ဆယ်စုနှစ်ပေါင်းများစွာထိ ဖက်ရှင်ကျနေမယ့် Nike နဲ့ Playstation ရဲ့ရှားပါးစာရင်းဝင် Air Force One ဖိနပ်သစ်

ဂိမ်းလောကရဲ့ပင်မမျက်နှာစာမှာ ရှေ့ဆုံးကရပ်တည်နေတဲ့ Sony နဲ့ Playstation ဟာ အိုင်ဒီယာအသစ်အဆန်းတွေကို အမြဲတမ်းအကောင်အထည်ဖော်ခဲ့သူပီသစွာပဲ ဒီတစ်နှစ်မှာလည်း အားလုံးထက် ခြေတစ်လှမ်းစောသွားပြန်ပါတယ်။ အဲဒါကတော့ ဂိမ်းလောကတင်မက ဖက်ရှင်လောကတစ်ဝှမ်းလုံးပါ ပါးစပ်အဟောင်းသားနဲ့ ငေးမောကြည့်ရှုရမယ့် Nike နဲ့ Playstation တို့ရဲ့ ခေတ်မှီအသပ်ရပ်ဆုံးဖန်တီးမှုတစ်ခု ဖြစ်ပါတယ်။ ကိုယ့်နယ်ပယ်အလိုက် ထိပ်ဆုံးမှာအသီးသီး ရပ်တည်နေတဲ့ အဖွဲ့အစည်းကြီးနှစ်ခုအနေနဲ့ အခုလိုမျိုး ထုတ်ကုန်တစ်ခုကို ပူးပေါင်းဖန်တီးဖို့ဆိုတာ တကယ့်ကို ခန့်မှန်းတွက်ဆရခက်သလောက် ဆန်းသစ်ထူးကဲတဲ့  ကြုံတောင့်ကြုံခဲပူးပေါင်းမှုတစ်ခု ဖြစ်ပြန်ပါတယ်။ 

အဲဒီလိုလက်တွဲပူးပေါင်းမှုကို တိုက်ရိုက်အကောင်အထည်ဖော်ခဲ့ပုံကတော့ ကွဲပြားခြားနားတဲ့ Nike တံဆိပ် sneaker မျိုးစုံရှိတဲ့ထဲကမှ ခေတ်မှီအတင့်တယ်ဆုံးဖြစ်သလို လူကြိုက်လည်းများတဲ့ Nike ရဲ့ Air Force One Sneaker ဖိနပ်မော်ဒယ်နဲ့ Playstation ဂိမ်းစက် console ရဲ့ဒီဇိုင်းသွင်ပြင်တို့ကို အချိုးကျကျပေါင်းစပ်ပြီး အရည်အသွေးမြင့်ရှားပါးတဲ့ Playstation Nike Air Force One ဖိနပ်ကို ဖန်တီးထုတ်လုပ်ခဲ့တာပဲ ဖြစ်ပါတယ်။ လွန်ခဲ့တဲ့ ၁၂ နှစ်၊ ၂၀၀၆ ခုနှစ်တုန်းက PS1 ဂိမ်းစက်အငွေ့အသက် ရောယှက်ထားတဲ့ Nike x Playstation Air Force One Low ဖိနပ်ကို ထုတ်လုပ်ခဲ့တာကြောင့် အခုလိုမျိုး Nike နဲ့ Playstation တို့အတူပူးပေါင်းဖန်တီးတဲ့ နောက်ထပ်ဖိနပ်မော်ဒယ်သစ်သစ် ထွက်ရှိလာဖို့ကိုပဲ သက်တမ်းကာလ ၁၂ နှစ်ကြာမြင့်တယ်လို့ ဆိုနိုင်ပါတယ်။ အထူးထုတ် Nike ဖိနပ်ဖြစ်တဲ့အတွက် မြင့်မားတဲ့အရည်အသွေးနဲ့ စစ်မှန်ရှားပါးမှု၊ ပိရိသေသပ်တဲ့ဒီဇိုင်းနဲ့ အနုစိတ်ဖန်တီးမှုလက်ရာတို့ကြောင့် တစ်ခေါက်မြင်လိုက်ရုံနဲ့ ထူးကဲတဲ့ဖိနပ်မော်ဒယ်ဖြစ်ကြောင်း သိရှိနိုင်ပါတယ်။ 

ဒီ Playstation Air Force One ကို အသေးစိတ်ခွဲခြမ်းစိတ်ဖြာကြည့်တဲ့အခါ ဖိနပ်အပြင်ဖက်သား (upper) ကို မည်းနက်တောက်ပြောင်တဲ့ အထူးလည်သာနဲ့အသေအချာချူပ်လုပ်ထားတယ်၊ Nike အမှတ်တံဆိပ်ရဲ့သင်္ကေတဖြစ်တဲ့ အမှန်ခြစ်အတွင်းမှာ Playstation ရဲ့ထင်ရှားတဲ့ လေးထောင့်၊၊ အမှား အစရှိတဲ့ ခလုတ်အမှတ်အသားတွေကို အထင်းသားမြင်ရအောင် မြှုပ်ပေးထားပြီး ဖိနပ်ရဲ့နောက်ဖနောင့် (heel support) မှာ Playstation ရဲ့ PS အမှတ်တံဆိပ်နဲ့ ခလုတ်အသီးသီးရဲ့သင်္ကေတတွေကို ထပ်မံဖော်ပြထားတာ တွေ့မြင်ရမှာဖြစ်ပါတယ်။ နောက်ပြီး ဖိနပ်ကိုကန့်သတ်အရေအတွက်သာ ထုတ်ပေးထားတဲ့အပြင် ပိုက်ဆံရှိသူတိုင်းလည်း မဝယ်ယူနိုင်ပါဘူး။ ယခုနှစ် ၂၀၁၈ ခုနှစ်ရဲ့ဇွန်လမှာ ကျင်းပခဲ့တဲ့ E3 ပွဲတစ်ပွဲတည်းမှာပဲ ဒီရှားပါးဖိနပ်ကို ကံစမ်းမဲပေါက်ပြီး ရရှိနိုင်မယ့်အခွင့်အရေးပေးထားတာပါ။ ပွဲပြီးဆုံးချိန်ကတည်းက ယခုအချိန်အထိ ဖိနပ်ကို ဘယ်နေရာမှာမှ တရားဝင်မရောင်းချသေးသလို ဈေးနှုန်းကိုလည်း မပြောပြထားပါဘူး။ သို့ပေမယ့် မကြာတော့တဲ့အချိန်မှာတော့ ပိုမိုကျယ်ပြန့်တဲ့ sneaker ချစ်သူတွေအတွက် ရရှိဝယ်ယူနိုင်အောင်စီစဉ်ပေးသွားမယ်လို့တော့ သိရပါတယ်။ Nike နဲ့ Playstation က ပြောရေးဆိုခွင့်ရှိသူများကတော့ Nike ရဲ့တရားဝင် ဝက်ဘ်ဆိုဒ်မှာ စောင့်ကြည့်ပေးကြဖို့ အားလုံးကိုအသိပေးထားပါတယ်။ 

တစ်ချက်လောက်ကြည့်လိုက်တာနဲ့ လိုချင်သွားမယ့် Nike နဲ့ Playstation ရဲ့ Air Force One ဖိနပ်ကို အားလုံးကြည့်ရှုနိုင်စေဖို့ ပုံတွေနဲ့တကွ ဖော်ပြပေးလိုက်ပါတယ် (၂၀၀၆ ခုနှစ်တုန်းက ထွက်ရှိခဲ့တဲ့ Air Force One Low ကိုပါ ထည့်သွင်းဖော်ပြပေးထားပါတယ်) ပုံလေးတွေကြည့်ပြီး လိုချင်စိတ်ကိုချူပ်တည်းကြစို့ဗျာ။

Yan

Ref: footwearsnews, nike.com

သူမတူတဲ့သွေးပျက်ခြောက်ခြားစရာများနဲ့ အားလုံးဆီ တစ်ကျော့ပြန်လာမယ့် Resident Evil 2: Rem‌ake

မကြာခင်ရောက်ရှိလာတော့မယ့် ၂၀၁၉ ခုနှစ်ဟာ ဂိမ်မာတွေအားလုံးရဲ့ရွှေနှစ်ဖြစ်သလို ပီတီအဝေဖြာရဆုံးကာလလို့ ဆိုရင်လည်း မှားမယ်မထင်ပါဘူး။ ၂၀၁၈ ရဲ့ E3 ပွဲမှာ ချပြထုတ်ပြန်ခဲ့တဲ့ ဂိမ်းကြေညာချက်တွေပြီးတဲ့နောက် ရှေ့နှစ်မှာ ဆိုက်ဆိုက်မြိုက်မြိုက်ထွက်ရှိလာမယ့် ဂိမ်းတွေကို ဂိမ်းချစ်သူထုကြီးက အားကြိုးမာန်တတ် တစ်ခဲနက် စောင့်မျှော်လို့နေပါတယ်။ အဲဒီထဲကမှ ဂိမ်မာတွေအထူးတလည် မျှော်လင့်ချက်ကြီးစွာ စောင့်နေကြတဲ့ ဂိမ်းကောင်းတွေထဲကတစ်ခုကတော့ အားလုံးနဲ့ရင်းနှီးပြီးသားဖြစ်တဲ့ Capcom ရဲ့ Resident Evil စီးရီးထဲက Survival Horror ဂိမ်းအမျိုးအစားသစ် Resident Evil 2: Remastered အခွေပဲ ဖြစ်ပါတယ်။ စတင်ထွက်ရှိတဲ့ ၁၉၉၆ ခုနှစ်မှာ ကမ္ဘာကျော်ဂိမ်းတစ်ခုဖြစ်လာခဲ့တဲ့ Capcom ရဲ့ Resident Evil ဂိမ်းစီးရီးဟာ အရှိန်အဟုန်ကောင်းကောင်းနဲ့ ဆယ်စုနှစ်သုံးခုနီးပါးတိုင်အောင် Survival Horror ရဲ့အဓိပ္ပါယ်ကို RE စီးရီးနဲ့ ဖွင့်ဆိုခဲ့ပါတယ်။ အခုလာမယ့် ၂၀၁၉ ခုနှစ်ရဲ့ Resident Evil 2: Remastered အခွေမှာ ဘယ်လိုအရာတွေပါဝင်လာမလဲ? ဘာတွေကိုမျှော်လင့်လို့ရမလဲ? အစရှိတာတွေကို ဂိမ်မာတွေ သိရှိစေဖို့ ဒီစာစောင်မှာ ဖော်ပြပေးလိုက်ပါတယ်။ 

၁၉၉၈ ခုနှစ်ကထွက်ရှိခဲ့တဲ့ Resident Evil 2 ကို ပြန်လည်အသက်သွင်းဖန်တီးခြင်း

RE စီးရီးဟာ ၁၉၉၆ ခုနစ်မှာထွက်ရှိလာပေမယ့် တကယ်တမ်း ၁၉၉၈ မှာထုတ်ပေးခဲ့တဲ့ Resident Evil 2 ဒုတိယအခွေ ထွက်လာမှသာ ကမ္ဘာတစ်ဝှမ်းအတိုင်းအတာနဲ့ ပေါက်မြောက်သွားခဲ့တာဖြစ်ပါတယ်။ နောက်နှစ် ၂၀၁၉ မှာ ထွက်ရှိလာမယ့် အခွေသစ်မှာ အရာအားလုံးကို အသေးစိတ်ပြန်လည် ဖန်တီးရေးဆွဲပြီး ခေတ်သစ်ဂိမ်းအင်ဂျင်နဲ့ မော်ဒန်ဂရုပ်ဖစ်ရုပ်ထွက်တို့ကို ပေါင်းစည်းပြီး ဂိမ်ဖန်တီးရေးဆွဲသူပညာရှင်ပေါင်း ၈၀၀ ကျော်တို့က ပါဝင်အားဖြည့်ပေးထားတဲ့ Resident Evil 2: Remastered ခွေသစ်ဖြစ်ပါတယ်။

T-Virus ပြန့်နှံ့ဝင်ရောက်လာတဲ့ Raccoon မြို့ရဲ့ သွေးပျက်ဖွယ်ဇွန်ဘီကပ်ဘေး

T-Virus စတင်ပြန့်နှံ့ခဲ့ပြီး အချိန်နှစ်လအကြာမှာတော့ အေးချမ်းသာယာမှုအပြည့်နဲ့ စည်ကားတဲ့ Raccoon မြို့လေးကို ဇွန်ဘီတွေ ကူးစက်ဝင်ရောက်လာပြီး တစ်မြို့လုံး သွေးပျက်ခြောက်ခြားဖွယ်အတိ ဖြစ်သွားခဲ့ပါတယ်။ ကမ္ဘာပျက်သလို အသက်လုပြေးနေကြတဲ့ လူတွေအကြားမှာ အားလုံးနီးတူပဲ လွတ်မြောက်ရှင်သန်နိုင်ဖို့အတွက် ဖန်တီးထားတဲ့ဂိမ်းဇာတ်ကြောင်းပေါ်မှာ ဂိမ်မာတွေ ကိုယ်တိုင် လက်တွေ့ကျကျရင်ဆိုင်ကျော်ဖြတ်ရမှာပါ။ 

အဓိကဂိမ်းဇာတ်ကောင်နေရာက Raccoon မြို့ရဲတပ်ဖွဲ့ဝင် Leon S.Kennedy နဲ့ ကောလိပ်ကျောင်းသူ Claire Redfield 

RE စီးရီးရဲ့မင်းသားလို့ တင်စားသမုတ်ကြတဲ့ Leon S.Kennedy ဟာ Resident Evil 4 အခွေမှာစပြီး ဂိမ်မာများရဲ့ အသည်းစွဲဖြစ်ခဲ့တာပါ။ ရွှေအိုရောင်ဆံရှည်ကို မျက်နှာတစ်ခြမ်းရှေ့မှာ ဝဲနေအောင် ချထားပြီး ပစ္စတိုတစ်လက်ကိုသာ လက်နက်အဖြစ်အသုံးပြုတဲ့ အမေရိကန်အထူးအေ့ဂျင့် Leon ကို Playstation 2 ခေတ်ကို ဖြတ်ကျော်ဖူးတဲ့ဂိမ်မာတိုင်း အမှတ်တရရှိကြပါတယ်။ ဒီအခွေမှာတော့ Leon ကို Raccoon မြို့ရဲဌာနက ရဲတပ်သားငယ်လေးအဖြစ် တွေ့ုမြင်ကြရမှာဖြစ်ပြီး BSAA တပ်ဖွဲ့က Chris Redfield ရဲ့ညီမဖြစ်တဲ့ Claire Redfield ကိုတော့ ငယ်ရွယ်တဲ့ ကောလိပ်ကျောင်းသူအဖြစ် အဓိကဇာတ်ဆောင်နှစ်ယောက်နေရာက ဆော့ကစားရမှာဖြစ်ပါတယ်။

သည်းထိတ်ရင်ဖိုခြောက်ခြားမှုကေို အသားပေးမယ့် ဇွန်ဘီအပြည့်နဲ့ဂိမ်းလောက

နောက်ဆုံးထွက်ရှိခဲ့တဲ့ Resident Evil 7 မှာ Survival Horror ရဲ့အဓိကမူလရင်းမြစ်ဖြစ်တဲ့ ရင်ဖိုစိတ်လှုပ်ရှားမှုကို တစ်ဖန်ပြန်လည်ဆန်းသစ်အောင် ဖန်တီးပေးခဲ့လို့ နာမည်ကောင်းများစွာ ဆွတ်ခူးနိုင်ခဲ့တဲ့ RE စီးရီးဟာ ဒီတစ်ခေါက်လာမယ့် Resident Evil 2: Remastered မှာလည်း ထိတ်လန့်သည်းဖိုမှုကို အသားပေးထားပြန်ပါတယ်။ ၁၉၉၈ ခုနှစ်က ဂိမ်းအပြင်အဆင်နဲ့ ပတ်ဝန်းကျင်ကို အမှတ်ရထင်ဟပ်အောင် အတတ်နိုင်ဆုံးဖန်တီးပေးထားပြီး Leon နဲ့ Claire ကိုယ်နှစ်သက်ရာဇာတ်ကောင်နဲ့အတူ သူမတူတဲ့အကြောက်တရားကို ပေးစွမ်းသွားမယ်လို့ ယူဆရပါတယ်။

ထွက်ရှိလာမယ့်ရက်အတိအကျ၊ ဆော့ကစားနိုင်မယ့် ပလက်ဖောင်းတွေနဲ့ အနှစ်ချူပ်

ဂိမ်မာများအတွက် သတင်းကောင်းတစ်ခုကတော့ ဒီ Resident Evil 2: Remastered ကို သိပ်ပြီးမစောင့်ရတော့ဘူးဆိုတာပါပဲ။ ထွက်ရှိလာမယ့် ရက်အတိအကျကို ပြောရမယ်ဆိုရင်တော့ လာမယ့်နှစ် ၂၀၁၉ ခုနှစ်ရဲ့ပထမဦးဆုံး ဇန်နဝါရီ်လ ၂၅ ရက်မှာ တရားဝင်ထုတ်ပေးသွားမယ်လို့ အတိအလင်းကြေညာထားပြီး Playstation 4, Xbox One, PC အစရှိတဲ့ ဂိမ်းပလက်ဖောင်းတိုင်းမှာ ဆော့ကစားနိုင်မှာဖြစ်ပါတယ်။ ဒါ့အပြင် ဂိမ်းတွင်းလက်နက်သစ်၊ ဝတ်စုံသစ်၊ ဂိမ်းဇာတ်လမ်းသစ် dlc နဲ့ ရုပ်ပြပိုစတာ ပါဝင်တဲ့ Collector's Edition ကိုလည်း ကြိုတင်မှာယူနိုင်မယ်လို့ သိရပြီး မြောက်အမေရိကတစ်ဝိုက်အတွက်ဆိုရင် ဒေါ်လာ ၂၀၀ တန်ဖိုး၊ ကနေဒါကနေမှာယူလိုသူများအတွက် ဒေါ်လာ ၂၃၀ တန်ဖိုးကျသင့်မှာဖြစ်ပြီး အထက်မှာဖော်ပြခဲ့တဲ့ နယ်မြေများမှာပဲ Resident Evil 2: Remastered (Collector's Edition) ကို ဝယ်ယူနိုင်မှာဖြစ်ပါတယ်။ 

Yan

Ref: Gamespot, Wikia

ဆယ်စုနှစ်တစ်ခုတိုင်အောင် စောင့်မျှော်ခဲ့ရတဲ့ Devil May Cry 5 ဂိမ်းသစ်ဟာ အားလုံးရဲ့မျှော်လင့်ချက်တွေကို ဖြည့်ဆည်းပေးနိုင်မှာလား?

၂၀၁၈ ခုနှစ်ရဲ့ E3 ပွဲကြီးစတင်ပြီဖြစ်တဲ့အတွက် အခုအချိန်ဟာ ဂိမ်မာတွေအားလုံးမျှော်လင့်နေကြတဲ့ အခိုက်အတန့်ဖြစ်နေပါတယ်။ ပွဲစပြီဆိုတာနဲ့တစ်ပြိုင်နက် ဂိမ်းဖန်တီးသူတွေနဲ့ ဂိမ်းကုမ္ပဏီတွေဟာ သူတို့ဖန်တီးထားတဲ့ ဂိမ်းအသစ်တွေကို ဆော့ကစားနိုင်မယ့် ပလက်ဖောင်းတွေနဲ့တကွ ထုတ်ပြလာကြပါတယ်။ E3 ပွဲကြေညာချက်တွေကနေတဆင့် အနာဂတ်မှာထွက်ရှိလာမယ့် ဂိမ်းကောင်းပေါင်းမြောက်မြားစွာကို သိရှိနိုင်ပြီး ဘယ်သူမှမထင်မှတ်ထားတဲ့ ဂိမ်းတွေကိုလည်း မျှော်လင့်လို့ရပါတယ်။ ဇွန်လ ၁၁ ရက်နေ့မှာ စတင်ပြီဖြစ်တဲ့ E3 ပွဲကြီးမှာ ပထမဦးဆုံး ထုတ်ဖော်ရှင်းလင်းမှုပြုလုပ်သူကတော့ Microsoft ပဲဖြစ်ပြီး Xbox One ပလက်ဖောင်းမှာဆော့နိုင်မယ့် ဂိမ်းတွေကိုချပြရင်းနဲ့ Devil May Cry 5 ဂိမ်းထွေလာကိုပါ တစ်ခါတည်းထုတ်ပြခဲ့တာဖြစ်ပါတယ်။ ဂိမ်းထွေလာဟာ နှစ်မိနှစ်ကျော်ရှည်လျားပြီး ဂိမ်းကစားဟန်ပုံစံနဲ့ ဇာတ်ကွက်အချို့ကို အသားပေးထည့်သွင်းဖော်ပြထားတာကို တွေ့မြင်ရမှာဖြစ်ပါတယ်။ နောက်ထပ်လာမယ့် Devil May Cry ဂိမ်းနဲ့ပတ်သက်တဲ့ ကောလဟာလတွေနဲ့ ဖန်တီးမှုတွေစတင်နေပြီဆိုတဲ့ သတင်းတွေဟာ လွန်ခဲ့တဲ့နှစ်နှစ်လောက်ကတည်းက အင်တာနက်ပေါ်မှာပြန့်နှံ့ခဲ့ပေမယ့် Capcom ဘက်ကပြောရေးဆိုခွင့်ရှိသူတွေအနေနဲ့ ဘယ်လိုအတည်ပြုချက်မှ ထုတ်ပြန်ခြင်းမပြုခဲ့ပါဘူး။ ဒါပေမယ့် ၂၀၁၈ ခုနှစ်၊ ဇွန်လ ၁၁ ရက်နေ့မှာတော့ Devil May Cry ဂိမ်းစီးရီးကို ပင်တိုင်ဖန်တီးရေးဆွဲသူ ဒါရိုက်တာဖြစ်တဲ့ Hideaki Itsuno ကိုယ်တိုင်ကနေပြီး E3 ပွဲရဲ့စင်မြင့်ထက်မှာ "Devil May Cry စီးရီးရဲ့ စစ်မှန်တဲ့နောက်ဆက်တွဲဂိမ်းသစ်" လို့ပြောကြားပြီး ဂိမ်းထွေလာကို ချပြခဲ့တာဖြစ်ပါတယ်။ ဒီတော့ ဆယ်စုနှစ်တစ်ခုတိုင်အောင် ဂိမ်မာတွေစောင့်ဆိုင်းခဲ့ရတဲ့ Devil May Cry 5 အနေနဲ့ တကယ်တမ်းထွက်ရှိလာမယ့်အချိန်မှာ ဘယ်လိုမျိုးပုံစံနဲ့ ထွက်ရှိလာမလဲ? အခုချပြခဲ့တဲ့ထွေလာကိုကြည့်ပြီး ဘာတွေကိုခန့်မှန်းနိုင်မလဲ? ဇာတ်လမ်းဇာတ်အိမ် တည်ဆောက်ဖန်တီးထားပုံကရော ဘယ်လိုရှိသလဲ? အစရှိတာတွေအားလုံးကို ခြုံငုံသုံးသပ်ပြီး တစ်ချက်လောက်ဆွေးနွေးကြစို့ဗျာ။

 ပိုမိုရင့်ကျက်ပြီး ကွဲပြားဆန်းသစ်တဲ့ပုံစံနဲ့တွေ့ရမယ့် အဓိကဇာတ်ဆောင် Nero

၂၀၀၈ ခုနှစ်ကထွက်ရှိခဲ့တဲ့ Devil May Cry 4 မှာ Dante မဟုတ်တဲ့ အဓိကဇာတ်ဆောင်တစ်ယောက်ကို အသားပေးပွဲထုတ်ထားတာ တွေ့ရမှာဖြစ်ပါတယ်။ အဲဒါကတော့ Order of the Swords ဘာသာရေးဂိုဏ်းရဲ့အဖွဲ့ဝင်တစ်ယောက်ဖြစ်တဲ့ ဆယ်ကျော်သက်အရွယ် Nero ပဲဖြစ်ပါတယ်။ Dante ငယ်ရွယ်စဉ်တုန်းက ပုံပန်းသွင်ပြင်၊ စိတ်နေသဘောထားနဲ့ ဟော့ဟော့ရမ်းရမ်းနိုင်တဲ့ ဇာတ်ကောင်သစ် Nero ကို စီးရီးရဲ့အဓိကဇာတ်ဆောင်အဖြစ် ပထမနေရာမှာထားပြီး ဂိမ်မာများအားလုံးက ဆော့ကစားခဲ့ရတာဖြစ်ပါတယ်။ အခုလာမယ့် Devil May Cry 5 မှာတော့ ဖြစ်ရပ်တွေအားလုံးအဆုံးသတ်သွားတဲ့နောက်ပိုင်း နှစ်အတော်အတန်အချိန်ကုန်လွန်ခဲ့ပြီး ဆယ်ကျော်သက် Nero ဟာ အသက်နှစ်ဆယ့်ငါးနှစ်ဝန်းကျင်ဖြစ်လာပါပြီ။ အရင်ကလိုဆံပင်ငွေရောင်ကို မျက်နှာရှေ့မှာဝဲနေအောင်မချထားတော့ဘဲ ခေါင်းဆောင်းပါတဲ့ အနက်ရောင် ကုတ်အကျီရှည်နဲ့အတူ သူကိုင်ဆောင်နေကျလက်နက်တွေဖြစ်တဲ့ Red Queen ဓါးနဲ့ Blue Rose ပစ္စတိုသေနတ်ကို ကိုင်ဆောင်ထားတာတွေ့ရမှာဖြစ်ပါတယ်။

Rico ဆိုတဲ့ပါတနာသစ်နဲ့အတူ Devil Hunter တစ်ယောက်ဖြစ်လာခဲ့တဲ့ Nero

Devil May Cry ဂိမ်းစီးရီးရဲ့အဓိကဇာတ်ဆောင်ဟာ နတ်ဆိုးခေါင်းဆောင် Sparda ရဲ့သား Dante ဖြစ်ပါတယ်။ Dante ဟာနတ်ဆိုးသွေးတစ်ပိုင်း၊ လူသားတစ်ပိုင်းရောယှက်နေတဲ့ နတ်ဆိုးနှိမ်နင်းသူ Devil Hunter တစ်ယောက်လည်းဖြစ်သလို စီးရီးရဲ့ဗီလိန်ဖြစ်တဲ့ Vergil ရဲ့အမြွာညီအစ်ကိုလည်းဖြစ်ပါတယ်။ ဒါပေမယ့် ၂၀၁၉ ခုနှစ်မှာတော့ အဲဒီနေရာကို Nero ကလက်ပြောင်းယူလိုက်ပုံပါပဲ။ ဘာဖြစ်လို့လည်းဆိုတော့ Nero ဟာ စီးရီးရဲ့ ဇာတ်ကောင်သစ်တစ်ယောက်ဖြစ်တဲ့ Nico ဆိုတဲ့အမျိုးသမီးပါတနာနဲ့အတူ ပူးပေါင်းလှုပ်ရှားပြီး နတ်ဆိုးတွေကို hunt လုပ်လို့ပဲဖြစ်ပါတယ်။ Nero နဲ့ Nico ဟာ အပြာရောင်နီယွန်မီးလိုင်းတွေနဲ့ Devil May Cry စကားလုံးပုံဖော်ထားတဲ့ ပေါင်မုန့်ကားကို စီးနင်းနေတာကိုလည်း ထွေလာမှာအားလုံးတွေ့ခဲ့ရမှာပါ။ ဒါ့အပြင်ထွေလာအရ Nico ဟာ Nero ရဲ့လက်နက်ပိုင်းဆိုင်ရာလိုအပ်ချက်တွေနဲ့ ပတ်သက်ပြီး အထောက်အပံ့ပေးတဲ့သူလည်းဖြစ်ပါတယ်။

နယ်မြေသစ်ဖြစ်တဲ့ Red Grave မြို့ကို တခြားကမ္ဘာကနတ်ဆိုးတွေ ကျူးကျော်ဝင်ရောက်လာမှု

Devil May Cry 4 ကို ရှေးကျတဲ့မြို့ပြအဆောက်အုံတွေရှိတဲ့ Fortune City မှာ ဇာတ်အိမ်တည်ထားပြီး Devil May Cry 5 ကိုတော့ နယ်မြေသစ်ဖြစ်တဲ့ Red Grave City (အုတ်ဂူနီမြို့တော်) မှာ ဇာတ်အိမ်တည်ထားပါတယ်။ ဒီမြို့ဟာ Reboot DmC ထဲမှာ ပါဝင်တဲ့ မြေအောက်ကမ္ဘာ Limbo နဲ့ အနည်းငယ်ပုံစံတူပြီး လက်ရှိခေတ်တိုက်တာအဆောက်အအုံတွေရှိတာကိုလည်း တွေ့ရမှာပါ။ လက်ရှိအချိန်ထိ သိရသမျှတော့ နတ်ဆိုးတွေဟာ Demon Tree လို့အမည်ရတဲ့ ဝင်ပေါက်နေရာကနေတဆင့် Red Grave City ကိုကူးသန်းဝင်ရောက်လာကြတာဖြစ်ပါတယ်။ အဲဒီအချိန်မှာ မြို့ရဲ့စစ်တပ်နဲ့ နတ်ဆိုးတွေကြားက တိုက်ပွဲတွေဟာ လုံးဝပြင်းထန်နေပြီး ပျက်သုန်းလုနီးပါးဖြစ်နေတဲ့ Red Grave City ရဲ့အခြေအနေကိုလည်း တွေ့မြင်ရမှာဖြစ်ပါတယ်။ များပြားလှတဲ့ နတ်ဆိုးမိစ္ဆာတွေရဲ့ ကျူးကျော်ဝင်ရောက်လာမှုဟာ လက်ရှိမှာ Devil Hunter တစ်ယောက်ဖြစ်နေတဲ့ Nero ကို စိန်ခေါ်လိုက်တဲ့သဘောဖြစ်ပါတယ်။ ဒါပေမယ့် ဂိမ်းထဲမှာ Devil Hunter သုံးယောက်ပါဝင်လိမ့်မယ်လို့ဆိုတဲ့အပြင် လေနှင်ရာလွင့်နေတဲ့ Dante ရဲ့သတင်းအစအနကိုလည်း ဘာမှမကြားသိရပါဘူး။ ဒီတော့ Dante နဲ့ Nero အပြင် နောက်ထပ်တွေ့ရမယ့် Devil Hunter ဆိုသူက ဘယ်သူလဲဆိုတာ စဉ်းစားစရာပါပဲ။

Devil May Cry 5 တရားဝင်ဝက်ဘ်ဆိုဒ်မှာ ဖော်ပြထားတဲ့ ဂိမ်းဇာတ်လမ်းအကျဉ်းချူပ်စာပိုဒ် 

ဂိမ်းထွေလာမထွက်လာခင် ရက်အနည်းအလိုမှာ Capcom ကနေပြီး Devil May Cry 5 ရဲ့တရားဝင်ဝက်ဘ်ဆိုဒ်လိပ်စာကို မှတ်ပုံတင်ခဲ့ပြီး အဲဒီကိစ္စဟာလည်း ဂိမ်းထွက်လာဖို့အတွက် သေချာလုံလောက်တဲ့သတင်းတစ်ခုဖြစ်ခဲ့ပါတယ်။ အခုအချိန်မှာတော့ အဲဒီဝက်ဘ်ဆိုဒ်ထဲကို ဝင်ရောက်နိုင်ပြီဖြစ်ပြီး ဝက်ဘ်ဆိုဒ်မှာ ဂိမ်းရဲ့ဇာတ်လမ်းအကျဉ်းကို ဖော်ပြထားတာတွေ့နိုင်ပါတယ်။ အဲဒီစာပိုဒ်အရဆိုရင်တော့ "အတိတ်ကဖြစ်ရပ်တွေအပြီး နှစ်တွေကုန်လွန်ခဲ့ပြီ။ အားလုံးမေ့လျော့နေခဲ့တဲ့ နတ်ဆိုးလောကရဲ့ ကျူးကျော်မှုတွေဟာ ဒီကမ္ဘာမြေကိုတစ်ကြော့ပြန် ရောက်ရှိလို့လာတယ်။ Red Grave City မှာအမြစ်တွယ်ပြီး ကြီးထွားရှင်သန်နေတဲ့ Demon Tree ကနေတဆင့် နတ်ဆိုးမိစ္ဆာတွေ ဝင်ရောက်လာကြတယ်။ အဲဒီလိုကျူးကျော်ဝင်ရောက်မှုကို တားဆီးဖို့ Dante ရဲ့မဟာမိတ်ဖြစ်တဲ့ Nero အပေါ်မှာ တာဝန်အပြည့်ရှိတဲ့အတွက် Nico ဆိုတဲ့အမျိုးသမီးပါတနာတစ်ယောက်နဲ့အတူ Devil May Cry လို့အမည်ပေးထားတဲ့ ကားကိုမောင်းပြီး Red Grave City ဆီ ဦးတည်ထွက်လာခဲ့တယ်" လို့ရေးထားတာကို တွေ့ရမှာပါ။  Nero ရဲ့စွမ်းအားဗဟိုချက်ဖြစ်တဲ့ Devil Bringer လက်နေရာမှာ အခုဆိုရင် စက်ရုပ်လက်နဲ့အစားထိုးထားပြီး ထွေလာမှာ Nero ရဲ့လက်ကို ဘယ်သူမှန်းမသိရသေးတဲ့ ဇာတ်ကောင်တစ်ယောက်က ဖြတ်ယူလိုက်တာကိုလည်း တွေ့ခဲ့ရပါတယ်။ ဒီတော့ တကယ့်ဇာတ်လမ်းက ဘယ်လိုလာဦးမလဲဆိုတာတော့ အတော်လေးစိတ်ဝင်စားစရာကောင်းနေပါတယ်။

Dante နဲ့ Nero တို့ရဲ့ပေါင်းစည်းမှု၊ Vergil နဲ့ Nero အကြားက ဆက်နွယ်မှုနဲ့ အနှစ်ချူပ်

ဒီလောက်ဆိုရင်တော့ ဇာတ်လမ်းအရိပ်အခြေကို အားလုံးခန့်မှန်းလို့ရလောက်ပြီ ထင်ပါတယ်။ ထွေလာအရဆိုရင် Nero ရဲ့လက် အဖြတ်ခံထားတဲ့နေရာကနေ ဇာတ်လမ်းစနိုင်ပြီး ခရီးတစ်ဝက်လောက်ရောက်မှာ Dante ရဲ့အရိပ်အယောင်ကို တွေ့နိုင်ခြေများပါတယ်။ ဒါ့အပြင် Nero နဲ့ Vergil တို့ကြားက ဆက်နွယ်မှုနဲ့ Nero လက်ကိုဖြတ်သွားတဲ့သူက ဘယ်သူဖြစ်မလဲဆိုတာကလည်း စဉ်းစားစရာပါပဲ။ တစ်ခုတွေးစရာရှိတာက Vergil ကိုင်ဆောင်တဲ့လက်နက်၊ Nero ရဲ့ Devil Bringer လက်ထဲမှာရှိနေတဲ့ Yamato ဓါးဟာ တခြားကမ္ဘာက နတ်ဆိုးတွေကို ခေါ်ယူဖို့အတွက်ဝင်ပေါက်အနေနဲ့ အသုံးပြုလို့ရပါတယ်။ Yamato ဓါးဟာ နတ်ဆိုးတွေကိုဖိတ်ခေါ်ဖို့ လိုအပ်ချက်တစ်ခုဖြစ်တဲ့အတွက် အဲဒီအမည်မသိဇာတ်ကောင်ဟာ Nero လက်ကိုဖြတ်ခဲ့တာလား? ဒါမှမဟုတ် ပျက်သုန်းတော့မယ့် Red Grave City နဲ့ ကမ္ဘာကြီးကို အချိန်မှီကယ်တင်ဖို့အတွက် ဖြေရှင်းချက်တွေမပေးဘဲ Nero ဆီက Yamato ဓါးကိုယူခဲ့တာလား? Devil May Cry ဂိမ်းစီးရီးရဲ့အခရာကျတဲ့ဇာတ်ကောင်ဖြစ်တဲ့ Vergil ဟာလည်း ဒီဂိမ်းထဲမှာ လူကောင်းဖြစ်မလား၊ ဗီလိန်ဖြစ်မလားဆိုတာ မသိရသေးတဲ့အပြင် အစအနကိုတောင် လုံးဝမတွေ့ရသေးပါဘူး။ ဂိမ်းထွက်ရှိမယ့်ရက်စွဲကတော့ ၂၀၁၉ ခုနှစ်၊ နွေရာသီဖြစ်ပြီး Xbox One, PS4 နဲ့ PC ပလက်ဖောင်းသုံးမျိုးအပေါ်မှာ ဆော့ကစားနိုင်မယ်လို့ သိရပါတယ်။ ပရိသတ်တွေအနေနဲ့ကတော့ လက်ရှိအချိန်မှာ နောက်ထပ်ဘာတွေထပ်လာမလဲဆိုတာကို စောင့်ဆိုင်းနေကြဖို့ပဲ လိုပါတယ်။ Devil May Cry စီးရီးရဲ့အမာခံပရိသတ်တစ်ယောက်ဖြစ်တဲ့ ကျွန်တော့်အနေနဲ့လည်း ဆယ်စုနှစ်တစ်ခုတိုင်အောင် စောင့်မျှော်ခဲ့ရပြီးမှ ထွက်ရှိလာတဲ့ Devil May Cry 5 အပေါ်မှာ ကျေနပ်အားရမိတာတော့ အမှန်ပါ။ လက်ရှိအချိန်မှာလည်း ဂိမ်းအသစ်ကြေညာချက်ပေါင်းများစွာရှိနေတဲ့အတွက် ဒီ Devil May Cry 5 စာစောင်ကို ဒီမှာအဆုံးသတ်ကြောင်းပြောရင်း နောက်ထပ်ဂိမ်းဆောင်းပါးတွေမှာ ပြန်လည်တွေ့ဆုံကြပါမယ်။

Yan
Ref: Polygon, Gamespot, Kotaku

ရဲရင့်တဲ့စပါတန်စစ်သည်တစ်ယောက်အဖြစ် အတိတ်ကအမှန်တရားကို ရှာဖွေရမယ့် Assassin’s Creed: Odyssey

ဂိမ်မာတွေအားလုံး ရင်ခုန်စိတ်လှုပ်ရှားစွာ စောင့်မျှော်နေကြတဲ့ E3 ဂိမ်းပွဲတော်ကြီးကတော့ အားလုံးနဲ့လက်တကမ်းမှာရှိနေပါပြီ။ ဇွန်လ ၁၁ မှာစတင်ကျင်းပမှာဖြစ်တဲ့ ၂၀၁၈ ခုနှစ်ရဲ့ E3 ပွဲမှာ ကမ္ဘာ့နယ်ပယ်အသီးသီးက နာမည်ကျော်ဂိမ်းကုမ္ပဏီတွေနဲ့ ဂိမ်းဖန်တီးထုတ်လုပ်သူတွေဟာ ဂိမ်မာတွေအားလုံးမျှော်လင့်နေကြတဲ့ အပြောင်မြောက်ဆုံး ဂိမ်းကောင်းဂိမ်းသစ်တွေကို ကိုယ့်ရဲ့အချိန်ဇယားနဲ့အလိုက် ထုတ်ဖော်ပြသသွားမှာဖြစ်ပါတယ်။ စွဲမက်စရာကောင်းတဲ့ မှင်သက်ဖွယ် ဂိမ်းထွေလာတွေ၊ ဂိမ်းအသစ်ရဲ့သူမတူတဲ့ ကစားဟန်တွေ၊ အားလုံးမမျှော်လင့်ထားတဲ့ဂိမ်းအသစ် ကြေညာချက်တွေ အစရှိတာတွေဟာ ဂိမ်မာတွေအသည်းထဲစွဲစေတဲ့ E3 ပွဲရဲ့အခန်းကဏ္ဍတွေ ဖြစ်ပါတယ်။ ပွဲမှာ မျိုးဆက်သစ်ဂိမ်းတွေကို ထုတ်ဖော်ပြသလေ့ရှိသလို အရင်နှစ် E3 ပွဲတွေမှာ အမြည်းချပြခဲ့တဲ့ဂိမ်းသစ်တွေရဲ့ နောက်ထပ်ထွေလာအသစ်တွေနဲ့ တရားဝင်ထွက်ရှိမယ့်ရက်စွဲတွေကို အတိအလင်းကြေညာချက်တွေ ထုတ်ပြန်ကြပါတယ်။ ဂိမ်းကိုချစ်တဲ့ဂိမ်မာတွေသာမက ဂိမ်းဖန်တီးထုတ်လုပ်တဲ့ဂိမ်းကုမ္ပဏီတွေပါ တညီတညွတ်တည်း တက်ရောက်ကြတဲ့ အခုနှစ် E3 ပွဲမှာလည်း အားလုံး ပါးစပ်အဟောင်းသားဖြစ်သွားစေမယ့် အမိုက်စားဂိမ်းအသစ်တွေ ရှိနေပါတယ်။ အဲဒီလို ဂိမ်းသစ်တွေထဲက တစ်ခုကတော့ Ubisoft ဂိမ်းကုမ္ပဏီရဲ့အအောင်မြင်ဆုံးဂိမ်းစီးရီးတစ်ခုဖြစ်တဲ့ Assassin’s Creed ရဲ့ ဂိမ်းသစ်ပဲဖြစ်ပါတယ်။ ဟုတ်ပါတယ်၊ AC စီးရီးတွဲရဲ့နောက်ဆုံးအခွေဖြစ်တဲ့ Origins အခွေဟာ ယမန်နှစ် အောက်တိုဘာလမှာထွက်ရှိလာခဲ့တာဖြစ်ပြီး Ubisoft အတွက်အောင်မြင်မှုအတိုင်းအတာတစ်ခုကို ဆွတ်ခူးပေးခဲ့တဲ့ဂိမ်းလို့ဆိုရင်လည်း မမှားပါဘူး။ Origins နဲ့ပတ်သက်တဲ့ ဂိမ်းသတင်းနဲ့ အကြောင်းအရာတွေဟာ အခုအချိန်ထိ ဂိမ်မာတွေကြားထဲမှာ ပြောမဆုံးဘဲဖြစ်နေပေမယ့် ခြေလှမ်းတွေသွက်တဲ့ Ubisoft အနေနဲ့ တစ်နှစ်တောင်မပြည့်သေးတဲ့အချိန်ကာလအတွင်းမှာ Odyssey လို့အမည်ရတဲ့ နောက်ထပ် AC ဂိမ်းသစ်ကို အပြီးသတ်ဖန်တီးရေးဆွဲနိုင်ခဲ့ပါတယ်။ ဒီသတင်းကိုသိသိရချင်းပဲ ဂိမ်မာတွေအားလုံး မှင်သက်အံ့သြသွားရသလို ကျွန်တော်ကိုယ်တိုင်လည်း Ubisoft ရဲ့မြန်ဆန်လှတဲ့ ဂိမ်းဖန်တီးမှုအဆင့်ဆင့်ကို ကြည့်ပြီး ဝေခွဲရခက်ခဲ့ပါတယ်။ ဘာကြောင့်လဲဆိုတော့ နှိုင်းယှဉ်ကြည့်မယ်ဆိုရင် Capcom အနေနဲ့ Devil May Cry 5 ဂိမ်းသစ်ကိုထုတ်ပေးဖို့ ဆယ်နှစ်နီးပါးအချိန်ယူခဲ့ရပြီး Ubisoft ကတော့ တစ်နှစ်မပြည့်တဲ့အချိန်အတွင်းမှာ Odyssey ဆိုတဲ့ AC ဂိမ်းအသစ်ကို ချပြနိုင်ခဲ့လို့ဖြစ်ပါတယ်။ ဒီတော့ မကြာခင်လာတော့မယ့် E3 ပွဲမှာတွေ့ရမယ့် Assassin’s Creed: Odyssey ဂိမ်းအသစ်ဟာ ဘယ်လိုဖြစ်မလဲ? ဘယ်လိုမျိုးပြောင်းလဲမှုတွေနဲ့ ကစားဟန်အသစ်တွေကို ထည့်သွင်းထားလဲ? ဇာတ်အိမ်တည်ထားတဲ့သမိုင်းကြောင်းနဲ့ ဂိမ်းပတ်ဝန်းကျင်ကရော ဘယ်လိုရှိလဲ? အစရှိတာတွေကို ဂိမ်မာတွေအားလုံးသိရှိစေဖို့ သိရသမျှအချက်တွေစုစည်းပြီး ဒီစာစောင်မှာ ဖော်ပြပေးလိုက်ပါတယ်။

ဂိမ်းရဲ့ဇာတ်အိမ်တည်ရာ ရှေးခေတ်ဂရိမြို့နဲ့ စပါတန်စစ်သူရဲကောင်းတွေ

အားလုံးသိကြတဲ့အတိုင်း AC ဂိမ်းတိုင်းဟာ ကမ္ဘာ့သမိုင်းတစ်လျှောက်ဖြစ်ပွားခဲ့တဲ့ နာမည်ကျော်စစ်ပွဲကာလတွေအပေါ်မှာ ဇာတ်အိမ်တည်လေ့ရှိပါတယ်။ Assassin တစ်ယောက်အနေနဲ့ AC ဂိမ်းတိုင်းမှာကိုယ်ရင်ဆိုင်ရတဲ့ ရန်သူတွေဟာ သမိုင်းကြောင်းတွေထဲမှာ တကယ်ရှိခဲ့ကြသူတွေဖြစ်ပါတယ်။ Ubisoft အနေနဲ့ AC ဂိမ်းတွေကို ရောမခေတ်၊ ပြင်သစ်၊ လန်ဒန်၊ အမေရိကန်နဲ့ ကာရီဘီယန်ကျွန်းစုတွေအထိ ဇာတ်ကြောင်းဖြန့်ကျက်ခဲ့ပြီး အခုတစ်ခေါက်မှာတော့ နာမည်ကျော်စပါတန်စစ်သည်တွေ မွေးဖွားရာနေရပ်ဖြစ်တဲ့ ရှေးခေတ်ဂရိမြို့မှာ ဇာတ်အိမ်တည်ထားပါတယ်။ ကိုယ်ဟာ Assassin တစ်ယောက်ဖြစ်မလား? စပါတန်စစ်သည်တစ်ယောက်ဖြစ်မလားဆိုတာကတော့ စိတ်ဝင်စားဖွယ်စောင့်ကြည့်ရမှာပါပဲ။ 

AC စီးရီးရဲ့ ရှိရင်းစွဲဂိမ်းကစားဟန်ထဲကနေ ကွဲထွက်မယ့် ဂိမ်းပုံစံအသစ်

နောက်ဆုံးထွက်ရှိခဲ့တဲ့ Assassin’s Creed: Origins ခွေမှာ နဂိုမူလရှိခဲ့တဲ့ဂိမ်းကစားဟန်ထဲကနေ ကွဲပြားတဲ့ ဂိမ်းတွင်းလုပ်ဆောင်ချက်အသစ်တွေကို ထည့်သွင်းထားပါတယ်။ လက်နက်ဖန်တီးတာတွေ၊ ရန်သူ့ဆီချဉ်းကပ်မှုပုံစံအသစ်တွေနဲ့ အတိုက်အခိုက်လုပ်ဆောင်ချက်တွေကို ပုံစံအသစ်တစ်ခုဖြစ်အောင် ပြောင်းလဲထားပါတယ်။ AC Rogue အခွေကနေစပြီး Origins အထိ တစတစပြောင်းလဲလာခဲ့တဲ့ ဂိမ်းကစားဟန်အပေါ်မှာ ဂိမ်မာအချို့အသားမကျကြသလို ပိုမိုကောင်းမွန်လာတယ်လို့ယူဆတဲ့ ဂိမ်မာတွေလည်းရှိပါတယ်။ အသေးစိတ်ကိုတော့ အသေအချာမသိရသေးပေမယ့် Origins အခွေမှာလိုအပ်ခဲ့တဲ့ ဂိမ်းတွင်းလုပ်ဆောင်ချက်တွေကို ပြန်လည်ပြင်ဆင်မွန်းမံပြီး အခုလာမယ့် Odyssey မှာ ထည့်သွင်းသွားမယ်လို့သိရပါတယ်။ 

ကြေးစားလုပ်ကြံသူဘဝကနေ ကြီးမြတ်တဲ့ စပါတန်စစ်သည်တစ်ယောက်အဖြစ်သို့

Odyssey ဆိုတဲ့စကားလုံးကို အဓိပ္ပါယ်ဖွင့်ဆိုရမယ်ဆိုရင် “ဖြတ်သန်းခဲ့တဲ့ခရီးရှည်” လို့ဆိုနိုင်ပါတယ်။ ဂိမ်းရဲ့အဓိကဇာတ်ကောင်အနေနဲ့ ရှေးခေတ်ဂရိမြို့မှာ ဘယ်လိုမျိုးကြမ်းတမ်းခက်ထန်တဲ့ ခရီးလမ်းကိုဖြတ်သန်း လျှောက်လှမ်းခဲ့ရသလဲဆိုတာကတော့ အားလုံးစောင့်ကြည့်ရမှာဖြစ်ပါတယ်။ ဇာတ်လမ်းကိုအကျဉ်းချူပ်ဖော်ပြထားတဲ့ စာပိုဒ်အရတော့ “ကိုယ့်ကံကြမ္မာရဲ့ ပဲ့ကိုင်ရှင်က ကိုယ်ကိုယ်တိုင်ပဲဖြစ်တယ်။ ကိုယ်ဖြတ်သန်းခဲ့တဲ့ဘဝခရီးလမ်းတစ်လျှောက်မှာ  ကြီးမြတ်တဲ့စပါတန်စစ်သည်တစ်ယောက်ဖြစ်လာဖို့အတွက် ကိုယ့်သမိုင်းကိုယ်ရေးရမယ်။ စွန့်စားခန်းတွေနဲ့ပြည့်နှက်နေတဲ့ ဒီလမ်းခရီးမှာ ကိုယ့်ရဲ့ဆုံးဖြတ်ချက်မှန်သမျှဟာ အသက်တမျှအရေးပါတယ်။ အတိတ်က အမှန်တရားကိုထုတ်ဖော်ဖို့အတွက် မိသားစုရဲ့ပစ်ပယ်ခြင်းကိုခံခဲ့ရတဲ့ ကြေးစားလူသတ်သမားဘဝကနေ စပါတန်စစ်သားတစ်ယောက်ဖြစ်လာရမယ်” လို့ဆိုထားတာကို တွေ့ရမှာဖြစ်ပါတယ်။ ဒီစာပိုဒ်အရဆိုရင် ဂိမ်းအတွင်းမှာ ကိုယ်ပိုင်ဆုံးဖြတ်ချက်ပေးရမယ့် ဂိမ်းစနစ်ပါဝင်မယ်လို့ ယူဆနိုင်ပြီး RPG ပိုဆန်လာစေအောင် လွတ်လပ်တဲ့ရွေးချယ်မှုစနစ်ပါဝင်လာတဲ့အပြင် ကိုယ့်ဆုံးဖြတ်ချက်အပေါ်မူတည်ပြီး ဇာတ်အိမ်ပြောင်းလဲသွားမှာဖြစ်ပါတယ်။ ဒီအချက်တွေအရ ဒီ Odyssey အခွေဟာ AC စီးရီးထဲမှာမှ လုံးဝကိုကွဲထွက်တဲ့ကစားဟန်နဲ့ အရသာသစ်ကိုပေးစွမ်းမယ့်အခွေဖြစ်တယ်လို့ ကောက်ချက်ချနိုင်ပါတယ်။ 

စပါတန်သမိုင်းကြောင်းကိုပြန်လည်ထင်ဟပ်မယ့် ဇာတ်ကွက်တွေနဲ့ ရာဇဝင်တွင်မစ်ရှင်တွေ

ရှေးခေတ်ဂရိမြို့နဲ့ စပါတန်စစ်သည်တွေကို အခြေပြုပြီးရိုက်ကူးဖန်တီးထားတဲ့ ရုပ်ရှင်ဇာတ်ကားတွေနဲ့ ဂိမ်းပေါင်းများစွာရှိပါတယ်။ တုနှိုင်းမရတဲ့ ရဲစွမ်းသတ္တိ၊ တစ်ဖက်ကမ်းခပ်ကျွမ်းကျင်တဲ့စစ်ပညာ၊ သူ့ကျွန်မခံလိုတဲ့မျိုးချစ်စိတ်နဲ့ စည်းလုံးညီညွတ်မှုတို့ဟာ စပါတန်စစ်သည်တွေရဲ့ ဖျောက်ဖျက်မရတဲ့ဗီဇဖြစ်ပါတယ်။ ဒီ Odyssey အခွေဟာ ကွဲပြားတဲ့ဂိမ်းကစားဟန်ကို ထည့်သွင်းထားရုံတင်မကဘဲ လုပ်ကြံသူအဖြစ်ကနေ စစ်သည်တစ်ယောက်ဖြစ်လာမယ့် ဇာတ်ကြောင်းဖြစ်တဲ့အတွက် အားလုံးနဲ့မတူ ကွဲထွက်နေတာတော့ အမှန်ပါ။ ရန်သူရဲ့စစ်စခန်းကိုဝင်ရောက်စီးနင်းတာတွေ၊ အကျဉ်းသားသုံ့ပန်းတွေကို သွားရောက်ကယ်တင်တာတွေ ပါဝင်လာဖို့ သေချာနေတဲ့အပြင် ဇာတ်ကြောင်းဟာ သမိုင်းကြောင်းတစ်လျှောက်နာမည်ကျော်ကြားခဲ့တဲ့ စပါတန်တွေနဲ့ ဆက်နွယ်နေတဲ့အတွက် အရင်ဘယ်လို AC ခွေနဲ့မှ မတူနိုင်ဘူးဆိုတာတော့ ကြိမ်းသေနေပါတယ်။ 

Odyssey နဲ့ပတ်သက်ပြီး သိရသမျှနဲ့ အကျဉ်းချူပ်

ဒီအခွေဟာ အရင် AC ဂိမ်းတွေလို Assassin နဲ့ Templar ကြားက ပြင်းထန်လှတဲ့ပဋိပက္ခတွေကို မီးမောင်းထိုးပြမှာ ဟုတ်ရဲ့လားလို့တောင် မေးခွန်းထုတ်ချင်စရာပါ။ ယမန်နေ့ကမှ အင်တာနက်ပေါ်မှာ ပြန့်နှံ့ခဲ့တဲ့ Odyssey အခွေရဲ့ ဂိမ်းတွင်း screenshot တွေအရတော့ ကိုယ်ဟာ Assassin တစ်ယောက်ရဲ့သွင်ပြင်လက္ခဏာတွေဖြစ်တဲ့ ခေါင်းဆောင်းဝတ်စုံနဲ့ လုပ်ကြံတဲ့နေရာမှာအသုံးပြုတဲ့ လျှို့ဝှက်ဓားမြောင်တို့ကို မဆင်မြန်းထားတာကိုတွေ့မြင်ရမှာဖြစ်ပါတယ်။ အဲဒီအစား စပါတန်စစ်ဝတ်စုံကိုဝတ်ပြီး Assassin တစ်ယောက်လို အဆောက်အဦးတွေရဲ့အပေါ်မှာ သွက်လက်စွာ ပြေးလွှားသွားလာနေတာဖြစ်ပါတယ်။ စစ်သည်တစ်ယောက်ဖြစ်လာမယ့် လုပ်ကြံသူတစ်ယောက်ရဲ့ဖြတ်သန်းခဲ့တဲ့ဘဝခရီးလမ်းရှည်ကတော့ စိတ်ဝင်စားစရာအတော်လေးကောင်းနေပါပြီ။ Ubisoft ကနေနောက်ထပ်ပြီး Odyssey နဲ့ပတ်သက်တဲ့ ဘယ်လိုမျိုးအရာတွေချပြဦးမလဲဆိုတာကတော့ စောင့်ကြည့်နေရမှာပါပဲ။ E3 ပွဲပြီးသွားတဲ့အချိန်ကျရင်တော့ ဒီထက်ပိုပြီး လက်ဆုပ်လက်ကိုင်ပြစရာရှိလာမယ်လို့ ယူဆရပါတယ်။ နောက်တစ်ချက်အနေနဲ့ ဒီ Odyssey အခွေကို ၂၀၁၈ ခုနှစ်ရဲ့ E3 ပွဲမှာ ပထမဦးဆုံးထုတ်ဖော်ပြသမှာဖြစ်ပေမယ့်လည်း ၂၀၁၉ နှစ်စပိုင်း ဒါမှမဟုတ် နှစ်လယ်ပိုင်းလောက်မှာမှ တရားဝင်ထွက်ရှိလာဖို့ အလားအလာများပါတယ်။ ဒီတော့ AC ပရိသတ်များအနေနဲ့ ဒီစာစောင်ကိုဖတ်ပြီး Odyssey အကြောင်းတစေ့တစောင်းနဲ့ သိလိုတာတွေကို သိသွားလောက်ပြီလို့ ထင်ပါတယ်။ E3 ပွဲကြီးကိုရောက်ဖို့က အချိန်ဘယ်လောက်မှမကျန်တော့တဲ့အတွက် ဒီစာစောင်လေးဖတ်ပြီး လာမယ့် E3 ပွဲကိုစောင့်ဆိုင်းရင်း ရင်ခုန်စိတ်လှုပ်ရှားနေလိုက်ကြပါဦးလို့ ဒီကနေပြောလိုက်ချင်ပါတယ်။ နောက်ထပ်ဂိမ်းဆောင်းပါးတွေမှာလည်း ပြန်လည်တွေ့ဆုံရဖို့ မျှော်လင့်မိပါတယ်။ 

Yan

Ref: Gamespot, Kotaku, Forbes

လုပ်ကြံသတ်ဖြတ်ခြင်းအနုပညာ သို့မဟုတ် ကမ္ဘာ့သမိုင်းတစ်လျှောက်က အကျွမ်းကျင်ဆုံး ရာဇဝင်တွင်လူသတ်အဖွဲ့ ၇ ဖွဲ့ (အပိုင်း ၁)

လူသားမျိုးနွယ်တဖြည်းဖြည်းဆင့်ကဲပြောင်းလဲလာခဲ့တဲ့ ဟိုးရှေးဦးရာစုနှစ်တွေကတည်းကစပြီး  ကမ္ဘာတစ်ဝှမ်းလုံးမှာရှိတဲ့နိုင်ငံအသီးသီးဟာ မရေတွက်နိုင်တဲ့ လိုအင်ဆန္ဒတွေနဲ့ ရည်ရွယ်ချက်တွေကြောင့် စစ်ပွဲပေါင်းမြောက်မြားစွာဖြစ်ပွားခဲ့ပါတယ်။ အာဏာစက်အရှိန်အဝါကြီးမားလိုမှုတွေ၊ နယ်မြေချဲ့ထွင်မှုတွေ၊ ကျူးကျော်သိမ်းပိုက်ပြီး ချူပ်ကိုင်ချယ်လှယ်တာတွေ အစရှိတဲ့ပိုင်ဆိုင်လိုမှုတွေကို အကောင်အထည်ဖော်ဖို့အတွက် တိုက်ခိုက်သတ်ဖြတ်ခြင်းဟာ လူသားတွေဆွဲကိုင်ရာလက်နက်တစ်ခုသဖွယ် ဖြစ်ခဲ့ပါတယ်။ ဒါကြောင့်ပဲ သမိုင်းတစ်လျှောက်မှာသွေးချောင်းစီးတဲ့ ရာဇဝင်တွင်စစ်ပွဲတွေ ထောင်နဲ့သောင်းနဲ့ချီပြီး ဖြစ်ပွားခဲ့ရတာပါ။ ခေတ်တွေအဆက်ဆက်ပြောင်းလဲလာပြီး အခုလိုမျိုးငြိမ်းချမ်းမှုကိုကိုယ်စားပြုတဲ့ ကမ္ဘာကြီးဖြစ်လာဖို့အတွက် ပြိုလဲခဲ့ရတဲ့နိုင်ငံတွေ၊ ကြွေလွင့်ခဲ့ရတဲ့အသက်ဝိညာဉ်တွေနဲ့ ကုန်လွန်သွားတဲ့သက္ကရာဇ်တွေဟာ လူသားမျိုးနွယ်ရဲ့ပေးဆပ်ရမှုတွေပါပဲ၊ ဒါတွေကိုကျွန်တော်တို့တတွေ အမြဲအမှတ်ရနေဖို့လိုပါတယ်။ အဲဒီလိုကမ္ဘာ့နိုင်ငံပေါင်းများစွာ စစ်ပွဲတွေစဉ်ဆက်မပြတ် ဆင်နွဲနေတဲ့အချိန်ကာလမှာ နိုင်ငံတစ်နိုင်ငံရဲ့အခိုင်အမာတည်ဆောက်ထားတဲ့စစ်တပ်ဟာ အဲဒီနိုင်ငံရဲ့အင်အားဖြစ်ပါတယ်။ တိုက်ခိုက်သိမ်းပိုက်မှုကြောင့်ပဲဖြစ်ဖြစ်၊ ကျူးကျော်လာမှုမှန်သမျှကို ပြန်လည်တွန်းလှန်ချေမှုန်းနိုင်ဖို့ပဲဖြစ်ဖြစ် စစ်တပ်ဆိုတာဟာ နိုင်ငံတိုင်းရဲ့အဓိကကျတဲ့ အသက်သွေးကြောဖြစ်ပါတယ်။ ဒါပေမယ့် အချို့နိုင်ငံရေးကိစ္စရပ်တွေမှာ တိုက်ခိုက်သတ်ဖြတ်ဖို့ လိုအပ်ပေမယ့်လည်း အတိအလင်းစစ်ကြေညာပြီး ပေါ်ပေါ်တင်တင်တိုက်ယူလို့မရတာမျိုးတွေရှိပါတယ်၊ အဲဒီလိုမျိုးအကြောင်းအရာတွေကြောင့် ဟိုးအရင်ခေတ်တွေကတည်းက ကမ္ဘာ့နိုင်ငံတွေဟာ သိုသိပ်တဲ့အချင်းအရာတွေကိုဆောင်ရွက်ဖို့အတွက် လျှို့ဝှက်တဲ့လုပ်ကြံသတ်ဖြတ်သူအဖွဲ့တွေကို စစ်တပ်နဲ့အတူ ဖွဲ့စည်းထားကြတာဖြစ်ပါတယ်။ အဲဒီလိုအဖွဲ့တွေထဲမှာမှ လုပ်ကြံသတ်ဖြတ်ခြင်းပညာရပ်ကို တစ်ဖက်ကမ်းခတ်အောင် တက်မြောက်ထားကြတဲ့ သမိုင်းဝင်အဖွဲ့ပေါင်းများစွာရှိပါတယ်။ အခုဒီစာစောင်မှာ အဲဒီလိုလျှို့ဝှက်လူသတ်အဖွဲ့တွေထဲကမှ နာမည်ကျော်ခဲ့ကြတဲ့ ရာဇဝင်တွင်အဖွဲ့ ၇ ဖွဲ့ကို အားလုံးအတွက် ဗဟုသုတဖြစ်ဖွယ် ပြန်လည်ရေးသားတင်ဆက်လိုက်ပါတယ်။ အားလုံးပဲ စိတ်ဝင်စားတယ်ဆိုရင် ဆက်ဖတ်ကြည့်ကြပါဦး။

The Hashshashin (ဟက်ရှရှင်အဖွဲ့)

လက်ရှိမှာတစ်ကမ္ဘာလုံးသုံးနှုန်းနေကြတဲ့ လုပ်ကြံသတ်ဖြတ်သူ Assassin (အက်စဆင်) ဆိုတဲ့ဝေါဟာရဟာ ဒီ Hashshashin (ဟက်ရှရှင်) ဆိုတဲ့စကားလုံးကနေ ဆင်းသက်လာတာဖြစ်ပါတယ်။ သူတို့ခေတ်သူတို့အခါတုန်းက လူသိများပြီး အားလုံးကြောက်ရွံ့ကြတဲ့ ဒီဟက်ရှရှင်အဖွဲ့ဟာ အေဒီ ၁၁ ရာစုကနေ ၁၃ ရာစုအထိ အဖွဲ့လိုက်လှုပ်ရှားမှုနဲ့ မစ်ရှင်တွေကို ဆောင်ရွက်ခဲ့ပါတယ်။ ဟက်ရှရှင်အဖွဲ့သားတွေဟာ သူတို့ရဲ့ဂိုဏ်းကို “အယူဝါဒသစ်” (သူတို့ရဲ့သာဘာစကားအရ  Al-da’wa al-Jadida) လို့သတ်မှတ်ခဲ့ကြပြီး အဖွဲ့ကို အေဒီ ၁၀၉၀ မှာ ဟဆန်အိုင်ဆာဘ (Hasan I Sabbah) က ပါးရှားနိုင်ငံမှာ စတင်တည်ထောင်ခဲ့တာဖြစ်ပါတယ်။ ဟက်ရှရှင်အဖွဲ့ဟာ နိုင်ငံရေးနဲ့ဘာသာရေး ရည်ရွယ်ချက်တွေအောက်မှာအဓိကလှုပ်ရှားကြပြီး သူတို့ရဲ့ပစ်မှတ်အများစုဟာ သူတို့တိုင်းပြည်ကို လက်ဝါးကြီးအုပ်စိုးချယ်လှယ်နေတဲ့ ဆူနီ (Sunni) အစိုးရအရာရှိတွေဖြစ်ပါတယ်။ ဒါပေမယ့် သူတို့အတွက်အကျိုးရှိစေမယ့် ကိစ္စရပ်တွေအတွက်လည်း လုပ်ကြံသတ်ဖြတ်မှုတွေကို ဆောင်ရွက်ပေးကြပါတယ်။ အဲဒီထဲကမှသမိုင်းဝင်ဖြစ်ရပ်တစ်ခုကတော့ ခရူဆိတ် (Crusade) စစ်သူရဲကောင်းတွေရဲ့တောင်းဆိုမှုကြောင့် ဂျေရူးစလင်မြို့ရဲ့ဘုန်းတော်ကြီးကို လျှို့ဝှက်စွာလုပ်ကြံသတ်ဖြတ်ခဲ့တာပဲဖြစ်ပါတယ်။ အဲဒီဟက်ရှရှင်ဆိုတဲ့နာမည်ကို အက်စဆင်ဆိုတဲ့နာမည်အဖြစ် ဥရောပတိုက်ကို ပြန်လည်သယ်ဆောင်သွားသူတွေကတော့ ခရူဆိတ်တွေပဲဖြစ်ပါတယ်။ ဟက်ရှရှင်တွေဟာ တကယ့်ကိုကျွမ်းကျင်ပါးနပ်တဲ့ လူသတ်သမားတွေဖြစ်ပြီး တစ်ယောက်ယောက်ကို ပစ်မှတ်ထားပြီဆိုရင် ပစ်မှတ်ကိုချဉ်းကပ်ဖို့နဲ့ အလွယ်တကူသရုပ်ဖျက်ဝင်ရောက်ဖို့အတွက် ပစ်မှတ်ရှိရာဒေသရဲ့ဘာသာစကားနဲ့ ယဉ်ကျေးမှုတွေကို အရင်ဆုံးလေ့လာသင်ယူပါတယ်။ ဟက်ရှရှင်အဖွဲ့သားတွေဟာ ဘယ်တော့မှကိစ္စရပ်တစ်ခု၊ အလုပ်တစ်ခုကို အလောတကြီးဆောင်ရွက်လေ့မရှိပါဘူး၊ လတွေနှစ်တွေအထိ အချိန်ယူသင့်ရင်ယူပြီး အခွင့်ကောင်းတစ်ခုကို အမိအရဆုပ်ကိုင်နိုင်ပြီဆိုမှ ပစ်မှတ်ကိုသိုသိုသိပ်သိပ်နဲ့ အပြတ်ရှင်းပစ်တဲ့သူမျိုးတွေ ဖြစ်ပါတယ်။ ဒါပေမယ့်လည်း အရာအားလုံးမှာအတက်အကျဆိုတာ ရှိစမြဲမို့  ၁၂၅၆ ခုနှစ်မှာတော့ ဟက်ရှရှင်အဖွဲ့ဟာ သူတို့ထက်အဆမတန် အင်အားကြီးမားတဲ့မွန်ဂိုအင်ပါယာရဲ့ အမြစ်ဖြတ်သုတ်သင်ရှင်းလင်းမှုကို ခံခဲ့ရပါတယ်။ အဲဒီနောက်မှာတော့ အသက်ရှင်ကျန်ခဲ့ကြတဲ့ ဟက်ရှရှင်အဖွဲ့သားတွေဟာ ဟိုတစ်စု၊ ဒီတစ်စု ပြန်လည်စုပေါင်းပြီးနေထိုင်ခဲ့ကြပေမယ့် အရင်လိုမျိုးအနေအထားကိုတော့ ဘယ်တော့မှရောက်မလာခဲ့ပဲ တဖြည်းဖြည်းပပျောက်သွားခဲ့ပါတယ်။

The Sicarii (စီကာရီအဖွဲ့)

ဟက်ရှရှင်အဖွဲ့လိုပဲ ဘာသာရေးနဲ့နိုင်ငံရေးရည်ရွယ်ချက်တွေအောက်မှာ အဓိကလှုပ်ရှားကြတဲ့အဖွဲ့ နောက်တစ်ဖွဲ့ရှိပါတယ်။ အဲဒီအဖွဲ့ကတော့ အေဒီ ၆၀ တဝိုက်ဝန်းကျင်မှာ လှုပ်ရှားမှုတွေလုပ်ခဲ့ကြတဲ့ ဂျူးလုပ်ကြံသူတို့ရဲ့ စီကာရီအဖွဲ့ပဲဖြစ်ပါတယ်။ အဖွဲ့ရဲ့အဓိကရည်ရွယ်ချက်ကတော့ ရိုမန်တွေနဲ့ သစ္စာဖောက်ဂျူးတွေကို သုတ်သင်ဖို့နဲ့ ဂျူးတွေရဲ့မြေပေါ်ကနေ အပြီးအပိုင်မောင်းထုတ်ဖို့ဖြစ်ပါတယ်။ Sicarii ဆိုတဲ့နာမည်ရဲ့အဓိပ္ပါယ်ကတော့ ဓါးမြှောင်လူ (Dagger man) ပဲဖြစ်ပါတယ်။ စီကာရီအဖွဲ့သားတွေ အသုံးပြုတဲ့အဓိကလက်နက်ဟာ ဓါးမြှောင်ဖြစ်ပြီး ခေါင်းဆောင်းစွပ်ထားပြီး ခါးမှာဓါးမြှောင်ချိတ်ထားတဲ့ ဂျူးစီကာရီအဖွဲ့ဝင်တွေရဲ့ပုံစံဟာ အားလုံးထဲကကွဲထွက်ပြီး နာမည်ဂုဏ်သတင်းကျော်ကြားပါတယ်။ စီကာရီအဖွဲ့ဟာ ဂျူးခေါင်းဆောင် မန်နာဟန် (Menahem) လက်အောက်မှာ အင်အားအကြီးမားဆုံးဖြစ်ခဲ့ပြီး ဘုန်းတော်ကြီးဂျိုနသန်ကိုလူပ်ကြံမှုကြောင့် သမိုင်းတစ်လျှောက်လူသိများပါတယ်။ စီကာရီအဖွဲ့သားတွေဟာ ပျော်ပွဲရွင်ပွဲတွေနဲ့ လူအများစုဝေးရာအရပ်မှာ သူတို့ရဲ့ပစ်မှတ်ကိုသုတ်သင်လေ့ရှိကြပြီး သေဆုံးမှုကိုလူတွေသတိမထားမိခင်လေးမှာ ကိုယ်ယောင်ဖျောက် ပျောက်ကွယ်သွားတတ်ကြပါတယ်။ စီကာရီအဖွဲ့ဟာ လုပ်ကြံသတ်ဖြတ်မှုတွေသာမက ပြန်ပေးဆွဲမှုကိုလည်းလုပ်ကြပါတယ်၊ အဓိကအားဖြင့် ဂျူးဘုန်းကြီးတွေနဲ့ အခွင့်ထူးခံလူတန်းစားတွေကို အကျိုးအမြတ်တစ်ခုခုအလဲအလှယ်နဲ့ ပြန်ပေးဆွဲကြပါတယ်။ ဒါပေမယ့် အေဒီ ၇၃ ခုနှစ်မှာတော့ စီကာရီခံတပ်စခန်းကို ရိုမန်အင်ပါယာတပ်တွေရဲ့ ဝင်ရောက်စီးနင်းခဲ့ပြီး ခံတပ်ကိုဖြိုဖျက်ခဲ့ပါတယ်။ ဒါပေမယ့် ရိုမန်တွေ အထဲရောက်တဲ့အချိန်မှာ ရန်သူ့လက်အောက်အရောက်ခံမယ့်အစား ဂုဏ်ကျက်သရေရှိရှိ ကိုယ့်ကိုယ်ကိုယ်အဆုံးစီရင်သွားကြတဲ့ စီကာရီအဖွဲ့သားတွေရဲ့ အလောင်းတွေကိုပဲ အစီအရီတွေ့ခဲ့ရပါတယ်။ 

The Ninja (နင်ဂျာ)

တိတ်တဆိတ်လုပ်ကြံမှုတွေ၊ ချောင်းမြောင်းသတ်ဖြတ်မှုတွေနဲ့ ကိုယ်ယောင်ဖျောက်မျက်ခြေဖြတ်မှုတွေအကြောင်း ပြောမယ်ဆိုရင် ဂျပန်ပြည်ကနင်ဂျာဂိုဏ်းတွေကို မေ့ထားလို့မရပါဘူး။ ဒီစာစောင်မှာပါဝင်တဲ့ လူသတ်အဖွဲ့ ၇ ဖွဲ့ထဲမှာ နင်ဂျာဂိုဏ်းတစ်ခုခုတော့ ပါလာလိမ့်မယ်လို့တော့ အားလုံးတွေးထားပြီးသားဖြစ်မှာပါ၊ ဟုတ်ပါတယ်။ ဂျပန်အခေါ်အဝေါ်အရ ရှီနိုဘီ (Shinobi) လို့အမည်ရတဲ့နင်ဂျာတွေဟာ ၁၃ ရာစုနဲ့ ၁၅ ရာစုအထိ ဂျပန်ပြည်ရဲ့ဆန်ဂိုခုခေတ် (Sengoku) မှာ လှုပ်ရှားမှုတွေကို အဓိကပြုလုပ်ခဲ့ပါတယ်။ အချို့သမိုင်းပညာရှင်တွေကတော့ နင်ဂျာတွေဟာ နိမ့်ကျတဲ့မျိုးနွယ်စုတွေနဲ့ ရာထူးကဖြုတ်ချခြင်းခံခဲ့ရတဲ့ ဆာမူရိုင်းဟောင်းတွေဖြစ်တယ်လို့ သုံးသပ်ကြသလို တချို့နင်ဂျာဂိုဏ်းတွေဟာလည်း ကိုယ်ပိုင်ဆိုင်တဲ့နယ်နိမိတ်တွေမှာ နင်ဂျာလေ့ကျင့်ရေးစခန်းတွေကို တည်ထောင်ပြီး မျိုးနွယ်စုအလိုက်လှုပ်ရှားကြပါတယ်။ နင်ဂျာအတတ်ပညာသင်ကြားတဲ့ လေ့ကျင့်ရေးစခန်းတွေမှာ သမိုင်းတစ်လျှောက်အထင်ရှားဆုံးကတော့ အိဂ (Iga) နဲ့ ခိုဂ (Koga) နယ်က နင်ဂျာကျောင်းတွေပဲဖြစ်ပါတယ်။ နင်ဂျာဖြစ်လာမယ့်အလောင်းလျာတွေဟာ လေ့ကျင့်ရေးစခန်းမှာ နင်ဂျူဆု (Ninjutsu) လို့ခေါ်တဲ့ နင်ဂျာတိုက်ခိုက်ရေးပညာကို သင်ကြားကြပြီး လျှို့ဝှက်စွာတိုက်ခိုက်တာတွေ၊ ချောင်းမြောင်းလုပ်ကြံတာတွေနဲ့ ကိုယ်ခန္ဓာအတတ်ပညာတွေကို လေ့လာဆည်းပူးရပါတယ်။ တစ်ချိန်တည်းမှာပဲ အမှောင်ထဲမှာလှုပ်ရှားတာတွေ၊ ကိုယ်ယောင်ဖျောက်အတတ်ပညာတွေကိုပါ လေ့လာရသလို ဓါး၊ စကြာ၊ ချိတ်ကြိုး၊ အဆိပ်နဲ့ လက်ပစ်ဗုံးတွေကို ဘယ်လိုအသုံးပြုရမလဲဆိုတာတွေကိုပါ သင်ကြားရပါတယ်။ ဂုဏ်နဲ့သိက္ခာကိုရှေ့တန်းတင်တဲ့ ဆာမူရိုင်းတွေမလုပ်တဲ့ ကိစ္စရပ်တွေကို ဆောင်ရွက်သူတွေကတော့ နင်ဂျာတွေပါပဲ။ နင်ဂျာဂိုဏ်းတွေအင်အားကြီးထွားလာတာနဲ့အမျှ ၁၆ ရာစုနောက်ပိုင်းမှာတော့ ဂျပန်ပြည်ရဲ့ထင်ရှားတဲ့စစ်ဘုရင် အိုဒနိုဘူနဂ (Oda Nobunaga) ကနေပြီး နင်ဂျာလှုပ်ရှားမှုတွေကို လျှော့ချပစ်ခဲ့ပါတယ်။ ဒါပေမယ့် ၁၈ ရာစုမှာတော့ နင်ဂျာတွေပြန်လည်နိုးကြားလာခဲ့ပြီး ယခုခေတ်ဂျပန်ပြည်ရဲ့ အထူးလျှို့ဝှက်တပ်ဖွဲ့ဖြစ်လာဖို့ အစပြုရာနေရာနဲ့ အခြေခံကျောရိုးတစ်ခုဖြစ်ခဲ့ပါတယ်။ 

အပိုင်း (၂) ကို မကြာခင်မှာဆက်လက်ဖော်ပြပေးသွားမှာမို့ စိတ်လှုပ်ရှားစွာနဲ့ စောင့်မျှော်နိုင်ပါတယ်။

Yan
Ref: historycollection

ကမ္ဘာတစ်ဝှမ်းလုံးကဂိမ်မာတွေအားလုံး ရင်ခုန်စိတ်လှုပ်ရှားစွာစောင့်မျှော်နေကြတဲ့ ၂၀၁၈ E3 ပွဲအကြောင်းတစေ့တစောင်း

ဂိမ်မာတွေအားလုံး ရင်ခုန်စိတ်လှုပ်ရှားစွာ စောင့်ဆိုင်းနေရတဲ့ E3 (Electronic Entertainment Expo) ပွဲကြီးကတော့ တစ်နှစ်ပြီးတစ်နှစ်ဆိုသလို အားလုံးဆီ တစ်ကျော့ပြန်လည်ရောက်ရှိလို့လာပါပြီ။ တစ်ကမ္ဘာလုံးအတိုင်းအတာနဲ့ ကြီးကျယ်ခမ်းနားလှတဲ့ E3 ဂိမ်းပွဲတော်ကြီးကို ကစလို့ နှစ်စဉ်စည်ကားသိုက်မြိုက်စွာကျင်းပခဲ့ပြီး ပွဲကို ကမ္ဘာနယ်ပယ်အသီးသီးက နာမည်ကျော်ဂိမ်းကုမ္ပဏီတွေ၊ ဂိမ်းဖန်တီးထုတ်လုပ်သူတွေနဲ့ ဂိမ်းကိုချစ်တဲ့ပရိသတ်ပေါင်းများစွာ တက်ရောက်ကျတာမို့ ဒီ E3 ပွဲဟာ တစ်ကမ္ဘာလုံးကဂိမ်းချစ်သူပရိသတ်တွေကို ဆက်သွယ်ပေါင်းစည်းပေးတဲ့ ပေါင်းကူးတံတားလည်းဖြစ်ပါတယ်။ နှစ်စဉ်ထိန်းသိမ်းလာတဲ့အစဉ်အလာအရ E3 ပွဲတိုင်းမှာ ဂိမ်မာတွေနှစ်ရှည်လများစောင့်မျှော်နေတဲ့ဂိမ်းတွေ၊ ရင်ကိုလှုပ်ခတ်စေမယ့် ဂိမ်းအသစ်ကြေညာချက်တွေ၊ နည်းပညာရဲ့တီထွင်ဆန်းသစ်မှုတွေနဲ့အတူ မရိုးနိုင်တဲ့ဂိမ်းတင်ဆက်မှုတွေကို တစ်နေရာတည်းမှာ မျက်ဝါးထင်ထင် တွေ့မြင်ခံစားမှာဖြစ်တဲ့အတွက် ဒီ E3 ပွဲကို တက်ရောက်ချင်ကြတာဂိမ်မာအားလုံးရဲ့ အိပ်မက်ပါ။ ဒါပေမယ့် ပွဲကိုကိုယ်တိုင်ကိုယ်ကျ မတက်ရောက်ဖြစ်ကြတဲ့ဂိမ်မာများလည်း လုံးဝစိတ်ပူစရာမလိုပါဘူး။ မျှော်လင့်ချက်ပေါင်းများစွာနဲ့ ၂၀၁၈ ခုနှစ်ရဲ့ E3 ပွဲကို ဘယ်နေရာမှာ ဘယ်လိုမျိုးကျင်းပသွားမလဲ? ဘယ်အချိန်မှာကျင်းပမှာလဲ? ဘယ်လိုမျိုးဂိမ်းအသစ်တွေကို ကြေညာမှာလဲ? အစရှိတာတွေကို ဂိမ်မာတို့သိရှိစေဖို့ ဒီစာစောင်မှာ အချက်လေးတွေနဲ့တကွပြောပြပေးသွားမှာမို့ အချိန်လေးခဏပေးပြီး ဆက်လက်ဖတ်ရှုပေးဖို့ပဲလိုပါတယ်။ ဒီတော့ ရှည်ရှည်ဝေးဝေး စကားဦးသန်းနေတာကို ဒီလောက်နဲ့ပဲရပ်နားပြီး ပြောလိုတဲ့အကြောင်းအရာကို ကျွန်တော်တို့သွားလိုက်ကြပါမယ်၊ အေးဆေးအနားယူရင်း ဖတ်ရှုနိုင်ပါတယ်။

E3 2018 ပွဲကို ဘယ်အချိန်၊ ဘယ်နေရာမှာကျင်းပမှာလဲ?

တစ်နှစ်မှတစ်ကြိမ်ပဲကျင်းပတာဖြစ်တဲ့ E3 ပွဲတိုင်းကို နှစ်တစ်နှစ်ရဲ့ ဆဋ္ဌမမြောက်လဖြစ်တဲ့ ဇွန်လ (June) မှာကျင်းပလေ့ရှိပြီး ဇွန်လဒုတိယအပါတ် ၁၂ ရက်ကနေ ၁၄ ရက်အထိ သုံးရက်တိုင်တိုင် ကျင်းပသွားမှာဖြစ်ပါတယ်။ ၂၀၁၈ E3 ပွဲကို ပင်တိုင်ပွဲကျင်းပရာနေရာဖြစ်တဲ့ အမေရိကန်ပြည်ထောင်စု၊ လော့စ်အိန်ဂျယ်လိစ် (Los Angeles) မြို့ရဲ့ LA Convention Centre မှာ စည်ကားသိုက်မြိုက်စွာ ကျင်းပသွားမှာပါ။

ပွဲကိုဘယ်သူတွေတက်ရောက်နိုင်လဲ? ဝယ်ယူနိုင်မယ့် ပွဲလက်မှတ်နဲ့ ဈေးနှုန်း

ဂိမ်မာတို့ရဲ့လိုအပ်ချက်ကို သိရှိနေတဲ့ E3 ပွဲစီစဉ်သူများဟာလည်း ဝါသနာအရင်းတည်တဲ့ ဝါရင့်သမ္ဘာရင့် ဂိမ်းမာများဖြစ်တဲ့အလျောက် ပွဲကိုဂိမ်မာတိုင်းလိုလို တက်ရောက်နိုင်အောင် ပြုလုပ်ပေးထားပါတယ်။ E3 ပွဲကို အများပြည်သူဝင်ရောက်ကြည့်ရှုလေ့လာနိုင်အောင် public area အဖြစ် နေရာတစ်ခုအထိကန့်သတ်ပေးထားပြီး တကယ်တမ်းပွဲတက်ရောက်မယ့်သူများကတော့ နေရာစေ့သွားလာခွင့်ရစေဖို့ ပွဲလက်မှတ်ကို တရားဝင်ဝက်ဘ်ဆိုဒ်ကနေတဆင့် ဝယ်ယူရမှာဖြစ်ပါတယ်။ ရောင်းချတဲ့လက်မှတ်ဈေးနှုန်းအနေနဲ့လည်း လူတန်းစေ့ဝယ်ယူနိုင်မယ့် ဈေးနှုန်းဖြစ်အောင် ဒေါ်လာ ၂၄၉ ကျပ်ပဲ သတ်မှတ်ပေးထားပြီး အထူးအစီအစဉ်အနေနဲ့ ပထမဦးဆုံးလက်မှတ်ဝယ်ယူတဲ့ ဂိမ်မာအယောက် ၁၀၀၀ အတွက် အထူးဈေးနှုန်း ၁၄၉ ကျပ်နဲ့ "Gamer Pass" ရရှိမှာဖြစ်ပါတယ်။

ပွဲမစတင်ခင်မှာ ပြုလုပ်မယ့် သတင်းစာရှင်းလင်းပွဲနဲ့ ဂိမ်းကြေညာချက်

နာမည်ကျော်ဂိမ်းကုမ္ပဏီကြီးတွေဖြစ်ကြတဲ့ Sony, Microsoft, Bethesda, EA နဲ့ Nintendo တို့ဟာ တကယ့်ပွဲမစတင်ခင်မှာ သတင်းစာရှင်းလင်းပွဲနဲ့ Live Streaming တွေကို ကနဦးအကြိုပြုလုပ်သွားမှာဖြစ်ပါတယ်။ အဲဒီလိုမျိုးသတင်းစာရှင်းလင်းပွဲပြုလုပ်ခြင်းဟာ E3 ပွဲကို ပိုပြီးအရှိန်မြင့်လာစေသလို ပွဲတက်ရောက်သူဂိမ်းပရိသတ်တွေနဲ့ ဂိမ်းဖန်တီးထုတ်လုပ်တဲ့ကုမ္ပဏီတွေကြား တိုက်ရိုက်အမေးအဖြေကဏ္ဍကနေတဆင့် သိလိုသမျှတွေ၊ မေးမြန်းလိုတာတွေကို လွတ်လပ်စွာထုတ်ဖော်ပြောကြားနိုင်ပါတယ်။ အဲဒီတော့ တကယ်တမ်း E3 ပွဲမှာ ဘယ်ကုမ္ပဏီက ဘယ်လိုဂိမ်းတွေကိုမိတ်ဆက်ပေးမလဲ? အရင်နှစ် E3 ပွဲတွေမှာကတည်းက ကြေညာပြီးသားဂိမ်းတွေအနေနဲ့ရော ဘယ်လိုမျိုးပွဲထွက်လာမလဲ? ဂိမ်းမီဒီယာတွေရဲ့ခန့်မှန်းချက်တွေနဲ့ ရရှိလာတဲ့သတင်းအချက်အလက်တွေအရ 2018 E3 ပွဲရဲ့သုံးသပ်ချက်တွေကို ကျွန်တော်တို့ တစ်ချက်ဆက်ကြည့်လိုက်ရအောင်။

Sony အနေနဲ့ E3 2018 မှာ ဘာတွေချပြဖို့ရှိသလဲ?

Sony အနေနဲ့ သတင်းစာရှင်းလင်းပွဲမှာထည့်သွင်းပြောကြားဖို့ စီစဉ်ထားတဲ့ အကြောင်းအရာခေါင်းကြီးပိုင်းအရ ၂၀၁၆ ခုနှစ်က စတင်ကြေညာခဲ့တဲ့ Days Gone, သိုသိုသိပ်သိပ်ဖန်တီးနေတဲ့ Shadow Die Twice ဂိမ်းအကြောင်းကို ဦးစားပေးပြောကြားမယ်လို့ ခန့်မှန်းရပြီး ဂိမ်မာတွေစောင့်မျှော်နေကြတဲ့ PS4 Exclusive ဂိမ်းတွေဖြစ်တဲ့ Spider-Man, Hideo Kojima ရဲ့ Death Stranding, အောင်မြင်မှုအညွှန့်တလူလူဖြစ်လာဦးမယ့် Naughty Dog ရဲ့ Last Of Us Part.2 ဂိမ်းတွေအကြောင်းရှင်းလင်းသွားမှာဖြစ်ပါတယ်။ ဒါ့အပြင် Yakuza 6 နဲ့ Kingdom Hearts 3 ကိုလည်း စင်မြင့်ထက်မှာတွေ့မြင်ရဖို့ ပရိသတ်တွေကမျှော်လင့်နေကြပါတယ်။ Playstation ကနေ နောက်ဆုံးမျှော်လင့်ရတဲ့ဂိမ်းကတော့ ဂျပန်ပြည်ရဲ့မြေရှင်ပဒေသရာဇ်ခေတ်၊ ဆူရှီမာကျွန်းကိုမွန်ဂိုတွေ ဝင်ရောက်သိမ်းယူတဲ့ကာလမှာ ဇာတ်အိမ်တည်ထားတဲ့ Ghost Of Tsushima ဂိမ်းပဲဖြစ်ပါတယ်။

Microsoft နဲ့ Xbox အနေနဲ့ E3 2018 မှာ ဘာတွေချပြဖို့ရှိသလဲ?

Microsoft အနေနဲ့ Xbox One X နဲ့ အတူလက်တွဲပြီး ဂိမ်းတွေအတွက် ရုပ်ထွက် 4K အပြည့်အဝပေးစွမ်းနိုင်ခဲ့တာ အချိန်အတော်အတန်ကြာခဲ့ပါပြီ။ ဒါပေမယ့် ဒီတစ်ချက်တည်းနဲ့ မလုံလောက်သေးတဲ့ Microsoft အနေနဲ့ ဒီနှစ် E3 ပွဲကို လူအများစိတ်ဝင်စားမယ့်ဂိမ်းတွေချပြပြီး ပွဲတက်ရမှာပါပဲ။ ယမန်နှစ် E3 ပွဲမှာ ဟိုးလေးတစ်ကျော်ဖြစ်ခဲ့တဲ့ Crackdown 3, Forza Motorsport 7 နဲ့ Cuphead တို့ကြောင့် ၂၀၁၇ ခုနှစ်ပွဲမှာ ခံသာသွားပေမယ့်လည်း တစ်နှစ်ထက်တစ်နှစ်ဆိုသလို ဂိမ်းလောကကြီးနဲ့ E3 ပွဲကြီးဟာ အပြောင်းအလဲပေါင်းစုံဖြစ်နေတာမို့ ပွဲမဝင်ခင်ကြိုတင်ပြင်ဆင်ရတော့မှာပါ။ ပရိသတ်တွေအနေနဲ့ Ori and the Will of Wisps ဂိမ်းရဲ့သတင်းတစွန်းတစပဲဖြစ်ဖြစ် သိချင်နေကြသလို ကောလဟာလတွေအရမ်းထွက်နေတဲ့ Halo 6 အခြေအနေကိုလည်း မျက်ဝါးထင်ထင်တွေ့မြင်နေကြပါပြီ။ Xbox နဲ့လက်တွဲဘော်တွေဖြစ်ကြတဲ့ Microsoft အနေနဲ့ ဘယ်လိုမျိုးဂိမ်းတွေနဲ့ တင်ဆက်မှုတွေကို E3 2018 မှာချပြသွားမလဲဆိုတာကတော့ အားလုံးစောင့်ကြည့်ရမှာပါပဲ။

Nintendo အနေနဲ့ E3 2018 မှာ ဘာတွေချပြဖို့ရှိသလဲ?

ဂိမ်းလောကရဲ့တစ်ထောင့်တစ်နေရာကနေ ဂိမ်းစက် console နယ်ပယ်ကို ချူပ်ကိုင်ထားတဲ့ Nintendo အနေနဲ့လည်း ဒီနှစ် E3 ပွဲမှာချပြတင်ဆက်သွားမယ့် အစီအစဉ်ဟာ ယမန်နှစ်နဲ့ ဆင်တူတယ်လို့တော့ ကြိုတင်ပြောကြားလာပါတယ်။ ဂျွန် ၁၂ ရက်နေ့မှာ ဗီဒီယိုနဲ့တကွ တင်ဆက်မှုလုပ်သွားမှာဖြစ်ပြီး Nintendo Switch ပလက်ဖောင်းပေါ်မှာ ကစားနိုင်မယ့် Third Party ဂိမ်းတွေကို ထုတ်ဖော်ပြောကြားသွားမှာပါ။ အခြားဂိမ်းကုမ္ပဏီတွေလို အမိုက်စားဂိမ်းတွေ ထုတ်ပြဖို့မရှိပေမယ့် အရင်နှစ်က အမြည်းချပြခဲ့တဲ့ Pokemon Switch ကို ရှင်းရှင်းလင်းလင်းထုတ်ပြလိုက်မယ်ဆိုရင်တော့ E3 ပွဲမှာမျက်နှာပန်းလှဖို့ ကြိမ်းသေနေပါတယ်။ Nintendo ဂိမ်းပလက်ဖောင်းရဲ့ဇာတ်လိုက်စီးရီးဖြစ်တဲ့ Mario ကိုတော့ မေ့ထားလို့ရမှာမဟုတ်တဲ့အတွက် Super Smash Bros Switch ကိုမြင်ရဖို့တော့ သေချာသလောက်ရှိပါတယ်။

EA (Electronic Arts) အနေနဲ့ E3 2018 မှာ ဘာတွေချပြဖို့ရှိသလဲ?

၂၀၁၀ ခုနှစ်လောက်ကစပြီး လွန်ခဲ့တဲ့လေးငါးနှစ်အထိ EA ကဖန်တီးထုတ်လုပ်တဲ့ ဂိမ်းတွေဟာ ဂိမ်မာတွေရဲ့အသည်းစွဲဂိမ်းစီးရီးတွေအဖြစ် ရင်ထဲမှာစွဲထင်ကျန်ရစ်နေတာ အမှန်ပါ။ ဒါပေမယ့် မော်ဒန်ခေတ်ဂိမ်းလောကနဲ့ ဂိမ်းမျိုးဆက်သစ်ကိုကူးပြောင်းလာတဲ့အချိန်မှာတော့ PS4 ရာစုနှစ်ရောက်လာခဲ့ပြီး EA ရဲ့ဂုဏ်သတင်းအရှိန်အဝါတွေ လျော့ကျလာခဲ့ပါတယ်။ ဒါပေမယ့်လည်း EA အနေနဲ့ ခြေလှမ်းတွေကို ဖြည်းဖြည်းနဲ့မှန်မှန်လှမ်းနေပြီး အခုလာမယ့် E3 2018 ပွဲမှာ ဂိမ်မာတွေအတွက် Play Event စီစဉ်ထားတယ်လို့ သိရပါတယ်။ ဒါ့အပြင်ဂိမ်မာများရဲ့အသည်းစွဲဂိမ်းတွေဖြစ်ကြတဲ့ FIFA, Madden နဲ့ Bioware ကချပြမယ့် ဂိမ်းတွေကိုပြင်ထားတယ်လို့သိရပါတယ်၊ Battlefield ဂိမ်းကိုလည်းမေ့ထားလို့မရသလို ဂိမ်းလောကအတွက်ကြီးမားတဲ့ပြောင်းလဲမှုတစ်ခုလို့ အားလုံးသုံးသပ်ယူဆတဲ့ Anthem ဂိမ်းကတော့ EA ရဲ့နောက်ဆုံးမျှော်လင့်ချက်ဖြစ်ပါတယ်။

ဒီလောက်ဆိုရင်တော့ ဂိမ်းပရိသတ်တွေအားလုံး အခုလာမယ့် E3 2018 ပွဲမှာ ဘယ်လိုအစီအစဉ်တွေရှိတယ်၊ ဘယ်ဂိမ်းကုမ္ပဏီတွေက ဘာတွေပြဖို့ရည်ရွယ်ထားတယ်၊ အစရှိတာတွေကို လုံးစေ့ပတ်စေ့သိသွားလောက်ပြီလို့ ထင်ပါတယ်။ E3 ပွဲဟာ တစ်နှစ်တစ်ခါပဲကျင်းပတာမို့ ကမ္ဘာနဲ့အဝှမ်းက ဂိမ်းပရိသတ်တွေအားလုံး မျှော်တလင့်လင့်နဲ့ စောင့်ဆိုင်းကြတဲ့ ဂိမ်းခင်းကျင်းပြသရာပွဲတော်ကြီးဆိုရင်လည်း မမှားပါဘူး။ ပွဲနဲ့ပတ်သက်တဲ့ သိရှိသမျှသတင်းအချက်အလက်တွေနဲ့ အကြောင်းအရာတွေကို ဂိမ်မာတွေကိုပြန်လည်ဝေမျှဖို့ ဒီစာစောင်မှာစုစည်းတင်ပြလိုက်ပါတယ်။ အားလုံးပဲနောက်လ ၁၂ ရက်မှာ စတင်ကျင်းပမယ့် E3 2018 ပွဲကြီးကို ရင်ခုန်စိတ်လှုပ်ရှားစွာနဲ့ စောင့်မျှော်နေကြပါဦးလို့ တိုက်တွန်းရင်း နောက်ဆောင်းပါးတွေမှာ ပြန်တွေ့ကြပါမယ်။ 

Yan
Ref: Gamespot, Kotaku

ရာစုသစ်ဂိမ်းလောကတစ်ခုလုံးကို လှုပ်ခါစေခဲ့တဲ့ God Of War 4 အပေါ် ဂိမ်းမီဒီယာကြီးတွေ ဘယ်လိုမြင်သလဲ?

ယခုအချိန်ဟာဂိမ်းလောကတစ်ခုလုံးအတွက် ရင်ခုန်သံတွေမြန်လောက်အောင် အရေးကြီးလှတဲ့အခိုက်အတန့်တစ်ခုဖြစ်ပါတယ်။ ယခုအချိန်ဟာကမ္ဘာအရပ်ရပ်က ဂိမ်းပညာရှင်တွေ၊ ဂိမ်းဖန်တီးထုတ်လုပ်သူတွေ၊ နယ်ပယ်ပေါင်းစုံကဂိမ်းမီဒီယာတွေနဲ့ ဂိမ်းချစ်သူများကိုယ်တိုင် နှစ်များချီပြီးစောင့်ဆိုင်းခဲ့ရတဲ့အချိန်ဖြစ်သလို ၂၁ ရာစုရဲ့မျိုးဆက်သစ်ဂိမ်းလောကကို အပြောင်းအလဲတစ်ခုရိုက်ခတ်မယ့်အချိန်တစ်ခုလည်းဖြစ်ပါတယ်။ အဲဒီလောက်ကြီးမားတဲ့အပြောင်းအလဲဟာ ဘယ်လိုအပြောင်းအလဲမျိုးဖြစ်မလဲ? Gaming Console အသစ်တစ်ခု ထွက်လာမှာလား? Gaming Platform သစ်တစ်ခုကို ချပြမယ့်အချိန်လား? မဟုတ်ပါဘူး၊ ဂိမ်မာများအားလုံး မျှော်လင့်ချက်ကြီးစွာနဲ့ နှစ်ရှည်လများစောင့်မျှော်နေခဲ့ရတဲ့ God Of War ဂိမ်းသစ်ထွက်လာမယ့်အချိန်မို့လို့ပါ။ ၂၀၁၄ ခုနှစ်ရဲ့ Playstation Experience ပွဲမှာ Santa Monica Studio ရဲ့ Creative Director ဖြစ်သူ Cory Barlog ဟာ အားလုံးစောင့်မျှော်နေကြတဲ့ God Of War ဂိမ်းသစ်ကို စတင်ဖန်တီးဖို့ခြေလှမ်းတွေပြင်နေပြီလို့ အားလုံးကို အသိပေးကြေညာခဲ့ပါတယ်။ Cory Barlog အနေနဲ့ နောက်လာမယ့် God Of War ဂိမ်းသစ်ဟာ ဂိမ်းစီးရီးရဲ့နောက်ဆုံးအဆုံးသတ်ခဲ့တဲ့ ဇာတ်ကြောင်းနောက်ကိုလိုက်မှာဖြစ်ပေမယ့် ဂိမ်းတစ်ခုလုံးကိုအစအဆုံးပြန်လည်ဖန်တီးပြီး reboot အနေနဲ့ ထွက်လာမယ်လို့ တစ်ခါတည်းထည့်သွင်းပြောကြားခဲ့တာဖြစ်ပါတယ်။ အဲဒီလိုနဲ့အချိန်နှစ်နှစ်အကြာ ၂၀၁၆ ခုနှစ်ရဲ့ E3 ပွဲမှာတော့ God Of War ဂိမ်းထွက်ရှိလာမယ်ဆိုတာကို gameplay demo နဲ့တကွ အတိအလင်းကြေညာခဲ့ပြီး အဲဒီသတင်းဟာ ပွဲတတ်ရောက်သူပရိသတ်အားလုံးရဲ့အသည်းနှလုံးကို လှုပ်ခတ်သွားစေခဲ့ပါတယ်။ ဒီလိုနဲ့ ၂၀၁၆ ခုနှစ် E3 ပွဲအပြီးမှာတော့ God Of War ဂိမ်းအသစ် ဘယ်အချိန်မှာထွက်လာမလဲ၊ ဘယ်အချိန်မှာ ပရိသတ်လက်ထဲရောက်မလဲဆိုတဲ့ မေးခွန်းတွေဟာ ဂိမ်းဒီမီယာများနဲ့ ဂိမ်မာတွေကြား ပွက်လောရိုက်ခဲ့ပါတယ်။ ဒါပေမယ့် အခုအချိန်မှာတော့ အဲဒီလိုမသေချာမရေရာတဲ့ မေးခွန်းတွေအားလုံးပျောက်ကွယ်ခဲ့ပါပြီ၊ ဘာဖြစ်လို့လည်းဆိုတော့ God Of War ဂိမ်းဖန်တီးထုတ်လုပ်တဲ့ Santa Monica Studio ဟာ God Of War ဂိမ်းသစ်ကို လွန်ခဲ့တဲ့နှစ်ရက် ၂၀၁၈ ခုနှစ်၊ ဧပြီလ ၂၀ ရက်နေ့က စောင့်ဆိုင်းနေတဲ့ပရိသတ်တွေဆီ ဆိုက်ဆိုက်မြိုက်မြိုက်ကြီး အရောက်ထည့်ပေးလိုက်လို့ပါပဲ။ ထွက်ထွက်လာပြီးချင်းပဲ စောင့်မျှော်နေတဲ့ဂိမ်မာထုကြီးရဲ့ တာဝန်ကျေပွန်မှုကြောင့် အချိန်တစ်ရက်တောင်မကြာခဲ့ပဲ God Of War ဂိမ်းသစ်ထွက်ရှိလာတဲ့သတင်းတွေဟာ တောမီးလို တဟုန်ထိုးပြန့်နှံ့သွားခဲ့ပါတယ်။ တစ်ချိန်တည်းမှာပဲ ဂိမ်းတစ်ခုလုံးကိုခြုံငုံသုံးသပ်ဖို့ အဆင်သင့်စောင့်နေတဲ့ဂိမ်းမီဒီယာများဟာလည်း အသစ်ထွက်ရှိလာတဲ့ God Of War ဂိမ်းအသစ်အကြောင်းကို ဆောင်းပါးတွေ၊ သတင်းတွေမှာ တစ်ဖွဲ့တစ်နွဲ့အသီးသီးဖော်ပြလာကြပါတယ်။ အထက်မှာဖော်ပြထားတဲ့ခေါင်းစဉ်အတိုင်း ဂိမ်းရဲ့ဇာတ်ကြောင်း၊ ဂိမ်းကစားပုံနဲ့ ကျင်လည်တဲ့ပတ်ဝန်းကျင် သို့လောသို့လောတွေကို ဒီနေရာမှာခေတ္တချန်လှစ်ထားပြီး ကမ္ဘာ့နယ်ပယ်အသီးသီးက ဂိမ်းမီဒီယာကြီးတွေအနေနဲ့ ဒီ God Of War ဂိမ်းသစ်အပေါ်မှာ ဘယ်လိုသုံးသပ်ကောက်ချက်ချထားသလဲဆိုတာကို ဒီဆောင်းပါးမှာဖော်ပြသွားမှာဖြစ်တဲ့အတွက် ဆက်ပြီးကြည့်လိုက်ကြစို့ဗျာ။

Game: God of War

Developer / Publisher: Sony Santa Monica / Sony

Platforms: PS4

Release Date: April 20

Price: US $60 / £53 / AU $100

Gamespot - 9/10

ဒီ God Of War ဂိမ်းဟာ အရင်စီးရီးအတိုင်းပဲ ဘာမှမပြောင်းလဲပါဘူး။ အသက်ရှုမှားလောက်အောင် မှင်သက်ဖို့ကောင်းတဲ့ဂိမ်းလောက၊ ရင်ထဲတိုက်ရိုက်ထိတဲ့အက်ရှင်တွေနဲ့ production ဘတ်ဂျက်မြင့်မားတယ်ဆိုတာ ကိုတွေ့ရတယ်။ ဇာတ်လမ်းကရှေ့ဆက်လေလေ၊ ကိုယ့်ရဲ့တိုက်ခိုက်မှုတွေက ပိုပြီးအသက်ပါလာလေလေပဲ။ ဒီနေရာမှာရင့်ကျက်သွားတဲ့တစ်ချက်က Storytelling အခန်းကဏ္ဍပဲ။ ဒီဂိမ်းရဲ့ဇာတ်ကောင် Kratos လိုပဲ၊ ဂိမ်းစီးရီးကြီး ကိုယ်တိုင်ကိုက အရင်ထွက်ခဲ့တဲ့ဂိမ်းတွေနဲ့မတူအောင် အဆင့်မြှင့်ခဲ့တယ်။ Kratos က အရင်လိုမျိုး ခန့်မှန်းရလွယ်တဲ့ အရိုင်းအစိုင်းကြီးမဟုတ်တော့ဘူး။ ဒီ reboot နဲ့အတူ နောက်ထပ်ပြီးလာမယ့် စွန့်စားခန်းအသစ်တွေကို ရင်ခုန်စွာနဲ့ လက်လမ်းကြိုဆိုရဦးမယ်။

-- Peter Brown

IGN - 10/10

God Of War ဂိမ်းဆိုတာနဲ့ အကြမ်းစားအက်ရှင်တွေကို မျှော်လင့်လို့ရတယ်။ ဒါပေမယ့် ဂိမ်းဇာတ်လမ်းတဖြည်းဖြည်းဆက်ရာကနေ အနုပညာမြောက်တဲ့ စိတ်လှုပ်ရှားစရာခရီးစဉ်ကြီးတစ်ခု ဖြစ်သွားလိမ့်မယ်လို့တော့ မထင်ခဲ့တာအမှန်ပဲ။ ဒီ God Of War မှာ Kratos ဟာ ဖခင်တစ်ယောက်၊ သူရဲကောင်းတစ်ယောက်ဖြစ်တယ်။ ရန်သူတွေနဲ့ရင်ဆိုင်တိုက်ခိုက်တဲ့ပုံစံနဲ့ သူ့ရဲ့သားကို ဖခင်တစ်ယောက်လိုဆက်ဆံတဲ့ပုံစံ၊ ဇာတ်ကောင်တစ်ကောင် ပုံစံနှစ်မျိုးကိုအသားပေးထားတာ တွေ့ရတယ်။ ဖန်တီးထားတဲ့ဂိမ်းလောက၊ ဇာတ်ကောင်တွေ၊ ဂိမ်းကစားပုံစံ အားလုံးကိုပေါင်းစည်းလိုက်ရင် စီးရီးတစ်ခုလုံးရဲ့ အမှတ်ရစရာ အခိုက်အတန့်တွေလို ဖြစ်သွားတယ်။

-- Jonathan Dornbush

GamesRadar - 5/5

ဒီ God Of War ဂိမ်း ဘယ်လောက်ကောင်းတယ်ဆိုတာကို ချဲ့ကားပြောမယ်ဆိုရင်တောင် စကားလုံးတွေနဲ့ဖော်ပြဖို့ မဖြစ်နိုင်ဘူး။ အသေးစိတ်ဖန်တီးထားတဲ့ဂိမ်းလောက၊ ဇာတ်ကောင်တွေနဲ့ Storytelling ကဏ္ဍ အလွှာတစ်လွှာချင်းစီဟာ လက်တွေ့ဆန်လွန်းတယ်။ Kratos အနေနဲ့ ဘယ်လောက်ပဲသွေးသံတရဲရဲနဲ့ ပုဆိန်တစ်လက်ကိုကိုင်ဆွဲပြီး တိုက်ပွဲမှာသောင်းကျန်းနေပစေဦးတော့၊ သူ့ရဲ့သားဖြစ်တဲ့ Atreus နဲ့အတူူတွဲပြီး မြင်ရတဲ့ဇာတ်ဝင်ခန်းတွေက Kratos ရဲ့ လူသားအဆန်ဆုံးအချိန်တွေပဲ။ ဒီဂိမ်းကြီးထွက်မလာခင်က တကယ်တမ်းထွက်လာရင် ဘယ်လောက်ကောင်းနိုင်မလဲဆိုတဲ့ ဆွေးနွေးခန်းပေါင်းသောင်းခြောက်ထောင်ဖွင့်လာလိုက်ကြတာ၊ တကယ့်တကယ်ထွက်လာတဲ့အချိန်မှာ ဒါဘယ်လောက်ကောင်းလဲဆိုတာထက် ဒီဂိမ်းဟာ ၂၁ ရာစုရဲ့ ဂိမ်းမျိုးဆက်သစ်တစ်ခုကိုအစပျိုးပေးလိုက်တဲ့ ဂိမ်းတစ်ခုဖြစ်သွားခဲ့တာ။

-- Leon Hurley

Game Informer - 9.75/10

လွန်ခဲ့တဲ့နှစ်တွေက Kratos ဟာ ကလဲ့စားချေလိုစိတ်တွေလွှမ်းမိုးပြီး အမျက်ဒေါသတွေပြည့်နှက်လို့ အိုလံပီယာတောင်ရဲ့နတ်ဘုရားတွေ အားလုံးကိုသတ်ပစ်ခဲ့တယ်။ အခုတော့ နော့စ်ဒဏ္ဍာရီထဲကို ရောက်လာပြီး အဲဒီမှာ Kratos ရဲ့ဖြစ်တည်မှုက နတ်ဘုရားတစ်ယောက်လိုဖြစ်နေတယ်။ ဒီအချိန်မှာ Kratos ပိုပြီးတည်ငြိမ်ရင့်ကျက်သွားတယ်၊ ပိုပြီးတိတ်ဆိတ်သွားတယ်။ နတ်ဘုရားတွေရဲ့ကျဆုံးမှုက သူ့ရဲ့အောင်မြင်မှုပဲ၊ ဒါပေမယ့် သူလိုချင်ခဲ့တဲ့အောင်မြင်မှုအပေါ်မှာ မယစ်မူးသွားဘူး။ ဂိမ်းရဲ့နောက်ခံစကားပြောက တစ်ချိန်တုန်းကသွေးဆာပြီး တိုက်ခိုက်မှုကိုလိုလားတဲ့ Kratos နဲ့ အခုလိုရင့်ကျက်သွားတဲ့ Kratos တို့ရဲ့ ပြောင်းလဲမှုကို ဖြည်းဖြည်းချင်းစီပြောပြနေတယ်။ ဒီ God Of War ဂိမ်းဟာ နက်ရှိုင်းတယ်၊ ကျယ်ပြန့်တယ်၊ ရင့်ကျက်တယ်။ အခုလာမယ့်မျိုးဆက်သစ်ရဲ့ဂိမ်းကောင်းတစ်ခုအဖြစ် လက်မထောင်နိုင်ဦးမှာအမှန်ပဲ။

-- Joe Juba

The Guardian - 5/5

အရာအားလုံးမှာ ပြီးပြည့်စုံနေတဲ့ဂိမ်းမျိုးကို အရင်ကတစ်ခါမှ မကစားဖူးခဲ့ဘူး။ တစ်ချိန်တုန်းကမဖြစ်နိုင်ဘူးလို့ လူတွေထင်ထားတာကို ဒီဂိမ်းမှာအတိုင်းသားတွေ့မြင်ရမယ်။ ဒီ God Of War ဂိမ်းဟာ ဂိမ်းတစ်ခုမဟုတ်ဘူး၊ ဂိမ်းတွေရဲ့အဆင့်အတန်းကိုသတ်မှတ်ပေးတဲ့ Standard-setter တစ်ခုဖြစ်ပါတယ်။

-- Keza Macdonald

ကဲ ဂိမ်းလောကမှာရှေ့ဆုံးကပြေးနေတဲ့ဂိမ်းမီဒီယာကြီးတွေရဲ့ God Of War ဂိမ်းသစ်အပေါ်မှာ သုံးသပ်ထားတဲ့သုံးသပ်ချက်တွေ၊ မြင်တဲ့အမြင်တွေကတော့ အထက်မှာတွေ့ရတဲ့အတိုင်းပါပဲ။ အဲဒီတော့ ဒီ God Of War ဂိမ်းဟာ ဘယ်လောက်တောင်ကောင်းသလဲဆိုတဲ့မေးခွန်းထက် ဘယ်လောက်အကောင်းလွန်နေသလဲလို့သာ ပြောင်းပြီးမေးလိုက်ချင်ပါတယ်။ God Of War ဂိမ်းကိုအသည်းစွဲကြိုက်နှစ်သက်ကြတဲ့သူတွေတော့ အခုလိုအချိန်မှာပီတီတွေ အတော်လေးဝေဖြာနေပြီလို့ ထင်ပါတယ်။ အဲဒီတော့ ဆောင်းပါးလေးလည်းဖတ်ရင်း၊ ကိုယ့်ရဲ့ဂိမ်းခလုတ်လေးလည်းပြန်ကိုင်ရင်း အဲဒီလောက်တောင်ညွှန်းခံထားရတဲ့ God Of War ဂိမ်းသစ် ဘယ်လောက်တောင်မှပြီးပြည့်စုံပြီး ကောင်းမွန်သလဲဆိုတာကို ကိုယ်တိုင်ကိုယ်ကျပဲ တွေ့မြင်ခံစားကြည့်ကြပါလို့ တိုက်တွန်းရင်း God Of War ဂိမ်းသစ်အပေါ် ဂိမ်းမီဒီယာကြီးတွေမြင်တဲ့အမြင်တွေကို ကောက်နှုတ်တင်ပြလိုက်ရပါတယ်။

Yan
Ref: Wikia, Gamespot

သခင်မဲ့ဆာမူရိုင်း ဒါမှမဟုတ် လေလွင့်ဓါးသမားလို့ လူတွေသိကြတဲ့ ရိုနင်တွေအကြောင်း

ဆာမူရိုင်းလို့ဆိုလိုက်တာနဲ့ အားလုံး ဘာကိုဆိုလိုသလဲဆိုတာ သိကြမှာပါ။ ကျွန်တော်တို့ငယ်စဉ်ကတည်းက ရုပ်ရှင်ဇာတ်လမ်းတွေ၊ ရုပ်ပြကာတွန်းတွေနဲ့ ဝတ္ထုစာအုပ်တွေကနေတဆင့် တွေ့မြင်ရင်းနှီးခဲ့ကြတဲ့ သိပ်ကိုရဲရင့်ပြီး သစ္စာတရားနဲ့ သိက္ခာတရားကို အလေးအနက်ထားကြတဲ့ ဂျပန်ပြည်က စစ်သူရဲကောင်းတွေပေါ့။ ဒါပေမယ့် ဆာမူရိုင်းတွေအားလုံးကတော့ သိက္ခာတရားနဲ့ နေကြသူတွေတော့ မဟုတ်ပါဘူး၊ တစ်ချို့ သော ဆာမူရိုင်းတွေကတော့ ဆာမူရိုင်းဆိုတဲ့ဂုဏ်ပုဒ်ကိုစွန့်လွှတ်ပြီး လုပ်ကြံသူလို့အဓိပ္ပါယ်ဖွင့်ဆိုနိုင်တဲ့ ရိုနင် (Ronin) ဘဝကို ရွေးချယ်ကြပါတယ်။ အဲဒီတော့ ရိုနင်ဆိုတာကို အတိအကျပြောရမယ်ဆိုရင် လေလွင့်နေတဲ့ ဆာမူရိုင်းဟောင်းတွေလို့ ခေါ်ဆိုရမှာဖြစ်ပါတယ်။ တကယ်တမ်း အကျယ်ဖြန့်ပြီးအနက်ဖွင့်ဆိုရမယ်ဆိုရင်တော့ ရိုနင်ဆိုတာဟာ သခင်မရှိတဲ့ ဆာမူရိုင်းကို ဆိုလိုခြင်းပဲ ဖြစ်ပါတယ်။ ဂျပန်ပဒေသရာဇ်ခေတ်ဖြစ်တဲ့ ၁၁၈၅ ခုနှစ်ကနေ ၁၈၆၉ ခုနှစ် အထိ ဆာမူရိုင်းတွေမှာ ဘူရှီဒို ရှိုရှင်ရှူ (Bushido Shoshinshu) လို့ခေါ်တဲ့ စည်းမျဉ်းတစ်ခုရှိပါတယ်။ အဲဒီစည်းမျဉ်းကတော့ ဆာမူရိုင်းတစ်ယောက်ဟာ သူခစားရာအထက်ကသခင် သေဆုံးသွားရင် ဟာရာကီရီ (hara kiri) လို့ခေါ်တဲ့ ကိုယ့်ကိုယ်ကိုအဆုံးစီရင်ခြင်းကို လုပ်ဆောင်ရပါတယ်။ ဒါပေမယ့် တကယ်တမ်း သခင်မဲ့သွားတဲ့အချိန်မှာ ဆာမူရိုင်းတစ်ယောက်ဟာ အဲဒီစည်းမျဉ်းကို မလိုက်နာဘူးဆိုရင်တော့ အထက်ကပြောသလို လေလွင့်ဆာမူရိုင်းဟောင်း ရိုနင်တွေဖြစ်လာကြပါတယ်။

တစ်ခေတ်တစ်ခါတုန်းကတော့ တစ်ချို့ သောဆာမူရိုင်းတွေဟာ တိုခုဂါဝါ ရှိုဂန်နိတ် (Tokugawa Shogunate) လို့ခေါ်တဲ့ အစိုးရကို ဆန့်ကျင့်ဖို့အတွက် ရိုနင်အဖြစ်ကို ရည်ရွယ်ချက်ရှိစွာ ခံယူတက်ကြပါတယ်။ ချမှတ်ထားတဲ့စည်းမျဉ်းတွေမရှိ၊ လိုက်နာရမယ့် ကျင့်ဝတ်တွေနဲ့ စောင့်ထိန်းရမယ့် သိက္ခာနဲ့ သစ္စာတရားတွေမရှိတာကြောင့် ရိုနင်တွေဟာ လွတ်လပ်စွာပဲ အစိုးရကို ဆန့်ကျင်ကြပါတယ်။ အဲဒီလိုနိုင်ငံရေးနဲ့ စစ်ရေးစစ်ရာတွေ ရှုပ်ထွေးနေချိန်မှာ တစ်ချို့သခင်တွေဟာ သူတို့်ရဲ့ လက်အောက်ခံ ဆာမူရိုင်းတွေကို ရိုနင်အဖြစ် ခံယူခိုင်းကြပါတယ်။ ဘာဖြစ်လို့လည်းဆိုတော့ အဲဒီလိုလုပ်လိုက်တဲ့အခါ သူတို့ရဲ့နာမည်နဲ့ ဂုဏ်သိက္ခာကိုမထိခိုက်ဘဲ လက်ရှိအစိုးရနဲ့ အုပ်စိုးနေတဲ့စနစ်ကို ဆန့်ကျင်နိုင်မှာဖြစ်ပါတယ်။ တိုခုဂါဝါအစိုးရ အုပ်ချုပ်ခဲ့တဲ့ကာလမှာ ပြောင်းလဲလာတဲ့ စနစ်အသစ်တွေကို ပြည်နယ်အသီးသီးက ဒိုင်မျိုတွေနဲ့ အရှင်သခင်တွေဟာ မနှစ်မြို့တာကြောင့် ရိုနင်အရေအတွက်ဟာ ဂျပန်နိုင်ငံမှာ မြင့်တက်လာခဲ့ပါတယ်။ ဆာမူရိုင်းဆိုတဲ့ စစ်သူရဲကောင်းတွေဆီမှာရှိတဲ့ ကန့်သတ်ချက်အတိုင်း ဆာမူရိုင်းတစ်ယောက်ဟာ သူ့အထက်ကသခင်ရဲ့ ခွင့်ပြုချက်မရပဲ အခြားသခင်တစ်ယောက်စီမှာ အမှုထမ်းခွင့်မရှိ ဆိုတဲ့ ဥပဒေကြောင့် ဆာမူရိုင်းအများစုဟာ လက်ရှိသခင်တွေဆီက ထွက်ခွာပြီး ရိုနင်အဖြစ်နဲ့ အစိုးရကို အတိအလင်း ဆန့်ကျင်လာကြပါတယ်။

အကြောင်းတစ်ခုခုကြောင့် သခင်သေဆုံးတာဖြစ်စေ၊ သခင်ရဲ့ စွန့်ပစ်ခြင်းကို ခံရတာမျိုးဖြစ်စေ၊ အစရှိတဲ့အချင်းအရာမျိုးဖြစ်လာတဲ့အချိန်မျိုးမှာ ဆာမူရိုင်းတွေဟာ ပြဠာန်းထားတဲ့ဥပဒေအရ အခြားသခင်တစ်ယောက်အောက်မှာ အမှုထမ်းခွင့်မရှိတာကြောင့် အသက်မွေးဝမ်းကြောင်းပြုဖို့ လုပ်ငန်းရှာရပါတယ်။ ဒါပေမယ့် စစ်ပညာရပ်နဲ့ ဓားရေးကျွမ်းကျင်မှုကလွဲပြီး အခြားဘယ်လိုပညာရပ်မှ မတက်ကျွမ်းတာကြောင့် သခင်မဲ့တဲ့ဆာမူရိုင်းတွေဟာ နောက်ဆုံးမှာ ရိုနင်တွေအဖြစ်နဲ့ အခကြေးငွေယူတဲ့ လုပ်ကြံသတ်ဖြတ်သူ (assassin) တွေဖြစ်လာကြပါတယ်။ ရိုနင်အများစုကတော့ ဓားနှစ်လက်ကို ခါးမှာချိတ်ဆွဲပြီး လက်နက်အဖြစ် အသုံးပြုကြပါတယ်။ ဒါတင်မက တစ်ခြား လက်နက်ပုန်းများစွာကိုလည်း အသုံးပြုကြပါသေးတယ်။ ငွေကြေးချို့တဲ့သူတွေကတော့ ဓားရေးလေ့ကျင့်ရာမှာသုံးတဲ့ ဝါးစိမ်းတုတ်အရှည်ကို လက်နက်အဖြစ်ကိုင်ဆောင်တတ်ကြပါတယ်။ သမိုင်းကြောင်းတစ်လျှောက်မှာမှ နာမည်ကြီးတဲ့ ရိုနင်အဖွဲ့ကတော့ 47 Ronins ဆိုတဲ့ ရိုနင်လေးဆယ့်ခုနှစ်ဦးအဖွဲ့ပဲ ဖြစ်ပါတယ်။ သူတို့ရဲ့ သခင်ဖြစ်သူ အဆနို နာဂနိုရိ (Asano Naganori) ဟာ ကီရာ ရိုရှီနာခါ (Kira Yoshinaka) လို့အမည်ရတဲ့ အစိုးရအရာရှိတစ်ယောက်ကို ကိုယ်ထိလက်ရောက်စော်ကားမှုကြောင့် ကိုယ့်ကိုယ်ကိုယ် (hara kiri) လုပ်ပြီး သတ်သေဖို့ တွန်းအားပေးခံရတဲ့အခါမှာ သခင်မဲ့သွားတဲ့ ဆာမူရိုင်း ၄၇ ဦး ရိုနင်တွေဖြစ်လာကြပြီး ကွယ်လွန်သွားတဲ့သခင်အတွက် အမှန်တရားကိုပြန်လည်ယူဆောင်ပြီး လက်စားချေဖို့သစ္စာဆိုခဲ့ကြပါတယ်။

ဒီလိုနဲ့ တစ်နှစ်ကျော် နှစ်နှစ်နီးပါး ပြင်ဆင်မှုတွေအပြီး ၁၇၀၃ ခုနှစ်၊ ဇန်နဝါရီလ ၃၀ ရက်နေ့၊ နှင်းမုန်တိုင်းတွေ တိုက်ခတ်နေတဲ့ ညတစ်ညမှာတော့ အဲဒီရိုနင် ၄၇ ယောက်ဟာ ကီရာရဲ့ နေအိမ်ကို အုပ်စုနှစ်စုခွဲပြီး အိမ်အရှေ့ဖက်က တစ်ဖွဲ့၊ အိမ်အနောက်ကတစ်ဖွဲ့ ဝင်ရောက်တိုက်ခိုက်ခဲ့ကြပါတယ်။ ဒါပေမယ့် အိမ်ထဲက လူအားလုံးကို မသတ်ပဲ ကီရာနဲ့သူ့ရဲ့နောက်လိုက် ၁၄ ဦးကိုသာ ကလဲ့စားချေတဲ့အနေနဲ့ သတ်ခဲ့ပါတယ်။ ဒီလုပ်ကြံသတ်ဖြတ်မှုဟာ တရားမဝင်ပေမယ့် ဂျပန်ပြည်အစိုးရဟာ အဲဒီရိုနင် ၄၇ ဦးရဲ့ ရဲရင့်မှု၊ သတ္တိနဲ့ တည်တံ့လှတဲ့သစ္စာတရားကို လေးစားတဲ့အနေနဲ့ ဆာမူရိုင်းတွေရဲ့ထုံးတမ်းဖြစ်တဲ့ ဟာရာကီရီနဲ့ ကိုယ့်ကိုယ်ကိုယ်သတ်သေစေဖို့ ခွင့်ပြုခဲ့ပြီး တိုကျိုမြို့ ဆန်ဂါခုဂျီ (Sengakuji) ဘုရားကျောင်းမှာ ရုပ်အလောင်းတွေကို မြှုပ်နှံစေခဲ့ပါတယ်။ ဆာမူရိုင်း ဒါမှမဟုတ် ရိုနင်တွေရဲ့ အခုလိုသမိုင်းဝင်ဖြစ်ရပ်ကို ပြန်လည်အသက်သွင်းတဲ့အနေနဲ့ ၂၀၁၃ ခုနှစ်မှာ နာမည်ကျော်မင်းသား Keanu Reeves ဦးဆောင်တဲ့ 47 Ronins ရုပ်ရှင်ထွက်ရှိခဲ့တာကြောင့် ရိုနင်ဆိုတဲ့စကားလုံးဟာ လူတော်တော်များများနဲ့လည်း မစိမ်းတဲ့စကားလုံးဖြစ်ခဲ့ပါတယ်။

ဒီဖြစ်ရပ်အပြင် သမိုင်းတစ်လျှောက်မှာ နာမည်ကြီးတဲ့ နောက်ထပ်ရိုနင်တစ်ယောက်ကတော့ မီရာမိုတို မူဆာရှီ (Miyamoto Musashi) ပဲဖြစ်ပါတယ်။ သူ့ကိုတော့ မသိတဲ့သူရှားပါးပါတယ်၊ ဘာကြောင့်လည်းဆိုတော့ မီရာမိုတိုဟာ တစ်ကမ္ဘာလုံးအတိုင်းအတာနဲ့ အတော်ဆုံးဓားသမားလို့ သတ်မှတ်ခံထားရတဲ့ သူတစ်ယောက်ဖြစ်လို့ပါပဲ။ အသက် ၁၃ နှစ်သား အရွယ်ကစလို့ တတ်ပေ့၊ ကျွမ်းပေ့ဆိုတဲ့ ဓားပညာရှင်တွေ တစ်ယောက်ပြီးတစ်ယောက်နဲ့ စိန်ခေါ် စီးချင်းထိုးခဲ့ပြီး နောက်ဆုံးအနားယူတဲ့အချိန်အထိ ရှုံးပွဲမရှိခဲ့လို့ပါပဲ။ သူ့ရဲ့အတွေးအခေါ်တွေ၊ သင်ကြားမှုတွေဟာ သိပ်ကိုကောင်းမွန်သလို ဓားပညာမှာပြိုင်ဘက်မရှိဘွဲ့ကို ရခဲ့တာကြောင့် ဂျပန်သာမက ကမ္ဘာ့သမိုင်းမှာပါ အားလုံးအမှတ်ရနေကြတဲ့ ရိုနင်တစ်ယောက်ပဲဖြစ်ပါတယ်။ ဒီလောက်ဆိုရင် ရိုနင်ဆိုတာ ဘာလဲ? လေလွင့်နေတဲ့ဆာမူရိုင်းတွေနဲ့ သူတို့ရဲ့သမိုင်းဝင်ဖြစ်ရပ်တွေကို သိရှိသွားလောက်ပြီထင်ပါတယ်။ နောက်ထပ်ပြီးလည်း အခုလို စိတ်ဝင်စားဖို့ကောင်းတဲ့ ဗဟုသုတဖြစ်ဖွယ်ဆောင်းပါးလေးတွေကို ပြန်လည်တင်ဆက်သွားမှာမို့ စောင့်မျှော်နိုင်ပါတယ်။ ဖတ်ရှုသူအားလုံးကို ကျေးဇူးတင်ပါတယ်။

Ref: historycollections

Wine & Yan