စိတ္တဇဆန်ဆန်ခြောက်ခြားစရာ သဘာဝလွန်ရုပ်ရှင်ဇာတ်လမ်းကနေ ရာစုသစ်ဂိမ်းတစ်ခုအဖြစ် ပြန်လည်အသက်ဝင်လာတဲ့ Blair Witch

အခုပြောမယ့်အကြောင်းကို အချို့သော ၉၀ ခုနှစ်ဖွားများကတော့ တစွန်းတစသိနိုင်ပါလိမ့်မယ်။ ကျွန်တော်ကိုယ်တိုင်လည်း ၉၀ ခုနှစ်နောင်းပိုင်းဖွားတဲ့သူဖြစ်ပေမယ့် ဒီလိုမရှေးမနှောင်းရုပ်ရှင်ဇာတ်ကားကို ကြည့်ခဲ့မကြည့်ခဲ့ဖူးလားဆိုတာ အသေအချာမမှတ်မိပါဘူး။ ဟိုးလေးတကျော်ပေါက်မြောက်တဲ့ ရုပ်ရှင်ဇာတ်ကားမဟုတ်သော်ငြားလည်း သူ့အိုးနဲ့သူ့ဆန်ဆိုသလို ကောင်းမွန်ပြောင်မြောက်တဲ့ ရုပ်ရှင်ဇာတ်ကားတစ်ခုရဲ့အတိုင်းအတာလောက်တော့ နာမည်ရှိကောင်းရှိပါလိမ့်မယ်။ ဒါပေမယ့် အခုပြောမယ့်အကြောင်းကတော့ ၁၉၉၀ ခုနှစ်နဲ့ ၂၀၁၆ ခုနှစ်တို့မှာအသီးသီးထွက်ရှိခဲ့တဲ့ စိတ္တဇရုပ်ရှင်အကြောင်းမဟုတ်ပါဘူး။ အဲဒီရုပ်ရှင်ရဲ့ပုံပြင်ဇာတ်လမ်းကိုမှ လက်ရှိခေတ်အခြေအနေနဲ့ အကိုက်ညီဆုံးဖြစ်အောင် ကဏ္ဍပေါင်းစုံက ပြန်လည်ပြုပြင်မွန်းမံပြီး အသက်ပြန်သွင်းထားတဲ့ Blair Witch ဆိုတဲ့ဂိမ်းအကြောင်းပါပဲ။ ဒီဂိမ်းထွက်ရှိလာမယ်ဆိုတဲ့အကြောင်းကို လွန်ခဲ့တဲ့တစ်ရက်ကမှ ကျင်းပပြီးစီးသွားခဲ့တဲ့၂၀၁၉ ခုနှစ် E3 ပွဲမှာထုတ်ဖော်ပြောကြားခဲ့တာဖြစ်ပါတယ်။ Ghostwire Tokyo, Elden Ring အစရှိတဲ့ဂိမ်းတွေနဲ့ အနေအထားချင်းတူညီတယ်လို့ ခန့်မှန်းရတဲ့ ဒီ Blair Witch  ဂိမ်းနဲ့ပတ်သက်ပြီး ဒီဂိမ်းဟာ ဘယ်လိုဇာတ်လမ်းဇာတ်အိမ်မျိုးရှိမလဲဆိုတာ ခန့်မှန်းနေကြသူတွေအတွက် စိတ်ကျေနပ်စရာတစ်ခုကိုအရင်ဆုံး ပြောလိုက်ချင်ပါတယ်။

အဲဒါကတော့ အရင်ကြေညာခဲ့တဲ့ဂိမ်းတွေလိုမျိုး ထွက်ရှိမယ့်ရက်စွဲရော၊ ဇာတ်လမ်းဇာတ်အိမ်နဲ့ ဂိမ်းကစားဟန်ရော ဘာဆိုဘာမှမသိရတာမျိုးမဟုတ်ဘဲ အခုလာမယ့် Blair Witch ဂိမ်းဟာ ၁၉၉၉ ခုနှစ်နဲ့ ၂၀၁၆ ခုနှစ်တို့က ရုပ်ရှင်ရဲ့နောက်ခံဇာတ်လမ်းထဲမှာပဲ ဂိမ်းဇာတ်အိမ်ကိုတည်ထားပြီး First Person Horror Survival ဂိမ်းဖြစ်တယ်လို့ Xbox က အတိအလင်းပြောကြားခဲ့လို့ပါပဲ။ အခုလိုအမှောင်အတိလွှမ်းပြီး ထိတ်လန့်ခြောက်ခြားစရာကောင်းတဲ့ Blair Witch ရဲ့နောက်ကွယ်က ဂိမ်းရေးဆွဲဖန်တီးသူတွေကတော့ ရသပြောင်မြောက်လှတဲ့ Horror ပရိသတ်တွေရဲ့အသည်းစွဲ Layers of Fear ဂိမ်းကို ထုတ်လုပ်ခဲ့တဲ့ Bloober စတူဒီယိုဖြစ်ပြီး ဒီတစ်ခေါက် Blair Witch ပရောဂျက်မှာ အစွမ်းကုန်ကြိုးစားအားထုတ်ထားတယ်လို့ ဆိုပါတယ်။ ဂိမ်းကို ၂၀၁၉ ခုနှစ်ရဲ့ E3 ပွဲမှာ Microsoft နဲ့ Xbox က ကြေညာပေးခဲ့တာဖြစ်ပြီး ညို့မှိုင်းမှိုင်းတောအုပ်အလယ် မှောင်ကြီးမည်းကြီးထဲမှာ ဓါတ်မီးတစ်လက်ကိုကိုင်ပြီး ခွေးတစ်ကောင်ကို အဖော်ပြုရင်း တစ်စုံတစ်ခုကိုရှာဖွေစုံစမ်းနေတဲ့ လူတစ်ယောက်ရဲ့ဗီဒီယိုတပိုင်းတစကို ထွေလာမှာတွေ့မြင်ရမှာဖြစ်ပါတယ်။ ဘယ်လိုဖြစ်ရပ်တွေလာဦးမလဲဆိုတာကို မှန်းဆလို့မရပေမယ့် ဒီဂိမ်းဟာအကြောက်တရားကို အတိုင်းသားခံစားရစေမယ့် တသီးသသန့် Horror ဂိမ်းဖြစ်တယ်လို့ ထွေလာကိုကြည့်ပြီး သိနိုင်ပါတယ်။ 

အရာရာကိုစူးစမ်းလေ့လာတတ်တဲ့ ဓါတ်ရှင်ဖန်တီးသူလောလိပ်ကျောင်းသား Ellis အနေနဲ့ ယုံတမ်းပုံပြင်တစ်ခုဖြစ်တဲ့ Blair Witch အကြောင်းကိုစုံစမ်းဖို့ တောတောင်မှောင်မည်းထဲ သွားရောက်ခဲ့တဲ့အဖြစ်အပျက်အပေါ်မှာ ၁၉၉၉ ခုနှစ်က Blair Witch ရုပ်ရှင်ရဲ့ဇာတ်အိမ်ကိုတည်ထားပေမယ့် အဲဒါတွေအပြီးနောက်ထပ် အချိန်နှစ်နှစ်အကြာမှာ Ellis ရဲ့ပျောက်ဆုံးသွားမှုကို Bullet ဆိုတဲ့ရဲခွေးတစ်ကောင်နဲ့ လိုက်လံစုံစမ်းတဲ့ရဲသား Peter Shannon အပေါ်မှာ Blair Witch ဂိမ်းဇာတ်အိမ်ကို တည်ဆောက်ထားတယ်လို့ သိရပါတယ်။ အဖြစ်အပျက်တွေကွာခြားပေမယ့် ဇာတ်ကြောင်းချင်းကတော့ ချိတ်ဆက်နေတယ်လို့ ဆိုနိုင်ပါတယ်။ ဒီဂိမ်းကိုလာမယ့် ၂၀၁၉ ခုနှစ်၊ သြဂုတ်လ ၃၀ ရက်နေ့မှာ ဆော့ကစားနိုင်မှာဖြစ်ပြီး ဂိမ်းဇာတ်ကြောင်းတည်ရာခုနှစ်ကတော့ ၁၉၉၆ ခုနှစ်ပါတဲ့ဗျာ။ ဒါပေမယ့် ကံမကောင်းစွာပဲ E3 ပွဲမှာ ကြေညာခဲ့တဲ့ဂိမ်းဖြစ်ပေမယ့် Blair Witch ဂိမ်းကို Xbox နဲ့ PC ပလက်ဖောင်းအသီးသီးမှာပဲ ဆော့ကစားနိုင်ပါဖြစ်ပါတယ်။ Playstation သမားများကတော့ ဒီဂိမ်းကိုတွေ့ကြုံခံစားခွင့်ရှိမှာ မဟုတ်ပါဘူး။ ကဲ ဒီတော့ အသစ်လာမယ့်  Blair Witch ဂိမ်းဟာ Horror ဂိမ်းချစ်ပရိသတ်တွေအားလုံးရဲ့ ဆန္ဒကိုဖြည့်ဆည်းပေးနိုင်မလား? မျိုးဆက်သစ်ဂိမ်းတစ်ခုအဖြစ် လက်မထောင်နိုင်မလား? အစရှိတာတွေကိုတော့ တကယ်တမ်းဂိမ်းထွက်ရှိလာချိန်မှသာ အဖြေရှာကြည့်ကြဖို့ တိုက်တွန်းရင်း နောက်ထပ်ဆောင်းပါးတွေမှာ ပြန်လည်ဆုံတွေ့ကြစို့ဗျာ။ 

Yan
Ref: theverge, gamesradar

စိတ်ကူးဉာဏ်ကွန့်မြူးမှုနဲ့ တီထွင်ကြံဆနိုင်စွမ်းနဲ့ တို့ပေါင်းစည်းထားတဲ့ အလားအလာအရှိဆုံးဂိမ်းသစ် Elden Ring

လတ်တလောတင်ဆက်ပေးခဲ့တဲ့ ဂိမ်းဆောင်းပါးတွေရဲ့ထိပ်ဆုံးမှာ ၂၀၁၉ E3 ပွဲအကြောင်းဟာ မပါမဖြစ်ပါပဲ။ ဟုတ်ပါတယ်၊ ဂိမ်းချစ်ပရိသတ်တွေအားလုံး နှစ်တိုင်းစောင့်မျှော်လေ့ရှိတဲ့ E3 ပွဲ (Electronic Entertainment Expo) ကကြေညာချက်တွေနဲ့ ထုတ်ဖော်ပြသခဲ့တဲ့အကြောင်းအရာတွေဟာ ဂိမ်မာတွေရဲ့မျှော်လင့်ချက်ကိုဘယ်သောအခါမှ ဖျက်သိမ်းပယ်ချခြင်းမရှိခဲ့ပါဘူး။ ဒါကြောင့်ပဲ တစ်နှစ်ထက်တစ်နှစ် နည်းပညာတွေထပ်မံတိုးတက်ပြောင်းလဲပြီး ဂိမ်းနယ်ပယ်ဟာပိုကျယ်ပြန့်လာတာနဲ့အမျှ E3 ပွဲကြီးဟာ ပိုပိုပြီးကောင်းလာတော့တာပါပဲ။ မိနစ်အနည်းငယ်သာပါဝင်တဲ့ ဂိမ်းထွေလာကိုကြည့်ပြီး ကိန်းအောင်းနေတဲ့ သိချင်စိတ်ကိုနှိုးဆွပေးခဲ့တဲ့ Ghostwire Tokyo အပြီးမှာ စာရေးသူအပါအဝင် ကြည့်ရှုနေကြတဲ့ပရိသတ်များသာမက E3 တစ်ပွဲလုံးကိုပါ တုန်လှုပ်အောင်ရိုက်ခတ်သွားစေခဲ့တဲ့ ဂိမ်းတစ်ခုရှိခဲ့ပါသေးတယ်။ အဲဒီဂိမ်းကတော့ နယ်ပယ်ကိုယ်စီက အထူးချွန်အပြောင်မြောက်ဆုံးသူနှစ်ဦး ပူးပေါင်းဖန်တီးထားတဲ့ Elden Ring ဆိုတဲ့ဂိမ်းပါပဲ။ Elden Ring ဆိုတဲ့ဂိမ်းဟာ Ghostwire Tokyo နီးတူပဲ E3 ပွဲမှာ ဂိမ်းကြေညာတဲ့မိနစ်ပိုင်းထွေလာကလွဲပြီး ဘာသတင်းအစအနမှ မထွက်ရှိလာသေးပါဘူး။ အဲဒီဂိမ်းဟာမျိုးဆက်သစ်ဂိမ်းလား? လက်ရှိပလက်ဖောင်းတွေမှာ ဆော့နိုင်မယ့်ဂိမ်းလား? ဆိုတာတောင်မသိရသေးတဲ့အခြေအနေပါ။

အဲ ဘာမှမသိရသေးဘူးဆိုပေမယ့် ရရှိထားတဲ့အချက်အလက်တွေအရတော့ ဒီဂိမ်းဟာအတော်လေးပေါက်မြောက်မယ့်ဂိမ်းလို့ ဆိုနိုင်ပါတယ်။ ဟိုးလေးတစ်ကျော်အောင်မြင်မယ်ဆိုတာထက် ရသသစ်နဲ့ကစားဟန်အသစ်ကို ဆော့ကစားသူတွေ တွေ့ကြုံခံစားစေပြီး ရင်ထဲကျန်ရစ်ခဲ့မယ့်အနေအထားမှာ ရှိနေပါတယ်၊ သိရတဲ့အချက်တွေအရတော့ လုံးဝကိုဒိတ်ဒိတ်ကျဲပါပဲ။ တစ်ကမ္ဘာလုံးကတစ်ခဲနက်အားပေးကြသူ သိန်းသန်းချီတဲ့အပြင် မကြာသေးခင်ကမှ နောက်ဆုံး season ကိုပြန်လည်ပြင်ဆင်ဖို့ ပဋိပက္ခတွေဖြစ်ခဲ့တဲ့ Game of Throne စီးရီးရဲ့နောက်ကွယ်က ဖန်တီးသူစာရေးဆရာ George R.R. Martin နဲ့ ခက်ခဲလွန်းလှပါတယ်ဆိုတဲ့ စိန်ခေါ်မှုတွေနဲ့တည်ဆောက်ထားတဲ့ Dark Souls နဲ့ Bloodborne  ဂိမ်းတို့ဖန်တီးမွေးဖွားရာ FromSoftware တို့ အတူပေါင်းပြီးပြုလုပ်ထားတဲ့ဂိမ်းဟာ Elden Ring ပါပဲ။ နယ်ပယ်အသီးသီးမှာလက်ရာပြောင်မြောက်တဲ့စီးရီးတွေကို ပရိသတ်အသည်းစွဲအောင်ပြုလုပ်နိုင်ခဲ့တဲ့သူနှစ်ယောက်ရဲ့ ပူးပေါင်းမှုဟာ ဘယ်လောက်တောင်အစွမ်းထက်မလဲဆိုတာ အားလုံးကမျက်ခြေမပြတ်စောင့်ကြည့်ရတော့မှာပါ။ FromSoftwre ရဲ့ အရင်ကထွက်ရှိခဲ့တဲ့ နာမည်ကျော်ကြားလူကြိုက်များတဲ့ Dark Souls, Bloodborne ဂိမ်းတွေနဲ့ ကွဲပြားခြားနားစွာပဲ အခုထွက်ရှိမယ့် Elden Ring ဟာ ကျယ်ပြန့်တဲ့ဂိမ်းလောကမှာ ကျင်လည်သွားလာဆော့ကစားရမယ့် Open-World ဂိမ်းစနစ်ဖြစ်တယ်လို့ သိရပါတယ်။

စဉ်းစားကြည့်မယ်ဆိုရင် Dark Souls ပဲဖြစ်ဖြစ်၊ Bloodborne ပဲဖြစ်ဖြစ် ဂိမ်းထဲကရှေးဟောင်းသမိုင်းပုံပြင်နဲ့ လောကအပေါ်မှာအားစိုက်ပြီး ဇာတ်အိမ်တည်ထားတာမှန်ပေမယ့် Open-World မဟုတ်တဲ့အတွက် ဆော့ရတဲ့သူတွေအနေနဲ့ အနည်းငယ်စိတ်ကျဉ်းကျပ်ဖိစီးမှုရှိတာ အမှန်ပါပဲ။ ဒီတစ်ခေါက်မှာတော့ George R.R Martin ရဲ့အိုင်ဒီယာအရ FromSoftware ဘက်ကနေ အားလုံးတအံ့တသြဖြစ်ရမယ့် ကြီးမားတဲ့အပြောင်းအလဲကို စပြီးလုပ်လာပါပြီ။ ဒါပေမယ့် ဒါကအစကနဦးပဲရှိပါသေးတယ်။ ဂိမ်းရဲ့နောက်ခံဇာတ်ကြောင်းကို များများစားစားမသိရသေးပေမယ့် George R.R Martin က ဂိမ်းရဲ့ဇာတ်လမ်းကိုရေးသားသူဖြစ်ပြီး ဂိမ်းတစ်ခုလုံးဟာ George R.R Martin ရဲ့လက်ရာ Mythos ဒဏ္ဍာရီအပေါ်မှာ ဇာတ်အိမ်တည်ထားတာဖြစ်ပါတယ်။ FromSoftware ရဲ့ဒါရိုက်တာ Mr.Miyazaki ရဲ့ Xbox ကိုပြောကြားချက်အရတော့ Elden Ring ဟာ လေးနက်မယ်၊ စိတ်ကူးယဉ်ဆန်ပြီး အမှောင်ဘက်သန်းမယ်၊ ဆန်းပြားပြီးရင်ခုန်ဖို့ကောင်းတဲ့ အတိုက်အခိုက်တွေပါဝင်မယ်၊ third-person အမြင်နဲ့ဆော့ရမှာဖြစ်ပြီး စုံလင်တဲ့ RPG အတွေ့အကြုံကို သူမတူအောင်ပေးစွမ်းသွားမယ်လို့ ဆိုပါတယ်။ ဂိမ်းရဲ့နာမည် Elden Ring ဟာ ဂိမ်းရဲ့တကယ်တမ်းဇာတ်ကြောင်းမှာလည်း လက်စွပ်ကိုရည်ညွှန်းတာဖြစ်ပါတယ်၊ Rings of Saturn လိုမျိုးဖြစ်မလားဆိုတာကတော့ ကိုယ့်ဘာသာကိုယ်ပဲ ခန့်မှန်းကြည့်ရုံကလွဲပြီး လောလောဆယ်မှာဘာမှမတတ်နိုင်ပါဘူး။ ဒီတော့ Elden Ring ဂိမ်းနဲ့ ပတ်သက်ပြီး လက်ရှိမှာသိရသလောက်ကို ဒီဆောင်းပါးနဲ့အတူ တင်ဆက်ပေးလိုက်ပါတယ်။ ၂၀၁၉ ရဲ့ E3 ပွဲကြီးကတော့ ဆောင်းပါးရေးသားဖန်တီးစရာ အကြောင်းအရာတွေအပြည့်ပါပဲ။ ဖတ်ရှုသူအားလုံးကို ကျေးဇူးအထူးတင်ပါတယ်။ အခုလိုမျိုးနောက်ထပ်ဂိမ်းဆောင်းပါးတွေမှာ ပြန်လည်တွေ့ကြပါမယ်လို့ ပြောကြားရင်း Elden Ring ဂိမ်းကိုအတူစောင့်မျှော်လိုက်ကြဖို့ တိုက်တွန်းလိုက်ပါရစေ။

Yan
Ref: PCgamers, androidcentral

အဖြေရှာမရတဲ့လျှို့ဝှက်နက်နဲမှုများစွာနဲ့ အမှောင်ထုရစ်ပတ်လွှမ်းခြုံထားတဲ့မြို့ပြ Ghostwire Tokyo

၂၀၁၉ ခုနှစ်ရဲ့ E3 ပွဲကြီးဟာ အခုဆိုရင်ရုပ်ရှင်တစ်ကားရဲ့ဇာတ်ရှိန်အတတ်ဆုံး အခိုက်အတန့်လိုဖြစ်နေပါပြီ။ ကိုယ်မျှော်လင့်ထားတဲ့အရာတွေ အမှန်တကယ်ဖြစ်လာခဲ့လို့ ပျော်မဆုံးဖြစ်နေတဲ့ဂိမ်းပရိသတ်တွေ၊ အသစ်အသစ်သောဂိမ်းတွေအတွက် ကြိုတင်ပြီးရင်ခုန်နေကြတဲ့ ဂိမ်းချစ်သူတွေ၊ နောက်ထပ်ဘယ်လိုမျိုးစိတ်လှုပ်ရှားစရာဂိမ်းမျိုးကို ပါဝင်လာဦးမလဲဆိုတာကို မျက်စိဒေါက်ထောက်ကြည့်နေကြသူတွေအကြားမှာ E3 ပွဲကြီးဟာ တရွေ့ရွေ့ရှေ့ဆက်သွားနေပါတယ်။ မနေ့ကတင်ဆက်ပေးခဲ့တဲ့ ၂၀၁၉ E3 ပွဲကြီးမှာ ဘာတွေမျှော်လင့်လို့ရနိုင်မလဲဆိုတဲ့ ဆောင်းပါးကိုဖန်တီးဖို့ သတင်းကုန်ကြမ်းရှာနေတဲ့အချိန်မှာ အမှတ်မထင်ပဲတွေ့သွားမိတဲ့ ဂိမ်းထွေလာတစ်ခုရှိခဲ့ပါတယ်။ E3 တစ်ပွဲလုံးမှာထုတ်ဖော်ပြသခဲ့တဲ့ အကောင်းဆုံးအမိုက်ဆုံးဂိမ်းတွေထဲမှာမှ အဲဒီဂိမ်းကိုကြေညာသွားတဲ့ထွေလာဟာ စာရေးသူရင်ထဲမှာမေးခွန်းများစွာနဲ့ ကျန်ရစ်ခဲ့တယ်လို့ဆိုရမှာပါ။ အဲဒါကြောင့်ပဲ အားလုံးကိုမျှဝေချင်တဲ့ရည်ရွယ်ချက်နဲ့ E3 အကြောင်းအပြီးမှာ ဒီဆောင်းပါးကိုတင်ဆက်ဖို့ ရွေးချယ်ဖြစ်သွားခဲ့တာပါ။ ကဲ ဒီတော့ ရှည်ရှည်ဝေးဝေးပြောမနေတော့ပဲ အဲဒီဂိမ်းဟာ ဘယ်လိုဂိမ်းမျိုးလဲ? ဘယ်လိုပုံစံဟန်ပန်နဲ့ ဂိမ်မာတွေရင်ထဲကိုဝင်ရောက်ခဲ့တာလဲ? ဂိမ်းရေးဆွဲဖန်တီးသူတွေက ဘယ်သူတွေလဲဆိုတာ သိရဖို့ စပြီးကြည့်လိုက်ကြရအောင်လားဗျာ။ 

Resident Evil နဲ့ The Evil Within လို့ဆိုလိုက်ရင် ဘယ်လောက်တောင်ခြောက်ခြားထိတ်လန့်ဖို့ကောင်းမှန်း၊ အဆင့်မြင့်ရုပ်ရှင်ဇာတ်ကားတစ်ကားလို ဇာတ်ကွက်ဇာတ်အိမ်အချိတ်အဆက်ကောင်းမှန်း၊ ဂိမ်းကစားဟန်နဲ့ ဂိမ်းဖန်တီးပြင်ဆင်မှုအားလုံးပြီးပြည့်စုံမှုရှိမှန်း ဂိမ်မာတိုင်းနီးပါးသိကြပါတယ်။ အဲဒါဆိုရင် စဉ်းစားကြည့်လိုက်ပါ၊ အဲဒီလိုရသမြောက်ပြီး ပရိသတ်အကြိုက်ထူးခြားတဲ့ဂိမ်းမျိုးတွေကို ဂိမ်မာတွေတွေ့ကြုံခံစားနိုင်အောင်လုပ်ပေးခဲ့တဲ့သူတွေ ပူးပေါင်းပြီး အတူဖန်တီးမယ့်ဂိမ်းမျိုးက ဘယ်လိုမျိုးဖြစ်လောက်မလဲဆိုတာကို ခန့်မှန်းလို့ရပါရဲ့လား။ သိပ်ကိုရပါတယ်၊ ဘာဖြစ်လို့လည်းဆိုတော့ အခုတင်ဆက်ပေးမယ့် Ghostwire Tokyo ဂိမ်းဟာ Resident Evil စီးရီးရဲ့ဂိမ်းဒါရိုက်တာဟောင်းဖြစ်သူ Shinji Mikami ရဲ့လက်ရွေးစင်တပည့်ကျော် Ikumi Nakamura ကဦးဆောင်ဖန်တီးပြီး The Evil Within ထုတ်လုပ်ခဲ့တဲ့ Bethesda တို့အတူ ဂိမ်မာတွေလက်ထဲအရောက်ထည့်ပေးမယ့် ဂိမ်းဖြစ်လို့ပါပဲ။ အားလုံးနီးတူ ကျွန်တော်ကိုယ်တိုင်လည်း သိသိချင်းပဲ ခေတ်သစ်ဂိမ်းလောကရဲ့ခြေလှမ်းတွေနဲ့ အခြေအနေဟာအခုလိုမျိုးတောင်ဖြစ်လာပြီလားဆိုတဲ့ ပီတိနဲ့ တအံ့တသြဖြစ်သွားခဲ့ရပါတယ်။ Resident Evil စီးရီးရဲ့ဂိမ်းဒါရိုက်တာဟောင်းဖြစ်သူ Shinji Mikami အနေနဲ့ ၂၀၁၀ ခုနှစ်မှာ Tango Gameworks ကိုတည်ထောင်ခဲ့ပြီး The Evil Within ပထမအခွေကို၂၀၁၄ ခုနှစ်မှာတစ်ကြိမ်၊ The Evil Within 2 ဒုတိယအခွေကို ၂၀၁၇ ခုနှစ်မှာတစ်ကြိမ် Bethesda နဲ့အတူ ဖန်တီးထုတ်လုပ်ခဲ့ပြီးဖြစ်ပါတယ်။ နှစ်ဦးနှစ်ဖက် ဂိမ်းကောင်းတွေကိုအတူဖန်တီးခဲ့တဲ့ သမိုင်းမှတ်တမ်းတွေရှိပေမယ့် ဒီတစ်ခေါက်လာမယ့် Ghostwire Tokyo မှာတော့ ထွက်ရှိခဲ့သမျှ ဂိမ်းတွေအားလုံးထက် အစစအရာရာပိုသာလွန်တယ်လို့ ကောက်ချက်ချုနိုင်ပါတယ်။ 

Ghostwire Tokyo နဲ့ပတ်သက်ပြီး မိနစ်ပိုင်းထွေလာကလွဲလို့ ဘာမှအကျိုးအကြောင်းမသိရပေမယ့် ထွေလာကိုကြည့်ပြီးတဲ့အခါမှာ ဒီဂိမ်းထဲမှာအဖြေရှာရမယ့် လျှို့ဝှက်နက်နဲမှုပေါင်းများစွာနဲ့ ပြန့်ကျဲနေတဲ့ပဟေဠိတွေ ကိန်းအောင်းတည်ရှိနေတယ်ဆိုတာ ခံစားသိရှိနိုင်ပါတယ်။ ဒါတင်မက Resident Evil နဲ့ The Evil Within တို့ရဲ့ဇာတ်အိမ်တည်ဆောက်ပုံနဲ့ ဂိမ်းကစားဟန်တွေကို ပြန်လည်ထင်ဟပ်ကြည့်မယ်ဆိုရင် ဒီဂိမ်းရဲ့ဇာတ်လမ်းဟာလည်း သဘာဝလွန်ထူးကဲဦးမှာပါပဲ။ အထူးခြားဆုံးအချက်တစ်ချက်က ဂျပန်နိုင်ငံရဲ့မြို့တော် Tokyo မှာဇာတ်အိမ်တည်ထားတာဖြစ်ပြီး တိုကျိုကိုအခြေပြုတဲ့ ဘယ်လိုမျိုးဇာတ်အိမ်လည်းဆိုတာ ခန့်မှန်းရသိပ်ခက်ပါတယ်။ နည်းပညာအဆင့်ရှေ့ရောက်ပြီး တိုးတက်ဖွံဖြိုးတဲ့တိုကျိုမြို့မှာ သာမန်လူတွေဟာ လျှို့ဝှက်တဲ့ ရုတ်တရတ်ပျောက်ဆုံးမှုတွေကို ဖြစ်နေတာကိုတွေ့ရပါမယ်။ နောက်ပြီးအမှောင်ထုရစ်ပတ်နေတဲ့ ခေတ်မှီမြို့ပြမှာ မြေအောက်လောကဆန်ဆန် ဂိုဏ်းတွေနဲ့ရင်ဆိုင်ရမယ့် ကိုယ့်မှာလည်း သူမတူတဲ့စွမ်းရည်ပိုင်ဆိုင်ဖို့ မြင်ပါတယ်။ နောက်ပြီးဂျပန်နိုင်ငံရဲ့အထင်ကရလူသိများတဲ့ ဒဏ္ဍာရီတစ်ခုဖြစ်တဲ့ yokai တွေနဲ့ တစ်နည်းနည်းဆက်နွယ်မှုရှိနေတယ်လို့လည်း တစ်ချို့ကဆိုပါတယ်။ ဒီတော့ ဘယ်လိုပဲဖြစ်ဖြစ် စောင့်မျှော်ရမှာက ဂိမ်မာတွေရဲ့အလုပ်ဖြစ်သွားပါပြီ။ ဘာကိုမှများများစားစား မသိရသေးတဲ့ Ghostwire Tokyo ဟာ ၂၀၂၀ မှာထွက်လာမယ်လို့ ရည်မှန်းထားကြပြီး ဂိမ်းထွေလာတစ်ခုလုံးဟာ CGI ဖြစ်တဲ့အတွက် မျိုးဆက်သစ်ဂိမ်းထဲမှာ ပါဝင်သွားမယ်လို့ မှတ်ယူထားကြပါတယ်။ ဒီလောက်ဆို ဂိမ်မာတွေစိတ်ဝင်စားနေတာကို ဖြေသိမ့်နိုင်လိမ့်မယ်လို့ ထင်ပါတယ်။ နောင်လာမယ့်ဆောင်းပါးတွေမှာလည်း အားလုံးကြိုက်နှစ်သက်ပြီး အကျိုးရှိမယ့်အကြောင်းအရာကို ဖော်ပြပေးသွားပါမယ်။ ဖတ်ရှုသူများအားလုံးကို ကျေးဇူးအထူးတင်ရှိကြောင်းပြောရင် ဒီနေရာကနေအဆုံးသတ်လိုက်ပါတယ်။ 

Yan

Ref: Ref: Gamesradar, Kotaku, Polygon, YouTube

ရင်ခုန်စရာအကောင်းဆုံးမျိုးဆက်သစ်ဂိမ်းတွေနဲ့ ဝေဆာပြန်ဦးမယ့် ၂၀၁၉ ခုနှစ်ရဲ့ E3 ပွဲမှာ ဘာတွေကိုမျှော်လင့်လို့ရမလဲ?

ဂိမ်းချစ်သူတွေနဲ့ နည်းပညာနှစ်သက်မြတ်နိုးသူတွေ ရင်ခုန်စိတ်လှုပ်ရှားစွာ နှစ်စဉ်နှစ်တိုင်းစောင့်မျှော်လေ့ရှိကြတဲ့ ၂၀၁၉ ရဲ့ E3 ပွဲဟာဆိုရင် လက်ရှိကြားသိရသမျှ သတင်းတွေအရတော့ အတော်လေးကို အလားအလာကောင်းနေပါတယ်။ နာမည်ကြီးဂိမ်းကုမ္ပဏီတွေ၊ ဂိမ်းထုတ်လုပ်ဖန်တီးသူတွေရဲ့ ကြိုတင်ကြေညာမှုတွေ၊ သတင်းစာရှင်းလင်းပွဲတွေ၊ အနာဂတ်မှာထွက်ရှိလာမယ့် ဂိမ်းအသစ်တွေရဲ့ အကြိုပြသမှုတွေနဲ့အတူ လက်ရှိမှာဂိမ်းမီဒီယာတွေအားလုံးရဲ့ အထူးအာရုံစိုက်ခြင်းကိုခံနေရတဲ့ E3 ပွဲမှာ ဂိမ်းအသစ်တွေအနေနဲ့ ဘယ်လိုမျိုးပွဲတက်ပွဲထွက်လာမလဲဆိုတာ တကယ့်ကိုရင်ခုန်စရာပါပဲ။ စာရေးသူအနေနဲ့ဆိုရင်လည်း ဂိမ်းချစ်သူတွေအတွက် နှစ်စဉ်ကျင်းပလေ့ရှိတဲ့ အခုလို E3 ပွဲအကြောင်းကို ရေးသားဖော်ပြခဲ့တာ အခု ၂၀၁၉ ခုနှစ်နဲ့ဆိုရင် သုံးနှစ်ဆက်တိုက်ရှိခဲ့ပြီ ဖြစ်ပါတယ်။ ဂိမ်းလောကမှာ ဆယ်စုနှစ်ပေါင်းများစွာရပ်တည်ခဲ့တဲ့ Sony ရဲ့ Playstation, Microsoft ရဲ့ X Box, Nintendo လိုမျိုးထိပ်တန်းဂိမ်းကုမ္ပဏီတွေသာမက ပြောင်မြောက်တဲ့ဂိမ်းတွေနောက်က ဖန်တီးသူတွေအဖြစ် နာမည်တစ်လုံးနဲ့ရပ်တည်နေတဲ့ Square Enix, Bethesda, EA, Ubisoft, Sega နဲ့ Capcom လိုမျိုးဂိမ်းထုတ်လုပ်ဖန်တီးသူတွေရဲ့ လှုပ်ရှားမှုအသစ်တွေကိုပါ တစ်ချိန်တည်းတစ်နေရာတည်းမှာ တွေ့မြင်ခံစားရမှာဖြစ်တဲ့အတွက် နှစ်တိုင်းကျင်းပနေကြဖြစ်တဲ့ E3 ပွဲကြီးဟာ ဂိမ်မာတွေရင်ခုန်မယ်ဆိုရင်လည်း အထူးခုန်ချင်စရာပါပဲ။ ဒါတွေတင်မကသေးပဲ သူမတူတဲ့ဖန်တီးမှုတွေကို ချပြလာမယ့် မျိုးဆက်သစ်ဂိမ်းဖန်တီးသူအသစ်တွေရဲ့ လက်ရာတွေကလည်း စီနီယာများနဲ့ပုခုံးချင်းယှဉ်လို့ရနိုင်လောက်အောင်ကို ပြောင်မြောက်နေတဲ့အတွက် ဘယ်သူတွေကပရိသတ်ရဲ့တစ်ခဲနက် အားပေးမှုကိုရသွားလိမ့်မလဲဆိုတာကတော့ စောင့်ကြည့်ရုံကလွဲပြီး ဘာမှမတတ်နိုင်ပါဘူး။ ဒီတော့ လာမယ့် E3 ပွဲမှာ ဘယ်သူတွေက ဘာတွေကိုချပြမလဲ? ဘယ်လိုဂိမ်းမျိုးတွေက ဈေးကွက်ကိုဦးဆောင်မလဲ? ဂိမ်းဖန်တီးသူအသစ်တွေရဲ့လက်ရာတွေက ဘယ်လိုရှိနေလဲ? အစရှိတာတွေကိုသိရဖို့ အဆင်သင့်ဖြစ်ပြီဆိုရင် ဆက်သွားလိုက်ကြရအောင်ဗျာ။

E3 ပွဲကျင်းပမယ့်အချိန်ရက်စွဲနဲ့ ခန်းမဆောင်နေရာ

ယခုနှစ် E3 ပွဲရဲ့အဓိကပွဲစီစဉ်သူကတော့ အမေရိကန်နိုင်ငံအခြေစိုက် ဗီဒီယိုဂိမ်းကုန်သွယ်အဖွဲ့အစည်း ESA (Entertainment Software Association) ဖြစ်ပြီး ယမန်နှစ်တွေက ကျင်းပခဲ့တဲ့အတိုင်းပဲ ယခုနှစ်ရဲ့ E3 ပွဲကို အမေရိကန်ပြည်ထောင်စု၊ ကယ်လီဖိုးနီးယားပြည်နယ်မှာရှိတဲ့ လော့အိန်ဂျယ်လ်လိစ် Convention Center မှာ စည်ကားသိုက်မြိုက်စွာ ကျင်းပပေးသွားမှာဖြစ်ပါတယ်။ ပွဲကျင်းပမယ့်အချိန်ကတော့ ဇွန်လ ၁၁ ရက်ကနေ ၁၃ ရက်အထိ အချိန်သုံးရက်သုံးညတိုင်တိုင်ဖြစ်ပြီး Timezone အချိန်ကွာဟချက်ရှိတဲ့အတွက် မြန်မာနိုင်ငံစံတော်ချိန်အတိုင်းအတာ (GMT +6:30) အရတွက်ချက်ကြည့်မယ်ဆိုရင်တော့ ဇွန်လ ၁၂ ရက် ဗုဒ္ဓဟူးနေ့ကနေ ဇွန်လ ၁၄ ရက်၊ သောကြာနေ့အထိ ကျင်းပသွားမယ်လို့ဆိုနိုင်ပါတယ်။ E3 ပွဲကျင်းပခဲ့တဲ့သမိုင်းတောက်လျှောက်မှာ ပထမဆုံးအကြိမ်အဖြစ် Sony အနေနဲ့ ပွဲမစခင်ကျင်းပလေ့ရှိတဲ့ သတင်းစာရှင်းလင်းပွဲမှာ ဘာကိုမှထုတ်ဖော်ပြောကြားခြင်းမရှိခဲ့သလို ပါဝင်ခြင်းလည်းမရှိခဲ့ပါဘူး။

ထိပ်တန်းဂိမ်းကုမ္ပဏီတွေရဲ့ ဂိမ်းအသစ်ထုတ်ဖော်ပြသမှုတွေနဲ့ အနာဂတ်ဂိမ်းကောင်းများစွာ

ဂိမ်းလောကနဲ့ ဈေးကွက်မှာ ရပ်တည်လာခဲ့တာ သက်တမ်းကြာမြင့်ပေမယ့် ဂိမ်းကောင်းတွေစဉ်ဆက်မပြတ်ထုတ်လုပ်ဖန်တီးနေဆဲဖြစ်တဲ့ ဂိမ်းကုမ္ပဏီကြီးတွေအနေနဲ့ ဒီနှစ် E3 ပွဲမှာလည်းပဲ ချပြစရတွေရှိနေပါတယ်။ ကောင်းပေ့မိုက်ပေ့ဆိုတဲ့ဂိမ်းတွေကို ဂိမ်းချစ်သူတွေဆီ အချိန်မှန်အရောက်ပို့ပေးနေတဲ့ ဂိမ်းထုတ်လုပ်ဖန်တီးသူတွေအနေနဲ့ လာမယ့် ၂၀၁၉ E3 ပွဲအတွက် ပြင်ဆင်ထားတာတွေကတော့

Microsoft – Microsoft အနေနဲ့ ပြီးခဲ့တဲ့ဇွန်လ ၉ ရက်နေ့က E3 ပွဲမှာဘာတွေမျှော်လင့်နိုင်မလဲဆိုတဲ့ သတင်းစာရှင်းလင်းပွဲကို Microsoft Theater မှာ အကျဉ်းချုံးပြုလုပ်ခဲ့ပြီး ပွဲချိန်မတိုင်ခင် ဇွန်လ ၁၀ ရက်နေ့မှာ အနာဂတ်ရဲ့ဂိမ်းတင်ဆက်ပြသမှုတွေကို စောင့်မျှော်အားပေးနေကြတဲ့ ပရိသတ်များအတွက် Xbox ကနေတဆင့် ပြသပေးသွားမှာဖြစ်ပါတယ်။ လက်ရှိအချိန်အထိ ဂိမ်မာတွေအရူးအမူးအားပေးခဲ့ကြတဲ့ဂိမ်းတွေကတော့ ပရိသတ်သန်းပေါင်းများစွာရဲ့မျှော်လင့်ချက်တွေကို ဖြည့်ဆည်းပေးခဲ့တဲ့ Star Wars Jedi: Fallen Order, John Wick အဖြစ်တစ်ကမ္ဘာလုံးက ပရိသတ်တွေသိကြတဲ့ Keanu Reeves ရဲ့ထူးကဲတဲ့တင်ဆက်မှုနဲ့အတူ လက်ခုပ်သံတွေဝေဆာခဲ့တဲ့ Cyberpunk 2077, ဂိမ်မာတိုင်းရဲ့ငယ်ဘဝကိုပြန်လည်အမှတ်ရစေမယ့် Age of Empire 2: Definitive Edition, Saiyan တွေကိုကြိုက်လှပါချည်ရဲ့ဆိုသူတွေအတွက် Dragonball Z: Kakarot တို့အပြင် လက်တွေ့အဆန်ဆုံးဇွန်ဘီဂိမ်း State of Decay: Heartland နဲ့ နှစ်ပေါင်းများစွာဂိမ်မာတွေအားပေးလာခဲ့တဲ့ Borderland 3 တို့ပဲ ဖြစ်ပါတယ်။ ဒါတွေတင်မကသေးပဲ အခြားနာမည်ကျော်ဂိမ်းတွေဖြစ်ကြတဲ့ Lego Star Wars: The Skywalker Saga, Dying Light 2, Forza Horizon 4, CrossFire X, Tales of Arise နဲ့ Elder Ring တို့ဟာလည်း စောင့်ကြည့်ရမယ့်ဂိမ်းတွေပါပဲ၊ Sony မတက်ရောက်တဲ့ ၂၀၁၉ ခုနှစ်မှာတော့ Microsoft အနေနဲ့ ခြေလှမ်းတွေပိုသွက်လို့လာတာ အမှန်ပါပဲ။

Bethesda Softwork – The Elder Scrolls စီးရီး၊ The Evil Within, Wolfenstein နဲ့ Dishonored လိုမျိုး ပရိသတ်တစ်သက်တာစွဲမက်စေမယ့် ဂိမ်းတွေရဲ့နောက်ကွယ်က Bethesda အနေနဲ့လည်း ဒီနှစ်အတွက် ပြင်ဆင်ထားတဲ့အရာတွေရှိနေပါတယ်။ လက်ရှိမှာကြိုတင်ရင်ခုန်နိုင်တဲ့ဂိမ်းတွေကတော့ လွတ်လပ်တဲ့ဂိမ်းကစားဟန်နဲ့ ကျယ်ပြန့်တဲ့ဂိမ်းလောကကြောင့် လူသိများကျော်ကြားတဲ့ The Elder Scrolls Online အပြင် သူနဲ့ဆက်စပ်နေတဲ့ Elder Scrolls: Blades နဲ့ Elder Scrolls: Legends, ကမ္ဘာစစ်မှ အနိုင်ရသွားတဲ့ နာဇီဂျာမဏီရဲ့နည်းပညာအဆင့်မြင့်မှုအောက်မှာ အဖိနှိပ်ခံနေရတဲ့အမေရိကန်ပြည်ထောင်စုဘက်ကနေ စစ်ပွဲနဲ့ အပစ်အခတ်ကို လက်ရာမြောက်စွာရောယှက်ထားတဲ့ Wolfenstein ရဲ့နောက်ဆက်တွဲ Wolfenstein: Cyberpilot နဲ့ Wolfenstein: Youngblood, အာကာသသတ္တဝါဆိုးတွေကို ရင်ဆိုင်နှိမ်နင်းရမယ့် Doom Eternal တို့ဖြစ်ပြီး အဲဒီဂိမ်းတွေကတော့ အသံကြားရုံနဲ့ရင်ခုန်စရာဆိုတာ ဝန်ခံရမှာပါပဲ။ အဲဒါတွေအပြင် Bethesda Softwork အနေနဲ့ သူတို့ကိုယ်တိုင်ဖန်တီးထုတ်လုပ်ထားတဲ့ Orion Software middleware ပက်ကေ့ချ်ကိုလည်း ထုတ်ဖော်ပြသွားဖို့အစီအစဉ်ရှိတဲ့အပြင် Orio Software ဟာ  ဂိမ်မာတွေ stream လုပ်တဲ့အခါ ဂိမ်းဆွဲအားမြန်နှုန်းနဲ့ လိုင်းချိတ်ဆက်မှုမှာ ပိုမိုအဆင်ပြေလွယ်ကူစေဖို့ ရည်ရွယ်ထားတယ်လို့လည်း သိရပါတယ်။

Ubisoft - ဇွန်လ ၁၀ ရက်နေ့မှာကျင်းပမယ့် သတင်းစာရှင်းလင်းပွဲမှာမှ ဘာတွေပြင်ဆင်ထားလဲဆိုတာ အတိအကျသိရမယ့်အနေအထားမှာရှိတဲ့ Ubisoft ဘက်ကလည်း ဘယ်လိုမျိုးဂိမ်းတွေအဆင်သင့်ရှိနေလဲဆိုတာ ခန့်မှန်းရခက်နေပါတယ်။ ဒါပေမယ့် Ubisoft ဘက်ကအရေးပါအရာရောက်သူတွေနဲ့ အဖွဲ့သားတော်တော်များများ E3 သတင်းစာရှင်းလင်းပွဲကိုတက်ရောက်ခဲ့တာကို ပုံမှာတွေ့နိုင်ပါတယ်။

Square Enix – Square Enix အနေနဲ့လည်း ဂိမ်းကြေညာချက်တွေရဲ့ ထုတ်လွှင့်တင်ဆက်မှုကို ဇွန်လ ၁၀ ရက်နေ့မှာ တိုက်ရိုက် stream ပြုလုပ်သွားမယ်လို့ ရည်ရွယ်ထားပါတယ်။ Square Enix အတွက်ရာထားပေးတဲ့ အချိန်နဲ့နေရာဟာ ယခင်နှစ်အထိ Sony ကပါဝင်ခဲ့တာဖြစ်ပြီး ဒီနှစ်မှာ Sony မတတ်ရောက်တဲ့အတွက် Square Enix ဘက်က ကြေညာချက်ပြုလုပ်ဖို့ အခိုက်အတန့်ကောင်းကို ရခဲ့တယ်လို့ ဆိုရမှာပါ။

PC Gaming Show - အားလုံးသိကြတဲ့အတိုင်း အသစ်ထွက်လာမယ့်ဂိမ်းတွေနဲ့ ဂိမ်းပလက်ဖောင်းတွေအကြောင်းပြောမယ်ဆိုရင် PC ကတော့ မပါမဖြစ်ပါပဲ။ ဘာဖြစ်လို့လည်းဆိုတော့ ဂိမ်မာအများစုသာမက ဂိမ်းအကြောင်းအရာဖန်တီးသူ Content Creator များဟာ Playstation, Xbox နဲ့ Nintendo စတဲ့ အိမ်သုံးဖျော်ဖြေရေးဂိမ်းစက်များထက်စာရင် အထူးပြုပြင်မွန်းမံထားတဲ့ စွမ်းအားမြင့်ဂိမ်းကွန်ပျူတာ PC များနဲ့သာ ဂိမ်းအတော်များများကို ဆော့ကစားကြလို့ဖြစ်ပါတယ်။ ဒီတစ်ခေါက်လာမယ့် E3 ပွဲရဲ့ PC Gaming Show အစီအစဉ်မှာ ပါဝင်ပြသကြမယ့် ဂိမ်းဖန်တီးထုတ်လုပ်သူများကတော့ Epic Games, Digital Extremes, Digital Uppercut, Annapurna Entertainment, Chucklefish, Frontier Development, Paradox Entertainment, Perfect World Entertainment, Rebellion နဲ့ Tripwire Interactive တို့ပဲဖြစ်ပါတယ်။ PC ပလက်ဖောင်းအတွက်ကတော့ ဘယ်လိုအမိုက်စားဂိမ်းမျိုးပါဝင်လာမယ်၊ ခံစားမှုအတွေ့အကြုံနဲ့ ရသသစ်ပေးစွမ်းမယ့်ဂိမ်းတွေ ချပြမယ်ဆိုတာကတော့ ပွဲစဉ်အချိန်မှသာ ကျွန်တော်တို့ဂိမ်မာတွေ သိနိုင်ပါလိမ့်မယ်။

ရည်ညွှန်းဖော်ပြထိုက်သောဂိမ်းအချို့၊ အခြားစိတ်ဝင်စားဖွယ်အစီအစဉ်များနဲ့ စာရေးသူအနှစ်ချူပ်

မကြာခင်မှာကျင်းပတော့မှာဖြစ်တဲ့ ၂၀၁၉ ခုနှစ်ရဲ့ E3 ပွဲမှာ ဘယ်လိုအကြောင်းအရာတွေပါဝင်လာမလဲဆိုတာကို အားလုံးအရိပ်အမြွက်လောက်တော့ ခန့်မှန်းရလောက်ပြီထင်ပါတယ်။ E3 ပွဲရဲ့ထုံးစံအရ ဂိမ်းကုမ္ပဏီအသီးသီးရဲ့ စိတ်လှုပ်ရှားဖို့အကောင်းဆုံးဂိမ်းဖော်ပြချက်တွေအပြင် နည်းပညာပိုင်းနဲ့ပတ်သက်တဲ့အစီအစဉ်တွေလည်း တင်ဆက်ပေးဖို့ရှိနေပါသေးတယ်။ ဆောင်းပါးမှာထည့်သွင်းရေးသားဖော်ပြထိုက်တာတွေကတော့ Nintendo အနေနဲ့ Super Smash Bro: Ultimate နဲ့ Splatoon 2 အတွက်ကျင်းပသွားမယ့် ပြိုင်ပွဲအစီအစဉ်၊ သတင်းထူးတွေယူဆောင်လာတတ်တဲ့ E3 ရဲ့ကြားအစီအစဉ်ဖြစ်တဲ့ E3 Coliseum မှာ Netflix အနေနဲ့ E3 မှာချပြမယ့် ဂိမ်းတွေရဲ့ကြိုးပမ်းအားထုတ်မှုကိုယ်စီကို ဖော်ပြတဲ့ panel, နာမည်ကျော်ကာတွန်းစီးရီး Simpsons ရဲ့နောက်ကွယ်က ထုတ်လုပ်ရေးသားသူတွေ ကိုင်ဆောင်မယ့် E3 ပွဲ panel တို့နဲ့ ဂိမ်မာတွေအားလုံးရင်ခုန်စွာစောင့်မျှော်နေတဲ့ Call of Duty: Infinite Warfare ဂိမ်းသစ်အကြောင်းကို ဆွေးနွေးပြောကြားသွားမယ့် Infinity Ward အစရှိတာတွေကို တွေ့မြင်ရဖို့အခွင့်အရေးရှိနေပါတယ်။ နောက်ဆုံးတစ်ခုကတော့ အားလုံးတအံ့တသြဖြစ်သွားရစေမယ့် Microsoft ရဲ့ Xbox Scarlet ပရောဂျက်ဖြစ်ပြီး ၂၀၂၀ မှာ အကောင်အထည်ဖော်မှာဖြစ်ပါတယ်။ အဲဒီအကြောင်းကိုတော့နောက်ထပ်ဆောင်းပါးတစ်ခုနဲ့အတူ သီးသန့်ရေးသားတင်ဆက်ပေးပါမယ်။ ကဲ သိသင့်သိထိုက်တဲ့ E3 အကြောင်းအရာတွေကတော့ ကုန်သလောက်ရှိနေပြီဖြစ်တဲ့အတွက် ဂိမ်မာအားလုံးကျေနပ်လိမ့်မယ်လို့ မျှော်လင့်ပါတယ်။ ကျန်တာတွေကိုတော့ တကယ့်ပွဲကျင်းပတဲ့အချိန်မှသာ သိရှိရပါလိမ့်မယ်။ ဖြည့်စွက်ပြောချင်တာကတော့ ၂၀၁၉ E3 ပွဲမှာဖော်ပြခဲ့တဲ့ဂိမ်းတွေထဲကမှ စာရေးသူအတော်လေးဘဝင်ခိုက်သွားမိတဲ့ ဂိမ်းတစ်ခုရှိပါတယ်။ အဲဒီဂိမ်းအကြောင်းဆောင်းပါးကိုလည်း မကြာခင်မှာရေးသားတင်ဆက်ပေးသွားမှာဖြစ်တဲ့အတွက် စောင့်မျှော်နေပေးကြဖို့ တိုက်တွန်းလိုက်ရပါတယ်။ လာမယ့် E3 ပွဲနဲ့ပတ်သက်ပြီး အနယ်နယ်အရပ်ရပ်က ဂိမ်မာများအားလုံးနည်းတူ စာရေးသူလည်း ရင်ခုန်ကြောင်းပြောရင်း ဒီဆောင်းပါးကိုအဆုံးသတ်လိုက်ရပါတယ်။ ဖတ်ရှုသူများအားလုံးကို ကျေးဇူးတင်ပါတယ်။

Yan

Ref: Techradar, Pcworld, wikia, YouTube