အနာဂတ်ရဲ့ဂိမ်းဖန်တီးသူတွေအပြင် ကျွန်တော်တို့လိုဂိမ်းချစ်သူတွေအနေနဲ့ The Last of Us: Part 2 ကနေ ဘယ်လိုသင်ခန်းစာတွေကို သင်ယူလို့ရမလဲ? 🍂🌫

၂၀၁၃ ခုနှစ်ကနေ ယခု ၂၀၂၀ ခုနှစ်အထိ ၇ နှစ်တိုင်တိုင် ဂိမ်းချစ်သူတွေစောင့်မျှော်ခဲ့ရတဲ့ The Last of Us: Part 2 ဟာ ဇွန်လ ၁၉ ရက်နေ့မှာတော့ ဆိုက်မြိုက်စွာထွက်ရှိလို့လာခဲ့ပါတယ်။ ဂိမ်းမထွက်ခင်နှစ်လလောက်အလိုက ကြိုတင်ပေါက်ကြားခဲ့တဲ့ ဂိမ်းဇာတ်ကြောင်းဗီဒီယိုအပိုင်းအစအချို့နဲ့အတူ ဂိမ်းမီဒီယာကြီးတွေရဲ့ရာနှုန်းပြည့်ချီးမြှောက်မှုများစွာရဲ့ လွန်ဆွဲမှုကြားက The Last of Us: Part 2 ဂိမ်းရဲ့အနာဂတ်ဟာ မရေရာမသေချာမှုတွေဝိုင်းရံလို့နေခဲ့ပါတယ်။ ကြားကာလအတွင်းမှာ ဖြစ်ပွားခဲ့တဲ့ပဋိပက္ခအချို့ကြောင့် ထွက်ရှိမယ့်ရက်ကို နောက်ဆုတ်ရွေ့ဆိုင်းရာကနေ နောက်ဆုံးမှာတော့ The Last of Us: Part 2 ဟာ တစ်ကမ္ဘာလုံးက ဂိမ်းပရိသတ်တွေလက်ထဲကို ရောက်ရှိလို့လာခဲ့ပါတယ်။ ထွက်ရှိလာလာချင်းမှာပဲ ဂိမ်းဇာတ်ကြောင်းဇာတ်အိမ် ယုတ္တိမတန်မှု၊ ပရိသတ်အကြိုက်ဇာတ်ကောင်များရဲ့စရိုက်ကို ပေါ့တန်စွာပြောင်းလဲထားမှု၊ ခြုံငုံထားတဲ့ဇာတ်လမ်းသဘောတရားနဲ့ အသစ်ထည့်သွင်းထားတဲ့ဇာတ်ကောင်တွေဟာ လေးနက်မှုမရှိမှုတွေကြောင့် နာမည်ကျော်မီဒီယာပေါင်းမြောက်များစွာရဲ့ ချီးမွမ်းထောပနာပြုမှုတွေကြားက The Last of Us: Part 2 ဟာ တစ်လောကလုံးကဂိမ်းပရိသတ်များရဲ့ ဝေဖန်ပြစ်တင်မှုများစွာကို ခံခဲ့ရပါတယ်။ မိအေးနှစ်ခါနာသလို ဂိမ်းလောကသားများ ခံပြင်းရတဲ့အချက်တစ်ချက်က အနောက်တိုင်းဂိမ်းဖန်တီးသူကုမ္ပဏီတွေထဲကမှ ရုပ်ရှင်တစ်ကားလိုဇာတ်ကြောင်းလှတဲ့ဂိမ်းတွေနဲ့ ဂိမ်းပရိသတ်များရဲ့အသည်းနှလုံးကိုချူပ်ကိုင်ထားပြီးသားဖြစ်တဲ့ Naughty Dog ကိုယ်တိုင်ဟာ သူတို့ဖန်တီးထားတဲ့ဂိမ်းနဲ့ အားလုံးကိုပြန်သစ္စာဖောက်တယ်လို့ ခံစားလိုက်ရတာပါပဲ။ The Last of Us: Part 2 ဂိမ်းအကြောင်းကို အခုအချိန်မှာအားလုံး သိသင့်သလောက်သိပြီးလောက်ပြီလို့ ယူဆတဲ့အတွက် ဂိမ်းကိုခွဲခြမ်းစိတ်ဖြာတာတွေတော့ ဒီဆောင်းပါးမှာဖော်ပြသွားမှာမဟုတ်ပါဘူး။ 

လောကမှာကျင့်သုံးနေထိုင်သင့်တဲ့ သဘောတရားတစ်ခုလိုမျိုး ဖြစ်ခဲ့ပြီးသွားတဲ့အရာတွေကို ထောက်ရှုပြီးတော့ ကျွန်တော်တို့ဟာ ဒီအဖြစ်အပျက်ကနေ ဘာတွေကိုသင်ယူလို့ရမလဲဆိုတာကို ဒီဆောင်းပါးမှာ တင်ပြသွားမှာဖြစ်ပါတယ်။ ဒီစာစောင်ဟာ The Last of Us: Part 2 နဲ့ပတ်သက်ပြီး ဂိမ်းတွေအပေါ်မှ ာယုံကြည်မှုပျက်ပြားသွားရသူတွေ၊ မီဒီယာကြီးတွေရဲ့လှည့်ဖြားမှုကို အဟုတ်ထင်မိခဲ့တဲ့သူတွေနဲ့ မြန်မာနိုင်ငံအတွင်းက ဂိမ်းကိုချစ်မြတ်နိုးကြတဲ့ဂိမ်းချစ်သူများအတွက် ရည်ရွယ်ပါတယ်။ သိသင့်သိထိုက်တဲ့ကိစ္စရပ်များဖြစ်တာကြောင့် ရှင်းလင်းတိကျစွာ တင်ဆက်ပေးဖို့ရည်ရွယ်ထားတာကြောင့် အာရုံစိုက်ဖတ်ရှုကြဖို့ တိုက်တွန်းလိုက်ရပါတယ်။ အဆင်သင့်ဖြစ်ပြီဆို အားလုံးပဲ စလိုက်ကြရအောင်ဗျာ ✍️

အရှေ့တိုင်း၊ အနောက်တိုင်းနဲ့ တစ်ကမ္ဘာလုံးကဂိမ်းဖန်တီးသူတွေအနေနဲ့ The Last of Us: Part 2 ရဲ့လက်ရှိနောက်ဆုံးရလာဒ်ကိုကြည့်ပြီး သင်ခန်းစာပေါင်းမြောက်မြားစွာ ယူနိုင်ကြလိမ့်မယ်လို့ ကျွန်တော့်အနေနဲ့ မျှော်လင့်မိပါတယ်။ နှစ်စကတည်းက ဘက်ပေါင်းစုံမှာ အခြေအနေဆိုးရွားလှတဲ့ ၂၀၂၀ ခုနှစ်မှာ The Last of Us: Part 2 ရဲ့ဆိုးရွားလှတဲ့ နောက်ဆုံးရသတင်းတွေဟာ ဂိမ်းချစ်သူတွေအတွက်တော့ နောက်ထပ်ကပ်ဘေးတစ်ခုအလားလို့တောင် ထင်မှတ်ရပါတယ်။ ဒီနေရာမှာကိန်းအောင်းနေတဲ့ပြဿနာတစ်ခုက အနောက်တိုင်းကထွက်တဲ့ဂိမ်းအများစုနဲ့ ဂိမ်းဖန်တီးရေးဆွဲသူတွေဟာ လူတစ်ဦးချင်းစီရဲ့လွတ်လပ်တဲ့စံနှုန်းစံထား၊ နိုင်ငံရေးလှုမှုရေးရပ်တည်မှုများ၊ အနောက်တိုင်းစံစနစ်နဲ့ ကွဲပြားတဲ့အယူအဆခံယူချက်တွေကို သူတို့ဖန်တီးတဲ့ဂိမ်းတွေထဲမှာ လိုအပ်သည်ထက် ပိုမိုရောပြွန်းပြီး ထည့်သွင်းထားတတ်ကြတာပါပဲ။ လူသားတိုင်း၊ အသင်းအဖွဲ့တိုင်း၊ အဖွဲ့အစည်းတိုင်းအတွက် ကိုယ်ကိုယ်စားပြုရာအရပ်နဲ့ ပြင်းထန်တဲ့ခံယူချက်လားရာဆိုတာ ရှိရမှာမှန်ပေမယ့် ကိုယ့်ရဲ့အတွေးအမြင်၊ ရှုထောင့်နဲ့ ခံယူချက်သဘောတရားကို လွန်ကျွံစွာရောနှောထည့်သွင်းထားပြီး ထုတ်ကုန်တစ်ခုကိုဖန်တီးတဲ့အခါ ကိုယ့်ရဲ့ကနဦးရည်ရွယ်ချက်ဟာ မစစ်မှန်မသန့်ရှင်းတော့ပါဘူး။ ဒါဟာအနုပညာဖန်တီးသူတွေရော၊ ဖန်တီးမှုလက်ရာမြောက်တဲ့ ထုတ်ကုန်လုပ်ငန်းတွေရဲ့ဖြစ်တည်မှုတိုင်းအတွက် အကျုံးဝင်ပါတယ်။ ကိုယ်ဟာ ဒီဘာသာဝင်မို့ ဒါကိုမလုပ်ဘူးဆိုတာမျိုးပဲဖြစ်ရမယ်၊ ကိုယ်ဟာ ဒီဘာသာဝင်မို့ မင်းတို့ ဒါမျိုးမလုပ်ရဘူးဆိုတာမျိုးဟာ မဖြစ်သင့်ပါဘူး။ အစွန်းတာလက်သင့်ခံလို့ရပေမယ့် တစ်ဖက်ပိတ်တာကတော့ လက်သင့်ခံလို့မရနိုင်ပါ။ အခု ၂၁ ရာစုမှာ ဗီဒီယိုဂိမ်းများဟာ ဒီဂျစ်တယ်အနုပညာလက်ရာများလို့ ကင်ပွန်းတတ်ခံရတဲ့အလျောက် ဂိမ်းဖန်တီးသူများအနေနဲ့ လူပေါင်းရာထောင်သောင်းဆီကို ပြန့်နှံ့သွားမယ့် ကိုယ့်ရဲ့ဖန်တီးမှုလက်ရာဟာ သမာသမတ်ကျပြီး အလယ်အလတ်လမ်းစဉ်ပေါ်မှာ တည်တည်တံ့တံ့ရှိနေဖို့လိုအပ်ပါတယ်။ ဥပမာဆိုရရင် အရှေ့တိုင်းကထုတ်တဲ့ဂျပန်ဂိမ်းတွေကိုပဲ အရင်ဆုံးသုံးသပ်ကြည့်လိုက်ပါ၊ ဂျပန်နိုင်ငံထုတ်ဂိမ်းတွေဟာ ဂျပန်နိုင်ငံရဲ့ဟိုးယခင်ကတည်းကရှိနှင့်ပြီးသား ရိုးရာထုံးတမ်းဓလေ့၊ ယဉ်ကျေးမှုဘာသာစကားနဲ့ ခိုင်မြဲတဲ့လူ့အဖွဲ့အစည်းတည်ဆောက်ပုံတွေကို ဂိမ်းတွေထဲမှာ သွယ်ဝိုက်တဲ့နည်းနဲ့သော်လည်းကောင်း၊ ရိုးရှင်းဖြောင့်မတ်တဲ့ဟန်နဲ့သော်လည်းကောင်း ထည့်သွင်းထားကြပြီး ကိုယ့်နိုင်ငံရဲ့ယဉ်ကျေးမှုအဖုံဖုံကို အလံထူပြသထားတတ်ကြပါတယ်။ သို့ပေမယ့် ဂိမ်းဆော့ကစားသူတိုင်းကို ဂျပန်စာပြေးသင်ဖို့လည်း မတိုက်တွန်းသလို၊ ကီမိုနိုဝတ်ပြီး ဆာမူရိုင်းဓါးကိုင်ဖို့လည်း အားသွန်ခွန်စိုက် မနှိုးဆော်တဲ့အတွက် တွေ့မြင်ခံစားရတဲ့ ဂိမ်းဆော့ကစားသူတိုင်းအဖို့ လှပသေသပ်လွန်းပြီး တည်တံ့ခိုင်မြဲလှတဲ့ ဂျပန်ယဉ်ကျေးမှုဟာ ပကတိမြတ်နိုးစရာပါပဲ ⛩🎌



ဒီနေရာမှာအရှေ့တိုင်းနဲ့ အနောက်တိုင်းကွဲပြားသွားတဲ့အချက် ဘာလဲဆိုတော့ အရှေ့တိုင်းဂိမ်းဖန်တီးသူတွေကိုယ်တိုင်က အရှေ့တိုင်းကဖြစ်တည်တဲ့ယဉ်ကျေးမှုနဲ့ ခံယူချက်သဘောတရားတွေကို သိုသိပ်တဲ့အသိုက်အမြုံလေးတစ်ခုအဖြစ် တင်ဆက်ပြသတတ်ကြပြီး အနောက်တိုင်းဂိမ်းဖန်တီးသူများကတော့ သူတို့ဦးခိုက်ထားတဲ့စံစနစ်နဲ့ အယူအဆတွေကို ဂိမ်းဆော့ကစားသူတိုင်း စိတ်အနှောင့်အယှက်ဖြစ်ရတဲ့အထိ အလွန်အကျွံထည့်သွင်းထားတတ်ကြတာပါပဲ။ ဒါဟာဟိုးယခင်အချိန်များကတည်းက အရှေ့နဲ့အနောက်ရဲ့ကွဲပြားတဲ့ လူ့အဖွဲ့အစည်းတည်ဆောက်ပုံအခြေခံအုတ်မြစ်လို့ မှတ်ယူနိုင်ပေမယ့် အလားတူလုပ်ရပ်မျိုးကို လတ်တလောကမှ ထွက်ရှိလာတဲ့ The Last of Us: Part 2 ဂိမ်းထဲမှာ ဂိမ်းချစ်သူတွေက မျက်ဝါးထင်ထင်တွေ့မြင်နိုင်ပါတယ်။ ဗီဒီယိုဂိမ်းတွေကို အနုပညာမြောက်နည်းပညာဖန်တီးမှုအဖြစ် မှတ်ယူဆော့ကစားကြတဲ့ ကျွန်တော်တို့လို ဂိမ်းပရိသတ်တွေအနေနဲ့ The Last of Us: Part 2 ရဲ့ဖြစ်ကြောင်းကုန်စင်ကို သိရှိပြီးပြီးချင်းပဲ စိတ်နှလုံးနာတဲ့အထိ ခံစားချက်ပြင်းပြခဲ့ပေမယ့် ဖြစ်ပြီးသွားအရာတွေကို ဘယ်လိုမှပြောင်းလဲယူလို့မရနိုင်တဲ့အတွက် အခုလိုမျိုးဖြစ်ရပ်မျိုးအပေါ်မှာ ပြန်လည်အရောင်ထင်ဟပ်ပြီး ဘာတွေကိုသင်ခန်းစာယူနိုင်မလဲဆိုတာကို အာရုံစိုက်တာပဲ အားလုံးအတွက်အကျိုးရှိပါလိမ့်မယ်။ ဒီတော့ ပထမဦးဆုံးသိစေချင်တာက မီဒီယာတိုင်းကလာတဲ့သတင်းတင်ပြချက်တွေ၊ အကြောင်းအရာအပိုင်းအစတွေ၊ သုံးသပ်ကောက်နှုတ်ချက်တွေကို မျက်စိစုံမှိတ်မယုံဖို့ပါ၊ ဒီအကြောင်းအရာကိုပြောပြချင်တာကြာပြီဖြစ်ပေမယ့် အခုအချိန်မှသာ ရေကန်အသင့်၊ ကြာအသင့်ဆိုသလို အကျိုးအကြောင်းသင့်သွားခဲ့တာဖြစ်ပါတယ် 📰



နိုင်ငံရေး၊ လူမှုရေး၊ စီးပွားရေး၊ ဘာသာရေး၊ ဖျော်ဖြေမှုနဲ့ သို့လောသို့လောကဏ္ဍအသီးသီးက အချင်းအရာတွေကို သတင်းအဖြစ်တင်ဆက်နေတဲ့ မီဒီယာတွေအနေနဲ့ သူတို့ရဲ့သတင်းတင်ပြချက်တွေမှာ အမြဲတမ်းလိုလို ဘက်လိုက်တဲ့အတွေးအမြင်၊ တစ်ဖက်ပိတ်တဲ့ထင်မြင်ယူဆချက်တွေကို ထည့်သွင်းထားတာ ဆက်တိုက်တွေ့မြင်နေရပါတယ်။ ဒါဟာသတိမမူမိတဲ့စာဖတ်သူနဲ့ ပြည်သူလူထုကို တစ်ဖက်လှည့်နဲ့ အသိအမြင်တိမ်းစောင်းသွားစေနိုင်တဲ့အပြင် ဂျာနယ်လစ်တွေရဲ့ချမှတ်ထားတဲ့ကျင့်ဝတ်နဲ့ လုံးဝမှမကိုက်ညီတဲ့လုပ်ရပ်ပါ။ အကြောင်းအရာတစ်ခုအပေါ်မှာ အဆုံးသတ်ကောက်နှုတ်ချက်ချတာဟာ စာဖတ်သူဖက်ကအလုပ်ပါ၊ ဖြစ်စဉ်တစ်ခုနဲ့ပတ်သက်ပြီး ဒီအပေါ်မှာ ဘယ်လိုယူဆရမယ်၊ ဘယ်လိုမျိုးမှတ်ယူရမယ်လို့ ဘယ်သူကမှ ကျွန်တော်တို့ကို ပြောပိုင်ခွင့်မရှိပါဘူး။ တိကျမှန်ကန်တဲ့သတင်းအချက်အလက်ကို ပြည်သူလူထုနဲ့ စာဖတ်ပရိသတ်ဆီ ရိုးသားတည့်မတ်တဲ့ရှုထောင့်ကနေ တင်ပြနိုင်ပါမှ ကိုယ်ဟာ ဂျာနယ်လစ်ကောင်းတစ်ယောက်၊ ဆောင်းပါးရေးသူကောင်းတစ်ယောက်၊ မီဒီယာသမားကောင်းတစ်ယောက်လို့ ဆိုထိုက်ပါတယ်။ ဒါဟာအနောက်တိုင်းမီဒီယာတွေမှာမှမဟုတ်၊ တစ်လောကလုံးက မီဒီယာတိုင်းကိုအကျိုးသက်ရောက်ပါတယ်၊ ရည်ရွယ်ချက်ကောင်းပါမှ အဖွဲ့အစည်းကောင်းတစ်ခုဖြစ်မှာပါ။ အဓိကကတော့ ကိုယ်ရဲ့ဆင်ခြင်တုံတရား၊ အတွေးအမြင်ဗဟုသုတ၊ ခံစားချက်ခံယူချက်တွေနဲ့ ချင့်ချိန်ပြီး အကြောင်းအရာတစ်ခုကို စစ်မှန်သည်မဟုတ်မဟုတ်၊ ကိုယ့်ရင်ထဲထည့်သင့်မထည့်သင့် ခွဲခြမ်းစိတ်ဖြာကြည့်ရမှာပါ။ သတင်းဆောင်းပါးတွေနဲ့ မီဒီယာထုတ်ကုန်တွေကိုလေ့လာတာဟာ ကိုယ်မသိသေးတဲ့သတင်းအချက်အလက်ကို သိရှိဖို့ပဲဖြစ်သင့််ပါတယ်၊ သဘောပေါက်နားလည်တဲ့အပိုင်းကတော့ လူတစ်ဦးချင်းစီရဲ့ဖြစ်တည်မှု၊ စိတ်နေသဘောထားအရ ကွဲပြားသွားမှာဖြစ်ပါတယ် 💭🗯



တစ်ကမ္ဘာလုံးကဂိမ်းဖန်တီးရေးဆွဲသူတွေနဲ့ ဂိမ်းဖြန့်ချိသူကုမ္ပဏီများဘက်ကလည်း ဒီဖြစ်စဉ်အပေါ်မှာ သင်ခန်းစာအတော်များများရယူနိုင်လိမ့်မယ်ဆိုတာ ငြင်းနိုင်ဖွယ်ရာမရှိပါဘူး။ ဒါဟာ Naughty Dog ဘက်က လိုလိုလားလားစတေးခဲ့တဲ့လုပ်ရပ်တစ်ခုအလား နောင်လာမယ့်ဂိမ်းတွေအနေနဲ့ အခုလိုထပ်တူကျတဲ့အမှားမျိုးကို နောက်ထပ်မကျူးလွန်မိအောင် အများကြီးပြင်ဆင်နိုင်ခွင့်ရှိသွားတဲ့အပြင် ကိုယ့်ရဲ့လုပ်ငန်းစဉ်နဲ့ နိုင်ငံရေးအယူဝါဒတွေကို ဂိမ်းတွေထဲထည့်သွင်းလိုတဲ့ အနောက်တိုင်းဂိမ်းကုမ္ပဏီများအတွက်လည်း နားထဲကပ်ပြောတဲ့ အနီးကပ်ဆုံးသတိပေးချက်တစ်ခုသဖွယ် ဖြစ်သွားခဲ့ပါပြီ။ ဒါတင်မက ဒီအရှုပ်တော်ပုံဟာ ဂိမ်းလောကအကျိုးတစ်နိုင်တစ်ပိုင်သယ်ပိုးနေတဲ့ ကျွန်တော်တို့လိုဆောင်းပါးရှင်၊ ဂျာနယ်လစ်၊ Content Creator တွေနဲ့ ဂိမ်းပရိသတ်ပြည်သူလူထုအတွက်လည်း ဘယ်ဟာသည် စစ်မှန်သလဲ? ဘယ်ဟာသည် မှားယွင်းသလဲ? ဆိုတာ ဝေဖန်ပိုင်းခြားသင်ယူနိုင်ဖို့ အခွင့်ကောင်းတစ်ခုလည်း ဖြစ်နေပြန်ပါတယ်။ ၂၀၁၇ ခုနှစ်တုန်းက EA ဖက်ကပြောကြားခဲ့တဲ့ "တစ်ကိုယ်တော်ဇာတ်လမ်းသွားဂိမ်းတွေဟာ သေဆုံးနေပြီ၊ အနာဂတ်မှာဆော့မယ့်သူတွေ မရှိလာနိုင်တော့ဘူး" ဆိုတဲ့ တစ်ဖက်စောင်းနင်းပြောကြားချက်ကို တစ်ကမ္ဘာလုံးက ဂိမ်းရေးဆွဲဖန်တီးသူတွေရော၊ ဂိမ်းချစ်သူပြည်သူလူထုကပါ အကျွင်းမဲ့မှားယွင်းကြောင်း တစ်ခဲနက်သက်သေပြခဲ့သလို ဒီတစ်ခေါက် The Last of Us: Part 2 ကိစ္စမှာလည်း အမှန်တရားဘက်ကရပ်တည်တဲ့မီဒီယာအချို့၊ အမှားအမှန်ကို ရိုးသားဖြောင့်မတ်စွာထောက်ပြခဲ့တဲ့ Content Creator တွေနဲ့ ဂိမ်းတွေကိုချစ်မြတ်နိုးကြတဲ့ ဂိမ်မာများဘက်ကပါ တာဝန်ကျေခဲ့ကြပါတယ်။ ဒီနေရာမှာ Sony ရဲ့နှစ်ဆင့်ခံ double standard, Neil Druckmann ကိုယ်တိုင် ဦးညွှတ်နေတဲ့ Identity Politics များ, SJW ရဲ့ကျော့ကွင်းစနက်များနဲ့ The Last of Us: Part 2 ဂိမ်းတစ်ခုလုံးရဲ့အငွေ့အသက်ကို လွှမ်းမိုးခြယ်လှယ်ခဲ့တဲ့ Anita Sarkeesian တို့ရဲ့ကန့်လန်ကာနောက်ကွယ်က လုပ်ရပ်တွေကို ချန်လှစ်ခဲ့ရပါသေးတယ်။ အဲသလိုရှုပ်ထွေးလှတဲ့နိုင်ငံရေးဝါဒ၊ ဆိုရှယ်လူမှုအချင်းအရာတွေကို မြန်မာနိုင်ငံအတွင်းက ဂိမ်းချစ်ပရိသတ်ရာခိုင်နှုန်းအတော်များများ နားလည်သွားတဲ့အချိန်ကျရင် ခေါင်းစဉ်တွေခွဲပြီ တင်ဆက်ပေးဖို့ ရည်ရွယ်ထားပါတယ် 📚



The Last of Us စီးရီးကို လွန်စွာမှမြတ်နိုးကြိုက်နှစ်သက်ရတဲ့ ကျွန်တော်တို့လိုဂိမ်းချစ်သူတွေအတွက်ကတော့ နုနယ်တဲ့ခံစားချက်တွေ ထိခိုက်ခဲ့ရုံသာမက ဒီဂိမ်းစီးရီးအနေနဲ့ အနာဂတ်မှာ ပြန်လည်ရှင်သန်လာမယ်ဆိုတဲ့ မျှော်လင့်ချက်လည်း ကင်းမဲ့ခဲ့ရပါပြီ။ သို့ပေမယ့် ပြီးခဲ့တာတွေကို ပြည်ဖုံးကားချပြီး ဖြစ်ခဲ့တာတွေထဲမှာမှ ဒါတွေက ကျွန်တော်တို့ကိုဘယ်တွေသင်ပြခဲ့သလဲ? ကျွန်တော်တို့ကရော ဘာတွေသင်ယူနိုင်ခဲ့သလဲ? ဆိုတာကပဲ လက်တွေ့ဘဝမှာ အရေးကြီးတာဖြစ်ပါတယ်။ ဂိမ်းလောကအပြင် ရုပ်ရှင်၊ ဂီတ၊ အနုပညာ၊ နိုင်ငံရေး အစရှိတဲ့နယ်ပယ်အသီးသီးမှာ လောင်မြိုက်ချစားနေတဲ့အထက်ပါအချင်းအရာတွေကြောင့် နဂိုကအရည်အသွေးပြည့်ဝပြောင်မြောက်လွန်းလှတဲ့ တည်ဆောက်မှုတွေ၊ franchise တွေအနေနဲ့ ပျက်ခြင်းမလှပျက်သုန်းသွားခဲ့ရပါပြီ။ Star Wars ပရိသတ်တွေ၊ Disney ချစ်သူတွေနဲ့ Game of Throne ကိုတစ်ခဲနက်အားပေးသူတွေကတော့ ဘာကိုဆိုလိုသလဲဆိုတာ တန်းပြီးနားလည်နိုင်မှာပါ။ ဆိုတော့ကာ ပြောသင့်တဲ့အချိန်မတန်ခင်အထိတော့ အားလုံးပဲ အချိန်တစ်ခုစောင့်ဆိုင်းနိုင်ကြလိမ့်မယ်လို့ မျှော်လင့်ပါတယ်။ ဖတ်ရှုလာရင်း ဒီနေရာအထိရောက်ရှိလာသူတိုင်းကို ကျေးဇူးအထူးတင်ရှိပါတယ်။ ဆောင်းပါးတစ်လျှောက်မှာ စာဖတ်သူဂိမ်းပရိသတ်တွေကို စိတ်ရင်းနဲ့ တင်ပြချင်တဲ့အကြောင်းအရာတွေ ပါဝင်နေတာကြောင့် အာရုံစိုက်ပြီးဖတ်ရှုပေးဖို့ ထပ်မံနှိုးဆော်လိုက်ရပါတယ်။ အခုတော့ ဒီလောက်နဲ့ပဲအဆုံးသတ်လိုက်ပါရစေ၊ နောင်လာမယ့်ဆောင်းပါးတွေမှာ အခုလိုစိတ်ဝင်စားဖို့ကောင်းတဲ့ ဂိမ်းသတင်းအကြောင်းအရာတွေနဲ့ ပြန်လည်ဆုံတွေ့ကြပါမယ်လို့ပြောရင်း ဒီကနေ နှုတ်ဆက်လိုက်ရပါတယ်။ ကောင်းမွန်သောနေ့လေးကို ပိုင်ဆိုင်နိုင်ကြပါစေ 🌥🌳



Yan