ဂိမ်းလောကနဲ့မရင်းနှီးသူများ ဗီဒီယိုဂိမ်းအပေါ်သုံးသပ်ထားတဲ့ အယူအဆအလွဲ ၇ ခု

ဂိမ်းဆော့ကစားခြင်းဟာ ဘယ်အရာနဲ့မှအစားထိုးလို့မရတဲ့ စိတ်ကျေနပ်မှုကိုပေးစွမ်းပါတယ်။ အဲဒီလိုမျိုးသူမတူူဆန်းပြားတဲ့အတွေ့အကြုံတွေကို ကိုယ်တိုင်ကိုယ်ကျခံစားရလို့ ဗီဒီယိုဂိမ်းကိုစွဲစွဲမြဲမြဲနှစ်ခြိုက်စွာ ဆော့ကြတဲ့ဂိမ်မာတွေဆိုတာ ထွက်ပေါ်လာတာပါ။ ဟုတ်ပါတယ်၊ စစ်ပွဲတွေအကြောင်းစိတ်ဝင်စားသူတွေက ဂိမ်းထဲမှာကိုယ်တိုင်သေနတ်ဆွဲပြီး သမိုင်းကြောင်းအထင်ကရတိုက်ပွဲတွေမှာ ပါဝင်ဆင်နွှဲတာမျိုး၊ ဟိုးရှေးခေတ်တစ်ခါက ဒဏ္ဍာရီသတ္တဝါကြီးတွေ၊ မှော်ဝင်သားရဲကြီးတွေနဲ့ ထိပ်တိုက်ရင်ဆိုင်ချင်တဲ့သူမျိုးက ဂိမ်းထဲမှာဒိုင်းနဲ့ဓါးဆွဲပြီး ချွတ်ချွတ်ခြုံခြုံ တိုက်ပွဲဝင်တာမျိုး၊ အကြောက်တရားကို လိုချင်သူတွေက ဂိမ်းထဲမှာ ကိုယ့်အသက်ကိုယ်လုပြေးပြီး ဖန်တီးထားတဲ့အကြောက်တရားကိုသီးသန့်ကြီးခံစားကြတာမျိုး၊ အစရှိသဖြင့် လူတစ်ဦးတစ်ယောက်ချင်းစီရဲ့ မသိစိတ်လိုအင်ဆန္ဒ၊ သိစိတ်လိုအင်ဆန္ဒတွေကို ဗီဒီယိုဂိမ်းများက တစ်ဖက်တစ်လမ်းကဖြည့်ဆည်းပေးနေပါတယ်။ ဗီဒီယိုဂိမ်းများဟာ အခုလိုမွန်းကြပ်လှတဲ့ရာစုသစ်လူ့ဘဝကြီးရဲ့ ထွက်ပေါက်ဖြစ်သလို ကိုယ်တစ်ခါမှမရောက်ဖူးတဲ့အံ့ဖွယ်အတိနဲ့နေရာတွေဆီ ကိုယ့်ကိုအိပ်မွေ့ချခေါ်ဆောင်သွားတဲ့ အချိန်ရထားတစ်စင်းလည်းဖြစ်ပါတယ်။ ဒါပေမယ့်ဂိမ်းများနဲ့ အထိအတွေ့မရှိသူတွေရဲ့ပတ်ဝန်းကျင်နဲ့ လူအများစုရဲ့အမြင်မှာတော့ ဗီဒီယိုဂိမ်းကစားခြင်းဟာ ကျန်းမာရေးအရထိခိုက်မှုတွေရှိရုံသာမက၊ စိတ်ပိုင်းဆိုင်ရာဘေးထွက်ဆိုးကျိုးနဲ့ မကောင်းတဲ့အကျိုးသက်ရောက်မှုတွေ အမြောက်အမြားရှိတယ်လို့ သမုတ်ကြပါတယ်။ တကယ်တမ်းဂိမ်းနဲ့ရင်းနှီးသူများအတွက်တော့ ဒီကိစ္စကိုပြောစမှတ်မပြုဘဲ မျက်နှာလွှဲထားလို့ရပေမယ့် ဂိမ်းလောကနဲ့အလှမ်းဝေးနေသူများအဖို့ ဗီဒီယိုဂိမ်းဆိုကြီးအပေါ်မှာ နားလည်မှုလွဲပြီး ဂိမ်းကစားခြင်းဟာလူကိုအကျိုးမပြုတဲ့အကျင့်၊ အလေ့အထတစ်ခုလို့ ယူဆသွားမှာကို မလိုလားပါဘူး။ ဒီတော့ အခုဒီမှာဂိမ်းပတ်ဝန်းကျင်က မဟုတ်တဲ့သူများရဲ့ ဗီဒီယိုဂိမ်းအပေါ်သုံးသပ်ထားတဲ့ အယူအဆလွဲလေးတွေနဲ့ တကယ်တမ်းမှာ ဗီဒီယိုဂိမ်းတွေဟာ ဆော့ကစားသူနဲ့ပတ်ဝန်းကျင်အပေါ်မှာ တကယ်ဘယ်လိုမျိုးအကျိုးသက်ရောက်မှုရှိသလဲဆိုတာကို အားလုံးသိနိုင်အောင်လို့ အချက် ၇ ချက်နဲ့တကွ ဒီကနေပြန်လည်မျှဝေလိုက်ရပါတယ်။

ဂိမ်းဆော့ကစားခြင်းဟာ ဘာအကျိုးမှမဖြစ်ထွန်းဘူးလို့ ထင်မြင်ခြင်း

ဒါကတော့ဂိမ်မာတွေအားလုံးငယ်စဉ်ဘဝမှာ နားနဲ့မဆံ့အောင် အပြောခံခဲ့ရဆုံးအရာပါ။ ကျွန်တော်တို့ရဲ့လူမှုအဖွဲ့အစည်းရဲ့ဖွဲ့စည်းပုံအရ ကိုယ့်ရဲ့မိဘများ၊ ဆရာဆရာမနဲ့ ကိုယ့်ပတ်ဝန်းကျင်က ဗီဒီယိုဂိမ်းဆော့ကစားတာကို ကိုယ့်အတွက်ဘာအကျိုးမှမဖြစ်ထွန်းဘူးလို့ ဖိအားပေးပြောဆိုကြပါတယ်။ တကယ်က တခြားတစ်ဖက်မှာ အွန်လိုင်းဂိမ်မာများဟာ သိပ္ပံပညာရပ်ရဲ့အကြီးမားဆုံးသော ပြသာနာတွေမှာအဓိကနေရာကနေ အဖြေရှာပေးနေကြတာတွေ တစ်ပုံတစ်ပင်ကြီးရှိနေပါတယ်။ ပဟေဠိအဖြေရှာတာတွေ၊ မျိုးစိတ်တွေပေါင်းစည်းတာတွေ အစရှိတဲ့သိပ္ပံစမ်းသပ်ချက်တွေမှာ ဂိမ်မာတွေဟာပါဝင်နေပါပြီ။ ဂိမ်မာများဟာ ဘာသာစကားမှာကျွမ်းကျင်သူတွေ၊ သမိုင်းကြောင်းနှံ့စပ်တဲ့သူတွေ၊ သိပ္ပံပညာရပ်မှာထူးချွန်တဲ့သူတွေ ဖြစ်နေကြတာကို လူတွေလုံးဝမမြင်နိုင်ကြပါဘူး။

ဂိမ်းဆော့ကစားခြင်းကြောင့် ကိုယ့်ရဲ့အပြုအမူတွေကြမ်းတမ်းသွားနိုင်တယ်လို့ ယူဆခြင်း

ဂိမ်းကစားခြင်းဟာ လူ့ဘဝရဲ့ထွက်ပေါက်ဖြစ်သလို စိတ်ဖိစီးမှုတွေ၊ စိုးရိမ်ကြောင့်ကြမှုတွေ၊ အဘက်ဘက်ကလာတဲ့ဖိအားတွေ အစရှိတာတွေကို ပပျောက်သွားအောင်လုပ်ပေးနိုင်တဲ့ လူနေမှုပုံစံတစ်ခုလည်းဖြစ်ပါတယ်။ ကျွန်တော်တို့ဟာ ကိုယ်ဆော့နေတဲ့ဗီဒီယိုဂိမ်းတွေထဲမှာ ဘဏ်ကိုဓါးပြဝင်တိုက်တာမျိုးတွေ၊ တွေ့သမျှလူတွေကိုသေနတ်နဲ့လိုက်ပစ်တာမျိုးတွေကိုလုပ်နိုင်ပေမယ့် တကယ်တမ်းအပြင်မှာတော့ ဂိမ်မာတွေဟာ ဂိမ်းခလုတ်ကိုကိုင်ပြီး တီဗီဖန်သားပြင်ရှေ့မှာ အေးဆေးငြိမ်သက်စွာနဲ့ တစ်နေ့တာရဲ့အချိန်တွေကိုကုန်ဆုံးစေသူတွေပါ။ ဂိမ်းအားလုံးကကြမ်းတမ်းနေတာလည်းမဟုတ်သလို ကိုယ့်ရဲ့အတွေးအမြင်၊ စိတ်ခံစားချက်နဲ့ အယူအဆတွေကိုပြောင်းလဲသွားစေတဲ့ ဂိမ်းတွေဟာလည်း အများကြီးရှိနေပါတယ်။

ဂိမ်မာများအားလုံးဟာ ယောက်ျားလေးများဖြစ်တယ်လို့ ထင်ခြင်း

ယောက်ျားနဲ့မိန်းမဆိုတဲ့နေရာမှာ သူ့နေရာနဲ့သူ တာဝန်ယူရမယ့်ကဏ္ဍတွေ အသီးသီးရှိနေပါတယ်။ ဂိမ်မာအများစုဟာ အမျိုးသားများဖြစ်တယ်ဆိုတာ ဟုတ်ပါတယ်။ ဒါပေမယ့်တစ်ကမ္ဘာလုံးအတိုင်းအတာနဲ့ဆိုရင် အမျိုးသမီးဂိမ်မာများဟာ ဂိမ်းဆော့သူလူဦးရေစုစုပေါင်းရဲ့ ၄၀ ရာခိုင်နှုန်းရှိနေတယ်ဆိုတာကို သိကြပါရဲ့လား။ ဂိမ်းဆော့ကစားခြင်းဟာ ကျား၊ မ ခွဲပေးထားတဲ့အရာမဟုတ်တဲ့အတွက် ယောက်ျားအများစုသာဂိမ်းဆော့သူများဖြစ်ကြပြီး မိန်းမများအနေနဲ့ဂိမ်းမဆော့နိုင်ဘူးလို့ တရားသေသတ်မှတ်လို့မရပါဘူး။ အားကစားကဏ္ဍလိုပဲ ကမ္ဘာနဲ့ချီပေါက်မြောက်နေတဲ့ အမျိုးသမီးဂိမ်းအဖွဲ့တွေဟာ ကိုယ့်ပတ်ဝန်းကျင်မှာတင် အများကြီးပေါ်ထွက်လာနေတာကို လေ့လာကြည့်ရင်သိရမှာပါ။

 

ဂိမ်းဆော့ခြင်းဟာ  ဦးနှောက်ကိုလေးလံထိုင်းမှိုင်းတယ်လို့ ထင်မြင်ခြင်း

ဒီသုံးသပ်ချက်ဟာ အနည်းငယ်တော့ရယ်ချင်စရာပါ။ တကယ့်တကယ်မှာဂိမ်းဆော့ခြင်းကြောင့် ဦးနှောက်ဟာပိုပြီးဖွံဖြိုးလာနိုင်တယ်၊ ပိုပြီးကြီးထွားလာနိုင်တယ်လို့ သုတေသနပြုချက်များက တရားဝင်အတည်ပြုထားပြီးသားပါ။ သက်သေအထောက်အထားနဲ့ပြောရမယ်ဆိုရင်တော့ Super Mario 64 ဂိမ်းကိုတစ်နေ့ မိနစ် ၃၀ ပေးပြီး နှစ်လကျော်ဆော့ကစားသူများဟာ မှတ်ဉာဏ်ဖွဲ့စည်းမှု၊ စနစ်ကျကျစဉ်းစားမှု၊ ကြွက်သားထိန်းချူပ်မှုနဲ့ တွေးတောကြံဆမှု အစရှိတာတွေကိုထိန်းချူပ်တဲ့ဦးနှောက်အပိုင်းတွေမှာ ဖွံဖြိုးမှုသိသိသာသာရှိလာပြီး ဂိမ်းမဆော့သူများနဲ့နှိုင်းယှဉ်ကြည့်လိုက်တဲ့အခါမှာ ဦးနှောက်ကပိုပြီး နေရာစုံအလုပ်လုပ်တာကို တွေ့ရမှာဖြစ်ပါတယ်။ အဲဒီလိုအလုပ်လုပ်နေတဲ့ဦးနှောက်ရဲ့လုပ်ငန်းဆောင်တာများဟာ ကျရောက်လာမယ့် စိတ်ရောဂါတွေ၊ စိတ်ဖိစီးမှုဝေဒနာတွေ၊ စိတ်ကစဉ့်ကလျားဖြစ်ခြင်းတွေ အစရှိတာတွေကို ပြန်လည်ချေပနိုင်တယ်လို့ သိရပါတယ်။

ဂိမ်းဆော့ခြင်းကြောင့် မိတ်ဆွေအပေါင်းအသင်းရှိမလာနိုင်တော့ဘူးလို့ ထင်ခြင်း

အဲဒီလိုယူဆချက်ပေးသူများကို ဘောင်အတွင်းကတွေးခေါ်သူများလို့ ကျွန်တော်တို့ယူဆရပါလိမ့်မယ်။ ဘာဖြစ်လို့လည်းတော့ အခုလိုမျိုးသတင်းအချက်အလက်ကို ကလစ်တစ်ချက်နှိပ်၊ ကီးဘုတ်တစ်ချက်ခေါက်လိုက်ရုံနဲ့ အချိန်နဲ့တပြေးညီသိရှိနိုင်တဲ့ခေတ်မျိုးမှာ အဲဒီလိုဟောင်းနွမ်းနေတဲ့ယူဆချက်တွေဟာ ပတ်ဝန်းကျင်ကို အဆိပ်သင့်စေပါတယ်။ တကယ်တမ်းလက်တွေ့မှာ ဂိမ်းဆော့ခြင်းကတဆင့် မိတ်ဆွေသူငယ်ချင်းပေါင်းများစွာရလာနိုင်တဲ့အပြင် အသင်းအဖွဲ့စိတ်ဓါတ်ရှိသူတွေ၊ ကိုယ်ချင်းစာနာတတ်သူတွေ၊ ကိုယ်နဲ့ဝါသနာတူ၊ အကြိုက်တူတဲ့လူတွေနဲ့ တစ်ခဏအတွင်းမှာပဲ မိတ်ဟောင်းဆွေဟောင်းတွေလို ခင်မင်ရင်းနှီးသွားနိုင်ပါတယ်။ ပလက်ဖောင်းအမျိုးမျိုးမှာ ဂိမ်းဆော့ခြင်းကနေလည်း ကိုယ်ကြိုက်တဲ့ကမ္ဘာ့နိုင်ငံ အရပ်ရပ်ကလူတွေနဲ့ ချိတ်ဆက်ပြီး မိတ်ဆွေဖြစ်သွားနိုင်ပါတယ်။ အဲဒီလိုအတွေ့အကြုံမျိုးတွေကြောင့် ကျွန်တော်တို့လို ဂိမ်မာတွေဟာ လက်တွေ့ဘဝမှာမိတ်ဖွဲ့ကောင်းသူ၊ ဆိုရှယ်ဆန်သူတွေတောင်မှ တစ်ခါတစ်ရံဖြစ်နေတတ်ကြပါတယ်။ ကိုယ်နဲ့ခင်မင်ရင်းနှီးသူတွေနဲ့ အွန်လိုင်းပေါ်မှာအတူတူ ဂိမ်းတစ်ပွဲမှမဆော့ဘူးရင် မင်း ပျော်ရွှင်မှုအစစ်အမှန်ဆိုတာကို ဘာလည်းမသိသေးဘူးဆိုတဲ့ စကားတောင်ရှိပါသေးတယ်။

ဂိမ်းဆော့ခြင်းဟာ အချိန်ကိုဖြုန်းနေတဲ့လုပ်ရပ်လို့ ယူဆခြင်း

ကျွန်တော်တို့အားလုံးနဲ့ရင်းနှီးမယ့်စကားလေးလို့ ထင်ပါတယ်။ ဒါပေမယ့်တကယ်တမ်းမှာ အဲဒီအဆိုဟာ ကိုယ့်လုပ်ရပ်တွေ တကယ်တမ်းဘာဖြစ်နေသလဲဆိုတာမမြင်ပဲ အခြားသူတွေရဲ့လုပ်ရပ်ကို မကောင်းဘူးထင်တတ်တဲ့အမြင်မျိုးဖြစ်နေပါတယ်။ ဆိုကြပါစို့၊ ကျွန်တော်တို့ဟာ ဘောလုံးအားကစားကိုစိတ်ဝင်စားသူတွေဖြစ်ကြတယ်၊ အိမ်အောက်မှာပဲဖြစ်ဖြစ်၊ လမ်းရှေ့မှာပဲဖြစ်ဖြစ် တစ်နေ့ကိုအချိန်နှစ်နာရီလောက်ပေးပြီး ဘောလုံးနဲ့ခြေထောက်ထိလိုက်ရမှ နေသာထိုင်သာရှိတယ်ဆိုရင် လူတွေဘောလုံးအားကစားမှာစိတ်ပါဝင်စားခြင်းဟာ အချိန်ကိုဖြုန်းတီးရာကျတယ်လို့ ယူဆကြမှာပါလား။ တကယ်တမ်းမှာ ဂိမ်းကစားခြင်းဆိုတာ ကိုယ့်ရဲ့ဝါသနာအရ ကိုယ့်ရဲ့လူနေမှုဘဝပုံစံနဲ့ ကိုယ့်ဘဝရဲ့လွတ်လပ်တဲ့ရွေးချယ်မှုပဲဖြစ်ပါတယ်။ တစ်ခါတလေဆိုရင် ကျွန်တော်တို့ဟာ သုံးလေးနာရီချီတဲ့ရုပ်ရှင်ဇာတ်ကားကြီးတွေ၊ အပိုင်းရေများပြားလှတဲ့စီးရီးတွဲတွေ အစရှိတာတွေမှာတောင် မြောပါပြီးဈာန်ဝင်စားစွာကြည့်တတ်ကြပါတယ်။ ဒါပေမယ့်ကိုယ်စိတ်ပါတဲ့အရာတစ်ခုကိုလုပ်လို့ကုန်ဆုံးသွားတဲ့အချိန်တွေဟာ ကိုယ်ဖြုန်းတဲ့အချိန်တွေမဟုတ်ပါဘူး။ ရည်ရွယ်ချက်ရှိရှိစိတ်ကျေနပ်မှုအပြည့်နဲ့ အသုံးချလိုက်တဲ့အချိန်တွေဖြစ်ပါတယ်။

ဂိမ်းဆော့ခြင်းကနေ ဘဝတက်လမ်းနဲ့ အလုပ်အကိုင်မတွေ့နိုင်တော့ဘူးလို့ ထင်မြင်ခြင်း

ဒီလိုယူဆချက်မျိုးကိုတော့ ကိုယ့်ဘာသာကိုယ်ပဲ ဥပမာပြန်ပေးပြီး ပြန်လည်ချေပချင်ပါတယ်။ ကျွန်တော်သမိုင်းကြောင်းတွေမှာစိတ်ဝင်စားတတ်တဲ့စိတ်ကို ဂိမ်းတွေကပျိုးပေးခဲ့တာပါ။ ကွဲပြားတဲ့သာသာစကားကိုသင်ယူလေ့လာချင်စိတ်တွေပြင်းပလာအောင် ဂိမ်းတွေကနှိုးဆော်ပေးခဲ့သလို ကိုယ်သိတဲ့အကြောင်းအရာ၊ သတင်းအချက်အလက်နဲ့ ဗဟုသုတကိုပြန်လည်မျှဝေပေးလိုတဲ့စိတ်ကိုဖွံဖြိုးလာအောင် ဗီဒီယိုဂိမ်းများကမျိုးစေ့ချပေးခဲ့တာပါ။ လက်ရှိမှာဆိုရင် ကျွန်တော်ဟာ ဘာသာပြန်တစ်ယောက်၊ ဆောင်းပါးရှင်တစ်ယောက်၊ ဂိမ်းပတ်ဝန်းကျင်ကိုအကျိုးပြုသူတစ်ယောက်အဖြစ်နဲ့ ကိုယ့်ဘဝနဲ့ကိုယ်ကောင်းကောင်းရပ်တည်နိုင်တဲ့ လူငယ်တစ်ယောက်ဖြစ်လာခဲ့ပါပြီ။ ဥပမာပေးရမယ်ဆိုရင် YouTube ချန်နယ်မှာ subscriber သန်းပေါင်း ၅၈ သန်းနဲ့ ကမ္ဘာ့ subcriber အများဆုံးဆွီဒင်နိုင်ငံသား Felix Arvid Ulf Kjellberg aka Pewdiepie ဟာလည်း ဂိမ်းများကိုစတင်ဆော့ရင်းနဲ့ပဲ သူ့ဘဝရဲ့လမ်းကိုရှာဖွေတွေ့ရှိခဲ့ပြီး ကမ္ဘာ့စံချိန်တွေကိုပါချိုးနိုင်ခဲ့တာပါ။ ဒီမှာတစ်ချက်ပြောချင်တာက ကိုယ်လုပ်တဲ့အလုပ်ကနေ ဘယ်လိုအရာကိုယူပြီး ဘယ်လိုအရာတွေကိုပယ်မလဲဆိုတာနဲ့ ဘဝမှာရှေ့ဆက်ချင်တဲ့စိတ်၊ ကြီးပွားချင်တဲ့စိတ်ကပဲအရေးကြီးတာပါ။ အခုဆိုရင် ဒီအချက် ၇ ချက်ကိုဖတ်ပြီး တချို့လူတွေ ဗီဒီယိုဂိမ်းအပေါ်မှာမြင်နေတဲ့အမြင်တွေကို ရှင်းလင်းပေးနိုင်လိုက်မယ်လို့ မျှော်လင့်မိပါတယ်။ အခုလိုဆောင်းပါးမျိုးကိုအလျင်းသင့်ရင်သင့်သလို စာတမ်းသေချာပြုစုပြီး ရေးပေးသွားမယ်လို့ ဒီကနေတဆင့်ပြောရင်း ဂိမ်းနဲ့မရင်းနှီးသူများ ဗီဒီယိုဂိမ်းအပေါ်သုံးသပ်ထားတဲ့ အယူအဆအလွဲ ၇ ခုကို အားလုံးလိုရင်းတိုရှင်း နားလည်သွားအောင် ပြန်မျှဝေလိုက်ရပါတယ်။

Yan
Ref: Gameranx, YouTube,

ထွက်ရှိမှုသက်တမ်းနှစ် ၂၀ ပြည့်အထိမ်းအမှတ်မှာ Open World အနေနဲ့ ထွက်လာပြန်ဦးမယ့် One Piece: World Seeker ဂိမ်း

၁၉၉၇ ခုနှစ်၊ ဂျူလိုင်လ ၂၂ ရက်နေ့က စတင်ထွက်ရှိခဲ့တဲ့ One Piece anime ဟာ အခုဆိုရင် ဆယ်စုနှစ်နှစ်ခုကိုဖြတ်ကျော်ပြီး ယခု ၂၀၁၇ ခုနှစ်မှာ သက်တမ်း ၂၀ တင်းတင်းပြည့်ခဲ့ပြီဖြစ်ပါတယ်။ လူကြီးလူငယ်မရွေး အခုအချိန်အထိ မျှော်တလင့်လင့်နဲ့ကြည့်ရှုနေရသေးတဲ့ One Piece anime ဇာတ်လမ်းတွဲဟာ ဂျပန်နိုင်ငံမှာတင်မက နိုင်ငံတကာအတိုင်းအတာနဲ့ပါ ပေါက်မြောက်နေတဲ့ anime ဇာတ်လမ်းတွဲလည်းဖြစ်ပါတယ်။ အဲဒီအချိန်တုန်းက ခေတ်ပြိုင်တွေဖြစ်တဲ့ Naruto, Bleach, One Piece ဂျပန်ကာတွန်းဇာတ်လမ်းတွဲတွေကို 90 born အားလုံးလိုလိုသိကြပြီး စီးရီးတစ်ခုမဟုတ်တစ်ခုကိုတော့ ထဲထဲဝင်ဝင်ကြည့်ဖူးကြပါတယ်။ အခုအချိန်မှာ ထွက်ရှိခဲ့တာသက်တမ်း ၂၀ ပြည့်သွားတဲ့ One Piece anime ဟာ သက်တမ်း ၂၀ ပြည့်အထိမ်းအမှတ်အနေနဲ့ One Piece ဂိမ်းတစ်ခုကိုထုတ်ပေးတော့မယ်လို့ မကြာသေးခင်ကမှ အားလုံးကို အတိအလင်းပြောကြားခဲ့ပါတယ်။ One Piece စီးရီးရဲ့နောက်ဆုံးဂိမ်းအနေနဲ့ ၂၀၁၆ ခုနှစ်က One Piece: BURNING BLOOD ဆိုတဲ့ဂိမ်းကိုထုတ်ပေးခဲ့ပြီး အချိန်ကာလတစ်နှစ်အကြာ ၂၀၁၇ မှာတော့ သက်တမ်း ၂၀ ပြည့်အနေနဲ့ မကြာတော့မယ့် ၂၀၁၈ ခုနှစ်အတွင်းမှာ Bandai Namco ကိုယ်တိုင်ဦးစီးပြီး One Piece: World Seeker ဆိုတဲ့ဂိမ်းကို ထုတ်ပေးတော့မှာဖြစ်ပါတယ်။ နောက်ဆုံးထွက်ခဲ့တဲ့ BURNING BLOOD ဂိမ်းဟာ Fighting ဂိမ်းအမျိုးအစားဖြစ်ပြီး ဒီတစ်ခေါက်မှာတော့ Open World ပုံစံဖြစ်တဲ့ One Piece ဂိမ်းကို စီးရီးပရိသတ်များပါမက ဂိမ်မာများကပါ ကိုယ်တိုင်ကိုယ်ကျဝင်ရောက်ဆော့ကစားရတော့မှာဖြစ်ပါတယ်။ ဂိမ်းအကြောင်း၊ အချက်အလက်တွေကို ဘာမှအသေးစိတ်မသိရသေးပေမယ့် Bandai Namco ဟာ ဂိမ်းတွင်း Screenshot တွေကိုအခုလိုထုတ်ဖော်ပြသခဲ့ပါတယ်။

One Piece: World Seeker ဂိမ်းတွင်း Screenshot တွေကိုကြည့်ပြီး ဘယ်လိုဂိမ်းအမျိုးအစားဖြစ်လာနိုင်မလဲဆိုတာကို ကျွန်တော်တို့တစ်ချက်သုံးသပ်ကြည့်ရအောင်။

ဒီ Screenshot တွေကြည့်ပြီးတော့ အခုလာမယ့် One Piece: World Seeker ဂိမ်းက အရင်စီးရီးတုန်းကဂိမ်းတွေနဲ့ လုံးဝမတူတာတော့အမှန်ပါပဲ။ ဂိမ်းလောကနဲ့ပတ်သတ်ရမယ်၊ Quest တွေလုပ်ရမယ်၊ ပတ်ဝန်းကျင်မျိုးစုံမှာကျင်လည်သွားလာရမယ် ပြီးတော့ လျှို့ဝှက်စွာလုပ်ဆောင်ရမယ့်အခန်းကဏ္ဍတွေလည်းပါတယ်ဆိုတာ screenshot တွေအရသိနိုင်ပါတယ်။ နောက်ပြီး ဂရပ်ဖစ်ရုပ်ထွက်၊ ဂိမ်းကစားပုံ၊ ဖန်တီးထားတဲ့ဂိမ်းလောကပတ်ဝန်းကျင်ကိုကအစအားလုံး smooth အရမ်းဖြစ်လွန်းပြီး အားလုံးနဲ့ကွဲထွက်နေပါတယ်။ သက်တမ်း ၂၀ ပြည့်နှစ်အထိမ်းအမှတ်အနေနဲ့ ၂၀၁၈ ခုနှစ်မှာထွက်လာမယ့် One Piece ဂိမ်းအကြောင်းကို Bandai Namco ကဦးစီးဦးဆောင်ဖန်တီးနေတယ်လို့သိရပြီး အခြားအသေးစိတ်တွေကိုတော့ထုတ်ပြန်ကြေညာခြင်းမရှိသေးပါဘူး။ ၂၀၁၈ ခုနှစ်ဟာ ဂိမ်မာများအားလုံးစောင့်မျှော်ရတဲ့ခုနှစ်လည်းဖြစ်၊ မျိုးဆက်သစ်ဂိမ်းပေါင်းများစွာထွက်ရှိမယ့် ခုနှစ်လည်းဖြစ်တဲ့အတွက် အခုအချိန်ကတည်းက အားလုံးမျှော်လင့်ချက်တွေထားပြီး ကိုယ်စီကိုယ်စီရင်ခုန်နေကြပြီလို့ထင်ပါတယ်။ ဒီတော့ ဒီဂိမ်းမှာဘယ်လိုနေရာတွေပါလာမလဲ၊ ဘယ်လိုဇာတ်ကောင်တွေပါလာနိုင်လဲ ပြီးတော့ ဘယ်လိုမျိုးဇာတ်ဝင်ခန်းတွေကိုတွေ့မြင်ရမလဲ အစရှိတာတွေကို One Piece စီးရီးပရိသတ်များရော၊ ဂိမ်မာများပါ ရင်ခုန်စိတ်လှုပ်ရှားစွာနဲ့ စောင့်ဆိုင်းနိုင်အောင်လို့ ထွက်ရှိခဲ့သမျှ  screenshot တွေနဲ့ ဂိမ်းအကြောင်းလေးကို ဒီကနေပြန်လည်မျှဝေရင်း ၂၀၁၈ ခုနှစ်ရဲ့ One Piece: World Seeker ဂိမ်းကို ကျွန်တော်တို့စိတ်ရှည်လက်ရှည်စောင့်မျှော်ကြတာပေါ့ဗျာ။

Yan
Ref: destructoid, trueachievements

၁၂၇၄ ခုနှစ် ဂျပန်၊ မွန်ဂိုစစ်သမိုင်းဇာတ်အိမ်ထဲက သေရွာပြန်စစ်သူရဲကောင်းတစ်ယောက်ရဲ့ကလဲ့စား Ghost Of Tsushima

၁၂၇၄ ခုနှစ်ကနေ ၁၂၈၁ ခုနှစ်အတွင်းဖြစ်ခဲ့တဲ့ ဂျပန်၊ မွန်ဂိုစစ်သမိုင်းကြောင်းကို အားလုံးတစ်စွန်းတစလောက်တော့ ကြားဖူးကြမှာပါ။ စစ်ပိုင်းဆိုင်ရာနည်းပညာတွေ၊ လက်နက်တွေ မဖွံဖြိုးခင်ကတည်းက ခွန်အားကြီးမားလှတဲ့မွန်ဂိုစစ်တပ်တွေဟာ တိုက်ပွဲတွေအတွင်းမှာ မော်ဒန်ဆန်တဲ့စစ်လက်နက်တွေကို အသုံးချနေကြပါပြီ။ မြေအောက်ဗုံးတွေ၊ မီးကျည်အမြောက်ဆံတွေ၊ အစရှိတဲ့အဖျက်စွမ်းအားကြီးမားလှတဲ့ စစ်လက်နက်တွေအပါအဝင် ရဲရင့်ပြီးကြမ်းကြုတ်တဲ့စစ်သည်တွေနဲ့တည်ထောင်ထားတဲ့ မွန်ဂိုအင်ပါယာကြီးရဲ့အရှိန်အဝါဟာ ၁၂ ကနေ ၁၃ ရာစုဝန်းကျင်တဝိုက်အထိ မငြှိမ်းနိုင်တဲ့တောမီးကြီးလို ကမ္ဘာ့တစ်ဝိုက်မှာကျယ်ပြန့်ကြီးမားခဲ့ပါတယ်။ မွန်ဂိုအင်ပါယာရွှေခေတ်ကမ္ဘာ့စစ်သမိုင်းမှာ မွန်ဂိုတွေရဲ့နယ်မြေအုပ်စိုးထားနိုင်မှုဟာ အဆင့် ၂ ရှိခဲ့ပြီး ကမ္ဘာ့မြေဧရိယာတစ်လုံးရဲ့ ၁၂ ရာခိုင်နှုန်းရှိခဲ့ပါတယ်။ မွန်ဂိုအင်ပါယာကြီးရဲ့အင်အားကြီးမားမှုကိုမြင်သာအောင်ပြောရမယ်ဆိုရင် မွန်ဂိုတွေရဲ့အင်အားကြီးမားမှုဟာ ၁၂၂၇ ခုနှစ်မှာ ပစိဖိတ်သမုဒ္ဒရာကနေ ကတ်စ်ပီယင်ပင်လယ် (ပင်လယ်နက်) အထိ နယ်မြေတောက်လျှောက်ကို စစ်အင်အားနဲ့အုပ်စိုးထားနိုင်တဲ့အထိဖြစ်ခဲ့ပြီး အဲဒီအတိုင်းအတာပမာဏဟာ ရိုမန်အင်ယာပါနဲ့ မူစလင်စော်ဘွားတွေထက်နှစ်ဆကြီးမားပါတယ်။

တစ်ချိန်ကမွန်ဂိုအင်ပါယာကြီးဟာ အရှေ့တိုင်းနိုင်ငံများဖြစ်တဲ့ တရုတ်၊ ကိုရီးယား၊ တိဘက်၊ အိန္ဒိယနဲ့ အရှေ့တောင်အာရှနိုင်ငံများကို ဝင်ရောက်ကျူးကျော်ပြီး အချိန်အတိုင်းအတာတစ်ခုအထိသိမ်းပိုက်အုပ်ချူပ်ခဲ့သလို ဥရောပတိုက်နဲ့အနောက်တိုင်းနိုင်ငံများအထိပါ ထိုးဖောက်သိမ်းပိုက်ထားနိုင်တဲ့အထိ အင်အားကြီးမားခဲ့ဖူးပါတယ်။ ၁၃ ရာစုမှာဥရောပတိုက်နိုင်ငံများဟာလည်း အထိုက်အလျောက်အင်အားကြီးနေပြီဖြစ်တဲ့အတွက် မွန်ဂိုအင်ပါယာအနေနဲ့ အရှေ့တိုင်းတစ်တိုင်းလုံးနီးပါးကိုအုပ်စိုးထားတဲ့အပြင် ဥရောပတိုက်အလယ်ပိုင်း အထိတောက်လျှောက်ထိုးဖောက်ပြီး အနောက်နိုင်ငံများကို ကျူးကျော်သိမ်းပိုက်ဖို့ဆိုတဲ့ကိစ္စဟာ တကယ်တမ်းစဉ်းစားကြည့်မယ်ဆိုရင် တော်တော်လေးကိုမလွယ်တဲ့ကိစ္စပါ။ အဲဒီလို ၁၃ ရာစုဝန်းကျင်တစ်ဝိုက်ရဲ့ကျူးကျော်သိမ်းပိုက်မှုတိုင်းမှာ အောင်ပွဲဆက်တိုက်ခံလာခဲ့တဲ့မွန်ဂိုတွေဟာ ၁၂၇၄ ခုနှစ်မှာ ဂျပန်ပြည်ဆူရှီမာကျွန်းစုကို ကျူးကျော်တိုက်စစ်ဆင်ခဲ့ပါတယ်။ ဒါပေမယ့် ၁၂၇၄ ခုနှစ်မှာတစ်ခါ၊ ၁၂၈၁ ခုနှစ်မှာတစ်ခါ၊ မွန်ဂိုတွေရဲ့ဂျပန်ပြည်ကျူးကျော်တိုက်စစ်ဆင်မှုတွေဟာ လုံးဝမအောင်မြင်ခဲ့ပါဘူး။ အခုဒီ Ghost Of Tsushima ဂိမ်းဟာ အဲဒီကာလတစ်ဝိုက်က စစ်သမိုင်းပေါ်မှာအခြေခံထားတဲ့ သေရွာပြန်ဂျပန်ဆာမူရိုင်းတစ်ယောက်ရဲ့ကလဲ့စားကိုအခြေခံထားတာဖြစ်ပါတယ်။ ဒီတော့ Ghost Of Tsushima ဂိမ်းဟာ ဘယ်လိုမျိုးဂိမ်းဖြစ်မလဲ? ဘယ်လောက်တောင်မှသမိုင်းကြောင်းကိုထင်ဟပ်မလဲ? စိတ်ဝင်စားဖို့ကောင်းတဲ့အချက်တွေနဲ့ သိရှိရသလောက်ကို ဒီကနေပြန်လည်မျှဝေလိုက်ရပါတယ်။

၁၂၇၄ ခုနှစ် ဂျပန်ဆူရှီမာကျွန်းကို မွန်ဂိုတပ်တွေရဲ့ထိုးဖောက်တိုက်စစ်ဆင်မှု

ဂိမ်းရဲ့ဇာတ်အိမ်ကို ၁၃ ရာစုမှာတည်ထားတာဖြစ်ပြီး ၁၃ ရာစုဟာအနောက်တိုင်းမှာတော့ medieval period ကာလအတွင်းဖြစ်ပါတယ်။ အဲဒီအချိန်ကာလမှာမွန်ဂိုအင်ပါယာဟာ ကမ္ဘာ့အင်အားအကြီးဆုံးနိုင်ငံတွေထဲကတစ်ခုဖြစ်ပြီး ကမ္ဘာတဝိုက်ကနိုင်ငံတွေနဲ့ နယ်မြေတွေအားလုံးကို အလုံးအရင်းနဲ့ဝင်ရောက်ကျူးကျော်သိမ်းပိုက်ခဲ့တာပါ။ ဂျပန်ပြည်၊ ဆူရှီမာကျွန်းကို မွန်ဂိုတွေရဲ့ကျူးကျော်မှုဟာ ၁၂၇၄ ခုနှစ်မှာတစ်ခါ၊ ၁၂၈၁ ခုနှစ်မှာတစ်ခါဖြစ်ပွားခဲ့ပေမယ့် kamikaze ဆိုတဲ့လေမုန်တိုင်းတွေကြောင့် သဘောၤတွေတပ်ပျက်ပြီး နှစ်ကြိမ်လုံးမအောင်မြင်ခဲ့ပါဘူး။ အဲဒီအချိန်ကစပြီး နတ်ဘုရားတွေဖန်တီးပေတဲ့လေမုန်တိုင်းဆိုတဲ့ Kamikaze ဆိုတဲ့ဝေါဟာရရဲ့ အသုံးအနှုန်းဟာကြီးမားကျယ်ပြန့်လာတာပါ။ အဲဒီအကြောင်းတွေကို ဒီဂိမ်းထဲမှာရဲစွမ်းသတ္တိအပြည့်ရှိတဲ့ သစ္စာတော်ခံဆာမူရိုင်းတစ်ယောက်အနေနဲ့ ဂိမ်မာများကကိုယ်တိုင်ကိုယ်ကျဝင်ရောက် လေ့လာပြီးဆော့ကစားရမှာပါ။

မြေရှင်ပဒေသရာဇ်ဂျပန်ခေတ်စနစ် (Feudal Japan) ကာလနဲ့ Open World ဂိမ်းစနစ်

ဂိမ်းရဲ့အေ့ကြာင်းကိုတော့ ဘာမှတိတိကျကျမသိရသေးပေမယ့် Sucker Punch ဂိမ်းကုမ္မဏီဟာ ဂိမ်မာများကြားမှာ စိတ်ဝင်စားဖို့ကောင်းတဲ့အကြောင်းအရာတွေကိုအစပျိုးလာပါတယ်။ Feudal ဂျပန်ခေတ်မှာဇာတ်အိမ်တည်ထားတာဖြစ်တဲ့အတွက် ဂျပန်ပြည်နိုင်ငံရေးအခြေအနေဟာလည်း အဲတုန်းကမတည်ငြိမ်ဘဲ အမျိုးအနွယ်အလိုက် နန်းသိမ်းမှုတွေဆက်တိုက်ဖြစ်ပေါ်နေခဲ့တာပါ။ ဒါပေမယ့်ဆာမူရိုင်းဆိုတဲ့ဂျပန်စစ်သူရဲကောင်းတွေကတော့ နိုင်ငံရေးထဲဝင်ရောက်မစွက်ဖက်ဘဲ နိုင်ငံထဲကျူးကျော်ဝင်ရောက်လာမယ့်ရန်သူတပ်တွေကို အမြစ်ပြတ်ချေမှုန်းမယ်ဆိုတဲ့စိတ်နဲ့ ခိုင်မာတဲ့သစ္စာတရားကိုစောင့်ထိန်းသူစစ်သူရဲကောင်းတွေဖြစ်ပါတယ်။ ဂိမ်းဟာ Open World ဖြစ်မယ်လို့သိရပြီး ထွေလာအရဆိုရင်တော့မွန်ဂိုစစ်ဗိုလ်တစ်ယောက်ဟာ ကျရှုံးနေတဲ့ဆာမူရိုင်းတစ်ယောက်ကို အညံ့ခံခိုင်းနေတာပါ။ ဇာတ်ကြောင်းတွေကဘယ်လိုမျိုးဖြစ်လာမလဲဆိုတာ လုံးဝကိုစိတ်ဝင်စားစရာကောင်းနေပါတယ်။

သေရွာပြန်စစ်သူရဲကောင်းအဖြစ် မွန်ဂိုတပ်တွေကိုကလဲ့စားချေမယ့် ဆာမူရိုင်း

စစ်အင်အားမမျှပဲအညံ့ခံလိုက်ရပေမယ့် ကျရှုံးနေတဲ့ဆာမူရိုင်းတစ်ယောက်ရဲ့စိတ်ဓါတ်ဟာ ဘယ်သောအခါမှရန်သူကိုဦးညွှတ်ဒူးထောက်လေ့မရှိတာကို ထွေလာမှာတွေ့မြင်ရမှာပါ။ အဲဒီလိုဦးချိုးခံလိုက်ရတဲ့ဆာမူရိုင်းတစ်ယောက်အနေနဲ့ သေရွာကနေပြန်လည်နိုးထလာပြီး အင်အားကြီးမားလှတဲ့မွန်ဂိုတပ်တွေကို တစ်ကိုယ်တည်း ဘယ်လိုမျိုးကလဲ့စားချေမလဲဆိုတာကို ဂိမ်မာများကို Sucker Punch ကလှလှပပကြီးတင်ဆက်သွားမယ်လို့ ကျွန်တော်ကတော့မျှော်လင့်မိပါတယ်။ ထွေလာအဆုံးပိုင်းမှာပြသထားတဲ့ တိုက်ခိုက်မှုစနစ်တွေအရရော၊ ဖန်တီးထားမှုပုံစံ၊ လောကဝန်းကျင်အစရှိတာတွေဟာ အဲဒီခေတ်သမိုင်းကိုထပ်ဟပ်တဲ့အပြင် လုံးဝကိုရင်ခုန်စရာကြီးပါပဲ။ Ghost Of Tsushima ထွေလာကို Playstation ချန်နယ်ကတင်ထားတဲ့အတွက် PS4 exclusive ဂိမ်းလို့တော့ လောလောဆယ်ကောက်ချက်ချနိုင်ပါတယ်။ ဘယ်လိုမျိုးဂိမ်းကစားပုံစံဖြစ်မလဲ? ဘယ်လိုမျိုးရန်သူတွေနဲ့ကြုံတွေ့ရမလဲ အစရှိတာတွေကိုတော့ လောလောဆယ်မှာ ဘာမှမပြောပြထားသေးပါဘူး။

စစ်သမိုင်းကြောင်းကိုပြန်လည်ထပ်ဟပ်မယ့် Ghost Of Tsushima ဂိမ်းနဲ့အနှစ်ချူပ်

Slyooper, Infamous အစရှိတဲ့နာမည်ကျော်ဂိမ်းတွေနောက်က ဖန်တီးရှင် Sucker Punch ဟာ ဒီတစ်ခေါက်မှာလည်း Ghost Of Tsuhima ဂိမ်းနဲ့ပရိသတ်တွေရဲ့သိချင်စိတ်ကို နိုးဆွလိုက်ပြန်ပါပြီ။ Sucker Punch ကထုတ်တဲ့ဂိမ်းတွေထဲမှာ ၂၀၁၄ ခုနှစ်က Infamous: First Light ဟာနောက်ဆုံးဖြစ်ပြီး အခုဒီတစ်ခါမှာတော့ ၂၀၁၇ အကုန်မှာ Ghost Of Tsushima ဂိမ်းကို Paris Game Week 2017 မှာ စတင်ထုတ်ဖော်ပြသခဲ့တာပါ။ ထွေလာကိုကြည့်လိုက်တာနဲ့ ဘယ်လောက်တောင်မှဇာတ်အိမ်ခိုင်မယ်၊ ဇာတ်ရှိန်တတ်မယ်၊ ဂိမ်းကစားပုံစံတွေရောထွေးထားမယ်ဆိုတာ သိနိုင်ပါတယ်။ ထွေလာကတော့ စစ်သမိုင်းကြောင်းရုပ်ရှင်တစ်ခုရဲ့ထွေလာကိုကြည့်နေရသလို ကြောက်ခမန်းလိလိပါ။ ကိုယ်ဟာစစ်မြေပြင်ထဲက ကျရှုံးခဲ့တဲ့ဆာမူရိုင်းတစ်ယောက်အဖြစ်နဲ့ ဂျပန်ပြည်ကိုကာကွယ်မဲ့စိတ်၊ ကျူးကျော်သူတွေကိုချေမှုန်းလိုတဲ့စိတ်၊ ကလဲ့စားချေလိုစိတ်တွေပြင်းပနေပြီး လူသားတစ်ယောက်ရဲ့စိတ်အားပြင်းပမှုဘောင်ကိုကျော်လွန်သွားတဲ့ သေရွာပြန်ဆာမူရိုင်းကောင်းတစ်ယောက်ဖြစ်ရဲ့ဇာတ်ကြောင်းပါ။ ဂိမ်းနဲ့ပတ်သက်ပြီးထွေလာအပြင် ဘာကိုမှမသိရသေးတဲ့အတွက် ၂၀၁၈ နှစ်ရောက်မှသာ အတိအလင်းသိရမယ်လို့ ဂိမ်းပညာရှင်များကောက်ချက်ချကြပါတယ်။ ဒီတော့ Ghost Of Tsushima ဂိမ်းနဲ့ပတ်သက်ပြီး ဂိမ်မာတွေရဲ့ထင်မြင်ယူဆချက်တွေလည်း ဖလှယ်လို့ရအောင်လို့ သိရှိရသမျှဂိမ်းအကြောင်းတွေကို ကမ္ဘာ့စစ်သမိုင်းကြောင်းဆက်စပ်ပြီး အချက်အလက်လေးတွေ ဒီကနေပြန်လည်မျှဝေလိုက်ရပါတယ်။

Yan
Ref: trustedreivews, polygon, wikia

အကောင်းဆုံးဂိမ်းအတွေ့အကြုံတွေခံစားနိုင်အောင် ကိုယ့် PC ဂရပ်ဖစ် setting ကို ဘယ်လိုချိန်ညှိကြမလဲ?

ကျွန်တော်တို့ဂိမ်မာများဟာ ဂိမ်းတွေသာတောက်လျှောက်ဆော့ဖို့ စိတ်ပါခဲ့ကြတာပါ။ Input, output ကေဘယ်လ်ကြိုးတွေမပြောနဲ့၊ တစ်ချို့ဆိုရင် ဘယ်ပလက်ပေါက်က ဘယ်ကိုသွယ်လိုက်ရင် ဘယ်ရောက်တယ်ဆိုတာတောင် မသိခဲ့ကြပါဘူး။ ကျွန်တော်လည်းအဲဒီလိုသူတစ်ယောက်ဖြစ်ခဲ့ပေမယ့် ဂိမ်းဆော့ချင်တဲ့စိတ်ကပြင်းပြတော့ ကိုယ့်ဘာသာကိုယ်လေ့လာရင်းပဲ ဂိမ်းတစ်ခုကို ဘယ်လို install လုပ်ရမယ်၊ rar ဖိုင်တွေအလုပ်လုပ်ပုံ၊ crack ဖြည်တာတွေနဲ့ bug ရှင်းတာတွေ သို့လောသို့လောတွေကို လုပ်တတ်ခဲ့တာပါ။ Playstation နဲ့ Xbox ပလက်ဖောင်းတွေထက် PC ပလက်ဖောင်းမှာအဆော့များတဲ့သူမို့ ဂိမ်းတစ်ခုကိုဆော့ချင်ပြီဆို ကိုယ့်စက်နဲ့ ကိုယ့်ဆော့ချင်တဲ့ဂိမ်းကိုက်ညီမှုရှိမရှိဆိုတာ အရင်ကြည့်ပြီးမှ ဂိမ်းတွေကို install ရပါတယ်။ အလွန်အမင်းဆော့ချင်နေတဲ့ဂိမ်းဖြစ်နေပေမယ့်လည်း ကိုယ့်ကွန်ပျူတာ specs နဲ့မကိုက်လို့ ကသိကအောင့်ဖြစ်ရတဲ့ ခံစားချက်ကို PC ဂိမ်မာတိုင်းကြုံဖူးကြမှာပါ။ ကိုယ်တိုင်လည်း PC ဂိမ်မာတစ်ယောက်ဖြစ်သလို PC ဂိမ်းတွေကိုဆော့နေသူမို့ ကိုယ်ဂိမ်းကစားနေတဲ့အချိန်မှာ အကောင်းဆုံးဂိမ်းတွင်းအတွေ့အကြုံတွေခံစားနိုင်အောင်လို့ ကိုယ့် PC ဂရပ်ဖစ် setting ကို ဘယ်လိုချိန်ညှိကြမလဲဆိုတာကို setting အချက်လေးတွေနဲ့တကွ ဒီကနေပြန်မျှဝေလိုက်ရပါတယ်။

Frame Per Second (FPS)

FPS ဆိုတာ First Person Shooter ကိုပြောတာတော့မဟုတ်ပါဘူး၊ သူ့ရဲ့အဓိပ္ပါယ်အရှည်က Framerate Per Second ဖြစ်ပါတယ်။ တိုက်ရိုက်ဘာသာပြန်မယ်ဆိုရင်တော့ စက္ကန့်အမျှလှုပ်ရှားမှုဘောင်ပေါ့ဗျာ။ Frame ကိုဘောင်လို့သတ်မှတ်ကြည့်ကြမယ်ဆိုရင် အဲဒီ frame ဘောင်တွေဟာ ကျွန်တော့်တို့ PC မော်နီတာဖန်သားပြင်ကထုတ်ပေးနိုင်တဲ့ စက္ကန့်အလျောက်ဂိမ်းလှုပ်ရှားမှုတွေပါ။ ဒီတော့ ဂိမ်မာတွေ အလွယ်သတ်မှတ်နိုင်တာက FPS ပိုများရင်ဂိမ်းကပိုရုပ်ထွက်ကောင်းမယ်၊ FPS လျှော့နေရင်ရုပ်ထွက်အားနည်းနေတယ်၊ setting တွေပြန်ညှိရမယ်၊ အဲသဘောပါ။ သာမန်ကြည်လင်ပြတ်သားတဲ့ FPS နှုန်းထားသတ်မှတ်ချက်ကတော့ 60 ဖြစ်ပြီး တစ်ချို့ဂိမ်းတွေမှာ FPS ကဏ္ဍဟာ တကယ်တမ်း In-game setting ထဲမှာပါလေ့ပါထမရှိပါဘူး။

Vertical Sync (V-Sync) နဲ့ Refresh Rate

သက်သက်မော်နီတာတစ်လုံးနဲ့ ဂိမ်းစက်တွဲထားတဲ့ console တွေဖြစ်တဲ့ Playstation နဲ့ Xbox ပလက်ဖောင်းဂိမ်မာများကတော့ ဒီအချက်နဲ့သက်ဆိုင်မှုသိပ်မရှိပါဘူး။ ဒါပေမယ့် ကျွန်တော့်တို့လို PC ဂိမ်မာများအတွက် ဒီ Vertical Sync ဟာ ဂိမ်းတစ်ခုလုံးကောင်းကောင်း run နိုင်ဖို့ အရေးပါတဲ့အချက်က ပါဝင်နေပါတယ်။ V-Sync ဟာ ဘာကိုဆိုလိုသလည်းဆိုတော့ ကျွန်တော်တို့ဖန်သားပြင်ကထုတ်ပေးနိုင်တဲ့စက္ကန့်အလျောက် frame နှုန်းတွေကို ဂိမ်းရုပ်ထွက် refresh နှုန်းနဲ့ကိုက်ညှိပေးထားတဲ့ စနစ်ပဲဖြစ်ပါတယ်။ ဥပမာပြောရမယ်ဆိုရင် 60hz frame ပဲထုတ်ပေးနိုင်တဲ့မော်နီတာဟာ တစ်စက္ကန့်မှာအများဆုံး 60 frame ပဲထုတ်ပေးနိုင်မှာဖြစ်တဲ့အတွက် တစ်ချို့  high specs ဂိမ်းတွေရဲ့ frame နှုန်းဟာ ကိုယ့်မော်နီတာရဲ့ထုတ်ပေးနိုင်နှုန်းထက်ပိုများသွားတဲ့အခါ ကင်မရာလှည့်လိုက်တဲ့အခါ မှုန်ဝါးပြီးလေးသွားတာကို ခဏတာခံစားရမှာပါ။ ဒါပေမယ့် V-Sync ဟာမော်နီတာနဲ့ဂိမ်းရုပ်ထွက် framerate ကို lock လုပ်ပြီးထိန်းညှိပေးထားတာမို့ ရုပ်ထွက်ပိုခံစားချင်ကြတဲ့ဂိမ်မာများကတော့ အမြဲတမ်း disable လုပ်ထားတတ်ကြပါတယ်။ အမြင့်စား high end PC များကတော့ကြိုက်သလိုချိန်ညှိနိုင်ပါတယ်၊ ဒါပေမယ့် သတ်မှတ်ချက်ပေးချင်တာကတော့ Medium Specs ကွန်ပျူတာများအနေနဲ့  V-Sync ကိုပိတ်ပြီးဆော့ရင်ပိုအဆင်ပြေပါတယ်။

Resolution

Resolution ဆိုတဲ့စကားလုံးကတော့ ဂိမ်မာမဟုတ်သူများနဲ့တောင် ရင်းနှီးနေမှာပါ။ ဖန်သားပြင်များပေါ်ကကျွန်တော်တို့မြင်ရတဲ့ရုပ်ပုံများဟာ သေးငယ်လှတဲ့ pixel တုံးပေါင်းများစွာရဲ့ပေါင်းစည်းမှုဖြစ်တာကို ဒီနေရာမှာတစ်ချက်သိရပါမယ်။ Resolution ဆိုတာကို တိုက်ရိုက်ဘာသာပြန်မယ်ဆိုရင်တော့ ဖန်သားပြင်ကြည်လင်ပြတ်သားမှုလို့ ပြောရပါလိမ့်မယ်။ Resolution ချိန်ညှိမှုမှာ pixel တုံးလေးတွေရဲ့ သိပ်သည်းမှုကိုသိဖို့လိုပြီး ဖန်သားပြင်ပေါ်ကပုံရိပ်ပြတ်သားမှုဟာ ကိုယ့်မော်နီတာရဲ့  pixel တုံး display နှုန်းနဲ့ချိတ်ဆက်နေတယ်ဆိုတာပါ။ အလွယ်မှတ်မယ်ဆိုရင် Resolution မြင့်ရင် pixel တုံးတွေပိုများ၊ ဖန်သားပြင်ပိုကြည်လင်တယ်လို့ပြောရမှာဖြစ်ပြီး Resolution နိမ့်မယ်ဆိုရင်တော့ pixel တုံးတွေပိုနည်း ပိုသေးသွားတယ်လို့မှတ်ယူနိုင်ပါတယ်။ ဒါပေမယ့်လည်း 4K HD ထုတ်ပေးနိုင်တဲ့ 3840x2160 တီဗီနဲ့မဆော့ဘူးဆိုရင် တချို့  console ဂိမ်းများဟာ 1280x720 resolution နဲ့ပဲ render ချကြဆဲပါပဲ။

Field Of View (FOV)

ဒါကတော့ ထွေထွေထူးထူးရှင်းပြနေစရာပါလိုပါဘူး။ Field Of View ဆိုတဲ့စကားအတိုင်း ကွင်းပြင်ကျယ်ပမာဏလို့သတ်မှတ်လိုက်ပါ။ FOV ဟာ ကိုယ်မြင်ရတဲ့ပတ်ဝန်းကျင်နဲ့ ကိုယ်ဟာ ပတ်ဝန်းကျင်ဘယ်လောက်ဝေးဝေးမြင်ရသလဲဆိုတာကိုချိန်ညှိပေးတာပဲဖြစ်ပါတယ်။ ဒါပေမယ့် FOV ကိုအရမ်းတိုးမြှင့်ထားမယ်ဆိုရင် အရာအားလုံးဟာဝေ့ဝိုက်ပြီး Fisheye အမြင်နဲ့မြင်နေရသလိုခံစားရမှာဖြစ်တဲ့အတွက် လိုသလိုချိန်ညှိပြီး ဆော့ကစားနိုင်ပါတယ်။

Anti-Aliasing 

ဒါဟာလည်း ဂိမ်းဂရပ်ဖစ် setting ချိန်ညှိမှုမှာအရေးကြီးတဲ့အချက်တစ်ချက်ပါ။ သူ့ရဲ့လုပ်ဆောင်ချက်ဟာ ဂိမ်းတွေရဲ့မှုန်ဝါးနေတဲ့နေရာတွေ၊ အချွန်အထက်တွေ၊ မရေရာတဲ့နေရာတွေ၊ အစရှိတာတွေကိုအသေးစိတ် ပိုမိုချောမွေ့စွာနဲ့ ကျွန်တော်တို့မြင်ရအောင်လုပ်ပေးတဲ့ကဏ္ဍပဲဖြစ်ပါတယ်။ Anti-Aliasing ဟာ ထစ်ငေါ့နေတဲ့မျက်နှာပြင်တွေ၊ မချောမွေ့တဲ့အရာဝတ္တူတွေ၊ ဗြောင်ချောကြီးဖြစ်နေတဲ့နံရံဟောင်းတွေ၊ အဲဒီလိုအရာတွေနဲ့အတူ ဂိမ်းလောကကြီးကို လက်တွေ့ဆန်ဆန်ပိုမြင်သွားစေဖို့ ချောမွေ့အောင်လုပ်ဆောင်ပေးတဲ့ကဏ္ဍလည်းဖြစ်ပါတယ်။ ဒါပေမယ့်အဲဒီလုပ်ဆောင်ချက်ဟာ Graphic Performance အရမ်းတောင်းဆိုလွန်းတဲ့အတွက် ကိုယ့်ဂိမ်းတွေမှာ High Setting တင်ထားပြီးကောင်းကောင်း run နိုင်ပြီဆိုရင် Anti-Aliasing ကိုဖွင့်ထားဖို့မလိုပါဘူး။ Anit-Aliasing အမျိုးအစားတွေကတော့ MSAA, FXAA, TXAA/MLAA, SSAA အသီးသီးရှိပြီး လေ့လာချင်သူများအနေနဲ့ ဆက်လက်လေ့လာနိုင်ပါတယ်။

Anisotropic Filtering (Texture Filtering)

Texture Filtering ဆိုတဲ့အတိုင်း အဲဒီလုပ်ဆောင်ချက်ဟာ ကိုယ်မြင်ရတဲ့ရှုထောင့်ကြည်လင်ပြတ်သားမှုနဲ့ ကိုယ့်စက်နဲ့ဂိမ်းကိုက်ညီမှုကို filter ဆိုတဲ့အတိုင်း အသင့်တော်ဆုံးအနေအထားတစ်ခုဖြစ်အောင် စစ်ထုတ်ပေးထာပဲဖြစ်ပါတယ်။ Anisotropic Filtering ကို On ထားပြီး ရုပ်ထွက်သက်ရောက်မှုကို စမ်းသပ်ကြည့်ချင်တယ်ဆိုရင် ဂိမ်းဖန်သားပြင်ပေါ်မှာ မီတာအနည်းငယ်လောက်ကိုလှမ်းကြည့်ပြီး ကိုယ့်အောက်ကမြေပြင်ကိုကင်မရာပြန်ဆွဲပြီးစမ်းသပ်ကြည့်နိုင်ပါတယ်။ Anisotropic Filtering ရဲ့သဘောတရားအရ အဝေးကိုအာရုံစိုက်ပြီးလှမ်းကြည့်မယ်ဆိုရင် ကိုယ့်အနီးတဝိုက်နံရံ၊ ပတ်ဝန်းကျင်၊ မြေပြင်အစရှိတာတွေဟာ တကယ့်မှာဖြစ်သလို လက်တွေ့ဆန်စွာအနည်းငယ်ဝေဝါးသွားတာကို ခံစားရပါလိမ့်မယ်။

အထက်မှာပြောပြခဲ့တဲ့အချက်တွေဟာ ဂိမ်းတစ်ခုရဲ့ setting ချိန်ညှိမှုမှာအရေးပါပြီး ဒါတွေကိုအခြေခံသိပြီဆိုရင် အကောင်းဆုံးဂိမ်းအတွေ့အကြုံတွေကို ခံစားနိုင်အောင်လို့ ကိုယ့်ဘာသာကိုယ်ဖန်တီးယူနိုင်ပြီဖြစ်ပါတယ်။ ဒါပေမယ့် ဒါတွေဟာအကုန်မဟုတ်သေးပါဘူး၊ Ambient Occlusion, Bloom, Motion Blur, Tessellation, Depth Of Field အစရှိတဲ့ setting ကဏ္ဍတွေလည်းရှိပါသေးတယ်၊ အဲဒါတွေကတော့ ဂိမ်မာကိုယ်တိုင်စမ်းသပ်ကြည့်နိုင်သလို အထက်ကပြောခဲ့တာတွေလိုမရှုပ်ထွေးတဲ့အတွက် သိပ်ပြီးအထွေအထူးရှင်းပြချက်တွေထုတ်နေစရာလည်းမလိုပါဘူး။ ဒီတော့ ဒီအချက်လေးတွေဖတ်ပြီး ကျွန်တော့်လို PC ဂိမ်မာတွေ အကောင်းဆုံးဂိမ်းတွင်းအတွေ့အကြုံတွေခံစားနိုင်စေဖို့ ကိုယ့်ရဲ့ PC စက်နဲ့ ကိုယ်ဆော့မယ့်ဂိမ်း ဘယ်လိုချိန်ညှိမလဲဆိုတာကတော့ကို အားလုံးသင့်တော်သလို လုပ်ဆောင်နိုင်ပြီပဲဖြစ်ပါတယ်။

Yan
Ref: gamespot

Unreal Engine ကိုအသုံးပြုထားပြီး PS4 ပလက်ဖောင်းမှာပွဲဦးထွက်မယ့် Devil May Cry 5 ဘယ်တော့ထွက်လာမှာလဲ?

ဂိမ်မာများအားလုံး CAPCOM ဂိမ်းကုမ္မဏီကထုတ်တဲ့ဂိမ်းတွေကို တစ်ခုမဟုတ်တစ်ခုတော့ ဆော့ဖူးကြမှာပါ။ ၉၀ ခုနှစ်ဝန်းကျင်တဝိုက်မှာ ကမ္ဘာ့ဂိမ်းဈေးကွက်ထဲနေရာတစ်နေရာ အရယူနိုင်ခဲ့တဲ့ ဂျပန်အခြေစိုက်ဂိမ်းကုမ္မဏီ CAPCOM ဟာ နာမည်ကျော်ဂိမ်းစီးရီးများစွာကြောင့် တစ်ကမ္ဘာလုံးအတိုင်းအတာနဲ့ ကမ္ဘာ့ထိပ်တန်းဂိမ်းထုတ်လုပ်တဲ့ကုမ္မဏီများကြားမှာ ပခုံးချင်းယှဉ်ရပ်တည်နေနိုင်တာပဲဖြစ်ပါတယ်။ CAPCOM ဂိမ်းကုမ္မဏီနဲ့ရင်းနှီးသူများကတော့ Megaman, Street-Fighter, Resident Evil, Monster Hunter အစရှိတဲ့ဂိမ်းတွေကိုလည်း ကိုယ်တိုင်ကိုယ်ကျဆော့ဖူးကြမှာပါ။ အဲတာဆိုရင်တော့ Devil May Cry ဆိုတဲ့ဂိမ်းစီးရီးကိုလည်း တစ်ကွေ့မဟုတ်တစ်ကွေ့တော့ ဆော့ခဲ့ဖူးကြမယ်လို့ထင်ပါတယ်။ ၂၀၀၁ ခုနှစ်မှာစတင်ထွက်ရှိခဲ့တဲ့ Devil May Cry ဂိမ်းဟာ လူသားမျိုးနွယ်ကို နတ်ဆိုးတွေသိမ်းယူကျွန်ပြုခြင်းကနေပြီး ကယ်တင်ခဲ့တဲ့နတ်ဆိုးဘုရင် Sparda နဲ့ သူ့ရဲ့မျိုးဆက်ဖြစ်တဲ့ နတ်ဆိုးတစ်ပိုင်း၊ လူတစ်ပိုင်းအမြွာညီအစ်ကိုနှစ်ယောက်ရဲ့ဇာတ်ကြောင်းကို မီးမောင်းထိုးထားတဲ့ဂိမ်းဖြစ်ပါတယ်။ 

၂၀၀၁ ခုနှစ်နဲ့ ၂၀၀၃ ခုနှစ်မှာ Devil May Cry ပထမအခွေ၊ ဒုတိယအခွေနှစ်ခွေ ပြီးတော့ ၂၀၀၈ ခုနှစ်မှာ စတုတ္တမြောက် DMC4, ၂၀၁၃ ခုနှစ်မှာ Ninja Theory နဲ့လက်တွဲပြီးထုတ်ခဲ့တဲ့ Devil May Cry: DMC reboot ကိုထုတ်ပေးခဲ့တဲ့ CAPCOM ဟာ ၂၀၁၅ ဂျွန်လမှာ  DMC4 Special Edition တို့ကို အသီးသီးထုတ်ပေးခဲ့ပါတယ်။ တကယ်တမ်းဆိုရင် ၂၀၀၈ ဂိမ်းဇာတ်လမ်းကသာ Devil May Cry ဂိမ်းရဲ့ဇာတ်ကြောင်းအမှန်ဖြစ်တာမို့ ၂၀၁၅ ခုနှစ်မှာ နောက်ဆုံးထုတ်ပေးခဲ့တဲ့ Special Edition ဟာလည်း ဇာတ်ကောင်အသစ်တွေထည့်သွင်းထားပြီးရုပ်ထွက်တိုးမြှင့်ထားတာကလွဲရင် ၂၀၀၈ ကဇာတ်ကြောင်းကိုပဲ ပြန်လည်ဆော့ကစားရတာပါ။ ဒီတော့ ၂၀၁၈ ခုနှစ်ကိုလည်းကူးပြောင်းတော့မယ်၊ အချိန်အတိုင်းအတာ ၃ နှစ်နီးနီးယူခဲ့တဲ့ CAPCOM ဟာ Devill May Cry စီးရီးနဲ့ပတ်သက်ပြီး ပရောဂျက်အသစ်ကိုမလုပ်ခဲ့တာ အခုဆိုရင် ၁၀ နှစ်တင်းတင်းပြည့်တော့မှာမယ်ဖြစ်ပါတယ်။ ဂိမ်းပင်တိုင်ဖန်တီးသူ Hideki Kamiya ဟာလည်း ဖျက်သိမ်းသွားခဲ့တဲ့ ၂၀၁၇ Scalebound ဂိမ်းမှာ အားစိုက်နေရတာမို့ Devil May Cry စီးရီးဟာ ဘယ်လိုအခြေအနေရှိမှန်း ဘာမှမသိရပါဘူး။

ဒါပေမယ့် ဆယ်စုနှစ်တစ်ခုတိုင်စောင့်မျှော်နေကြတဲ့ပရိသတ်တွေအတွက် မျှော်လင့်ချက်ရေးရေးကတော့ ပြန်လည်တောက်ပလာပါပြီ။ အဲဒါဘာလည်းဆိုတော့ ၂၀၁၈ အတွင်းမှာ Devil May Cry 5 ထွက်လာမယ်ဆိုတဲ့သတင်းနဲ့ အဲဒီသတင်းဟာ ခိုင်မာတယ်လို့ယူဆရတဲ့သက်သေတွေပါပဲ။ Hideki Kamiya ဟာ ၂၀၁၇ E3 ပွဲကိုသူမတက်ရောက်ခဲ့ပေမယ့် သူရေးဆွဲဖန်တီးနေတဲ့ဂိမ်းတွေကတော့ အဆင်ပြေချောမွေ့စွာနဲ့ ရှေ့ဆက်သွားနေတယ်လို့ Twitter မှာပြောကြားခဲ့ပါတယ်။ ၂၀၁၅ နှစ်ဝက်လောက်တည်းက အခြေယူပြီးဖန်တီးခဲ့မယ်ဆိုရင် DMC စီးရီးအနေနဲ့ သုံးနှစ်တာကာလအကြာ ၂၀၁၈ မှာ Devil May Cry 5 ဂိမ်းသစ်ဟာထွက်သင့်ပြီလို့ ဂိမ်းပညာရှင်၊ ခန့်မှန်းသုံးသပ်ချက်များက ယူဆကြပါတယ်။ ခိုင်မာတဲ့ဂိမ်းမီဒီယာတွေရဲ့သတင်းတွေအရ Sony ဟာ DMC5 ဂိမ်းသစ်ဖန်တီးတည်ဆောက်တဲ့အပိုင်းမှာပါဝင်နေပြီး ထွက်လာခဲ့မယ်ဆိုရင်လည်း PS4 ပလက်ဖောင်းအနေနဲ့ ပွဲဦးထွက်လာမယ်သိရတဲ့အပြင် PC ဗားရှင်းကိုတော့အချိန်တစ်ခုနေမှထုတ်ပေးသွားမှာလို့လည်းပြောပြခဲ့ပါတယ်။ ဒါတင်မကသေးပါဘူး၊ Devil May Cry 5 ဂိမ်းသစ်မှာ ခေတ်သစ်နာမည်ကျော်ဂိမ်းတွေရဲ့အက်ရှင်ကဏ္ဍတွေကို hardcore ဖြစ်အောင်ထောက်ပံ့ထားတဲ့ Unreal Engine ကိုအသုံးပြုထားတယ်လို့ သိရပါတယ်။ ဂိမ်းဇာတ်ကောင်တွေရဲ့အသံသရုပ်ဆောင်ဓါတ်ပုံတွေနဲ့ motion picture ဖမ်းယူတဲ့ဓါတ်ပုံနဲ့ သတင်းများထွက်လာခဲ့ပေမယ့်လည်း ပြန့်နှံ့ပြီၤးအချိန်ခဏအကြာမှာ အဲဒီပို့စ်တွေကို ဖျက်သိမ်းခဲ့ပါတယ်။ 

အဲဒီတော့ တကယ်လို့ Devil May Cry ဂိမ်းသစ် ထွက်ရှိလာတော့မှာသေချာတယ်ဆိုရင် အခုလာမယ့် ဒီဇင်ဘာ ၁၀ ရက်နဲ့ ၁၁ ရက်မှာကျင်းပမယ့် Playstation Experience ပွဲမှာ CAPCOM ဒါမှမဟုတ် Sony ဟာ ကောလဟာလအားလုံးကိုရှင်းလင်းပြီး DMC ဂိမ်းသစ်ကိုလုပ်ဆောင်နေကြောင်း အရိပ်အမြွက်ထုတ်ဖော်ပြောရတော့မှာပါ။ အဲဒီလိုမှမဟုတ်ရင် ကြေညာချက်ဟာ ၂၀၁၈ E3 ပွဲအထိကူးသွားမှာဖြစ်ပြီး အားလုံးနှောင့်နှေးသွားနိုင်ပါတယ်။ ဒီတော့ ကျွန်တော်တို့လို ၂၀၁၅ ခုနှစ်ကတည်းကနေ မျှော်တလင့်လင့်နဲ့ Devil May Cry အခွေသစ်ဘယ်တော့မှများထွက်လာလိမ့်မလဲ စောင့်နေသူများအတွက် တောက်လျှောက်ကြားနေရတဲ့ကောလဟာလတွေကနေ အခုလို စိတ်ချယုံကြည်ရတဲ့သတင်းတွေကိုကြားသိရတဲ့အတွက် တကယ်စိတ်ချမ်းသာရပါတယ်။ ဂိမ်းဆော့တဲ့သက်တမ်း ၈ နှစ်အတွင်း ကျွန်တော်စဆော့ခဲ့တဲ့ဂိမ်းတွေထဲမှာ DMC စီးရီးက ထိပ်ဆုံးကနေရာယူထားတဲ့အတွက် Devil May Cry ဂိမ်းစီးရီးရဲ့ သက်တမ်းရင့်လူငယ် Fan တစ်ယောက်ကိုလက်ညှိုးထိုးပြပါဆိုရင် ကျွန်တော့်ကိုသာညွှန်ပြရပါလိမ့်မယ်။ အဲဒီတော့အခုအချိန်မှာ ဂိမ်မာများအားလုံးလုပ်နိုင်တာကတော့ စိတ်ရင်းခံနဲ့မျှော်လင့်ချက်ထားပြီး တကယ်တမ်း Devil May Cry 5 ဂိမ်းသစ်ထွက်လာဖို့စောင့်ဆိုင်းဖို့ပါပဲလို့ပြောရင်းနဲ့ စိတ်တူကိုယ်တူ DMC Fan များစိတ်ချမ်းသာစေဖို့ရာ ဒီသတင်းကိုဒီဆောင်းပါးနဲ့ပြန်လည်မျှဝေလိုက်ရပါတယ်။

Yan
Ref: trustedreviews, wcctech

Resident Evil 8 ဟာ Resident Evil 7 နဲ့ဆက်နွယ်နေသလားဆိုတာကို ဒီ DLC သစ်နှစ်ခုမှာသိရမယ်

Resident 7 ဂိမ်းဟာ ကစားသူတွေအတွက်ဘယ်လောက်တောင်မှ သွေးပျက်ဖို့ကောင်းပြီး သူမတူတဲ့ထိတ်လန့်ဖွယ် အတွေ့အကြုံတွေကိုပေးခဲ့တယ်ဆိုတာ အားလုံးအသိပါ။ အဲဒီလိုခြောက်ခြားဖို့ကောင်းလွန်းတဲ့အခိုက်အတန့်တွေကို ပိုပြီးတိုးမြှင့်လိုက်တဲ့အနေနဲ့ RE7 ကို VR ဗားရှင်းနဲ့ပါထွက်ခဲ့လို့ horror ဂိမ်းတွေကိုကြိုက်ပေ့၊ နှစ်သက်ပေ့ဆိုတဲ့ဂိမ်မာတွေတောင် ဆော့ဖို့လက်တွန့်ခဲ့ရပါတယ်။ ဒါပေမယ့် ဒီလိုနေရာမှာပဲ Resident Evil စီးရီးဟာ မရပ်တန့်သွားပါဘူး။ Review ကောင်းတွေ၊ လူကြိုက်နှစ်သက်မှုတွေနဲ့ ပရိသတ်တွေရဲ့တစ်ခဲနက်အားပေးမှုကို ရခဲ့တဲ့ Resident Evil 7 ဟာ ဒီဇင်ဘာလ ၁၂ ရက်နေ့မှာ Gold Edition ဆိုတဲ့ Edition အသစ်ကို ဂိမ်မာတွေအတွက် ထပ်မံထုတ်ပေးတော့မှာပါ။ RE7 ကိုအောင်မြင်ပြီးမြောက်အောင် ဆော့ပြီးသွားတဲ့အပြင် ထပ်ဆောာင်း DLC တွေဖြစ်တဲ့ The Banned Footage နှစ်ခုလုံးကို ဆော့ပြီးသူမာျးအတွက်တော့ ဒါဟာ အထူးသတင်းကောင်းပါပဲ။ အဲဒီဒီဇင်ဘာလ ၁၂ ရက်နေ့မှာထုတ်ပေးမယ့် Gold Edition မှာ တိုးမြှင့်ထားတဲ့ရုပ်ထွက် graphic တွေ၊ အကြောင်းအရာအသစ်တွေနဲ့ လက်နက်အသစ်တွေပါမယ်လို့ ခန့်မှန်းရပါတယ်။ အဲဒီတော့ ဒီဇင်ဘာလ ၁၂ ရက်နေ့မှာ CAPCOM က တရားဝင်ထုတ်ပေးမယ့် Resident Evil 7: Gold Edition မှာ ဘယ်လိုမျိုးအကြောင်းအရာသစ်တွေပါမလဲ? မူရင်းဇာတ်လမ်းကရော ဘယ်လိုမျိုးအလှည့်အပြောင်းတွေဖြစ်မလဲဆိုတာကို ဂိမ်မာများအားလုံးသိရဖို့ ဒီကနေတဆင့် ဖော်ပြပေးလိုက်ရပါတယ်။

RE 7: Gold Edition နဲ့အတူထွက်ရှိလာမယ့် DLC သစ်တွေကိုအခမဲ့ရယူနိုင်မယ်

CAPCOM ရဲ့ကြေညာချက်တွေအပြီးမှာ အကြာကြီးစောင့်မျှော်ခဲ့ရတဲ့ Resident Evil DLC သစ်တွေဟာ ဒီဇင်ဘာလ ၁၂ ရက်နေ့မှာတော့ ဂိမ်မာအားလုံးလက်ထဲကို Gold Edition သစ်နဲ့အတူ ဆိုက်ဆိုက်မြိုက်မြိုက်ရောက်ရှိလာတော့မှာပါ။ အဲဒီ DLC နှစ်ခုကတော့ Not A Hero DLC နဲ့ End Of Zoe DLC တို့ပဲဖြစ်ကြပြီး အသူတို့အသီးသီးရဲ့ဇာတ်ကြောင်းတွေဟာ နဂိုမူလဇာတ်လမ်းနဲ့ ချိတ်ဆက်မှုတစ်နည်းရှိနေတယ်လို့ဆိုပါတယ်။ အဲဒီဇာတ်ကြောင်းတွေနဲ့ပတ်သက်ပြီး CAPCOM ဟာ မကြာသေးခင်ကမှ teaser ထွေလာကို စောင့်မျှော်နေကြတဲ့ပရိသတ်တွေဆီ ထုတ်ဖော်ပြသခဲ့ပါတယ်။

Not A Hero DLC ရဲ့အဓိကဇာတ်ဆောင်ဖြစ်တဲ့ BSAA အေးဂျင့် Chris Redfield

Resident Evil 5 မှာ Sheva နဲ့အတူ တောင်အာဖရိကက T-Virus ကပ်ပါးကောင်တွေအမြစ်ဖြတ်နှိမ်နင်းခဲ့တဲ့ Chris ကိုအားလုံးမှတ်မိကြမယ်ထင်ပါတယ်။ Resident Evil 4 ထဲမှာ Leon S.Kennedy ပြီးရင် Resident Evil 5 ထဲက Chris Redfield ဟာ RE စီးရီးရဲ့မင်းသားတွေလိ့ု သတ်မှတ်ရမှာပါ။ RE7 ဖြစ်စဉ်တစ်ခုလုံးအပြီးမှာ BSAA အထူးအေးဂျင့်ဖြစ်သူ Chris Redfield ဟာ Umbrella ရဟတ်ယာဉ်ပေါ်ကကျလာတာကို အားလုံးတွေ့မြင်ပြီးသားဖြစ်ပါလိမ့်မယ်။ အဲဒါဘာကိုဆိုလိုသလဲဆိုတော့ BSAA အထူးတပ်ဖွဲ့အနေနဲ့ Umbrella အဖွဲ့အစည်းနဲ့ပူးပေါင်းပြီး Aveline ရဲ့ပူးကပ်မှုကိုပထဦးဆုံးခံခဲ့ရတဲ့ Lucas Baker ရဲ့သတင်းအစအနကိုရှာဖွေဖို့အရာအားလုံးကို ပြန်စတင်မယ်လို့ဆိုလိုတာပါဖြစ်ပါတယ်။ အသက်အန္တရာယ်ဆုံးရှုံးသွားနိုင်တဲ့ အခြေအနေပေါင်းများစွာကို ကျော်ဖြတ်ခဲ့တဲ့ Chris တစ်ယောက်အနေနဲ့ RE7 ရဲ့ဇီဝပြောင်းသတ္တဝါတွေနဲ့ဘယ်လိုရင်ဆိုင်မလဲဆိုတာကတော့ ဒီဇင်ဘာလ ၁၂ ရက်ကျရင် အားလုံးသိရတော့မှာပါ။

End Of Zoe DLC မှာ လူထူးဆန်း Joe နဲ့  Zoey တို့ရဲ့ကံကြမ္မာတိုက်ဆိုင်မှု

တစ်ခုတည်းသောရှိတဲ့ဗိုင်းရပ်စ်ဖြေဆေးကို သူ့ရဲ့ဇနီးဖြစ်သူ Mia ကိုထိုးပေးလိုက်တဲ့နောက်မှာ Ethan တို့လင်မယားနှစ်ယောက်ထွက်သွားဖို့ Zoey ဟာ ကြိမ်းမောင်းနှင်ထုတ်ခဲ့ပါတယ်။ ဒါပေမယ့် အဲဒီလို Ethan တို့ထွက်သွားအပြီးမှာ Zoey ဘာဖြစ်သွားသလဲဆိုတာတော့ ဘယ်လိုမှမသိခဲ့ပါဘူး။ Ethan တို့ထွက်သွားပြီး အချိန်အတိုင်းအတာတစ်ခုအတွင်းမှာ ခံစားနေရတဲ့ဗိုင်းရပ်စ်ကူးစက်မှုကြောင့် မလှုပ်မယှက်တောင့်ခဲနေတဲ့ ဖယောင်းရုပ်တစ်ခုအသွင်ပြောင်းသွားပြီး နွံအိုင်တွေအလယ်ကိုနှစ်မြှုပ်သွားခဲ့တာပါ။ ဒါပေမယ့် အဲဒီလိုအချိန်အနေဖြစ်နေတဲ့ Zoey ကို Joe လို့အမည်ရတဲ့ လူထူးဆန်းတစ်ယောက်က ဆယ်ယူပြီး သူ့ရဲ့လက်ပေါ်မှာပွေ့ချီထားတဲ့ပုံကို အားလုံးကိုဖော်ပြခဲ့ပါတယ်။ ပြီးတော့ အဲဒီလိုနွံအိုင်တွေကြားထဲမှာရှင်သန်နေတဲ့လူထူးဆန်း Joe ဟာ Zoey နဲ့သွေးသားချင်းတော်စပ်မှုရှိတယ်လို့ ဆိုပါတယ်။ ဒီတော့ ဇာတ်လမ်းတွေကတဖြည်းဖြည်းစိတ်ဝင်စားစရာကောင်းလာတာမို့ စောင့်ကြည့်ဖို့ကတော့ ဂိမ်ာမာတွေတာဝန်ပါပဲ။

DLC နှစ်ခုနဲ့ပတ်သက်ပြီး အနှစ်ချူပ်

ပြောရမယ်ဆိုရင် BSAA က Chris Redfield က စီးရီးထဲကိုပြန်ရောက်လာတယ်။ ပြီးတော့ သန္ဓေပြောင်းသတ္တဝါတွေနဲ့ရင်ဆိုင်ပြီး စတင်ကူးစက်ခံခဲ့ရတဲ့ Lucas Baker ရဲ့အစအနကို ရှာမယ်။ အခြားတစ်ဖက်မှာလည်း သေဆုံးပျောက်ဆုံးသွားပြီလို့ယူဆထားတဲ့ Zoey ကိုရွံ့နွံ့ထဲကလူထူးဆန်း Joe ကပြန်ပြီး ကယ်တင်ထားပြီး သွေးသားချင်းတော်စပ်နေတယ်လို့ သိရတယ်။ ဒီတော့ အဲဒီဇာတ်ကြောင်းတွေရဲ့နောက်ဇာတ်လမ်းအပိုင်းတွေက Resident Evil 8 အထိကူးသွားမလား? ဒါမှမဟုတ် တစ်နည်းနည်း ပတ်သက်ဆက်နွယ်နေမလားဆိုတာကတော့ ဒီဇင်ဘာလ ၁၂ ရက်နေ့မှပဲ ကျွန်တော်တို့အားလုံး အဖြေရှာကြည့်ကြတာပေါ့ဗျာ။

Yan
Ref: gamespot, ign

ဘယ်သူမှမသိမထားမိတဲ့ Playstation 2 ကနဦးအစဖန်သားပြင်ပေါ်က အဓိပ္ပါယ်

Playstation 2 ဂိမ်းကို ဘယ်လို resolution ပေးနိုင်တဲ့တီဗီမျိုးနဲ့ဆော့ဆော့ပါ။ ဂိမ်းကိုစဆော့ဖို့အတွက်ဆိုရင် ကျွန်တော့်တို့ဟာ ပါဝါခလုတ်ကို အရင်ဆုံးစဖွင့်ရပါတယ်။ ပါဝါခလုတ်စဖွင့်လိုက်တာနဲ့ တီဖီဖန်သားပြင်မှာ ပထမဦးဆုံးမြင်ကြရတာ Sony Computer Entertainment ဆိုတဲ့စာတန်းအနောက်မှာ မျိုးမျှော်တိုက်တွေလိုမျိုး အကြည်ရောင်ဘလော့တုံးတွေ အစီအရီဖန်သားပြင်ပေါ်မှာ ထိုးထောင်တတ်လာတာပါပဲ။ အဲဒီလို အနိမ့်အမြင့် ဘလော့တုံးတွေကြားမှာ အနီ၊ အပြာ၊ အစိမ်း လေဆာတန်းလေးတွေ လှည့်လည်ဝေဝိုက်နေတာကိုပါ တစ်ခါတည်းတွေ့မြင်ရမှာပါ။ အဲဒီအချိန်မှာ ကိုယ်က ဘာဂိမ်းခွေမှာမထည့်ထားဘူးဆိုရင် အပြာရောင်အကြည်လုံးလေးတွေ စက်ဝိုင်းပုံစံလည်ပတ်နေတဲ့ setup နဲ့အတူ Browser နဲ့ System Configuration ဆိုပြီး ရွေးချယ်မှုနှစ်ခုပေးထားတာကို မြင်ရပါလိမ့်မယ်။ ဒါပေမယ့် PS2 ဂိမ်းခွေလည်းထည့်ထားတယ်၊ အဲဒီဂိမ်းခွေကလည်းအလုပ်လုပ်တယ်ဆိုရင်တော့ အမည်းရောင်နောက်ခံမှာ Playstation 2 ဆိုတဲ့ အဖြူရောင်စာတန်းကြီး ဘွားကနဲတတ်လာပါလိမ့်မယ်။ အဲဒီလိုစာတန်းပေါ်လာခဲ့တဲ့အချိန်တိုင်းဟာ ကျွန်တော်တို့လို Playstation 2 ကို သဲကြီးမဲကြီး ဆော့ကစားခဲ့သူတွေအတွက် ကျွမ်းထိုးမတတ်ပျော်ရွှင်ခဲ့ရတဲ့အခိုက်အတန့်တွေပါ။ Save မှတ်တဲ့နေရာကိုမရောက်ခင် တစ်နေရာရာမှာ ထစ်ပြီးဆက်မသွားတော့တာတွေ၊ loading မှာတုံ့ဆိုင်းနေတာတွေ၊ စက်ချို့ယွင်းသွားတာမျိုးတွေ၊၊ ပြီးတော့ ဘော့စ်တွေနဲ့ရင်ဆိုင်ရတော့မယ့်အချိန်မှာ လျှပ်စစ်မီးပျက်တောက်သွားတာမျိုးတွေ၊ အဲဒီလိုအချိန်တွေမှာဆိုရင် လက်ရှိဆော့နေတဲ့ဂိမ်းစက်နဲ့ ဂိမ်းခလုတ်ကိုရိုက်ခွဲချင်စိတ်ဖြစ်မိတာ ဂိမ်မာတိုင်းလိုလိုကြုံဖူးမှာပါ။

ဒါပေမယ့် အဲဒီလို အနိမ့်အမြင့်ဖြစ်နေတဲ့ အကြည်ရောင်ဘလော့တုံးတွေ  Microsoft Window startup လိုမျိုး အနီ၊ အပြာ၊ အစိမ်း လေဆာတန်းလေးတွေ လှည့်လည်ဝေဝိုက်နေတဲ့ ကနဦးဖန်သားပြင်မှာ Sony ကဖွင့်ဆိုထားတဲ့အဓိပ္ပါယ်ရှိပါတယ်။ ကျွန်တော်အပါအဝင်များစွာသော ဂိမ်မာမာျးက ဒီလျှို့ဝှက်ချက်ကို သတိထားမိကြမယ်မထင်ပါဘူး။ အဲဒါကိုကျွန်တော်ဒီမှာ အားလုံးကိုပြန်လည်မျှဝေပေးသွားမှာပါ။ အဲဒီကဘာလဲဆိုတော့ အဲဒီလိုမိုးမျှော်တိုက်တွေလိုမျိုး ထိုးထောင်ထွက်လာနေတဲ့ ဘလော့တုံးတွေရဲ့ပမာဏဟာ ကျွန်တော်တို့ဆော့ထားတဲ့ဂိမ်းတွေရဲ့သက်တမ်းအပေါ်မှာ မူတည်နေပြီး အဲဒီဖန်သားပြင်ပေါ်က ဘလော့တုံးတွေရဲ့ပြသချိန်ကြာမြင့်မှုဟာ ကျွန်တော်တို့မှတ်သားထားတဲ့ဂိမ်းဖိုင်တွေကို ကိုယ်စားပြုနေတယ်ဆိုတာပါပဲ။ Memory Card ကိုတစ်ခါတည်းထိုးစိုက်ပြီး PS2 ဂိမ်းစက်ပါဝါကိုဖွင့်လိုက်မယ်ဆိုရင် ကျွန်တော်တို့ဆော့ထားသမျှဂိမ်းတွေအပေါ်မှာမူတည်ပြီး အဲဒီဘလော့တုံးတွေဟာ ဖန်သားပြင်ပေါ်ကိုတိုးတက်လာမှာပါ။ ဒါတင်မသေးပါဘူး၊ အဲဒီဘလော့တုံးတွေရဲ့အနိမ့်အမြင့်ကွာဟချက်ဟာ ကျွန်တော်တို့ဆော့ခဲ့တဲ့ဂိမ်းတွေ ဘယ်လောက်အတိုင်းအတာထိရောက်နေပြီဆိုတာကိုပါ ဖော်ပြနေတာပါ။ ပြောရမယ်ဆိုရင် ဘလော့တုံးတွေ့ရှည်လျားမြင့်မားလေလေ၊ ကိုယ်ဆော့ထားတဲ့ဂိမ်းတွေကခရီးအတော်ရောက်နေပြီလို့ ဆိုနိုင်ပါတယ်။ အဲဒီလိုဘလော့တုံးတွေတက်လာနေတဲ့အချိန်မှာ Memeory Card ကိုရုတ်တရတ်ဖြုတ်လိုက်မယ်ဆိုရင်တော့ အထက်စာပိုဒ်မှာဖော်ပြခဲ့တဲ့အတိုင်း အားလုံးဟိုးအစက setup ကိုပြန်ရောက်သွားမှာပါ။ တကယ်လို့ PS2 ရှိလို့စမ်းသပ်ကြည့်ချင်သူများကလည်း စမ်းသပ်ကြည့်နိုင်သလို အဲဒီစမ်းသပ်ချက်ဟာ PS2 မှာတင်မက PS1 Memory Card များမှာလည်း အကျုံးဝင်တယ်ဆိုတဲ့အကြောင်းကို ဒီကနေတဆင့် အားလုံးသိသွားရအောင် မျှဝေလိုက်ပါရစေ။

Yan

Ref: standard.uk

ရာစုသစ်ဂိမ်းတွေရဲ့ယှဉ်ပြိုင်မှုတွေကြားမှာ ရင်ခုန်စိတ်လှုပ်ရှားစရာတွေနဲ့ ဝေဆာပြန်ဦးမယ့် The Game Awards 2017

ရုပ်ရှင်လောကမှာဆိုရင် နှစ်စဉ် ရွှေကမ္ဘာလုံးနဲ့ အော်စကာရုပ်ရှင်ဆုပေးပွဲတွေ၊ ဂီတလောကမှာလည်း နှစ်စဉ် ဂရမ်မီရှိုးတွေ၊ BMA, VMA ဂီတပွဲတွေ အစရှိတဲ့ပွဲတွေကို သူတု့ိရဲ့နယ်ပယ်အလိုက် ခုနှစ်တိုင်းကျင်းပကြစမြဲပါ။ ရုပ်ရှင်၊ ဂီတနဲ့စာပေ အစရှိတဲ့ကဏ္ဍအသီးသီးမှာ ပေါက်မြောက်ခဲ့ကြတဲ့အနုပညာလက်ရာတွေအတွက် သူတို့ရဲ့နောက်ကွယ်ကဖန်တီးရှင်ထူးချွန်သူတွေကို တစ်ကမ္ဘာလုံးသိရှိသွားစေဖို့ နှစ်စဉ်ဆုပေးပွဲတွေကျင်းပပြီး ထိုက်တန်စွာဆုချီးမြှင့်ကြတာဟာ ထုံးတမ်းတစ်ခုလိုဖြစ်နေခဲ့ပါပြီ။ ကဏ္ဍရပ်အသီးသီးအတွက် အသိအမှတ်ပြုဆုပေးပွဲတွေကို အချိန်မှန်ကျင်းပကြသလို မကြာတော့တဲ့အချိန်အတွင်းမှာ ဂိမ်းလောကရဲ့ The Game Awards ဆုပေးပွဲဟာလည်း ၂၀၁၇ ခုနှစ်ရဲ့ဂိမ်းဈေးကွက်ထဲမှာ ဒိတ်ဒိတ်ကြဲဖြစ်နေတဲ့ဂိမ်းတွေကို ပေါင်းစည်းပြီး ပွဲထုတ်တင်ဆက်သွားတော့မှာပါ။ အဲဒီတော့ဂိမ်မာပရိသတ်တွေ နှစ်တိုင်းနှစ်တိုင်း မျှော်တလင့်လင့်စောင့်စားနေရတဲ့ The Game Awards ဆိုတာဘာလဲ? အဲဒီဂိမ်းဆုပေးပွဲဟာ ဘယ်လောက်တောင်မှရင်ခုန်ဖို့ကောင်းမှာလဲ? သူ့ရဲ့နောက်ခံသမိုင်းကြောင်းနဲ့ ဒီနှစ်မှာကျင်းပသွားမယ့် The Game Awards နဲ့ပတ်သက်ပြီး သိသင့်သိထိုက်တဲ့အချက်အလက်တွေကို ဒီမှာပြန်ပြီးဝေမျှပေးလိုက်ပါတယ်။

The Game Awards ဆိုတာဘာလဲ?

The Game Awards ဆိုတာ ကနေဒါနွယ်ဖွားဂိမ်းလောကစာနယ်ဇင်းသမား Geoff Keighley ဦးဆောင်စီစဉ်ပြီး နှစ်စဉ်ကျင်းပမြဲဖြစ်တဲ့ ဗီဒီယိုဂိမ်းပွဲတော်ဖြစ်ပါတယ်။ အဲဒီပွဲမှာ နှစ်တစ်နှစ်အတွင်း ရေပန်းအစားဆုံး၊ ပရိသတ်အကြိုက်တွေ့ဆုံး၊ ဈေးကွက်ထဲမှာရောင်းအားအကောင်းဆုံး အစရှိတဲ့ နာမည်ကောင်းတွေဆွတ်ခူးခဲ့တဲ့ဂိမ်းတွေကို တစ်စုတစည်းတည်းပေါင်းစည်းပြီး လျာထားခြင်းခံရတဲ့ကဏ္ဍအလိုက် ဆုပေးအပ်တဲ့ပွဲဆိုရင်လည်းမမှားပါဘူး။ The Game Awards ပွဲကို ကျင်းပရခြင်းရည်ရွယ်ချက်ဟာ ဗီဒီယိုဂိမ်းများရဲ့ဂုဏ်ပုဒ်ကိုမြှင့်တင်ဖို့နဲ့ ကမ္ဘာကျော်လက်ရာမြောက်ဂိမ်းများကို တစ်ကမ္ဘာလုံးအတိုင်းအတာနဲ့ အသိအမှတ်ပြုဖို့ဖြစ်ပါတယ်။

Spike Video Game Awards (VGAs) နဲ့ The Game Awards တို့ရဲ့ဆက်နွယ်မှု

VGAs ဒါမှမဟုတ် VGX လို့လည်း လူသိများတဲ့ Spike Video Game Awards ဟာ ဆယ်စုနှစ်တစ်ခုတိုင်အောင်ကျင်းပခဲ့တဲ့ The Game Awards မတိုင်မှီက ဂိမ်းဆုပေးပွဲဖြစ်ပါတယ်။ ၂၀၀၃ ခုနှစ်မှာစတင်ပြီးကျင်းပခဲ့တဲ့ VGAs ဂိမ်းဆုပေးပွဲကို ၂၀၁၃ အထိ ဆယ်နှစ်တိုင်တိုင်စည်ကားသိုက်မြိုက်စွာ ကျင်းပခဲ့ပြီး နှစ်စဉ်ပွဲတိုင်းမှာ ဗီဒီယိုဂိမ်းတွေထဲကလူသိများတဲ့ဂိမ်းသီချင်းတွေနဲ့ ပြောင်မြောက်တဲ့ဂိမ်းနောက်ခံတေးသီချင်းတွေကို live performance အနေနဲ့ နာမည်ကျော်အဆိုတော်များက စင်တက်ဖျော်ဖြေတင်ဆက်တဲ့ကဏ္ဍတွေလည်း ပါဝင်ခဲ့ပါတယ်။ ၂၀၁၃ ခုနှစ်ပွဲအပြီးမှာတော့ ဆယ်နှစ်တိတိကျင်းပခဲ့တဲ့ VGAs ဂိမ်းပွဲတော်ကိုဖျက်သိမ်းဖို့အကြောင်းဖန်လာခဲ့ပြီး ဂိမ်းနယ်ပယ်ရဲ့အထင်ကရစာနယ်ဇင်းသမားဖြစ်သူ Geoff Keighley က သူကိုယ်တိုင်ဦးစီးဦးဆောင်ပြီး The Game Awards ဆိုတဲ့ ဂိမ်းပွဲတော်ကိုပြန်လည်အသက်သွင်းခဲ့ပါတယ်။ ၂၀၁၄ ခုနှစ်မှာတော့ Spike Video Game Awards (VGAs) ဆိုတာမရှိတော့ပဲ အမည်သစ်၊ ပုံစံသစ်နဲ့ The Game Awards ဆိုတဲ့ ဂိမ်းဆုပေးပွဲဖြစ်ပေါ်လာခဲ့ပါတယ်။

နှစ်စဉ်နဲ့အမျှကျင်းပတဲ့ The Game Awards မှာ ဘာတွေကိုတွေ့မြင်ရမလဲ?

The Game Awards ဆိုတဲ့အတိုင်း နှစ်တစ်နှစ်ရဲ့ဆုပေးဖို့လျာထားခြင်းခံရတဲ့ဂိမ်းတွေကို ကဏ္ဍအလိုက် ထိုက်တန်စွာဆုတွေချီးမြှင့်ပြီး ဂုဏ်ပြုတဲ့ဂိမ်းဆုပေးပွဲဖြစ်ပါတယ်။ ကိုယ်အကြိုက်နှစ်သက်ဆုံးဂိမ်းတွေကို တစ်နေရာတည်းမှာ တစ်စုတစည်းတည်း ရင်ခုန်စိတ်လှုပ်ရှားစွာတွေ့မြင်ရမယ့်အပြင် အနာဂတ်ရဲ့ဂိမ်းသစ်တွေ၊ ကြေညာပြီးသားဂိမ်းသစ်တွေရဲ့ အကြောင်းအရာသစ်တွေကို သိရှိရတဲ့ပွဲမို့လို့ E3 ပွဲနည်းတူပဲ ဂိမ်မာပရိသတ်များအထူးစောင့်မျှော်ကြတဲ့ဂိမ်းပွဲတော်ဖြစ်ပါတယ်။ ဒါပေမယ့် ဒီနှစ် ၂၀၁၇ မှာတော့ ထူးခြားတဲ့ကဏ္ဍတစ်ခုအနေနဲ့ The Game Awards Orchestra ဆိုပြီး ကမ္ဘာကျော်သံစုံတီးဝိုင်းနဲ့အတူ နာမည်ကျော်ရော့ခ်ဂီတပညာရှင်များနဲ့ပူးပေါင်းပြီး ဂိမ်းတေးသီချင်းဖျော်ဖြေပွဲကိုပါ ထည့်သွင်းကျင်းပသွားမှာပါလို့ Keighley က သတင်းစာရှင်းလင်းပွဲမှာပြောကြားသွားခဲ့ပါတယ်။

ပွဲကျင်းပမယ့်ရက်စွဲ၊ တိုက်ရိုက်ထုတ်လွှင့်သွားမယ့်မီဒီယာတွေနဲ့ အနှစ်ချူပ်

The Game Awards ဂိမ်းဆုပေးပွဲကို ဒီဇင်ဘာလ ၇ ရက်နေ့မှာ လော့စ်အိန်ဂျယ်လိစ်မြို့ရဲ့ Microsoft Theatre မှာကျင်းပသွားမှာဖြစ်ပါတယ်။ ပွဲကို တစ်ကမ္ဘာလုံးအတိုင်းအတာနဲ့ မီဒီယာရုပ်သံလိုင်း စုစုပေါင်း ၅၁ ခုကနေ တိုက်ရိုက်ထုတ်လွှင့်သွားမှာဖြစ်ပြီး ဂိမ်းလောကရဲ့အထင်ကရမီဒီယာများဖြစ်ကြတဲ့ Gamespot နဲ့ Giant Bomb တို့ပါ ဒီတင်ဆက်မှုမှာပါဝင်သွားမှာပါ။ ဒီနှစ်အတွက်ဆုလျာထားခြင်းကို အများဆုံးကိုရရှိထားတဲ့ဂိမ်းတွေကတော့ Destiny 2, Horizon Zero Dawn, The Legend of Zelda: Breath of the Wild, Super Mario Odysse တို့ပဲဖြစ်ကြပြီး ပွဲတက်ရောက်သူဂိမ်မာတွေ အရင်ပွဲနဲ့မတူတဲ့အတွေ့အကြုံသစ်တွေကိုခံစားရစေဖို့အတွက် ထူးခြားတဲ့အစီအစဉ်သစ်တွေနဲ့ စိတ်ကျေနပ်မှု ပေးစွမ်းသွားမယ်လို့ သိရပါတယ်။

Yan
Ref: gamespot, rollingstone, wikia

၂၀၁၈ ခုနှစ်မှာဂိမ်းသမိုင်းသစ်ရေးထိုးဦးမယ့် Pokemon Go ဂိမ်းအဖွဲ့ Niantic ဖန်တီးတဲ့ Harry Potter: Wizards Unite ဂိမ်းသစ်

90 born တိုင်းလိုလို အသည်းစွဲကြိုက်နှစ်သက်ခဲ့ကြတဲ့ စီးရီးဇာတ်လမ်းတွဲတွေကိုပြပါဆိုရင် Pokemon ကာတွန်းနဲ့ လျှို့ဝှက်ဆန်းကြယ် Harry Potter ဇာတ်ထုပ်ကို ပြရမှာပါပဲ။ ကျွန်တော်တို့လို 90 born တွေဟာ အဲဒီဇာတ်လမ်းတွဲတွေကိုကြည့်ပြီး သူတို့နဲ့အတူတူကြီးပြင်းလာခဲ့တာပါ။ ဘယ်လိုမျိုးစိတ်ကူးယဉ်ဆန်တယ်ပဲပြော တကယ်လို့ဖြစ်နိုင်မယ်ဆိုရင် ကျွန်တော်တို့တတွေဟာ အဲဒီလို Pokemon နဲ့ Harry Potter ကမ္ဘာတွေထဲကို ကိုယ်တိုင်ကိုယ်ကျဝင်ရောက်ပြီး ရှင်သန်ချင်ခဲ့ကြတဲ့အထိကို ရူးရူးမူးမူးစွဲလမ်းခဲ့တာပါ။ အဲဒီအချက်ကိုကောင်းကောင်းကြီးရိပ်စားမိတဲ့ Niantic ဂိမ်းအဖွဲ့ဟာ ၂၀၁၆ ခုနှစ်၊ ဇူလိုင်လ ၇ ရက်နေ့မှာ ဂိမ်မာတွေလက်တွေ့အဆန်ဆုံးခံစားရစေမယ့် Pokemon Go ဂိမ်းကို မိုဘိုင်းဖုန်းပလက်ဖောင်းအတွက် စတင်ထုတ်ပေးခဲ့ပါတယ်။ ထွက်ရှိပြီးအချိန်အနည်းငယ်အကြာမှာပဲ တစ်ကမ္ဘာလုံးမှာရေပန်းစားအစားဆုံးဂိမ်းဖြစ်လာခဲ့တဲ့ Pokemon Go ဂိမ်းဟာ ဆော့ကစားသူများကို တကယ့်လက်တွေ့ဘဝမှာ Pokemon အကောင်များကိုလိုက်လံဖမ်းဆီးနေရသလို ခံစားရစေလို့ မိုဘိုင်းဖုန်းတစ်လုံးပိုင်ဆိုင်ရုံနဲ့ လူကြီးလူငယ်မရွေး ဆော့ကစားနိုင်တဲ့ ၂၀၁၆ ခုနှစ်ရဲ့ လူဆော့အများဆုံးမိုဘိုင်းဂိမ်းတစ်ခုဖြစ်လာခဲ့ပါတယ်။ အဲဒီလိုဖန်တီးမှုတွေနဲ့ Pokemon Go ဂိမ်းဟာ အချိန်တိုအတွင်းမှာ နာမည်တဟုန်ထိုးကြီးသွားခဲ့တဲ့အပြင် မိတ်ဆွေသူငယ်ချင်းတွေ၊ အပေါင်းအသင်းတွေနဲ့အတူ ဝိုင်းဖွဲ့ချိတ်ဆက်ဆော့ကစားနိုင်လို့ တက်ညီလက်ညီနဲ့ လူသားတွေရဲ့ပူးပေါင်းမှုကိုပါဖော်ဆောင်ခဲ့တဲ့အတွက် ဂိမ်းသမိုင်းတစ်လျှောက်အထင်ကရဖြစ်ရပ်တစ်ခုတောင် ဖြစ်သွားခဲ့ပါတယ်။ ဒါပေမယ့် အဲဒီလို နာမည်ကောင်းတွေနဲ့အညွှန့်တလူလူဝေဆာခဲ့တဲ့ Pokemon Go ဂိမ်းဟာ လူတွေကြားမှာ ကြာရှည်တော့မခံခဲ့ပါဘူး၊ ၂၀၁၆ ခုနှစ်ရဲ့လူတိုင်းရဲ့ပါးစပ်ဖျားပေါ်က Pokemon Go ဂိမ်းဟာ ၂၀၁၇ ခုနှစ်ထဲကူးလာပြီးနောက်ပိုင်းမှာ ဆော့ကစားမှုသိသိသာသာကျဆင်းသွားပြီး လူစိတ်ဝင်စားမှုလုံးဝကိုနည်းပါးသွားခဲ့ပါတယ်။ Pokemon Go ဂိမ်းဟာ တစ်ချိန်ကျရင်နာမည်လုံးဝပျောက်သွားမယ်ဆိုတာကိုကြိုတွက်ထားတဲ့ Niantic ဂိမ်းအဖွဲ့ဟာ အခု ၂၀၁၈ ကိုကူးပြောင်းဖို့လအနည်းလောက်သာလိုတော့တဲ့အချိန်မှာ Pokemon Go နဲ့အသွင်တူတဲ့ Harry Potter: Wizards Unite ဆိုတဲ့ဂိမ်းကို လာမယ့်နှစ်အတွင်း ထုတ်ပေးတော့မှာဖြစ်ကြောင်း အတိအလင်းကြေညာခဲ့ပါတယ်။

သစ်လွင်ဆန်းပြားတဲ့စိတ်လှုပ်ရှားစရာတွေနဲ့ ဂိမ်းအတွေ့အကြုံသစ်တွေကိုစောင့်စားနေတဲ့ Pokemon Go သည်းကြီးမဲကြီးဆော့ခဲ့ကြသူလုထုဟာ ဒီသတင်းကြောင့်ပြန်ပြီးလှုပ်လှုပ်ရွရွဖြစ်လာခဲ့ပါပြီ။ Niantic ဂိမ်းအဖွဲ့ဟာ ဒီ Harry Potter ဂိမ်းသစ်ကို Warner Bros Interactive ကုမ္မဏီနဲ့အတူ လက်တွဲဖန်တီးနေခဲ့တာဖြစ်ပြီး တရားဝင်ထုတ်ပြန်ကြေညာချက်အရဆိုရင် Harry Potter: Wizards Unite ဂိမ်းသစ်မှာ မှော်ကမ္ဘာကြီးထဲကပတ်ဝန်းကျင်အသစ်တွေ၊ တည်နေရာအလိုက်ကွဲပြားခြားနားတဲ့မြို့တွေထဲမှာ ခရီးရှည်ကြီးတစ်ခုထွက်နေရသလိုခံစားရမှာဖြစ်ပြီး မှော်အစွမ်းသင်ကြားရတာတွေ၊ ရှေးဟောင်းဒဏ္ဍာရီပစ္စည်းတွေကို စုဆောင်းတာတွေ ပါဝင်လာမယ်လို့ သိရပါတယ်။ ဒါ့အပြင် ကိုယ့်လိုပဲအခြားကစားသူများနဲ့အတူပူးပေါင်းပြီး ဆိုးသွမ်းကြမ်းတမ်းလှတဲ့မှော်ဝင်သတ္တဝါကြီးတွေကိုလည်း ရင်ဆိုင်နှိမ်နင်းရမှာဖြစ်ပြီး Death Eaters, Lord Voldemort အစရှိတဲ့ ပရိသတ်အကြိုက်ဇာတ်ကောင်တွေလည်း ပြန်လည်ပါဝင်လာနိုင်ဖွယ်ရှိပါတယ်။ ဒီဂိမ်းနဲ့ပတ်သက်ပြီး Harry Potter: Wizards Unite ဆိုတဲ့စာတန်းပါ ဓါတ်ပုံကလွဲပြီး အခြားဘာမှမထုတ်ဖော်ပြထားပါဘူး။ ဂိမ်းသတင်းအကြောင်းအရာတွေကို Niantic ဟာ လာမယ့် ၂၀၁၈ ခုနှစ်ထဲမှာ ထပ်မံကြေညာသွားမှာဖြစ်တဲ့အတွက် စောင့်ဆိုင်းနေကြတဲ့သူများအဖို့တော့ လောလောဆယ်မှာ မျှော်တလင့်လင့်နဲ့ ဆက်ပြီးစောင့်ဆိုင်းနေရုံမှတစ်ပါး ဘာမှမတတ်နိုင်ပါဘူး။ Pokemon Go ဂိမ်းကိုလည်းအရူးအမူးကြိုက်ခဲ့ကြပြီး Harry Potter ဇာတ်လမ်းတွဲရဲ့ပရိသတ်တွေလည်းဖြစ်တဲ့သူတွေအတွက်ကတော့ လုံးဝကိုရွှေသတင်းပဲဖြစ်ပါတယ်လို့ပြောရင်း ၂၀၁၈ ကိုစိတ်ရှည်ရှည်နဲ့စောင့်ကြဖို့ ဂိမ်မာများအားလုံးကို ဒီကနေတိုက်တွန်းလိုက်ရပါတယ်။

Yan
Ref: kotaku, theverge

တစ်ကမ္ဘာလုံးအတိုင်းအတာနဲ့မှ ၁၆ ရံအတိပဲထုတ်မယ့် Adidas နဲ့ Ubisoft တို့ပေါင်းစည်းထားတဲ့ Assassin's Creed Origins Yeezy Sneaker

အားလုံးမျှော်လင့်ချက်ကြီးစွာနဲ့ စောင့်မျှော်နေတဲ့ Ubisoft ရဲ့ဂိမ်းသစ် Assassin's Creed Origins ဂိမ်းဟာ အောက်တိုဘာလ၊ ၂၇ ရက်နေ့မှာတော့ ဂိမ်မာများအားလုံးရဲ့လက်ထဲ ဆိုက်မြိုက်စွာရောက်ရှိလာခဲ့ပါတယ်။ PS4 ဒါမှမဟုတ် Xbox Console ပိုင်ဆိုင်သူဂိမ်မာများကတော့ ဂိမ်းထွက်မယ့်အချိန်နဲ့ကိုက်ပြီး အလုအယက်ဝယ်ယူကုန်ကြသလို PC ဂိမ်မာများကလည်း Steam ကနေတဆင့် ဒါမှမဟုတ် crack ရမယ့်အချိန်ကိုစောင့်လို့နေကြပါတယ်။ တချို့ဂိမ်မာများဆိုဂိမ်းမထွက်ခင်ကတည်းက ကွဲပြားတဲ့ edition အခွေများကို ကြိုတင်မှာယူပြီး အားလုံးထက်ဦးဦးဖျားဖျားဆော့နှင့်နေကြပါပြီ။ ဒီနှစ် ၂၀၁၇ မှာတင်မက ၂၀၁၈ အထိပါ ပရိသတ်တွေပါးစပ်ဖျားမှာပြောစမှတ်ပြုနေဦးမယ့် Assassin's Creed Origins ဂိမ်းအသစ်ဟာ နောက်ထပ်ထွက်ရှိလာမယ့် အမိုက်စား DLC (downloadable contents) တွေနဲ့အတူ လာတော့မယ့် ၂၀၁၈ ခုနှစ်ကိုလည်း သိမ်းပိုက်ဖို့ကြံစည်ထားပုံပါပဲ။ ဒါတွေတင်မကသေးပါဘူး။ ဂိမ်းလောကမှာဂယက်ရိုက်ခတ်မယ့် AC စီးရီးရဲ့ဂိမ်းသစ် Origins အခွေဟာ ပရိသတ်တွေအတွက် merchandise ပစ္စည်းအမျိုးစုံလင်စွာနဲ့ collectible figures တွေအပြင် Yeezy Sneaker artist ဖြစ်တဲ့ Dominic Lowman နဲ့ပေါင်းပြီး Assassin's Creed Origins ဗားရှင်းနဲ့ Yeezy ဖိနပ်တွေကိုထုတ်ပေးဦးမှာပါ။ ဒါပေမယ့် အဲဒီ AC Origins မော်ဒယ်နဲ့ Yeezy ဖိနပ်ဟာ ကမ္ဘာလုံးအတိုင်းအတာနဲ့မှ အရံပေါင်း ၁၆ ရံ တိတိပဲထွက်ရှိမှာဖြစ်ပြီး ငွေဘယ်လောက်ပေးပေး ဝယ်ယူလို့ရမှာမဟုတ်ပါဘူး။ နောက်တစ်ချိန်မှာရှားပါးပစ္စည်းစာရင်းဝင်မယ့် AC Origins Yeezy Sneaker ဟာ အဖြူအမဲနှစ်ရောင်ကာလာနဲ့ပဲလာမှာဖြစ်ပြီး ဖိနပ်ရဲ့ပုံစံကို အီဂျစ်ပရိမစ်များနဲ့အုတ်ဂူတွေအတွင်းမှာ ရေးဆွဲထားတဲ့နံရံဆေးရေးပန်းချီပုံတွေနဲ့ လက်ရာမြောက်စွာရေးဆွဲဒီဇိုင်းဖော်ပေးထားကိုတွေ့ရမှာဖြစ်ပြီး ရှေးဟောင်းအီဂျစ်ပြည်မျက်ရှင်နဲ့ Assassin's Creed စီးရီးရဲ့သင်္ကေတနှစ်ခု ပေါင်းစည်းထားတဲ့တံဆိပ်ကို ဖိနပ်ထိပ်မှာ ရေးဆွဲထားတာအတိုင်းသားတွေ့မြင်ရမှာပါ။ နံရံဆေးရေးပန်းချီပုံဖော်ထားတဲ့အောက်ခံအရောင်ဟာ ကြည့်လိုက်တာနဲ့ အီဂျစ်ပြည်ရဲ့ကန္တာရအငွေ့အသက်ခံစားရစေမယ့်အရောင်ဖြစ်ပြီး အမဲရောင်မော်ဒယ် sneaker ရဲ့ဖိနပ်ကြိုးတွေကိုတော့ မြွေခန္ဓာကိုယ်နဲ့အသွင်တူအောင် အသေးစိတ်ဖန်တီးထားပါတယ်။ Yeezy Sneaker artist Dominic Lowman ကိုယ်တိုင်ကိုယ်ကျအနုစိတ်ရေးဆွဲဖန်တီးထားတဲ့ တစ်ကမ္ဘာလုံးမှာမှ ၁၆ ရံအတိရှိမယ့် ဒီ sneaker တွေကို Ubisoft က giveaway လုပ်ပေးသွားမှာဖြစ်ပြီး အဲဒီ giveaway အစီအစဉ်မှာပါဝင်ခြင်းဖြင့်သာ ပရိသတ်များကပိုင်ဆိုင်နိုင်မှာပါ။



အစီအစဉ်မှာပါဝင်ချင်သူဂိမ်မာများဟာ @gamespot ကို Instagram မှာ follow လုပ်ပြီးပြိုင်ပွဲပို့စ်ကို Like လုပ်ရမှာပါ။ ပြီးတာနဲ့ သူငယ်ချင်းတစ်ယောက်ကို tag လုပ်ပြီး ကိုယ်အကြိုက်ဆုံး Assassin's Creed ဂိမ်းကို ကွန်မန့်ပေးရမှာဖြစ်ပါတယ်။ ဆုရရှိမယ့်ကံထူးရှင်ကို နိုဝင်ဘာလ ၁၃ ရက်နေ့မှာတရားဝင်ကြေညာသွားမှာဖြစ်ပြီး United Kingdom မှာနေထိုင်သူများသာ ဒီအစီအစဉ်မှာအကျုံးဝင်မှာဖြစ်ပြီး ပါဝင်ကံစမ်းလို့ရမှာဖြစ်ပါတယ်။

သေရွာပြန်ဖာရိုဘုရင်တွေ၊ ကြိမ်စာသင့်မာမီ Mummy တွေနဲ့ အီဂျစ်နတ်ဘုရားတွေအပါအဝင် စစ်အင်အားကြီးရိုမန်တွေနဲ့ရင်ဆိုင်ရမယ့် Assassin's Creed Origins ရဲ့ DLC အသစ်များ

Assassin's Creed စီးရီးရဲ့ဂိမ်းအသစ်ဖြစ်တဲ့ Assassin's Creed Origins ကို ဂိမ်မာများ အားလုံးကမျှော်လင့်ချက်ကြီးစွာ စောင့်မျှော်နေကြပါပြီ။ ရှေးကျလှတဲ့ခေတ်ဟောင်းအီဂျစ်ပြည်မှာ ဇာတ်အိမ်တည်ထားပြီး ဂိမ်းရဲ့အဓိကဇာတ်ကောင်ဖြစ်တဲ့ ဆူဒန်မြို့မြောက်ပိုင်းသား Bayek ကို အရာအားလုံးကိုစတင်ခဲ့တဲ့ Assassin Brotherhood ကြီးနဲ့အတူ တီဗီဖန်သားပြင်ပေါ်မှာ အားလုံးကမြင်နေကြပြီဆိုတာအသေအချာပါပဲ။ အရင်ခွေတွေနဲ့မတူဘဲ Assassin Brotherhood ကြီး ဘယ်လိုမျိုးဖြစ်ပေါ်လာသလဲဆိုတဲ့ဇာတ်ကြောင်းနဲ့ တစ်မူထူးခြားသွားတဲ့တဲ့ဂိမ်းကစားပုံစံ၊ ကွဲပြားတဲ့ဂိမ်းတွင်းလုပ်ဆောင်ချက်အသစ်တွေနဲ့ အနုပညာမြောက်စွာဖန်တီးထားတဲ့ Assassin Creed Origins ကို Ubisoft ကအရှိန်အဟုန်ကောင်းကောင်းနဲ့ ပရိသတ်တွေဆီတစ်ကျော့ပြန်တင်ဆက်လိုက်ပြန်ပါပြီ။

Ubisoft အနေနဲ့ AC စီးရီးရဲ့ထွက်ရှိခဲ့သမျှဂိမ်းတိုင်းအတွက် expansion တွေအမြဲတမ်းပေါင်းထည့်လေ့ထည့်ထမရှိခဲ့ပေမယ့် အမေရိကန်တော်လှန်ရေးစစ်သမိုင်းကိုအခြေခံထားတဲ့ Assassin's Creed 3 အတွက် King Of The Washington နဲ့ Tyranny Of The King, Assassin တစ်ဖြစ်လဲ၊ ပင်လယ်ဓါးပြတစ်ယောက်ရဲ့ဘဝကို လက်တွေ့ကျကျခံစားရမယ့် Assassin's Creed Black Flag အတွက်ဆိုရင် Freedom Cry, ဒုတိယမြောက်စက်မှုတော်လှန်ရေးဖြစ်ပွားနေတဲ့ကာလ၊ ၁၈ ရာစုနှောင်းလန်ဒန်မြို့နဲ့ အဲဒီအချိန်တဝိုက်ကလန်ဒန်မြို့အတွင်း ကြီးစိုးကျက်စားနေတဲ့လူဆိုးဂိုဏ်းတွေကိုပုံဖော်ပေးထားတဲ့ Assassin's Creed Syndicate အတွက်ဆိုရင်တော့ Jack The Ripper, အစရှိတဲ့ DLC (downloadable contents) ထပ်ပေါင်းဂိမ်းတွေပေါင်းထည့်ပေးပြီး မူရင်းဂိမ်းကိုအခြေခံထားတဲ့ ဂိမ်းတွင်းအတွေ့အကြုံသစ်တွေပေးစွမ်းခဲ့ပါတယ်။ AC ဂိမ်းတိုင်းရဲ့ဇာတ်ကြောင် း တွေဟာ နိုင်ငံအသီးသီး၊ ခေတ်အသီးသီးက တကယ့်ဖြစ်ရပ်မှန်သမိုင်းကြောင်းတွေအပေါ်မှာ အခြေခံထားတာဖြစ်တဲ့အတွက် AC ဂိမ်းတွေမှာ ထပ်မံပေါင်းထည့်ထားတဲ့ DLC တွေဟာလည်း သူတို့မူရင်းဂိမ်းရဲ့သမိုင်းကြောင်းတွေနဲ့ တစ်နည်းမဟုတ်တော့တစ်နည်း ဆက်နွယ်နေစမြဲပါ။ ဒီတော့ အခုနောက်ဆုံး Origins အခွေသစ်မှာရောဘယ်လိုမျိုး ထပ်ပေါင်း DLC တွေပါလာမလဲ? ထွက်လာဖို့ရောအစီအစဉ်ရှိရဲ့လား? အဲဒီလိုမေးခွန်းထုတ်နေသူများအတွက် အဖြေကရှိနေပါပြီ။ ဂိမ်မာများအားလုံးစိတ်ကြိုက် တစ်ဝကြီးအပိုဆောင်းဆော့ကစားနိုင်စေဖို့ Assassin's Creed Origins မှာမူရင်းဂိမ်းအပြင် Gold Edition, Deluxe Edition နဲ့နောက်ထပ် DLC နှစ်ခုကိုထပ်မံထည့်သွင်းပေးသွားမှာပါ။ ဒီတော့နောက်ထပ်ပေါင်းထည့်မယ့် DLC တွေကဘယ်လိုမျိုးလဲ? ဘယ်လိုမျိုးနောက်ခံသမိုင်းဇာတ်ကြောင်းတွေပါဝင်မလဲ? အစရှိနေတာတွေကိုစုစည်းပြီး ဂိမ်မာများအားလုံးသိရှိစေဖို့ ဒီကနေဖော်ပြလိုက်ရပါတယ်။

နယ်မြေသစ်ကိုကျူးကျော်ဝင်ရောက်လာတဲ့ အင်အာကြီးရိုမန်တွေရဲ့ရင်ဆိုင်ရမယ့် The Hidden Ones

သမိုင်းကြောင်းအရ ဘုရင်မကီလီယိုပတ်တရာရဲ့ချစ်သူ စစ်သူကြီးမက်ခ်အန်ထော်နီဟာ သူ့နဲ့အချစ်ပြိုင်ဖက်ဖြစ်တဲ့ အော်ခ်တဗီယန်ကိုရှုံးနိမ့်သွားပြီးနောက်ပိုင်းမှာ အီဂျစ်ပြည်ကြီးဟာရိုမန်တွေရဲ့သိမ်းပိုက်မှုကိုခံခဲ့ရပြီး ၃၀ ဘီစီနောက်ပိုင်းမှာတော့ အီဂျစ်ပြည်ကြီးကို ရိုမန်လက်အောက်ခံနယ်တစ်ခုအဖြစ် ပြန်လည်ထူထောင်လိုက်ပါတယ်။ အခုလည်းဒီ DLC မှာ Assassin ဖြစ်သူအဓိကဇာတ်ဆောင် Bayek ဟာ အဲဒီလိုကျူးကျော်ဝင်ရောက်လာတဲ့ အင်အားကြီးရိုမန်တပ်တွေရဲ့သိမ်းပိုက်မှုကနေ အီဂျစ်ပြည်ကြီးကိုဘယ်လိုမျိုးကာကွယ်သွားမလဲဆိုတာကို ဂိမ်မာများမျက်ဝါးထင်ထင်တွေ့မြင်ရုံတင်မက Bayek နေရာကနေဝင်ရောက်ပြီးခံစားနိုင်မှာပါ။ ပြင်းထန်လှတဲ့စစ်ပွဲတွေနဲ့ အီဂျစ်ပြည်၊ ရိုမန်စစ်တပ်အင်အားချင်းပြိုင်မှုတွေကြား တကယ့်သမိုင်းထဲကအတိုင်းရှုံးနိမ့်သွားမလား? ဒါမှမဟုတ် ဂိမ်မာတွေကပဲသမိုင်းကိုကိုယ်တိုင်ပြောင်းလဲနိုင်မလား? အဆုံးသတ်ကဘယ်လိုမျိုးဖြစ်သွားမလဲဆိုတာတော့ ဂိမ်မာတွေအပေါ်မှာမူတည်နေပါတယ်။ 

သမိုင်းတစ်ခေတ်ကသေရွာပြန်ဖာရိုဘုရင်တွေ၊ မာမီဖုတ်ကောင်တွေနဲ့ရင်ဆိုင်ရမယ့် The Curse Of The Pharoahs DLC

The Mummy ရုပ်ရှင်ဇာတ်ကားကို အားလုံးမှတ်မိကြမယ်ထင်ပါတယ်။ ရှေးခေတ်အီဂျစ်ပြည်မှာကျင့်သုံးခဲ့တဲ့ ရက်စက်ကြမ်းကြုတ်တဲ့ဘုရင်စနစ်၊ ကန္တာရကင်းမြီးကောက်ကြီးတွေနဲ့ အသက်ပြန်ဝင်လာတဲ့မာမီရုပ်အလောင်းတွေကို အတိုင်းသားတွေ့မြင်ခဲ့ရလို့ ပရိသတ်တွေလုံးဝအကြိုက်တွေ့ခဲ့တဲ့ရုပ်ရှင်ဖြစ်ပါတယ်။ ဒါပေမယ့်အခုဒီ The Curse Of The Pharoahs ဆိုတဲ့ DLC မှာ အဲဒါတွေအားလုံးကို Assassin တစ်ယောက်အနေနဲ့ဂိမ်မာတွေကရင်ဆိုင်ရမှာပါ။ အသက်ပြန်ဝင်လာတဲ့ဖာရိုဘုရင်ရုပ်အလောင်းတွေ၊ အဆမတန်ကြီးမားလှတဲ့ကင်းမြီးကောက်ကြီးတွေ၊ ပိရမစ်ထဲက မာမီအလောင်းကောင်တွေ အစရှိတဲ့ရန်သူသစ်တွေကို Assassin တစ်ယောက်ဖြစ်တဲ့အဓိကဇာတ်ကောင် Bayek အနေနဲ့ ချွပ်ချွပ်ချုံချုံရင်ဆိုင်တိုက်ပွဲရမှာပါ။ AC ဂိမ်းစီးရီးအနေနဲ့ အမြဲတမ်းလက်တွေ့ဆန်တဲ့ဇာတ်ကြောင်းမျိုးကိုသာ ဂိမ်းအတွင်းမှာဖော်ပြလေ့ရှိခဲ့ပေမယ့် အခုဒီမှာတော့ စိတ်ကူးယဉ်ဒဏ္ဍာရီတစ်ခုသဖွယ်လူတွေသမုတ်ကြတဲ့ ဟိုးသမိုင်းတစ်ခေတ်ကသေရွာပြန်ဖာရိုဘုရင်တွေနဲ့ မာမီအလောင်းကောင်တွေဆီပြန်လည်ခေါ်ဆောင်သွားတော့မှာပါ။

လက်နက်ဝတ်စုံသစ်တွေပါဝင်တဲ့ပက်ကေ့ချ်နှစ်မျိုးနဲ့ အီဂျစ်နတ်ဘုရားတွေနဲ့ကြုံတွေ့ရမယ့် Trial Of Gods

Assassin's Creed Origins ကိုမူရင်းဂိမ်းချည်းပဲမဟုတ်ပဲ Edition ဗားရှင်းတွေကိုဝယ်ယူသူများအဖို့တော့ ဝတ်စုံအသစ်နဲ့လက်နက်အသစ်တွေပါဝင်တဲ့ ပက်ကေ့ချ်နှစ်ခုကိုထပ်ဆောင်းရရှိသွားမှာပါ။ အဲဒီပက်ကေ့ချ်တွေကတော့ ရိုမန်စတိုင်လက်နက်နဲ့ဝတ်စုံတွေပါဝင်တဲ့The Roman Centurian Pack နဲ့ ကန္တာရလက်နက်ဝတ်စုံသစ်တွေကိုအသုံးပြုခွင့်ရမယ့် Horus Pack တို့ပဲဖြစ်ကြပါတယ်။ အဲဒီလိုအခကြေးငွေနဲ့ဝယ်ယူရမယ့် add-ons တွေအပြင် အခမဲ့ရရှိနိုင်မယ့်ကဏ္ဍတွေအနေနဲ့ ဂိမ်းစတင်ဖြန့်ချိပြီး အချိန်ဆယ့်ငါးရက်အကြာမှာဆော့ကစားခွင့်ရှိမယ့် အီဂျစ်နတ်ဘုရားဘော့စ်တွေနဲ့တိုက်ပွဲတွေပါဝင်တဲ့ Trail Of Gods ကဏ္ဍ၊ ဂိမ်းလောကကြီးထဲမှာလှည့်လည်သွားလာနေရင်းကနေ လျှိ့ဝှက် ကုန် သည်တစ်ယောက်ပေးအပ်တဲ့ နေ့စဉ်တာဝန်တွေကို ပြီးမြောက်အောင်ထမ် း ဆောင်သွားရင် တန်ဖိုးမြင့်ဆုပစ္စည်း တွေရရှိမယ့် The Nomad Bazaar's ကဏ္ဍ၊ ဒါ့အပြင်လူသတ်ကွင်းပြင်ကျယ်ကြီးထဲမှာ ရန်သူတွေကိုတစ်ကြော့ပြီးတစ်ကြော့ရင်ဆိုင်ရမယ့် Horde Mode နဲ့ဂိမ်းတွင်းပုံရိပ်တွေကို လိုသလိုဖမ်းယူရိုက်ကူးနိုင်မယ့် Photo Mode တွေကိုလည်း ဂိမ်မာတွေအတွက်ထည့်သွင်းပေးထားပါတယ်။

DLC များထွက်ရှိလာမယ့်ရက်စွဲအသီးသီး၊ သိရှိရသမျှနဲ့ အနှစ်ချူပ်

Assassin's Creed Origins ကို PC, PS4 နဲ့ Xbox ပလက်ဖောင်းများမှာ အသီးသီးဆော့ကစားနိုင်မှာဖြစ်တဲ့အတွက်ဂိမ်း DLC များဟာလည်း အလားတူပါပဲ။ PC ပလက်ဖောင်းမှာဆော့ကစားနိုင်မယ့် ဂိမ်းလိုအပ်ချက် Specs အပြည့်အစုံဟာလည်း မကြာသေးခင်ကမှအတိအကျထွက်ရှိလာခဲ့ပါပြီ။ ရက်စွဲတွေအနေနဲ့ အင်အားကြီးမားလှတဲ့ရိုမန်တွေရဲ့ကျူးကျော်မှုကို နယ်မြေသစ်မှာရင်ဆိုင်ရမယ့် The Hidden Ones DLC ဟာ ၂၀၁၈ ခုနှစ်၊ ဇန်နဝါရီလမှာထွက်ရှိဖြစ်ပြီး သမိုင်းတစ်ခေတ်ကသေရွာပြန်ဖာရိုဘုရင်တွေ၊ မာမီဖုတ်ကောင်တွေနဲ့ရင်ဆိုင်ရမယ့် The Curse Of The Pharoahs DLC ကိုတော့ ၂၀၁၈ ခုနှစ်၊ မတ်လမှာမှ ဂိမ်မာများကစတင်ဆော့ကစားနိုင်မှာပါ။ အထက်ဖော်ပြပါ DLC တွေအပြင် အီဂျစ်ပြည်ကြီးတစ်ခုလုံးရဲ့နက်ရှိုင်းလှတဲ့လျှို့ဝှက်ချက်တွေကို သိရှိနိုင်မယ့် Discovery Mode ကိုလည်းထည့်သွင်းပေးထားပါတယ်။ အဲဒီ Mode မှာတော့ ကိုယ့်ရဲ့ဂိမ်းတွင်းတိုက်ခိုက်မှုစနစ်ကိုပိတ်ပေးထားမှာဖြစ်ပြီး ဂိမ်မာတွေကိုလေ့လာရေးခရီးတစ်ခုသွားနေရသလိုခံစားရအောင် ဖန်တီးပေးထားမှာပါ။ အချိန်ကာလကိုကွက်တိကိုက်ညှိပြီး အားလုံးလက်ထဲအရောက်ထည့်ပေးမယ့် AC စီးရီးရဲ့နောက်ဆုံးဂိမ်းသစ်ဖြစ်တဲ့ Assassin's Creed Origins ဂိမ်းဟာ DLC တွေစုံစုံလင်လင်နဲ့ ဂိမ်းလောကကိုပြန်ပြီးဂယက်ရိုက်လာစေတော့မှာပါ။ ဒီတော့စိတ်ဝင်စားစရာတွေပြည့်နှက်နေတဲ့ ရှေးဟောင်းအီဂျစ်ပြည်ကြီးကို ကိုယ်တိုင်ကိုယ်ကျလေ့လာခွင့်ရမယ့်အပြင် Assassin Creed Brotherhood ကြီးဘယ်လိုမျိုးထွက်ပေါ်လာသလဲဆိုတာကိုလည်း သိရှိရမှာဖြစ်တဲ့အတွက် ဒီဂိမ်းဟာ AC ပရိသတ်များသာမက အခြားဂိမ်းချစ်သူပရိသတ်ဂိမ်မာများပါ လုံးဝကိုလက်မလွှတ်သင့်တဲ့ဂိမ်းတစ်ခုဖြစ်ပါတယ်လို့ပြောလိုက်ရပါတယ်။

Yan
Ref: Ign, Kotaku, Gamespot, Pastmagazine, Gamespot

ထိုင်းရိုးရာဒဏ္ဍာရီပုံပြင်တစ်ပုဒ်နောက်ကွယ်က သွေးပျက်စရာအမှန်တရားကိုရှာဖွေရမယ့် Home Sweet Home ဂိမ်း

ခြောက်ခြားဖို့ကောင်းလှတဲ့ ထိုင်းသရဲကားတွေ၊ ထိုင်းစုန်းအောက်လမ်းကားတွေကို အားလုံးအနည်းဆုံးတစ်ခေါက်လောက်တော့ ကြည့်ဖူးကြမှာပါ။ ငယ်စဉ်ဘဝကတည်းက ထိုင်းသရဲရုပ်ရှင်တွေနဲ့ တစ်ကွေ့မဟုတ်တစ်ကွေ့ရင်းနှီးခဲ့ဖူးသူအတွက်တော့ ထိုင်းတစ္ဆေသရဲတွေဟာ ဘယ်လောက်တောင်မှထိတ်လန့်ဖွယ်ရာအတိနဲ့ လူတွေကိုအန္တရာယ်ပြုခြောက်လှန့်နိုင်တယ်ဆိုတာ သိရှိကြပြီးဖြစ်မှာပါ။ လည်ပင်းကနေတောက်လျှောက်အောက်အထိ ဝမ်းတွင်းကလီစာတွဲလောင်းကျနေတဲ့သရဲမ Krasue, လူ့ဘဝမှာရှင်သန်နေထိုင်နိုင်အောင် စုန်းအတတ်ပညာနဲ့ အသက်ပြန်သွင်းထားတဲ့လူသားဖုတ်ကောင် Hun Phayon, မီးလောင်ထားတဲ့ဦးရေပြားထက်မှာဆံပင်ကျို့တို့ကျဲတဲနဲ့ ရိုးရာထိုင်းဝတ်စုံကိုဝတ်ဆင်ထားပြီး ကလေးတွေရဲ့စိတ်ဝိညာဉ်လိပ်ပြာကို အောက်လမ်းနည်းတွေနဲ့ညှင်းပန်းနှိပ်စက်တဲ့ Kuman Thang, မီးဖွားနေချိန်မှာအသက်ဆုံးရှုံးခဲ့ရတဲ့ နာကျည်းချက်အပြည့်နဲ့သရဲမ Phi Tai Thang Khom အစရှိတဲ့ထင်ရှားတဲ့တစ္ဆေသရဲဇာတ်ကောင်တွေအပြင် တချို့ပုံပြင်တွေကိုလည်းရုပ်ရှင်ဇာတ်ကားတွေအဖြစ်ပြန်လည်ဖန်တီးရိုက်ကူးခဲ့ကြလို့ မြန်မာနိုင်ငံပရိသတ်တွေကြားမှာတောင် ဓါတ်ပုံသရဲ၊ ပိန္နဲသီးသရဲ၊ ခေါင်းပြတ်သရဲဆိုပြီးတောင် အမည်တွင်ကျန်ရစ်ခဲ့ပါသေးတယ်။ ကျွန်တော်တို့ငယ်စဉ်ဘဝကကြားသိဖူးခဲ့တဲ့ ဖျာသရဲ၊ ခြေတစ်ပေါင်ကျိုးသရဲ၊ ဘုန်းကြီးသရဲ အစရှိတဲ့သရဲပုံပြင်တွေဟာ ထိုင်းနိုင်ငံမှာတင်မက အခြားအရှေ့တောင်အာရှအိမ်နီးချင်းနိုင်ငံများမှာပါ နာမည်ကျော်လူပြောများကြတဲ့ ရှေးရိုးရာသရဲပုံပြင်ဇာတ်လမ်းတွေဖြစ်ပါတယ်။

အရှေ့တောင်အာရှတဝှမ်းကပုံပြင်တွေအပြင် ကမ္ဘာနဲ့အဝှမ်းမှာရှိတဲ့ရှေးရာစုနှစ်တွေကသရဲတစ္ဆေပုံပြင်တွေကို အခုခေတ်အခုအချိန်ထိ လူတွေသိရှိနေကြတာဟာ အဲဒီဇာတ်လမ်းတွေကို ဝတ္ထုဇာတ်လမ်း၊ ရုပ်ရှင်ဇာတ်ကားတွေ၊ ဂိမ်းတွေအဖြစ် ပုံစံအမျိုးမျိုးပြန်လည်ပုံဖော်ပြီး အသက်သွင်းခဲ့ကြလို့ပါပဲ။ သွေးပျက်လောက်စရာ Horror ဂိမ်းပေါင်းမြောက်မြားစွာရှိပေမယ့် တကယ့်အစစ်အမှန်သရဲတစ္ဆေဇာတ်ကြောင်းနဲ့ဂိမ်းကောင်းဆိုတာ လက်ချိုးရေတွက်လို့ရတဲ့အပြင် အာရှတိုက်ထဲကဂိမ်းဆိုရင် ပိုပြီးတောင်ရွေးထုတ်ဖို့ခက်ပါသေးတယ်။ အာရှတိုက်အတွင်းမှာ ဂျပန်နိုင်ငံကလွဲရင် ဂိမ်းဖန်တီးထုတ်လုပ်တဲ့အဖွဲ့အစည်း၊ ဂိမ်းကုမ္ပဏီတွေဆိုတာမရှိသလောက် ရှားပါးတဲ့အပြင်ဂိမ်းချစ်သူပရိသတ်တွေကလည်း ဂျပန်နိုင်ငံရဲ့ horror ဂိမ်းတွေကို သိပ်အားပေးလေ့ပေးထမရှိတဲ့အတွက် ကမ္ဘာ့ဂိမ်းဈေးကွက်မှာဂျပန်နိုင်ငံဟာ horror ဂိမ်းထွက်ရှိမှုနည်းပါးလှပါတယ်။ ဒါပေမယ့် အာရှတိုက်ကသရဲဂိမ်းကောင်းတွေကိုမှ ကစားချင်သူများအဖို့ အခုဒီမှာ Horror ဂိမ်းသစ်တစ်ခုလာပါပြီ။ ထူးခြားတာက အဲဒီဂိမ်းကို ဂိမ်းဈေးကွက်မှာနှာတစ်ဖျားသာနှင့်ပြီးသား အရှေ့ပိုင်းအာရှတိုက်နိုင်ငံတွေက ဖန်တီးထုတ်လုပ်ခဲ့တာမဟုတ်ဘဲ အရှေ့တောင်အာရှနိုင်ငံတစ်နိုင်ငံအတွင်းက ဂိမ်းဖန်တီးသူများအဖွဲ့က ကိုယ်တိုင်ကိုယ်ကျဖန်တီးထုတ်လုပ်ခဲ့တာပါ။ လက်ရှိခေတ်ဂိမ်းဈေးကွက်ထဲကို တိုးဝင်လာတဲ့ အရှေ့တောင်အာရှနိုင်ငံထုတ် Horror ဂိမ်းသစ်က ဘယ်လိုဂိမ်းမျိုးလဲ? အားလုံးမျှော်လင့်ထားတဲ့အတိုင်းဖြစ်ပါ့မလား? အားလုံးကိုခြုံငုံပြီး သုံးသပ်နိုင်အောင်လို့ သိရှိရသမျှကိုဒီမှာစုစည်းပြီး ဖော်ပြပေးလိုက်ပါတယ်။

ဆန်းကြယ်စွာပျောက်ဆုံးသွားတဲ့ဇနီးနဲ့ လျှို့ဝှက်တဲ့အမည်မသိအိမ်ပျက်ကြီး

Tim နဲ့သူ့ရဲ့ဇနီးဖြစ်သူဟာ မအိုဟောင်းသွားတဲ့အချစ်မျိုးနဲ့ တစ်ယောက်ကိုတစ်ယောက်ချစ်ကြပြီး သာယာတဲ့အိမ်ထောင်ရေးတစ်ခုကို တည်ထောင်ထားတာပါ။ ဒါပေမယ့် တစ်ညမှာတော့သူ့ရဲ့ဇနီးဖြစ်သူဟာ ပျောက်ချင်းမလှပျောက်ဆုံးသွားခဲ့ပါတယ်။ ဘယ်လိုအကြောင်းမျိုးကြောင့်ပျောက်ဆုံးသွားလဲဆိုတာ အတိအကျမသိရပေမယ့် သူ့ရဲ့ဇနီးသည်နဲ့ပတ်သက်တဲ့သတင်းအစအနကို လုံးဝမကြားသိခဲ့ရပါဘူး။ လျှို့ဝှက်စွာပျောက်ဆုံးသွားတဲ့ ချစ်ရသူဇနီးသည်အပေါ်မှာ အချိန်အကြာကြီးလွမ်းဖျားလွမ်းနာကျနေတဲ့ Tim ဟာ ညတစ်ညမှာတော့ ထူးဆန်းစွာနဲ့အိမ်ပျက်ကြီးတစ်လုံးရဲ့အထဲမှာ နိုးလာခဲ့ပါတယ်။ သူရောက်နေတာနေရာက ဘယ်နေရာလဲ? ဒါသူ့ရဲ့အိမ်လား? ပျောက်ဆုံးသွားတဲ့ဇနီးသည်နဲ့ ဘယ်လိုမျိုးပတ်သက်နေမလဲဆိုတာကို ဂိမ်မာများကိုယ်တိုင် စတင်အဖြေရှာရတော့မှာပါ။

အိမ်ပျက်ကြီးထဲကမိန်းကလေးနဲ့ ကိုယ့်ရဲ့လွတ်မြောက်ရာလမ်းစ

ရုတ်တရတ်အိမ်ပျက်ကြီးထဲကနေ နိုးထလာတဲ့ Tim ဟာ ထွက်ပေါက်ကိုအရင်ဆုံးရှာဖွေရမှာပါ။ ကိုယ်ရောက်နေတဲ့အခန်းထဲကလှေကားတန်းကနေတဆင့် အောက်တစ်ထပ်ကိုဆင်းလိုက်တဲ့အခါမှာ မိန်းကလေးတစ်ယောက်ကိုတွေ့ရပါလိမ့်မယ်။ အမှောင်အတိဖုံးပြီး လူသူအရိပ်အယောင်သဲ့သဲ့တောင်မကြားရတဲ့အိမ်ပျက်ကြီးထဲက မိန်းကလေးက ဘယ်သူများပါလဲ? ထွက်ပေါက်ဟာဘယ်နားမှာရှိသလဲလို့ အဲဒီမိန်းကလေးကိုအကူအညီတောင်းဖို့ရည်ရွယ်လိုက်ပေမယ့် ကံဆိုးစွာနဲ့ပဲ အဲဒီမိန်းကလေးဟာ ကိုယ့်ကိုကူညီမဲ့သူတစ်ယောက်မဟုတ်ခဲ့ပါဘူး။ ခြောက်ခြားဖို့ကောင်းလှတဲ့အိမ်ပျက်ကြီး၊ လူသားမဟုတ်တဲ့မိန်းကလေးတစ်ယောက်နဲ့အတူ ဝေဝါးတဲ့အတွေးတွေနဲ့ဂယောင်ခြောက်ခြားဖြစ်နေတဲ့ Tim အတွက် လွတ်မြောက်ရာလမ်းစက ဘယ်မှာရှိနေတာလဲ? အခုအချိန်အထိ ဘယ်သူမှမဖော်ထုတ်ရသေးတဲ့ အနက်နဲဆုံးလျှို့ဝှက်ချက်တစ်ခုက သွေးပျက်ဖို့အကောင်းဆုံးအမှန်တရားလား?

ရှောင်ပြေးရမယ်၊ အဖြေရှာရမယ်၊ သွေးပျက်မှုတွေနဲ့ရင်ဆိုင်ရမယ်

နာရီပိုင်းအနည်းငယ်သာရှိတဲ့ဂိမ်းတစ်ခုဖြစ်ပေမယ့်လည်း ဂိမ်းဆော့နေရင်းကြုံရမယ့်အဖြစ်အပျက်တွေကြားမှာ စိတ်မမွန်းကြပ်သွားဖို့လိုပါတယ်။ ဘယ်လောက်ပဲအကြပ်ရိုက်နေတဲ့အခြေအနေကိုရောက်ရောက် ကိုယ်ဟာတစ်ဖက်သားကို ကိုယ်ထိလက်ရောက်ပြန်လည်တုံ့ပြန်နိုင်မှာမဟုတ်ပါဘူး။ ကိုယ်ရောက်နေတဲ့အခြေအနေကိုသိရမယ်၊ ကိုယ်လိုရာနေရာကိုသွားဖို့ အချိန်ကိုစောင့်ရမယ်၊ တစ်ခါတလေပုန်းခိုရမှာဖြစ်သလို တစ်ခါတလေလည်း ရှောင်ပြေးရမှာဖြစ်ပါတယ်။ မမျှော်လင့်ထားတဲ့အချိန်မျိုးမှာ ကျရောက်လာမယ့်သွေးပျက်မှုတွေကိုရင်ဆိုင်နိုင်အောင် စိတ်ကိုပြင်ဆင်ထားဖို့လိုပါတယ်။ ဒါ့အပြင်ဇာတ်လမ်းတောက်လျှောက်မှာ အဖြေရှာရမယ့်ပဟေဠိတွေ၊ ဉာဏ်စမ်းတွေကို စုံလင်အောင်ထည့်သွင်းပေးထားပြီး အဲဒါတွေကိုကျော်ဖြတ်နိုင်မှ ကိုယ်သွားလိုရာနေရာကို ရောက်ရှိမှာဖြစ်ပါတယ်။ အဓိကကတော့ Tim ရဲ့ဇနီးဘာကြောင့်ပျောက်သွားခဲ့လဲဆိုတဲ့ အဖြေကိုရှာရမှာပါ။ အခုသူရောက်နေတဲ့နေရာနဲ့ ကြုံခဲ့ရတဲ့ကြောက်မက်ဖွယ်မိန်းကလေး၊ အရာအားလုံးနဲ့ချိတ်ဆက်မှုနေတဲ့အမှန်တရားတွေကို မဝေးတော့တဲ့တစ်ချိန်မှာပေါ်ပေါက်လာအောင် ကြိုးစားရမှာပါ။

ထိုင်းနိုင်ငံအခြေစိုက်ဂိမ်းဖန်တီးသူများအဖွဲ့ရဲ့ ပြောင်မြောက်တဲ့ဖန်တီးမှု 

 Home Sweet Home ဂိမ်းတစ်ခုလုံးကို ထိုင်းနိုင်ငံ၊ ဘန်ကောက်မြို့အခြေစိုက်ဂိမ်းဖန်တီးသူအဖွဲ့ဖြစ်တဲ့ Yggdrazil အဖွဲ့က ဂုဏ်ယူစွာနဲ့ဖန်တီးထုတ်လုပ်ခဲ့တာဖြစ်ပြီး ဒီဂိမ်းကို ရှေးဟောင်းထိုင်းဒဏ္ဍာရီတစ္ဆေဇာတ်လမ်းအပေါ်မှာ အခြေခံထားတယ်လို့သိရပါတယ်။ ဒီဂိမ်းမှာနာမည်ကျော် Unreal အင်ဂျင်ကို အသုံးပြုထားပြီး လက်လီလက်ကားဝယ်ယူလို့ရသလို Steam ကနေတဆင့်လည်း ဒေါ်လာ ၁၇ ကျပ်နဲ့ ဝယ်ယူဆော့ကစားနိုင်ပါတယ်။ လက်ရှိအနေနဲ့ဆိုရင် Home Sweet Home ဂိမ်းအပြည့်အစုံထွက်ရှိပြီးတာ အချိန်ကာလနှစ်ပါတ်ရှိနေပြီဖြစ်ပြီး Steam review တွေအရတော့ ပြောစရာတကွက်မတွေ့ရဘဲ ကမ္ဘာနဲ့အဝှမ်းက စမ်းသပ်ဆော့ကြည့်ကြတဲ့ ဂိမ်မာတွေလက်မာထောင်ထားတာကို တွေ့မြင်ရမှာဖြစ်ပါတယ်။ ထိုင်းနိုင်ငံ၊ ဘန်ကောက်မြို့အခြေစိုက် Yggdrazil ဂိမ်းအဖွဲ့အတွက်တော့ ကျေနပ်အားရစရာပါပဲ။

ဂိမ်းတစ်လုံးမှာပါဝင်တဲ့ ထူးခြားချက်တွေ၊ ဆော့နိုင်မယ့်ပလက်ဖောင်းနဲ့ အနှစ်ချူပ်

ဂိမ်းတစ်ခုလုံးမှာ ကိုယ်ကျင်လည်ရမယ့်ပတ်ဝန်းကျင်ကို ထိုင်းရိုးရာအငွေ့အသက်တွေလွှမ်းခြုံဖန်တီးပေးထားပြီး ဇာတ်လမ်းတစ်လျှောက်မှာ ကိုယ်ကြားရမယ့်နောက်ခံစကားပြောတွေဟာ ထိုင်းနိုင်ငံရဲ့ရှေးဟောင်းဒဏ္ဍာရီတစ္ဆေဇာတ်လမ်းကို အခြေခံထားပါတယ်။ ဂိမ်းကစားမှုပုံစံဟာ စိန်ခေါ်မှုအပြည့်ရှိပြီး ကိုယ့်ရဲ့လျှို့ဝှက်စွာသွားလာနိုင်မှုအပေါ်မှာ မူတည်နေပါတယ်။ ကွဲပြားတဲ့ဂိမ်းကစားမှုအတွေ့အကြုံတွေကို ခံစားရစေဖို့အတွက် စူးစမ်းရှာဖွေတာတွေ၊ ပဟေဠိအဖြေရှာတာတွေ ထည့်သွင်းပေးထားတဲ့အပြင် အားလုံးထဲက အကောင်းဆုံးတစ်ချက်ကတော့ VR စနစ်ကိုထောက်ပံ့ပေးထားတဲ့အတွက် Oculus Rift တွေကိုအသုံးပြုပြီး လက်တွေ့အဆန်ဆုံး၊ ရင်ခုန်စရာဂိမ်းတွင်းအတွေ့အကြုံတွေကို ခံစားနိုင်ဦးမှာပါ။ လောလောဆယ်မှာတော့ ပလက်ဖောင်းအနေနဲ့ PC တစ်မျိုးတည်းမှာပဲ Home Sweet Home ဂိမ်းကိုဆော့ကစားနိုင်ဦးမှာဖြစ်ပြီး နောက်လာမယ့်အနာဂတ်မှာတော့ ပလက်ဖောင်းတွေတိုးချဲ့လာနိုင်ဖွယ်ရာရှိပေမယ့် သတင်းအစအနတော့ ဘာမှမကြားသိရသေးပါဘူး။ အရှေ့တောင်အာရှနိုင်ငံများဟာ ကိုယ့်ဖွံဖြိုးနှုန်းနဲ့ကိုယ်ရှေ့ဆက်နေပေမယ့် တိုးတတ်ပြီးအနောက်နိုင်ငံမာျးနဲ့ယှဉ်ရင် နယ်ပယ်အချို့မှာခြေလှမ်းများနောက်ကျနေဆဲဖြစ်ပါတယ်။ အဲဒီလိုနယ်ပယ်တွေထဲမှာ ဂိမ်းနယ်ပယ်ဟာလည်းအပါအဝင်ပါပဲ။ အခုလိုမျိုး ကိုယ့်နိုင်ငံရိုးရာကိုထင်ဟပ်စေတဲ့ နိုင်ငံတကာတန်းဝင်တဲ့ဂိမ်းတစ်ခုကို ကိုယ့်ခြေကိုယ့်လက်နဲ့ လွတ်လပ်စွာဖန်တီးခဲ့ပြီး နိုင်ငံတကာဂိမ်းဈေးကွက်မှာ အနေအထားတစ်ခုရအောင် စွမ်းဆောင်နိုင်ခဲ့တာဟာ ထိုင်းနိုင်ငံအခြေစိုက် Yggdrazil ဂိမ်းအဖွဲ့ရဲ့ပြောင်မြောက်တဲ့လုပ်ရပ်ပါပဲ။ ဘက်ပေါင်းစုံမှာစင်းလုံးချောပြီးပြည့်စုံတဲ့ ဂိမ်းတစ်ခုလို့မဆိုသာပေမယ့် အရည်အသွေးမှီတဲ့ဂိမ်းတစ်ခုအဖြစ် ကမ္ဘာအဝှမ်းကဂိမ်မာများတောင် လက်ခံခဲ့တဲ့အတွက် အရှေ့တောင်အာရှနိုင်ငံတစ်နိုင်ငံရဲ့အဲဒီလိုမျိုးဂိမ်းတစ်ခုကို အရှေ့တောင်အာရှသားတွေကိုယ်တိုင် စမ်းဆော့ကြည့်သင့်ကြောင်းကို ဒီကနေတဆင့် တိုက်တွန်းလိုက်ရပါတယ်။

Yan
Ref: Steam, Homesweethome, bloody-disgusting, oneangrygamer