ပထမဆုံး Playstation 5 ဂိမ်းအဖြစ် တရားဝင်ကြေညာခဲ့တဲ့ Godfall ဂိမ်းဟာ ဂိမ်းလောကတစ်ခုလုံး ဘဝင်ခိုက်အကြိုက်တွေ့မယ့် အမိုက်စားဂိမ်းတစ်ခုဖြစ်လာမှာလား? ⚔️🛡

၂၀၂၀ ခုနှစ်ရဲ့နွေရာသီအားလပ်ရက်မှာ Playstation 5 ကိုထုတ်ပေးသွားမယ်ဆိုတဲ့ ပြောကြားချက်ကြောင့် ၂၀၁၉ ခုနှစ်၊ ဒီဇင်ဘာလကုန်ခါနီးမှာကတည်းက ဂိမ်းလောကတစ်ခုလုံးအနေနဲ့ PS5 ရဲ့သတင်းအစအနတွေကို ရင်ခုန်စိတ်လှုပ်ရှားစွာ နားစွင့်စောင့်စားလို့နေပါတယ်။ လက်ရှိအချိန်မှာ PS5 ရဲ့ official logo ကိုပဲ ဖော်ပြရသေးပေမယ့် Playstation ပရိသတ်များအနေနဲ့ Sony ရဲ့နောက်မျိုးဆက်သစ်ဂိမ်းစက်အတွက် အလွန်တစ်ရာကို မြင့်မားတဲ့မျှော်လင့်ချက်များရှိနေပါတယ်။ အဲဒီလိုအတိုင်းထက်အလွန် ရင်ဖိုစိတ်လှုပ်ရှားဖို့ကောင်းနေတဲ့ကာလအပိုင်းအခြားမှာ Playstation YouTube ချန်နယ်က တင်ပေးလိုက်တဲ့ ဗီဒီယိုတစ်ခုကြောင့် ဂိမ်းချစ်သူများအနေနဲ့ Playstation 5 ရဲ့ဂိမ်းတွင်းအက်ရှင်တစ်ချို့နဲ့ brand new ဂိမ်းသစ်တစ်ခုကို မျက်ဝါးထင်ထင် အတိအလင်းတွေ့မြင်ခွင့်ရခဲ့ပါတယ်။ ဟုတ်ပါတယ်၊ အဲဒါကတော့ မျိုးဆက်သစ်ဂိမ်းလောကကို အရှိန်အဟုန်နဲ့ထိုးဖောက်ဝင်ရောက်လာတဲ့ Godfall ဂိမ်းရဲ့ Reveal Trailer ပဲ ဖြစ်ပါတယ် ☄️☄️

Godfall ဂိမ်းရဲ့ဗီဒီယိုထွေလာကို Playstation ချန်နယ်ကနေ ၂၀၁၉ ခုနှစ်၊ ဒီဇင်ဘာလ ၁၃ ရက်နေ့မှာ တင်ပေးခဲ့တာဖြစ်ပြီး ဗီဒီယိုတစ်ခုလုံးမှာပါဝင်တဲ့ ပတ်ဝန်းကျင်မြင်ကွင်းနဲ့ အက်ရှင်လှုပ်ရှားမှုအားလုံးဟာ CGI cutscene တွေမဟုတ်ဘဲ တကယ့်ဂိမ်းတွင်းဆော့ကစားမှုတွေဖြစ်တယ်လို့ ဖော်ပြထားပါတယ်။ ထွေလာကိုကြည့်ကြည့်မိချင်း ပထမဦးဆုံးခံစားရမိတာကတော့ ဂိမ်းတစ်ခုလုံးရဲ့ဂရုပ်ဖစ်ရုပ်ထွက်နဲ့ သစ်လွင်တဲ့ဇာတ်ကောင်ပုံစံတွေဟာ လုံးဝကိုပြောင်လက်ဝင်းပပြီး ချောမွေ့သေသပ်နေတာကို တွေ့မြင်ရမှာဖြစ်ပါတယ်။ ဒါကိုခြုံငုံသုံးသပ်ကြည့်မယ်ဆိုရင် Godfall ထွေလာမှာခံစားရတဲ့ အတွေ့အကြုံတစ်ခုလုံးဟာ မျိုးဆက်သစ်ဂိမ်းတွေရဲ့ စွမ်းဆောင်နိုင်စွမ်းတွေထဲကတစ်ခုဖြစ်ပြီး ပိုအထင်ကြီးစရာကောင်းတာက ထွေလာမှာဖော်ပြပါ footage တွေဟာ ဂိမ်းတွင်းဆော့ကစားမှု In-game content တွေဖြစ်တယ်ဆိုတာပါပဲ။ ဒါ့အပြင်ဒီဂိမ်းတစ်ခုလုံးရဲ့ အငွေ့အသက်၊ ဇာတ်ကောင်ပုံစံတည်ဆောက်မှုနဲ့ ဆန်းပြားသစ်လွင်မှုတို့ကြောင့် ဒီ Godfall ဂိမ်းဟာ ထွက်ရှိခဲ့ပြီးသား ဘယ်လိုဂိမ်းမျိုးနဲ့မှ မတူတဲ့ RPG/Action-Adventure/Looter-Slasher ဂိမ်းတစ်ခုလို့ ခန့်မှန်းသုံးသပ်နေကြပါတယ်။ ဒီ Godfall ဂိမ်းကို Counterplay Games ကဖန်တီးရေးဆွဲပြီး Gearbox Publishing က Playstation 5 နဲ့ Microsoft Windows ပလက်ဖောင်းတို့မှာ အသီးသီး ဖြန့်ချိသွားမှာဖြစ်ပါတယ် 🎮🖱

သိရှိရတဲ့သတင်းအချက်အလက်များအရ ဒီဂိမ်းဟာ စိတ်ကူးယဉ်ဆန် စောက်ထာကျလွန်းတဲ့ High Fantasy လောကမျိုးမှာ ဇာတ်အိမ်တည်ထားတာဖြစ်ပြီး ကိုယ်ဟာ နောက်ဆုံးကျန်ရစ်တဲ့ Knight's Order တွေထဲကတစ်ယောက်အဖြစ် ကမ္ဘာပျက်သုန်းမယ့်ဖြစ်ရပ်တွေကို တားဆီးကာကွယ်ရမယ်လို့ သိရပါတယ်။ ဒီဂိမ်းဟာ third-person အမြင်နဲ့ဆော့ကစားရမှာဖြစ်သလို စတိုင်ကျပြီးအနှစ်အရသာပါဝင်လွန်းတဲ့ အတိုက်အခိုက်စနစ် mastery-driven melee combat ကိုအသားပေးထားတာဖြစ်ပါတယ်။ နောက်တစ်ခုက ဒီ Godfall ဂိမ်းဟာ ကိုယ့်ရဲ့မိတ်ဆွေသူငယ်ချင်းများနဲ့အတူ စည်းစည်းလုံးလုံးလက်တွဲပြီး အတူကစားသင့်တဲ့ co-op အမျိုးအစားဖြစ်တဲ့အပြင် တစ်ယောက်တည်း solo ကစားသူများကလည်း လက်လွှတ်မခံသင့်တဲ့ အသစ်စက်စက် Playstation 5 ဂိမ်းတစ်ခုပါ။ ကျွန်တော်ကတော့ ကျွမ်းကျင်ပိရိသေသပ်လွန်းတဲ့အတိုက်အခိုက်စနစ်နဲ့ ရင်သပ်ရှုမောဖို့ကောင်းတဲ့ ဇာတ်ကောင်ပုံစံတွေကြောင့် ဒီဂိမ်းကိုတော့ အကောင်းဖက်ကပိုမြင်နေပါတယ်။ ကဲ ဒီတော့ ဘာတွေဆက်လာဦးမှာလဲဆိုတာကတော့ စောင့်ကြည့်ရမှာ ဂိမ်မာတွေရဲ့ တာဝန်ပါ။ Sony အနေနဲ့ Playstation 5 ရဲ့ပထမဦးဆုံးတရားဝင်ဂိမ်းတစ်ခုအဖြစ် Godfall ဂိမ်းကို ထုတ်ပြတယ်ဆိုကတည်းကိုက အဲဒီဂိမ်းနဲ့ပတ်သက်ပြီးတစ်ခုခုတော့ မျှော်လင့်ထားတဲ့ပုံပါပဲ။ ဖတ်ရှုသူများအားလုံးကို ကျေးဇူးအထူးပါ၊ ဂိမ်းတွင်းအကြောင်းအရာများနဲ့ အခြားစိတ်ဝင်စားဖွယ်ဆောင်းပါးတွေကို ပေ့ချ်မှာပုံမှန်တင်ဆက်ပေးသွားမှာပါ 🤓💜

Yan

နှစ်စဉ်နှစ်တိုင်းကျင်းပလေ့ရှိတဲ့ ၂၀၂၀ ခုနှစ်ရဲ့ E3 ပွဲကို Sony အနေနဲ့ တက်ရောက်မှာမဟုတ်ကြောင်း တရားဝင်ထုတ်ပြန်ကြေညာ 🗞🗞

၂၀၂၀ ခုနှစ်၊ နွေရာသီအားအပ်ရက်မှာထွက်ရှိဖို့ ရာထားတဲ့ Playstation 5 နဲ့ပတ်သက်ပြီး Sony က ဘယ်လိုအရာတွေကို ထုတ်ဖော်ပြသသွားမလဲဆိုတာ တစ်ကမ္ဘာလုံးက ဂိမ်းချစ်ပရိသတ်တွေအားလုံး သိချင်နေကြပါတယ်။ ပြီးခဲ့တဲ့ တစ်ပါတ်လောက်က ကျင်းပခဲ့တဲ့ ၂၀၂၀ ခုနှစ် CES ပွဲမှာ Playstation 5 ရဲ့ Official Logo ကို တရားဝင်ထုတ်ဖော်ချပြလိုက်တဲ့ သတင်းဟာ ဂိမ်းမီဒီယာပေါင်းများစွာနဲ့ ဂိမ်းလောကနယ်ပယ်တစ်ဝိုက်မှာ အတိုင်းအတာတစ်ခုအထိ ပွက်လောထခဲ့တာတော့ အမှန်ပါပဲ။ နှစ်တိုင်းနှစ်တိုင်းရဲ့နိုဝင်ဘာလမှာ ထွက်လေ့ရှိကြတဲ့ Playstation console ဂိမ်းစက်တွေရဲ့သမိုင်းကြောင်းအရ Sony အနေနဲ့ သူတို့ရဲ့အလားအလာရှိ မျိုးဆက်သစ်ဂိမ်းစက် Playstation 5 ကို ၂၀၂၀ ခုနှစ်ရဲ့နိုဝင်ဘာလမှာ ထုတ်ပေးသွားမယ်လို့ အားလုံးက မျှော်လင့်ထားကြပါတယ်။ X Box အနေနဲ့ ၂၀၁၉ ခုနှစ်၊ ဒီဇင်ဘာလမှာကတည်းက X Box Series X ရဲ့ဂိမ်းစက်ပုံစံနဲ့ အရွယ်အစားပမာဏကို ဗီဒီယိုနဲ့တကွ ပြသလိုက်တာမို့ ၂၀၂၀ ထဲဝင်တာနဲ့ Playstation ဆီက တစ်ခုခုကြားရမယ်လို့ ဂိမ်းလောကသုံးသပ်သူများက ကောက်ချက်ချနေကြပါတယ် 🗣

ဒါကြောင့်မို့ပဲ ယမန်နှစ် ၂၀၁၉ ခုနှစ် E3 ပွဲကိုတက်ရောက်ခြင်းမရှိခဲ့တဲ့ Sony အနေနဲ့ အခု ၂၀၂၀ ခုနှစ် E3 ပွဲမှာတော့ Playstation 5 ရဲ့သတင်းတစ်ခုခုကို အသေအချာ unveiling လုပ်သွားမှာပဲလို့ မှတ်ယူချင်စရာပါပဲ။ ဒါပေမယ့် အံ့သြဖို့ကောင်းတာက လွန်ခဲ့တဲ့တစ်ရက်၊ ဇန်နဝါရီလ ၁၃ ရက်နေ့က Sony အနေနဲ့ လာမယ့် ၂၀၂၀ ခုနှစ်ရဲ့ E3 ပွဲမှာ တက်ရောက်ပါဝင်သွားမှာမဟုတ်လို့ တရားဝင်ထုတ်ပြန်ခဲ့ပါတယ်။ Sony အနေနဲ့ E3 ပွဲမှာတတ်ရောက်ဖို့ ရှောင်ထွက်ခဲ့တာ ဒီနှစ်နဲ့ဆိုရင် နှစ်နှစ်ဆက်တိုက်ရှိသွားပြီဖြစ်ပါတယ်။ ကျွန်တော်တို့အားလုံးသိခဲ့ကြတဲ့ Playstation ဂိမ်းလိုလိုဟာ ဟိုအရင် E3 ပွဲတွေမှာ ကြေညာပြသခဲ့တာဖြစ်သလို အခုအချိန်ထိရေပန်းစားနေတဲ့ Playstation 4 ဂိမ်းစက်အထိ E3 ပွဲတွေမှာပဲ တင်ဆက်ပြသခဲ့တာဖြစ်ပါတယ်။ အခုဆိုရင် Playstation 5 ထွက်ရှိလာမယ့် ၂၀၂၀ ခုနှစ်ဖြစ်တဲ့အတွက် Sony အနေနဲ့ ဒီနှစ် E3 ပွဲကို ပိုပြီးတော့တောင် ခေါင်းကြီးပိုင်းက တက်သင့်ပါသေးတယ် 📸✨

ဒါပေမယ့် ကျွန်တော်တို့အခုပြောနေတာက Sony နဲ့ Playstation ပါ။ အားလုံးကိုယ်တိုင်တွေ့ကြုံခံစားခဲ့ရတဲ့အတိုင်း Sony နဲ့ Playstation ဟာ ကျွန်တော်တို့ကို ဘယ်တုန်းကမှစိတ်မပျက်စေခဲ့ရပါဘူး၊ ဂိမ်းပလက်ဖောင်းအရရော၊ ဆော့ကစားနိုင်တဲ့ဂိမ်းတွေအရပါ တစ်ကမ္ဘာလုံးနဲ့ချီတဲ့ပရိသတ်တွေကို ရရှိထားတဲ့ Playstation အနေနဲ့ ဒီတစ်ခေါက်ရွေ့မယ့်အကွက်ကတော့ နားမလည်နိုင်လောက်အောင်ကို လျှို့ဝှက်လွန်းနေပါတယ်။ တစ်ခုသိရမှာက Sony နဲ့ Playstation လို brand မျိုးဟာ နာမည်ဂုဏ်သိက္ခာနဲ့ သြဇာပါ ကြီးမားတဲ့အတွက် E3 လို Convention ပွဲမျိုးကို တစ်ကိုယ်တော်ခင်းကျင်းပြသလို့ရတဲ့ အနေအထားရှိသလို သတင်းတစ်ခုခုထူးပြီဆိုရင်လည်း မီဒီယာပေါင်းစုံက အာရုံစိုက်ဖော်ပြမှုကို အထူးခံရတဲ့ အထာကျကျနေရာမှာရပ်တည်နေတယ်ဆိုတာပါပဲ။ ၂၀၂၀ ခုနှစ်ရဲ့ E3 ပွဲမှာ Sony မပါလည်း အခြားသောရင်ခုန်ဖွယ်ဂိမ်းပေါင်းမြောက်မြားစွာကြောင့် ကျွန်တော့်တော့ ရင်ခုန်နေပါပြီ။ တစ်ဖက်ကလည်း Sony အနေနဲ့ ဘယ်လိုမျိုးပုံစံနဲ့ ဈေးကွက်ထဲကိုထိုးဖောက်ဝင်ရောက်လာမှာလဲဆိုတာကလည်း မျက်ခြေမပျက်စောင့်ကြည့်နေရဦးမှာဖြစ်တဲ့အတွက် ၂၀၂၀ ခုနှစ်ကတော့ ကျွန်တော်တို့ ဂိမ်းချစ်ပရိသတ်တွေအတွက် ရင်ခုန်စရာကာလကြီးဖြစ်ပါတယ် 🤓

Yan

Marvel ရဲ့ Anti-hero Vampire ဖြစ်တဲ့ Morbius နေရာမှာ အသက်ဝင်ပီပြင်စွာ သရုပ်ဆောင်ထားတဲ့ Jared Leto ကို ဒီတစ်ခေါက်မှာရော ဘယ်လိုတွေ့မြင်ရမလဲ? 🧛‍♂️⚰️

လက်ရှိ ၂၁ ရာစုဟာ မြောက်မြားလှတဲ့ Comics ဇာတ်ကောင်တွေ Live-Action အဖြစ်နဲ့ ရုပ်ရှင်ပရိသတ်တွေဆီ တစ်သုတ်ပြီးတစ်သုတ်ရောက်ရှိလာတဲ့ခေတ်ဖြစ်တာကြောင့် ၂၀ ရာစုကတည်းက ရုပ်ပြကာတွန်းရဲ့ Juggernaut နှစ်ဦးဖြစ်ကြတဲ့ DC နဲ့ Marvel ဟာလည်း နာမည်ကျော်ကြားတဲ့ရုပ်ရှင်ထုတ်လုပ်ရေးကုမ္ပဏီများနဲ့ လက်တွဲပြီး Live-Action ရုပ်ရှင်ပေါင်းများစွာကို ရိုက်ကူးဖန်တီးထုတ်လုပ်လျက်ရှိပါတယ်။ အဲဒီထဲမှာမှ အရည်အချင်းရှိတဲ့သရုပ်ဆောင်တွေရဲ့အနုပညာတင်ဆက်မှုနဲ့ ရွေးချယ်ထားတဲ့ ဇာတ်ကောင်စရိုက်လိုက်ဖက်မှုတို့ကြောင့် Comics ပရိသတ်တွေရော၊ ရုပ်ရှင်ချစ်ပရိသတ်တွေပါ အကြိုက်တွေ့ခဲ့ရတဲ့ဇာတ်ကားတွေရှိခဲ့သလို မှန်းချက်နဲ့နှမ်းထွက်လုံးဝမှမကိုက်ခဲ့ပဲ အသားတင်ဝင်ငွေရဖို့နေနေသာသာ ခွက်ခွက်လန်အောင် အရှုံးပေါ်ခဲ့တဲ့ရုပ်ရှင်တွေဟာလည်း မနည်းမနောပါပဲ။ ဇာတ်ကောင်သစ်တစ်ယောက်ကို Live-Action ရုပ်ရှင်ဇာတ်ကားပေါ်မှာ ပွဲထုတ်ပြီဟေ့ဆိုရင် သရုပ်ဆောင်နဲ့ ဇာတ်ကောင် ဘယ်လောက်ထိလိုက်ဖက်မှုရှိရှိ ရိုက်ကူးထုတ်လုပ်သူတွေဖက်က အနည်းနဲ့အများတော့ risk ယူရစမြဲဆိုတာ Live-Action လောကရဲ့ နိယာမတစ်ခုလိုဖြစ်နေပါပြီ 📽🎬

ကိုယ့်ဖက်ကအကောင်းဆုံးကြိုးစားထားပေမယ့် franchise ကိုအသည်းစွဲကြိုက်တဲ့ လူထုပရိသတ်ရဲ့အမြင်နဲ့ ကိုယ့်ရဲ့စင်တင်ဆက်မှုဟာ ကွဲပြားမှုတစ်ချို့ရှိတဲ့အခါ မလိုလားအပ်တဲ့ပဋိပက္ခတွေဟာ ဖြစ်ရစမြဲပါ၊ ဥပမာဆိုရရင် Jared Leto ရဲ့ Suicide Squad က Joker နဲ့ Henry Cavill ရဲ့ Witcher စီးရီးက Geralt ကိုပဲ ကြည့်ကြည့်လိုက်ပါ။ ဒါပေမယ့် ဒီတစ်ခေါက်မှာတော့ Joker ဇာတ်ကောင်သရုပ်ဖော်မှုမှာ မီဒီယာနဲ့ပရိသတ်တွေ ဝေဖန်ပြစ်တင်ပြောဆိုမှုတွေကို ဒုနဲ့ဒေးရရှိခဲ့တဲ့ Jared Leto အနေနဲ့ DC Universe ကနေ Marvel Universe ကို ကူးပြောင်းပြီး Spiderman ရဲ့ရန်သူတော်တစ်ယောက်ဖြစ်တဲ့ Living Vampire အဖြစ် အသက်ပြန်ဝင်နိုးထလို့လာပါပြီ။ ၂၀၁၇ ခုနှစ်ကတည်းက ရိုက်ကူးမှုအဆင့်ဆင့်ကို စတင်အကောင်အထည်ဖော်နေပြီဖြစ်တဲ့ Morbius ရဲ့တစ်ကိုယ်တော်လုံးချင်းဇာတ်ကားမှာ Jared Leto ကို ဘယ်လိုပုံစံနဲ့တွေ့ရမလဲဆိုတာကတော့ ရင်ခုန်စရာပါပဲ။ DC ရဲ့ Joker အဖြစ် ပရိသတ်တွေရဲ့လက်ခုပ်သြဘာနဲ့ဝေးကွာခဲ့တဲ့ Jared Leto ဟာ အခုအချိန်မှာတော့ Marvel ရဲ့အသက်မဲ့သွေးစုပ်ဖုတ်ကောင် Morbius အဖြစ် ပိတ်သားပေါ်မှာ အားလုံးကို အငြိုးအတေးနဲ့ အသည်းစွဲကြိုက်သွားအောင် သရုပ်ဖော်သွားတော့မှာပါ ✨🤵

ဒီဇာတ်ကားကို ၂၀၂၀ နှစ်လယ်ပိုင်း၊ ဇူလိုင်လ ၃၁ ရက်နေ့မှာ ထုတ်ပေးသွားမှာဖြစ်ပြီး ဇာတ်ကားနဲ့ပတ်သက်တဲ့ထွေလာတို့၊ ဇာတ်ကားပိုစတာတို့၊ ဓါတ်ပုံတို့ အစရှိတာတွေကတော့ မထွက်လာသေးပါဘူး။ ဒါပေမယ့် ဇာတ်ကားထွက်ရှိလာမယ့် အချိန်ဟာ အမှန်တကယ်ဆို သိပ်မလိုတော့တာဖြစ်တဲ့အတွက် Morbius ဇာတ်ကားကို promote လုပ်မယ့် ထွေလာတွေ၊ ဗီဒီယိုအပိုင်းအစတွေကတော့ မကြာခင်မှာ ထွက်ရှိလာတော့မယ်လို့ ယူဆရပါတယ်။ ကဲ ဒီတော့ အားလုံးပဲ အဆုံးထိဖတ်ရှုပေးတာကို ကျေးဇူးတင်ပါတယ်။ ပေ့ချ်ကိုတည်ထောင်ခဲ့ရတဲ့ ရည်ရွယ်ချက်အတိုင်း စိတ်ဝင်စားဖို့ကောင်းတဲ့ဂိမ်းသတင်းတွေနဲ့ အခြားဆက်စပ်အကြောင်းအရာတွေကို ဆောင်းပါးအသွင်နဲ့သော်လည်းကောင်း၊ ဗီဒီယိုအသွင်နဲ့သော်လည်းကောင်း ပုံမှန်တင်ဆက်ပေးသွားပါမယ်။ ဖတ်ရှုပြီး မျှဝေခံစားသူများကိုလည်း ကျေးဇူးအထူးတင်ပါကြောင်း 🖤🖤

Yan

မျှော်လင့်ချက်ပေါင်းများစွာဆုပ်ကိုင်ထားတဲ့ Batman ဂိမ်းသစ်မှာပါဝင်လာမယ့် Logo သစ်တစ်ခုကို Warner Bros Games Montreal ထုတ်ဖော်ပြသ 🦇🦇

DC Comics ရဲ့ Batman ဇာတ်ကောင်ဟာ ရုပ်ပြကာတွန်းနဲ့ Live Action ရုပ်ရှင်တွေသာမက ဂိမ်းစီးရီးအနေနဲ့လည်း တစ်ဟုန်ထိုးနာမည်ကျော်ကြားအောင်မြင်တဲ့ franchise တစ်ခုဖြစ်ပါတယ်။ ခုနှစ်အသီးသီးနာမည်ကောင်းမြောက်မြားစွာ ဆွတ်ခူးနိုင်ခဲ့တဲ့ Batman: Arkham Asylum, Origins, Knight အစရှိတဲ့ဂိမ်းတွေဟာ ဂိမ်းချစ်သူပရိသတ်များရဲ့ ရင်ထဲမှာစွဲကျန်အမှတ်ရနေခဲ့တဲ့ ဂိမ်းတွေဖြစ်ပါတယ်။ Batman franchise အနေနဲ့ ၂၀၁၉ ခုနှစ်၊ စက်တင်ဘာလမှာ Batman: Arkham Collection ဆိုတဲ့ ဂိမ်းသုံးမျိုးစလုံးရဲ့ Remastered ဗားရှင်းကိုတစ်စုစစည်းတည်း ပေါင်းစည်းထုတ်ပေးခဲ့ပေမယ့် ဇာတ်ကြောင်းနဲ့ ဂိမ်းကစားဟန်အသစ်ပါမဝင်တဲ့ ဂိမ်းသစ်တစ်ခုမဟုတ်တဲ့အတွက် ၂၀၁၅ ကနောက်ဆုံးထွက်ရှိခဲ့တဲ့ Batman: Arkham Knight ဟာ စီးရီးရဲ့နောက်ဆုံးဂိမ်းလို့ မှတ်ယူနိုင်ပါတယ်။ ဒါပေမယ့် ၂၀၁၅ ခုနှစ်ကနေ အခု ၂၀၂၀ ခုနှစ်၊ ဇန်နဝါရီလအထိ အချိန်ငါးနှစ်အတွင်းမှာ Warner Bros Games Montreal အနေနဲ့ Batman ဂိမ်းသစ်ကို ဖန်တီးရေးဆွဲနေတယ်ဆိုတဲ့အကြောင်း အမျိုးမျိုးသောကောလဟာလတွေနဲ့ သတင်းအချက်အလက်အမှန်တွေပါ ထွက်ရှိခဲ့ပါတယ် 📰

ပထမဦးဆုံးမှတ်မှတ်ရရဖြစ်စေမယ့် သတင်းတစ်ခုကတော့ လာမယ့် Batman ဂိမ်းအသစ်ရဲ့အမည်ဟာ Batman: Arkham Legacy ဖြစ်မယ်ဆိုတာပါပဲ။ ဘယ်နေရာကနေ leak ဖြစ်ခဲ့မှန်းမသိပေမယ့် ဒီသတင်းနဲ့ပတ်သက်လို့ Rocksteady ကရော Warner Bros Games Montreal ကပါ အကြောင်းပြန်ခြင်းမရှိတာကြောင့် အနာဂတ်ရဲ့ Batman ဂိမ်းသစ်ကို Arkham Legacy လို့ပဲ ဂိမ်းမီဒီယာများနဲ့ ပရိသတ်တွေက ခေါ်ဝေါ်လျက်ရှိပါတယ်။ လတ်တလောကမှ Tease လုပ်လိုက်တာကတော့ WB Games Montréal အနေနဲ့ သူတို့ရဲ့ Twitter Profile မှာ ဂေါ်သန်မြို့ရဲတပ်ဖွဲ့ကိုယ်စားပြုအမှတ်တံဆိပ်လို့ ယူဆရတဲ့ သိမ်းငှက်၊ ဓားနှစ်လက်ပါတဲ့ဒိုင်းနဲ့ ကြယ်ပွင့် logo ကို တင်ပေးခဲ့လို့ပါပဲ။ အဲဒီလို Logo နဲ့အလားတူစွာပဲ ၂၀၁၉ ခုနှစ်၊ စက်တင်ဘာလကလည်း နတ်ဆိုးတစ်ယောက်ရဲ့မျက်နှာပြင် Logo ကိုတင်ပေးခဲ့ပြီး အဲဒီ Logo ဟာ Ra's Al Ghul ရဲ့ League of Assassins အဖွဲ့ကိုရည်ညွှန်းထားတယ်လို့ ဆိုပါတယ်။ လောလောဆယ်အထိတော့ ဂိမ်းတစ်ခုလုံးနဲ့ပတ်သက်ပြီး အဲဒီ Logo နှစ်ပုံကိုပဲ သိရသေးပေမယ့် အောက်ပါပုံအရတော့ Logo ကွက်လပ်ပေါင်း လေးခုကျန်ရှိနေသေးတဲ့အတွက် DC Universe ထဲက ဘယ်လိုမျိုးအဖွဲ့အစည်းတွေက Batman: Arkham Legacy ဂိမ်းမှာ ပါဝင်သွားမလဲဆိုတာ ရင်ခုန်ဖွယ်စောင့်ကြည့်ရတော့မှာပါ 🖤

သေချာသလောက်ရှိတာတစ်ခုကတော့ လာမယ့် Batman: Arkham Legacy ဂိမ်းမှာ Bruce Wayne ရဲ့အဓိကရန်သူဟာ Count of Owls ဖြစ်မယ်ဆိုတာပါပဲ။ Gotham ရဲ့တော်ဝင်တွေချည်းစုပေါင်းဖွဲ့စည်းပြီး မြို့ကိုတစ်ဖက်တစ်လမ်းကချူပ်ကိုင်နေတဲ့ Count of Owls ကို ၂၀၁၁ မှာ စတင်မိတ်ဆက်လိုက်ကတည်းက ပရိသတ်တွေကအကြိုက်တွေ့ခဲ့ကြတာဖြစ်တဲ့အတွက် ဂိမ်းစီးရီးထဲမှာလည်း ထည့်သွင်းဖို့ ဖြစ်နိုင်ချေများပါတယ်။ ဒါ့အပြင် လွန်ခဲ့တဲ့နှစ်နှစ် ၂၀၁၈ ခုနှစ်တုန်းက Scott Synder ကိုယ်တိုင် hashtag တွဲပြီး Wait of it... #bewarethecountofowls ဆိုတဲ့ Tweet ကို Twitter မှာတင်ပေးခဲ့တဲ့အတွက် Batman: Arkham Legacy မှာ Count of Owls ပါဝင်လာဖို့က ကြိမ်းသေသလောက်ပါပဲ။ ကဲ ဒါလောက်ဆိုရင် ဂိမ်းပရိသတ်တွေရော Comics ပရိသတ်တွေပါ ဒီသတင်းကိုဖတ်ပြီး ရင်ခုန်နေကြမယ်ထင်ပါတယ်။ လာမယ့်ဆောင်းပါးတွေမှာလည်း စိတ်ဝင်စားဖို့ကောင်းတဲ့ ဂိမ်းသတင်းအကြောင်းအရာကို တင်ဆက်ပေးသွားမှာမို့ စောင့်ဆိုင်းပေးကြပါဦး 🦉🤓

Yan

၂၀၂၀ ခုနှစ်ရဲ့ CES ပွဲမှာ Playstation 5 ရဲ့ Official Logo နဲ့ Hardware စွမ်းဆောင်ရည်တွေကို Sony ချပြခဲ့ 🖼

ပုံကိုကြည့်လိုက်တာနဲ့ လာမယ့် Playstation 5 ရဲ့ Logo ကို သိနေကြလောက်ပါပြီ။ ဒီသတင်းကိုသိပြီးတာ နှစ်ရက်နီးပါးရှိနေပြီဖြစ်ပေမယ့် ဒီသတင်းကိုရေးရတဲ့အကြောင်းကိုအခုမှပဲ ရေးဖြစ်ပါတယ်။ ပုံပါ Playstation 5 ရဲ့တရားဝင် Logo ကို၂၀၂၀ ခုနှစ် Sony ရဲ့ CES ပွဲမှာ ထုတ်ဖော်ပြသခဲ့တာဖြစ်ပြီး Playstation 5 မှာပါဝင်မယ့် အခြား hardware ပိုင်းကစွမ်းဆောင်ရည်တွေကို အကြမ်းဖျင်းတင်ဆက်သွားခဲ့တာဖြစ်ပါတယ်။ ဂိမ်းလောကတစ်ခုလုံးပါးစပ်အဟောင်းသားဖြစ်ရမယ့် သတင်းမျိုးမဟုတ်ပေမယ့် Playstation ချစ်သူများနဲ့ မျိုးဆက်သစ်ဂိမ်းလောကပြီုင်ပွဲကို စောင့်ကြည့်နေသူတွေ စိတ်ကျေနပ်သွားလောက်တဲ့ ထုတ်ဖော်ပြသမှုတစ်ခုပါပဲ။၂၀၂၀ ခုနှစ်ရဲ့ CES ပွဲမှာ Sony ပြသခဲ့ပုံအရ Playstation 5 မှာပါဝင်မယ့် hardware စွမ်းဆောင်ရည်တွေကတော့ 3D Audio Sound, Haptics/Adaptive Triggers, Ultra-High Speed SSD, Hardware-based Ray Tracing နဲ့ Ultra HD Blu-Ray တို့ပဲဖြစ်ကြပါတယ် 🌌🌄

အဲဒီထဲမှာပါဝင်တဲ့စွမ်းဆောင်ရည်အတော်အများများကို ဂိမ်းလောကအနေနဲ့ ယခင်ကတည်းကသိပြီးပြီဖြစ်ပေမယ့် ဒီတစ်ခေါက်မှာ Sony အနေနဲ့ 3D Audio Sound အသံပိုင်းအပေါ်မှာ အတော်လေးအာရုံစိုက်ထားတယ်လို့ သိရပါတယ်။ Hardware စွမ်းဆောင်ရည်တွေရဲ့ အသေးစိတ်လုပ်ဆောင်ချက်တွေကိုတော့ အတိအလင်းပြောကြားခြင်းမရှိသေးပေမယ့် လတ်တလောအခြေအနေအရတော့ မီဒီယာတော်တော်များများမှာ Playstation ရဲ့ Official Logo ဒီဇိုင်းပုံတွေကို တွေ့မြင်နေရပါတယ်။ ကျွန်တော့်အနေနဲ့ Sony ဖက်က Playstation 5 Official Logo ကို အခုလိုရိုးရှင်းတဲ့ပုံစံအဖြစ် သုံးစွဲထားတာကို ကျေနပ်အားရမိပါတယ်။ ခေတ်တွေဘယ်လိုပဲပြောင်းပြောင်း Playstation brand ရဲ့အမှတ်တံဆိပ်ပုံစံကို ရှေးမူမပျက်ထိန်းသိမ်းထားနိုင်တဲ့စံနှုန်းကို ချီးကျူးရမှာအမှန်ပါပဲ။ ဒါဟာ အခုလာမယ့် Playstation 5 မှာတင်သာမက နှစ်ပေါင်းများစွာကြာသည်အထိ အနာဂတ်မှာလာမယ့် Playstation 8, 9,10 အတွက်လည်း ဒီလိုမျိုး Logo ပဲဖြစ်လိမ့်မယ်ဆိုတာ ကြိုတွေးလို့ရပါတယ်။ ဒီစာစောင်လေးကိုဖတ်ပြီး Playstaiton 5 ကို စောင့်မျှော်နေကြလိမ့်မယ်ဆိုတာ ယုံကြည်ပါတယ်။ နောက်ဆက်ပြီးလည်း မှန်ကန်တိကျပြီး ရင်ခုန်ဖို့ကောင်းတဲ့ဂိမ်းသတင်းနဲ့ ဆက်စပ်အကြောင်းအရာတွေအပြင်၊ ဂိမ်းလောကကိုယ်စီရဲ့ဇာတ်ကောင်သမိုင်းနဲ့ အခြားစိတ်ဝင်စားစရာဆောင်းပါးတွေကို ရေးသားတင်ဆက်ပေးသွားပါမယ်။ ဖတ်ရှုသူများကို ကျေးဇူးအထူးတင်လျက်ရှိတယ် 💜💜

Yan

YouTube မှာ Subscriber ပေါင်းမီလီယံ ၁၀၀ ကျော်ခဲ့တဲ့ PewDiePie အနေနဲ့ ၂၀၁၉ မှာဝင်ငွေ ဘယ်လောက်ဝင်ခဲ့လဲ? 💰💰

အားလုံးကို PewDiePie နဲ့ အထွေအထူးမိတ်ဆက်ပေးနေစရာတော့ မလိုပါဘူး။ ဂိမ်းလောကနဲ့ YouTube ကိုအကျွမ်းတဝင်အသုံးပြုတဲ့သူမှန်ရင် PewDiePie ဆိုတဲ့နာမည်နဲ့ တစ်ကွေ့မဟုတ်တစ်ကွေ့တော့ ကြုံခဲ့ရမှာပဲ။ စာရေးသူကိုယ်တိုင်ကိုက ၂၀၁၅ ခုနှစ်ကတည်းက သူ့ရဲ့ဗီဒီယိုများကိုဆက်တိုက်ကြည့်ရှုပြီး အားပေးခဲ့သူဖြစ်တာကြောင့် စာဖတ်သူများသိရှိစေခြင်းအလို့ငှာ ဒီသတင်းကိုပြန်လည်ရေးသားတင်ဆက်ပေးရခြင်းဖြစ်ပါတယ်။ ရသစုံလင်တဲ့ဗီဒီယိုတွေကို လွတ်လပ်စွာဖန်တီးရတာ ကြိုက်နှစ်သက်တဲ့ PewDiePie အနေနဲ့ မီဒီယာတွေက သူတစ်နှစ်ဘယ်လောက်ဝင်တယ်၊ ပျှမ်းပျှဝင်ငွေဘယ်လောက်ရှိတယ် ဆိုတဲ့သတင်းတွေရေးရင် စိတ်ရင်းနဲ့မကြိုက်သူဖြစ်တာမှန်ပေမယ့် ၂၀၂၀ ခုနှစ်ကိုရောက်လာပြီဖြစ်တဲ့အတွက် YouTube မှာ ပထမဦးဆုံး Subscriber မီဒီယံ ၁၀၀ ကျော်ခဲ့တဲ့ Creator ဖြစ်သူ PewDiePie ရဲ့ ၂၀၁၉ ဝင်ငွေ ဘယ်လောက်ရှိခဲ့လဲဆိုတာ တစ်ချက်လောက်ကြည့်လိုက်ကြရအောင် 🧐

လက်ရှိမှာ YouTube Subscriber ပေါင်း ၁၀၂ မီလီယံနဲ့ ရပ်တည်နေတဲ့ PewDiePie အနေနဲ့ ရရှိထားတဲ့ Subscriber အရေအတွက်က များပြားလွန်းတဲ့အပြင် စက္ကန့်နဲ့အမျှတတ်လာနေတဲ့ ကြည့်ရှုမှုနှုန်းတွေအရ ၂၀၁၉ ခုနှစ်အတွင်းမှာ အသားတင်ဝင်ငွေချည်းပဲ အတော်လေးရရှိခဲ့မယ်လို့ မီဒီယာများကသုံးသပ်ကြပါတယ်။ ဒါပေမယ့် တကယ်တမ်းမှာ YouTube တစ်ခုတည်းကသာတင်မက သူကိုယ်တိုင် Marzia နဲ့ပေါင်းပြီးထုတ်ထားတဲ့ Tsuki brand ရဲ့ merchandise တွေ၊ တခြားသောနာမည်ကျော်အမှတ်တံဆိပ်ထုတ်ကုန်တွေနဲ့ပေါင်းပြီး သဘောတူစာချူပ်ချူပ်ထားတဲ့ endorsement deal တွေ၊ ဖိတ်ကြားမှုတွေကြောင့် ပွဲတတ်ရတာတွေ အစရှိတာတွေကလည်း တစ်ဖက်တစ်လမ်းကဝင်ငွေရစေတဲ့ နည်းလမ်းတွေဖြစ်ပါတယ်။ ပျှမ်းပျနှုန်းထားအရတော့ ၂၀၁၉ မှာ PewDiePie ရဲ့တစ်နှစ်တာဝင်ငွေဟာ ဗြိတိသျှပေါင် £၅၄ မီလီယံနဲ့ အမေရိကန်ဒေါ်လာ $70 မီလီယံအတွင်းရှိမယ်လို့ တွက်ချက်ထားကြပါတယ်။ မြန်မာငွေနဲ့ဆိုရင် သန်းပေါင်းတစ်သောင်းနှစ်ရာ့ခြောက်ဆယ့်နှစ်ကျပ် (၁၀,၂၆၂,၀၀၀,၀၀၀ ကျပ်) တန်ဖိုးရှိပါတယ် 🤩

၂၀၁၉ တစ်နှစ်အတွင်းမှာ ၁၂ လရှိတယ်ဆိုပြီး စုစုပေါင်းပမာဏကို ၁၂ နဲ့စား အတိအကျခွဲလိုက်လို့မရပေမယ့် မနှစ်က ဝင်ငွေအများဆုံးရခဲ့တဲ့လဖြစ်တဲ့ စက်တင်ဘာလမှာ အမေရိကန်ဒေါ်လာ ၉ မီလီယံနဲ့ အနိမ့်ဆုံးဝင်ငွေရတဲ့နိုဝင်ဘာလအတွက်တော့ အမေရိကန်ဒေါ်လာ ၄ မီလီယံနီးနီး ဝင်ခဲ့တာဖြစ်ပါတယ်။ ကိုယ်ကြိုက်တာကိုယ်လုပ်ပြီး ရနေတဲ့ပိုက်ဆံဝင်ငွေဖြစ်တဲ့အတွက် တကယ်တမ်းစဉ်းစားကြည့်လိုက်မယ်ဆိုရင်တော့ အတော်လေးမဆိုးဘူးလို့ဆိုလို့ရတဲ့ ပမာဏတစ်ခုပါပဲ။ ဘာတွေပဲြပောပြော စာရေးသူကတော့ PewDiePie ကိုငါးနှစ်ငါးမိုးဆက်တိုက်အားပေးလာခဲ့သူဖြစ်တဲ့အတွက် သူ့အစားဂုဏ်ယူအားရမိပါတယ်၊ သူဟာလူမှန်တစ်ယောက်ဖြစ်တဲ့အတွက် ဆက်ပြီးလည်း အားပေးသွားဦးမှာပါ။ အခုနှစ် ၂၀၂၀ ခုနှစ်မှာသာမက လာမယ့်နောင်နှစ်ပေါင်းများစွာမှာလည်း ဒီထက်မကများတဲ့ဝင်ငွေကိုရရှိပိုင်ဆိုင်ရင်း ချစ်ဇနီး Marzia နဲ့သက်ဆုံးတိုင်ပေါင်းသင်းနိုင်ကြပါစေလို့ ဆုတောင်းပေးရင်း ဒီသတင်းလေးကို အဆုံးသတ်လိုက်ရပါတယ်ဗျာ 💏👪

ကဲ PewDiePie aka Felix Kjellberg ကိုဂုဏ်ပြုတဲ့အနေနဲ့ Pewds ရဲ့ပရိသတ်တွေမှန်ရင် Brofist 👊 လေးလုပ်ကြရအောင်ဗျာ။