ကျွန်တော်သဘောကျတဲ့ဂိမ်းနာမည်များနဲ့ မြန်မာလိုပြန်ဆိုကြည့်တဲ့အခါ အထာပိုကျတဲ့အဓိပ္ပါယ်ရှိသောအမည်များ 🦚

ဂိမ်မာများကိုပြောပြချင်နေတဲ့အကြောင်းအရာတစ်ခုရှိပါတယ်။ အဲဒါက‌တော့ဂိမ်းနာမည်တွေနဲ့ပတ်သက်ပါတယ်၊ ဂိမ်းနာမည်တွေဆိုတာထက် အမိဘာသာစကားနဲ့သက်ဆိုင်ပြီး အနက်ထိထက်ဆင်းမယ်ဆိုရင် ကိုယ်သုံးစွဲနေတဲ့ဘာသာစကားအပေါ်  ကျွန်တော်တို့မြင်တဲ့အမြင်တစ်ခုလုံးနဲ့ တိုက်ရိုက်သက်ဆိုင်နေပါတယ်။ လူ့လောကထဲမှာနာမည်များဟာ အရေးပါသလို အနုပညာနယ်ပယ်ထဲကထုတ်ကုန်များဖြစ်ကြတဲ့ သီချင်း၊ ရုပ်ရှင်များလို ဗီဒီယိုဂိမ်းများမှာလည်း အမည်ပေးကင်ပွန်းတပ်ဆိုတာ လွန်စွာမှအရေးကြီးပါတယ်။ တကယ်တော့အမည်နာမဆိုတာ ကျွန်တော်တို့ဖြစ်တည်မှုနေရာတိုင်းမှာ နက်ရှိုင်းစွာပါဝင်ပတ်သက်နေတဲ့နာမ်စားအခေါ်အဝေါ်မျိုးပါ။ ဒီစာကိုဖတ်မိတဲ့ဂိမ်မာတိုင်းမှာ အမည်ကိုယ်စီရှိကြပါတယ်၊ အဲအမည်ဟာ မည်သူမည်ဝါကပေးခဲ့သည်ဖြစ်စေ ကိုယ့်ရဲ့ဖြစ်တည်မှုအလုံးစုံပါပဲ။ ကျောင်းသားကတ်မှာ၊ မှတ်ပုံတင်မှာ၊ ပတ်စပို့မှာ၊ ဘွဲ့လက်မှတ်မှာအစရှိသဖြင့် ကိုယ့်ကိုပေးခဲ့တဲ့နာမည်ဟာ ကိုယ်အိမ်ထောင်ပြုတဲ့အချိန်၊ သေဆုံးချိန်အထိ အကျုံးဝင်နေမှာဖြစ်ပါတယ်။ အမည်ဆိုတာ ကိုယ့်နိုင်ငံကတရားဝင်သုံးစွဲတဲ့ အမျိုးသားဘာသာစကားနဲ့ပေးထားတဲ့ နာမ်စားတစ်ခုပါ။ စာရေးသူဒီမှာ‌ ပထမဦးဆုံး ပြောြပချင်တဲ့အကြောင်းအရာကတော့ ကိုယ့်ဘာသာစကားအပေါ် ကျွန်တော်တို့မြင်တဲ့အမြင်ပါ။ ဂိမ်မာများဟာ လူငယ်များပီပီ အရာရာကိုစူးစမ်းချင်ကြတယ်၊ အသစ်အဆန်းဆိုရင် တွေ့မြင်ခံစားချင်ကြတယ်၊ လက်တည့်စမ်းချင်တယ်၊ ဂိမ်းများကိုစဆော့မိတာလဲ အဲလိုအခြေအနေမျိုးကစတာပါပဲ။ ဂိမ်မာများအဲသလိုတွေးမိလားတော့ မသိပါ၊ စာရေးသူကတော့ ဂိမ်းတစ်ခုရဲ့အနုပညာမြောက်မှု၊ ကောင်းမွန်မှု၊ လူသိများမှုဟာ သူတို့ရဲ့နာမည်နဲ့ တိုက်ရိုက်သက်ဆိုင်တယ်လို့ ယူဆထားပါတယ်။ ကျွန်တော်တို့ဟာ ဘာသာကွဲစကားလုံးတစ်လုံးကိုတွေ့ရင် ကိုယ့်အမိဘာသာစကားနဲ့ မသိစိတ်ကအလိုလျောက်ပြန်ဆိုပြီးမှ သူဆိုလိုတဲ့အဓိပ္ပါယ်ကိုနားလည်တတ်ကြတာပါ 🌎

ဥပမာဆိုရရင် Gears of War ဆိုတဲ့နာမည်ကိုပဲ ကြည့်ပါ။ မြန်မာလိုပြန်ဆိုမယ်ဆိုရင် စစ်လက်နက်၊ စစ်ပွဲကိရိယာ၊ စစ်အသုံးအဆောင်စသဖြင့် အဓိပ္ပါယ်ဖွင့်နိုင်ပြီး သူ့နာမည်ဟာ ဂိမ်းရဲ့တည်ဆောက်ထားပုံ၊ ဆော့ကစားပုံ၊ ဇာတ်ကောင်တွေနဲ့လည်း လွန်စွာကိုက်ညီတဲ့ဂိမ်းမျိုးပါ။ စာရေးသူသဘောကျရတဲ့ Resident Evil ဆိုရင်လည်း “အမြဲတမ်းရှိနေမယ့်မကောင်းဆိုးရွား” Evil Within ဆိုရင် “ကိန်းအောင်းနေသောမကောင်းဆိုးရွား”လို့ပြန်ဆိုနိုင်ပါတယ်။ မြန်မာလိုပြန်ဆိုရင် လွန်စွာမှ အထာကျသောအမည်ပေါင်းများစွာရှိပါသေးတယ်။ အဲဒါတွေကတော့

Resident Evil ဆိုရင် “အမြဲတမ်းရှိနေမယ့်မကောင်းဆိုးရွား”၊ “ထာဝရရှိနေမယ့်မကောင်းဆိုးရွား”
Evil Within ဆိုရင် “ကိန်းအောင်းနေသောမကောင်းဆိုးရွား”၊ “ရင်ထဲကမိစ္ဆာ”။
Final Fantasy ဆိုရင် “နောက်ဆုံးသောစိတ်ကူးယဥ်ခြင်း”၊ “အဆုံးသတ်စိတ်ကူး”။
Devil May Cry ဆိုရင် “နတ်ဆိုးတစ်ကောင်တောင် ငိုနိုင်တယ်”၊ “နတ်ဆိုးကျနိုင်တဲ့မျက်ရည်”။
Ghost of Tsushima ဆိုရင် “ဆူရှီးမားကျွန်းကတစ္ဆေ”။
God of War ဆိုရင် “စစ်ပွဲနတ်ဘုရား”။
Shadow of Mordor ဆိုရင် “မော်ဒေါရဲ့အရိပ်”။
Baldur’s Gate ဆိုရင် “ဘောလ်ဒါရဲ့ဂိတ်တံခါး”။
Legend of Zelda ဆိုရင် ဇယ်လ်ဒါရဲ့ဒဏ္ဏာရီ”။
Dishonored ဆိုရင် “ဂုဏ်သိက္ခာမဲ့သူ”၊ “ဂုဏ်သိက္ခာမရှိ”။
Grand Theft Auto ဆိုရင် “မဟာဆန်သောဖောက်ထွင်းမှု”၊ “ခိုးယူမှုအကြီးစား”။
Prince of Persia ဆိုရင် “ပါရှားပြည်ကမင်းသားတစ်ပါး”။
God Hand ဆိုရင် “ဘုရားသခင်ရဲ့လက်တစ်ဖက်”။
Counter Strike ဆိုရင် “တန်ပြန်တိုက်စစ်ဆင်ခြင်း”။
Assassin’s Creed ဆိုရင် “လူသတ်သမားလမ်းစဥ်”၊ “လျှို့ဝှက်သူတို့အယူဝါဒ”

စသဖြင့် မြန်မာဘာသာနဲ့ဆို ပိုမို‌လေးနက်တဲ့အဓိပ္ပါယ်ကိုဖော်ဆောင်တဲ့ဂိမ်းနာမည်တွေမှ အများကြီးပါ။ တစ်ခုရှိတာက အဓိပ္ပါယ်ကိုယ်စီရှိတဲ့သတ်ပုံတွေကိုစုပေါင်းပြီး နာမည်အဖြစ်ပေးထားကြတဲ့ ချွင်းချက်အမည်မျိုးရှိသလို လက်တင်အက္ခရာကိုပဲ စကားလုံးကွန့်မြူးတီထွင်ထားတဲ့ အမည်များလည်းရှိကြပါတယ်။ အဲဒါတွေကတော့ Metal Gear Solid တို့လို၊ Red Dead Redemption တို့လို၊ Fortnite တို့လို၊ The Witcher တို့လို၊ Skyrim တို့လို အမည်များပါ။ မြန်မာဘာသာအရဆိုရင် ဖြိုးဓန၊ မယ်ဇလီ၊ ကေသီပန်၊ ကမ္ဘောဇ၊ ဧရာဝတီတို့လို သီးခြားစကားလုံးမျိုးဖြစ်ပါတယ်။ အခုစာဖတ်နေချိန်မှာ ဂိမ်းနာမည်တွေကိုမြန်မာလိုပြန်ဆိုထားလို့ လှောင်ပြောင်ချင်စရာ၊ ဟာသတစ်ခုလိုမြင်ချင်စရာ၊ ပေါတောတောဆန်တယ်လို့ထင်မိတဲ့ အမြင်မျိုး စာဖတ်သူမှာဖြစ်ရင်ဖြစ်လာနိုင်ပါတယ်၊ ကျွန်တော်လိုချင်တာကလည်း ဒါပါပဲ။ ဒါဟာဘာကြောင့်လည်းဆိုတော့ ကိုယ့်ရဲ့အမိဘာသာစကားကို တွေ့မြင်နေကျမဟုတ်တဲ့နေရာမျိုးမှာ တွင်တွင်ကျယ်ကျယ်သုံးစွဲထားတာကို တွေ့ရလို့ဖြစ်ပြီး အင်္ဂလိပ်စကားလုံးတွေကို မြန်မာလိုပြန်ရင် မလန်းဘူး၊ မမိုက်ဘူး၊ အထာမကျဘူးဆိုတဲ့ မသိစိတ်၊ ကိန်းအောင်းနေတဲ့စိတ်က ကိုယ့်ကို အဲဒီလိုခံစားရစေတာဖြစ်ပါတယ်။ ဒါတွေဟာဘာကြောင့်ပါလဲ? တစ်ချက်လောက်ရှင်းပြပါရစေ 👨🏻‍🎨

နေရာတိုင်းက (အင်တာနက်ကရှာဖို့ခွင့်ပြုထားတဲ့) သတင်းအချက်အလက်တွေကို အလွယ်တကူသိရှိနိုင်တဲ့ခေတ်မျိုးမှာ ကျွန်တော်တို့နိုင်ငံသားတွေဟာ မြန်မာဘာသာစကားနဲ့ ကြားနေ၊ မြင်နေ၊ တွေ့နေရတဲ့သမားရိုးကျနေရာတွေထဲကမဟုတ်တဲ့ တခြားတစ်နေရာရာမှာ မြန်မာဘာသာစကားအသုံးပြုထားတာကိုတွေ့ရရင် အဆိုးအမြင်၊ ကဲ့ရဲ့တဲ့အမြင်၊ လှောင်ပြောင်ချင်တဲ့အမြင်နဲ့ ကြည့်ကြတာများပါတယ်။ အဲဒါဘာကိုဆိုလိုသလဲဆိုတော့ မြန်မာဘာသာနဲ့ နောက်ခံစကား‌ပြောထည့်ထားတဲ့ ရုပ်ရှင်ဇာတ်ကားတွေ၊ ဂျပန်ကာတွန်းကားတွေ၊ ဂိမ်းတွေတွေ့ရင် မျက်နှာရှုံ့ကြတယ်။ မြန်မာဘာသာစကားနဲ့ထည့်သွင်းရေးသားထားတဲ့ အယ်ပလီကေးရှင်းတွေ၊ ဆော့ဖ်ဝဲတွေ၊ လူမှုကွန်ယက်တွေသုံးရင် ခေတ်မမှီဘူးဆိုပြီးမြင်ကြတယ်။ ယုတ်ဆွအဆုံး လူမှုကွန်ယက်တွေမှာတောင် တစ်ယောက်နဲ့တစ်ယောက် ကွန်မန့်ပေး၊ စာပြန်တာကအစ မြန်မာဘာသာစကားနဲ့ဆိုရင် အောက်တယ်၊ ပညာမဲ့တယ်ဆိုတဲ့အတွေးအမြင်ဟာ လူတော်တော်များများမှာ ကိန်းအောင်းပြီးတည်ရှိနေပါတယ်။ တစ်နည်းအားဖြင့်ဆိုရရင် ကိုယ့်ရဲ့အမိဘာသာစကားဟာ အခြားဘာသာများနဲ့ယှဥ်ရင် ပိုမိုနိမ့်ကျတယ်၊ ခေတ်မမှီဘူး၊ လူအထင်သေးတယ်၊ တောဆန်တယ်လို့ယူဆနေတဲ့ မသိစိတ်ကသိမ်ငယ်ခြင်းမျိုးပဲဖြစ်ပါတယ် 😡

ဒီပြဿနာရဲ့အဖြေကိုရှာတဲ့အခါ ဒါဟာကျွန်တော်တို့ကိုအုပ်စိုးခဲ့တဲ့ အစိုးရအသီးသီးရဲ့ နိုင်ငံ၊ လူမျိုး၊ သမိုင်း၊ ဘာသာစကားကို ချစ်နှစ်သက်စေတဲ့ မျိုးချစ်စိတ်ထည့်သွင်းပေးမှုနဲ့ဆိုင်သလို ကမ္ဘာပေါ်မှာရပ်တည်နေတဲ့ မြန်မာနိုင်ငံရဲ့အနေအထား (စီးပွားရေး၊ လူမှုရေး၊ စစ်ရေး၊ နိုင်ငံရေး) နဲ့လည်း တိုက်ရိုက်သက်ဆိုင်ပါတယ်။ ဒ့ါအပြင် အင်တာနက်ကိုအတိုင်းအတာတစ်ခုထိ မထိန်းချုပ်ထားပဲ နိုင်ငံသားတွေကို ရေကာတာဖွင့်သလို ဖွင့်ပေးလိုက်တာနဲ့ အများကြီးဆက်နွယ်နေပါသေးတယ်။ သာသာစကားနဲ့ ပတ်သက်ပြီး အခုထိအမှတ်ရနေတဲ့ အတွေ့အကြုံတစ်ခုကို ဂိမ်မာများကို ပြန်ပြောပြချင်ပါတယ်။ အသက်နှစ်ဆယ်အရွယ်တုန်းက စာရေးသူအလုပ်လုပ်ကိုင်နေတဲ့ နိုင်ငံခြားရုံးက ဗီယက်နမ်နိုင်ငံသားဟာ သူ့ကွန်ပျူတာအသစ်ကို စားပွဲပေါ်မှာဖွင့်ဖွင့်ပြီးချင်း ပထမဦးဆုံးလုပ်တဲ့အရာဟာ ဘာလဲဆိုတော့ ဘာသာစကားဆက်တင်ဆီသွားပြီး ကွန်ပျူတာတစ်ခုလုံးကို သူ့အမိဘာသာအဖြစ်ပြောင်းလဲလိုက်တာပါပဲ။ ဒါဟာတကယ့်ကိုသေးငယ်တဲ့ဖြစ်ရပ်တစ်ခုဖြစ်ပေမယ့် စာရေးသူ အခုအချိန်ထိအမှတ်ရသလို အတုယူတဲ့လုပ်ရပ်တစ်ခုဖြစ်ပါတယ်။ ကျွန်တော်တို့ဟာ အာရှသားများဖြစ်တာကြောင့် အာရှနိုင်ငံတွေဖြစ်ကြတဲ့ တရုတ်၊ ကိုရီးယား၊ ဂျပန်၊ ဆော်ဒီ၊ အီရမ်၊ ယိုးဒယား၊ ဗီယက်နမ်တို့ကိုပဲ ဥပမာကြည့်ပါ၊ သူတို့နိုင်ငံအတွင်းက ဆိုင်းဘုတ်တွေ၊ သင်္ကေတတွေ၊ ဆိုင်ခန်းတွေမှာ လက်တင်အက္ခရာ (အင်္ဂလိပ်ဘာသာစကားအပြင် အခြားဥရောပဘာသာများရေးသားရာတွင် အသုံးပြုသည့်အက္ခရာ) ကိုလုံးဝအသုံးမပြုထားဘဲ ကိုယ့်အမျိုးသားအက္ခရာကိုသာ အသုံးအများဆုံးဖြစ်တယ်ဆိုတာ တွေ့မြင်ရမှာပါ။ အခြားအာရှစကားသင်ဖူးသူတွေဆို သိကြမှာပါ၊ ဂျပန်စကားမှာဆိုရင် handsome တို့ strawberry တို့လို အင်္ဂလိပ်စကားလုံးကို သူတို့အက္ခရာနဲ့စာလုံးပေါင်းထားတဲ့သတ်ပုံအဖြစ်ပဲ ပြောဆိုရပါတယ်။ မြန်မာနိုင်ငံမှာတော့ restaurant ပြောတာတောင် ကိုယ်ကအသံထွက်မမှန်ရင် မျက်စောင်းထိုးကြည့်သူ၊ ကဲ့ရဲ့ချင်သူတွေက ထုနဲ့ဒေးဖြစ်ပါတယ် 🤐

လူတွေဟာ တွေ့ပါကြုံပါများတဲ့အရာ၊ လူပြောများရာကို အမှန်ထင်သွားတတ်တဲ့သဘောသဘာဝရှိပါတယ်။ ဒါကြောင့် ကိုယ့်အမိဘာသာစကားကို နေရာတိုင်းမှာမမြင်တွေ့ရတဲ့အခါ၊ အင်တာနက်အသုံးများတဲ့အခါ၊ တိုင်းတစ်ပါးကယဥ်ကျေးမှုနဲ့ မီဒီယာအပိုင်းအစတွေဟာလူထုကို အချိန်ပြည့်ကြီးစိုးလာတဲ့အခါ၊ ကိုယ့်အမိဘာသာစကားကို ကိုယ့်နိုင်ငံသားများကပြောဆိုသုံးစွဲရတာ ရှက်လာတဲ့အခါ၊ နေရာတိုင်းလိုလိုမှာ ရှုတ်ချကဲ့ရဲ့ကြတဲ့အခါ အခုလိုဖြေရှင်းရခက်တဲ့ လူမျိုးရေးဆိုင်ရာ၊ ယဥ်ကျေးမှုဆိုင်ရာပြဿနာမျိုးဟာ ကိန်းအောင်းဖြစ်တည်လာတော့တာပါပဲ။ ကျွန်တော်ဟာဂိမ်းတွေကိုချစ်မြတ်နိုးလို့၊ ငယ်ဘဝကဗီဒီယိုဂိမ်းများနဲ့ ကြီးပြင်းခဲ့လို့၊ ဂိမ်းများနဲ့စိတ်အပန်းဖြေသူတစ်ယောက်မို့ ဂိမ်းဆောင်းပါးတွေကို ရေးသားနေတယ်ဆိုတာမှန်ပါတယ်၊ ဒါပေမယ့် ကျွန်တော့်ရဲ့ဂိမ်းစာစောင်များမှာ အတတ်နိုင်ဆုံးမြန်မာဘာသာစကားကိုပဲ သုံးစွဲရေးသားပါတယ်။ ဒီနိုင်ငံမြေမှာနေ၊ ဒီနိုင်ငံရေကို‌သောက်ပြီး ရှင်သန်ကြီးပြင်းလာသူစစ်စစ်တွေကမှ ကိုယ့်ဘာသာစကားကို မချစ်မမြတ်နိုး၊ ကိုယ်စားမပြုဘူးဆိုရင် မည်သူမည်ဝါကလာပြီး ကျွန်တော်တို့အစား ကိုယ့်အမိဘာသာစကားကို ထိန်းသိမ်းမှာပါလဲ? အဓွန့်ရှည်တည်မြဲအောင် လက်ဆင့်ကမ်းမှာပါလဲ? ကဲ တွေးစရာလေးတစ်ခုပါ။ အင်္ဂလိပ်လိုရင်တော့ Fruit for Thought ပေါ့ဗျာ။ ဂိမ်မာများလည်းအားလုံး အမိဘာသာစကားကိုမြတ်နိုးတတ်ကြပါစေ။ မြန်မာလိုပြန်ဆိုရင် ပိုထိရောက်တဲ့ဂိမ်းနာမည်အချို့နဲ့ ဘာသာစကားနောက်ကွယ်က နက်ရှိုင်းမှုအချို့ကိုရော‌နှောပြီး အတွေးအမြင်သစ်တစ်ခုရဖွယ် တင်ဆက်ပေးလိုက်ပါတယ်။ နောက်လာမယ့် ဂိမ်းဆောင်းပါးတွေမှာလည်း ဘယ်လိုဂိမ်းအကြောင်းအရာမျိုးကို ဖော်ပြပေးသွားမလဲဆိုတာ စောင့်မျှော်ပေးကြဖို့ သတင်းစကားပါးရင် ဒီစာစောင်ကိုအဆုံးသတ်လိုက်ပါတယ်။ ဖတ်ရှုပေးသူတစ်ယောက်ချင်းစီကို ကျေးဇူးအထူးတင်လျက် 🙌

Yan

Resident Evil 2® နဲ့ 4® တို့ရဲ့ မတူကွဲပြားတဲ့ Horror ရသပုံစံနှစ်မျိုးနဲ့ Resident Evil စီးရီးရဲ့ စစ်မှန်တဲ့အမွေဆက်ခံသူဟာ ဘယ်သူလဲ? 🤲🏻

ကဲ အပါတ်စဥ်ဂိမ်းဆောင်းပါးနဲ့အတူ ပေ့ချ်ကနေ စာဖတ်သူဂိမ်းပရိသတ်များကို ပြန်လည်ကြိုဆိုလိုက်ပါတယ်။ ခေါင်းစဥ်မှာအားလုံးဖတ်ခဲ့ရတဲ့အတိုင်း ဒီတစ်ခေါက်မှာတော့ RE ပရိသတ်တွေ အကြိုက်ဆုံးဂိမ်းနှစ်ခုဖြစ်တဲ့ RE2 နဲ့ RE4 (Remake) အသီးသီးကပေးစွမ်းတဲ့ အကြောက်တရားကိုယ်စီကို အသေးစိတ်လေ့လာသွားမှာဖြစ်ပြီး အခြေခံတွေကစပြီးကွဲပြားသွားကြတဲ့ ဒီဂိမ်းနှစ်ခုမှာ ဘယ်သူက Resident Evil ဂိမ်းတွဲရဲ့စစ်မှန်တဲ့ အမွေဆက်ခံသူလဲဆိုတာ အဖြေရှာသွားမှာဖြစ်ပါတယ်။ တစ်လမှာလေးပို့စ်ပုံမှန်တင်ပေးနေတဲ့ကြားက RE ဂိမ်းလောကနဲ့ပတ်သက်တဲ့ စာစောင်တွေဟာ အခြားဂိမ်းများထက်ပိုပြီး ဖော်ပြခြင်းခံရတာကြောင့် ပေ့ချ်ကို RE’s Gamedia လို့ နာမည်ပြောင်းရမလိုပါပဲ။ စာရေးသူတင်မက ဖတ်ရှုသူများရဲ့ငယ်ဘဝတွေမှာ နာရီပေါင်းများစွာ နှစ်နှစ်ခြိုက်ခြိုက် ဆော့ကစားခဲ့ရတဲ့ Resident Evil ဂိမ်းတွဲအကြောင်းကို အခုလိုရေးသားမျှဝေရတဲ့အပေါ် ဂိမ်မာတစ်ယောက်အနေနဲ့ ကျေနပ်အားရမိသလို ဖတ်ရှုရတဲ့ဂိမ်မာများကလည်း သဘောတွေ့ကြလိမ့်မယ်လို့ မျှော်လင့်ပါတယ်။ ကဲ ဒါဆိုရင် RE2 နဲ့ RE4 တို့နှစ်ခုရဲ့ မဟာကွဲပြားခြားနားမှုများနဲ့ သူတို့ပေးစွမ်းတဲ့အကြောက်တရားကိုယ်စီကို ဒီဆောင်းပါးမှာ ကြည့်လိုက်ရကြရအောင်ဗျာ။ (ဒီပို့စ်မှာ ရည်ညွှန်းတဲ့ RE2 နဲ့ RE4 ဟာ အစကနေအဆုံးထိ အသစ်ပြန်လည်‌ရေးဆွဲဖန်တီးထားတဲ့ Remake နှစ်ခုကို ဆိုလိုခြင်းဖြစ်ပါတယ်) 

‌Horror ရသအောက်မှာရှိနေပေမယ့် ‌ဆော့ကစားဟန်အရ ကဏ္ဍသုံးပိုင်းခွဲခြားနိုင်တဲ့ Resident Evil ဂိမ်းများစွာ 📚

RE ဂိမ်းထဲစဝင်လိုက်ပြီဆိုတာနဲ့ ဘာတွေကြုံတွေ့ရမလဲဆိုတာ ယေဘုယျအားဖြင့် ကြိုတင်ခန့်မှန်းလို့ရပါတယ်။ ကျောချမ်းစရာဂိမ်းလောကထဲ ကိုယ်ရောက်နေမယ်၊ သွေးပျက်ဖို့ကောင်းတဲ့ဇာတ်ကြောင်းတွေ၊ ရုပ်ပျက်ဆင်းပျက်သန္ဓေပြောင်းသတ္တဝါတွေကြားမှာ အခန့်မသင့်ရင် မျက်စိမှောက်လမ်းလည်မယ်၊ ကျည်ဆံနဲ့သွေးကိုချွေတာရမယ်၊ ခြေလှမ်းတိုင်းကိုသတိရှိရှိလှမ်းရမယ် အစသဖြင့် Resident Evil ရဲ့ အဓိကကျောရိုးရသမပျက်‌အောင် ဆော့ကစားဟန်ကိုယ်စီနဲ့ ရေးဆွဲဖန်တီးထားကြတာဖြစ်ပါတယ်။ ၁၉၉၆ ကနေ အခု ၂၀၂၄ ခုနှစ်အထိ အရှိန်အဟုန်ကောင်းစွာ ရှေ့ဆက်သွားနေတဲ့ RE စီးရီးထဲက ထွက်ခဲ့သမျှဂိမ်းတွေကို သူတို့ပေးစွမ်းတဲ့ရသနဲ့ ဆော့ကစားဟန်အလိုက် တစ်ပိုင်းစီခွဲခြမ်းရမယ်ဆိုရင် ၁၉၉၀ နှောင်းပိုင်းထွက် တကယ့် OG တွေဖြစ်ကြတဲ့ RE 1, 2, 3 ကတစ်ပိုင်း၊ ၂၀၀၅ မှာထွက်ရှိခဲ့ပြီး ဂိမ်းလောကတစ်ခုလုံးကို မြေလှန်ပြောင်းလဲပေးခဲ့တဲ့ RE4 အပါအဝင် အက်ရှင်ပိုမိုရော‌နှောတဲ့ 5, 6 တို့က တစ်ပိုင်း၊ အကြောက်တရားကို ပြန်လည်ပုံဖော်အသက်သွင်းခဲ့တဲ့ ၂၀၁၇ ခုနှစ်ထွက် RE7 နဲ့ ‌စီးရီးနောက်ဆုံးထွက်ဂိမ်းဖြစ်တဲ့ RE8 တို့ကတစ်ပိုင်းဆိုပြီး အဓိကအပိုင်းသုံးပိုင်းခွဲခြမ်းနိုင်ပါတယ်။ အဲဒီထဲကမှ ဂိမ်မာများက ကိုယ်ရဲ့အသက်အရွယ်၊ ဗီဒီယိုဂိမ်းများနဲ့ စတင်ရင်းနှီးကျွမ်းဝင်ချိန်၊ ခေတ်ကာလအပေါ်မူတည်ပြီး မတူကွဲပြားတဲ့ခုနှစ်အလိုက် RE စီးရီးထဲကို ရောက်ရှိလာနိုင်ပါတယ်။ စာရေးသူဆိုရင် ၂၀၀၅ ခုနှစ်ထွက် RE4 (မူရင်း) နဲ့အတူ စီးရီးထဲစရောက်ခဲ့တာဖြစ်ပြီး နောက်ပိုင်းထွက်ခဲ့သမျှဂိမ်းတွေကို အလွတ်မခံပဲဆော့ကစားတော့တာပါပဲ။ ဒီလိုအပိုင်းသုံးပိုင်းခွဲခြားပြီးကြည့်မယ်ဆိုရင် ဘယ် RE ဂိမ်းက ဘယ်အမျိုးအစားထဲပါလဲဆိုတာ ပိုမိုမြင်သာတဲ့အတွက် ဂိမ်မာများအနေနဲ့ ကိုယ်ကိုယ်တိုင်ဟာ ဘယ်အပိုင်းမှာရှိမှန်း သိရှိနိုင်ပါတယ်။

RE ပရိသတ်အဟောင်း၊ အသစ်နှစ်မျိုးလုံးရဲ့ တစ်ခဲနက်အားပေးခြင်းကိုခံခဲ့ရတဲ့ Resident Evil 2 နဲ့ Resident Evil 4 Remake 🧬🧬

ဘယ်သူတွေဘာပဲ‌ပြောပြော ဂိမ်းလောကနဲ့ RE ပရိသတ်တွေကြားမှာ ငြင်းဆိုလို့မရတဲ့အမှန်တရားတစ်ခုရှိပါတယ်။ အဲဒါကတော့ RE စီးရီးမှာ လက်ရှိနာမည်အကြီးဆုံးနဲ့ လူကြိုက်အများဆုံးဂိမ်းနှစ်ခုဟာ RE2 နဲ့ RE4 တို့ဖြစ်တယ်ဆိုတာပါပဲ။ Remake တွေခေတ်မစားခင်ကတည်းကိုက အဲဒီမူရင်းဂိမ်းနှစ်ခုရဲ့ ပင်ကိုအရည်အသွေးနဲ့ ဆော့ကစားဟန်တို့ဟာ Resident Evil ရဲ့အဓိကကျောရိုးဖြစ်တဲ့ Horror ရသကို ပုံစံသစ်ကိုယ်စီနဲ့ ပုံဖော်ပြသနိုင်ခဲ့တာကြောင့် ဂိမ်မာများက အထူးကြိုက်နှစ်သက်ကြတာဖြစ်ပါတယ်။ နောက်ပြီး ၂၀၂၄ ခုနှစ်ရဲ့ ဂိမ်းရောင်းအားတွေကိုကြည့်ခြင်းအားဖြင့် RE2 နဲ့ RE4 တို့ကို ဂိမ်းလောကက ဘယ်လောက်တောင် အားပေးနေသလဲဆိုတာ အထင်းသားတွေ့မြင်နိုင်ပါတယ်။ ၂၀၁၉ ခုနှစ်မှာထွက်ရှိခဲ့တဲ့ RE2 ဟာဆိုရင် ၂၀၂၄ ခုနှစ်မှာတော့ ရောင်းအား ၁၃,၆၀၀,၀၀၀ (ဆယ့်သုံးသန်းခြောက်သိန်း) နဲ့ သက်တမ်း ၅ နှစ်အတွင်းမှာတင် တစ်သက်တာအရောင်းရဆုံး RE ဂိမ်းတွေရဲ့ နံပါတ်နှစ်နေရာမှာ ရပ်တည်နိုင်ခဲ့ပါပြီ။ ယမင်နှစ်ကမှထွက်ရှိခဲ့တဲ့ RE4 ကတော့ သက်တမ်းတစ်နှစ်အတွင်းမှာ ရောင်းအား ၆,၄၈၀,၀၀၀ (ခြောက်သန်းလေးသိန်းရှစ်သောင်း) နဲ့ အချိန်တစ်နှစ်အတွင်း အရောင်းရဆုံး RE ဂိမ်းတွေထဲက တစ်ခုဖြစ်လာခဲ့ပါတယ်။ စျေးကွက်အနေအထားကိုကြည့်ခြင်းအားဖြင့် Resident Evil နာမည်အောက်မှာရှိပေမယ့် မတူကွဲပြားတဲ့ Horror ဂိမ်းတွေကို အားပေးကြတဲ့သူတွေအသီးသီး သူ့ဟာနဲ့သူရှိနေဆဲပဲဆိုတာ သိရှိနိုင်ပါတယ်။

ရေးဆွဲဖန်တီးထားတဲ့ရည်ရွယ်ချက်နဲ့ ဆော့ကစားပုံမတူတဲ့ Resident Evil ဂိမ်းနှစ်ခုရဲ့ ယှဥ်ပြိုင်လွန်ဆွဲမှု ⚖️

RE2 အပြီးမှာ RE3, RE8 နဲ့ RE4 တို့ အသီးသီးထွက်ရှိခဲ့ကြတာမှန်ပေမယ့် RE ရဲ့အမွေကိုဆက်ခံသူဟာ RE 2 နဲ့ RE4 ဖြစ်တယ်လို့ ပရိသတ်အများစုကသတ်မှတ်ကြပါတယ်။ ဒါဟာဘာကြောင့်လဲဆိုတော့ ဂိမ်းနှစ်ခုလုံးရဲ့အဓိကဇာတ်ကောင်ဟာ လီယွန်ဖြစ်တာကတစ်ကြောင်း၊ လီယွန်ရဲ့ဇာတ်ကြောင်းအရ RE2 ပြီးရင် RE4 လာတာကတစ်ကြောင်း (ကြားထဲက Spin-off တွေမပါ) ဂိမ်းနှစ်ခုလုံးဟာ ဟိုးအရင်ငယ်ဘဝက ကြည်နူးဖို့ကောင်းတဲ့ အခိုက်အတန့်တွေကို ပြန်လည်အမှတ်ရစေတဲ့ ဂိမ်းတွေဖြစ်တာကတစ်ကြောင်း စတဲ့အကြောင်းကြောင်းကြောင့် ဒီဂိမ်းနှစ်ခုဟာ ခေတ်သစ် RE ဂိမ်းတွေထဲမှာ ပရိသတ်တွေအသည်းစွဲကြိုက်ရတဲ့ဂိမ်းနှစ်ခုလည်း ဖြစ်ပါတယ်။ ဒါပေမယ့် အားလုံးသတိထားမိရင် ထားမိကြမှာပါ၊ RE2 နဲ့ RE4 ဟာ လူကြိုက်များတာ၊ အဆော့များတာမှန်ပေမယ့် ဂိမ်း‌ဆော့ကစားဟန်နဲ့ အကြောက်တရားပေးစွမ်းတဲ့ပုံစံတွေက လုံးလုံးလျားလျား မတူညီတာကို တွေ့မြင်ရမှာဖြစ်ပါတယ်။ RE2 ဂိမ်းတစ်ခုလုံးကိုဖန်တီးထားတဲ့ပုံစံက ခြောက်ခြားဖို့ကောင်းတယ်၊ လှုပ်ရှားသွားလာပုံနှေးတယ်၊ ဓား (သို့) ဗုံးမပါရင် တန်ပြန်ခုခံလို့မရဘူး၊ Survival Horror ဆိုတဲ့အတိုင်း အကြောက်တရားထဲမှာ တကယ်အသက်ရှင်ရုန်းကန်ရမယ် ဒါ့အပြင် ကိုယ်ဟာ မူရင်းဂိမ်းကိုမဆော့ဖူးတဲ့ သူတစ်ယောက်ဆိုရင်တော့ စတဲ့အခန်းမှာကတည်းကလည်နေမှာဖြစ်ပြီး အင်တာနက်ရဲ့အကူအညီမပါပဲ ဂိမ်းတစ်ခုလုံးက လျှို့ဝှက်ချက်တွေအားလုံးကို‌ တွေ့ရှိဖို့ဆိုတာ တစ်ခေါက်တည်းဆော့ရုံနဲ့ လုံးဝမဖြစ်နိုင်ပါဘူး။ RE4 ကတော့ စဖွင့်ကတည်းက ရင်ခုန်ဖို့ကောင်းတယ်၊ အက်ရှင်နဲ့စတယ်၊‌ လှုပ်ရှားသွားလာရတာသွက်လက်တယ်၊ မြန်ဆန်တယ်၊ ဖြတ်ထိုးဉာဏ်ရှိရင်ရှိသလို parry နဲ့တစ်မျိုး၊ ကန်တာနဲ့တစ်မျိုး မိမိကိုယ်ကိုခုခံနိုင်တယ်၊ Survival Horror လိုစမ်းတဝါးဝါးနဲ့ ရှေ့ဆက်တိုးရမှာထက် ရန်သူတွေကို တိုက်ရိုက်ရင်ဆိုင်ရတဲ့ Action Horror ရသမျိုးဖြစ်တယ်။ ထင်ရှားတဲ့ အဓိကကွာခြားချက်ကတော့ RE2 မှာ ကိုယ်အသက်ရှင်ဖို့အတွက် လိုအပ်တဲ့ပစ္စည်းတွေကို ကိုယ်ကရှာဖွေရတာဖြစ်ပြီး RE4 မှာတော့ ရန်သူတွေကိုယ်တိုင်က သူတို့သေတဲ့အခါ ကျည်ဆံ (သို့) ကျည်မှုံ့တွေကျတာဖြစ်တဲ့အတွက် ရှင်သန်မှုထက် အက်ရှင်နဲ့တိုက်ခိုက်မှုကို အသားပေးထားတယ်ဆိုတာ တွေ့မြင်နိုင်ပါတယ်။

Resident Evil အဆန်ဆုံးဂိမ်းလို့ဆိုလိုက်ရင် ဘာတွေကို ပထမဦးဆုံးပြေးမြင်သလဲ? RE2 လား ဒါမှမဟုတ် RE4 လား? 🧟

ဒီမေးခွန်းဟာ အမေးခံရသူအပေါ်မူတည်ပြီး အဖြေပေါင်းများစွာရှိနေနိုင်ပါတယ်။ ကိုယ်စဆော့မိတဲ့ RE ဂိမ်းများရဲ့ခေတ်ကာလနဲ့အညီ ဂိမ်မာများရဲ့ အကြိုက်များဟာလည်းမတူညီကြပါဘူး။ RE ဆန်တဲ့ဂိမ်းဆိုတာ ပစ္စတိုတစ်လက်နဲ့ ရုန်းကန်ရမယ်၊ အကြောက်တရားရဲ့လှုံ့ဆော်မှုတွေကြားမှာ အထီးကျန်စွာ ရှင်သန်ရမယ်၊ ဖြတ်ထိုးဉာဏ်ကြွယ်ရမယ်၊ မျက်စိလည်လမ်းမှားမယ်၊ စက်ဆုပ်ဖို့ကောင်းတဲ့သမိုင်းကြောင်းတွေကို တစ်လွှာချင်းခွာချရမယ်၊ မထင်မှတ်ထားတာတွေကို မျှော်လင့်ရမယ်၊ ဒါတွေဟာ RE ဂိမ်းတစ်ခုလို့သတ်မှတ်နိုင်တဲ့ အခြေခံဒေါက်တိုင်တွေပါပဲ။ သို့ပေမယ့် RE ဆိုတဲ့နာမည်တစ်လုံးကို ထမ်းပိုးထားပြီး ဟိုးအနာဂတ်တစ်ချိန်ရဲ့ နောက်မျိုးဆက်အထိသယ်ဆောင်သွားပေးနိုင်မယ့် ဂိမ်းမျိုးကိုပြောပါဆိုရင်တော့ RE2 လို့သာ ဖြေမိမှာဖြစ်ပါတယ်။ ဘာကြောင့်လဲဆိုတော့ Resident Evil ရဲ့ဇာတ်ကြောင်းအရကိုက တီဗိုင်းရပ်စ်ပြန့်ပွားခြင်းနဲ့ ရက်ကွန်းမြို့ပျက်သုန်းခြင်းဟာ အရာအားလုံးကို‌ တစ်မဟုတ်ချင်း ပြောင်းလဲသွားစေတဲ့ ကြီးမားသောဖြစ်ရပ်တစ်ခုမို့လို့ပါပဲ။ ‌ဂျေးလ်ဆိုရင် တီဗိုင်းရပ်အကူးစက်ခံခဲ့ရပြီး ခန္ဓာကိုယ်ထဲမှာ ပိုးခုခံကာကွယ်နိုင်စွမ်းရသွားခဲ့လို့ နောက်ပိုင်းမှာ Wesker ရဲ့ထိန်းချုပ်ခြင်းကိုခံခဲ့ရတယ်။ လီယွန်နဲ့ခလယ်လ်ဆိုရင် တစ်ရက်လေးအတွင်းမှာ ဖြစ်ခဲ့တဲ့အရာတွေကြောင့် စိတ်ဒဏ်ရာအသီးသီးရခဲ့ပြီး သူတို့တစ်ဘဝလုံး ဇီဝလက်နက်တိုက်ဖျက်ရေးကို ရှေးရှုတဲ့အနာဂတ်လမ်းကိုယ်စီကို လျှောက်ခဲ့ကြတယ်။ အေဒါဆိုရင်လည်း ဂျီဗိုင်းရပ်နမူနာကို ခိုးယူနိုင်ခဲ့ပြီး မှောင်ခိုစျေးကွက်ထဲမှာ ရက်ကွန်းမြို့ရဲ့ အချက်အလက်တွေပြန့်နှံ့သွားခဲ့တယ်။ နောက်ပြီး ရက်ကွန်းတစ်မြို့လုံးကိုလက်ဝါးကြီးအုပ်ထားတဲ့ Umbrella ကုမ္ပဏီတစ်ခုလုံး ပြိုလဲသွားတဲ့အပြင် အနုမျူဗုံးကျဲခြင်းက လက်မတင်လေး လွတ်မြောက်သွားသူတွေအနေနဲ့ သူတို့ရဲ့စိတ်ဓာတ်၊ ခံယူချက်တွေအလိုက် အကောင်း၊ အဆိုးလုပ်ရပ်ကိုယ်စီကို လုပ်ဆောင်ခဲ့ကြပါတယ်။ 

အဲဒီလို စီးရီးတစ်ခုလုံးအတွက် လွန်စွာအရေးပါတဲ့ဖြစ်ရပ်တွေနဲ့ RE4 ကို ယှဥ်လိုက်တဲ့အခါ ဆော့လို့ပိုကောင်းတာ၊ ဂိမ်းကစားဟန်ကလတ်ဆတ်တာ၊ ပိုမိုက်ပိုကြမ်းတဲ့လီယွန်ကို တွေ့ရတာမှန်ပေမယ့် ဖြစ်စဥ်တွေနဲ့ အဆုံးသတ်ဟာ စီးရီးတစ်ခုလုံးအပေါ်မှာ ကြီးမားတဲ့သက်ရောက်မှုမရှိတာကို တွေ့မြင်ရမှာဖြစ်ပါတယ်။ လီယွန်ကယ်တင်ခဲ့တဲ့ အမေရိကန်သမ္မတရဲ့သမီး အက်ရှလီဟာလည်း နောက်ပိုင်းဂိမ်းတွေမှာ ပါဝင်ခြင်းမရှိခဲ့သလို RE4 ရဲ့အဓိကရန်သူဖြစ်တဲ့ လော့အလူမီနာဒိုစ် (Los Illuminatos) ဘာသာရေးဂိုဏ်းဟာလည်း တစ်ဂိမ်းထဲမှာပဲပါဝင်ခဲ့ပြီး ပြန်လည်ပေါ်ပေါက်လာခြင်းမရှိပဲ ပျောက်ဆုံးလို့သွားခဲ့ပါတယ်။ ပွင့်ပွင့်လင်းလင်းပြောရရင် RE4 ဂိမ်းဟာ စီးရီးမှာမရှိခဲ့ရင်တောင် Resident Evil ဇာတ်ကြောင်းတစ်ခုလုံးအနေနဲ့ ဘာလိုအပ်ချက်၊ ယိုယွင်းမှုမှမရှိဘဲ အသာလေးရှေ့ဆက်လို့ရတဲ့ အနေအထားဖြစ်ပါတယ်။ အခုပဲတွေးကြည့်ပါ၊ RE1, RE2, RE3 ပြီးရင် RE4 မပါပဲ RE5, RE6, RE7, RE8 ဆက်သွားလည်း ပြဿနာတစ်စုံတရာမရှိပဲ စီးရီးဟာလည်ပတ်မြဲလည်ပတ်နေမှာပါ။

Resident Evil ဆိုတဲ့နာမည်နဲ့ထိုက်တန်တဲ့ စစ်မှန်တဲ့အမွေဆက်ခံသူဆိုတာဘာလဲ အဓိပ္ပါယ်ဖွင့်ဆိုခြင်း ✍️

Resident Evil ဆိုတာ Survival Horror ဆိုတဲ့ဂိမ်းရသသစ်ကို မွေးထုတ်ပေးခဲ့တဲ့ တစ်ခုတည်းသော ဂိမ်းစီးရီးဖြစ်ပါတယ်။ “အမြဲတမ်းရှိနေမယ့်မကောင်းဆိုးရွား” ဆိုတဲ့အမည်နဲ့လိုက်အောင် RE ဂိမ်းမှန်ရင် နောက်ကျောမလုံတဲ့ခံစားချက်၊ မျှော်လင့်ချက်မဲ့ခြင်း၊ အရာအားလုံးအချိန်မရွေး ဆုံးရှုံးနိုင်တာကို သိရှိနားလည်ခြင်း၊ သေနတ်တစ်လက်ကျည်တစ်တောင့်နဲ့ မရမကရှင်သန်လိုတဲ့ စိတ်ဓာတ်ပြင်းပြမှုတို့အပြင် စမ်းစူးရှာဖွေမှု၊ ဇွဲမလျှော့မှု၊ အကြောက်တရားကိုအာခံနိုင်မှုတို့ လိုအပ်ပါတယ်။ ဒါတွေကို ခံစားရမှသာ Resident Evil ဂိမ်းစစ်မှန်တယ်လို့ သတ်မှတ်ကြသလို Horror မှာကိုမှ မတူကွဲပြားတဲ့ အကြောက်တရားကိုယ်စီ ပေးစွမ်းနေတဲ့ RE ဂိမ်းများစွာရှိပါတယ်။ အနက်ထိခွဲခြမ်းစိတ်ဖြာကြည့်တဲ့အခါ RE4 ဟာဇာတ်လမ်းဆိုတာထက် အားလုံးထဲကကွဲထွက်တဲ့ ဂိမ်းဆော့ကစားပုံကြောင့် နာမည်ကျော်ကြားခဲ့တဲ့ဂိမ်းကောင်းတစ်ခုဖြစ်ပါတယ်။ စပြီဆိုကတည်းက ကစားသူအနေနဲ့ ရွာ၊ ရဲတိုက်၊ ကျွန်း အစရှိတဲ့နေရာတွေကို ရင်တထိတ်ထိတ်နဲ့ တစ်ဆင့်ချင်းစီ ဆက်သွားရတာကြောင့် အကြောက်တရားနဲ့ အက်ရှင်ကိုဘက်မျှအောင် ပေးစွမ်းထားတဲ့ဂိမ်းလည်းဖြစ်ပါတယ်။ RE2 ကတော့ (RE1 ပြီးရင်) Resident Evil အဆန်ဆုံးဂိမ်းလို့ ပရိသတ်များက သတ်မှတ်ရတဲ့အထိ RE နာမည်ကို ပြန်လည်အသက်သွင်းပေးခဲ့တဲ့ဂိမ်းဖြစ်ပြီး အလားတူဂိမ်းမျိုးကိုသာ အရည်အသွေးပြည့်ဝစွာ ဆက်တိုက်ထုတ်နေခဲ့မယ်ဆိုရင် မကြာခင်မှာ ကြောက်စရာအကောင်းဆုံး Resident Evil ဂိမ်းပုံစံဟာ ပိုမိုနာမည်ကျော်ပြီး ဂိမ်းလောကတင်သာမက အနုပညာနယ်ပယ်အထိပါ ကျယ်ပြန့်လာမှာ အမှန်ပါပဲ။ အခုလက်ရှိအချိန်မှာ RE လို့ဆိုလိုက်ရင် ခေတ်အလိုက်၊ ခုနှစ်အလိုက် ဆော့ကစားဟန်တွေဟာ အမျိုးမျိုးကွဲပြားနေတာကြောင့် ဘယ်သူကစစ်မှန်တဲ့ အမွေဆက်ခံသူလည်းဆိုတာ အတိအကျပြောဖို့ခဲယဥ်းလှပါတယ်။ ဆက်ခံသူဆိုတာ အမွေအနှစ်တစ်ခုကို မပျောက်ပျက်အောင် ထိန်းသိမ်းထားနိုင်ရမယ်၊ မိမိမျိုးရိုးရဲ့အမည်နာမကို အဓွန့်ရှည်ပြန့်ပွားအောင် ဆောင်ရွက်နိုင်ရမယ်၊ ကိုယ့်ထုံးတမ်းယဥ်ကျေးမှုအငွေ့အသက်နဲ့ နောက်လာမယ့်မျိုးဆက်သစ်တွေကို လွှမ်းခြုံထားနိုင်ရမယ်၊ စတင်တည်ဆောက်ခဲ့သူတွေကို ထာဝရလေးစားဂုဏ်ပြုတဲ့ အထိမ်းအမှတ်တွေကို ကျင်းပပြုလုပ်နိုင်ရမယ်၊ ထိုက်တန်သူတွေကို အချိန်တန်ရင် ပြန်လည်လက်ဆင့်ကမ်းရမယ်။ ဒါတွေဟာ အမွေအနှစ်ဆက်ခံသူတွေမှာရှိတတ်ကြတဲ့ အရည်အသွေးတွေပါပဲ။ 

သေချာတာတစ်ခုကတော့ CAPCOM အနေနဲ့ ဖော်မျူလာပေါင်းများစွာလည်း ထုတ်သုံးခဲ့ပြီးပြီ၊ ဇာတ်ကောင်တွေလည်းစုံခဲ့ပြီ၊ ကမ္ဘာပေါ်ကနေရာအနှံ့အပြားမှာလည်း ဇာတ်အိမ်တည်ခဲ့ပြီးပြီဖြစ်တဲ့အတွက် နေရာတိုင်းကအကောင်းဆုံးတွေနဲ့ ပေါင်းစပ်ဖန်တီးထားတဲ့ ပြီးပြည့်စုံတဲ့ RE ဂိမ်းကိုထုတ်ပေးဖို့ သိပ်မလိုတော့ဘူးဆိုတာ ဂိမ်မာတွေက ကြိုတင်ခန့်မှန်းနိုင်ပါတယ်။ လက်ရှိအချိန်မှာတော့ ကျွန်တော်တို့လို စီးရီးရဲ့အသည်းစွဲပရိသတ်များအတွက် Resident Evil အမည်ကို လက်ဆင့်ကမ်းဆက်ခံသူဟာ RE2 ဖြစ်ပြီး ကမ္ဘာတစ်ဝှမ်းလုံးမှာရှိကြတဲ့ သာမန် RE ချစ်သူများအတွက်တော့ RE4 ဟာ ဆက်ခံသူလို့ သတ်မှတ်ကြပါတယ်။ ဒါပေမယ့် အနာဂတ်မှာထွက်ရှိလာမယ့် RE9 ဟာ ပရိသတ်နှစ်မျိုးလုံးရဲ့စိတ်ကိုပြောင်းလဲပေးပြီး Resident Evil နာမည်ကို သွေးသစ်လောင်းဆက်ခံမယ့် ဂိမ်းမျိုးဖြစ်လာမလားဆိုတာကတော့ ဂိမ်မာများ စောင့်ကြည့်ရဦးမှာပါ။ ကဲ ဒီဆောင်းပါးနဲ့အတူ Resident Evil ရဲ့စစ်မှန်တဲ့ဆက်ခံသူဟာ ဘယ်သူလဲဆိုတာ စာရေးသူရဲ့အတွေးအမြင်နဲ့အတူ ရေးသားတင်ဆက်လိုက်ပါတယ်။ အိုင်ဒီယာကြိုတင်ရှိနေပြီးသားမို့ လာမယ့်အပါတ်မှာ စိတ်ဝင်စားဖို့ကောင်းတဲ့ RE လောကထဲက အကြောင်းအရာတစ်ခုကို ဖော်ပြပေးသွားမှာဖြစ်ပါတယ်။ အချိန်မှန်စောင့်မျှော်နေပေးကြဖို့ ဂိမ်မာများကိုအသိပေးရင်း ဖတ်ရှုသူတစ်ယောက်ချင်းစီကို ကျေးဇူးအထူးတင်‌လျက်ပါ။ 

Yan

သိန်းသောင်းချီများပြားလှတဲ့ ပုရွက်ဆိတ်တွေထဲက တပ်သားတစ်ကောင်အဖြစ် ကိုယ့်အသိုက်ကိုလိုနီကို ထိန်းသိမ်းကာကွယ်တည်ဆောက်ရမယ့် ပုရွက်ဆိတ်တို့ရဲ့အင်ပါယာ Empire of Ants ဂိမ်း 🐜🐜

လွန်ခဲ့တဲ့ရက်အနည်းငယ်က ထုံးစံအတိုင်း YouTube ကြည့်နေရင်း လုံးဝအမှတ်မထင်ပဲ ကျွန်တော့်ရဲ့စိတ်အာရုံကို ဆွဲငင်ဖမ်းစားသွားတဲ့ အလွန်ထူးကဲတဲ့ဂိမ်းတစ်ခုရဲ့ ထွေလာတက်လာပါတယ်။ အဲဒါကတော့ ၂၀၂၄ နှောင်းပိုင်းမှာထွက်လာမယ်လို့ ကြေညာခဲ့တဲ့ ပုရွက်ဆိတ်တို့ရဲ့အင်ပါယာ (Empire of Ants) ဂိမ်းရဲ့ထွေလာပဲ ဖြစ်ပါတယ်။ အင်းဆက်ပိုးမွှားတွေကို စူးစမ်းလေ့လာတဲ့သဘာဝချန်နယ်ကို တီဗီမှာတိုက်ရိုက်ကြည့်နေရသလို ခံစားရစေတဲ့ နောက်ဆုံးပေါ်ဂရပ်ဖစ်ရုပ်ထွက်တွေနဲ့ ရေးဆွဲပုံဖော်ထားပြီး သာမန်ဗီဒီယိုဂိမ်းတွေနဲ့ လားလားမှမတူဘဲ ကွဲထွက်နေတဲ့ ဒီပုရွက်ဆိတ်ဂိမ်းဟာ စိတ်ဝင်စားဖို့ကောင်းတာတော့ အမှန်ပါပဲ။ ဆိတ်အဖြစ်၊ ငါးမန်းအဖြစ်၊ သားရဲတစ်ကောင်အဖြစ်စသဖြင့် သတ္တဝါတစ်ကောင်အနေနဲ့ ကိုယ်စိတ်ကြိုက်ဆော့ကစားလို့ရတဲ့ဂိမ်းတွေဟာ စျေးကွက်ထဲမှာ ဟိုးအရင်အချိန်တွေကတည်းက ထွက်ရှိခဲ့ပြီးဖြစ်တာကြောင့် ဒါဟာ ဆန်းပြားတဲ့ကိစ္စတစ်ခုမဟုတ်သော်ြငား ပုရွက်ဆိတ်တစ်ကောင်ရဲ့နေရာကဝင်ပြီး ပုရွက်ဆိတ်ကိစ္စတွေကို ဂိမ်းတစ်လျှောက်လုံးလုပ်ဆောင်ရမယ့် ဒီဂိမ်းကတော့ ဘာနဲ့မှကိုမတူတာ အမှန်ပါပဲ။ ပုရွက်ဆိတ်ဂိမ်းလို့ခေါ်‌‌ဝေါ်ရတာကို ပါးစပ်ဖျားမှာ တစ်မျိုးလေးထူးကဲနေပါတယ် 🍁

ပုရွက်ဆိတ်တို့ရဲ့အင်ပါယာ (Empire of Ants) လို့အမည်ရတဲ့ဒီဂိမ်းကို ပြင်သစ်နိုင်ငံအခြေစိုက်ဂိမ်းစတူဒီယိုဖြစ်တဲ့ Tower Five က ဖန်တီးရေးဆွဲပြီး Microids ကုမ္ပဏီက ထုတ်လုပ်ဖြန့်ချိသွားမှာဖြစ်ပါတယ်။ မရေမတွက်နိုင်လောက်အောင် အကောင်ရေသိန်းသောင်းချီများပြားလှတဲ့ ပုရွက်ဆိတ်တွေထဲကမှ ဂိမ်မာများဟာ ပုရွက်ဆိတ်နံပါတ် ၁၀၃,၆၈၃ မြောက်နေရာကနေ ကိုယ့်ရဲ့အသိုက်အမြုံ၊ ကိုလိုနီကို တစ်ဆင့်ချင်းစီတည်ဆောက်သွားပြီး ကျရောက်လာမယ့်အန္တရာယ်မျိုးစုံကနေ ကာကွယ်စောင့်ရှောက်ရမှာဖြစ်တယ်လို့ သိရပါတယ်။ လူသားတွေအမြင်နဲ့ကြည့်ရင်သာ ပုရွက်ဆိတ်လေးတွေဟာ လွန်စွာမှသေးငယ်လှပေမယ့် သူတို့တွေမှာလည်း သီးသန့်ဘဝနေထိုင်မှုပုံစံ၊ အဖွဲ့အစည်းလိုက်လှုပ်ရှားပုံ၊ အစာရှာထွက်ပုံ၊ ရန်သူမိတ်ဆွေခွဲခြားသတ်မှတ်ပုံတွေ အစရှိသဖြင့် စနစ်တကျဖွဲ့စည်းထားတဲ့ သွားလာပြုမူဆက်ဆံပုံတွေရှိကြပါတယ်။ ပုရွက်ဆိတ်တို့ရဲ့အင်ပါယာဆိုတဲ့ နာမည်အတိုင်းပဲ ဒီဂိမ်းမှာ အင်ပါယာတစ်ခုကိုအောက်ခြေကနေ တစ်ဆင့်ချင်းစတင်တည်ထောင်ရမှာြဖစ်ပြီး အခြားသောအင်းဆက်အမျိုးအစားများ၊ ပိုးကောင်းများ၊ တိရစ္ဆာန်များအပြင် ရင်သပ်ရှုမောဖွယ်ကောင်းတဲ့နေရာများစွာကိုလည်း ပုရွက်ဆိတ်တစ်ကောင်အဖြစ် တွေ့မြင်ခံစားရမှာဖြစ်ပါတယ်။ ဂိမ်းအမျိုးအစားကိုတော့ ဗျူဟာဆွဲပြီးဆော့ရတဲ့ဂိမ်းအဖြစ် သတ်မှတ်ထားပေမယ့် တိုက်ခိုက်ပုံ၊ ဇာတ်ကြောင်းရှေ့ဆက်ပုံ၊ အဆင့်တက်ပုံအစရှိတဲ့ ဂိမ်းကစားပုံအတိအကျကိုတော့ အခုထိမသိရသေးပါဘူး 🗺️

ကျွန်တော်တို့ငယ်စဥ်ကလေးဘဝတုန်းက ပျားကလေးများရဲ့ဘဝကို ပုံဖော်ရေးဆွဲထားတဲ့ ကာတွန်းကားကိုကြည့်ခဲ့ဖူးသလို ပုရွက်ဆိတ်လေးများ၊ ငါးကလေးများရဲ့ရုန်းကန်လှုပ်ရှားမှုကို အတိုင်းသားမြင်တွေ့ခဲ့ရတဲ့ ကာတွန်းကားများကိုလည်း ကြည့်ခဲ့ရဖူးပါတယ်။ အဲဒီအချိန်တုန်းက ငါသာအဲလိုအင်းဆက်လေးတစ်ကောင်၊ တိရစ္ဆာန်လေးတစ်ကောင်များဖြစ်ခဲ့ရင် ဒီလိုအန္တရာယ်များတဲ့ပတ်ဝန်းကျင်မှာ ဘယ်လိုအသက်ရှင်မလဲဆိုတဲ့အတွေးတော့ ဂိမ်မာတိုင်းရခဲ့ကြဖူးမှာပါ၊ အခုဒီပုရွက်ဆိတ်တို့ရဲ့အင်ပါယာဂိမ်းဟာ အဲလိုငယ်စဥ်ဘဝကအတွေးတွေကို လက်တွေ့ဖြစ်လာအောင် လုပ်ပေးနိုင်မယ့်ဂိမ်းတစ်ခုပါပဲ။ ဂိမ်းဇာတ်ကြောင်းပုံစံ၊ တည်ဆောက်ထားတဲ့ဂိမ်းလောက၊ နောက်ခံဇာတ်လမ်း အစရှိတဲ့အချက်အလက်တွေကိုတော့ များများစားစားမသိရသေးပေမယ့် အသစ်ထွက်လာမယ့်ဂိမ်းတွေထဲကမှ ဒီဂိမ်းဟာ ကျွန်တော်စိတ်ဝင်စားမိတဲ့ဂိမ်းတွေထဲက တစ်ခုလို့‌‌ပြောရင်လည်းမမှားပါဘူး 🔜

ကဲ ဒီတော့ပုရွက်ဆိတ်တို့ရဲ့အင်ပါယာဂိမ်းမှာ ဘယ်လိုအံ့အားသင့်တဲ့အရာတွေပါနေမလဲ? ရုပ်ထွက်ကရောဘယ်လောက်ထိကောင်းမလဲ? ပုရွက်ဆိတ်တစ်ကောင်လို ဂိမ်းတစ်လျှောက်လုံး အပြည့်အဝခံစားရစေမလား? ပုရွက်ဆိတ်နံပါတ် ၁၀၃,၆၈၃ မြောက်နေရာက ဘယ်လိုဆော့ကစားရမလဲ? အစရှိတာတွေကို အတိအကျသိရဖို့တော့ ဂိမ်းထွက်လာတဲ့အချိန်ထိစောင့်မျှော်ရဦးမှာပါ။ လတ်တလောသိလိုက်ရတဲ့ ဂိမ်းသစ်တစ်ခုအကြောင်းကို စာဖတ်သူများသိရှိစေဖို့ အခုလိုရေးသားတင်ပြလိုက်ရပါတယ်။ နောက်လာမယ့်အပါတ်များမှာလည်း လက်ရှိဂိမ်းလောကထဲက အကြောင်းအရာများ၊ နောက်ဆုံးရဂိမ်းသတင်းများ၊ ဂိမ်းသမိုင်းကြောင်းများကို စိတ်ဝင်စားဖွယ်ရေးသားတင်ဆက်ပေးသွားမှာမို့ စောင့်မျှော်နေပေးကြဖို့ ‌‌ပြောကြားရင်း ပုရွက်ဆိတ်တို့ရဲ့အင်ပါယာဂိမ်းစာစောင်ကို ဒီမှာအဆုံးသတ်လိုက်ရပါတယ်။ ဂိမ်းရဲ့ရုပ်ထွက်နဲ့ပုံစံကို တစ်စေ့တစောင်းတွေ့မြင်သိရှိချင်သူများအဖို့ ရိုက်ယူထားတဲ့ ဂိမ်းတွင်းဓာတ်ပုံများကို ဒီကနေ အမြည်းအဖြစ်ပြန်လည်မျှဝေလိုက်ပါတယ်။   👆

Yan

Red Dead Redemption 2 ကဖွင့်ဆိုတဲ့သစ္စာတရားနဲ့ လူမှုဆက်ဆံရေး၊ လူ့အဖွဲ့အစည်း၊ တစ်ဦးနဲ့တစ်ဦးကြားမှာ သစ္စာရှိမှုဟာ ဘယ်လောက်တောင်အရေးကြီးသလဲ? 🐎🐎

Red Dead Redemption လို့ပြောလိုက်ရင် ဂိမ်မာအတော်များများက တစ်စွန်းတစတော့ကြားဖူးကြမှာပါ။ ဥပဒေမဲ့ပြီး ကြမ်းတမ်းခက်ထန်လှတဲ့ အမေရိကန်အနောက်ပိုင်း (Wild West) ကကောင်းဘွိုင်တွေနဲ့ တစစဖွံ့ဖြိုးတိုးတက်လာတဲ့လူ့အဖွဲ့အစည်း၊ ယဥ်ကျေးမှုတို့ အားပြိုင်လွန်ဆွဲကြတဲ့ ဂိမ်းတစ်ခုဖြစ်ပြီး ပေးစွမ်းတဲ့ရသထူးကဲတာကြောင့် အနောက်တိုင်းမှာသာမက တစ်ကမ္ဘာလုံးမှာပါ နာမည်တစ်လုံးနဲ့ကျော်ကြားတဲ့ Rockstar ရဲ့ဂိမ်းတွဲတစ်ခုဖြစ်ပါတယ်။ ပွင့်ပွင့်လင်းလင်းပြောရရင် Red Dead Redemption စီးရီးမှာ ဒုတိယမြောက် (တကယ်တော့ တတိယမြောက်) ဂိမ်းကို ၂၀၁၉ ခုနှစ်မှ ကိုယ်တိုင်ကိုယ်ကျ စတင်ဆော့ကစားခဲ့ဖူးပြီး ကျွန်တော်ကြိုက်အနှစ်သက်ရဆုံံးဂိမ်းတွေထဲက တစ်ခုဖြစ်သွားခဲ့တာဖြစ်ပါတယ်။ စာရေးသူတစ်ယောက်အနေနဲ့ Red Dead Redemption စီးရီးဟာ ဒရာမာအထူးအသားပေး ဂိမ်းတွဲတစ်ခုဖြစ်တယ်လို့မှတ်ယူရမှာဖြစ်ပြီး အက်ရှင်၊ သမိုင်း၊ စူးစမ်းလေ့လာမှုနဲ့ တစ်ခါတစ်ရံမှာစိတ်ခြောက်ခြားစေတဲ့ လျှို့ဝှက်ချက်တွေပါတဲ့ ဂိမ်းကစားပုံနဲ့ ရောယှက်လိုက်တဲ့အခါမှာ အဘက်ဘက်ကပြီးပြည့်စုံတဲ့ဂိမ်းတစ်ခု ဖြစ်သွားတော့တာပါပဲ။

အခုဒီဆောင်းပါးမှာပြောချင်တာကတော့ RDR ဖြစ်တည်လာပုံနဲ့ သမိုင်းကြောင်းတွေမဟုတ်ပါဘူး၊ Red Dead Redemption 2 မှာမီးမောင်းထိုးပြထားတဲ့ သစ္စာတရားနဲ့ သစ္စာတရားဟာ လူ့ပတ်ဝန်းကျင်မှာ ဘယ်လောက်အရေးပါပုံ၊ အရာအားလုံးနဲ့ဆက်နွယ်နေပုံ၊ ပျက်စီးမှုနဲ့ ကြွယ်ဝမှုနှစ်ခုလုံးအတွက် တာဝန်ရှိနိုင်ပုံ အစရှိတာတွေကို စာရေးသူရဲ့ အတွေးအမြင်နဲ့ ရော‌‌နှောတင်ဆက်ပေးသွားမှာဖြစ်ပါတယ်။ ဒီအကြောင်းအရာကိုရေးသားဖို့ ကျွန်တော်ပြင်ဆင်လာခဲ့တာဟာ Red Dead 2 ကိုဒုတိယအကြိမ် ပြီးစီးအောင်ဆော့ပြီးတဲ့အချိန်ကတည်းကပါပဲ။ ကဲ အခုလောက်ဆိုရင်ခေါင်းစဥ်ကိုလည်း ဖတ်ပြီးလောက်ပြီထင်ပါတယ်၊ ဒါကြောင့်မို့ Red Dead ပရိသတ်များ‌ရော ဂိမ်မာများပါ အဆင်သင့်ဖြစ်ပြီဆိုစလိုက်ကြရစို့ဗျာ။ အမှန်တော့ ဒီပို့စ်ကိုအရင်အပါတ်ကတည်းကတင်ပေးဖို့ ရည်ရွယ်ချက်ရှိပေမယ့် ကြားထဲမှာ ခရီးတစ်ခုထွက်ဖြစ်လိုက်တဲ့အတွက် ဒီနေ့မှသာတင်ဆက်ပေးရခြင်းဖြစ်ပါတယ်။ တစ်ပါတ်တစ်ပုဒ်နှုန်းဖြင့်သာ ‌ရေးသားဖြစ်နေတဲ့ဂိမ်းစာစောင်တွေကို ပေ့ချ်ကနေတင်လိုက်တိုင်းမှာ ဖတ်ရှုအားပေးကြတဲ့အတွက်လည်း ဂိမ်မာများကိုကျေးဇူးတင်ပါတယ်။ 

RRed Dead Redemption 2 ရဲ့ဇာတ်ကြောင်းပုံစံနဲ့ ဒတ်ချ်ဗန်ဒါလင်ဂိုဏ်းတည်ဆောက်ထားပုံ

အားလုံးပဲမှတ်မိကြမယ်ထင်ပါတယ်၊ RDR2 ဇာတ်ကြောင်းရဲ့အရေးကြီးအခန်းကဏ္ဏက ပါဝင်နေတဲ့ ဒတ်ချ်ရဲ့ဂိုဏ်းမှာ ‌ယောကျ်ား၊ မိန်းမ၊ လူဖြူ၊ လူမည်းအစရှိသဖြင့် အတိတ်မျိုးစုံ၊ ခံယူချက်မျိုးစုံနဲ့ အဖွဲ့ဝင်များစွာရှိကြပါတယ်။ အဲဒီထဲမှာမှ သတိထားပြီးကြည့်မယ်ဆိုရင် အသွင်တူ၊ လူတူသူများနဲ့ အတွေးအမြင်တူ၊ အလုပ်အကိုင်တူသူများဟာ ဂိုဏ်းထဲမှာတစ်စုစီ စုဖွဲ့နေတာကိုတွေ့မြင်ရမှာဖြစ်ပါတယ်။ အဖွဲ့ခေါင်းဆောင်ဖြစ်တဲ့ဒတ်ချ်အပါအ၀င် လွန်ခဲ့သောနှစ်ပေါင်းနှစ်ဆယ်ကျော်ကတည်းက ဂိုဏ်းရဲ့ပထမဦးဆုံးအဖွဲ့ဝင် များဖြစ်ကြတဲ့ ဒတ်ချ်၊ ဟိုဇေယာ၊ အာသာ (နောက်ပိုင်းဂျွန်အပါအဝင်) တို့ကတစ်တွဲဖြစ်ပြီး သူတို့သုံးယောက်ဟာ အကြံအစည်များ၊ အငြင်းပွားမှုများနဲ့ ဂိုဏ်းနဲ့သက်ဆိုင်တဲ့ကိစ္စရပ်မှန်သမျှကို ခေါင်းချင်းဆိုင်ပြီး အချင်းချင်းတိုင်ပင်ကြပါတယ်။ အဲဒီထဲမှာ အာသာနဲ့ဂျွန်ထက် အမိန့်အာဏာမှာတစ်ဆင့်နိမ့်တဲ့ ဂိုဏ်းရဲ့အမာခံသေနတ်များဖြစ်တဲ့ Bill, Micah တို့ကတစ်တွဲ။ မိန်းမသားများဖြစ်တဲ့ Mary Beth, Karen နဲ့ Tily တို့ကတစ်တွဲ။ လူငယ်ကောင်းဘွိုင်များဖြစ်တဲ့ Lenny, Sean တို့ကတစ်တွဲ။ Lone Wolf များလို ဂိုဏ်းအပေါ်မှာသစ္စာရှိပြီး အခြားသောအဖွဲ့ဝင်များနဲ့ ရောရောနှောနှော နေလေ့မရှိတဲ့ Charles, Javier (နောက်ပိုင်း Sadie အပါအဝင်) တို့လိုသူများကသပ်သပ်ဖြစ်ပြီး ဂိုဏ်းစခန်းအတွင်းမှာသာ ချက်ပြုတ်ရေး၊ စီစစ်ရေးနဲ့ ဝေယျာဝစ္စလုပ်သူများဖြစ်တဲ့ Miss Grimshaw, Pearson နဲ့ Uncles တို့ကတစ်တွဲဖြစ်ပါတယ်။ ညဖက်အချိန်သူတို့အိပ်တဲ့နေရာမှာတောင် ဒီအချက်ဟာထင်ဟပ်နေပါတယ်၊ အာသာရဲ့အိပ်ရာဟာ Horseshoe Overlook မှာကတည်းက ဒတ်ချ်နဲ့အနီးစပ်ဆုံးမှာရှိပြီး ဂျွန်ဟာသူ့မိန်းမဖြစ်သူ Abigail တို့နဲ့နီးပါတယ်။ အဖွဲ့သားများအားလုံးဟာ ဂိုဏ်းအပေါ်သစ္စာရှိကြပေမယ့် ရှိတဲ့အတိုင်းအတာတွေကတော့ မတူညီကြပဲ ပုဂ္ဂိုလ်စွဲသစ္စာများလည်းရှိနေတာကို ဂိမ်းရှေ့ဆက်သွားတာနဲ့အမျှ တဖြည်းဖြည်းတွေ့ရမှာဖြစ်ပါတယ်။

ဒတ်ချ်ရဲ့မဟာအကြံ၊ ခံယူချက်၊ ဇာတ်ကောင်စရိုက်နဲ့ သူပြောတဲ့သစ္စာတရား

Guarma ကပြန်လာပြီးကတည်းက အရာအားလုံးကို သံသယမျက်စိနဲ့ကြည့်ပြီးပြောတဲ့ ဒတ်ချ်ရဲ့စကားတွေကို ဂိမ်မာအများစုက မှတ်မိချင်မှမှတ်မိကြမှာဖြစ်ပေမယ့် ဒတ်ချ်ရဲ့ဇာတ်ကောင်စရိုက်ကို ထင်ဟပ်စေတဲ့ ဒီစကားနှစ်ခွန်းကိုတော့ စွဲစွဲမြဲမြဲအမှတ်ရနေကြမယ်ဆိုတာ သေချာပါတယ်။ အဲစကားနှစ်ခွန်းကတော့ “ငါ့မှာအမြဲအကြံရှိတယ်ဆိုတာရယ်၊ သူ့အပေါ်ယုံကြည်ချက်နဲ့ သစ္စာရှိနေဖို့ဆိုတာရယ်” ပါပဲ။ စာရေးသူရဲ့သုံးသပ်ချက်အရ ဒတ်ချ်ရဲ့မဟာအကြံဟာ ပိုက်ဆံအများကြီးရှာဖို့လည်းမဟုတ်သလို ဂိုဏ်းတစ်ခုလုံးကို သြစတေးလျှမှာ လွှဲပြောင်းအခြေချပြီး သာယာအေးချမ်းတဲ့ ဘဝသစ်တစ်ခုထူထောင်ဖို့လည်းမဟုတ်ပါဘူး (သူ့မှာအဲလိုအတွေးရှိနိုင်သော်ငြား ဒါဟာသူ့ရဲ့အဓိက priority မဟုတ်ခဲ့ပါဘူး) ဒတ်ချ်ရဲ့မဟာအကြံဟာ သူ့ရဲ့ခံယူချက်၊ အသက်ရှင်နေထိုင်ခြင်းပုံစံနဲ့ အတွေးအခေါ်ကို အချိန်နဲ့အမျှ တဖြည်းဖြည်းဝန်းရံပိတ်ဆို့စိန်ခေါ်လာတဲ့ လူ့အဖွဲ့အစည်းရပ်ဝန်းကို ကိုယ်စွမ်းဉာဏ်စွမ်း အင်အားရှိသရွေ့ အမြဲရင်ဆိုင်တိုက်ခိုက်ဖို့ပဲဖြစ်ပါတယ်။ ဒါဟာကိုယ့်ကိုယ်ကိုသေကြောင်းကြံတဲ့လုပ်ရပ်ဖြစ်သော်ငြား ငယ်စဥ်ကနေ ကြီးပြင်းလာတဲ့အထိ ဒတ်ချ်မှာရှိခဲ့တဲ့တစ်ခုတည်းသောအသိဟာ ဆွဲငင်အားကိုဆန့်ကျင်ဖို့၊ သဘာဝနဲ့အမြဲတိုက်ခိုက်ဖို့ပဲဖြစ်ပါတယ်။ မသေဆုံးခင်မှာ ဂျွန်ကို‌‌နောက်ဆုံးပြောကြားခဲ့သလို “ငါတို့သဘာဝကို အမြဲတမ်းတိုက်ခိုက်လို့မရဘူး ဂျွန်၊ အချိန်ရဲ့ပြောင်းလဲမှုနဲ့ ဆွဲငင်အားကို ငါတို့ဆန့်ကျင်လို့မရဘူး၊ ငါတို့ဘာကိုမှလွန်ဆန်လို့မရဘူး။ ငါ့ရဲ့ဘဝတစ်ခုလုံး တော်လှန်ဖီဆန်တာတွေပဲ ငါလုပ်ခဲ့တာ။ ဒါပေမယ့်လည်း အရှုံးပေးဖို့ကတော့မဖြစ်နိုင်ဘူး၊ ငါတို့အချိန်တွေကကုန်လွန်ခဲ့ပြီ ဂျွန်” ဒီစကားတွေကိုကြည့်ခြင်းအားဖြင့် ဒတ်ချ်ဟာဟိုးအရင်ကတည်းက လောကကြီးကိုမကျေနပ်သူ၊ သဘာဝကိုမေးခွန်းထုတ်ချင်သူ၊ သူဖြစ်တည်ရာလူ့အဖွဲ့အစည်းကို ရွံရှာစက်ဆုပ်သူ (အတိုင်းအတာတစ်ခုထိ ပြန်လည်တည်ဆောက်ချင်သူ) ဆိုတာ သိရှိနိုင်ပါတယ်။ ဒါတွေဟာ ကျွန်တော်ကြိုက်ရတဲ့ဒတ်ချ်ရဲ့ဇာတ်ကောင်စရိုက်တွေဖြစ်သလို သူနဲ့ခံယူချက်မတူဘဲ သူ့အပေါ်သစ္စာမရှိ၊ ထောက်ခံသူမရှိဘဲ ဒတ်ချ်တစ်ဦးတည်း ဒါမျိုးလုပ်ရပ်တွေကို လုပ်ဖို့ဆိုတာ လုံးဝမှယုတ္တိမတန်၊ မဖြစ်နိုင်တဲ့ကိစ္စတစ်ခုပါပဲ။ ဒတ်ချ်ရဲ့ဇာတ်ကောင်စရိုက်ဟာ RDR2 နောက်ပိုင်းမှသာ တဖြည်းဖြည်းဆုတ်ယုတ်ပျက်စီးသွားတယ်ဆိုပေမယ့် ကျွန်တော်တို့ဆော့ကစားသူများဟာ အာသာအသက် ၃၀ ကျော်ဝန်းကျင်ရောက်လာမှသာ RDR2 ဇာတ်လမ်းကို စဆော့ကြရတာပါ။ အာသာဘက်ကကြည့်မယ်ဆိုရင် သူလူလားစမြောက်တဲ့ ဆယ်ကျော်သက်အရွယ်တည်းက နံရံလေးဖက်၊ အမိုးတစ်နေရာ နေဖို့ပေးခဲ့တယ်၊ စားဖို့ကျွေးခဲ့တယ်၊ ရေးဖတ်နိုင်အောင်သင်ကြားပေးခဲ့တယ်၊ အစ်ကိုတစ်ယောက်၊ အဖေတစ်ယောက်နေရာကနေပြီး နှစ်ပေါင်း ၂၀ ကျော်အထိ အန္တရာယ်ပေါင်းစုံ၊ ဒုက္ခပေါင်းစုံက လွတ်မြောက်အောင် လုပ်‌ဆောင်ပေးနိုင်ခဲ့တယ်ဆိုရင် ဘာတွေပဲဖြစ်ဖြစ် ဒီလူအပေါ်မှာ ကြီးမားတဲ့သစ္စာတရားထားရှိတာဟာ ထူးဆန်းတဲ့အရာတစ်ခု‌တော့လည်း မဟုတ်လှပါဘူး။                                                                                            

သစ္စာတရားဆိုတာကို အနက်ပြန်ဆိုကြည့်တဲ့အခါ ဘယ်လိုအရည်အသွေးတွေရှိနေသလဲ?

ဒတ်ချ်ဟာ လောကကြီးကိုအရွဲ့တိုက်ချင်လို့ အာသာတို့၊ ဂျွန်တို့ကို စကားလုံးတွေ၊ လုပ်ရပ်တွေနဲ့လှည့်ဖြားထားတယ်ဆိုတာထက် ရှိသမျှဂိုဏ်းဝင်များဟာ ဒတ်ချ်အပေါ်သစ္စာရှိကြလို့၊ ယုံကြည်ကြလို့၊ လေးစားအားကိုးကြလို့သာ သူ‌စေခိုင်းသမျှကို မေးခွန်းတစ်ခုမထုတ်ပဲ တာဝန်ကျေပွန်အောင်ဆောင်ရွက်နေတယ်လို့ မှတ်ယူရမှာပါ။ ဒီလိုအစုအဖွဲ့အလိုက်ထားရှိကြတဲ့သစ္စာတရားမျိုးကို စစ်တပ်တွေမှာ၊ လုပ်ငန်းခွင်တွေမှာ ဒါမှမဟုတ် ရာဇဝတ်ဂိုဏ်းတွေမှာ ထင်ရှားစွာတွေမြင်နိုင်ပါတယ်။ အရိုးသားဆုံးပြောရရင် သစ္စာတရားကိုအလေးထားတဲ့ ကျွန်တော့်ရဲ့ဗီဇ၊ စိတ်နေစိတ်ထားနဲ့ ခံယူချက်အရ အဲနေရာမှာကျွန်တော်သာဆိုရင်လည်း ဂျွန့်လိုဖြစ်နေဖို့ကမသေချာပဲ အာသာလို၊ Javier လိုနေရာမှာ ရောက်နေမှာကြိမ်း‌သေကြောင်း ကိုယ့်ကိုယ်ကိုသိနေပါတယ်။ အဲတော့ မေးခွန်းတစ်ခုကရှိလာပါြပီ၊ သစ္စာတရားဆိုတာက ဘာပါလဲ? သစ္စာဆိုတာမျိုးဟာ ချစ်သူရည်းစား၊ လင်မယားအတွင်းမှာပဲရှိတဲ့အရာမျိုးမဟုတ်ပါဘူး။ မိသားစု၊ သူငယ်ချင်းမိတ်ဆွေတွေအကြား၊ ကိုယ်လုပ်တဲ့အလုပ် (ကုမ္ပဏီကိုဆိုလိုခြင်းမဟုတ်၊ ပညာရပ်ကိုဆိုလိုခြင်းဖြစ်ပါသည်) ကိုယ့်ခံယူချက်၊ လူမျိုးစု၊ မွေးဖွားရာဒေသ၊ အမိမြေနဲ့ ဘာသာစကားအစရှိသဖြင့် မိမိရဲ့ဖြစ်တည်မှုကဏ္ဏတိုင်းဟာ သစ္စာတရားနဲ့ဆက်နွယ်လို့နေပါတယ်။ သစ္စာတရားဟာ လူ့ကျင့်ဝတ်တစ်ခုမဟုတ်‌သော်ြငား လူအများသိပြီးသားဖြစ်တဲ့ လူ့ကျင့်ဝတ်များနဲ့ အခြေခံသဘောတရားကိုကစပြီး ဆန့်ကျင်နေတာကို ခွဲခြမ်းစိတ်ဖြာကြည့်ရင်တွေ့နိုင်ပါတယ်။ ဥပမာ ယေဘုယျလူ့ကျင့်ဝတ်ဆိုတာ ရိုးသားရမယ်၊ မလိမ်ညာရဘူး၊ အမှန်တရားကိုမြတ်နိုးရမယ်၊ အားနည်းသူကိုဖေးမရမယ် အစရှိတာတွေဖြစ်ပြီး သစ္စာဆိုတာမျိုးကကျတော့ လူ့ကျင့်ဝတ်နဲ့ ပြောင်းပြန် မင်းဘယ်လိုစက်ဆုပ်ယုတ်မာတဲ့လုပ်ရပ်မျိုးလုပ်လုပ် မင်းကို ငါအဆုံးထိထောက်ခံတယ်၊ ဘယ်သူ့ကိုမှမပြောဘူး၊ တတ်နိုင်သမျှကူညီပေးမယ်ဆိုတာမျိုးဖြစ်ပါတယ်။

RDR2 ကပေးချင်တဲ့မက်ဆေ့ချ်နဲ့ သစ္စာတရားအပေါ် စာရေးသူထားရှိတဲ့ခံယူချက်

ပထမဦးစွာ သစ္စာတရားအပေါ်မှာထားရှိတဲ့ RDR2 ရဲ့မတ်ဆေ့ချ်ကိုအနက်ထိဆင်းပြီး ရှင်းပြရမယ်ဆိုရင် ဥပမာ ကိုယ်နဲ့လွန်စွာခင်မင်ရင်းနှီးတဲ့ မိတ်ဆွေသူငယ်ချင်းတစ်ယောက်‌ယောက်ဟာ ခိုးခဲ့သည်ဖြစ်စေ၊ ဖွက်ခဲ့သည်ဖြစ်စေ၊ မူးယစ်နွံထဲနှစ်နေသည်ဖြစ်စေ၊ မကောင်းမှုဒုစရိုက်တစ်ခုခုကို ကျူးလွန်ခဲ့သည်ဖြစ်စေ၊ ယုတ်ဆွအဆုံး လူသတ်ခဲ့သည်ဖြစ်စေ ကိုယ့်ဆီအကူအညီတစ်ခုခုလာတောင်းခဲ့အခါ အဖမ်းဆီးမခံရအောင်ဖုံးကွယ်ပေးထားပြီး ငွေကြေးပိုင်းအရ အဆက်အသွယ်ပိုင်းအရ လွတ်မြောက်အောင် အတတ်နိုင်ဆုံးကာကွယ်ပေးမယ့် ခံယူချက်မျိုးဖြစ်ပါတယ်။ ဆိုလိုတာက လူတစ်‌ယောက်ဟာ ကိုယ်နဲ့အရင်တွေ့ခဲ့တယ်၊ ကိုယ့်အပေါ်ကောင်းခဲ့တယ်၊ ကျေးဇူးရှိခဲ့တယ်၊ စိတ်ရင်းချင်းလည်းသိခဲ့တယ်ဆိုရင် သူနဲ့ရင်းနှီးပြီးသက်တမ်းတစ်လျှောက်မှာ အဲလူလုပ်ခဲ့တဲ့လုပ်ရပ်တွေက မိမိအပေါ်ဆိုးကျိုးတစ်စုံတရာ မသက်ရောက်သရွေ့ မျက်နှာလွှဲနေပေးမှာပါ၊ ဘာတွေပဲဖြစ်ဖြစ် အဲလူဘက်မှာပဲ ရပ်တည်ပေးမှာပါ၊ ဒါသည်ကိုကခိုင်မာတဲ့သစ္စာတရားပါ။ ပုံမှန်အားဖြင့် ကျွန်တော်တို့ရဲ့မိဘတွေ၊ သွေးရင်းညီအစ်ကိုမောင်နှမတွေမှာ အဲသလို သစ္စာတရားမျိုးတွေ့ရတတ်ပါတယ်။ ဆင်ခြင်တုံတရားမပါတဲ့၊ ချင့်ချိန်စဥ်းစားတွေးတောခြင်းမပါတဲ့၊ အကောင်းအဆိုးဘက်လိုက်ခွဲခြားခြင်းမရှိတဲ့၊ ပြောရမယ်ဆိုရင် conscience မပါတဲ့ အသန့်စင်ဆုံးသစ္စာတရားဟာ ဒါပါပဲ၊ မျက်ကန်းသစ္စာလို့လည်း ခေါ်ဝေါ်နိုင်ပါတယ်။ ဒီအချက်ကို RDR2 ဂိမ်းမှာ လွန်စွာမှအသားပေးပုံဖော်ထားပြီး သစ္စာတရားကို‌ရှေ့တန်းတင်လို့ ပျက်စီးဆုံးရှုံးခဲ့ရတဲ့ဘဝတွေကို ဝမ်းနည်းကြေကွဲဖွယ်ပြသထားပါတယ်။ အာသာကတော့ ဒတ်ချ်ဆိုတဲ့ပုဂ္ဂိုလ်စွဲထက် ဂိုဏ်းတစ်ခုလုံးအပေါ်မှာသစ္စာရှိလို့ အသက်ဆုံးရှုံးရတယ်၊ ဂျွန်ကတော့ သူ့မိသားစုအပေါ်သစ္စာရှိခဲ့လို့ အချက်ပေါင်းများစွာ လူမဆန်ပဲပစ်သတ်ခြင်းခံခဲ့ရတယ်၊ ဟိုဇေယာကတော့ ငယ်သူငယ်ချင်းဖြစ်တဲ့ဒတ်ချ်နဲ့ ဂိုဏ်းအပေါ်အဆုံးထိ သစ္စာရှိစွာနဲ့ သူငယ်ချင်းနှစ်ယောက်သား တိုင်ပင်ထားတဲ့ အကြံအစည်တွေကိုအကောင်အထည်ဖော်ဖို့ ကြိုးစားရင်း မရှုမလှအပစ်ခံပြီး သေဆုံးခဲ့ရတယ်။ ဒီလိုဖြစ်ရပ်တွေကို ရူးသွပ်တယ်လို့တချို့ကမြင်ကြသလို တချို့ကလည်း သတိပြုရမယ့်အဖြစ်သနပ်လို့ မြင်ကြပါတယ်။ ကျွန်တော်ကတော့ ဂိမ်မာတစ်ယောက်အဖြစ်ရော၊ သစ္စာတရားကိုအလေးထားသူတစ်ယောက်အနေနဲ့ရော ဒီလိုမျိုးအကြောင်းအရာတွေကို ဗီဒီယိုဂိမ်းထဲမှာလေးလေးနက်နက် ဖော်ထုတ်ပြသထားတာကို လွန်စွာမှသဘောကျမိပါတယ်။

တံတားကိုမဖောက်ခွဲခင်မှာ အာသာက ဂျွန်ကိုပြောတဲ့ “အရေးပါတဲ့အရာအပေါ်မှာ သစ္စာရှိပါ (Be loyal to what matters)” ဆိုတဲ့ စကားကိုတော့ ရိုးရှင်းစွာပဲငြင်းဆိုပါရစေ။ ကျွန်တော်တို့ဟာ အရေးပါတဲ့အရာအပေါ်မှာသစ္စာရှိရမှာမဟုတ်ပဲ ကိုယ်သစ္စာရှိတဲ့အရာတိုင်းဟာ ကိုယ့်အတွက်အရေးပါနေရမှာ ဖြစ်ပါတယ်။ ဒီဆောင်းပါးကိုရေးနေရင်း ရုတ်တရတ် Batman: The Dark Knight ရုပ်ရှင်ထဲက စကားတစ်ခွန်းကိုသတိရမိပါတယ်။ အဲဒါကတော့ “တရုတ်ပြည်ကဘယ်တော့မှ တရုတ်နိုင်ငံသားတွေကို သူတို့နိုင်ငံထဲက နယ်မြေလွှဲပြောင်းပြီး တရားခံပေးအပ်မှာမဟုတ်ဘူး” ဆိုတာပါ (Chinese will never extradite one of their own) ဒီလိုနိုင်ငံရေး၊ သမိုင်း၊ လူမျိုးရေးတွေနဲ့လားလားမှမသက်ဆိုင်တဲ့ စူပါဟီးရိုးဇာတ်ကားတွေမှာတောင် နိုင်ငံအသီးသီးကအစိုးရတွေဟာ သူတို့နိုင်ငံသားတွေအပေါ်ထားတဲ့ အမျိုးသားရေးစိတ်ဓာတ်နဲ့ သစ္စာတရားကို ဟောလိဝုဒ်ကရိုက်တဲ့ရုပ်ရှင်တွေထဲအထိ ဝါဒဖြန့်ခြင်းတစ်ခုအဖြစ် ထည့်သွင်းပြသတတ်ကြပါတယ်။ ဒါကြောင့်မို့ သစ္စာတရားဟာ သွယ်ဝှိက်သောနည်းနဲ့ဖြစ်စေ၊ တိုက်ရိုက်ဖြစ်စေ အရာအားလုံးနဲ့ဆက်စပ်နေနိုင်ကြောင်း ဒီဆောင်းပါးနဲ့အတူ ရေးသားတင်ပြလိုက်ပါတယ်။ ဗီဒီယိုဂိမ်းလောကမှာတောင် ဂိမ်းဖလက်ဖောင်းတစ်ခုတည်းမှာပဲ စွဲစွဲမြဲမြဲဆော့တာ၊ ဂိမ်းတွဲတစ်ခုကို ဘာတွေဖြစ်ဖြစ်သဘောကျတာ၊ ဒီကုမ္ပဏီတစ်ခုက ထုတ်တဲ့ဂိမ်းတွေကိုဆို ဘာအပြစ်မှမမြင်တာ စသဖြင့် သစ္စာတရားဟာ ကျွန်တော်တို့ရဲ့ပတ်ဝန်းကျင်တစ်ဝိုက်မှာ ကျယ်ပြန့်စွာ သက်ဝင်လှုပ်ရှားလျက်ရှိပါတယ်။

ဒီအထိ ဖတ်ရှုပြီးသူများကလည်း RDR2 ဂိမ်းကို တစ်ကျော့ပြန်ပြီး ဆော့လိုစိတ်များတဖွားဖွား ပေါ်ပေါက်လာနိုင်ပါတယ်။ ဒီဆောင်းပါးကိုဖတ်ရှုပြီး အမြင်သစ်တစ်ခုရခဲ့သည်ဖြစ်စေ၊ ရှုထောင့်သစ်တစ်ခုက RDR2 ကိုကြည့်မိသည်ဖြစ်စေ၊ ဂိမ်းထဲက ဇာတ်ကောင်စရိုက်သစ်အချို့ကို ရှာဖွေတွေ့ရှိခဲ့သည်ဖြစ်စေ ကျွန်တော် ကျေနပ်ပါပြီ။‌ ကဲ ဒါဆိုရင် နောက်လာမယ့်အပတ်မှာ ဘယ်လိုအကြောင်းအရာမျိုးကို တင်ဆက်ပေးသွားမလဲဆိုတာ စောင့်မျှော်နေကြဖို့ စကားပါးရင်း ဒီစာစောင်ကို အဆုံးသတ်လိုက်ရပါတယ်။ ဖတ်ရှုသူတစ်ဦးတစ်ယောက်ချင်းစီကို ကျေးဇူးအထူးပါ။

Yan

Survival Horror တို့ရဲ့ဖခင်လို့တင်စားခေါ်‌ဝေါ်ကြတဲ့ ပထမဦးဆုံး Resident Evil ဟာ ဂိမ်းရသသစ်တစ်ခုကို ဘယ်လိုအဓိပ္ပါယ်ဖွင့်ဆိုခဲ့သလဲ?

လက်ရှိဂိမ်းလောကမှာ Survival Horror လို့ဆိုလိုက်ရင် ဂိမ်မာတော်တော်များများက ဘာကိုဆိုလိုသလဲဆိုတာ အတိအကျမဟုတ်တောင် သဘောတရားလောက်တော့ သိနေကြပါပြီ။ ယေဘုယျအားဖြင့်ဆိုရရင် Survival Horror ရဲ့အဓိပွါယ်ကို စကားလုံးဆိုလိုချက်အတိုင်း မြန်မာလိုပြန်ဆိုရမယ်ဆိုရင်တော့ အကြောက်တရားထဲမှာ (နှင့်အတူ) ရုန်းကန်ခြင်း၊ အသက်ရှင်သန်နေထိုင်ခြင်းလို့ အနီးစပ်ဆုံးပြန်ဆိုရမှာဖြစ်ပါတယ်။ စာဖတ်သူများသတိမထားမိတဲ့ နောက်တစ်ချက်က Survival Horror ဆိုတဲ့ရသဟာ ဗီဒီယိုဂိမ်းလောကထဲမှာသာရှိပြီး အခြားအနုပညာနယ်ပယ်များဖြစ်တဲ့ ရုပ်ရှင်တို့၊ စာပေတို့မှာ မရှိသလောက်ရှားပါးပါတယ်။ အဲဒါဘာကြောင့်လဲဆိုတော့ Survival Horror ဆိုတာဟာ ဂိမ်းဆော့ကစားသူကိုယ်တိုင်က ကိုယ်ပိုင်ဆုံးဖြတ်ချက်ချပြီး အန္တရာယ်များခြောက်ခြားတဲ့ ပတ်ဝန်းကျင်တစ်ခုမှာ ရရာနည်းနဲ့ အသက်ရှင်အောင် ရုန်းကန်ရတာမို့လို့ ဖြစ်ပါတယ်။ အခြားအနုပညာနယ်ပယ်များနဲ့ ပကတိကွဲပြားတဲ့အချက်တစ်ချက်က ရုပ်ရှင်တစ်ကား၊ စာအုပ်တစ်အုပ်မှာ ဇာတ်ကြောင်းအရ အဓိကဇာတ်ဆောင်က ဘယ်လိုပြုမူမယ်၊ လုပ်ဆောင်မယ်ဆိုတာ စ၊ လယ်၊ ဆုံး ကြိုတင်သတ်မှတ်ထားပြီးဖြစ်ပေမယ့် ဗီဒီယိုဂိမ်းများမှာတော့ အဲသလိုသတ်မှတ်ချက်မရှိပါဘူး။ ဒါကြောင့်လည်း ဗီဒီယိုဂိမ်းဆိုတာ အခြားအနုပညာနယ်ပယ်များထဲက လွန်စွာမှကွဲထွက်တဲ့ ဖျော်ဖြေရေးကြားခံနယ်တစ်ခု ဖြစ်နေတာဖြစ်ပါတယ်။

ဘယ်နေရာကြည့်ကြည့် ‌စိတ်တုန်လှုပ်ဖို့ကောင်းတဲ့နေရာတစ်ခုမှာ ဘယ်နေရာမှာကျည်ဆံကိုချွေတာသုံးမယ်၊ ရန်သူကိုမသတ်ပဲ လှည့်ပတ်ကျော်သွားမယ်၊ ဒီကောင်ကိုသတ်ပြီး ဒီတစ်ကောင်ကိုတော့ နောက်တစ်ခေါက်မှ ပြန်လာဖိုက်မယ် အစရှိသဖြင့် ကစားသူကိုယ်တိုင်က ကိုယ်ကြိုက်တဲ့ဆုံးဖြတ်ချက်၊ ဗျူဟာအတိုင်း အဆင်ပြေသလိုဆော့ကစားပြီး ရှေ့ဆက်ရတာဖြစ်ပါတယ်။ ဒါ့အပြင် ကိုယ်ရှေ့ဆက်တိုးဖို့ ဂိမ်းကပေးထားတဲ့ပစ္စည်းဆိုတာဟာလည်း ကိုယ်အသက်ရှင်နိုင်ရုံလောက်၊ အမှားတစ်ခုပဲလုပ်နိုင်ရုံလောက် ပေးစွမ်းထားတာဖြစ်ပါတယ်။ ဒါသည်ကိုက Survival Horror ပါပဲ။ အဲဒီထဲမှာမှ မမျှော်လင့်ထားတဲ့ဇာတ်မြှုပ်ကွက်တွေပါမယ်၊ ထူးကဲတဲ့ concept တွေနဲ့ ရုပ်ပျက်ဆင်းပျက်သတ္တဝါတွေ၊ စက်ဆုပ်ဖို့ကောင်းတဲ့နောက်ခံဇာတ်ကြောင်းတွေနဲ့ ရသ‌မြောက်စွာ ဂိမ်းတစ်ခုလုံးကို ရေးဆွဲဖန်တီးထားတယ်ဆိုရင်တော့ ဒါကို အနုပညာမြောက်တဲ့ Survival Horror ဂိမ်းတစ်ခုလို့ ကျွန်တော်တို့မှတ်ယူရမှာဖြစ်ပါတယ်။ ကဲ အဲဒါဆိုရင် Survival Horror ဆိုပြီး ဂိမ်းရသသစ်တစ်ခု ဖြစ်လာစေတဲ့ ပထမဦးဆုံး Resident Evil ဂိမ်းဆိုတာဘာလဲ? အဲလောကထဲမှာအသက်ရှင်ရုန်းကန်ရတာ ဘယ်လောက်တောင်ခက်ခဲမလဲ? ဂိမ်းလောကတစ်ခုလုံးကိုလှုပ်ခတ်စေခဲ့ပြီး Horror ပရိသတ်တွေအပြင် မျိုးဆက်သစ်၊ မျိုးဆက်ဟောင်းဂိမ်မာများကပါ ကြိုက်နေဆဲ၊ ကစားနေဆဲဖြစ်တဲ့ RE ဂိမ်းစီးရီးကို အစပျိုးခဲ့တဲ့ Resident Evil 1 ရဲ့ရိုက်ခတ်မှု၊ ခမ်းနားမှုနဲ့ မျိုးစေ့ချခဲ့မှုတွေကို ကျွန်တော်တို့လေ့လာကြည့်လိုက်ကြရအောင်ဗျာ။ တစ်ပုံချင်းစီထောက်ပြီးဖတ်ရှုပေးပါ။

၁၉၉၆ ခုနှစ်မှာပွဲဦးထွက်လာတဲ့ Resident Evil ဂိမ်းနဲ့ အရာအားလုံးစတင်ခဲ့ခြင်း

CAPCOM ကထုတ်လုပ်ဖြန့်ချိတဲ့ ပထမဦးဆုံး Resident Evil ဂိမ်းဟာ ၁၉၉၆ ခုနှစ်မှာ ထွက်ရှိခဲ့ပြီး အဲဂိမ်းနဲ့အတူ Survival Horror ဂိမ်းအမျိုးအစားသစ်ကို ဂိမ်းလောကထဲအရောက်ပို့ပေးလိုက်တာဖြစ်ပါတယ်။ ၁၉၉၆ ခုနှစ်ဟာ ကျွန်တော့်ရဲ့မွေးနှစ်ဖြစ်သလို အခု ၂၀၂၄ ခုနှစ်မှာဆိုရင် Resident Evil စီးရီးဟာ ဂိမ်းလောကမှာ ရပ်တံ့တစ်လှည့်၊ ဆက်သွားတစ်လှည့်နဲ့ အသက် ၂၇ နှစ်တိုင်တိုင် ရပ်တည်နိုင်ခဲ့တဲ့ နာမည်ကျော်ဂိမ်းတွဲတစ်ခုဖြစ်လာခဲ့ပါပြီ။ ကျွန်တော်နဲ့အသက်သိပ်မကွာတဲ့ဂိမ်မာများကတော့ ၁၉၉၀ နှောင်းပိုင်းက ဂိမ်းတွေကိုမှီလိုက်မယ်မထင်ပါဘူး၊ ငယ်ငယ်ကလမ်းဘေးဂိမ်းဆိုင်များမှာတောင် PS1 မှာဆို ကားပြိုင်တာတို့၊ Tekken ချတာတို့၊ မြေခွေးကားမောင်းတို့ပဲ အဆော့များကြတာဖြစ်ပြီး Resident Evil စီးရီးကိုတောင် ၂၀၀၀ ပြည့်နှစ်နှောင်းပိုင်းရောက်မှ RE4 စဆော့ပြီး သိရှိခဲ့ရတာဖြစ်ပါတယ်။ Resident Evil စီးရီးဟာ သူ့ရဲ့ပထမဆုံးဂိမ်းနဲ့ Survival Horror ကို စတင်မိတ်ဆက်ခဲ့သလို RE4 ဟာလည်း သူ့ရဲ့ Third-Person အမြင်နဲ့ ဂိမ်းလောကတစ်ခုလုံးကို သွေးသစ်လောင်းပြောင်းလဲပေးလိုက်တာဖြစ်ပါတယ်။ RE4 မရှိခဲ့ရင် The Last of Us တို့၊ Dead Space တို့၊ God of War (၂၀၁၈) တို့လိုဂိမ်းမျိုးဟာ ရှိလာနိုင်မှာမဟုတ်သလို Resident Evil စီးရီးဟာလည်း အခုလိုကမ္ဘာကျော်တဲ့ဂိမ်းစီးရီးတွဲအဖြစ် ကြံ့ကြံ့ခိုင်ရပ်တည်နိုင်ခဲ့မှာမဟုတ်ပါဘူး။ Survival Horror ကနေ ဂိမ်းကစားဟန်သွေဖယ်တဲ့ RE4 လို Action Horror ဂိမ်းမျိုးဆိုတာလည်း သူ့ကိုမွေးထုတ်ပေးခဲ့တဲ့ ပထမဦးဆုံး Resident Evil မရှိပဲဖြစ်မလာနိုင်တဲ့အတွက် ကျွန်တော်တို့စီးရီးပရိသတ်များဟာ ၁၉၉၆ ခုနှစ်ကထွက်ရှိခဲ့တဲ့ ဦးဆုံးသော Resident Evil ကို အထူးကျေးဇူးတင်ရမှာဖြစ်ပါတယ်။

ဂိမ်မာများတစ်ခါမှမကြုံခဲ့ဖူးတဲ့ ‌ခြောက်ခြားဖွယ်ဂိမ်းကစားဟန်နဲ့ ဝင်္ကပါတစ်ခုလို ခမ်းနားကြီးကျယ်သော Spencer Mansion

Spencer Mansion လို့ဆိုလိုက်ရင် OG RE ပရိသတ်များရဲ့ကိန်းအောင်းနေတဲ့ စိတ်ဒဏ်ရာကို နှိုးဆွလိုက်သလိုပါပဲ။ RE2 မှာပါ၀င်တဲ့ရက်ကွန်းမြို့ရဲစခန်းထက် အဆပေါင်းများစွာပိုနက်နဲရှုပ်ထွေးတဲ့ Spencer Mansion ဟာ RE ပရိသတ်များ ပွဲဦးထွက်နဖူးတွေ့ဒူးတွေ့ ကြုံတွေ့ရတဲ့ နေရာတစ်ခုဖြစ်ပါတယ်။ Jill (သို့) Chris အနေနဲ့ ဆော့ရမှာဖြစ်ပြီး ဒီ Mansion ကြီးထဲမှာ ဘာတွေရှိနေမလဲ? ဘယ်လိုအရာတွေကိန်းအောင်းနေမလဲ? ထိပ်သီးနည်းဗျူဟာချကယ်ဆယ်ရေးတပ်ဖွဲ့ (STARS) က ဘယ်သူတွေရော အသက်ရှင်ကျန်နေမလဲ? အဖွဲ့ခေါင်းဆောင် Wesker ကရော ဘယ်မှာလဲ? အစရှိတဲ့ပဟေဠိပေါင်းများစွာကို အခန်းတစ်ခန်းဝင်လိုက်တိုင်းမှာ တစ်လွှာချင်းစီဖြည်ထုတ်အဖြေရှာရမယ့်သူကတော့ တခြားသူမဟုတ် ဂိမ်းဆော့ကစားသူ မိမိကိုယ်တိုင်ပါပဲ။ ပစ္စည်းသယ်ဆောင်နိုင်တဲ့ပမာဏ‌ရှစ်ကွက်ပဲရှိတဲ့ ကိုယ်ဟာ (Chris ဆိုခြောက်ကွက် lol) ဂိမ်းကပေးထားတဲ့ကျည်၊ သွေးနဲ့ မလောက်မငှတဲ့ ဇွန်ဘီတွေ၊ ရန်သူတွေကို မထင်မှတ်ထားတဲ့အချိန်တွေမှာ ရုတ်တရတ်ဆိုသလို ရင်ဆိုင်ရမှာဖြစ်ပါတယ်။ အပွင့်လင်းဆုံးပြောရရင် Resident Evil 1 (2002 Remake) ရဲ့ ၂၀၁၄ ခုနှစ်ထုတ် PS4 ဗားရှင်းကို လွန်ခဲ့တဲ့အပါတ်ကမှ ဆော့ကစားမိဖူးပြီး လုံးဝ‌‌ကို ကြိုက်နှစ်သက်သွားတော့တာပါပဲ။ ဘယ်လောက်တောင်ကြိုက်မိသွားသလဲဆိုတော့ RE ချစ်သူမှန်ရင် Resident Evil 1 ကိုဆော့ဖူးမှ Survival Horror ရဲ့အရသာမှန်ကိုသိမယ်လို့တောင် တိုက်တွန်း‌ပြောလိုက်ချင်တဲ့ထိပါပဲ။

တံခါးတစ်ချက်ဖွင့်လိုက်တိုင်းမှာ ဘာကိုမျှော်လင့်လို့ရမှန်းမသိတဲ့လျှို့ဝှက်ချက်ပေါင်းများစွာ

တံခါးတစ်ချက်ချင်းစီဖွင့်တဲ့ animation နဲ့ လုံခြုံရေးကင်မရာလို view ကို ဂိမ်းတစ်ခုလုံး သည်းခံကြည့်ပြီး ဇာတ်ကြောင်းလေးရှေ့နည်းနည်းဆက်အောင် ဆော့လိုက်နိုင်တာနဲ့ Spencer Mansion ကြီးနဲ့ဆက်စပ်နေတဲ့ ကိုယ်ကြိုမမြင်ထားတဲ့အရာတွေကို ဂိမ်းကသူ့ဟာသူ တစ်ဆင့်ချင်းပြသသွားမှာဖြစ်ပါတယ်။ လမ်းလွဲမှားယွင်းသွားတဲ့ Umbrella ရဲ့ ရေတွက်မရတဲ့စမ်းသပ်ချက်တွေ၊ Trevor မိသားစုရဲ့ကြေကွဲဖွယ်ကောင်းလှတဲ့ နောက်ခံဇာတ်ကြောင်း၊ အသိခံလို့မရတဲ့ တရားမဝင်လျှို့ဝှက်ချက်တွေ၊ STARS အဖွဲ့ရဲ့ကံဆိုးမိုးမှောင်ကျမှုတွေနဲ့ အားလုံးကိုထောင်ချောက်ဆင်ခဲ့တဲ့ သစ္စာဖောက်တစ်‌ယောက်က ဘယ်သူလဲ? အစရှိတာတွေကို တက့စိတ်‌ခြောက်ခြားဖွယ် ဒီဂိမ်းမှာ‌တွေ့မြင်ခံစားရမှာဖြစ်ပါတယ်။ တံခါးတစ်ချက်ဖွင့်လိုက်တိုင်းမှာ ဘာတွေရှိနေမလဲ? ဘာကိုမျှော်လင့်ရမလဲလို့တွေးပြီး တကယ်စိတ်လှုပ်ရှားရတဲ့ဂိမ်းတစ်ခုပါ၊ ‌ပြောနေရင်တောင် အပိုဖြစ်ပါတယ်။ ကိုယ့်မှာရှိတဲ့သေနတ်၊ ကျည်၊ သွေးတွေကို စနစ်တကျစီမံပြီး ကြီးမားရှုပ်ထွေးလှတဲ့ Spencer Mansion ကြီးထဲမှာ ဟိုတံခါးဝင်၊ ဒီတံခါးထွက် ဘာတွေဖြစ်ခဲ့သလဲဆိုတာ တဖြည်းဖြည်းရှာဖွေရမယ့် Survival Horror ဂိမ်းစစ်စစ်တစ်ခုဖြစ်ပါတယ်။ ကွန်ပျူတာနဲ့ဆော့ကစားသူများကတော့ တံခါးတစ်ချပ်ချင်းစီဖွင့်တဲ့ animation ကိုဖြုတ်တဲ့ mod သွင်းပြီး ပိုမိုအဆင်ပြေချောမွေ့တဲ့ ဂိမ်းကစားမှုအတွေ့အကြုံကို ရရှိနိုင်တာမှန်ပေမယ့် တံခါးတစ်ချပ်ချင်းစီဖွင့်တာ၊ ပိတ်တာကိုကြည့်နေရတာကိုက အရသာတစ်မျိုးပါပဲ၊ အရှေ့မှာဘာရှိနေမလဲမသိနိုင်တာကြောင့် ရင်ခုန်စိတ်လှုပ်ရှားမှုကို ပိုမြှင့်တင်ပေးပါတယ်။ နောက်ပြီးကိုယ်မထင်ထားတဲ့ဇာတ်ကြောင်းအလှည့်အပြောင်းတွေ၊ ကိုယ်အသေအချာမသိသေးတဲ့ RE ရဲ့သမိုင်းကြောင်းတွေကို ဒီဂိမ်းထဲမှာလေ့လာနိုင်ပါတယ်။

အစစ်မှန်ဆုံး Survival Horror ဂိမ်းရသကို တစိမ့်စိမ့်ခံစားရစေမယ့် Resident Evil 1 ဂိမ်းကိုဆော့ဖို့ ဘာတွေကြိုတင်ပြင်ဆင်ထားဖို့လိုမလဲ?

RE စီးရီးကိုကြိုက်တယ်ဆိုရင်တော့ Resident Evil 1 (2002 Remake) ကို ဘဝမှာတစ်ခေါက်လောက်တော့ မဆော့မဖြစ်ဆော့သင့်ပါတယ်။ ကျွန်တော်ကိုယ်တိုင်တောင် ဆော့ကစားခဲ့တာ မကြာသေးပေမယ့် Resident Evil 1 ရဲ့အနှစ်နှစ်ဆယ်တိုင် ဂိမ်းလောကမှာ ထင်ကျန်နေခဲ့တဲ့ဂိမ်းအရသာကို အခုထိခံစားမိနေဆဲဖြစ်ပါတယ်။ ကြိုတင်ပြောကြားလိုတာကတော့ ကိုယ့်ကိုယ်ကိုလုံးဝ မ spoil ပဲ မျက်လုံးစုံမှိတ်ပြီး ဒီဂိမ်းထဲကိုသာဝင်သွားပါ၊ ဂိမ်မာများလုံးဝအံ့အားသင့်နေမှာပါ။ နောက်ပြီး Resident Evil 1 ဟာ အခြားသော RE ဂိမ်းများနဲ့လုံးဝမတူပါဘူး၊ အရင် RE ဂိမ်းများကိုပိုင်နိုင်အောင်ဆော့ကစားနိုင်ပြီဆိုပြီး သတိပေ့ါဆစွာ ဒီဂိမ်းထဲဝင်သွားရင် ဂိမ်းထဲမှာမရှုမလှလမ်းပျောက်ပြီး Spencer Mansion ရဲ့အပြစ်ပေးခြင်းကိုခံရပါလိမ့်မယ်။ စူးစမ်းလေ့လာရှာဖွေခြင်း၊ ဖြတ်ထိုးဉာဏ်နဲ့ ပဟေဠိအဖြေရှာနိုင်စွမ်းတို့ကို အခြေခံထားတဲ့ဂိမ်းကစားဟန်ဖြစ်တဲ့အတွက် စီးရီးထဲမှာ အထူးကဲဆုံး Resident Evil ဂိမ်းဖြစ်ပြီး RE1, 2, 3 ဟာ OG RE ပရိသတ်များလွန်စွာကြိုက်နှစ်သက်ရတဲ့ classic သုံးဆက်တွဲဖြစ်ပါတယ်။ နောက်ပြီး ကျွန်တော်တို့အားလုံးရဲ့အချစ်တော်ဖြစ်တဲ့ Chris, Jill, Wesker တို့လို နာမည်ကျော်ဇာတ်ကောင်များရဲ့ ငယ်စဥ်အရွယ်ကပုံစံတွေ၊ အခြားသော STARS အဖွဲ့သားတွေ၊ စကား‌‌‌ပြောဆိုဆက်ဆံပုံတွေကို အတိုင်းသားတွေ့မြင်ရတဲ့အတွက် စိတ်ကျေနပ်ဖို့ကောင်းတာလည်းအမှန်ပါပဲ။ Resident Evil 1 ဟာ တစ်ခါတလေမှာဘယ်လောက်တောင် စိတ်အထီးကျန်စေသလဲ၊ မွန်းကြပ်မှုကိုခံစားရစေသလဲဆိုရင် ဂိမ်းဇာတ်ကြောင်းအရ STARS အဖွဲ့သားတစ်ယောက်ယောက်ကို တစ်ကွေ့ကွေ့မှာ တွေ့ပြီဆိုတာနဲ့ လမ်းပျောက်နေတုန်းမျက်နှာသိတွေ့သလို စိတ်သက်သာရာရသွားတဲ့အထိ စိတ်ဖိအားပေးနိုင်တဲ့ ဂိမ်းပါပဲ (အပိုမပြောပါဘူး၊ ဆော့ဖူးသူများအဲခံစားချက်ကိုနားလည်နိုင်မှာပါ) ကဲ ဒီတော့ဆက်ပြီးမညွှန်းတော့ပါဘူး၊ ကိုယ့်ဘာသာကိုယ်ဆော့ကြည့်ပြီးသာ ဆုံးဖြတ်ချက်ချကြဖို့ ဒီကနေစကားပါးလိုက်ချင်ပါတယ်။

ဆော့ပြီးတာနဲ့ လုံးဝမေ့မရတဲ့ ဂိမ်းကစားမှုအတွေ့အကြုံကိုပေးစွမ်းသွားမယ့် Resident Evil 1 နဲ့ စာရေးသူအနှစ်ချုပ်

ကိုယ်ဟာ RE7 ကြိုက်သူလား? ဒါမှမဟုတ် RE2 Remake ရဲ့ပရိသတ်လား? ဒါမှမဟုတ် RE4 Remake ဟာ သိပ်ကြောက်ဖို့ကောင်းတယ်မထင်လို့ ပိုပြီး တစ်ဒုန်းဒုန်းရင်ခုန်စေမယ့်ဂိမ်းမျိုးကို ဆော့ချင်တာလား? ဒါဆိုရင်တော့ ဘယ်ကိုမှပြေးမကြည့်ပါနဲ့၊ Resident Evil 1 ကိုသာ အခုပဲဝယ်ဆော့လိုက်ပါ။ PS Store မှာ‌တော့ အမေရိကန်‌ဒေါ်လာ ၁၀ ကျပ်ဝန်းကျင်နဲ့ရနိုင်ပေမယ့် အခြားပလက်ဖောင်းများမှာတော့ စျေးအပြောင်းအလဲအနည်းငယ်ရှိနိုင်ပါတယ်။ ကိုယ်ပေးတဲ့ငွေ၊ သုံးရတဲ့အချိန်နဲ့တန်တဲ့ဂိမ်းတစ်ခုဖြစ်ကြောင်း အာမခံပါတယ်။ နောက်ပြီး CAPCOM က ကျွန်တော့်ကို ဒါမျိုးဆောင်းပါးရေးတင်ဖို့လည်း စပွန်ဆာမပေးထားပါဘူး။ ကိုယ်ကိုယ်တိုင်ဆော့ပြီးလို့ ကောင်းမွန်ကြောင်းကို အချက်အလက်နဲ့တကွ မှတ်တမ်းတင်ပြီး စာဖတ်သူဂိမ်မာများကို ထုံးစံအတိုင်း ပေ့ချ်မှာ ပြန်လည်မျှဝေတာဖြစ်ပါတယ်။ 

နောက်ဆုံးအနှစ်ချုပ်အနေနဲ့ ပြောလိုက်ချင်တာကတော့ Resident Evil 1 ကို ဆော့ပြီဆိုရင် စိတ်ကိုလုံးဝနှစ်မြှုပ်ထားပါ၊ အာရုံစူးစိုက်ပါ၊ headphone မဟုတ်ရင် earphone တက်ပြီးဆော့ပါ၊ ကိုယ်ရောက်နေတဲ့နေရာမှန်သမျှကို စေ့စပ်အောင် စစ်ဆေးပါ၊ သွားခဲ့သမျှလမ်းတွေကိုမှတ်ထားပါ၊ နောက်ပြီး ဂိမ်းနဲ့ပတ်သက်လို့ဘာမျှော်လင့်ချက် ကြီးကြီးမားမားမှ မထားပါနဲ့၊ flow အတိုင်းသွားပါလို့ မှာကြားလိုက်ပါရစေ။ ကဲ ဒါကတော့ Survival Horror ဆိုတဲ့ဂိမ်းရသသစ်ကို မွေးထုတ်ပေးခဲ့တဲ့ Resident Evil 1 ကိုဆော့ကစားပြီး စာ‌ရေးသူကိုယ်တိုင် အချိန်ယူလေ့လာပြုစုထားတဲ့ ဂိမ်းစာစောင်ပဲဖြစ်ပါတယ်။ ဖတ်ရှုရင်း ဒီထိရောက်လာပြီး သိချင်စိတ်ပိုကဲသွားရင်တော့ ကိုယ်တိုင်ကိုယ်ကျ Resident Evil 1 ကို ဝယ်ယူဆော့ကစားနိုင်သလို ဒီဆောင်းပါးကနေ RE လောကရဲ့ လူသိပ်မသိတဲ့အကြောင်းတွေ၊ ဗဟုသုတနဲ့ တခြားသောအချက်တွေကို စာဖတ်သူတွေသိသွားတယ်ဆိုရင်ဖြင့် ရေးသားရကျိုးနပ်ပါပြီ။ ဒီအပတ်မှာတော့ ဒီလောက်နဲ့အဆုံးသတ်ပါရစေ၊ နောက်လာမယ့်အပါတ်တွေမှာလည်း ဘယ်လိုဆောင်းပါးတွေတင်ဆက်ပေးသွားမလဲဆိုတာ စောင့်မျှော်ပေးကြဖို့ ပြောကြားရင်း စာဖတ်သူတစ်ဦးချင်းစီကို ကျေးဇူးအထူးတင်ရှိကြောင်း အသိပေးလိုက်ပါရစေ။

Yan