တဲ့လို့လာကြပါတယ်။ ရုပ်ရည်မချောမောမလှပတာဟာ ပကတိပြစ်ချက်တစ်ခုမဟုတ်သော်ြငား ကွဲပြားခြားနားမှုကိုဗန်းပြပြီး ရှိနှင့်တဲ့ဇာတ်ကောင်တွေကို လူတစ်စုအလိုကျ ပုံသွင်းတာမျိုးကတော့ လက်သင့်မခံနိုင်တဲ့အရာတစ်ခုဖြစ်ပါတယ်။ မကြာသေးခင်ကမှထွေလာနဲ့ demo ထွက်ရှိခဲ့တဲ့ တောင်ကိုရီးယားနိုင်ငံအခြေစိုက်ဂိမ်းကုမ္ပဏီ Shift Up ရဲ့ Stella Blade ဂိမ်းကိုပဲကြည့်မယ်ဆိုရင် လက်ရှိမှာဖြစ်ပျက်နေတဲ့အရာတော်တော်များများကို သိနိုင်ပါတယ်။ Stella Blade ဂိမ်းရဲ့အဓိကဇာတ်ဆောင်ဖြစ်သူ အိဗ်ရဲ့ခန္ဓာကိုယ်အချိုးအစားနဲ့ ဝတ်စားဆင်ယင်ပုံကိုထောက်ရှုပြီး အနောက်တိုင်းဂိမ်းမီဒီယာအတော်များများဟာ ဒါဟာလက်တွေ့ဘဝနဲ့မကိုက်ညီကြောင်း၊ မိန်းမသားတွေကို လိင်စိတ်ကြွဖွယ်ပုံဖော်ထားကြောင်း၊ ခန္ဓာကိုယ်အချိုးအစားဟာ ယုတ္တိမတန်ကြောင်း၊ အသက်မပြည့်သေးတဲ့ကလေးမလေးတစ်ယောက်နဲ့ ဆင်တူကြောင်းစသဖြင့် ထင်မြင်ချက်ပေါင်းစုံ၊ ဝေဖန်မှုပေါင်းစုံနဲ့ ထိုးနှက်တိုက်ခိုက်ကြပါတော့တယ်။ ဒီလိုတုံ့ပြန်မှုမျိုးကိုကြည့်ခြင်းအားဖြင့် ပထမဦးဆုံးကောက်နှုတ်နိုင်တာက အိဗ်ရဲ့ရုပ်ရည်နဲ့ ခန္ဓာကိုယ်တစ်ခုတည်းကသာ ဂိမ်းတစ်ခုလုံးကိုကိုယ်စားပြုနေသလိုဖြစ်နေပြီး ချောမောလှပခြင်း၊ ကြည့်ပျော်ရှုပျော်ရှိခြင်းဟာ တစ်ချို့သောလူတစ်စုအတွက် လားလားမှလက်သင့်မခံနိုင်တဲ့ အရာမျိုးဖြစ်နေပြီလားလို့တောင် မေးခွန်းထုတ်မိပါတယ်။ သေချာစဥ်းစားကြည့်တဲ့အခါ ဒါဟာရည်ရွယ်ချက်ရှိတဲ့ အကွက်ကျသောတိုက်ခိုက်မှုတစ်ခုဖြစ်ပြီး မိန်းမသားများရဲ့ နဂိုရှိသင့်တဲ့ဂုဏ်ရည်ဂုဏ်သွေးနဲ့ ပုံပန်းသဏ္ဌာန်ကို ခေတ်နဲ့ရောပြီး အာရုံထွေပြားရောထွေးသွားစေတဲ့ ခြေလှမ်းတစ်ဆင့်လည်းဖြစ်ပြန်ပါတယ်။ မီဒီယာနဲ့ ရုပ်ရှင်လောကတွေမှာစတင်ခဲ့ပြီး အခုဆိုရင်ဗီဒီယိုဂိမ်းများအထိ ကူးစက်ပြန့်နှံ့လာတဲ့ ဒီတိုက်ခိုက်မှုရဲ့ဦးတည်ရာပစ်မှတ်တွေကတော့ သတိမမူမိတဲ့ မိန်းမသားထုပါပဲ (‌‌ယောကျ်ားထုကြီးအတွက်လည်း ပြဿနာများသီးသန့်ရှိနေပါတယ်) Horizon Zero Dawn: Forbidden West ကနေ Forspoken ကနေ Fable 4 အထိ မိန်းမသားများဦးဆောင်တဲ့ ခေတ်သစ်ဂိမ်းများမှာ အဓိကကျတဲ့ဇာတ်ကောင်အမျိုးသမီးတွေကို ဆွဲဆောင်မှုပိုင်းမှာလျော့ကျအောင်၊ ရုပ်ပိုင်းဆိုင်ရာအားနည်းနေအောင် တမင်တကာဖော်ြပရေးဆွဲထားကြတာဟာ ဘာကြောင့်များပါလဲ?



ဒါတွေဟာဘာကြောင့်လဲဆိုတော့ ဖြစ်တည်မှုပိုင်းဆိုင်ရာ (Identity Politics)၊ လူမှုတရားမျှတမှု (Social Justice)၊ ကွဲပြားခြားနားမှုကိုလက်သင့်ခံခြင်း (Inclusivity) ဆိုတဲ့ခေါင်းစဥ်တွေအောက်ကနေ ဝါဒဖြန့်မှု၊ လာဘ်စားခြင်း၊ ဘက်လိုက်ခြင်းတွေကို ဗီဒီယိုဂိမ်းတွေထဲ ထည့်သွင်းမီးမောင်းထိုးချင်တဲ့ agenda ဖြစ်ပါတယ်။ နားလည်လွယ်အောင်ပြောရရင် လူမည်းတွေကနေရာတိုင်းပါရမယ်၊ အပုအဝငပိန်တွေ၊ အခြောက်တွေ၊ လိင်ပြောင်းလဲသူတွေဟာ နေရာတိုင်းမှာပါကိုပါရမယ်၊ အဲထက်ပိုပြီးနက်ရှိုင်းပေမယ့် သဘောတရားကတော့ဒါပါပဲ (ပိုမိုသိရှိလိုပါက Sweet Baby Inc အကြံပေးကုမ္ပဏီအကြောင်းလေ့လာပါ) ဒီအရာတွေဟာ အမေရိကန်အပါအဝင် (အနောက်ပိုင်း) နိုင်ငံများရဲ့နိုင်ငံရေး၊ မူဝါဒ၊ လှုပ်ရှားမှုများနဲ့ တိုက်ရိုက်ဆက်စပ်နေတာမို့ အနက်ထိဆင်းဖို့မလိုအပ်ပေမယ့် အားလုံးသိသင့်တဲ့တစ်ချက်ကတော့ အရှေ့တိုင်းကဂိမ်းရေးဆွဲဖန်တီးသူများဟာ ဒီဝါဒမှိုင်းနဲ့ကင်းလွတ်နေသေးတယ်ဆိုတာပါပဲ။ အတွင်းကစိတ်နေစိတ်ထားနဲ့ နှလုံးသားဟာ အပြင်ပန်းထက်ပိုအရေးကြီးတယ်လို့ ဘယ်လောက်တောင်ဆိုကြပါစေ ကျွန်တော်တို့လူသားတွေဟာ ချောမောလှပခြင်းကိုရှုစားရတာ ကြိုက်နှစ်သက်သူများဖြစ်ပါတယ်။ ဒါဟာ ကျား၊ မလိင်အရရော၊ ဇီဝဗေဒနဲ့ သဘာဝအရပါ မှန်ကန်နေတဲ့အချက်တစ်ချက်ဖြစ်ပြီး ရုပ်ရှင်မင်းသား၊ မင်းသမီးများ၊ မော်ဒယ်များ နာမည်ကျော်ကြားလူသိများလာခြင်းဟာလည်း အဲအချက်ကြောင့်ပါပဲ။ အမျိုးသားများဟာ တင်၊ ရင်အချိုးကျဖွံထွားပြီး အသားအရည်နူးညံ့စိုပြေတဲ့ မိန်းမသားများကို တွေ့မြင်ရတာကြိုက်ကြသလို အမျိုးသမီးများဟာလည်း အရပ်အမောင်းကောင်း၊ ကိုယ်ခန္ဓာတောင့်တင်းပြီး ဆွဲဆောင်မှုရှိတဲ့ရုပ်ရည်နဲ့ ယောကျ်ားသားများကို တွေ့မြင်ရတာ ကြိုက်ကြပါတယ်။ လူတွေဟာ ကိုယ့်ထက်မလှတောင် ကိုယ့်အောက်ရုပ်မဆိုးတဲ့သူမျိုးနဲ့သာ ပေါင်းဖက်လိုကြပြီး ကိုယ်မွေးတဲ့သားသမီးတွေအထိပါ ကြည့်မြင်ဖွယ်ကောင်းစေလိုတဲ့ စိတ်အတွေးမျိုးရှိပါတယ်။ ဘာကြောင့်လဲဆိုတော့ များသောအားဖြင့် ရုပ်ရည်ရူပကာမှာအားသာနေသူဟာ အားနည်းနေသူထက် ဘယ်နေရာမှာမဆို ရှင်သန်နေထိုင်ဖြတ်သန်းရတာ ပိုမိုလွယ်ကူလို့ပါပဲ။ ဒီတော့ အဲလိုအမှန်တရားတစ်ရပ်ကို ဗီဒီယိုဂိမ်းတွေထဲမှာထည့်သွင်းခြင်းဟာ ဘာတွေများမှားယွင်းနေပါသလဲ? အခုခေတ်မှာ ချောမောလှပသူအမျိုးသမီးဟာ ဂိမ်းတစ်ခုရဲ့အဓိကဇာတ်ဆောင်ဖြစ်နေရင် အနောက်တိုင်းဂိမ်းဂျာနယ်လစ်နဲ့ မီဒီယာများရဲ့ ရှုပ်ချခြင်းကို ဘာကြောင့်ခံရတာပါသလဲ? အိဗ်ရဲ့ခန္ဓာကိုယ်ဖွံ့ထွားနေတာ သဘာဝမကျဘူး၊ ယုတ္တိမတန်ဘူးလို့ ပုတ်ခတ်ချင်သူများသိရမှာက Stella Blade ရဲ့အဓိကဇာတ်ဆောင်အိဗ်ကိုပုံဖော်ဖို့ တကယ့်လက်တွေ့ဘဝမှာမှီငြမ်းထားတဲ့ ကိုရီးယားမော်ဒယ်ရှင်ဂျေအွန်ဟာ ဂိမ်းမှာတွေ့မြင်ရတဲ့အတိုင်း နှစ်လိုဖွယ်ကောင်းတဲ့ ဥပဓိရုပ်နဲ့ အချိုးကျတဲ့ခန္ဓာကိုယ်ကို တစ်ထေရာတည်း ပိုင်ဆိုင်ထားတယ်ဆိုတာပါပဲ 💋

ဒါ့အပြင် အရှေ့တိုင်းဂိမ်းတွဲကဇာတ်ကောင်များဖြစ်ကြတဲ့ RE စီးရီးက ဂျေးလ်၊ အေဒါနဲ့ ခလယ်လ်တို့ဟာ သူတို့မှီငြမ်းထားတဲ့ လက်တွေ့ဘဝကမိန်းမသားများ နည်းတူ အသီးသီးကိုယ်စီလှပကြသလို Devil May Cry က လေဒီနဲ့ ထရစ်ရှ်တို့ဟာလည်း ပုံစံတစ်မျိုးလေးကွဲထွက်ပြီး ကြည့်လို့ကောင်းနေပြန်ပါတယ်။ သက်ရှိလူတွေရဲ့မျက်နှာ၊ ခန္ဓာကိုယ်အချိုးအစားကို မကူးယူထားဘဲ နည်းပညာနဲ့သီးသန့်ပုံဖော်ထားတဲ့ Final Fantasy က တီဖာ၊ အေးရစ်နဲ့ ဂျက်စီတို့ဟာလည်း တကယ့်ပြင်ပကမိန်းမသားများလို့ မှတ်ယူရလောက်အောင် ရင်ထဲစွဲမှတ်လောက်စေမယ့် အလှတရားမျိုးကို ပိုင်ဆိုင်ထားပါတယ်။ ဒါတင်မကသေးပါဘူး၊ 2D နဲ့ Anime ဟန်ပါတဲ့ မိန်းမသားဇာတ်ကောင်များဖြစ်တဲ့ Street Figher က ချန်လီ၊ ကန်မီတို့ဟာလည်း ပရိသတ်တွေရဲ့ အထူးကြိုက်နှစ်သက်မှုကို တစ်ခဲနက်ရရှိထားသလို Genshin Impact ကမိန်းမသားဇာတ်ကောင်တိုင်းလိုလိုဟာ ချစ်မြတ်နိုးစရာကောင်းပြီး ထက်မြက်ထူးချွန်နေတာကို တွေ့ရဦးမှာပါ။ ဆိုတော့ကာ ဂိမ်မာများ သတိထားကြည့်မယ်ဆိုရင် အရှေ့တိုင်းကလာတဲ့ဂိမ်းများမှာ ဝတဲ့အဓိကမိန်းမသားဇာတ်ကောင်မျိုးကို အခုချိန်ထိ တစ်ခါမှမတွေ့ဖူးသလို ရုပ်ဆိုးအကျည်းတန်တဲ့ အဓိကမိန်းမသားဇာတ်ကောင်မျိုးကိုလည်း အခုထိမတွေ့ရပါဘူး။ ဒါဟာဘာကြောင့်ပါလဲ? အဖြေကရိုးရှင်းပါတယ်။ ‌အရှေ့တိုင်းဂိမ်းရေးဆွဲသူများဟာ သူတို့လူ့အဖွဲ့အစည်းရဲ့ ရှိနှင့်ပြီးသားစံနှုန်းစံထား၊ ယဥ်ကျေးမှုနဲ့ သတ်မှတ်ချက်များအောက်ကသာ ဂိမ်းများကိုဖန်တီးကြပြီး သူတို့တိုင်းပြည်နဲ့လူမျိုးကို ကိုယ်စားပြုတဲ့မိန်းမသားများကို ကမ္ဘာ့အလယ်မှာ ချောမောလှပကြောင်းသာ ပြသချင်ကြလို့ပါပဲ။ အရှင်းဆုံးပြောရမယ်ဆိုရင် အရှေ့တိုင်းဂိမ်းထုတ်လုပ်သူများဟာ ဗီဒီယိုဂိမ်းကို ဗီဒီယိုဂိမ်းမှန်း လက်ခံထားကြလို့ပါပဲ။ အရှေ့တိုင်းဂိမ်းများဟာ မျက်မှောက်ခေတ်မှာဖြစ်ပွားနေတဲ့ နိုင်ငံရေးအချင်းအရာများနဲ့ သူတို့ထုတ်လုပ်တဲ့ဗီဒီယိုဂိမ်းများကို တစ်ကန့်စီ ခွဲခြမ်းထားနိုင်ပြီး အသုံးမကျတဲ့ဝါဒဖြန့်ခြင်းများကို ဂိမ်းတွေထဲ ထည့်သွင်းရော‌နှောရလောက်တဲ့အထိ တစ်ကိုယ်ကောင်းဆန်ခြင်းမရှိ၊ အတ္တကြီးခြင်းမရှိဖူးလို့သာ ဂိမ်မာများကမှတ်ယူကြရမှာပါ။ (အရှေ့တိုင်းဂိမ်းများမှာ ပါဝင်တဲ့ဝါဒဖြန့်ခြင်းဟာ ပျော့ပျောင်းပါတယ်၊ ညင်သာပါတယ်၊ ပျော်ဝင်လွယ်ပြီးများသောအားဖြင့် သူတို့ရဲ့ယဥ်ကျေးမှုကိုပဲ ဦးတည်ကြပါတယ်၊ အဓိပ္ပါယ်မဲ့သော ဖြစ်တည်မှုရေးရာ ပေါက်ကရ‌လေးဆယ်မဟုတ်ပါ) ☠️


ကဲ ဒီလောက်ဆိုရင် ဂိမ်မာများအားလုံးလည်း ဂိမ်းလောကနဲ့ အင်တာနက်တစ်ခွင်မှာ တွေ့မြင်နေရတဲ့ အိဗ်ရဲ့အုတ်အော်သောင်းနင်းဒရာမာများဟာ ဘယ်ကစသလဲ နားလည်လောက်ပါပြီ၊ စာလည်းအတော်အတန်ရှည်ခဲ့ပါြပီ။ ဂိမ်းတစ်ခုအကြောင်းမဟုတ်တာကြောင့် တက်ကြွစွာ ဆက်ပြီးရေးဖို့လည်း စိတ်အားမထက်သန်တော့ပါဘူး၊ ဒါကြောင့်မို့ ဒီနေရာမှာပဲစာစောင်ကို အဆုံးသတ်လိုက်ပါရစေ။ ဖတ်ရှုပေးသူတစ်ယောက်ချင်းစီကို ကျေးဇူးအထူးတင်ရှိပါတယ်။ ‌နောက်အပါတ်မှာဘာအကြောင်းအရာမျိုးတင်ဆက်ပေးသွားမလဲ စောင့်မျှော်နေပေးကြဖို့ပြောကြားရင်း ဂိမ်မာများကို ဒီကနေနှုတ်ဆက်လိုက်ပါတယ်။

Yan

Resident Evil 8 မှာအားလုံးမြင်ခဲ့ရတဲ့ Chris ဦး‌ဆောင်တဲ့ခွေးဝံပုလွေတပ်ဖွဲ့ (Hound Wolf Squad) ဆိုတာဘာလဲ? ဘယ်သူတွေနဲ့ဖွဲ့စည်းထားလဲ? 🐺

ကဲ အလှည့်ကျပို့စ်လေးနဲ့ပေ့ချ်ကနေ ပြန်လည်နှုတ်ဆက်လိုက်ပါတယ်။ ဒီတစ်ခေါက်မှာတော့ Resident Evil 8 မှာကျွန်တော်တို့နောက်ဆုံးတွေ့ခဲ့ရတဲ့ Chris ဦးဆောင်တဲ့ ခွေးဝံပုလွေတပ်ဖွဲ့အကြောင်း ဂိမ်းချစ်သူများကို တင်ဆက်ပေးလိုက်ချင်ပါတယ်။ ကြည့်လိုက်တာနဲ့ ချပ်ဝတ်ဆိုက်ဂိုက်အပြည့်နဲ့ စတိုင်သိပ်ကျပြီး Resident Evil လောကထဲမှာ ထိရောက်မှုအရှိဆုံးနဲ့ အထာကျလွန်းတဲ့တပ်ဖွဲ့တစ်ဖွဲ့ဖြစ်ပါတယ်။ RE လောကထဲမှာ ရက်ကွန်းမြို့ရဲတပ်ဖွဲ့လို၊ ထိပ်သီးနည်းဗျူဟာချကယ်ဆယ်ရေးအဖွဲ့ (S.T.A.R.S) လို၊ ကမ္ဘာလုံးဆိုင်ရာဇီဝအကြမ်းဖက်မှုတိုက်ဖျက်ရေးမဟာမိတ်အဖွဲ့ (B.S.A.A) လို၊ ဇီဝလက်နက်တန်ပြန်စစ်ဆင်ရေးတပ်ဖွဲ့ (U.B.C.S) တို့လို ကြီးမားလှတဲ့ အန္တရာယ်ရန်စွယ်တွေကို ဘတစ်ပြန်ကြားတစ်ပြန် ရင်ဆိုင်နှိမ်နင်းတဲ့အထူးအဖွဲ့တွေဆိုရင် စာရေးသူ သဘောအလွန်ကျပါတယ်။ အဲဒါ Resident Evil မှာမှမဟုတ်ပါဘူး၊ လူဆိုးဖြစ်စေ လူကောင်းဖြစ်စေ တစ်ဖက်နဲ့တစ်ဖက်ထိပ်တိုက်တွေ့ကြတဲ့ ပါလာဒင်တွေလို၊ စစ်သူရဲကောင်းတွေလို အစုလိုက်ဖွဲ့စည်းထားတဲ့ တပ်ဖွဲ့တွေကို အထူးနှစ်ခြိုက်တဲ့စိတ်ဟာ ဟိုးအရင်ကတည်းက ရှိနှင့်နေတာဖြစ်ပါတယ်။ ခေါင်းစဥ်ကိုလည်းဖတ်ပြီးလောက်ပြီမို့ ဒီတစ်ခေါက်မှာတော့ RE စီးရီးရဲ့ မင်းသားတစ်လက်ဖြစ်တဲ့ ခရစ်စ်ကိုယ်တိုင် ကြီးကြပ်ကွပ်ကဲဦးဆောင်ပြီး ပါဝင်တိုက်စစ်ဆင်တဲ့ ခွေးဝံပုလွေတပ်ဖွဲ့ဆိုတာ ဘာလဲ? ဘယ်သူတွေနဲ့ဖွဲ့စည်းထားလဲ? သူတို့ရဲ့ရည်ရွယ်ချက်ကဘာလဲ? အစရှိတာတွေ ဒီပို့စ်မှာစိတ်ဝင်စားဖွယ်ဖော်ြပသွားမှာပါ။ ကဲ အဆင်သင့်ဖြစ်ပြီဆိုရင် အချိန်တွေဆက်မဖြုန်းပဲစလိုက်ကြရအောင်ဗျာ။ ⬇️⬇️

ခွေးဝံပုလွေတပ်ဖွဲ့ (Wolfhound Squad) ဆိုတာ ဘာလဲ? ဘယ်သူတွေပါဝင်ပြီး ဘယ်လိုဖွဲ့စည်းထားလဲ?

ခွေးဝံပုလွေတပ်ဖွဲ့ဆိုပြီးမဖြစ်ခင်က ပါဝင်တဲ့အဖွဲ့သားအားလုံးဟာ ကမ္ဘာလုံးဆိုင်ရာဇီဝအကြမ်းဖက်မှုတိုက်ဖျက်ရေးမဟာမိတ်အဖွဲ့ (B.S.A.A) ရဲ့အထူးတပ်ဖွဲ့ဝင်ဟောင်းများဖြစ်ကြပြီး RE8 ဇာတ်ကြောင်းမတိုင်ခင်မှာ အနှောင်အဖွဲ့ကင်းရှင်းပြီး လွတ်လပ်တဲ့တပ်ဖွဲ့စုတစ်ခုအဖြစ် B.S.A.A လက်အောက်က သီးသန့်ခွဲထွက်လိုက်တာြဖစ်ပါတယ်။ B.S.A.A ဟာ RE7 ရဲ့နောက်ဆုံးဗီလိန်ဖြစ်တဲ့အယ်ဗလင်းကို အချိန်မှီသုတ်သင်ရှင်းလင်းဖို့နောက်ကျခဲ့ပြီး တကယ့်ဖြစ်ရပ်မှန်ကို လူထုဆီမပြန့်နှံ့အောင်ဖုံးဖိခဲ့တဲ့အတွက် ခရစ်စ်အနေနဲ့ သူကိုယ်တိုင်တည်ထောင်ခဲ့တဲ့ မဟာမိတ်အဖွဲ့အပေါ် ပြန်လည်သံသယဝင်လာခဲ့တဲ့နောက် ခွေးဝံပုလွေတပ်ဖွဲ့ဆိုတာ ပေါ်ထွန်းလာခဲ့တာပါ။ B.S.A.A လက်အောက်က ဒီအထူးတပ်ဖွဲ့ခွဲကို ခရစ်စ်ကိုယ်တိုင် လက်ပြောင်းဦးဆောင်ပြီး RE8 ရဲ့အဓိကရန်သူဖြစ်တဲ့ မီရန်ဒါနောက်ကို ထပ်ချပ်မကွာလိုက်လံစုံစမ်းရင်း သုံးနှစ်သုံးမိုးကြာတဲ့အခါ ခွေးဝံပုလွေ (Wolfhound) ဆိုတဲ့နာမည်အသစ်နဲ့ ဒီတပ်ဖွဲ့ကို ပြန်လည်ဖွဲ့စည်းခဲ့တယ်လို့ မှတ်ယူကြရမှာပါ။ ခရစ်စ်ရဲ့ခွေးဝံပုလွေတပ်ဖွဲ့မှာ ပါဝင်သူတွေကတော့

Chris Redfield (အဖွဲ့ခေါင်းဆောင်)

Rolando Elba (မျက်လုံးဝါ)

Dion Wilson (ညခေါ်သံ)

Charlie Graham (ခွေးစွယ်)

John Perlman (လိုဘို)

Emily Berkhoff (ထွန်ဒရာ) တို့ ခြောက်‌ယောက်ဖြစ်ကြဖြစ်ပါတယ်။ တစ်ဦးချင်းစီဟာ တိုက်ခိုက်ရေး၊ စစ်ဆင်ရေး၊ ဗျူဟာချရေး၊ ထောက်လှမ်းရေးနဲ့ လက်နက်ကိရိယာတပ်ဆင်ရေး အစရှိတဲ့ကဏ္ဍအသီးသီးမှာ အထူးကျွမ်းကျင်သူများဖြစ်ပြီး မတူကွဲပြားတဲ့တာဝန်အမျိုးမျိုးကို ခရစ်စ်ရဲ့အမိန့်အာဏာအောက်မှာ ကျေပွန်အောင်ထမ်းဆောင်ကြပါတယ် ♟

ခွေးဝံပုလွေတပ်ဖွဲ့ရဲ့ရည်ရွယ်ချက်၊ ခံယူချက်နဲ့ ဖြစ်တည်မှုအနေအထား

နာမည်နဲ့သင်္ကေတတင် တွေ့မြင်ရတာ ထိမိလွန်းတဲ့ခွေးဝံပုလွေအဖွဲ့ဟာ ခရစ်စ်ရဲ့လမ်းပြခေါင်းဆောင်မှုကို အထူးလေးစားအားထားယုံကြည်သူများဖြစ်ကြပါတယ်။ RE လောကထဲမှာ ကျွန်တော်အကြိုက်ဆုံးအမျိုးသားဇာတ်ကောင်ဖြစ်တဲ့ ခရစ်စ်ဟာ သာမန်လူသားတစ်ယောက်ဖြစ်နေပေမယ့် ဇီဝဗိုင်းရပ်စ်နှိမ်နင်းရေး၊ ကာကွယ်ရေး၊ စစ်ဆင်ရေးနဲ့ ကမ္ဘာ့နေရာအနှံ့အပြားက ဇီဝလက်နက်အကြမ်းဖက်မှုများစွာကို အောင်မြင်စွာ အမြစ်ဖြတ်ထိန်းသိမ်းနိုင်ခဲ့တဲ့ အတွေ့အကြုံရှိစစ်သူရဲကောင်းတစ်ယောက်ဖြစ်ပါတယ်။ B.S.A.A ကိုစတင်တည်ထောင်ခဲ့သူဖြစ်တဲ့ ခရစ်စ်ကိုယ်တိုင် စစ်မြေပြင်မှာအတူတိုက်ပွဲဝင်ပြီး အမိန့်ပေးညွှန်ကြားတဲ့ ခွေးဝံပုလွေတပ်ဖွဲ့ဟာ လူနည်းနည်းနဲ့ကျဲကျဲ ဖွဲ့စည်းထားတယ်ဆိုပေမယ့် အခြားသောအဖွဲ့အစည်းကြီးတွေ လူအင်အား၊ ငွေအင်အားများစွာအသုံးပြုပြီး ဖြေရှင်းရတဲ့ ရှုပ်ထွေးနက်နဲသောပြဿနာများကို အသာလေးကိုင်တွယ်နိုင်ပါတယ်။ ခွေးဝံပုလွေတပ်ဖွဲ့ရဲ့ ပင်မရည်ရွယ်ချက်ကို တစ်သီးတသန့်သတ်မှတ်ထားတာမျိုးမရှိသေးပေမယ့် ဇီဝလက်နက်အကြမ်းဖက်မှုကို အသက်ရှင်နေသရွေ့တိုက်ဖျက်လိုတဲ့ ခရစ်စ်ရဲ့အိပ်မက်နဲ့ ရည်မှန်းချက်ဟာ တပ်ဖွဲ့ရဲ့ လက်ရှိလျှောက်လှမ်းနေတဲ့လားရာပါလို့ သုံးသပ်နိုင်ပါတယ်။ အဖွဲ့သားများအားလုံးဟာ B.S.A.A ထွက် အထူးစစ်သားများဖြစ်ကြတဲ့အတွက် သ‌န္ဓေပြောင်းသတ္တဝါများ၊ ဇီဝအကြမ်းဖက်မှုများနဲ့ပတ်သက်ရင် တိုက်ခိုက်ရေးအတွေ့အကြုံများစွာရှိပြီး မီရန်ဒါနဲ့ သခင်လေးယောက် (The Four Lords) တို့အုပ်စိုးတဲ့ ရွာတစ်ရွာလုံးက ဇီဝလက်နက်တွေကို တစ်ကောင်တစ်မြီးမကျန် ဖြိုခွဲရှင်းလင်းခဲ့တာကို ကြည့်ခြင်းအားဖြင့် တော်ရုံတန်ရုံဗိုင်းရပ်စ်ကူးစက်ထားရုံနဲ့တော့ ခွေးဝံပုလွေတပ်ဖွဲ့နဲ့ မျက်နှာချင်းဆိုင်တိုက်ခိုက်ဖို့ မဖြစ်နိုင်ပါဘူး။ ခရစ်စ်ရဲ့ညွှန်ကြားမှုအောက်မှာ တပ်ဖွဲ့တစ်စုလုံးရဲ့ ချိတ်ဆက်လှုပ်ရှားပုံတွေကို RE8 ပြီးခါနီး နောက်ဆုံးတစ်ပိုင်းမှာသာ တွေ့မြင်ရတာကြောင့် အဖွဲ့ဝင်တစ်ယောက်ချင်းစီရဲ့စိတ်နေစိတ်ထား၊ ပုံသဏ္ဏာန်၊ ပြုမူဆက်ဆံပုံနဲ့ စကားပြောဆိုပုံတွေကို သေချာမတွေ့မြင်ရသေးပါဘူး။ လာမယ့် RE9 မှာတော့ ခရစ်စ်အပါအဝင် ခွေးဝံပုလွေတပ်ဖွဲ့ရဲ့ပုံစံအသီးသီးကို ဖော်ထုတ်ပြသသွားမယ်လို့‌တော့ မျှော်လင့်ရပါတယ် 🌙

အဖွဲ့သားတစ်ယောက်ချင်းစီရဲ့နောက်ခံဇာတ်ကြောင်းနဲ့ သူတို့ကျွမ်းကျင်ရာကိုယ်စီ

အဖွဲ့ဝင်လေးယောက်ရှိတဲ့ထဲကမှ ပထမဦးဆုံးအနေနဲ့ ဖော်ြပပေးမယ့်အဖွဲ့ဝင်ကတော့ Rolando Elba (မျက်လုံးဝါ) ဖြစ်ပြီး မျက်လုံးဝါဟာ ခွေးဝံပုလွေတပ်ဖွဲ့ရဲ့လက်ဖြောင့်တပ်သားဖြစ်ပါတယ်။ အ‌ရှေ့ဥရောပမှာရှိတဲ့ အီသန်တို့အိမ်ကို ခရစ်စ်တို့ဖောက်ထွင်းဝင်ရောက်စဥ်မှာ မျက်လုံးဝါကိုယ်တိုင်ပါဝင်ခဲ့ပြီး မျက်လုံးဝါဟာ မော်ဒိုး ကျင်လည်ကျက်စားတဲ့ ရေကန်ကြီးထဲက လျှို့ဝှက်ဓာတ်ခွဲခန်းအနားမှာ ခွေးဝံပုလွေတပ်ဖွဲ့စခန်းခွဲကို တည်ဆောက်ခဲ့သူလည်းဖြစ်ပါတယ်။

ဒုတိယတစ်ယောက်ကတော့ Dion Wilson (ညခေါ်သံ) ဖြစ်ပြီး သူဟာ ဆက်သွယ်‌‌ရေးမှာအထူးကျွမ်းကျင်တဲ့ ခွေးဝံပုလွေအဖွဲ့ဝင်ဖြစ်ပါတယ်။ ညစ်ပတ်စုပ်ပြတ်နေတဲ့ မော်ဒိုးရဲ့ လျှို့ဝှက်ဓာတ်ခွဲခန်းနဲ့ လားလားမှမအပ်စက်တဲ့ ကွန်ပျူတာ၊ စက်ကိရိယာနဲ့ သုတေသနသုံးပစ္စည်းတွေကို အမှတ်မထင်တွေ့လိုက်ရလို့ အံ့သြသွားတဲ့အီသန်ကို အနောက်ကနေသေနတ်နဲ့ချိန်ပြီး “မင်းခေါင်းမမော့လာနဲ့” ဆိုပြီး‌ပြောသူဟာ တခြားသူမှမဟုတ် ညခေါ်သံပါပဲ။

တတိယတစ်ယောက်ကတော့ အဖွဲ့နဲ့အကိုက်ညီဆုံးဇာတ်ကောင်ဖြစ်ပါတယ်။ သူကတော့ Charlie Graham (ခွေးစွယ်) ဖြစ်ပြီး ခွေးဝံပုလွေတပ်ဖွဲ့ဆိုတဲ့အမည်နဲ့ကိုက်တဲ့ နာမည်ကိုပိုင်ဆိုင်ထားသူလည်းဖြစ်ပါတယ်။ တပ်ဖွဲ့ထဲမှာ “ကေ” ဆိုပြီးလည်းခေါ်ဝေါ်ကြတဲ့ ခွေးစွယ်ဟာ ခရစ်စ်တို့ဆီမရောက်လာခင် အရင်ဘဝက ခွေးများကိုထိန်းသိမ်းမွေးမြုပြီး လေ့ကျင့်ပေးသူလည်းဖြစ်ပါတယ်။ အီသန်နဲ့ ရို့စ်ကိုသယ်ဆောင်လာတဲ့ပေါင်မုန့်ကားကြီး တိမ်းမှောက်သွားအပြီး မကြာခင်မှာ အခင်းဖြစ်ပွားရာနေရာကို ခွေးစွယ်အပါအဝင်အခြားအဖွဲ့သားများ ရောက်ရှိခဲ့ပေမယ့် အသက်ရှင်ကျန်သူတစ်ဦးတစ်ယောက်မှ မတွေ့ရတော့ပါဘူး။  

အခုဖော်ပြပေးမယ့်စတုတ္တတစ်ယောက်ကတော့ John Perlman (လိုဘို) ဖြစ်ပြီး လိုဘိုရဲ့ကျွမ်းကျင်မှုနဲ့ နောက်ခံဇာတ်ကြောင်းကို အတိအကျမသိရသေးပေမယ့် B.S.A.A ထွက်ဖြစ်တာကြောင့် သာမန်စစ်သားများထက်ပိုပြီး တိုက်ခိုက်ရေးအတွေ့အကြုံရှိတယ်ဆိုတာ ခန့်မှန်းနိုင်ပါတယ်။ ရွာထဲမှာရှိတဲ့ဘုရားကျောင်းအတွင်းမှာ ဂိမ်မာအားလုံးတွေ့မြင်ရတဲ့ ကိရိယာပစ္စည်းများဟာ လိုဘို၊ ညခေါ်သံနဲ့ ထွန်ဒရာတို့သုံးယောက် ပြင်ဆင်ထားတဲ့အရာများပဲဖြစ်ပါတယ်။

နောက်ဆုံးပဉ္စမတစ်ယောက်ကတော့ ခွေးဝံပုလွေတပ်ဖွဲ့ထဲမှာ တစ်ဦးတည်းသောမိန်းမသားလည်းဖြစ်ပြန်တဲ့ Emily Berkhoff (ထွန်ဒရာ) ပါပဲ။ ထွန်ဒရာဟာ B.S.A.A ကိုရောက်မလာခင်က မူးယစ်ဆေးဝါးနှိမ်နင်းတိုက်ဖျက်ရေး (D.E.A: Drug Enforcement Administration) ရဲ့အေးဂျင့်တစ်ယောက်ဖြစ်ပြီး B.S.A.A ကတစ်ဆင့် ခွေးဝံပုလွေတပ်ဖွဲ့ထဲ ရောက်လာခဲ့တာဖြစ်ပါတယ်။ ထွန်ဒရာဟာ ရှေ့ပြေးကင်းထောက်အဖြစ် လုပ်ဆောင်တဲ့နေရာမှာအထူးကျွမ်းကျင်သူဖြစ်ပြီး မီရန်ဒါရဲ့အကြံအစည်တစ်ခုလုံးကို ပြန်ကြား‌ထောက်လှမ်းမှုတွေလုပ်ပြီး ခရစ်စ်ကိုပြန်လည်သတင်း‌ပေးပို့ခဲ့ပါတယ်။ ထွန်ဒရာရဲ့ပိရိသေသပ်တဲ့လှုပ်ရှားမှုတွေကြောင့် မီရန်ဒါဘက်ကလက်ဦးမှုမရယူနိုင်ခဲ့ဘဲ ခွေးဝံပုလွေတစ်ဖွဲ့လုံးဟာ ရွာထဲကိုစီးနင်းဝင်ရောက်နိုင်ခဲ့တာဖြစ်ပါတယ်။ ‌ထောက်လှမ်းရေးတွေပဲလုပ်နေရလို့ နည်းနည်းလေးတောင်သွေးအေးလာပြီလို့ ထွန်ဒရာရဲ့ပြောကြားမှုကို ခရစ်စ်ကိုယ်တိုင်က မင်းရဲ့အခုလိုလုပ်ရပ်တွေကြောင့်ပဲ မီရန်ဒါရဲ့အကြံအစည်အစအဆုံးကို ငါတို့သိနိုင်ခဲ့တာဆိုပြီး ချီးကျူးတဲ့သဘောနဲ့ ပြန်လည်ဖြေကြားခဲ့ပါတယ်။ ဒါတွေကတော့ ခွေးဝံပုလွေတပ်ဖွဲ့မှာပါဝင်တဲ့ အဖွဲ့သားတွေရဲ့သမိုင်းအကျဥ်းချုံးပဲဖြစ်ပါတယ် ☠️

ခရစ်စ်ရဲ့အထင်ရှားဆုံးသောစိတ်ဒဏ်ရာနဲ့ အချိန်ကြာရှည်တည်တံ့ခိုင်မြဲသွားနိုင်ခြေရှိတဲ့ ခွေးဝံပုလွေတပ်ဖွဲ့

ခရစ်စ်မှာသူ့တစ်သက်တာ ဖျောက်ဖျက်မရတဲ့ စိတ်ဒဏ်ရာတစ်ခုရှိနေပါတယ်။ အဲဒီစိတ်ဒဏ်ရာက ဘာလဲဆိုတော့ သူအတိတ်မှာ ဦးဆောင်ခဲ့၊ အမိန့်ပေးညွှန်ကြားခဲ့တဲ့ အဖွဲ့သားများစွာဟာ အကြောင်းတစ်စုံတစ်ရာကြောင့် အမြဲတမ်း မရှုမလှအသက်ဆုံးရှုံးသွားကြတဲ့ အဖြစ်အပျက်တွေပါပဲ။ ရက်ကွန်းမြို့ရဲတပ်ဖွဲ့မှာတာဝန်ထမ်းဆောင်နေချိန်ကဆိုရင် Spencer Mansion ကြီးအတွင်းမှာ အသက်သေဆုံးခဲ့တဲ့ S.T.A.R.S အဖွဲ့သားတွေ၊ RE5 ဇာတ်ကြောင်းမှာဆိုရင် လျှို့ဝှက်စစ်ဆင်ရေးဆောင်ရွက်နေချိန်မှာ အသက်ကိုစတေးပြီး သူ့ကိုကယ်ခဲ့တဲ့ဂျေးလ်၊ RE6 မှာဆိုရင် ကိုယ့်ကိုယ်ကို တမင်တကာ စီဗိုင်းရပ်စ်နဲ့ထိုးသွင်းပြီး ခရစ်စ်ကို သူ့အသက်နဲ့လဲကယ်ခဲ့တဲ့ B.S.A.A အထူးစစ်ဆင်‌ရေးတပ်သား ပီရဲ၊ RE8 မှာဆိုရင် ရို့စ်၊ မီရာ၊ ခရစ်စ်နဲ့ ခွေးဝံပုလွေတပ်ဖွဲ့တစ်ခုလုံးကို ပျံသန်းလွတ်မြောက်စေခဲ့ပြီး ကိုယ့်ကိုယ်ကို အသေခံဗုံးခွဲသွားတဲ့အီသန် စသဖြင့် ခရစ်စ်ရဲ့အမိန့်ကိုနာခံရင်းဖြစ်စေ၊ လုပ်ဖော်ကိုင်ဖက်မိတ်ဆွေသူငယ်ချင်းဖြစ်စေ၊ တပည့်လက်အောက်ခံဖြစ်စေ၊ စိတ်ရင်းနဲ့ ချစ်ခင်ရင်းနှီးရသူဖြစ်စေ သူ့ပတ်ဝန်းကျင်ကလူတွေဟာ သူ့ကိုချန်ရစ်ခဲ့ပြီး တစ်နည်းမဟုတ်တစ်နည်း အသက်ဆုံးရှုံးသွားကြတတ်တဲ့ သဘာဝရှိပါတယ်။ ဒါတွေဟာ ခရစ်စ်ရဲ့ကြီးမားတဲ့ဇာတ်ကောင်စရိုက်ဖြစ်သလို အားသာချက်လို့လည်းဆိုနိုင်တဲ့ အားနည်းချက်လည်းဖြစ်နေပြန်ပါတယ်။ ဘာကြောင့်လည်းဆိုတော့ ဒီလိုအတိတ်ဆိုးတွေကြောင့်ပဲ ခရစ်စ်ဟာ လက်ရှိအနေအထားထိ ရောက်အောင်အားသွန်ခွန်စိုက် ကြိုးစားခဲ့တာြဖစ်သလို အဲလိုကြေကွဲစရာတွေကိုအသုံးချပြီး ခရစ်စ်ရဲ့ရန်သူတွေကလည်း သူ့နှလုံးသားကို လှည့်ဖြားဖို့ကြံစည်နိုင်ပါတယ်။

RE9 မှာဘာတွေဖြစ်လာမလဲတော့မသိသေးပေမယ့် RE8 မှာတော့ ခွေးဝံပုလွေတပ်ဖွဲ့ကဘယ်သူမှ ကျဆုံးခြင်း၊ ပျောက်ဆုံးခြင်းမရှိတဲ့အတွက် ကံကောင်းတဲ့နိမိတ်လို့တော့ မှတ်ယူနိုင်ပါတယ်။ RE8 ဂိမ်းအဆုံးမှာ B.S.A.A က မီရန်ဒါတို့ရွာကို ဇီဝတပ်သားတွေ စေလွှတ်ခဲ့တဲ့အတွက် ခရစ်စ်ကိုယ်တိုင် ရဟတ်ယာဥ်ပြန်လှည့်ခိုင်းပြီး  B.S.A.A ဥရောပရုံးချုပ်ကို ဆိုက်ဆိုက်မြိုက်မြိုက်ဦးတည်သွားပါြပီ။ ဘာတွေဆက်ဖြစ်လာမလဲဆိုတဲ့ ပွဲတွေကတော့ကြည့်လို့ကောင်းမှာအသေအချာပါပဲ။ ဒီတော့ ခရစ်စ်ရဲ့အနာဂတ်မှာ ဘယ်လိုအခက်အခဲတွေ တွေ့ကြုံရမလဲ? ခွေးဝံပုလွေတပ်ဖွဲ့ကရော ဘယ်လိုအရေးကြီးတဲ့အခန်းကဏ္ဏတွေမှာ ပါဝင်လာမလဲ? နောက်ကြုံတွေ့ရမယ့် ရန်သူကရော ဘယ်သူများဖြစ်နိုင်မလဲဆို ကျွန်တော်တို့ RE ချစ်သူများက စိတ်ရှည်ရှည်ထားပြီးစောင့်ကြည့်ရတော့မှာပါ။ ကဲ အားလုံးကို စိတ်ဝင်စားဖို့ကောင်းတဲ့ RE လောကထဲက ခွေးဝံပုလွေတပ်ဖွဲ့နဲ့ မိတ်ဆက်ပေးလိုက်ပါတယ်။ နောက်လာမယ့်စာစောင်တွေမှာလဲ ဘာတွေပါလာမလဲဆိုတာ စောင့်မျှော်ပေးရင်း ဂိမ်းချစ်သူများကိုတစ်ဖန်ပြန်ပြီး နှုတ်ဆက်ခဲ့ပါရစေ။ ဖတ်ရှုပေးသူများအားလုံးကို ‌ကျေးဇူးအထူးတင်လျက် ✍️

Yan

ကျွန်တော်သဘောကျတဲ့ဂိမ်းနာမည်များနဲ့ မြန်မာလိုပြန်ဆိုကြည့်တဲ့အခါ အထာပိုကျတဲ့အဓိပ္ပါယ်ရှိသောအမည်များ 🦚

ဂိမ်မာများကိုပြောပြချင်နေတဲ့အကြောင်းအရာတစ်ခုရှိပါတယ်။ အဲဒါက‌တော့ဂိမ်းနာမည်တွေနဲ့ပတ်သက်ပါတယ်၊ ဂိမ်းနာမည်တွေဆိုတာထက် အမိဘာသာစကားနဲ့သက်ဆိုင်ပြီး အနက်ထိထက်ဆင်းမယ်ဆိုရင် ကိုယ်သုံးစွဲနေတဲ့ဘာသာစကားအပေါ်  ကျွန်တော်တို့မြင်တဲ့အမြင်တစ်ခုလုံးနဲ့ တိုက်ရိုက်သက်ဆိုင်နေပါတယ်။ လူ့လောကထဲမှာနာမည်များဟာ အရေးပါသလို အနုပညာနယ်ပယ်ထဲကထုတ်ကုန်များဖြစ်ကြတဲ့ သီချင်း၊ ရုပ်ရှင်များလို ဗီဒီယိုဂိမ်းများမှာလည်း အမည်ပေးကင်ပွန်းတပ်ဆိုတာ လွန်စွာမှအရေးကြီးပါတယ်။ တကယ်တော့အမည်နာမဆိုတာ ကျွန်တော်တို့ဖြစ်တည်မှုနေရာတိုင်းမှာ နက်ရှိုင်းစွာပါဝင်ပတ်သက်နေတဲ့နာမ်စားအခေါ်အဝေါ်မျိုးပါ။ ဒီစာကိုဖတ်မိတဲ့ဂိမ်မာတိုင်းမှာ အမည်ကိုယ်စီရှိကြပါတယ်၊ အဲအမည်ဟာ မည်သူမည်ဝါကပေးခဲ့သည်ဖြစ်စေ ကိုယ့်ရဲ့ဖြစ်တည်မှုအလုံးစုံပါပဲ။ ကျောင်းသားကတ်မှာ၊ မှတ်ပုံတင်မှာ၊ ပတ်စပို့မှာ၊ ဘွဲ့လက်မှတ်မှာအစရှိသဖြင့် ကိုယ့်ကိုပေးခဲ့တဲ့နာမည်ဟာ ကိုယ်အိမ်ထောင်ပြုတဲ့အချိန်၊ သေဆုံးချိန်အထိ အကျုံးဝင်နေမှာဖြစ်ပါတယ်။ အမည်ဆိုတာ ကိုယ့်နိုင်ငံကတရားဝင်သုံးစွဲတဲ့ အမျိုးသားဘာသာစကားနဲ့ပေးထားတဲ့ နာမ်စားတစ်ခုပါ။ စာရေးသူဒီမှာ‌ ပထမဦးဆုံး ပြောြပချင်တဲ့အကြောင်းအရာကတော့ ကိုယ့်ဘာသာစကားအပေါ် ကျွန်တော်တို့မြင်တဲ့အမြင်ပါ။ ဂိမ်မာများဟာ လူငယ်များပီပီ အရာရာကိုစူးစမ်းချင်ကြတယ်၊ အသစ်အဆန်းဆိုရင် တွေ့မြင်ခံစားချင်ကြတယ်၊ လက်တည့်စမ်းချင်တယ်၊ ဂိမ်းများကိုစဆော့မိတာလဲ အဲလိုအခြေအနေမျိုးကစတာပါပဲ။ ဂိမ်မာများအဲသလိုတွေးမိလားတော့ မသိပါ၊ စာရေးသူကတော့ ဂိမ်းတစ်ခုရဲ့အနုပညာမြောက်မှု၊ ကောင်းမွန်မှု၊ လူသိများမှုဟာ သူတို့ရဲ့နာမည်နဲ့ တိုက်ရိုက်သက်ဆိုင်တယ်လို့ ယူဆထားပါတယ်။ ကျွန်တော်တို့ဟာ ဘာသာကွဲစကားလုံးတစ်လုံးကိုတွေ့ရင် ကိုယ့်အမိဘာသာစကားနဲ့ မသိစိတ်ကအလိုလျောက်ပြန်ဆိုပြီးမှ သူဆိုလိုတဲ့အဓိပ္ပါယ်ကိုနားလည်တတ်ကြတာပါ 🌎

ဥပမာဆိုရရင် Gears of War ဆိုတဲ့နာမည်ကိုပဲ ကြည့်ပါ။ မြန်မာလိုပြန်ဆိုမယ်ဆိုရင် စစ်လက်နက်၊ စစ်ပွဲကိရိယာ၊ စစ်အသုံးအဆောင်စသဖြင့် အဓိပ္ပါယ်ဖွင့်နိုင်ပြီး သူ့နာမည်ဟာ ဂိမ်းရဲ့တည်ဆောက်ထားပုံ၊ ဆော့ကစားပုံ၊ ဇာတ်ကောင်တွေနဲ့လည်း လွန်စွာကိုက်ညီတဲ့ဂိမ်းမျိုးပါ။ စာရေးသူသဘောကျရတဲ့ Resident Evil ဆိုရင်လည်း “အမြဲတမ်းရှိနေမယ့်မကောင်းဆိုးရွား” Evil Within ဆိုရင် “ကိန်းအောင်းနေသောမကောင်းဆိုးရွား”လို့ပြန်ဆိုနိုင်ပါတယ်။ မြန်မာလိုပြန်ဆိုရင် လွန်စွာမှ အထာကျသောအမည်ပေါင်းများစွာရှိပါသေးတယ်။ အဲဒါတွေကတော့

Resident Evil ဆိုရင် “အမြဲတမ်းရှိနေမယ့်မကောင်းဆိုးရွား”၊ “ထာဝရရှိနေမယ့်မကောင်းဆိုးရွား”
Evil Within ဆိုရင် “ကိန်းအောင်းနေသောမကောင်းဆိုးရွား”၊ “ရင်ထဲကမိစ္ဆာ”။
Final Fantasy ဆိုရင် “နောက်ဆုံးသောစိတ်ကူးယဥ်ခြင်း”၊ “အဆုံးသတ်စိတ်ကူး”။
Devil May Cry ဆိုရင် “နတ်ဆိုးတစ်ကောင်တောင် ငိုနိုင်တယ်”၊ “နတ်ဆိုးကျနိုင်တဲ့မျက်ရည်”။
Ghost of Tsushima ဆိုရင် “ဆူရှီးမားကျွန်းကတစ္ဆေ”။
God of War ဆိုရင် “စစ်ပွဲနတ်ဘုရား”။
Shadow of Mordor ဆိုရင် “မော်ဒေါရဲ့အရိပ်”။
Baldur’s Gate ဆိုရင် “ဘောလ်ဒါရဲ့ဂိတ်တံခါး”။
Legend of Zelda ဆိုရင် ဇယ်လ်ဒါရဲ့ဒဏ္ဏာရီ”။
Dishonored ဆိုရင် “ဂုဏ်သိက္ခာမဲ့သူ”၊ “ဂုဏ်သိက္ခာမရှိ”။
Grand Theft Auto ဆိုရင် “မဟာဆန်သောဖောက်ထွင်းမှု”၊ “ခိုးယူမှုအကြီးစား”။
Prince of Persia ဆိုရင် “ပါရှားပြည်ကမင်းသားတစ်ပါး”။
God Hand ဆိုရင် “ဘုရားသခင်ရဲ့လက်တစ်ဖက်”။
Counter Strike ဆိုရင် “တန်ပြန်တိုက်စစ်ဆင်ခြင်း”။
Assassin’s Creed ဆိုရင် “လူသတ်သမားလမ်းစဥ်”၊ “လျှို့ဝှက်သူတို့အယူဝါဒ”

စသဖြင့် မြန်မာဘာသာနဲ့ဆို ပိုမို‌လေးနက်တဲ့အဓိပ္ပါယ်ကိုဖော်ဆောင်တဲ့ဂိမ်းနာမည်တွေမှ အများကြီးပါ။ တစ်ခုရှိတာက အဓိပ္ပါယ်ကိုယ်စီရှိတဲ့သတ်ပုံတွေကိုစုပေါင်းပြီး နာမည်အဖြစ်ပေးထားကြတဲ့ ချွင်းချက်အမည်မျိုးရှိသလို လက်တင်အက္ခရာကိုပဲ စကားလုံးကွန့်မြူးတီထွင်ထားတဲ့ အမည်များလည်းရှိကြပါတယ်။ အဲဒါတွေကတော့ Metal Gear Solid တို့လို၊ Red Dead Redemption တို့လို၊ Fortnite တို့လို၊ The Witcher တို့လို၊ Skyrim တို့လို အမည်များပါ။ မြန်မာဘာသာအရဆိုရင် ဖြိုးဓန၊ မယ်ဇလီ၊ ကေသီပန်၊ ကမ္ဘောဇ၊ ဧရာဝတီတို့လို သီးခြားစကားလုံးမျိုးဖြစ်ပါတယ်။ အခုစာဖတ်နေချိန်မှာ ဂိမ်းနာမည်တွေကိုမြန်မာလိုပြန်ဆိုထားလို့ လှောင်ပြောင်ချင်စရာ၊ ဟာသတစ်ခုလိုမြင်ချင်စရာ၊ ပေါတောတောဆန်တယ်လို့ထင်မိတဲ့ အမြင်မျိုး စာဖတ်သူမှာဖြစ်ရင်ဖြစ်လာနိုင်ပါတယ်၊ ကျွန်တော်လိုချင်တာကလည်း ဒါပါပဲ။ ဒါဟာဘာကြောင့်လည်းဆိုတော့ ကိုယ့်ရဲ့အမိဘာသာစကားကို တွေ့မြင်နေကျမဟုတ်တဲ့နေရာမျိုးမှာ တွင်တွင်ကျယ်ကျယ်သုံးစွဲထားတာကို တွေ့ရလို့ဖြစ်ပြီး အင်္ဂလိပ်စကားလုံးတွေကို မြန်မာလိုပြန်ရင် မလန်းဘူး၊ မမိုက်ဘူး၊ အထာမကျဘူးဆိုတဲ့ မသိစိတ်၊ ကိန်းအောင်းနေတဲ့စိတ်က ကိုယ့်ကို အဲဒီလိုခံစားရစေတာဖြစ်ပါတယ်။ ဒါတွေဟာဘာကြောင့်ပါလဲ? တစ်ချက်လောက်ရှင်းပြပါရစေ 👨🏻‍🎨

နေရာတိုင်းက (အင်တာနက်ကရှာဖို့ခွင့်ပြုထားတဲ့) သတင်းအချက်အလက်တွေကို အလွယ်တကူသိရှိနိုင်တဲ့ခေတ်မျိုးမှာ ကျွန်တော်တို့နိုင်ငံသားတွေဟာ မြန်မာဘာသာစကားနဲ့ ကြားနေ၊ မြင်နေ၊ တွေ့နေရတဲ့သမားရိုးကျနေရာတွေထဲကမဟုတ်တဲ့ တခြားတစ်နေရာရာမှာ မြန်မာဘာသာစကားအသုံးပြုထားတာကိုတွေ့ရရင် အဆိုးအမြင်၊ ကဲ့ရဲ့တဲ့အမြင်၊ လှောင်ပြောင်ချင်တဲ့အမြင်နဲ့ ကြည့်ကြတာများပါတယ်။ အဲဒါဘာကိုဆိုလိုသလဲဆိုတော့ မြန်မာဘာသာနဲ့ နောက်ခံစကား‌ပြောထည့်ထားတဲ့ ရုပ်ရှင်ဇာတ်ကားတွေ၊ ဂျပန်ကာတွန်းကားတွေ၊ ဂိမ်းတွေတွေ့ရင် မျက်နှာရှုံ့ကြတယ်။ မြန်မာဘာသာစကားနဲ့ထည့်သွင်းရေးသားထားတဲ့ အယ်ပလီကေးရှင်းတွေ၊ ဆော့ဖ်ဝဲတွေ၊ လူမှုကွန်ယက်တွေသုံးရင် ခေတ်မမှီဘူးဆိုပြီးမြင်ကြတယ်။ ယုတ်ဆွအဆုံး လူမှုကွန်ယက်တွေမှာတောင် တစ်ယောက်နဲ့တစ်ယောက် ကွန်မန့်ပေး၊ စာပြန်တာကအစ မြန်မာဘာသာစကားနဲ့ဆိုရင် အောက်တယ်၊ ပညာမဲ့တယ်ဆိုတဲ့အတွေးအမြင်ဟာ လူတော်တော်များများမှာ ကိန်းအောင်းပြီးတည်ရှိနေပါတယ်။ တစ်နည်းအားဖြင့်ဆိုရရင် ကိုယ့်ရဲ့အမိဘာသာစကားဟာ အခြားဘာသာများနဲ့ယှဥ်ရင် ပိုမိုနိမ့်ကျတယ်၊ ခေတ်မမှီဘူး၊ လူအထင်သေးတယ်၊ တောဆန်တယ်လို့ယူဆနေတဲ့ မသိစိတ်ကသိမ်ငယ်ခြင်းမျိုးပဲဖြစ်ပါတယ် 😡

ဒီပြဿနာရဲ့အဖြေကိုရှာတဲ့အခါ ဒါဟာကျွန်တော်တို့ကိုအုပ်စိုးခဲ့တဲ့ အစိုးရအသီးသီးရဲ့ နိုင်ငံ၊ လူမျိုး၊ သမိုင်း၊ ဘာသာစကားကို ချစ်နှစ်သက်စေတဲ့ မျိုးချစ်စိတ်ထည့်သွင်းပေးမှုနဲ့ဆိုင်သလို ကမ္ဘာပေါ်မှာရပ်တည်နေတဲ့ မြန်မာနိုင်ငံရဲ့အနေအထား (စီးပွားရေး၊ လူမှုရေး၊ စစ်ရေး၊ နိုင်ငံရေး) နဲ့လည်း တိုက်ရိုက်သက်ဆိုင်ပါတယ်။ ဒ့ါအပြင် အင်တာနက်ကိုအတိုင်းအတာတစ်ခုထိ မထိန်းချုပ်ထားပဲ နိုင်ငံသားတွေကို ရေကာတာဖွင့်သလို ဖွင့်ပေးလိုက်တာနဲ့ အများကြီးဆက်နွယ်နေပါသေးတယ်။ သာသာစကားနဲ့ ပတ်သက်ပြီး အခုထိအမှတ်ရနေတဲ့ အတွေ့အကြုံတစ်ခုကို ဂိမ်မာများကို ပြန်ပြောပြချင်ပါတယ်။ အသက်နှစ်ဆယ်အရွယ်တုန်းက စာရေးသူအလုပ်လုပ်ကိုင်နေတဲ့ နိုင်ငံခြားရုံးက ဗီယက်နမ်နိုင်ငံသားဟာ သူ့ကွန်ပျူတာအသစ်ကို စားပွဲပေါ်မှာဖွင့်ဖွင့်ပြီးချင်း ပထမဦးဆုံးလုပ်တဲ့အရာဟာ ဘာလဲဆိုတော့ ဘာသာစကားဆက်တင်ဆီသွားပြီး ကွန်ပျူတာတစ်ခုလုံးကို သူ့အမိဘာသာအဖြစ်ပြောင်းလဲလိုက်တာပါပဲ။ ဒါဟာတကယ့်ကိုသေးငယ်တဲ့ဖြစ်ရပ်တစ်ခုဖြစ်ပေမယ့် စာရေးသူ အခုအချိန်ထိအမှတ်ရသလို အတုယူတဲ့လုပ်ရပ်တစ်ခုဖြစ်ပါတယ်။ ကျွန်တော်တို့ဟာ အာရှသားများဖြစ်တာကြောင့် အာရှနိုင်ငံတွေဖြစ်ကြတဲ့ တရုတ်၊ ကိုရီးယား၊ ဂျပန်၊ ဆော်ဒီ၊ အီရမ်၊ ယိုးဒယား၊ ဗီယက်နမ်တို့ကိုပဲ ဥပမာကြည့်ပါ၊ သူတို့နိုင်ငံအတွင်းက ဆိုင်းဘုတ်တွေ၊ သင်္ကေတတွေ၊ ဆိုင်ခန်းတွေမှာ လက်တင်အက္ခရာ (အင်္ဂလိပ်ဘာသာစကားအပြင် အခြားဥရောပဘာသာများရေးသားရာတွင် အသုံးပြုသည့်အက္ခရာ) ကိုလုံးဝအသုံးမပြုထားဘဲ ကိုယ့်အမျိုးသားအက္ခရာကိုသာ အသုံးအများဆုံးဖြစ်တယ်ဆိုတာ တွေ့မြင်ရမှာပါ။ အခြားအာရှစကားသင်ဖူးသူတွေဆို သိကြမှာပါ၊ ဂျပန်စကားမှာဆိုရင် handsome တို့ strawberry တို့လို အင်္ဂလိပ်စကားလုံးကို သူတို့အက္ခရာနဲ့စာလုံးပေါင်းထားတဲ့သတ်ပုံအဖြစ်ပဲ ပြောဆိုရပါတယ်။ မြန်မာနိုင်ငံမှာတော့ restaurant ပြောတာတောင် ကိုယ်ကအသံထွက်မမှန်ရင် မျက်စောင်းထိုးကြည့်သူ၊ ကဲ့ရဲ့ချင်သူတွေက ထုနဲ့ဒေးဖြစ်ပါတယ် 🤐

လူတွေဟာ တွေ့ပါကြုံပါများတဲ့အရာ၊ လူပြောများရာကို အမှန်ထင်သွားတတ်တဲ့သဘောသဘာဝရှိပါတယ်။ ဒါကြောင့် ကိုယ့်အမိဘာသာစကားကို နေရာတိုင်းမှာမမြင်တွေ့ရတဲ့အခါ၊ အင်တာနက်အသုံးများတဲ့အခါ၊ တိုင်းတစ်ပါးကယဥ်ကျေးမှုနဲ့ မီဒီယာအပိုင်းအစတွေဟာလူထုကို အချိန်ပြည့်ကြီးစိုးလာတဲ့အခါ၊ ကိုယ့်အမိဘာသာစကားကို ကိုယ့်နိုင်ငံသားများကပြောဆိုသုံးစွဲရတာ ရှက်လာတဲ့အခါ၊ နေရာတိုင်းလိုလိုမှာ ရှုတ်ချကဲ့ရဲ့ကြတဲ့အခါ အခုလိုဖြေရှင်းရခက်တဲ့ လူမျိုးရေးဆိုင်ရာ၊ ယဥ်ကျေးမှုဆိုင်ရာပြဿနာမျိုးဟာ ကိန်းအောင်းဖြစ်တည်လာတော့တာပါပဲ။ ကျွန်တော်ဟာဂိမ်းတွေကိုချစ်မြတ်နိုးလို့၊ ငယ်ဘဝကဗီဒီယိုဂိမ်းများနဲ့ ကြီးပြင်းခဲ့လို့၊ ဂိမ်းများနဲ့စိတ်အပန်းဖြေသူတစ်ယောက်မို့ ဂိမ်းဆောင်းပါးတွေကို ရေးသားနေတယ်ဆိုတာမှန်ပါတယ်၊ ဒါပေမယ့် ကျွန်တော့်ရဲ့ဂိမ်းစာစောင်များမှာ အတတ်နိုင်ဆုံးမြန်မာဘာသာစကားကိုပဲ သုံးစွဲရေးသားပါတယ်။ ဒီနိုင်ငံမြေမှာနေ၊ ဒီနိုင်ငံရေကို‌သောက်ပြီး ရှင်သန်ကြီးပြင်းလာသူစစ်စစ်တွေကမှ ကိုယ့်ဘာသာစကားကို မချစ်မမြတ်နိုး၊ ကိုယ်စားမပြုဘူးဆိုရင် မည်သူမည်ဝါကလာပြီး ကျွန်တော်တို့အစား ကိုယ့်အမိဘာသာစကားကို ထိန်းသိမ်းမှာပါလဲ? အဓွန့်ရှည်တည်မြဲအောင် လက်ဆင့်ကမ်းမှာပါလဲ? ကဲ တွေးစရာလေးတစ်ခုပါ။ အင်္ဂလိပ်လိုရင်တော့ Fruit for Thought ပေါ့ဗျာ။ ဂိမ်မာများလည်းအားလုံး အမိဘာသာစကားကိုမြတ်နိုးတတ်ကြပါစေ။ မြန်မာလိုပြန်ဆိုရင် ပိုထိရောက်တဲ့ဂိမ်းနာမည်အချို့နဲ့ ဘာသာစကားနောက်ကွယ်က နက်ရှိုင်းမှုအချို့ကိုရော‌နှောပြီး အတွေးအမြင်သစ်တစ်ခုရဖွယ် တင်ဆက်ပေးလိုက်ပါတယ်။ နောက်လာမယ့် ဂိမ်းဆောင်းပါးတွေမှာလည်း ဘယ်လိုဂိမ်းအကြောင်းအရာမျိုးကို ဖော်ပြပေးသွားမလဲဆိုတာ စောင့်မျှော်ပေးကြဖို့ သတင်းစကားပါးရင် ဒီစာစောင်ကိုအဆုံးသတ်လိုက်ပါတယ်။ ဖတ်ရှုပေးသူတစ်ယောက်ချင်းစီကို ကျေးဇူးအထူးတင်လျက် 🙌

Yan