မတ်လ ၁၈ ရက်နေ့ကကျင်းပခဲ့တဲ့ PS5 ကြေညာချက်အရ PS5 နဲ့ပတ်သက်ပြီး Sony ဆီမှာ ဘယ်လိုရည်မှန်းချက်နဲ့ အကြံအစည်တွေရှိနေလဲ? Sony ကို ကျွန်တော်တို့လျှော့တွက်နေမိသလား? 🎮🌫

အခုအချိန်ဟာ ဂိမ်မာများအတွက် လွန်စွာကိုခေါင်းရှုပ်ဖို့ကောင်းတဲ့အချိန်တစ်ခုဖြစ်ပါတယ်။ တစ်ကမ္ဘာလုံးက ပရိသတ်တွေ နှစ်ရှည်လများ မျှော်လင့်ချက်ကြီးစွာ စောင့်မျှော်နေကြတဲ့ PS5 ရဲ့တရားဝင်ကြေညာချက်ဟာ တကယ်ဖြစ်လာပါပြီတဲ့။ အဲဒီကြေညာချက်ကို တိုက်ရိုက်ထုတ်လွှင့်မယ့် Live Stream မစတင်ခင်ကတည်းက ပရိသတ်တွေဟာ နာရီပေါင်းများစွာကြိုတင်စောင့်ဆိုင်းပြီး Sony ဘက်က ဘာတွေကိုဒီတစ်ခေါက်မှာချပြသွားမလဲဆိုတာ တစ်ခဲနက် စောင့်ကြည့်လို့နေကြပါတယ်။ ဒီတစ်ခေါက် Sony ရဲ့ PS5 တရားဝင်ကြေညာချက်ကို ထုံးစံအတိုင်းပဲ Playstation ဂိမ်းစက်များရဲ့ဖန်တီးသူဖခင် Mark Cerny ကိုယ်တိုင် စင်ပေါ်မှာတတ်ပြီး ကိုယ်တိုင်တက်ရောက်တင်ဆက်သွားခဲ့တာဖြစ်ပါတယ်။ Live Stream စတင်ခဲ့ပြီး Mark ကိုယ်တိုင် PS5 ရဲ့အဆင့်မြင့်တဲ့တည်ဆောက်ပုံ၊ နည်းပညာပိုင်းဆိုင်ရာတိုးမြှင့်ချက်များနဲ့ သက်ဆိုင်ရာအချက်အလက်တွေကို ပြောပြခဲ့တာဟာဆိုရင် တင်ဆက်ချိန်မှာ တစ်နာရီဝန်းကျင်ကြာမြင့်ခဲ့ပါတယ်။ ဒါပေမယ့်လို့ Live Stream ပြီးပြီးသွားချင်းပဲ ပရိသတ်တွေအနေနဲ့ PS5 နဲ့ပတ်သက်ပြီး ရှေ့တိုးရမလို နောက်ဆုတ်ရမလိုနဲ့ ဘယ်အရာကိုလက်ဆုပ်လက်ကိုင်ပြုပြီး အားခဲရမှန်းမသိဖြစ်သွားတာကတော့ အမှန်ပါပဲ။ ဘာကြောင့်လည်းဆိုတော့ Sony အနေနဲ့ PS5 အကြောင်းကိုကြေညာချပြတဲ့ ပထမဦးဆုံး ဒီ Live Stream မှာ ဂိမ်မာထုကြီးအတွက် တစ်ခဲနက်စိတ်အားတတ်သွားစေမယ့် အရာမျိုးကိုထုတ်မပြောခဲ့လို့ပါပဲ။ ဒါဟာ ကျွန်တော်တို့ဂိမ်းလောကရဲ့ပကတိယူဆချက်လား? PS5 ရဲ့ထုတ်ဖော်ချက်တစ်ချို့ဟာ တကယ်ပဲရင်ခုန်စရာမကောင်းတာလား? ဒါမှမဟုတ် Sony ဟာ အကြံအစည်ဟာ စီစဉ်ထားသလိုပဲ တစ်ဆင့်ချင်းစီသွားနေတာလား? တစ်ချက်လောက်သုံးသပ်ကြည့်လိုက်ရအောင် ⬇️ PS5 ရဲ့ကနဦးထုတ်ဖော်ချက်တွေနဲ့ ပတ်သက်ပြီး လုံးဝအားမရဘူးဖြစ်နေတဲ့သူတွေအနေနဲ့ ဘာကိုသိရမလဲဆိုတော့ မနေ့ကကျင်းပတဲ့ Sony ရဲ့ PS5 Live Stream ဟာ ဂိမ်းတွေကိုတစ်နဲနက်ချစ်ခင်တွယ်တာမြတ်နိုးတဲ့ ကျွန်တော်တို့ဂိမ်မာထုကြီးဆီ တိုက်ရိုက်ရည်ရွယ်တာမဟုတ်ဘဲ ဂိမ်းရေးဆွဲဖန်တီးသူ developer များအတွက်ကိုသာ ဦးတည်ပြီးပြောကြားသွားတယ်ဆိုတာပါပဲ။ တင်ဆက်မှုတစ်လျှောက်မှာ Mark ဟာ PS5 ဂိမ်းစက်ရဲ့ နည်းပညာပိုင်းဆိုင်တိုးမြှင့်မှုတွေ၊ စနစ်သစ်ထည့်သွင်းတည်ဆောက်ထားမှုတွေ၊ ဂိမ်းဖန်တီးရေးဆွဲသူများကိုရည်ရွယ်တဲ့ Hardware ပိုင်း အသေးစိတ်အချက်အလက်တွေကို ရှင်းလင်းပြောပြသွားခဲ့တာကို တွေ့နိုင်ပါတယ်။ ဒီနှစ်လာမယ့် PS5 နဲ့ X Box Series X တို့မှာ နည်းပညာပိုင်းဘာတွေကွဲပြားမှုရှိသလဲဆိုတာ သိရှိချင်ရင်တော့ အသေးစိတ် Specs အသီးသီးကိုတော့ သက်ဆိုင်ရာဂိမ်းဝက်ဘ်ဆိုဒ်များမှာ ကိုယ်တိုင်ဖတ်ကြည့်ရင်း နှိုင်းယှဉ်ကြည့်နိုင်ပါတယ်။ နောက်တစ်ချက်သိရမှာက အခု Sony ရဲ့ PS5 အကြောင်းချပြတဲ့ Live Stream ဟာ ဒီဇင်ဘာလလယ်တုန်းက Microsoft အနေနဲ့ X Box Series X ကိုကြေညာခဲ့သလို ဂိမ်းစက်တစ်ခုလုံးရဲ့ပုံပန်းသဏ္ဍာန်နဲ့ ဒီဇိုင်းကို ဂိမ်မာတွေအကြိုက်တွေ့အောင် ပွဲဦးထွက်ပြတဲ့ Commercial ဂိမ်းဗီဒီယိုမာကတ်တင်းပုံစံမျိုး မဟုတ်သေးပါဘူး။ Sony ရဲ့တရားဝင်ချပြချက်အရဆိုရင် PS5 ဟာ X Box Series X လောက် နည်းပညာပိုင်းအားပိုကောင်းမှာ မဟုတ်ဘူးဆိုတာကို အတိအလင်းပြောပြထားတဲ့အပြင် အရင်မျိုးဆက်များဖြစ်ကြတဲ့ PS4 Pro နဲ့ X Box One X တို့ အသီးသီးမှာလည်း X Box ဟာ Playstation ထက် နည်းပညာပိုင်းအရပိုမိုအားကောင်းတယ်ဆိုတာကိုပါ တွေ့ရမှာဖြစ်ပါတယ်။ တကယ့်တကယ်တမ်းမှာ ဂိမ်းဖန်တီးရေးဆွဲသူ developer များမဟုတ်တဲ့ ကျွန်တော်တို့လိုဂိမ်မာထုကြီးအတွက်က ပလက်ဖောင်းနှစ်ခုရဲ့ Specs တွေကို ခရေစေ့တွင်းကျအသေးစိတ်လေ့လာပြီး နှုန်းယှဉ်နေဖို့ဆိုတာကလည်း အရမ်းကြီးအရေးပါလှတယ်တော့လည်း မဟုတ်ပါဘူး။ နည်းပညာပိုင်းမှာသာလွန်အားကောင်းစွာနဲ့ ပြိုင်ဖက်ကိုအလဲထိုးအနိုင်ယူဖို့ဆိုတာ Playstation ရဲ့ အားသာချက်တွေထဲက တစ်ခုမဟုတ်ခဲ့တာ အားလုံးအသိပါပဲ 🧠💪󠀾

   

အထက်ပါစာနှစ်ပိုဒ်ကိုဖတ်ပြီးချိန်မှာ Sony အနေနဲ့ ဒီ PS5 Live Stream ကိုလုပ်ရတဲ့ သဘောကို အကြမ်းဖျင်းနားလည်သွားပြီး ခေါင်းလည်းအတန်သင့်ရှင်းသွားလောက်ပြီထင်ပါတယ်။ ကဲ ဒါဆို နောက်တစ်ချက်ဆက်သွားမှာကတော့ မထင်မှတ်ထားတာကိုပဲ အမြဲတမ်းမျှော်လင့်ရမယ်ဆိုတာပါ၊ ဘာဖြစ်လို့လည်းတော့ မနေ့က Live Stream မှာ Sony ဘက်က ဘာတွေပြောပြသွားသလဲဆိုတာထက် ဘာတွေကိုမပြောပြသွားဘူးလဲဆိုတဲ့အပေါ်မှာ ကျွန်တော်တို့ဂိမ်မာထုကြီးဟာ အာရုံပိုစူးစိုက်ရတော့မှာပါ။  Microsoft အနေနဲ့ နည်းပညာပိုင်းဆိုင်ရာအချက်တွေလည်း အားလုံးကြေညာပြီးသလို ဂိမ်းစက်ရဲ့ပုံစံ၊ ဖန်တီးထားတဲ့ဒီဇိုင်းနဲ့ ထွက်ရှိမယ့်ရက်ကိုပါ အတိအလင်းကြေညာထားပြီးသွားတဲ့အတွက် လက်ရှိအခြေအနေမှာ X Box Series X ရဲ့ဂိမ်းစက်တန်ဖိုးကလွဲပြီး ပရိသတ်အံ့အားသင့်အောင်အငိုက်ဖမ်းမယ့် surprise element မရှိတော့ပါဘူး၊ မသိရင်ပဲ X Box Series X နဲ့ပတ်သက်တဲ့ hype တွေကို Sony အနေနဲ့ အရင်မြင့်တတ်လာအောင် စနစ်တကျစီစဉ်ပြီး တမင်နှုတ်ဆိတ်နေခဲ့တာလားတောင် မပြောတတ်ပါဘူး။ ကမ္ဘာ့သမိုင်းမှာထင်ရှားကျော်ကြားတဲ့တရုတ်စစ်သူကြီး Sun Tzu ရဲ့ စစ်ပရိယာယ်တစ်ရပ်အရ "Move only if there is a real advantage to be gained" ဆိုတဲ့တိုင်း ကိုယ့်ဘက်က အားသာချက်အစစ်အမှန်ကိုရမယ်ဆိုတာ သေချာပြီဆိုတော့မှသာ စစ်မျက်နှာပြင်မှာရွေ့လျားရမယ်ဆိုတာ Sony က ကောင်းကောင်းကြီးသိတဲ့ပုံပါပဲ။ သို့ပေမယ့်လို့ Sony ဘက်က PS5 ဂိမ်းစက်ရော၊ စက်ရဲ့ဈေးနှုန်းကိုရော တကယ်တမ်းကြေညာလိုက်တဲ့အချိန်မှာ ဂိမ်မာထုရဲ့မှန်းချက်နဲ့နှမ်းထွက်မကိုက်ရင်ရော ဘယ်နှယ့်လုပ်မလဲလို့ မေးခွန်းတစ်ချက် ပြန်ထောက်ဖွယ်ရှိပါတယ်။ အဲဒါနဲ့ပတ်သက်လို့ စိတ်ပူနေရင်တော့ အပူတွေကိုအခုပဲမေ့လိုက်ပါ၊ ဘာကြောင့်လည်းတော့ ၂၀၀၆ ခုနှစ်၊ မေလကကျင်းပခဲ့တဲ့ E3 ပွဲရဲ့ Playstation 3 တရားဝင်ထုတ်ဖော်ကြေညာချက်ဟာ Sony ဘက်က တစ်ဘဝစာသင်ခန်းစာပေါင်းများစွာရထားတဲ့ မဟာ့မဟာအမှားကြီးတစ်ရပ်ဖြစ်ခဲ့လို့ပါပဲ။ အတိတ်ကိုခဏပြန်ကြည့်တဲ့အခါ ၂၀၀၆ E3 ပွဲမှာ Sony အနေနဲ့ PS3 ဟာ Backward Compatibility မရရှိနိုင်တဲ့အပြင် ဂိမ်းစက်ဈေးနှုန်း ၅၉၉ ဒေါ်လာဖြစ်တယ်ဆိုပြီး တစ်ပြိုင်တည်းထုတ်ဖော်ကြေညာခဲ့တာကြောင့် အဲဒီခေတ်တုန်းက X Box 360 ကို အပြတ်အသတ်ရှုံးခဲ့ရပါတယ် 🗑📉

ဇာတ်လမ်းကမပြီးသေးပါဘူး၊ အဲကစတဲ့နောက်ဆက်တွဲရလဒ်တွေကတော့ Sony ဘက်က ကမ္ဘာ့ဂိမ်းလောကမှာဈေးကွက် ၃၅ ရာခိုင်နှုန်းဆုံးရှုံးခဲ့သလို PS1 နဲ့ PS2 တို့ကရရှိထားတဲ့ စီးပွားရေးအမြတ်တွေကို PS3 ပြန်လည်ပြင်ဆင်တည်ဆောက်ခြင်းနဲ့ ဈေးနှုန်းလျှော့ချခြင်းတို့မှာ အဆမတန်အသုံးချခဲ့ရတဲ့အတွက်လည်း ခေါင်းနဲ့ကိုယ်အိုးစားကွဲခဲ့ပါတယ်၊ နောက်ပြီး ဈေးနှုန်းကိုပြန်လည်ပြင်ဆင်ထားတဲ့စက်တွေကို မဖြန့်ချိမချင်း PS3 ဂိမ်းစက်တွေရဲ့ရောင်းအားတွေဟာ အဆမတန်ကြီးကို ကျဆင်းလာတဲ့အပြင် တစ်ချိန်မှာအလွန်တန်ဖိုးရှိမယ့် ပရိသတ်အကြိုက် exclusive ဂိမ်းကောင်းအတော်များများဟာလည်း X Box ဆီ ရောက်ခဲ့ရပါတယ်။ ဒါဟာ Sony နဲ့ Playstation 3 ရောဟုတ်ရဲ့လားလို့ မေးခွန်းထုတ်ရလောက်အောင်ကို နလန်ကိုပြန်မထူနိုင်အောင် Sony ဘက်က အတော်လေးအထိနာခဲ့ဘူးပါတယ်။ အတိတ်မှာခြေလှမ်းတွေမှားခဲ့ဖူးတဲ့ Sony ဟာ အဲဒီဖြစ်ရပ်တွေကနေ တစ်ဘဝစာသင်ခန်းစာယူပြီး PS3 ရဲ့နောက်ထပ်မျိုးဆက် PS4 လက်ထက်ရောက်တဲ့အချိန်မှာတော့ အစွမ်းကုန်ကြိုးစားအားထုတ်ခဲ့ပါတယ်။ ဒါကြောင့်ပဲ လက်ရှိမှာ PS4 ဂိမ်းခွေပေါင်း တစ်ဘီလီယံနဲ့ PS4 ဂိမ်းစက်ပေါင်း ၉၁ မီလီယံအရေအတွက်ရောင်းအားနဲ့ လက်ရှိ Console ဂိမ်းနယ်ပယ်ကို ထိပ်ဆုံးကဦးဆောင်နေတာပါ။ အဲဒီလိုမျိုး အတွေ့အကြုံနုနယ်လွန်းတဲ့ ၂၀၀၆ ခုနှစ်က အမှားမျိုးကို Sony ဘက်က ဒီတစ်ခေါက် ၂၀၂၀ ခုနှစ်မှာ ထပ်ကျူးလွန်ဖို့ဆိုတာတော့ လုံးဝကြီးကိုဖြစ်နိုင်ချေ နည်းပါးလွန်းလှပါတယ်။ X Box လို နည်းပညာပိုင်းသာလွန်အားကောင်းမှုကို အသားပေးတဲ့ဂိမ်းစက်တည်ဆောက်မှုမျိုးနဲ့ ရင်ဘောင်တန်းယှဉ်ရတဲ့အခါ Playstation ဖက်က အသာစီးအနိုင်ယူမယ့်နည်းလမ်းက ထူးခြားမှာတော့သေချာပါတယ်။ မနေ့က PS5 ရဲ့နည်းပညာပိုင်းပြောကြားချက်များနဲ့ ဟိုးကတည်းကသိထားတဲ့ သတင်းအချက်အလက်တွေအရ ဒီတစ်ခေါက်မှာ PS5 ဟာ တီထွင်နိုင်စွမ်းမြင့်လွန်းပြီး သဘာဝဆန်ယုတ္တိတန်တဲ့ဂိမ်းတွင်းအတွေ့အကြုံကို ဂိမ်မာတစ်ဦးချင်းစီခံစားရစေဖို့ ရည်ရွယ်ထားတဲ့သဘောရှိနေပါတယ်။ ဂိမ်းကစားရင်ခံစားရတဲ့ အာရုံခံစားမှုသုံးပါး (အမြင်၊ အကြား၊ အထိ) ကို PS5 အနေနဲ့ အရင်ကတစ်ခါမှမခံစားမတွေ့ကြုံဖူးတဲ့ အခြေအနေတစ်ခုအထိ အချိတ်အဆက်မိမိနဲ့ တစ်ခြားကမ္ဘာတစ်ခုမှာ တကယ်ကြီးကျင်လည်နေရသလို အနုပညာဆန်ရသစုံတဲ့ ခံစားချက်မျိုးပေးစွမ်းသွားမယ်လို့ ထင်ပါတယ်။ Playstation ရဲ့အသက်သွေးကြောဟာ Exclusive ဂိမ်းတွေဖြစ်တဲ့အတွက် ဇာတ်လမ်းအသားပေးဂိမ်းတွေနဲ့ PS5 ဂိမ်းခေါင်းစဉ်အသစ်တွေဟာလည်း မျိုးဆက်သစ်ဂိမ်းတွေရဲ့ အချက်အခြာကျတဲ့နေရာကနေ အဓိကရတနာဖြစ်လာမှာပါ။ နောက်ဆုံးထည့်သွင်းစဉ်းစားရမှာက PS5 Live Stream မှာ Mark ပြောခဲ့တဲ့အတိုင်း PS5 ရဲ့ဂိမ်းတွင်းအသံထွက်စနစ်ကို တစ်ယောက်ချင်းအလိုက် အကောင်းဆုံးခံစားရစေဖို့ ကိုယ့်ရဲ့နားဓါတ်ပုံကိုရိုက်ယူပြီး ပို့ပေးရမယ်ဆိုတဲ့အချက်ကြောင့် PS5 မှာ ဂိမ်းတွင်းတစ်မူထူးတဲ့အသံထွက်စနစ်ကို ပေးစွမ်းဖို့လည်း Sony ဘက်က အတော်လေးအားစိုက်ကြိုးပမ်းထားတယ်ဆိုတာ တွေ့ရပါတယ်။ အခုလိုနှစ်ဦးနှစ်ဖက်ကို အသေအချာခွဲခြမ်းပြီး ထောက်ရှုကြည့်လိုက်တဲ့အခါ စာဖတ်သူအတွေးထဲမှာမီးလေးပွင့်လာတယ်လို့ ယူဆမိပါတယ်။ ဂိမ်မာတွေက ခံယူချက်ပြင်းထန်တယ်ဆိုတာ ယုံကြည်ပါတယ်၊ ဘယ်လိုအချိန်မျိုးမှာမှ Sony ဘက်က ဂိမ်းလောကတစ်ခုကို အမြစ်ကကိုင်လှုပ်ခါစေမယ့် သတင်းမျိုးကို ကြေညာသွားမှာလဲဆိုတာ မျက်ခြေမပြတ်တစ်ချက်တော့ စောင့်ကြည့်ရပါလိမ့်မယ်။ ကျွန်တော်ကတော့ မျှော်လင့်ချက်အပြည့်နဲ့ PS5 ဆက်စပ်သတင်းအကြောင်းအရာများအပြင် အခြားသောဂိမ်းလောကဆိုင်ရာဆောင်းပါးတွေကို ပုံမှန်တင်ဆက်ပေးသွားမှာပါ။ ဖတ်ရှုသူများအားလုံးကို ကျေးဇူးအထူးတင်လျက်ပါ။ Sony ကတော့ သူ့မျှော်မှန်းချက်ဆီ တစ်လှမ်းချင်း တိုးတိတ်စွာလှမ်းရင်း သိပ်မကြောတော့တဲ့အချိန်မှာ ဂိမ်မာတွေအားလုံးရဲ့ မျှော်လင့်ချက်ကို ဖြည့်ဆည်းပေးသွားမယ်လို့ ယုံကြည်ရင်း နောက်လာမယ့်ဆောင်းပါးတွေမှာ ပြန်လည်ဆုံတွေ့ကြတာပေါ့ဗျာ 🧡💐

Yan