အားလုံးကိုမှင်သက်သွားစေမယ့် Assassin's Creed နဲ့ Final Fantasy တို့ရဲ့ပေါင်းစည်းမှု

၂၀၁၆ ခုနှစ်၊ နိုဝင်ဘာလ ၂၉ ရက်နေ့က ထွက်ရှိခဲ့တဲ့ Final Fantasy ဂိမ်းဇာတ်လမ်းတွဲရဲ့ နောက်ဆုံးအခွေအသစ်ဖြစ်တဲ့ Final Fantasy XV ဟာ သစ်လွင်တဲ့ဇာတ်ကောင်တွေ၊ ရင်သပ်ရှုမောဖွယ်ဂိမ်းလောက၊ စိတ်လှုပ်ရှားစရာဇာတ်ကြောင်း၊ ကွဲပြားတဲ့ဂိမ်းကစားမှုပုံစံတို့နဲ့ Final Fantasy ဂိမ်းစီးရီးကိုတစ်ကြော့ပြန်သစ်ဆန်းစေခဲ့ပါတယ်။ ပလက်ဖောင်းသုံးမျိုးလုံးမှာ ဆော့ကစားနိုင်တဲ့ Final Fantasy XV ဂိမ်းဟာ သူ့ရဲ့ပြောင်မြောက်တဲ့ကဏ္ဍအသီးသီးတို့ကြောင့် ဂိမ်းလောကမှာနာမည်ကောင်းတွေရလာခဲ့တာ အားလုံးမျက်မြင်ပါပဲ။ အဲဒီလိုအောင်မြင်မှုတွေ အတိုင်းအတာတစ်ခုအထိဆွတ်ခူးလာနိုင်ခဲ့တဲ့ Final Fantasy XV ဟာ နောက်ဆက်တွဲအခွေထုတ်ဖို့ဆိုတာထက် DLC တွေ update အသစ်တွေနဲ့ ကစားသူတွေကို ပိုမိုဆန်းပြားတဲ့ဂိမ်းအတွေ့အကြုံတွေပေးစွမ်းဖို့ ကြိုးပမ်းလာခဲ့ပါတယ်။ ဘယ်လိုမျိုး DLC ဖြစ်မလဲ၊ နောက်လာမယ့် update တွေကရော ဘယ်လိုမျိုးလုပ်ဆောင်ချက်အသစ်တွေပါလာမလဲလို့ ဂိမ်မာတွေစောင့်ဆိုင်းနေတဲ့အချိန်မှာ ဘယ်သူမှမျှော်လင့်မထားတဲ့ပေါင်းစည်းမှုကြီးကို Final Fantasy XV DLC အဖြစ်နဲ့ မကြာခင်တွေ့မြင်ခံစားကြရတော့မှာဖြစ်ပါတယ်။ ဘာဖြစ်လို့လည်းဆိုတော့ Ubisoft နဲ့ Square Enix တို့ဟာ Assassin's Creed ဂိမ်းစီးရီးနဲ့ Final Fantasy XV တို့ပေါင်းထားတဲ့ DLC ကို သြဂုတ်လ ၃၀ ရက်နေ့မှာ ထုတ်ပေးတော့မှာဖြစ်ကြောင်း လတ်တလောကမှ တရားဝင်ကြေညာခဲ့လို့ပါပဲ။ နာမည်ကျော်ဂိမ်းစီးရီးနှစ်ခုဖြစ်ကြတဲ့ AC နဲ့ Final Fantasy ကိုပေါင်းစည်းပြီး ဂိမ်းတစ်ခုထဲမှာဆော့ကစားဖို့ဆိုတာ ဂိမ်မာတွေမက်ဖူးကြတဲ့အိပ်မက်ဖြစ်ပေမယ့် တကယ်တမ်းလက်တွေ့မှာတော့ မျှော်လင့်ချက်ကလေးသာသာပါ၊ ဒါပေမယ့် အခုတော့ အဲဒီအိပ်မက်ဟာ တကယ်ကြီးဖြစ်လာခဲ့ပါပြီ။ ဒီတော့ အမှန်တရားဘက်တော်သား Assassin တွေနဲ့ စိတ်ကူးယဉ်ဆန်ဆန် Final Fantasy ထဲကဇာတ်ကောင်တွေကို ဘယ်လိုမျိုးပေါင်းစည်းထားလဲ၊ ဆော့ရမယ့်ပုံစံကရော ဘယ်လိုမျိုးလဲ၊ ပါဝင်မယ့်ဇာတ်ကောင်အမျိုးအစား အစရှိတာတွေကို စုစည်းပြီးဒီမှာဖော်ပြပေးလိုက်ပါတယ်။

Assassin တစ်ယောက်ဖြစ်လာဖို့ ဘယ်ကစတင်ရမလဲ

Assassin တစ်ယောက်ဖြစ်လာဖို့အတွက်ဆိုရင်တော့ Moogle Chocobo Carnival ပွဲတော်မှာ Dream Egg ကိုလိုက်လံရှာဖွေရမှာပါ။ အဲဒီ Dream Egg ကိုရှာတွေ့သွားပြီဆိုရင်တော့ အဓိဇာတ်ဆောင်ဖြစ်တဲ့ Noctis ဟာ Assassin ဝတ်စုံကို စတင်ဝတ်ဆင်နိုင်ပြီဖြစ်ပါတယ်။ သြဂုတ်လ ၃၀ မှာ DLC ထွက်ရှိမှာဖြစ်ပြီး နောက်တစ်ရက်မှာ Final Fantasy XV ဂိမ်းရဲ့ Assassin ပွဲတော် DLC ကို အားလုံးကဝင်ရောက်ဆော့ကစားနိုင်မှာပဲဖြစ်ပါတယ်။

Assassin တစ်ယောက်အနေနဲ့ တွေ့ကြုံခံစားနိုင်မယ့်အရာတွေ

DLC အတွင်းမှာ ကိုယ်ကျင်လည်ရမယ့်မြို့ကတော့ Lestalium မြို့ဖြစ်ပြီး ဂိမ်းအတွင်းမှာလုပ်ငန်းဆောင်တာအသစ်တွေ၊ မစ်ရှင်အသစ်တွေ၊ လုပ်ဆောင်ချက်အသစ်တွေနဲ့ Assassin Creed ဂိမ်းဒီဇိုင်းတွဲဆက်ထားတဲ့ ပစ္စည်းတွေ၊ အဆောက်အအုံတွေကို အားလုံးကတွေ့မြင်ရမှာဖြစ်ပါတယ်။ ဒါ့အပြင် Noctis အနေနဲ့ Assassin ဝတ်စုံကိုဝတ်ဆင်ထားတဲ့အတွက် ပြောင်းလဲသွားတဲ့တိုက်ခိုက်မှုအကွက်အသစ်တွေ၊ သွားလာတဲ့စတိုင်အသစ်တွေ၊ Assassin ဆန်ဆန်လှုပ်ရှားမှုတွေကို ထည့်ပေါင်းမြင်တွေ့ရဦးမယ့်အပြင် Assassin Creed ရဲ့အချက်အခြာကျလုပ်ဆောင်ချက်တစ်ခုဖြစ်တဲ့ ဟိုးအမြင့်တစ်နေရာကနေ သိမ်းငှက်တစ်ကောင်လိုအဟုန်နဲ့ မြေအောက်ကိုထိုးဆင်းတဲ့ Leap Of Faith လုပ်ဆောင်ချက်ကို လုပ်ဆောင်နိုင်ဦးမှာပါ။

Assassin ပွဲတော်ကျင်းပချိန်နဲ့ ပြီးဆုံးချိန်

Assassin ပွဲတော်ကို သြဂုတ်လ ၃၁ ရက်နေ့မှာစတင်ကျင်းပမှာဖြစ်ပြီး ၂၀၁၈ ဇန်နဝါရီလ ၃၁ ရက်နေ့မှာ အဆုံးသတ်မှာဖြစ်ပါတယ်။ PS4 နဲ့ Xbox One ပလက်ဖောင်းများအတွက် update အသီးသီးကို ရယူနိုင်မှာဖြစ်ပြီး PC အတွက်တော့ ဘယ်အချိန်မှာရောက်လာမလဲဆိုတာ မသိရသေးပါဘူး။ Nocits ဟာ Master Assassin ဝတ်စုံကိုဝတ်ဆင်လို့ရမယ့်အပြင် brotherhood ကြီးရဲ့အငွေ့အသက်ကို ဂိမ်မာများခံစားနိုင်စေဖို့ ကျန်တဲ့အဓိကဇာတ်ကောင် ၃ ယောက်အတွက်လည်း ဆင်မြန်းနိုင်မယ့် Assassin ဝတ်စုံတွေရှိနေပါသေးတယ်။

ရှေ့ဆက်အနာဂတ်မှာဖြစ်လာမယ့် crossover တွေနဲ့ပတ်သက်သမျှ 

Final Fantasy XV ဂိမ်းအနေနဲ့ Assassin Creed ရဲ့ အငွေ့အသက်တွေကိုပေးစွမ်းဖို့ DLC တစ်ခုအဖြစ်ဖန်တီးပြီး ဂိမ်းထဲမှာထည့်သွင်းခဲ့တယ်ဆိုပေမယ့် Assassin Creed အနေတော့ Final Fantasy နဲ့ပတ်သက်တဲ့အကြောင်းအရာ၊ ကဏ္ဍတွေကို တကယ့်ဂိမ်းထဲမှာတစ်ဖန်ပြန်ထည့်သွင်းဖို့ အစီအစဉ်မရှိသေးဘူးလို့ သိရပါတယ်။ အခုလို crossover DLC ကိုဖန်တီးဖြစ်ခဲ့တာလည်း လွန်ခဲ့တဲ့ ၃ နှစ်လောက်က Ubisoft ဂိမ်းဆွဲတဲ့အဖွဲ့နဲ့ Square Enix ဂိမ်းဖန်တီးသူများအဖွဲ့တို့ မိတ်ဖြစ်ဆွေဖြစ် တွေ့ဆုံရာကနေ အစပျိုးခဲ့တယ်လို့ဆိုပါတယ်။

အနှစ်ချူပ်

Ubisoft နဲ့ Square Enix အနေနဲ့ အနာဂတ်မှာထပ်ပြီးပေါင်းစည်းသွားမယ့် crossover ဂိမ်းတွေရဲ့ အရိပ်အယောင်ကိုတော့ ဘာမှမချပြသေးပေမယ့် ဂိမ်မာတွေမက်ခဲ့ရတဲ့အိပ်မက်တစ်ခုထဲကတစ်ခု အကောင်အထည်ပေါ်လာတာဖြစ်တဲ့အတွက် ဒီ crossover DLC ကလုံးဝကိုအားရကျေနပ်စရာကြီးပါ။ ဒါပေမယ့်အချိန်အကန့်သတ်နဲ့ဖြစ်တဲ့အတွက် Assassin ပွဲတော်စတင်ပြီဆိုတာနဲ့ အားလုံးကလက်မနှေးဘဲ အလျင်အမြန်ဆော့ထားနိုင်မှ စိတ်ကျေနပ်ဖို့ကောင်းတဲ့ ဂိမ်းတွင်းအတွေ့အကြုံတွေကို အပြည့်အဝခံစားနိုင်မှာဖြစ်တယ်လို့ပြောရင်း Final Fantasy XV: Assassin Festival DLC ကိုဒီကနေ ညွှန်းလိုက်ပါရစေ။

Yan
Ref: gamespot, ign

စိတ်ရဲ့သဘောသဘာဝကို အနုပညာမြောက်စွာ ဖန်တီးဖော်ကျူးထားတဲ့ Hellblade: Senua's Sacrifice

၂၀၁၃ ခုနှစ်ကထွက်ရှိခဲ့တဲ့ DmC Devil May Cry Reboot ကို အားလုံးမှတ်မိလိမ့်မယ်ထင်ပါတယ်။ အဲဒီ Reboot ခွေကို Capcom က UK အခြေစိုက်ဂိမ်းရေးဆွဲသူအဖွဲ့ဖြစ်တဲ့ Ninja Theory နဲ့ လက်တွဲလုပ်ဆောင်ခဲ့တာပါ။ ၂၀၀၀ ခုနှစ်ကတည်းက ဂိမ်းလောကနယ်ပယ်မှာရှိနေခဲ့တဲ့ Ninja Theory ဟာလွတ်လပ်တဲ့ private ဂိမ်းရေးဆွဲတဲ့ကုမ္မဏီတစ်ခုဖြစ်ပြီး အဖွဲ့ဝင်အရေအတွက်နည်းနည်းနဲ့ ခြေလှမ်းတွေကျဲကျဲ လှမ်းနေတဲ့ပုံစံမျိုးပါ။ ၂၀၁၃ ခုနှစ်မှာ DmC Reboot နဲ့ပရိသတ်များကြား နာမည်ထွက်လာခဲ့တဲ့ Ninja Theory ဟာ DmC အခွေပြီးတဲ့နောက်မှာ ခြေရာတွေပြန်ဖျောက်သွားပြီး သတင်းအစအနတွေပျောက်သွားခဲ့ပြန်ပါတယ်။ ယခု ၂၀၁၇ ခုနှစ် လေးနှစ်တာကာလအကြာမှာတော့ Hellblade: Senua's Sacrifice ဆိုတဲ့ဂိမ်းအသစ်နဲ့အတူ အားလုံးရဲ့အရှေ့ကို တကြော့ပြန်ထွက်လာခဲ့ပါတယ်။ ထွက်ရှိလာပြီးပြီးချင်းမှာပဲ review တွေတဟုန်ထိုးကောင်းသလို အောင်မြင်မှုတွေဆွတ်ခူးနိုင်ခဲ့တဲ့ Hellblade ဂိမ်းဟာ Ninja Theory ရဲ့ ၁၄ နှစ်တာ ပရောဂျက်ကြီးဆိုရင်လည်း မမှားပါဘူး။ သစ်လွင်မှု၊ လျှို့ဝှက်ဆန်းကြယ်မှု၊ ကွဲပြားခြားနားမှုနဲ့ အဆုံးစွန်ရောက်ခံစားချက်တွေပေါင်းစည်းထားတဲ့ Ninja Theory ရဲ့ဂိမ်းအသစ်ဟာ ဂိမ်းတစ်ခုအနေနဲ့ဆိုတာထက် အနုပညာဆန်တဲ့ထုတ်ကုန်တစ်ခုလို့ပြောရင် ပိုမှန်မယ်ထင်ပါတယ်။ ဘာကြောင့် အဲဒီဂိမ်းကိုအနုပညာဆန်တယ်လို့ပြောရတာလဲ? ဘယ်လိုအကြောင်းတွေကြောင့် အားလုံးရဲ့ထိပ်ဆုံးကိုရောက်သွားခဲ့တာလဲ? ဂိမ်းရဲ့အကြောင်းအရာနဲ့ကစားပုံစံဆိုတာတွေကို အားလုံးသေချာစေ့စပ်စွာ သုံးသပ်အကဲဖြတ်နိုင်အောင်လို့ အချက်လေးတွေခွဲပြီး တင်ပြပေးလိုက်ပါတယ်။

ကျောက်ခေတ်နှောင်းမျိုးနွယ်စုကနေအစပြုခဲ့တဲ့ ဇာတ်ကြောင်း

Hellblade: Senua's Sacrifice ဂိမ်းဟာ ဆဲလ်တစ်ဒဏ္ဍာရီနဲ့ နော့စ်ဒဏ္ဍာရီနှစ်ခုကြားထဲမှာရှိခဲ့တဲ့ ကျောက်ခေတ်နှောင်းဗြိတိန်မျိုးနွယ်စုကို အခြေပြုထားပါတယ်။ ဂိမ်းရဲ့အဓိကဇာတ်ကြောင်းဟာ ခံစားချက်ပြင်းထန်တဲ့မိန်းမသားတစ်ဦးအနေနဲ့ လျှို့ဝှက်ဆန်းကြယ်တဲ့ စိတ်ရဲ့လောကပတ်ဝန်းကျင်အသစ်တစ်ခုမှာ ရင်ဆိုင်ကြုံတွေ့ရမယ့်အခက်အခဲတွေအားလုံးကိုဖြတ်ကျော်ပြီး သူမချစ်ရတဲ့ချစ်သူကို သွားရောက်ကယ်တင်တဲ့အကြောင်းပါ။  ဂိမ်းတစ်ခုလုံးမှာကိုယ်ကျင်လည်ရမယ့်နေရာတွေအားလုံးဟာ တကယ်တမ်းမှာ ကိုယ့်စိတ်ရဲ့အတွေးနဲ့ မသိစိတ်ခြောက်ခြားမှုတွေ၊ စိတ်တစ်ခုနောက်ကွယ်က လှည့်ဖြားမှုတွေရဲ့ အမှောင်အုပ်နေတဲ့နေရာတွေဖြစ်ပါတယ်။

ဂိမ်းရဲ့အဓိပ္ပါယ်ကိုဖွင့်ဆိုတဲ့ အဓိကကဏ္ဍသုံးခုက ဘာတွေလဲ

လွတ်လပ်တဲ့ဂိမ်းရေးဆွဲသူအဖွဲ့ဖြစ်တဲ့ Ninja Theory ဟာ Hellblade: Senua's Sacrifice ဂိမ်းကို independent AAA အဆင့်လို့သတ်မှတ်ထားပါတယ်။ ဘာဖြစ်လို့လည်းဆိုတော့ ဂိမ်းတစ်ခုလုံးကို ဘယ်အဖွဲ့အစည်းရဲ့အကူအညီမှမပါဘဲ ထိရောက်တဲ့စိတ်အားလူအားငွေအားသုံးပြီး အကောင်းဆုံးအနေအထားထိရောက်အောင် ကိုယ်တိုင်ကိုယ်ကျဖန်တီးခဲ့တဲ့ဂိမ်းဖြစ်လို့ပါပဲ။ Ninja Theory ရဲ့လွန်ခဲ့တဲ့ ၁၄ နှစ်ကတည်းကရည်ရွယ်ချက်ဟာ ပြောင်မြောက်တဲ့ဂိမ်းကဏ္ဍသုံးခုနဲ့ ဂိမ်းရဲ့အဓိပ္ပါယ်ကိုဖွင့်ဆိုဖို့ပဲဖြစ်ပါတယ်။ အဲဒီကဏ္ဍသုံးရပ်ကတော့ ထူးခြားကွဲပြားတဲ့အတိုက်အခိုက်စနစ်၊ ခိုင်မာတောင့်တင်းပြီး ခံစားသက်ဝင်ဖို့ကောင်းတဲ့ ဇာတ်ကြောင်းနဲ့ မှင်သက်ရှုမောဖွယ် အနုပညာဆန်တဲ့ဂိမ်းပတ်ဝန်းကျင်တို့ပဲဖြစ်ပါတယ်။ အဲဒီလိုရည်ရွယ်ချက်တွေကို Hellblade ဂိမ်းအဖြစ်နဲ့ အကောင်အထည်ဖော်ခဲ့တာပဲဖြစ်ပါတယ်။

အာရုံကြောပညာရှင်၊ ဆရာဝန်များနဲ့ လက်တွဲဆောင်ရွက်မှု

ကိုယ်ချမှတ်လိုက်တဲ့ဆုံးဖြတ်ချက်တွေ၊ သွားတဲ့ခြေလှမ်းတွေ၊ နှိမ်နင်းလိုက်တဲ့အန္တရာယ်တွေရဲ့နောက်မှာ အမြဲတမ်း လွန်ဆွဲနေတဲ့စိတ်ရဲ့ အတွေးတွေရှိနေပါတယ်။ စိတ်ဝေဒနာခံစားနေရတဲ့လူတွေရဲ့ စိတ်ထဲမှာဖြစ်နေတဲ့ အခြေအနေတစ်ရပ်ကို နားလည်သိရှိဖို့အတွက် Ninja Theory ဟာ အာရုံကြောပညာရှင်၊ ဆရာဝန်တွေနဲ့ လက်တွေ့ကွင်းဆင်းပြီး လက်တွဲဆောင်ရွက်ခဲ့ပါတယ်။ ရှုပ်ထွေးဆန်းကြယ်လှတဲ့ လူ့စိတ်အတိမ်အနက်ကို Hellblade: Senua's Sacrifice ဂိမ်းမှာ ကောင်းကောင်းကြီး ဖော်ကျူးပြထားပါတယ်။ ဂိမ်းတစ်ခုလုံးမှာ နောက်ခံစကားပြောပေါင်းမာျးစွာကို တောက်လျှောက်ကြားနေရမယ့်အပြင် ထိန်းမရတဲ့စိတ်ရဲ့အခြေအနေတွေ၊ ထွက်ပေါက်မဲ့တဲ့စိတ်နဲ့ ဖိစီးမှုတွေ၊ အာဃာတ၊ မာန၊ သောက အစရှိတဲ့စိတ်ရဲ့အင်္ဂါရပ်တွေအားလုံးကို Hellblade: Senua's Sacrifice ဂိမ်းမှာ အားလုံးကတွေ့မြင်ခံစားကြရမှာပါ။

စိတ်ရောဂါခံစားနေရတဲ့လူတွေရဲ့ စိတ်ထဲမှာဘာတွေရှိနေမလဲ?

စိတ်မနှံ့သူတွေ၊ စိတ်ရောဂါရှိသူတွေ တစ်ယောက်တည်းဗလုံးဗထွေး စကားတွေပြောနေတာကို အားလုံးတွေ့မြင်ဖူးကြမှာပါ။ တကယ်က ခေါင်းထဲမှာ၊ အကြားအာရုံမှာ စကားသံတွေကြားရတဲ့အတွက် သူတို့ကပြန်ပြီးတုံ့ပြန်တာဖြစ်ပါတယ်။ တကယ်တော့ စိတ်မနှံ့သူတွေရဲ့စိတ်ထဲမှာ စကားသံတွေကြားနေရတယ်ဆိုတာဟာ နောက်ပြောင်ပြီးပြောတဲ့စကားမဟုတ်ပါဘူး။ စိတ်ဝေဒနာတစ်ခုခံစားနေရသူတွေရဲ့ အတွင်းစိတ်မှာလည်း ဖြစ်တည်နေတဲ့ စိတ်အခြေအနေတစ်ရပ်ဆိုတာရှိပါတယ်။ ဒီ Hellblade: Senua's Sacrifice ဂိမ်းမှာ အဲဒီလိုဝေခွဲမရတဲ့ စိတ်ရဲ့အနက်ရှိုင်းဆုံးတစ်နေရာကို အားလုံးကိုခေါ်ဆောင်သွားမှာပါ။ အဲဒီလိုမျိုးထူးဆန်းပြီး လက်တွေ့ဆန်တဲ့အကြောင်းအရာကြောင့် Hellblade ဂိမ်းက အားလုံးထက် ပိုကွဲထွက်သွားခဲ့တာလို့ဆိုရင်လည်း မှားမယ်မထင်ပါဘူး။

ဂိမ်းကစားရမယ့်ပုံစံ၊ ပတ်ဝန်းကျင်လောကနဲ့ အနှစ်ချူပ်

Heavenly Sword နဲ့ DmC တို့မှာကတည်းက Ninja Theory ရဲ့အဓိကကျောရိုးဂိမ်းပုံစံဖြစ်တဲ့ စတိုင်ကျတဲ့အတိုက်အခိုက်စနစ်ကို Hellblade ဂိမ်းမှာ ထည့်သွင်းပေးထားပါတယ်။ ဒါပေမယ့် တိုက်ခိုက်တဲ့ကဏ္ဍဟာ ဂိမ်းတစ်ခုလုံးရဲ့ ၂၀ ရာခိုင်နှုန်းလောက်ပဲရှိပါတယ်။ စူးစမ်းရှာဖွေမှုတွေ၊ နယ်မြေကျင်လည်မှုတွေ၊ အန္တရာယ်တွေကိုရင်ဆိုင်နှိမ်နင်းတာတွေ၊ ရင်သပ်ဖိုမောဖို့ကောင်းတဲ့ ဆန်းကြယ်တဲ့ပတ်ဝန်းကျင်တွေ အားလုံးပေါင်းစည်းပြီး Hellblade: Senua's Sacrifice ဂိမ်းကို ဖန်တီးထားတာဖြစ်ပါတယ်။ ဂိမ်းရဲ့ဇာတ်ကြောင်းက လက်တွေ့အရမ်းဆန်သလို ဆန်းကြယ်ပြီးအနုပညာဆန်ပါတယ်။ ဒီဂိမ်းမှာ သွားရမယ့်နေရာတွေ၊ တွေ့မြင်ရမယ့်အရာတွေ၊ ဖြတ်သန်းကြုံတွေ့ရမယ့် အရာတွေအားလုံးက တကယ့်တကယ် ကိုယ့်စိတ်ထဲမှာပဲဖြစ်နေတယ်ဆိုတဲ့အတွေးဟာ အားလုံးဘဝင်ခိုက်အကြိုက်တွေ့သွားစေတဲ့ အချက်ပဲဖြစ်ပါတယ်။ ဒီတော့ လူသားတွေရဲ့စိတ်ကိုအခြေခံပြီး ထူးခြားဆန်းကြယ်တဲ့ဂုဏ်အင်္ဂါရပ်တွေနဲ့ ပြောင်မြောက်တဲ့ဂိမ်းတစ်ခုကို အနုပညာဆန်ဆန်ဘယ်လိုဖန်တီးထားလဲ သိချင်သူများအဖို့ ၂၀၁၇ ခုနှစ်၊ သြဂုတ်လ ၈ ရက်နေ့မှာ တရားဝင်ထွက်ရှိခဲ့တဲ့ Ninja Theory ရဲ့ Hellblade: Senua's Sacrifice ဂိမ်းကို ဆော့ကြည့်ကြဖို့ ဒီကနေတိုက်တွန်းလိုက်ပါရစေ။

Yan
Ref: empireonline, wikia, news-journal

ဂန္တဝင် Assassin ၄၃ ယောက်ကိုတွေ့မြင်ရမယ့် Assassin Creed: Rebellion မိုဘိုင်းဂိမ်း

နာမည်ကျော်ကြီးဂိမ်းပေါင်းများစွာကို ဖန်တီးခဲ့တဲ့ ပြင်သစ်အခြေစိုက် Ubisoft ဂိမ်းကုမ္မဏီဟာ ဂိမ်းဈေးကွက်မှာလူအများရဲ့အာရုံစိုက်ခြင်းနဲ့ အားပေးမှုကိုတစ်ခဲနက်ရရှိထားတဲ့ ဂိမ်းကုမ္မဏီတစ်ခုဖြစ်ပါတယ်။ Ubisoft ရဲ့ အထင်ကရနာမည်ကျော်ဂိမ်းတစ်ခုဖြစ်တဲ့ Assassin Creed ဂိမ်းဇာတ်လမ်းတွဲဟာ အခုဆိုရင်ရုပ်ရှင်တောင်မှထွက်ရှိခဲ့ပြီဖြစ်ပြီး AC ဂိမ်းရဲ့အခွေသစ် Origins ဟာလည်း ယခုနှစ်အောက်တိုဘာလမှာထွက်ရှိလာတော့မှာပါ။ ပလက်ဖောင်းအမျိုးမျိုးမှာဆော့ကစားနိုင်တဲ့ AC ဂိမ်းတွေဟာ အခုဆိုရင်မိုဘိုင်းဘက်ကို နောက်တစ်ကြော့ခြေဆန့်လို့လာပါပြီ။ Bloodlines တို့ Pirates တို့လို မိုဘိုင်းပလက်ဖောင်းမှာဆော့ကစားနိုင်တဲ့ AC ဂိမ်းတွေရှိခဲ့ပေမယ့် ဒီတစ်ခေါက်မှာတော့ Ubisoft အနေနဲ့ ကစားသူပရိသတ်တွေကို ဂိမ်းအရသာသစ်ပေးစွမ်းပြီး မိုဘိုင်းဈေးကွက်ဖက်ကို ထပ်မံချဲ့ထွင်ချင်တဲ့ပုံပါပဲ။ AC ဂိမ်းအများစုဟာ RPG ဂိမ်းပုံစံတွေဖြစ်ပေမယ့် အခု Rebellion မှာတော့ RPG နဲ့ Strategy ရောယှက်ထားပြီး ၁၅ ရာစုအတွင်းဖြစ်ပွားခဲ့တဲ့ စပိန်နိုင်ငံဘာသာရေးစစ်ကြီးအတွင်းမှာ ဇာတ်အိမ်တည်ထားပါတယ်။ Ezio, Aguilar, Shao Jun, Claudia တို့အခြားသောဂန္တဝင် assassin ပေါင်း ၄၃ ယောက်နဲ့အတူ brotherhood ကြီးကို တည်ဆောက်ပြီး Templar တွေကို အမြစ်ဖြတ်ချေမှုန်းရမှာပါ။

AC ဇာတ်တစ်ဇာတ်ချင်းစီရဲ့အထင်ကရ assassin တွေကို တစ်နေရာတည်းမှာ တစ်စုတစည်းတည်းတွေ့မြင်ရမယ့်အပြင် Rebellion ဂိမ်းမှာပဲ သီးသန့်တွေ့မြင်နိုင်မယ့်ဇာတ်ကောင်ပေါင်း ၂၀ ကိုပါ ထည့်သွင်းပေးထားပါတယ်။ ကိုယ့်ရဲ့ brotherhood ဌာနချူပ်မှာ အရင်ဆုံးလေ့ကျင့်ရမှာဖြစ်ပြီး ဂိမ်းနဲ့အသားကျသွားတာနဲ့အမျှ ပစ္စည်းအသစ်တွေနဲ့ အသုံးအဆောင်တွေကို ပြုလုပ်နိုင်မှာပါ။ ကိုယ့်အဆင့်တက်သွားတာနဲ့ ထပ်မံသွားလာနိုင်မယ့်နေရာအသစ်တွေ ပွင့်လာမယ့်အပြင် ကိုယ့်ရဲ့လက်ပါးစေ assassin သုံးယောက်ကို တာဝန်ခွဲပေးပြီး မတူကွဲပြားတဲ့မစ်ရှင်တွေကို လုပ်ဆောင်ခိုင်းနိုင်ပါတယ်။ တချို့မစ်ရှင်တွေကို အရည်အသွေးကွဲပြားတဲ့ assassin တွေနဲ့ပူးပေါင်းပြီးလုပ်ဆောင်ရမှာဖြစ်သလို မစ်ရှစ်တွေရဲ့အောင်မြင်နှုန်းဟာ assassin တွေရဲ့လုပ်ရပ်တွေအပေါ်မူတည်ပြီး ကွဲပြားသွားမှာပါ။

 ယေဘုယျအနေနဲ့ ပုံမှန်မစ်ရှင်တွေမှာ ကိုယ့်ဇာတ်ကောင်ကိုအဆင့်မြှင့်တင်နိုင်မယ့် အသုံးအဆောင်ပစ္စည်းတွေရရှိမှာဖြစ်ပြီး ဓါးပြတိုက်တဲ့မစ်ရှင်တွေမှာတော့ လက်နက်အသုံးအဆောင်တွေပြုလုပ်နိုင်မယ့် ကုန်ကြမ်းပစ္စည်းတွေရရှိမှာပါ။ တခြားသော assassin တွေကိုရယူဖို့အတွက်ဆိုရင်တော့ သူတို့ရဲ့ DNA အပိုင်းအစတွေကို လိုက်လံရှာဖွေတာတွေ ဒါမှမဟုတ် legacy မစ်ရှင်တွေကိုဆောင်ရွက်တာတွေ လုပ်ဆောင်ရမှာဖြစ်ပါတယ်။ အခုလာမယ့် Assassin Creed: Rebellion မိုဘိုင်းဂိမ်းမှာဆိုရင် သမိုင်းကြောင်းဘက်ဖြစ်ရပ်တွေကို ပိုမိုဦးတည်သွားမှာဖြစ်ပြီး အစွမ်းထက် assassin တွေကိုစုဆောင်းတာတွေ၊ brotherhood ဌာနချူပ်ကိုပိုမိုအားတောင့်လာစေမယ့် ပြင်ဆင်ချက်တွေ၊ သူရဲကောင်းစွမ်းရည်နဲ့ အရည်အသွေးတွေကိုအဆင့်မြှင့်တာတွေပါဝင်ပါတယ်။ အဲဒီတော့ ကိုယ်သွားရမယ့်နေရာတွေ၊ လုပ်ဆောင်ရမယ့်မစ်ရှင်တွေမှာ တွေ့သမျှ templar ရန်သူအားလုံးကိုနှိမ်နင်းသွားမလား၊ တိတ်ဆိတ်အေးဆေးစွာပဲ ဖြတ်ကျော်မလားဆိုတာကတော့ ဂိမ်မာတွေအပေါ်မှာမူတည်ပါတယ်။

Yan
Ref: Ubisoft, Wikia

၁၉ ရာစု၊ ကပ်ရောဂါဆိုက်လန်ဒန်မြို့မှာ သွေးစုပ်ဖုတ်ကောင်အဖြစ်ဆော့ကစားရမယ့် Vampyr

သွေးစုပ်ဖုတ်ကောင်တွေရဲ့လောကမှာရှင်သန်ပြီး သူတို့ရဲ့ဘဝကိုလေ့လာချင်တယ်ဆိုရင်တော့ Vampire: The Masquerade ဟာ PC ရဲ့ အကောင်းဆုံးဒရယ်ဂူလာဂိမ်းတစ်ခုပါ။ ဒါပေမယ့်အချိန်တွေကြာသွားတာနဲ့အမျှ ဖုတ်ကောင်လောကနဲ့ပတ်သတ်တဲ့ အတွေ့အကြုံသစ်တွေ၊ ဂိမ်းသစ်တွေကို ဂိမ်မာတွေတောင့်တလာကြမှာပါ။ အဲဒီလိုသွေးစုပ်ဖုတ်ကောင်တွေနဲ့ ပြည့်နှက်နေတဲ့ခေတ်ကာလကို တစ်ခေါက်ပြန်သွားလိုသူများအတွက်ဆိုရင်တော့ ၁၉ ရာစု၊ လန်ဒန်မြို့မှာဇာတ်အိမ်တည်ထားတဲ့ Vampyr ဂိမ်းဟာ အသင့်တော်ဆုံးရွေးချယ်မှုဖြစ်မှာပါ။ Life Is Strange ဂိမ်းစီးရီးကိုဖန်တီးခဲ့တဲ့ ပြင်သစ်နိုင်ငံအခြေစိုက် Dontnod ဂိမ်းစတူဒီယိုဟာ Vampyr ဂိမ်းရဲ့ဖန်တီးသူအဖွဲ့ဖြစ်ပြီး  Vampyr ဂိမ်းမှာ သွေးဆာလောင်နေတဲ့သွေးစုပ်ဖုတ်ကောင်တစ်ယောက်ရဲ့ဘဝကို ကိုယ်ကျကိုယ်ကျဝင်ရောက်ခံစားနိုင်မှာဖြစ်သလို ကိုယ့်ပတ်ဝန်းကျင်ကအပြစ်မဲ့တဲ့လူသားတွေရဲ့ ကံကြမ္မာနဲ့ လန်ဒန်မြို့ကြီးရဲ့ရလဒ်ဟာ ကိုယ့်ရဲ့ဆုံးဖြတ်ချက်အပေါ်မှာမူတည်နေပါတယ်။ E3 2016 ပွဲမှာတုန်းက ဂိမ်းဖြန့်ချိသူအဖွဲ့ဖြစ်တဲ့ Focus Home Entertainment ကနေပြီး Vampyr ဂိမ်းရဲ့ထွေလာကို ပရိသတ်တွေဆီထုတ်ဖော်ပြသခဲ့ပါတယ်။ အမှောင်လွှမ်းနေတဲ့ ၁၉ ရာစုလန်ဒန်မြို့ ဆိုးသွမ်းလှတဲ့ရောဂါကပ်ဘေးကြီးနဲ့ သွေးစုပ်ဖုတ်ကောင်တွေရဲ့ဇာတ်လမ်း၊ အနာဂတ်မှာကျရောက်လာမယ့်အန္တရာယ်ကို မီးမောင်းထိုးထားတဲ့ဇာတ်ဖြစ်တာကြောင့် တွေ့မြင်ကြည့်ရှုခဲ့ကြတဲ့ ပရိသတ်မာျးအားလုံးဘဝင်ခိုက် အကြိုက်တွေ့သွားခဲ့ပါတယ်။ ဂိမ်းသစ်ဆယ်မျိုးထွက်ရင်မှ ရှားရှားပါးပါး တစ်ခွေလောက်ထွက်လာတတ်တဲ့ ဒရယ်ဂူလာနောက်ခံဇာတ်ကြောင်းနဲ့ ဒီနှစ်ကုန်မှာထွက်ရှိလာမယ်လို့ခန့်မှန်းထားတဲ့ Vampyr နဲ့ဂိမ်းပတ်သက်သမျှတွေကို ဒီကတဆင့်ဂိမ်မာများသိရှိစေဖို့အတွက် ဖော်ပြပေးလိုက်ပါတယ်။

အသွေးအသားထဲကဖုတ်ကောင်ဗီဇနဲ့ ဆရာဝန် Doctor Jonathan Red

ဂိမ်းရဲ့အဓိကဇာတ်ကောင်ဖြစ်သူ Doctor Jonathan Reid ဟာ တည်ငြိမ်အေးဆေးတဲ့ဆရာဝန်တစ်ယောက်ပါ။ Jonathan ဟာဖြောင့်မတ်တဲ့လူတော်တစ်ယောက်ဖြစ်ပြီး ဆေးပညာကိုပြန်လည်သင်ကြားပို့ချတဲ့ဆေးဆရာတစ်ယောက်ဖြစ်သလို သွေးစုပ်ဖုတ်ကောင်ဗီဇရောယှက်နေတဲ့ ဇာတ်ကောင်တစ်ယောက်ဖြစ်ပါတယ်။ Jonathan ဟာသူ့အသွေးအသားထဲမှာဖြစ်တည်နေတဲ့ သွေးစုပ်ဖုတ်ကောင်ဗီဇတွေကြောင့် သူ့လူနာတွေနဲ့လူ့ပတ်ဝန်းကျင် ဘယ်တော့မှမထိခိုက်စေရဘူးလို့ စိတ်သန္နိဋ္ဌာန်ချထားသူတစ်ယောက်လည်းဖြစ်ပါတယ်။ ဒါပေမယ့် ဂိမ်းတစ်လျှောက်လုံးမှာ သူ့ရဲ့လူသားစိတ်နဲ့ ဖုတ်ကောင်ဗီဇလွန်ဆွဲမှုတွေက ဇာတ်လမ်းရဲ့အချက်အခြာကျတဲ့ အခန်းကဏ္ဍဖြစ်လာမှာပါ။

သမိုင်းကြောင်းထဲကစပိန်ကပ်ရောဂါကပ်ဘေးနဲ့ ၁၉၁၈ ခုနှစ် လန်ဒန်မြို့

Vampyr ဂိမ်းကို ၁၉၁၈ ခုနှစ်၊ လန်ဒန်မြို့မှာအဓိကကျောရိုးဇာတ်အိမ်တည်ထားပါတယ်။ အပြစ်မဲ့တဲ့အသက်ဝိညာဉ်ပေါင်းမြောက်များစွာကိုနှုတ်ယူခဲ့တဲ့ တုပ်ကွေးကပ်ရောဂါဘေးကြီးဟာ လန်ဒန်မြို့မှာရဲ့နေရာတိုင်းမှာ ကိန်းအောင်းတည်ရှိနေပါတယ်။ အဲဒီလိုအချိန်မျိုးမှာ ရောဂါခံစားနေရတဲ့လူသားတွေရဲ့အသက်ကို ရသလောက်ကယ်တင်ပေးဖို့တာဝန်ဟာ ဆရာဝန်တစ်ယောက်ဖြစ်တဲ့ Reid ရဲ့ပုခုံးပေါ်မှာ အလိုလိုကျရောက်လာပါတယ်။ အဲဒီတော့ ကိုယ်ကလူတွေကိုပဲလိုက်ကယ်တင်မှာလား၊ ဒါမှမဟုတ်ရင် အခြား side quest တွေကိုပဲလိုက်လုပ်မှာလားဆိုတာ ဂိမ်မာတွေကိုယ်တိုင်ပဲ ဆုံးဖြတ်ရမှာပါ။ ကိုယ်အခြေချပြီး လုပ်ငန်းတွေဆောင်ရွက်ရမယ့်နေရာက ဆေးရုံဖြစ်ပြီး ဆေးရုံတစ်ဝိုက်ပတ်ဝန်းကျင်ဟာ သွေးစုပ်ဖုတ်ကောင်နှိမ်နင်းသူတွေ၊ ဒရယ်ဂူလာမုဆိုးတွေ ဝင်ရောက်အကြမ်းဖက်လို့မရတဲ့ ကြားနေရာတစ်ခုဖြစ်ပါတယ်။

စိတ်ဝင်စားဖို့ကောင်းတဲ့ leveling ဂိမ်းတွင်းလုပ်ဆောင်ချက်

Vampyr ဂိမ်းလို့အမည်ပေးထားတဲ့အတိုင်း ဂိမ်းပတ်ဝန်းကျင်၊ ဇာတ်လမ်းအသွားအလာနဲ့ ကစားဟန်ဟာ ဂိမ်းကိုပြန်လည်ထင်ဟပ်စေပါတယ်။ ကိုယ်ဟာဘယ်လောက်ပဲစိတ်ထားဖြူစင်တဲ့ ဆရာဝန်ဖြစ်နေပါစေ သွေးစုပ်ဖုတ်ကောင်တစ်ဖြစ်လဲဖြစ်နေတဲ့အတွက် ကိုယ့်ရဲ့အစွမ်းတွေကိုမြှင့်တင်ဖို့ဆိုရင်တော့ လူတွေရဲ့အသွေးအသားကို ဝါးမြိုစားသုံးရမှာပါပဲ။ ဒီနေရာမှာတစ်ခုရှိတာက ကိုယ်စားသုံးလိုက်တဲ့လူအပေါ်မှာမူတည်ပြီး ကိုယ့်ရဲ့စွမ်းအင်တိုးမြင့်လာမှု ကွာခြားသွားမယ်ဆိုတဲ့အချက်ပါပဲ။ လမ်းပြင်ထွက်ပြီးတွေ့သမျှလူတွေကိုလိုက်လံတိုက်ခိုက်နေရုံနဲ့ အဆင့်မမြင့်သွားပါဘူး၊ ဂိမ်းကချမှတ်ထားတဲ့စနစ်အတိုင်း လူတစ်ယောက်ရဲ့အသွေးအသားကို စားသုံးလိုက်မှသာ leveling အထမြောက်မှာဖြစ်ပြီး ကိုယ့်စွမ်းအားပြည့်ဝမှုပမာဏဟာ ကိုယ်စားသုံးလိုက်တဲ့လူရဲ့ကောင်းမွန်သန့်စင်ခြင်းအပေါ်မှာ မူတည်နေတာဖြစ်ပါတယ်။ အဲဒါတင်မကသေးပါဘူး၊ လူတစ်ယောက်ကိုစားသုံးလိုက်ပြီဆိုရင် အဲဒီလူရဲ့ဘဝနဲ့ မှတ်ဉာဏ်အချက်အလက်တွေကိုပါ ကိုယ်ကသိရှိသွားပြီး သူနဲ့ပတ်သက်တဲ့ကွင်းဆက်တွေကို ချိတ်ဆက်မိသွားတဲ့အပြင် ဖြစ်လာမယ့် နောက်ဆက်တွဲရလဒ်တွေကိုပါကြိုခန့်မှန်းလို့ရပါတယ်။

သွေးစုတ်ဖုပ်ကောင်မိတ်ဆွေနဲ့ ရန်သူ

ကိုယ်ဟာသွေးစုတ်ဖုပ်ကောင်တစ်ယောက်ဖြစ်နေတဲ့အလျောက် ကိုယ်နဲ့အမျိုးတူသူတွေဟာလည်း ကိုယ့်ပတ်ဝန်းကျင်မှာရှိနေမယ်ဆိုတာကိုတော့ ငြင်းပယ်လို့မရတဲ့အချက်တစ်ချက်ဖြစ်သလို အဲဒီအချက်ကြောင့်ပဲ Vampyr ဟာပိုပြီးစိတ်ဝင်စားဖို့ကောင်းသွားခဲ့တာပါ။ အမျိုးတူသွေးစုပ်ဖုတ်ကောင်တွေနဲ့ မုချတွေ့မယ်ဆိုတာကို ခေါင်းဆောင်ဒီဇိုင်နာဖြစ်သူ Florent Guillaume က E3 2016 ပွဲမှာတုန်းက အရိပ်အမြွက်ပြောပြသွားပါတယ်၊ ဒါပေမယ့် တစ်ချို့သွေးစုပ်ဖုတ်ကောင်တွေဟာ ကိုယ်ရဲ့မိတ်ဆွေတွေဖြစ်ပြီး ကိုယ်လုပ်ဆောင်တဲ့ကိစ္စတွေမှာတောင် ဝင်ရောက်ကူညီမယ့်သူတွေသလို တချို့သွေးစုပ်ဖုတ်ကောင်တွေဟာ အပြစ်မဲ့လူသားတွေရဲ့အသက်ကို လိုက်လံအန္တရာယ်ပြုနေတဲ့ ဆိုးသွမ်းတဲ့သွေးစုပ်ဖုတ်ကောင်တွေပါ။ ဒါတင်မကသေးဘဲ လန်ဒန်မြို့ရဲ့အမှောင်အမှိုက်တွေကို အမြစ်ပြတ်ရှင်းလင်းနေတဲ့ သွေးစုပ်ဖုတ်ကောင်မုဆိုးလူသားတွေကိုလည်း ရင်ဆိုင်ရမှာပါ။

ကိုယ့်ရဲ့လုပ်ရပ်တွေရဲ့ရလဒ်အပေါ်မူတည်နေတဲ့ လန်ဒန်မြို့ရဲ့ကံကြမ္မာ

သမားရိုးကျ role playing ဂိမ်းတွေလိုမျိုး Vampyr မှာ အဓိက quest, side quest နဲ့ကျယ်ပြန့်စွာသွားလာနိုင်မယ့် ဂိမ်းလောကပါဝင်ပါတယ်။ Vampyr ဂိမ်းမှာ စိတ်ဝင်စားဖို့ကောင်းတဲ့အချက်က မတူကွဲပြားတဲ့အရည်အချင်းတွေ၊ စွမ်းရည်တွေကိုမြှင့်တင်ပြီး ဇာတ်ကောင် Reid ကိုပိုမိုအစွမ်းထက်အောင်လုပ်တဲ့နေရာမှာ ကိုယ့်ရဲ့လုပ်ရပ်က ကပ်ရောဂါကျရောက်နေတဲ့လန်ဒန်မြို့ကြီးကိုပါ အကျိုးသက်ရောက်စေတယ်ဆိုတာပါပဲ။ အပြစ်ကင်းစင်တဲ့လူသားတွေကိုရွေးချယ်ပြီး ဝါးမြိုရင်စွမ်းအားပမာဏပိုတိုးတယ်ဆိုပေမယ့် အပြစ်မဲ့တဲ့လူသားတစ်ယောက် ဒီလောကကြီးမှာဆုံးရှုံးသွားတဲ့ရလဒ်က ကိုယ်ကျင်လည်ရာလန်ဒန်မြို့ကြီးကို အကျိုးသက်ရောက်ပါတယ်။ ဒီတော့အမှောင်တွေထပ်မလွှမ်းစေချင်ရင် လူတွေကိုမစားရုံဘဲရှိသလို လူတွေကိုမစားရင်လည်း စွမ်းအားတွေကတိုးလာမှာမဟုတ်တဲ့အတွက် ဂိမ်မာများကလိမ္မာပါးနပ်စွာ ဆုံးဖြတ်ချက်ချဖို့လိုပါတယ်။

အထက်မှာပြောပြခဲ့သလောက်ဆိုရင်တော့ တော်တော်ကိုစိတ်ဝင်စားဖို့ကောင်းတဲ့ဂိမ်းတစ်ခုဖြစ်နေပါပြီ။ အခုလိုအချိန်မျိုး နည်းပညာဘက်ကို အလေးပေးထားတဲ့ဂိမ်းတွေချည်း တောက်လျှောက်ထွက်နေတဲ့ကာလအတွင်းမှာ သွေးစုပ်ဖုတ်ကောင်ဇာတ်ကြောင်းနဲ့ လန်ဒန်မြို့နောက်ခံဂိမ်းဆိုတော့ ဂိမ်မာများအတွက်တော့ လုံးဝကွက်တိပါပဲ။ Vampyr ဂိမ်းကို ၂၀၁၇၊ နိုဝင်ဘာလမှာထွက်ရှိမယ်လို့လျာထားပြီး လောလောဆယ်တော့ PS4 ပလက်ဖောင်းပေါ်မှာသာ သီးသန့်ဆော့ကစားနိုင်မယ်လို့ သိရပါတယ်။

Yan
Ref: gamereactor, polygon, wiki