ယဉ်ကျေးမှုနဲ့လူ့အဖွဲ့အစည်းစံနှုန်းကို နိမ့်ကျထိပါးစေတဲ့အရာများကြောင့် The Last of Us 2 ဂိမ်းကို အရှေ့အလယ်ပိုင်းနိုင်ငံများမှာ တားမြစ်ပိတ်ပင် ❌🗑

တစ်ကမ္ဘာလုံးကဂိမ်းချစ်သူများ စောင့်မျှော်နေကြတဲ့ The Last of Us 2 ဂိမ်းဟာ မကြာတော့တဲ့ ဇွန်လ ၁၉ ရက်နေ့ကျရင် အားလုံးလက်ထဲကို ဆိုက်ဆိုက်မြိုက်မြိုက် ရောက်ရှိလာတော့မှာ ဖြစ်ပါတယ်။ အရင်တုန်းက ၂၀၂၀ ခုနှစ်၊ မေလ ၂၉ ရက်မှာ ထွက်လာတော့မယ်လို့ တရားဝင်ကြေညာခဲ့တဲ့ The Last of Us 2 ဟာ ကြားကာလအတွင်းဖြစ်ပွားခဲ့တဲ့ ပဋိပက္ခများစွာကြောင့် ထွက်ရှိမယ့်ရက်စွဲကို နှစ်ကြိမ်တိုင်တိုင် ပြောင်းရွေ့ခဲ့ရပါတယ်။ ဒါပေမယ့် အခုလာမယ့်ဇွန်လ ၁၉ ရက်နေ့မှာတော့ ကျွန်တော်တို့တတွေ ၇ နှစ်တိုင် စောင့်ဆိုင်းခဲ့ရတဲ့ Naughty Dog ရဲ့ The Last of Us 2 ကို အားလုံးကမျက်မြင်ကိုယ်တွေ့ တွေ့ကြုံခံစားနိုင်တော့မှာပဲ ဖြစ်ပါတယ်။ Sony ရဲ့ Playstation Store ကနေတဆင့် The Last of Us 2 ကို တစ်ကမ္ဘာလုံးအတိုင်းအတာ ဖြန့်ချိသွားမှာဖြစ်ပေမယ့် အရှေ့အလယ်ပိုင်းနိုင်ငံများမှာတော့ The Last of Us 2 ဂိမ်းကို ဆော့ကစားခွင့်မပြုဘဲ တားမြစ်ပိတ်ပင်ထားတယ်လို့ သိရပါတယ်။ အရှေ့အလယ်ပိုင်းနိုင်ငံများရဲ့ ယဉ်ကျေးမှု၊ လူ့အဖွဲ့အစည်းရဲ့စံနှုန်းထား၊ လူတစ်ဦးချင်းစီရဲ့သတ်မှတ်ချက်တွေနဲ့ မကိုက်ညီတဲ့အရာများ ဂိမ်းအတွင်းမှာ အသားပေးကဏ္ဍကနေ ပါဝင်နေတာကြောင့် အခုလိုပိတ်ပင်ထားမြစ်ထားခြင်းဖြစ်တယ်လို့သိရပါတယ် 🙅‍♂️🙅‍♀️



အထူးသဖြင့် The Last of Us 2 ဂိမ်းမှာ အထူးအသားပေးမြှောက်စားထားတဲ့ မိန်းမသားချင်းလိင်တူချစ်သက်ဝင်ခြင်း၊ လိင်ပြောင်းလိင်လွှဲပြုလုပ်ခြင်း၊ မိန်းမယောက်ျားလိင်နှစ်မျိုးနှစ်စလုံးကို ကြိုက်နှစ်သက်ခြင်းအပြင် ဘာသာရေးဂိုဏ်းတွေရဲ့ဂုဏ်သတင်းကို နှိမ့်ချပျက်ပြားစေတဲ့အရာတွေ ပါဝင်နေတဲ့အတွက် အရှေ့အလယ်ပိုင်းနိုင်ငံတွေရဲ့စံနှုန်းစံထားနဲ့ လုံးဝကို ပြဒါးတစ်လမ်း၊ သံတစ်လမ်းကွဲပြားနေရခြင်းဖြစ်ပါတယ်။ နောက်တစ်ချက်ကတော့ အရှေ့အလယ်ပိုင်းနိုင်ငံများရဲ့ လူ့အဖွဲ့အစည်းတည်ဆောက်ထားပုံနဲ့ ယဉ်ကျေးမှုထုံးတမ်းတို့က ပိတ်ပင်တားဆီးပြီး ပြစ်တင်ရှုံ့ချထားတဲ့အရာများဟာ ဂိမ်းရဲ့အဓိကကျောရိုးကဏ္ဍမှာ ပါဝင်နေတာကြောင့်လည်း အခုလိုပြတ်သားစွာ ဆော့ကစားခွင့်မပြုခြင်းဖြစ်တာလို့ သိရပါတယ်။ အရှေ့အလယ်ပိုင်းနိုင်ငံများဖြစ်ကြတဲ့ ယူအေအီး (United Arab Emirates) နဲ့ ဆော်ဒီအာရေးဗျ (Saudi Arabia) နိုင်ငံတို့ရဲ့ PS စတိုးမှာ The Last of Us 2 ဂိမ်းကို မှာယူနိုင်ခွင့်ရှိမှာ မဟုတ်ပါဘူး။ အခြားနိုင်ငံများရဲ့ကျင့်သုံးတဲ့ခံယူချက်နဲ့ စံနှုန်းထားများအရ ဖန်တီးထားတဲ့ထုတ်ကုန်တွေကို အခေါက်ခေါက်အခါခါ တင်းကြပ်စွာစီစစ်ပြီးမှ နိုင်ငံတွင်းသွတ်သွင်းတာဟာ ဟိုးယခင်အချိန်များကတည်းက အရှေ့အလယ်ပိုင်းနိုင်ငံများမှာ ချမှတ်ထားတဲ့ စည်းမျဉ်းစည်းကမ်းတစ်ခုဖြစ်ပြီး ဒါဟာနိုင်ငံတစ်နိုင်ငံအတွက် လုပ်သင့်လုပ်ထိုက်တဲ့ လုပ်ရိုးလုပ်ထုံးတစ်ခုဖြစ်ပါတယ်။ အဲဒါမှပဲ တိုင်းပြည်တစ်ပြည်ရဲ့ ဟိုးယခင်နှစ်ထောင်ပေါင်းများစွာကတည်းကရှိခဲ့ကြတဲ့ ယဉ်ကျေးမှုထုံးတမ်းဓလေ့နဲ့ အခြေခံလူအဖွဲ့အစည်းစံနှုန်းထားတွေဟာ ပြင်ပနှောင့်အယှက်မရှိတည်မြဲနေမှာဖြစ်ပါတယ်။ အရှေ့အလယ်ပိုင်းနိုင်ငံများအနေနဲ့ သူတို့ရဲ့လားရာနဲ့မတူညီတဲ့အရာတွေကို တိုင်းပြည်အတွင်းမဝင်ခံတာ ဒီတစ်ခေါက်မှမဟုတ်ပါဘူး၊ မကြာခင်ကမှထွက်ထားခဲ့တဲ့ Pixer ရဲ့ Onward ကာတွန်းကားဟာဆိုရင်လည်း လိင်တူကြိုက်နှစ်သက်မှုကို အားပေးထောက်ခံတဲ့သဘောကိုဆောင်တဲ့ ဒိုင်ယာလော့တစ်ကြောင်းပါခဲ့လို့ အဲဒီရုပ်ရှင်ကိုပိတ်ပင်ခဲ့ပြန်ပါသေးတယ် ❎❎



အိန္ဒိယနိုင်ငံအနေနဲ့ကတော့ ဒီလိုမျိုးအခြေအနေမှာ The Last of Us 2 ဂိမ်းကို ဆော့ကစားလို့ရမရ အတိအကျမသိသေးပေမယ့် The Last of Us 2 ဂိမ်းကို အနောက်နိုင်ငံပရိသတ်များလို အလွန်အမင်းထောက်ခံကြမှာ မဟုတ်ဘူးဆိုတာတော့ ကြိမ်းသေနေပါတယ်။ ချွင်းချက်အနေနဲ့ အသိအမှတ်ပြုရမှာတစ်ခုကတော့ ESRB က Nudity နဲ့ လိင်ပိုင်းဆိုင်ရာလွန်ကွဲတဲ့အချင်းအရာများပါဝင်တယ်လို့ သတ်မှတ်ထားတဲ့ Cyberpunk 2077 ကိုတော့ အရှေ့အလယ်ပိုင်းနိုင်ငံများမှာ ကြိုတင်မှာယူခွင့်ရှိတယ်ဆိုတာပါပဲ။ The Last of Us 2 နဲ့ Cyberpunk 2077 တို့ရဲ့ အဓိကကွဲပြားသွားတဲ့အချက်တစ်ချက်ကတော့ Cyberpunk 2077 ဟာ The Last of Us 2 လို LGBT နဲ့ SJW ကိစ္စတွေကို ဆော့ကစားသူရဲ့ စိတ်နှလုံးထဲ အတင်းအဓမ္မထိုးသွင်းခြင်း မပြုတာပါပဲ။ ဆိုတော့ကာ အရှေ့အလယ်ပိုင်းနိုင်ငံများရဲ့ ချမှတ်ထားတဲ့ အခုလိုစည်းစနစ်နဲ့ ပတ်သက်ပြီး ကျွန်တော့်ဘက်က အားပေးထောက်ခံမိသလို တိုင်းပြည်တစ်ပြည်အရ ဒါဟာလုပ်သင့်တဲ့လုပ်ရပ်တစ်ခုလို့ အကျွင်းမဲ့မြင်မိတယ်။ အမြင်ကျဉ်းတာ၊ ကျယ်တာတွေကို ဒီနေရာမှာခေတ္တခဏမေ့ထားပြီး နိုင်ငံသားတစ်ယောက်အဖြစ်နဲ့ အချင်းအရာတစ်ခုဟာ ကိုယ့်ရဲ့တိုင်းပြည်အတွင်းက နယ်ပယ်ကဏ္ဍအသီးသီး၊ နုနယ်လှသော လူငယ်ထုနဲ့ နောင်လာမယ့်မျိုးဆက်အပေါ် ဘယ်လိုမသင့်တော်တဲ့အကျိုးဆက်မျိုး သက်ရောက်သွားနိုင်သလဲဆိုတာကို ကျွန်တော်တို့အနေနဲ့ အရင်တွေးပါမှ ကျွန်တော်တို့ရဲ့နောင်လာမယ့်မျိုးဆက်ဟာ အနှောင်အဖွဲ့ကင်းစွာ လွတ်လွတ်လပ်လပ် ကြီးပြင်းရှင်သန်နိုင်ပါလိမ့်မယ်။ ဖြစ်တည်မှုတန်ဖိုးချင်းမတူတဲ့အရာတွေမှာ ဟိုးနှစ်ထောင်ပေါင်းများစွာကတည်းကရှိနေခဲ့တဲ့ ယဉ်ကျေးမှုဓလေ့စရိုက်နဲ့ လူ့ရပ်ဝန်းစံနှုန်းတွေကို နိုင်ငံသားတစ်ယောက်အနေနဲ့ ကျွန်တော်တို့ဟာ တန်ဖိုးထားလေးစားရပါမယ်။ အရှေ့တိုင်းသားများဖြစ်ကြပြီး မြန်မာနိုင်ငံမှာရှင်သန်ကြီးပြင်းခဲ့တဲ့ ကျွန်တော်တို့အတွက် တစ်ဦးချင်းစီလွတ်လပ်မှုနဲ့ အခွင့်အရေးထက် နှစ်ပေါင်းများစွာတည်တံ့ခိုင်မြဲလာခဲ့တဲ့ မြတ်နိုးဖွယ်ရာယဉ်ကျေးမှုထုံးတမ်းများနဲ့ လူ့အဖွဲ့အစည်းညီညွှတ်မှုဟာ ပိုလို့အရေးကြီးပါတယ်။ ဒီတော့ ရဲဝံ့ပြတ်သားစွာပဲ The Last of Us 2 ဂိမ်းကို ထားမြစ်ပိတ်ပင်ခဲ့တဲ့ အရှေ့အလယ်ပိုင်းနိုင်ငံများကို ဒီဆောင်းပါးနဲ့ shoutout လုပ်ရင်း အခုသတင်းကို တင်ဆက်ပေးလိုက်ရပါတယ်။ လာမယ့်ဆောင်းပါးများလည်း အခုလိုစိတ်ဝင်စားစရာဂိမ်းအကြောင်းအရာနဲ့ သတင်းများကို ရေးသားဖော်ပြသွားမှာဖြစ်လို့ မကြာခင်အချိန်မှာ ကျွန်တော်တို့တွေ ပြန်လည်ဆုံတွေ့ကြပါမယ် 🧳



Yan

၂၀၂၀ ရဲ့ E3 ပွဲကိုဖျက်သိမ်းလိုက်ပေမယ့် ၂၀၂၀ တစ်နှစ်လုံးစာရဲ့လက်ရှိ ဂိမ်းလောကပြက္ခဒိန်အရ ဘာတွေကိုစောင့်မျှော်လို့ရမလဲ? (ပထမပိုင်း) 🗓⏰

ဂိမ်းဂျာနယ်လစ်ဆောင်းပါးရှင်တစ်ယောက်အဖြစ် နှစ်စဉ်နှစ်တိုင်းကျင်းပမြဲဖြစ်တဲ့ ဂိမ်းလောကရဲ့ E3 ပွဲ အကြောင်းကို အချိန်မှန်ရေးသားဖြစ်ခဲ့ပေမယ့် ဒီနှစ် ၂၀၂၀ မှာ ရုတ်ချည်းဖြစ်ပျက်ခဲ့တဲ့အချင်းအရာတွေကြောင့် ဂိမ်မာတွေအမြဲတမ်းစောင့်မျှော်ကြရတဲ့ E3 ပွဲကြီးကို ဖျက်သိမ်းလိုက်ရပါတယ်။ ၁၉၉၅ ခုနှစ်ကတည်းက လော့အိန်ဂျယ်လိစ်မြို့ရဲ့ Convention စင်တာမှာ စတင်ကျင်းပခဲ့တဲ့ ဒီ E3 ပွဲကြီး ကျရောက်မယ့် ဇွန်လနီးလာတိုင်း ကမ္ဘာအနှံ့သာမက အနယ်နယ်အရပ်ရပ် ဂိမ်မာများဟာ ဖင်တကြွကြွနဲ့ ရင်ခုန်မဆုံးဖြစ်ကြရပါတယ်။ ဘာကြောင့်လည်းဆိုတော့ ဂီတလောကဘက်ဆိုရင် ဂရမ်မီ၊ Billboard နဲ့ VMA ဂီတဆုပေးပွဲတွေ၊ ရုပ်ရှင်ဘက်ဆိုရင်လည်း အော်စကာနဲ့ ရွှေကမ္ဘာလုံးဆုပေးပွဲတွေ အသီးသီးရှိကြပေမယ့် ဂိမ်းလောကအတွက်ဆိုရင်တော့ တစ်နှစ်ဆိုမှတစ်ပွဲ အကြီးကျယ်အခမ်းနားဆုံးကျင်းပတဲ့ ဒီ Electronic Entertainment Expo aka E3 ပွဲကြီးပဲ ရှိတာဖြစ်ပါတယ်။ တကယ်လည်း ကြီးကျယ်ခမ်းနားတယ်လို့ ဆိုထိုက်ပါတယ်၊ ဘာကြောင့်လည်းဆိုတော့ ကျွန်တော်တို့ဂိမ်းချစ်သူတွေ နှပ်တစ်ရှုံ့ရှုံ့အရွယ်ကတည်းက ကြိုက်နှစ်သက်ဆော့ကစားခဲ့ရတဲ့ ဂိမ်းများနောက်ကွယ်က ဂိမ်းရေးဆွဲဖန်တီးသူတွေ၊ ထုတ်ဝေဖြန့်ချိသူတွေ၊ Sony, Nintendo နဲ့ Microsoft အစရှိတဲ့ ဗီဒီယိုဂိမ်းစက်ကုမ္ပဏီကြီးတွေအပြင် ကမ္ဘာ့နေရာအနှံ့အပြားက ဂိမ်းဂျာနယ်လစ်နဲ့ ဂိမ်းမီဒီယာများကိုပါ တစ်နေရာတည်းမှာ တစ်စုတစည်းတည်း တွေ့မြင်ရမယ့် ပွဲတော်ကြီးဖြစ်လို့ပါပဲ။ ဒါဟာ E3 ပွဲရဲ့ဆွဲဆောင်မှုတစ်ခုဖြစ်ပေမယ့် ဂန္တဝင်မြောက်အချက်တော့မဟုတ်ပါဘူး။ တကယ်တမ်း အကြီးကျယ်အခမ်းနားဆုံးလို့ဆိုထိုက်တဲ့ ကဏ္ဍကတော့ အနာဂတ်တစ်ချိန်မှာ ကျွန်တော်တို့ရဲ့ရင်ထဲစွဲငြိစေမယ့် အပြောင်မြောက်ဆုံးဂိမ်းအသစ်တွေ၊ ဂိမ်းအမြည်းဆော့ကစားမှုနဲ့ ထုတ်ဖော်ပြသမှုတွေအပြင် အရည်အသွေးမြင့်မားဂိမ်းထွေလာတွေကို ကြည့်ရှုရသူအပေါင်း မျက်ဝန်းအိမ်အရည်ရွှမ်းပြီး ဟစ်ကြွေးဝမ်းသာရလောက်အောင် ဖွင့်လှစ်ခင်းကျင်းပြသတာပဲဖြစ်ပါတယ် 🥺😍

၂၀၁၈ ခုနှစ်ရဲ့ E3 ပွဲမှာ ပထမဦးဆုံး ပွဲဦးထွက်ပြသခဲ့တဲ့ Devil May Cry 5 ထွေလာကိုကြည့်ပြီး ကြည့်နေရင်း ထခုန်မတတ် ရင်ထဲပျော်မဆုံးနိုင်ဖြစ်ခဲ့တဲ့အချိန်ကို ပြန်သတိရမိပါတယ်၊ အခုအချိန်ထိလည်း ကိုယ့်နဲ့ထပ်တူကျတဲ့ခံစားချက်တွေဖြစ်ခဲ့သူတွေရဲ့ ဂိမ်းထွေလာ reaction mash up ဗီဒီယိုတွေကို ကြည့်ပြီး "သြော် ငါနဲ့အကြိုက်ချင်းတူ၊ စိတ်အတွေးတုံ့ပြန်တာချင်းတူပြီး ခံစားချက်ချင်းတူတဲ့သူတွေလည်း ခြားနားတဲ့ကမ္ဘာအရပ်ရပ်မှာ ရှိနေပါသေးလား" ဆိုတဲ့အသိက ကျွန်တော့်ကို ပီတိဖြစ်စေပါတယ်။ ကိုယ်နဲ့ဝါသနာတူ၊ အကြိုက်တူသူတွေကို ဂိမ်းလောကအကြောင်းတွေ မျှဝေချင်တဲ့စိတ်ကြောင့်ပဲ ဒီပေ့ချ်လေးထောင်ပြီး ဂိမ်းဆောင်းပါးတွေ၊ ဂိမ်း commentary, disscusion နဲ့ ဗီဒီယို essay တွေဖြစ်တဲ့ original content တွေကို ဖန်တီးဖြစ်ခဲ့တာပါ။ တကယ်က စာရေးခြင်းနဲ့ တစ်ဖက်တစ်လမ်းအသက်မွေးတဲ့ ကျွန်တော့်အတွက်က သတင်းရေးတာနဲ့ article ဘာသာပြန်တာဟာ ဘယ်လောက်မှ အပန်းမကြီးလှပါဘူး၊ သို့ပေမယ့် အကြောင်းအရာအချက်အလက်တစ်ခုကို စနစ်တကျစုစည်းကောက်နှုတ်ပြီး တိကျသေချာတဲ့ဆောင်းပါးတစ်ပုဒ် ဒါမှမဟုတ် ကြေညက်တဲ့ content တစ်ခုအဖြစ် ဖန်တီးထုတ်လုပ်ရတာကို ကျွန်တော်ကပိုပြီးနှစ်သက်ပါတယ်။ အဲအခါကျ ဂိမ်းပရိသတ်စာဖတ်သူတွေလည်း ဖော်ပြတာတစ်ခုဆိုတစ်ခု အပိုင်အနိုင်သိသွားသလို အချိန်ယူပြီးခြစ်ကုတ်ဖန်တီးရတဲ့ ကျွန်တော့်ဖက်ကလည်းရေးသားရကျိုးနပ်ပါတယ်။ ဆိုတော့ကာ ဒီ Gamedia ပေ့ချ်မှာ တစ်ခါတလေ အခုလိုဆောင်းပါးမျိုးမတင်ဖြစ်တာကို နားလည်နိုင်လိမ့်မယ်လို့ မျှော်လင့်ပါတယ်။ ဂိမ်းလောကသတင်းတွေကတော့ အလျင်းသင့်ရင်သင့်သလို အချိန်နဲ့တစ်ပြေးတည်းဖြစ်စေဖို့ရော၊ ပေ့ချ် activity အဖြစ်ပါ ပုံမှန်တင်ဆက်ပေးလျက်ရှိပါတယ်။ ဒီတော့ အားလုံးပဲအဆင်သင့်ဖြစ်ပြီဆိုရင် ၂၀၂၀ ခုနှစ်ရဲ့ လတ်တလောဂိမ်းလောကပြက္ခဒိန်မှာ ဂိမ်မာတွေအနေနဲ့ ဘာတွေကိုစောင့်မျှော်လို့ရမလဲ? ဘယ်လိုမျိုးရင်ခုန်စိတ်လှုပ်ရှားဖို့ကောင်းတဲ့ ဂိမ်းထုတ်ဖော်ပြသမှုတွေ ပါဝင်လာမလဲ? တစ်ချက်လောက် ဆက်ကြည့်လိုက်ကြရအောင် 👨‍🏫

🚨 Playstation 5 ထုတ်ဖော်ပြသမှုအစီအစဉ် (PS5 Reveal Event) - ဇွန်လအစောပိုင်း 🚨📆

Sony ဟာ သူတို့ရဲ့မျိုးဆက်သစ်ဗီဒီယိုဂိမ်းစက်ဖြစ်တဲ့ Playstation 5 ကို ဇွန်လအစောပိုင်းမှာ ဂိမ်းလောကတစ်ခုလုံးကို ဖော်ထုတ်ချပြသွားမယ်လို့ သတင်းတင်ပို့ချက်များအရ သိရပါတယ်။ အဲဒီအစီအစဉ်ကို Playstation ရဲ့ YouTube ချန်နယ် ဒါမှမဟုတ် Twitch ကွန်ယက်ကနေ ထုတ်လွှင့်တင်ဆက်သွားဖို့ ရာထားပြီး ကျွန်တော်တို့ ဂိမ်းချစ်သူများအနေနဲ့ အချိန်ခုနှစ်နှစ်တိတိ စောင့်ဆိုင်းခဲ့ရတဲ့ Sony ရဲ့ အမြင့်မားဆုံးနည်းပညာဖန်တီးမှုတစ်ခုဖြစ်တဲ့ Playstation 5 ကို သိပ်မကြာတော့တဲ့အချိန်မှာ မျက်ဝါးထင်ထင်တွေ့မြင်ရတော့မှာပါ။ PS5 ရဲ့အတွင်းဖက် hardware တည်ဆောက်မှု၊ နည်းပညာအရတိုးမြှင့်ထားမှု၊ သစ်လွင်ဆန်းပြားတဲ့လုပ်ဆောင်ချက်တွေနဲ့ အရင်မော်ဒယ် PS4 နဲ့မတူတဲ့ ကွဲပြားချက်တွေကို Playstation 4 ဖန်တီးတည်ဆောက်သူ Mark Cerny ကိုယ်တိုင် ချက်ကျလက်ကျရှင်းပြခဲ့အတွက် ဒီတစ်ခေါက်ချပြမှုမှာ PS5 ရဲ့ အပြင်ဒီဇိုင်းပိုင်းနဲ့ အသွင်ပုံသဏ္ဍာန်ကို အသားပေးပြသသွားမယ်လို့ သိရပါတယ်။ ရက်အတိအကျကိုတော့ မထုတ်ပြန်ထားပေမယ့် ဇွန်လ ၄ ရက်နေ့ဖြစ်မယ်လို့တော့ ခန့်မှန်းကြပါတယ်။

🚨 IGN ရဲ့နွေရာသီဂိမ်းကြေညာများ (IGN' Summer of Gaming) - ဇွန်လအတွင်း 📆

ဇွန်လအတွင်းမှာ ရှေ့ပြေးဂိမ်းမီဒီယာကြီးတွေထဲက တစ်ခုဖြစ်တဲ့ IGN ရဲ့နွေရာသီဂိမ်းကြေညာချက်များ (Summer of Gaming) အစီအစဉ်ကိုလည်း ဂိမ်မာတွေတွေ့ကြုံရဦးမှာဖြစ်ပါတယ်။ ပါဝင်သူအပြည့်အစုံနဲ့ အချိန်ဇယားအတိအကျကိုတော့ ထုတ်ပြန်ခြင်းမရှိသေးပေမယ့် ဂိမ်းလောကတစ်ဝိုက်မှာ နာမည်ကျော်လူသိများကြတဲ့ ဂိမ်းဖန်တီးဖြန့်ချိသူများဖြစ်တဲ့ Capcom, Bandai Namco, Deep Silver, Google, Paradox Interactive, Square Enix, THQ Nordic, Wizards of the Coast, Xbox နဲ့ အခြားသော ဂိမ်းကုမ္ပဏီတွေရဲ့ ဂိမ်းကြေညာပေါင်းများစွာ ပါဝင်လာနိုင်ဖွယ်ရှိပါတယ်။

🚨 Indie Live Expo - ဇွန်လ ၆ ရက်နေ့ (အရှေ့ပိုင်းစံတော်ချိန် ၇ နာရီအတိ) 📆

ဒါကတော့ ၂၀၂၀ ခုနှစ်ရဲ့နွေရာသီမှာ ပထမဦးဆုံးအကြိမ် ကျင်းပတင်ဆက်မယ့် အနာဂတ် Indie ဂိမ်းများရဲ့ တိုက်ရိုက်ထုတ်လွှင့်မှုပြပွဲပဲဖြစ်ပါတယ်။ Indie Live Expo ပွဲကို ဂျပန်နိုင်ငံကနေ တိုက်ရိုက်ထုတ်လွှင့်သွားမှာဖြစ်တယ်လို့ သိရပြီး အထူးသဖြင့် ဂျပန် Indie ဂိမ်းတွေကို အသားပေး တင်ဆက်ပြသွားမှာဖြစ်ပါတယ်။ ဂျပန်နိုင်ငံကအလားအလာရှိတဲ့ Indie ဂိမ်းဖန်တီးသူများအတွက် သူတို့ရဲ့ဂိမ်းရေးဆွဲဖန်တီးမှုလက်ရာကို တွေ့ကြုံခံစားနိုင်မယ့်အပြင် အင်တာနေရှင်နယ်က Indie ဂိမ်းရေးဆွဲများလည်း ပါဝင်မှာဖြစ်ပြီး အင်္ဂလိပ်ဘာသာစကားနဲ့လည်း ကြည့်ရှုခံစားနိုင်မှာဖြစ်ပါတယ်။

🚨 အမည်မဖော်လိုတဲ့လျှို့ဝှက်ဂိမ်းကြေညာချက် (Mystery Game Announcement) - ဇွန်လ ၂ ရက်နေ့ 📆

ဂိမ်းလောကထဲက နာမည်တစ်ခုရှိပြီးဖြစ်တဲ့ ဂိမ်းကုမ္ပဏီတစ်ခုရဲ့ ဂိမ်းသစ်ထုတ်ဖော်မှုကို ဇွန်လ ၂ ရက်နေ့ကျရင် အားလုံးကတွေ့မြင်ရဖို့ ကြိမ်းသေနေပါတယ်။ အဲဒီဂိမ်းနဲ့ပတ်သက်ပြီး ဘာအချက်အလက်မှမသိရပေမယ့် Mel Gibson Picture ဆိုတဲ့စကားလုံးကတော့ တစ်နည်းနည်းဆက်စပ်နေတယ်လို့ သိရပါတယ်။ ဘာကိုဆိုလိုမှန်းမသိသေးပေမယ့် ဇွန်လ ၂ ရက်နေ့ဟာ သိပ်အကွာအဝေးကြီးမဟုတ်တော့တဲ့အတွက် အဲနေ့ကျရင်တော့ မမျှော်လင့်ထားတဲ့ဂိမ်းကြေညာချက် ဒါမှမဟုတ် ထုတ်ဖော်ချပြမှုတစ်ခုခုကို ဂိမ်မာများအနေနဲ့ ကြုံရဖို့တော့ ရှိနေပါတယ်။

🚨 The Guerilla Collective - ဇွန်လ ၆ ရက်နေ့ကနေ ဇွန်လ ၈ ရက်နေ့ထိ 📆

The Guerilla Collective ကတော့ E3 ပွဲရဲ့အစားထိုးလို့ပြောရလောက်တဲ့ ၂၀၂၀ ခုနှစ်ရဲ့ အရေးအကြီးဆုံး ဂိမ်းအစီအစဉ်တွေထဲက တစ်ခုဖြစ်ပါတယ်။ E3 နည်းတူပဲ အချိန်သုံးရက်တိုင်တိုင် ကျင်းပမှာဖြစ်တဲ့ The Guerilla Collective မှာ ဂိမ်းရေးဆွဲဖန်တီးသူတွေနဲ့ ဂိမ်းထုတ်ဝေဖြန့်ချိသူတွေက သူတို့ရဲ့လက်ရာမြောက်ဂိမ်းသစ်တွေကို အသီးသီးထုတ်ဖော်ပြသသွားကြမှာပါ။ ဒီ Guerilla Collective ကို IGN နွေရာသီဂိမ်းကြေညာချက်များရဲ့ အစီအစဉ်အပိုင်းတစ်ခုလို့သတ်မှတ်လို့ရပေမယ့် ခင်းကျင်းပြသမှုဟာ ဇွန်လ ၆ ရက်နေ့မှာပဲ ကျင်းပသွားမယ့် PC Gaming Show ကဏ္ဍထဲကိုလည်း ကူးြပောင်းသွားနိုင်ဖွယ်ရာရှိပါတယ်။ ဂိမ်မာတွေအနေနဲ့ Guerilla Collective အတွက် ရင်ခုန်စိတ်လှုပ်ရှားနေကြပြီး ၂၀၂၀ ခုနှစ်ရဲ့ကြီးမားတဲ့ဂိမ်းကြေညာချက်တစ်ချို့ဟာ Guerilla Collective ကနေ ထွက်ပေါ်လာမယ့် အခြေအနေမှာရှိနေပါတယ်။ ဒီတော့ အနယ်နယ်အရပ်ရပ်က ဂိမ်မာများဟာ Guerilla Collective ပွဲကို အထူးတလည်စောင့်မျှော်နေကြရတော့မှာပါ။

🚨 PC Gaming Show - ဇွန်လ ၆ ရက်နေ့ အရှေ့ပိုင်းစံတော်ချိန် ညနေ ၃ နာရီအတိ 📆

ဂိမ်းမီဒီယာတစ်ခုဖြစ်တဲ့ PC Gamer ကလည်း သူတို့ရဲ့နှစ်စဉ်ပြုလုပ်လေ့ရှိတဲ့ PC Gaming Show ကို ကျင်းပသွားမှာဖြစ်ပါတယ်။ ဒီတစ်နှစ်မှာတော့ Guerilla Collective အစီအစဉ်ရဲ့ကဏ္ဍတစ်ခုအဖြစ် ပါဝင်လာတဲ့ PC Gaming Show မှာ အမိုက်စား PC ဂိမ်းတွေကို အသားပေးပြီး ခင်းကျင်းပြသသွားမယ့် အနေအထားမှာရှိပါတယ်။ အရသာသစ်တစ်ခုကြောင့် လူကြိုက်များခဲ့တဲ့ Mafia: Definitive Edition လို ဂိမ်းမျိုးတွေကို အဓိကနေရာမှာ ထည့်သွင်းပြသွားမယ်လို့ သိရပြီး အခြားဂိမ်းရေးဆွဲဖန်တီးသူများဖြစ်ကြတဲ့ Merge Games, Tripwire Interactive, Frontier Developments, Epic Games နဲ့ Perfect World Entertainment တို့ကလည်း သူတို့ရဲ့ဂိမ်းအသစ်တွေကို ဒီအစီအစဉ်မှာ ထုတ်ဖော်သွားမယ့်ပုံစံပါပဲ။ ၂၀၂၀ ခုနှစ်ရဲ့ PC Gaming Show ကတော့ PC ပလက်ဖောင်းမှာ အများဆုံးဆော့ကစားဖြစ်တဲ့ ဂိမ်မာတွေ အထူးတလည် စောင့်ကြည့်ရပြန်ဦးမယ့် အစီအစဉ်တစ်ခုဖြစ်ပါတယ်။

🚨 The Future Gaming Show - ဇွန်လ ၆ ရက်နေ့ အရှေ့ပိုင်းစံတော်ချိန် ည ၅ နာရီခွဲအတိ 📆

ဂိမ်းလောကမှာနာမည်တစ်ခုရှိတဲ့ ဂိမ်းမီဒီယာတစ်ခုဖြစ်တဲ့ Gamesradar ကလည်း The Guerilla Collective ဂိမ်းပြပွဲမှာ သူတို့ရဲ့ပလက်ဖောင်းကနေ The Future Gaming Show ကို ဝင်ရောက်ခင်းကျင်းပြသသွားမှာပါ။ နာရီပိုင်းကြာမြင့်ချိန်နဲ့ ဒီအစီအစဉ်မှာ အချို့သော AAA ဂိမ်းတွေနဲ့ ထုတ်ဖော်ကြေညာချက်တွေ၊ ဂိမ်းထွေလာတွေကို အလေးအနက်ရှင်းလင်းပြောကြားသွားမှာဖြစ်ပြီး Indie ဂိမ်းတွေလည်း ပါဝင်သွားမှာပါ။ ဒီ Future Gaming Show မှာ ကွဲပြားတဲ့ဂိမ်းများစွာနဲ့ မိုဘိုင်းဂိမ်း၊ လက်ရှိဗီဒီယိုဂိမ်းမျိုးဆက်နဲ့ လာမယ့်မျိုးဆက်သစ်ဂိမ်းပလက်ဖောင်းတွေအပေါ် အာရုံစိုက်ပြောကြားသွားမယ်လိ့ု သိရပါတယ်။

ကဲ အခုဆိုရင် ၂၀၂၀ ခုနှစ်ရဲ့လတ်တလောဂိမ်းပြက္ခဒိန်အရ ဂိမ်းချစ်သူတွေ စောင့်မျှော်နိုင်မယ့် ဂိမ်းအစီအစဉ်များ ပထမပိုင်းကို တင်ဆက်ပေးလိုက်ပါတယ်။ နောက်လာမယ့် ဒုတိယပိုင်းမှာလည်း ဘယ်လိုမျိုး ရင်ခုန်စိတ်လှုပ်ရှားဖို့ကောင်းတဲ့ ဂိမ်းအစီအစဉ်တွေ ပါဝင်လာဦးမလဲဆိုတာကတော့ မကြာခင်မှာ ထပ်မံဖော်ပြသွားမှာဖြစ်ပါတယ်။ ဖတ်ရှုခဲ့တဲ့ဂိမ်းချစ်သူများအားလုံးကို ကျေးဇူးအထူးတင်ကြောင်း ပြောရင်း သိပ်မကြောတော့တဲ့အချိန်မှာ ၂၀၂၀ ရဲ့ဂိမ်းပြက္ခဒိန်ဆောင်းပါး အပိုင်း ၂ နဲ့ ကျွန်တော်တို့ ပြန်လည်ဆုံတွေ့ကြပါမယ် 🤓💜

Yan

လူမဆန်တဲ့ ဇီဝစမ်းသပ်မှုပေါင်းများစွာကို တစ်ယောက်တည်းခါးစည်းခံခဲ့ရပေမယ့် လူသားဆန်တဲ့ခံစားချက်အချို့ကျန်ရှိနေသေးတဲ့ Lisa Trevor ရဲ့ကြေကွဲဆို့နင့်ဖွယ်ဇာတ်လမ်း 💉🥀

Resident Evil စီးရီးတစ်လျှောက်လုံးမှာ ဝမ်းနည်းဖို့ကောင်းတဲ့ဇာတ်ကြောင်းဖြစ်စဉ်ပေါင်းများစွာရှိပါတယ်။ ဒါပေမယ့် အဲဒီထဲမှာမှ ပရိသတ်တွေရင်ထဲကို ဆို့နင့်ကြေကွဲဖို့ကောင်းတဲ့ ခံစားချက်တွေနဲ့ ချန်ရစ်ခဲ့ကြတဲ့ ဇာတ်လမ်းအချို့ကိုတော့ ပရိသတ်အတော်များများက အမှတ်ရနေကြပါတယ်။ အဲဒီလိုမှောင်မိုက်လွန်းတဲ့ဖြစ်ရပ်တွေထဲမှာမှ လူသိများတဲ့ဖြစ်ရပ်တွေရှိသလို လူတွေမသိလိုက်ပဲ တဖြည်းဖြည်းမှေးမှိန်ပျောက်ကွယ်သွားရတော့မယ့် ဖြစ်ရပ်တွေဟာလည်း ဒုနဲ့ဒေးပါပဲ။ အဲဒီလိုအချင်းအရာတွေထဲမှာမှ စာရေးသူရဲ့စိတ်နှလုံးထဲအထိ ပြင်းထန်တဲ့ခံစားချက်ကိုပေးခဲ့ပြီး ဖုန်တတ်နေတဲ့စာအုပ်တစ်အုပ်အဖြစ် လူတွေချောင်ထိုးခြင်းကိုခံထားရတဲ့ ကြေကွဲဖွယ်ဇာတ်လမ်းဖြစ်စဉ်တွေကို ဆောင်းပါးအသွင်နဲ့ ဂိမ်းချစ်သူတွေဆီ ပြန်လည်မျှဝေတာဟာ ဒီပေ့ချ်လေး တည်ထောင်ထားရတဲ့ ရည်ရွယ်ချက်တွေထဲက တစ်ခုဖြစ်ပါတယ်။ ခေါင်းစဉ်မှာဖော်ပြခဲ့တဲ့အတိုင်းအခု ဒီတစ်ခေါက်မှာ ပြောပြသွားမယ့်ဖြစ်ရပ်ဇာတ်လမ်းလေးကတော့ Umbrella ရဲ့လူမဆန်တဲ့စမ်းသပ်မှုများစွာကို အပျိုစင်လေးတောင်မဖြစ်သေးတဲ့အရွယ်ကတည်းက ခါးစည်းခံခဲ့ရင်း ကြောက်မတ်ဖွယ်ပုံစံကို ပြောင်းလဲသွားခဲ့ပေမယ့် ဖြူစင်စွာလူသားဆန်နေသေးတဲ့ Lisa Trevor ရဲ့ဇာတ်လမ်းပဲဖြစ်ပါတယ်။ စိတ်ဝင်စားဖို့ကောင်းသလို Resident Evil စီးရီးတစ်လျှောက်လုံးက အဖြစ်အပျက်တွေထဲက ရင်အနင့်ရဆုံးနဲ့ ကျောချမ်းစရာအကောင်းဆုံးဖြစ်ရပ်တစ်ခုလို့ စာရေးသူကိုယ်တိုင်သတ်မှတ်ထားပါတယ်။ ပရိသတ်တွေမှတ်မိကြမယ်ဆိုရင် Lisa Trevor ဟာ Resident Evil ပထမဦးဆုံးအခွေမှာ ကျွန်တော်တို့ရင်ဆိုင်ရတဲ့ ရန်သူတွေထဲမှာ တစ်ယောက်အပါအဝင်ပါပဲ။ ဆိုတော့ကာ အားလုံးပဲအဆင်သင့်ဖြစ်လောက်ပြီလို့ ယူဆတာမို့ ကျွန်တော်တို့တွေ ဆက်သွားကြပါမယ် 🤓➡️➡️

Resident Evil စီးရီးတစ်လျှောက်လုံးမှာ ဝမ်းနည်းဖို့ကောင်းတဲ့ဇာတ်ကြောင်းဖြစ်စဉ်ပေါင်းများစွာရှိပါတယ်။ ဒါပေမယ့် အဲဒီထဲမှာမှ ပရိသတ်တွေရင်ထဲကို ဆို့နင့်ကြေကွဲဖို့ကောင်းတဲ့ ခံစားချက်တွေနဲ့ ချန်ရစ်ခဲ့ကြတဲ့ ဇာတ်လမ်းအချို့ကိုတော့ ပရိသတ်အတော်များများက အမှတ်ရနေကြပါတယ်။ အဲဒီလိုမှောင်မိုက်လွန်းတဲ့ဖြစ်ရပ်တွေထဲမှာမှ လူသိများတဲ့ဖြစ်ရပ်တွေရှိသလို လူတွေမသိလိုက်ပဲ တဖြည်းဖြည်းမှေးမှိန်ပျောက်ကွယ်သွားရတော့မယ့် ဖြစ်ရပ်တွေဟာလည်း ဒုနဲ့ဒေးပါပဲ။ အဲဒီလိုအချင်းအရာတွေထဲမှာမှ စာရေးသူရဲ့စိတ်နှလုံးထဲအထိ ပြင်းထန်တဲ့ခံစားချက်ကိုပေးခဲ့ပြီး ဖုန်တတ်နေတဲ့စာအုပ်တစ်အုပ်အဖြစ် လူတွေချောင်ထိုးခြင်းကိုခံထားရတဲ့ ကြေကွဲဖွယ်ဇာတ်လမ်းဖြစ်စဉ်တွေကို ဆောင်းပါးအသွင်နဲ့ ဂိမ်းချစ်သူတွေဆီ ပြန်လည်မျှဝေတာဟာ ဒီပေ့ချ်လေး တည်ထောင်ထားရတဲ့ ရည်ရွယ်ချက်တွေထဲက တစ်ခုဖြစ်ပါတယ်။ ခေါင်းစဉ်မှာဖော်ပြခဲ့တဲ့အတိုင်းအခု ဒီတစ်ခေါက်မှာ ပြောပြသွားမယ့်ဖြစ်ရပ်ဇာတ်လမ်းလေးကတော့ Umbrella ရဲ့လူမဆန်တဲ့စမ်းသပ်မှုများစွာကို အပျိုစင်လေးတောင်မဖြစ်သေးတဲ့အရွယ်ကတည်းက ခါးစည်းခံခဲ့ရင်း ကြောက်မတ်ဖွယ်ပုံစံကို ပြောင်းလဲသွားခဲ့ပေမယ့် ဖြူစင်စွာလူသားဆန်နေသေးတဲ့ Lisa Trevor ရဲ့ဇာတ်လမ်းပဲဖြစ်ပါတယ်။ စိတ်ဝင်စားဖို့ကောင်းသလို Resident Evil စီးရီးတစ်လျှောက်လုံးက အဖြစ်အပျက်တွေထဲက ရင်အနင့်ရဆုံးနဲ့ ကျောချမ်းစရာအကောင်းဆုံးဖြစ်ရပ်တစ်ခုလို့ စာရေးသူကိုယ်တိုင်သတ်မှတ်ထားပါတယ်။ ပရိသတ်တွေမှတ်မိကြမယ်ဆိုရင် Lisa Trevor ဟာ Resident Evil ပထမဦးဆုံးအခွေမှာ ကျွန်တော်တို့ရင်ဆိုင်ရတဲ့ ရန်သူတွေထဲမှာ တစ်ယောက်အပါအဝင်ပါပဲ။ ဆိုတော့ကာ အားလုံးပဲအဆင်သင့်ဖြစ်လောက်ပြီလို့ ယူဆတာမို့ ကျွန်တော်တို့တွေ ဆက်သွားကြပါမယ်။

Lisa Trevor ကို ၁၉၅၃ ခုနှစ်မှာ ထူးချွန်ပြီးလက်ရာပြောင်မြောက်တဲ့ ဗိသုကာပညာရှင် George Trevor နဲ့ မိခင် Jessica တို့က မွေးဖွားပေးခဲ့ပါတယ်။ Lisa ရဲ့ဖခင်ဖြစ်သူ George Trevor ဟာ ဖန်တီးဆောက်လုပ်တဲ့ဗိသုကာအတတ်ပညာတို့မှာ တစ်ဖက်ကမ်းခတ်ကျွမ်းကျင်တဲ့ အင်ဂျင်နီယာတစ်ယောက်ဖြစ်ပြီး Trevor & Chamberlain ဆိုတဲ့ ဆောက်လုပ်ရေးကုမ္ပဏီကို ပူးတွဲတည်ထောင်ထားသူ ဖြစ်ပါတယ်။ မှတ်သားဖွယ်ရာအချက်တစ်ခုကိုပြောရမယ်ဆိုရင် Resident Evil 7 မှာ ကျွန်တော်တို့ခေါင်းမူးနောက်ရလောက်အောင်ကို ရှုပ်ထွေးပြီး တစ်ခန်းနဲ့တစ်ခန်းချိတ်ဆက်နေတဲ့ Baker မိသားစုရဲ့ Main House ဟာ Trevor & Chamberlain ကုမ္ပဏီက တာဝန်ယူတည်ဆောက်ပေးထားတဲ့ အရှုပ်တော်ပုံအိမ်ကြီးဖြစ်ပါတယ်။ ပညာတတ်ပြီး ဥစ္စာကြွယ်ဝတဲ့ Lisa တို့မိသားစုဟာ Lisa အသက် ၁၄ အရွယ်မရောက်ခင်အထိ ကောင်းမွန်တဲ့ပတ်ဝန်းကျင်မှာ နေထိုင်ပြီး သာယာတဲ့မိသားစုဘဝလေးကို ပိုင်ဆိုင်ခဲ့ကြပါတယ်။ ဒါပေမယ့် တစ်နေ့မှာတော့ အရာအားလုံးကို ကြမ္မာငင်မယ့်ဖြစ်ရပ်တစ်ခုဖြစ်ဖို့ အကြောင်းဖန်လာပါတယ်။ အဲဒါကတော့ Resident Evil စီးရီးဆိုပြီး စတင်ဖြစ်ပေါ်လာစေခဲ့တဲ့ ဖခင်ကြီး Dr. Oswell E. Spencer က သူ့ရဲ့အကြံအစည်တွေ အထမြောက်စေဖို့နဲ့ Umbrella ရဲ့ဇီဝစမ်းသပ်မှုတွေကို စိတ်ကြိုက်ပြုလုပ်လို့ရစေဖို့ ကြီးမားကျယ်ပြန့်ပြီး လျှို့ဝှက်တဲ့လမ်းတွေ၊ အခန်းတွေနဲ့ပြည့်နေတဲ့ Mansion ကြီးတစ်ခုကို George ကို တည်ဆောက်ခိုင်းခဲ့တာပါပဲ။ ပြောရမယ်ဆိုရင် အရှုပ်တော်ပုံကြီးကိုစတင်တဲ့ အိမ်တော်ကြီးတစ်လုံးကို သပွတ်အူလို မြေအောက်လမ်းတွေ၊ ဓါတ်ခွဲခန်းတွေနဲ့ ပညာသားပါပါ တည်ဆောက်ဖို့ ဗိသုကာပညာရပ်မှာ ပြိုင်ဖက်ကင်းတဲ့ George ဆီ တာဝန်ပေးခဲ့တယ်လို့ ဆိုရမှာပါ။ George ဟာ ဖခင်ကြီး Dr. Oswell E. Spencer လိုချင်တဲ့အတိုင်း သူ့ရဲ့ပညာကုန်ကိုထုတ်သုံးပြီး အားသွန်ခွန်စိုက်ဆောက်လုပ်ပေးခဲ့ပေမယ့် အဲဒီအိမ်တော်ကြီးဟာ တစ်ချိန်မှာ Resident Evil သမိုင်းတစ်လျှောက်က ခြောက်ခြားစရာဖြစ်ရပ်တွေအတိနဲ့ မကောင်းမှုတွေကိန်းအောင်းတည်ရှိနေတဲ့ Spencer Mansion ဆိုပြီးဖြစ်လာမယ်ဆိုတာကိုတော့ George တစ်ယောက် လုံးဝမှမရိပ်မိခဲ့ပါဘူး 🏚

အဲဒီလိုနဲ့ ၁၉၆၇ ခုနှစ်မှာ Spencer Mansion ကို ဆောက်လုပ်ပြီးစီးခဲ့ပြီး အလုပ်ပြီးမြောက်မှုကို အောင်ပွဲခံဖို့အတွက် George အပါအဝင် သူ့ရဲ့ဇနီး Jessica နဲ့ သမီးဖြစ်သူ Lisa Trevor တို့ကိုပါ Spencer Mansion ကိုလာရောက်လည်ပတ်ဖို့ ဖိတ်ခေါ်လိုက်ပါတယ်။ George ဟာ စိတ်ရင်းမှန်နဲ့ ဖခင်ကြီး Oswell E. Spencer အပ်ထားတဲ့ အလုပ်ကို ပြီးမြောက်အောင်လုပ်ခဲ့ပေမယ့် တစ်ခုခုဆိုသဲလွန်စမချန်လိုတဲ့ ဖခင်ကြီး Oswell E. Spencer ရဲ့အကြံကတော့ ဒီ Spencer Mansion ကြီး တစ်ခုလုံးရဲ့တည်ဆောက်ပုံအစအဆုံးနဲ့ လျှို့ဝှက်ချက်အားလုံးကို သိရှိနေတဲ့ George Trevor နဲ့ သူတို့တစ်မိသားစုလုံးကို နှုတ်ပိတ်ဖို့ပဲ ဖြစ်ပါတယ်။ ပထမနေ့ Jessica နဲ့ Lisa တို့သားအမိနှစ်ယောက် Spencer Mansion ကိုရောက်သွားချိန်မှာ George ကတော့ လတ်စသတ်ရမယ့်အလုပ်တွေရှိသေးတာကြောင့် နောက်ထပ်တစ်ပါတ်ကြာမှပဲ အဲဒီ Mansion မှာ မိသားစုစုံစည်းကြမယ်ဆိုပြီး တိုင်ပင်ထားကြတာပါ။ Lisa တို့သားအမိနှစ်ယောက် ရောက်သွားတဲ့ ပထမဦးဆုံးနေ့မှာစပြီး ဖခင်ကြီး Oswell E. Spencer ဟာ သူ့ရဲ့ယုတ်မာတဲ့အကြံအစည်တွေကို စတင်အကောင်အထည်ဖော်တော့တာပါပဲ။ တကယ်တမ်းနှုတ်ပိတ်မယ်ဆိုပြီး အသက်ကိုသတ်ပစ်လိုက်ရင် ခံသာသေးပေမယ့် တကယ်တမ်းမှာ Umbrella ရဲ့ဇီဝလက်နက်ဖန်တီးရေးအတွက် လိုအပ်တဲ့စမ်းသပ်မှုမျိုးစုံတို့မှာ သူတို့သားအမိနှစ်ယောက်ဟာ ဓါတ်ခွဲခန်းကကြွက်တွေလို အသုံးချခံလုံးလုံးဖြစ်သွားခဲ့ပါတယ်။ ၁၀ ရက်နေ့မှာ Spencer Mansion ကိုရောက်ရှိချင်းချင်းပဲ Spencer ရဲ့လုံခြုံရေးဂတ်တွေဟာ သူတို့နှစ်ယောက်ကို အတင်းအဓမ္မချူပ်ကိုင်ပြီး မြေအောက်လမ်းကနေတဆင့်သွားရတဲ့ ဓါတ်ခွဲခန်းမှာ Progenitor ဗိုင်းရပ်စ်စမ်းသပ်ချက်အတွက် စတင်စမ်းသပ်မှုတွေ ပြုလုပ်ပါတော့တယ်။ တစ်ချက်လောက် စဉ်းစားကြည့်ကြပါ၊ Resident Evil စီးရီးတစ်လျှောက်လုံးမှာ ဗိုင်းရပ်စ်စမ်းသပ်မှုတွေပြုလုပ်လို့ လူတွေ ဘယ်လိုမျိုးရုပ်ပျက်ဆင်းပျက်ဖြစ်ပြီး သန္ဓေပြောင်းတဲ့သတ္တဝါတွေဖြစ်ကုန်ကြလဲဆိုတော ကြောက်ခမန်းလိလိ အားလုံးတွေ့မြင်ခဲ့ရပါတယ်။ Lisa Trevor အနေနဲ့ ဇီဝစမ်းသပ်ချက်တွေရဲ့ကြားက မြေစာပင်ဖြစ်ခဲ့တဲ့အချိန်မှာ သူမဟာ အသက် ၁၄ နှစ်အရွယ်ပဲရှိပါသေးတယ် 👧🌱

တကယ်က Lisa Trevor ရဲ့ဆို့နင့်ဖို့ကောင်းလှတဲ့ဇာတ်လမ်းဟာ အခုမှစတယ်ဆိုရုံလောက်လေးပဲ ရှိပါသေးတယ်။ ၁၃ ရက်နေ့မှာ မိခင်ဖြစ်သူ Jessica ဟာ သူတို့သုံးယောက် အတူပျော်ပျော်ရွှင်ရွှင်ရိုက်ထားတဲ့ မိသားစုဓါတ်ပုံကို ဘယ်သူမှမသိအောင် Lisa ဆီ အမှတ်တရအဖြစ်ပေးနိုင်ခဲ့ပါတယ်။ ဒါပေမယ့် အဲဒီ ၁၃ ရက်နေ့ ညမှာတင် Jessica ရဲ့ခန္ဓာကိုယ်ဟာ စမ်းသပ်ချက်တွေအတွက် အကျိုးမပြုလို့ Umbrella က ပွဲချင်းပြီးသတ်ဖြတ်ခဲ့ပါတယ်။ ဒါပေမယ့် သူမရဲ့မိခင်ဟာ ဒီကမ္ဘာကြီးမှာ ဘယ်ကိုပျောက်သွားသလဲဆိုတာကိုတော့ Lisa တစ်ယောက်မသိခဲ့ပါဘူး၊ သူမရဲ့မိခင်ဟာ သူမကိုထားခဲ့ပြီး ထွက်ပဲပြေးသွားသလား? တောကြီးမှောင်မဲထဲမှာ သားရဲတွေရဲ့အစာပဲဖြစ်သွားသလား? ဒါမှမဟုတ် သူ့အဖေကိုခေါ်ပြီး တစ်နေ့ပဲ သူမကိုလာကယ်မလား? အစရှိတဲ့မျှော်လင့်ချက်ရေးရေး အတွေးတွေနဲ့ Lisa ဟာ တစ်ယောက်တည်း Umbrella ရဲ့ဗိုင်းရပ်စ်စမ်းသပ်ချက်မှန်သမျှကို Spencer Mansion ရဲ့ မြေအောက်ခန်းမှာ အံကြိတ်ရင်းခါးစည်းခံခဲ့ရပါတယ်။ အသက် ၁၄ နှစ်အရွယ်ကတည်းက သူမရဲ့ခန္ဓာကိုယ်နဲ့အကြောတွေထဲကို ဗိုင်းရပ်စ်ပေါင်းများစွာထိုးသွင်းပြီး စမ်းသပ်မှုပေါင်းများစွာပြုလုပ်ခဲ့တဲ့အတွက် Lisa ရဲ့ကြည့်ကောင်းတဲ့မိန်းမငယ်လေးတစ်ယောက်ရဲ့ ခန္ဓာကိုယ်အချိုးအစားဟာ ကြောက်မတ်ဖွယ်ကောင်းတဲ့ သန္ဓေပြောင်းသတ္တဝါကြီးတစ်ကောင်လို တဖြည်းဖြည်းြပောင်းလဲလာခဲ့ပါတယ် 🌫

ကံဆိုးမှုလို့ပဲပြောရမလား? ကံကြမ္မာရဲ့ထူးဆန်းမှုလို့ပဲဆိုရမှာလား? မပြောတတ်တော့တာ တစ်ခုက Lisa ရဲ့ခန္ဓာကိုယ်ဟာ ဇီဝစမ်းသပ်မှုပြုလုပ်ဖို့အတွက် ရာနှုန်းပြည့်ကိုက်ညီတဲ့ အခြေအနေမှာရှိနေတာပါပဲ။ Resident Evil စီးရီးတစ်လျှောက်လုံးမှာ ကျွန်တော်တို့သိခဲ့ရတဲ့ တီဗိုင်းရပ်စ် (Tyrant Virus) နဲ့ William ပြုလုပ်ခဲ့တဲ့ ဂျီဗိုင်းရပ်စ် (Golgotha Virus) နှစ်မျိုးလုံးဟာ Lisa ရဲ့ခန္ဓာကိုယ်မှာ စမ်းသပ်ခဲ့ပြီးမှ စင်းလုံးချောအရည်အသွေးပြည့်မှီတဲ့ ဇီဝအကြမ်းဖက်ဗိုင်းရပ်စ်တွေ ဖြစ်ခဲ့တာပါ။ တီဗိုင်းရပ်စ်စမ်းသပ်မှုမှာ ပထမဦးဆုံးအသက်ရှင်သန်သူလူသားဖြစ်ခဲ့တဲ့ Lisa ဟာ တီဗိုင်းရပ်စ်ဖြစ်လာဖို့အတွက် အရေးကြီးတဲ့အခန်းကဏ္ဍမှာပါဝင်ခဲ့သလို ဂျီဗိုင်းရပ်စ်အတွက်လည်း အလားတူပါပဲ။ Resident Evil စီးရီးချစ်ပရိသတ်တွေဟာ တီဗိုင်းရပ်စ်နဲ့ ဂျီဗိုင်းရပ်စ်တို့ကို ထပ်မံမမိတ်ဆက်ပေးနေစရာမလိုအောင် သိကြပြီး အဲဒီဗိုင်းရပ်စ်ဖြစ်တည်မှုအသီးသီးရဲ့ မြစ်ဖျားခံရာကတော့ ကျွန်တော်တို့လိုလူသားတစ်ယောက်ဖြစ်တဲ့ Lisa ဆိုတာကို မေ့လျော့နေကြပါတယ်။ အရှင်းလင်းဆုံးပြောရမယ်ဆိုရင် အဲဒီဗိုင်းရပ်စ်တွေဟာ Lisa ရဲ့ခန္ဓာကိုယ်ကနေ စမ်းသပ်လို့ရခဲ့တဲ့ရလဒ်တွေကို ပြုပြင်မွန်းမံရင်း အချောသတ်ထွက်ရှိလာခဲ့တာပါ 🧬🧪

အသက် ၁၄ နှစ်အရွယ်ကတည်းက ခန္ဓာကိုယ်ထဲကို ဗိုင်းရပ်စ်ပေါင်းများစွာ ထိုးသွင်းစမ်းသပ်ခံခဲ့ရတဲ့ Lisa ဟာ အသက်မသေဆုံးပေမယ့် အဲဒီလိုအန္တရာယ်များတဲ့ဇီဝစမ်းသပ်ချက်ရဲ့ ဘေးထွက်ဆိုးကျိုးကြောင့် သူမရဲ့ခန္ဓာကိုယ်တစ်လုံးဟာ ယိုယွင်းပျက်စီးခဲ့ပြီး ပြိတ္တာတစ်ကောင်လို ရုပ်ရည်သွင်ပြင်ပြောင်းလဲလာခဲ့ပါတယ်။ သူမရဲ့ ဆံပင်တွေဟာ ကျဲသွားတယ်၊ လက်ပြန်ရိုးဟာကိုင်းပြီး ခါးပြင်ဟာ ကုန်းသွားတယ်၊ အမြဲတမ်းလက်နဲ့ခြေထောက်ကို ကြမ်းတမ်းတဲ့သံကြိုးနဲ့ ချူပ်နှောင်ထားတာကြောင့် ပုံမှန်ခန္ဓာကိုယ်တည်ဆောက်ပုံလိုမဟုတ်တော့ဘဲ ခြေထောက်နဲ့လက်တို့ရဲ့ ရှိရင်းစွဲပုံစံဟာ ပျက်ယွင်းသွားတယ်။ အထက်ပါပုံတွေကြည့်ပြီး Lisa ရဲ့ပျက်ယွင်းသွားတဲ့ ခန္ဓာကိုယ်ပုံသဏ္ဍာန်ကိုတွေ့မြင်နိုင်ပါတယ်။ Lisa ဟာ လူတစ်ယောက်မှာရှိသင့်တဲ့အသိဉာဏ်မျိုးပျောက်ကွယ်သွားပြီး ဘာသာစကားကိုလည်း မပြောတတ်တော့ပေမယ့် "မိခင်" ဆိုတဲ့စကားတစ်ခွန်းကတော့ သူမအသိစိတ်ထဲမှာရော၊ မသိစိတ်ထဲမှာပါ မှတ်မိနေတဲ့အရာဖြစ်ပါတယ်။ Lisa ဟာ အသက် ၁၄ နှစ်ကတည်း Spencer Mansion မြေအောက်ခန်းထဲက အမှောင်တိုက်ထဲမှာပိတ်လှောင်ခံခဲ့ရရင်း နောက်ထပ် ၁၁ နှစ်တိုင်အောင် နေ့စဉ်နဲ့အမျှ အဲဒီလိုစမ်းသပ်မှုတွေကို ခါးစည်းခံခဲ့ရတာပါ။ လွန်စွာမှ သနားဖို့ကောင်းသလို အော့နှလုံးနာဖို့လည်းကောင်းတဲ့ ဖြစ်ရပ်တစ်ခုပါပဲ။ ပြင်းထန်လွန်းတဲ့စမ်းသပ်မှုတွေကြောင့် သူမဟာ လူသားဆန်တဲ့အသိဉာဏ်ကိုပျောက်ဆုံးခဲ့တယ်ဆိုပေမယ့် သူမရဲ့မသိစိတ်ထဲမှာတော့ ဖြူစင်တဲ့လူသားဆန်မှုတစ်ခုဟာ ကိန်းအောင်းလို့ရှိနေခဲ့ပါတယ်။ အဲဒါကတော့ သူမရဲ့မိခင်ကို အခုချိန်ထိစောင့်ဆိုင်းနေဆဲဆိုတဲ့ အသိပါပဲ။ Lisa ဟာ အဖိုးတန်တဲ့စမ်းသပ်ခံပစ္စည်းဖြစ်တဲ့အတွက် Umbrella က ဓါတ်ခွဲခန်းမှာလုပ်နေတဲ့ အမျိုးသမီးအချို့ကို သူမရဲ့မိခင်ဖြစ်သူ Jessica လို ပြုမူဆက်ဆံစေခဲ့ပြီး မိခင်အတုလိုဟန်ဆောင်စေခဲ့ပြီး Lisa ကိုဖြားယောင်းခဲ့ပါတယ်။ သို့ပေမယ့်လည်း မိခင်ဖြစ်သူကို အတိအကျသိတဲ့ Lisa ရဲ့မသိစိတ်ဟာ သူမရဲ့မိခင်မဟုတ်မှန်း ဖော်ထုတ်သိရှိသွားတဲ့အချိန်တိုင်း ဟန်ဆောင်နေသူတိုင်းရဲ့မျက်နှာအရေပြားကို မျက်နှာဖုံးတစ်ခုလိုစွဲခွာပြီး သူမရဲ့မျက်နှာပတ်ပတ်လည်မှာ မိခင်ကိုသတိပေးတဲ့အနေတဲ့ ကပ်တွယ်ထားလေ့ရှိပါတယ် 👨‍👩‍👧👥

ဇီဝဗိုင်းရပ်စ်စမ်းသပ်ချက်ပေါင်းများစွာကြောင့် လူသားဆန်တဲ့အသိဉာဏ်ပျောက်ရှနေလည်း သူမရဲ့မိခင်ကိုသတိရလာတိုင်းဟာ Lisa ရဲ့ အသိစိတ်ဟာ တစ်စတစ်စပိုတိုးလို့လာခဲ့ပါတယ်။ ဒါကြောင့်မို့ စမ်းသပ်ချက်တွေလည်း ပြီးမြောက်လို့ Lisa ရဲ့ခန္ဓာကိုယ်ကို အသုံးချတာဝပြီဆိုတဲ့အချိန်မှာ Umbrella က Lisa ကို သတ်ဖြတ်ပစ်ခဲ့ပါတယ်။ ဒါပေမယ့် သုံးရက်တိတိ တကယ်သေလား မသေလားဆိုတာ အတည်ပြုနေချိန်မှာ Umbrella က Dr. John Clemens ဟာ Lisa ရဲ့ခန္ဓာကိုယ်ကို လျှို့ဝှက်တဲ့နေရာတစ်ခုဆီ သယ်ဆောင်သွားခဲ့ပါတယ်။ တီဗိုင်းရပ်စ်တို့ရော၊ ဂျီဗိုင်းရပ်စ်တို့အပြင် အခြားသောဗိုင်းရပ်စ်ပေါင်းများစွာက Lisa ရဲ့ခန္ဓာကိုယ်ထဲမှာ သန္ဓေပြောင်းတည်ရှိနေတာမို့ Lisa ဟာ အသက်မသေဆုံးခဲ့ဘဲ Spencer Mansion နဲ့ ခပ်လှမ်းလှမ်း ဟိုးမြေကွက်အစွန်းမှာရှိတဲ့ တွဲအိမ်လေးတစ်အိမ်မှာ အသက်ရှင်သန်ခဲ့ပါတယ်။ အဲဒီလိုဖြစ်ခဲ့တဲ့ ဇာတ်လမ်းတွေအပြီး ၁၉၉၈ ခုနှစ်က ပထမဦးဆုံးသော Resident Evil အခွေမှာတော့ Spencer Mansion တစ်ခုလုံးမှာ လူသူတစ်စွန်းတစ်စမရှိတော့ဘဲ သုသာန်တစ်စဖြစ်နေခဲ့ပါပြီ။ ဗိုင်းရပ်စ်ပြန့်ပွားရာကနေ အစောင့်တွေအားလုံးသေဆုံးကုန်တဲ့အတွက် Spencer Mansion ရဲ့အထက်အောက်နဲ့ မြေအောက်ခန်းတစ်လျှောက်မှာ Lisa ဟာ နေရာယူထားပြီး ဂိမ်းဇာတ်လမ်းရှေ့ဆက်တဲ့အချိန်မှာ Jill Valentine နဲ့ Burry Burton တို့နဲ့ တွေ့တာဖြစ်ပါတယ် 👩‍✈️👮‍♂️

Lisa ရဲ့အဆုံးသတ်က ဘယ်လိုဖြစ်သလဲဆိုတာကတော့ ပထမဦးဆုံးသော Resident Evil မှာ အားလုံးက ကိုယ်တိုင်ကိုယ်ကျဆော့ကစားနိုင်ပါတယ်။ ဒါပေမယ့် Resident Evil မှာလည်း Lisa ရဲ့ဇာတ်လမ်းကမဆုံးသွားဘဲ ၂၀၀၇ ခုနှစ်မှာထွက်တဲ့ Resident Evil: The Umbrella Chronicles မှာလည်း ထပ်မံပါဝင်လာပါသေးတယ်။ ကဲ Resident Evil စီးရီးထဲကမှ ရင်နင့်ဖွယ်အကောင်းဆုံးဖြစ်ရပ်တစ်ခုဖြစ်တဲ့ Lisa Trevor ရဲ့အကြောင်းကို ဒီတစ်ခေါက်တင်ဆက်ပေးလိုက်ပါတယ်။ Resident Evil 4 ထဲက ရွာလေးရဲ့သမိုင်းကြောင်းရယ်၊ Resident Evil 7 က Baker Family ရယ် ပြီးတော့ Resident Evil က Lisa Trevor ရဲ့ဇာတ်လမ်းတွေဟာ ကျွန်တော်တို့ဂိမ်းချစ်သူတွေရဲ့ ရင်ထဲကိုဆွဲကိုင်လှုပ်ခါလိုက်သလို ခံစားရပါတယ်။ အသက် ၁၄ နှစ်အရွယ် မိန်းကလေးတစ်ယောက်အနေနဲ့ သူမရဲ့တစ်သက်တာအထိ အခုလိုလူမဆန်တဲ့ ဇီဝစမ်းသပ်မှုတွေကို တောက်လျှောက်ခံခဲ့ရတာဆိုတာ ကိုယ်ချင်းစာကြည့်ဖို့တောင် ကျောချမ်းရစေပါတယ်။ အားလုံးလည်း တီဗိုင်းရပ်စ်နဲ့ ဂျီဗိုင်းရပ်စ်တို့ဖြစ်ပေါ်လာပုံကို သိရှိရင်း Lisa Trevor ဆိုတဲ့လူသားအမျိုးသမီးတစ်ယောက်အကြောင်းကိုပါ သိသွားရအောင် ဒီဆောင်းပါးကိုရေးသားတင်ဆက်ပေးခြင်းဖြစ်ပါတယ်။ နောက်လာမယ့် ဆောင်းပါးတွေမှာလည်း အခုလိုစိတ်ဝင်စားစရာဂိမ်းအကြောင်းအရာတွေကို ရေးသားဖော်ပြဖို့ရည်ရွယ်ထားပါတယ်။ ဖတ်ရှုသူအားလုံးကို ကျေးဇူးအထူးတင်ကြောင်းပြောရင်း ဒီနေရာကနေ နှုတ်ဆက်လိုက်ရပါတယ်၊ နောင်လာမယ့်ဂိမ်းဆောင်းပါးတွေမှာ ကျွန်တော်တို့ပြန်လည်ဆုံတွေ့ကြပါမယ် 💐

Yan

Ubisoft ကိုကျော်လွန်ပြီး ဥရောပတိုက်ရဲ့ နံပါတ်တစ်တန်ဖိုးမြင့်ဂိမ်းကုမ္ပဏီဖြစ်လာခဲ့တဲ့ CD Projekt Red 👹⚖️

အရှေ့တိုင်းဂိမ်းကုမ္ပဏီဖြစ်တဲ့ CAPCOM ကို ဘယ်လောက်ထိကြိုက်နှစ်သက်ရကြောင်း တင်ဆက်ပေးအပြီးမှာတော့ အနောက်တိုင်းဂိမ်းကုမ္ပဏီတွေဘက်ကို ပြန်လှည့်ဖို့အချိန်ကျရောက်လာပါပြီ။ အဲဒါကတော့ အားလုံးပဲခေါင်းစဉ်မှာဖတ်လိုက်ရတဲ့အတိုင်း ဥရောပတိုက်ဂိမ်းကုမ္ပဏီတစ်ခုဖြစ်တဲ့ Ubisoft ရဲ့ ထိပ်ဆုံးနေရာကို ဖြုတ်ချပြီး နံပါတ်တစ်တန်ဖိုးမြင့်ဂိမ်းကုမ္ပဏီဖြစ်လာခဲ့တဲ့ CD Projekt Red အကြောင်းပါပဲ။ ဂိမ်းလောကနဲ့ ရင်းနှီးကျွမ်းဝင်သူများကတော့ CD Projekt Red အမည်နဲ့ ဂိမ်းရေးဆွဲထုတ်လုပ်တဲ့ကုမ္ပဏီကို တစ်နည်းမဟုတ်တစ်နည်း ကြားဖူးကြမှာပါ။ အနောက်တိုင်းဆိုပေမယ့် အထက်ပါဂိမ်းကုမ္ပဏီနှစ်ခုစလုံးဟာ အမေရိကတိုက်ကမဟုတ်ကြဘဲ ဥရောပတိုက်ကဖြစ်ကြပြီး ကမ္ဘာ့ဂိမ်းဈေးကွက်မှာ ဥရောပတိုက်ဂုဏ်ဆောင်နိုင်တဲ့ နာမည်ကျော်ဂိမ်းကုမ္ပဏီများဖြစ်ကြပါတယ်။ အတိအကျဆိုရင်တော့ Ubisoft ဟာ ပြင်သစ်ဂိမ်းကုမ္ပဏီဖြစ်ပြီး CD Projekt Red ကတော့ ပိုလန်ဂိမ်းကုမ္ပဏီဖြစ်ပါတယ်။ အခုလိုနံပါတ်တစ်နေရာကို ရုတ်တရတ်ရယူနိုင်သွားတဲ့ CD Projekt Red ရဲ့အစကတော့ ယမန်နှစ် ၂၀၁၉ ခုနှစ်၊ ဒီဇင်ဘာလမှာ Men of Steel မင်းသား Henry Cavill ပါဝင်သရုပ်ဆောင်ထားတဲ့ The Witcher စီးရီးဇာတ်လမ်ပါပဲ။ ဘာကြောင့်လည်းဆိုတော့ အဲဒီ The Witcher စီးရီးတွဲထွက်ရှိလာအပြီးမှာ CD Projekt Red ရဲ့ဂုဏ်သတင်းကျော်စောမှုနဲ့ နာမည်ဟာ ကြီးမားသည်ထက်ပိုကြီးမားလို့လာခဲ့ပြီး The Witcher 3: Wild Hunt ရဲ့ရောင်းအားတွေဟာလည်း ဒီရေအလား ဟုန်းကနဲမြင့်တတ်လာခဲ့ပြီး ၂၈ မီလီယံအထိကို တိုးမြင့်လာခဲ့ပါတယ် 📊📈



၂၀၁၉ ခုနှစ်ရဲ့ The Witcher 3 စီးရီးဇာတ်လမ်းတွဲ မထွက်လာခင်ကတည်းက The Witcher ဂိမ်းစီးရီးဟာ ဂိမ်းလောကမှာ ထင်ပေါ်ကျော်ကြားပြီး သူ့ပရိသတ်နဲ့သူအခိုင်အမာရှိတဲ့ တစ်ကိုယ်တော်ဇာတ်လမ်းသွားဂိမ်းကောင်းတစ်ခုဖြစ်ပါတယ်။ ၂၀၁၅ ခုနှစ်မှာ The Witcher 3: Wild Hunt ထွက်မရှိလာခင်ကတည်းက ဂိမ်းကိုကြိုတင်မှာယူထားမှု (pre-order) အရေအတွက် ၁.၅ မီလီယံရှိခဲ့ပြီး ဂိမ်းထွက်လာတဲ့အချိန်မှာလည်း အချိန်နှစ်ပါတ်အတွင်း အခွေပေါင်း ၄ မီလီယံတိတိ ရောင်းအားရှိခဲ့ပါတယ်။ ဒါ့အပြင် The Witcher 3: Wild Hunt ဟာ ကမ္ဘာတစ်ဝန်းက ပရော်ဖက်ရှင်နယ်များစွာ အကဲဖြတ်ဝေဖန်ကြတဲ့ Metacritic ဝက်ဘ်ဆိုဒ်မှာလည်း သတ်မှတ်ချက် ၁၀၀ အရ ၉၃ မှတ် (93 out of 100) ရရှိခဲ့ပါတယ်။ အခုဆိုရင်တော့ ကမ္ဘာ့ဂိမ်းလောကထဲမှာ ဥရောပတိုက်နံပါတ်တစ်ဂိမ်းကုမ္ပဏီဖြစ်ခဲ့တဲ့ Ubisoft အနေနဲ့ ပိုလန်ရဲ့ CD Projekt Red ကို သူတို့ရဲ့နှစ်ရှည်လများစိုးမိုးထားတဲ့ ပလ္လင်ကို လွှဲပြောင်းပေးအပ်လိုက်ရပါပြီ။ ပိုလန်နိုင်ငံရဲ့ မြို့တော်ဖြစ်တဲ့ ဝါဆောမြို့စတော့အိတ်စ်ချိန်းရဲ့ တင်ပြချက်အရဆိုရင် CD Projekt Red ကထုတ်ခဲ့တဲ့ The Witcher 3 ရဲ့ ဈေးကွက်တန်ဖိုးဟာ ပိုလန်ငွေကြေး zloty တန်ဖိုးအရ ၃၆.၅ ဘီလီယံရှိပြီး အဲဒီနှုန်းထားဟာ ယူရိုငွေကြေးအရဆိုရင် ၈ ဘီလီယံတန်ဖိုး ရှိပါတယ်။ သို့ပေမယ့် Ubisoft ရဲ့ The Assassin's Creed နဲ့ Far Cry စီးရီးတို့ရဲ့ ဈေးကွက်တန်ဖိုးကတော့ ယူရို ၇.၈၂ ဘီလီယံတန်ဖိုးသာရှိပြီး လက်မတင်လေး CD Projekt Red ထက် လျော့နည်းခဲ့ရပါတယ်။ ဒီနေရာမှာအားလုံးသတိပြုရမှာက ကိုယ်သုံးစွဲထားတဲ့ ဈေးကွက်အရင်းအနှီးဟာ ပိုများတဲ့အမြတ်အစွန်းကို ဆိုလိုခြင်းမဟုတ်ဘူးဆိုတာပါပဲ၊ ဘာကြောင့်လည်းဆိုတော့ CD Projekt Red ရဲ့ ၂၀၁၉ ခုနှစ်ရဲ့ဈေးကွက်အရင်းအနှီးဟာ ယူရို ၃၅ မီလီယံဖြစ်ပြီး Ubisoft ရဲ့ဈေးကွက်အရင်းအနှီးကတော့ ယူရို ၄၁၆.၂ မီလီယံအထိ အသီးသီး ရှိနေလို့ပါ 💶💶



လက်ရှိအချိန်မှာတော့ ပိုလန်ရဲ့ CD Projekt Red ဂိမ်းကုမ္ပဏီဟာ အမေရိကန်ဒေါ်လာ ၈.၈၈ ဘီလီယံတန်ဖိုးရှိပြီး ပြင်သစ်ရဲ့ Ubisoft ကတော့ အမေရိကန်ဒေါ်လာ ၈.၅၇ မီလီယံနဲ့ နံပါတ်နှစ်ဖြစ်လို့သွားခဲပါပြီ။ CD Projekt Red ဟာ ၂၀၁၅ ခုနှစ်ကနေ ၂၀၂၀ ခုနှစ်အတွင်း ဂိမ်းလောကတစ်ခုလုံးကို တုန်လှုပ်စေမယ့် AAA ဂိမ်းမျိုးမထုတ်ခဲ့ပေမယ့်လို့ Netflix ရဲ့ The Witcher စီးရီးဇာတ်လမ်းတွဲနဲ့ နိဂိုရှိနှင့်ပြီးသား အရည်အသွေးမြင့်ဂိမ်းတွေကြောင့် ၁၀ နှစ်ကျော်ကြာ ဥရောပတိုက်မှာထိပ်ဆုံးရောက်နေခဲ့တဲ့ Ubisoft ကို အခုလိုအချိန်မှာ ဖြုတ်ချနိုင်ခဲ့ပါပြီ။ သိပ်မကြာခင်ရောက်လာတော့မယ့် ၂၀၂၀ ခုနှစ်ရဲ့ စက်တင်ဘာလ ၁၇ ရက်နေ့မှာ CD Projekt Red ရဲ့စွမ်းဆောင်ရည်အမြင့်မားဆုံး ဖန်တီးရေးဆွဲထားတဲ့ Cyberpunk 2077 ထွက်ရှိလာတော့မှာဖြစ်ပြီး Ubisoft ဘက်ကနေလည်း နှစ်ပေါင်းများစွာနာမည်တစ်ခုနဲ့ ရပ်တည်နေတဲ့ Assassin's Creed စီးရီးရဲ့ Assassin's Creed: Valhalla ထွက်ရှိမှာဖြစ်တယ်လို့ သိရပါတယ်။ ကုမ္ပဏီနှစ်ခုရဲ့တန်ဖိုးဟာ သိပ်အများကြီး မကွာဟတာကြောင့် Ubisoft အနေနဲ့ အစွမ်းကုန်ပြန်လည်အားထုတ်ပြီး အမှီလိုက်မယ်ဆိုရင် သူတို့ဆုံးရှုံးခဲ့ရတဲ့နံပါတ်တစ်နေရာကို ပြန်လည်သိမ်းယူနိုင်မှာဖြစ်တယ်လို့ ထင်ရပေမယ့် တကယ်တမ်း CD Projekt Red ရဲ့ Cyberpunk 2077 ထွက်လာတဲ့အချိန်ကျရင် သူတို့နှစ်ခုကြားက တန်ဖိုးဟာ အခုထက်ပိုကွာခြားသည်ထက် ကွာခြားသွားနိုင်တယ်လို့ မြင်မိပါတယ်။ အဲဒီတော့ ကျွန်တော်တို့ဂိမ်းချစ်သူတွေအတွက် တကယ့်ကိုပြောင်မြောက်လှပပြီး ရသစုံတဲ့ဂိမ်းတွေကို ထုတ်ပေးနိုင်ခဲ့တဲ့ ဥရောပဂိမ်းကုမ္ပဏီကြီးနှစ်ခုရဲ့ အားပြိုင်မှုမှာ ဘယ်သူက ထိပ်ဆုံးနေရာမှာ ရပ်တည်နိုင်မလဲဆိုတာကိုတော့ စောင့်ကြည့်နေရတော့မှာပါ။ 

စာဖတ်သူဂိမ်းပရိသတ်တွေအားလုံးကိုလည်း CD Projekt Red က Ubisoft ကို ကျော်တတ်သွားတဲ့ကိစ္စရပ်နဲ့ ပတ်သက်ပြီး အချက်အလက်နဲ့တကွ ခြုံငုံသိသွားနိုင်အောင်လို့ ဒီဆောင်းပါးကို ရေးသားတင်ဆက်ပေးရခြင်းဖြစ်ပါတယ်။ လာမယ့်ဆောင်းပါးတွေမှာလည်း အခုလိုသုတ၊ ရသစုံလင်စွာ ပေးစွမ်းသွားမယ့် ဂိမ်းတွင်းလောကအကြောင်းအရာတွေကို ရေးသားဖန်တီးသွားမှာပါ။ အားလုံးလည်း ဒီဆောင်းပါးလေးကိုဖတ်ရှုပြီး စိတ်ကျေနပ်ကြလိမ့်မယ်လို့ မျှော်လင့်ပါတယ်။ ၂၀၂၀ ခုနှစ်တစ်နှစ်အတွင်းမှာ ထွက်လာမယ့် Cyberpunk 2077 နဲ့ Assassin's Creed: Valhalla တို့ နှစ်ခုမှာရော ဘယ်ဟာအတွက်ပိုပြီးရင်ခုန်သလဲဆိုတာကို အောက်မှာတစ်ချက်လောက် ပြန်လည်ပြောပြခဲ့ပါဦးလို့ နှုတ်ဆက်လိုက်ရင်း မကြာခင်အချိန်မှာ ကျွန်တော်တို့ပြန်လည်ဆုံတွေ့ကြပါမယ် 💜

Yan

ဂိမ်းလောကထဲ ပြန်လည်ခြေစုံပစ်ဝင်လာခဲ့ပြီး အမိုက်စားတစ်ကိုယ်တော်ဇာတ်လမ်းသွားဂိမ်းတွေကိုပဲ ဆက်တိုက်ထုတ်လာခဲ့တဲ့ CAPCOM ရဲ့ အနာဂတ်ခြေလှမ်းတွေ ဘယ်ကိုဦးတည်နေသလဲ? 💙💛

ဂိမ်းဆော့ကစားခြင်းဟာ ကမ္ဘာနဲ့အဝှမ်းက သန်းပေါင်းများစွာသောလူတွေရဲ့ အားလပ်အပန်းဖြေရာနိဗ္ဗာန်ဘုံတစ်ခုလိုပါပဲ။ လူတစ်ကိုယ်၊ စိတ်တစ်မျိုးဆိုသလို ကိုယ့်ရဲ့စိတ်နေသဘောထား၊ အမူအကျင့်၊ အကြိုက်စရိုက်နဲ့ ကျွမ်းကျင်မှုတို့ကိုလိုက်ပြီး ကိုယ်ကြိုက်နှစ်သက်တဲ့ဂိမ်းတွေ ကွာခြားသွားကြသလို ဗီဒီယိုဂိမ်းဆိုတဲ့ခေါင်းစဉ်အောက်မှာမှ ဂိမ်းအမျိုးအစားပေါင်းမြောက်မြားစွာ ကွဲပြားနေကြပါသေးတယ်။ အပစ်အခတ်၊ အခုတ်အဖြတ်၊ အားကစားနဲ့ အံ့မခန်းဖွယ်တွေအတိနဲ့ ဒီဂျစ်တယ်ကမ္ဘာတစ်ခုကို အေးချမ်းစွာတည်ဆောက်ဖြတ်သန်းမယ့် simulation ဂိမ်းတွေအပါအဝင် အများကြီးမှအများကြီးပါပဲ။ အဲဒီထဲမှာမှ ကျွန်တော်အကြိုက်ဆုံးဂိမ်းမျိုးကတော့ ဇာတ်ကြောင်းဇာတ်အိမ်ပြောင်မြောက်ခိုင်ခံမှု၊ ဇာတ်ကောင်စရိုက်ဖန်တီးမှု၊ ရသစုံအသက်ဝင်တဲ့ဂိမ်းလောက အစရှိတာတွေကို ရောပြွန်းပြီးအနုပညာမြောက်အောင် ရေးဆွဲတည်ဆောက်ထားတဲ့ တစ်ကိုယ်တော်ဇာတ်လမ်းသွားဂိမ်းတွေပါပဲ။ စစ်တိုက်တဲ့အပစ်အခတ်ဂိမ်း၊ ဘောလုံးလို အားကစားဂိမ်းနဲ့ မြန်နှုန်းမြင့်ကားပြိုင်ဂိမ်းတွေဟာ စာရေးသူမဆော့ကစားသလို မကြိုက်မနှစ်သက်တဲ့ဂိမ်းအမျိုးအစားတွေထဲမှာပါဝင်ပါတယ်။ ဘာကြောင့်လဲဆိုတဲ့ အကြောင်းအရင်းအထွေအထူးမရှိပေမယ့် အဲဒီလိုဂိမ်းတွေဟာ ဒီဂျစ်တယ်အနုပညာထုတ်ကုန်ဖြစ်တဲ့ ဗီဒီယိုဂိမ်းများရဲ့ အံ့မခန်းအရည်အသွေး၊ မြင့်မားတဲ့စွမ်းဆောင်ရည်နဲ့ ရသမြောက်တဲ့ခံစားသက်ဝင်မှုတို့ကို အစွမ်းကုန်ထုတ်ပြခွင့်မရှိကြတဲ့ ဂိမ်းများဖြစ်ကြလို့ပါပဲ။ လက်ရှိနည်းပညာခေတ်မှာ ဂိမ်းများဟာ ပေါခြင်းသောခြင်းထနေတယ်ဆိုပေမယ့် အခြေခံသဘောတရားအရ ဂိမ်းများကို အရှေ့တိုင်းကထုတ်တဲ့ဂိမ်းနဲ့ အနောက်တိုင်းကထုတ်တဲ့ဂိမ်းဆိုပြီး နှစ်မျိုးနှစ်စား အတိအကျခွဲခြမ်းနိုင်ပါတယ်။ အရှေ့ဆိုအရှေ့၊ အနောက်ဆိုအနောက် သူတို့ရဲ့သက်ဆိုင်ရာလူ့အဖွဲ့အစည်း၊ တစ်ဦးချင်းခံယူချက်နဲ့ စံစနစ်၊ ကျင့်သုံးတဲ့နိုင်ငံမူဝါဒနဲ့ တိုင်းပြည်ယဉ်ကျေးမှု အစရှိတဲ့တည်မြဲတဲ့အုတ်မြစ်များကနေတဆင့် သူတို့ဖန်တီးတဲ့ဂိမ်းများရဲ့သဘောသဘာဝဟာ အလျှိုလျှိုကွဲပြားသွားကြတာဖြစ်ပါတယ်။ ဥပမာဆိုရရင် အရင်းရှင်နဲ့ လစ်ဘရယ်မဟုတ်တဲ့အရှေ့တိုင်းနိုင်ငံထုတ်ဂိမ်းတွေမှာ PUBG တို့၊ Fortnite တို့လို Live Service ဂိမ်းများပေါက်မြောက်စွာရှိမနေသလို အဲဒီလိုဂိမ်းများကို အရှေ့တိုင်းရဲ့ဂိမ်းဖန်တီးမှုစံစနစ်အရ ချိန်တိုင်းမယ်ဆိုရင် Live Service ဂိမ်းများဟာ အတော်လေးအခြေခံကျတဲ့ဂိမ်းများဖြစ်ကြပါတယ်။ အဲဒီအကြောင်းကိုတော့ နောက်လာမယ့် ဆောင်းပါးမှာ ရေးသားတင်ဆက်ပေးသွားပါမယ်။ အခုလောလောဆယ်တော့ ကျွန်တော်အားလုံးလွန်စွာမှ ကြိုက်နှစ်သက်ရတဲ့ CAPCOM ရဲ့ ဂိမ်းလောကထဲပြန်လည်ထိုးစစ်ဆင်ဝင်ရောက်လာခြင်းနဲ့ အနာဂတ်မှာ ဘာတွေထုတ်ဖော်ချပြသွားဦးမလဲဆိုတာကို သုံးသပ်ဆွေးနွေးသွားမှာပါ။ အားလုံးပဲ အဆင်သင့်ဖြစ်ပြီဆို ဆက်သွားလိုက်ကြစို့လားဗျာ 🚀☄️

Resident Evil 2 Remake တို့၊ Devil May Cry 5 တို့နဲ့ CAPCOM ဟာ ခေတ်သစ်ဂိမ်းလောကမှာ ပြန်လည်ခေါင်းမော့လာတယ်ဆိုတာ မှန်ပေမယ့် တကယ်တမ်း စဉ်းစားကြည့်မယ်ဆိုရင် CAPCOM ဟာ တစ်ချိန်ကဖိန့်ဖိန့်တုန်အောင် ကြီးကျယ်တဲ့သူတို့ရဲ့နာမည်နဲ့ ထင်ပေါ်ဝင့်ကြွားလှတဲ့ဂုဏ်သိက္ခာကို အခုလိုမျိုး ပြန်လည်ဖြည့်တည်းဖို့ အစီအစဉ်တကျနဲ့ လုပ်ဆောင်ခဲ့တယ်ဆိုတာ ယမန်နှစ်အနည်းငယ်က လုပ်ရပ်တွေကို ပြန်လည်ထောက်ချင့်ပြီး သိရှိနိုင်ပါတယ်။ အမှန်ဆိုရင် ၂၀၁၇ ခုနှစ်၊ ဇန်နဝါရီလက ထွက်တဲ့ Resident Evil 7: Biohazard မှာ CAPCOM ရဲ့ Comeback ဟာ တစ်ဖန်ပြန်အစပျိုးခဲ့တာပါ။ ၂၀၁၇ ခုနှစ်မှာ CAPCOM ဟာ သွေးအေးခြောက်ခြားမှုအတိနဲ့ ရင်ဖိုစိတ်လှုပ်ရှားစရာကောင်းတဲ့ Resident Evil ဂိမ်းရဲ့နဂိုဇာတ်မြစ်ကို Resident Evil 7 နဲ့ ပြန်လည်ခေါ်ဆောင်လာခဲ့ရုံသာမက အသွင်သစ်အရသာသစ်နဲ့ ယခင်နဲ့မတူအောင် ဆန်းပြားတဲ့ Survival Horror ပုံစံသစ်ကိုပါ ဂိမ်းလောကတစ်ခုလုံးဆီ ဖော်မြူလာချပြနိုင်ခဲ့ပါတယ်။ ဟိုးယခင်ကတည်းက Street Fighter, Megaman အစရှိတဲ့ဂိမ်းများနဲ့ ဂိမ်မာများရဲ့ ငယ်ဘဝကိုအရောင်စုံလင်စိုပြေစေခဲ့တဲ့ CAPCOM ဟာ ဂိမ်းလောကရဲ့အကူးအပြောင်းကာလဖြစ်တဲ့ ၂၀၁၃ ခုနှစ်နဲ့ ၂၀၁၇ ခုနှစ့်အတွင်းမှာ ပရိသတ်တွေတစ်ခဲနက်ကြိုက်ပြီး ဖန်တီးမှုလက်ရာလည်းမြောက်တဲ့ အမိုက်စားဂိမ်းတွေကို မထုတ်နိုင်ခဲ့ဘဲ ကုမ္ပဏီအခြေအနေဟာ အတော်လေး ဖယိုဖရဲဖြစ်ခဲ့ရပါတယ်။ အဲဒီအခိုက်အတန့်တွေတုန်းက စာရေးသူကိုယ်တိုင်လည်း CAPCOM ဟာ အချိန်နဲ့အမျှ ပြောင်းလဲနေတဲ့ခေတ်သစ်ဂိမ်းလောကမှာ နလန်ပြန်မထူလာမှာကို စိုးရိမ်တွေးပူခဲ့ရပါတယ်။ ပရိသတ်တွေတော်တော်များများ မုန်းကြတဲ့ Resident Evil 6 ကိုလည်း အကြိမ်ပေါင်းမြောက်မြားစွာ ဝယ်ယူဆော့ကစားပြီး ကိုယ်တတ်နိုင်တဲ့ဘက်ကနေ ကုမ္ပဏီကို ထောက်ပံ့အားပေးခဲ့ရပါတယ်။ ဒါပေမယ့် မသေချာမရေရာတဲ့ မျှော်လင့်ချက်မဲ့မှုတွေဟာ အခုအချိန်မှာ အတိတ်သာသာရယ်ပါ။ ကျွန်တော် သိပ်ကြိုက်ရတဲ့ CAPCOM ဟာ ၂၀၁၇ မှာစပြီး ဂိမ်းလောကထဲကို အရှိန်အဟုန်ကောင်းစွာ အားမာန်အပြည့်နဲ့ ပြန်လည်ဝင်ရောက်လို့လာခဲ့ပါတယ်။ CAPCOM ပြန်ဝင်ရောက်လာတဲ့ပုံစံကလည်း အခြေခံကျပြီးလူကြိုက်များတဲ့ ဖန်စီ Battle Royale ဂိမ်းတွေလို၊ ဟော့ဟော့ရမ်းရမ်းနိုင်တဲ့ အက်ရှင်အသားပေးဂိမ်းတွေလို trend ကိုနင်းပြီး ပြန်ဝင်လာခဲ့တာမဟုတ်ပါဘူး။ ဗီဒီယိုဂိမ်းများရဲ့ရွှေခေတ်လို့ဆိုနိုင်တဲ့ ၁၉၉၀ နှောင်းပိုင်းလောက်က တစ်ကမ္ဘာလုံးကပရိသတ်တွေ အရူးအမူးဖြစ်ခဲ့ကြတဲ့ Resident Evil လိုမျိုး သူကိုယ်တိုင်ဖန်တီးခဲ့တဲ့စီးရီးကို အထူးချွန်အြပောင်မြောက်ဆုံးပုံစံသစ်နဲ့ အတားအဆီးတွေကို ဖေါက်ထွက်လို့ ပြေးလမ်းထဲပြန်ဝင်လာခဲ့တာပါပဲ 🏍💨

CAPCOM ရဲ့ဆက်တိုက်ထိုးစစ်ဆင်မှုဟာ ၂၀၁၇ မှာဆိုရင် Resident Evil 7, ၂၀၁၈ မှာဆိုရင် Monster Hunter World, ၂၀၁၉ မှာဆိုရင် Resident Evil 2 Remake, Devil May Cry 5 နဲ့ Monster Hunter World: Iceborne, အခု ၂၀၂၀ မှာဆိုရင်လည်း Resident Evil 3 Remake အစရှိတဲ့ ကိုယ်ပိုင် franchise တွေကိုပဲ တစ်ကိုယ်တော်ဇာတ်လမ်းသွားဂိမ်းတွေအဖြစ် မူလအရည်အသွေးလည်းမပျက်၊ ခေတ်နဲ့အညီပုံစံလည်းအထွက် အားလုံးအကြိုက်တွေ့အောင် ချပြနိုင်ခဲ့တာပါ။ အဲဒီလိုလူသိများကျော်ကြားတဲ့တစ်ကိုယ်တော်ဇာတ်လမ်းသွားဂိမ်းတွေနဲ့ လက်ရှိမျိုးဆက်သစ်ဂိမ်းလောကကို ပြန်လည်ဝင်ရောက်လာခဲ့တာဟာ CAPCOM ကိုယ်တိုင်အတွက်သာမက ဗီဒီယိုဂိမ်းလောကတစ်ခွင်မှာလည်း တစ်ကိုယ်တော်ဇာတ်လမ်းသွားဂိမ်းတွေဟာ ထာဝရမင်းမူကြီးစိုးပြီး နေရာယူလျက်ရှိနေဦးမယ်ဆိုတာကို တစ်ခါတည်းပြသလိုက်သလိုပါပဲ။ မကြာတော့တဲ့အနာဂတ်မှာ CAPCOM ဘက်က ဘယ်လိုမျိုးနောက်ထပ်အမိုက်စားဇာတ်လမ်းသွားဂိမ်းတွေကို ချပြဦးမလဲဆိုတာကို မသိပေမယ့် တစ်နှစ်ကိုနာမည်ကြီးဂိမ်းတစ်ခု ထုတ်မယ်ဆိုတဲ့ စနစ်ချထားတာကြောင့် လာတော့မယ့် ၂၀၂၁ ခုနှစ်မှာ CAPCOM ဘက်က ဂိမ်းခေါင်းစဉ်ကြီးတစ်ခုလာမယ်ဆိုတာ မုချပြောလို့ရပါတယ်။ 

၂၀၀၈ ခုနှစ်မှာ နောက်ဆုံးထွက်ခဲ့ပြီး ယမန်နှစ် ၂၀၁၉ ခုနှစ်မှာမှ အသစ်ထွက်ရှိလာတဲ့ ၁၁ နှစ်အချိန်ကာလကြာ Devil May Cry 5 ဟာလည်း စီးရီးပရိသတ်တွေအားလုံးအတွက် ဝမ်းသာလုံးဆို့ပြီး ပျော်ရွှင်ရလွန်းလို့ ရင်ဘတ်တစ်ခုလုံးဆုတ်ဖြဲပြီး "DMC ပြန်လာပြီကွလို့" အော်ဟစ်ကြွေးကြော်လောက်ရတဲ့အထိကိုကောင်းတဲ့ ဂိမ်းကောင်းတစ်ခုပါပဲ၊ နေ့စဉ်ရက်ဆက်ကို ဆော့နေဆဲပါ၊ မနက်ဖြန်များစွာအထိ စဉ်ဆက်မပြတ်ဆော့နေမှာပါ။ လူသူကင်းမဲ့ပြီး သုသာန်တစ်စပြင်လို ခြောက်ခြားတဲ့ ဥရောပတိုက်ကရွာလေးတစ်ရွာမှာ ဇာတ်အိမ်တည်မယ်လို့ သိရတဲ့ Resident Evil 8 ဟာလည်း ၂၀၂၁ ခုနှစ် နှစ်ကုန်ပိုင်းမှာ ထုတ်ပေးဖို့တော့ မျှော်လင့်ရပါတယ်။ CAPCOM အနေနဲ့ ဂိမ်းလောကထဲကို ပြန်ဝင်လာပြီး လက်ရှိဂိမ်းဈေးကွက်ကို ဦးဆောင်နေတဲ့ ဂိမ်းရေးဆွဲထုတ်လုပ်သူတွေနဲ့ ရင်ဘောင်တန်းနေတာကို တွေ့မြင်ရတာ ပီတိလည်းဖြစ်ရသလို ပရိသတ်တစ်ယောက်အနေနဲ့ ပစ္စုပွန်ထက်ပိုကောင်းသထက်ကောင်းတဲ့ ဂိမ်းတွေကို အနာဂတ်မှာ ကိုယ်တိုင်ကိုယ်ကျဆော့ကစားရတော့မှာပါ။ CAPCOM နဲ့ သူထုတ်တဲ့ဂိမ်းတွေရဲ့အကြောင်းကို ပြောရရင် ကျွန်တော့်အတွက်ကမဆုံးနိုင်ပါဘူး၊ ဒါပေမယ့် ဂိမ်းချစ်ပရိသတ်စာဖတ်သူများ အားလုံးကိုတစ်ဆင့် ပြန်လည်သတိပေးလိုက်တဲ့အနေနဲ့ရော CAPCOM ပြန်လည်ဝင်ရောက်လာတဲ့အခြေအနေအရပ်ရပ်ကို ခြုံငုံသိသွားအောင်လို့ရော ဒီဆောင်းပါးကိုရေးသားတင်ဆက်လိုက်တာပါ။ အရင်လိုပဲ စိတ်ဝင်စားစရာဂိမ်းအကြောင်းအရာဆောင်းပါးတွေကတော့ အချိန်ပေးပြီး အသေအချာရေးသားရမှာဖြစ်တဲ့အတွက် မကြာခင်တော့တင်ဆက်ပေးနိုင်အောင် အားထုတ်လျက်ရှိပါတယ်။ ဖတ်ရှုရင်းနဲ့အခုအချိန်ထိ ရောက်ရှိလာသူများကို ကျေးဇူးအထူးတင်လျက်ပါ။ ဂိမ်းချစ်သူတွေရော CAPCOM ဘယ်ဂိမ်းတွေကို အကြိုက်ဆုံးလဲ? ဂိမ်းဟောင်းတွေထဲက ဘာတွေကိုရော အခုခေတ်သစ်မှာပြန်လည် remake လုပ်စေချင်လဲ? အစရှိတာတွေကို ပြန်ပြီးမျှဝေခဲ့ပါဦး။ အခုလိုဂိမ်းဆောင်းပါးမျိုးနဲ့ သိပ်မကြာခင်မှာ ကျွန်တော်တို့ထပ်မံဆုံတွေ့ကြပါမယ်လို့ စကားပါးရင်း ဒီဆောင်းပါးလေးကို အဆုံးသတ်လိုက်ပါတယ်။ နောက်ထပ်ဂိမ်းဆောင်းပါးအသစ်မှာ ဘယ်လိုမျိုးအကြောင်းအရာ ဒါမှမဟုတ် သတင်းမျိုးပါလာမလဲကတော့ အားလုံးပဲ နားစွင့်စောင့်ဆိုင်းနေကြမယ်လို့ ယုံကြည်ပါတယ် ✍️💐


Yan

ကျွန်တော်အကြိုက်ဆုံး Devil May Cry စီးရီးရဲ့ကိုယ်တိုင်ရှာဖွေစုစည်းခဲ့တဲ့ မှတ်သားဖွယ်ရာအချက် facts ၇ ချက် (အပိုင်း ၂) 📕📘

ဂိမ်းချစ်သူများအတွက် အချိန်မှန်တင်ဆက်ပေးနေကျဖြစ်တဲ့ စာရေးသူအကြိုက်ရဆုံး Devil May Cry စီးရီးရဲ့ မှတ်သားဖွယ်ရာအချက် ၇ ချက်ကို တင်ဆက်ဖို့ အချိန်ကျလာပြန်ပါပြီ။ အပိုင်း ၁ ကို Gamedia ပေ့ချ်နဲ့ ဘလော့မှာရော လွန်ခဲ့တဲ့တစ်လလောက်က ရေးသားဖော်ပြခဲ့ပြီး အချိန်ရတိုင်းမှာ အခုလို facts အပိုင်းသစ်တွေကို ရေးသားဖန်တီးဖို့ ရည်ရွယ်ထားပါတယ်။ အခုဆိုရင် ကျွန်တော် DMC စီးရီးကို ဘယ်လောက်ထိအသည်းနင့်အောင် ကြိုက်ရကြောင်း ဂိမ်းပရိသတ်တွေကို အထွေအထူးပြောပြနေစရာလိုမယ် မထင်တော့ပါဘူး။ ကျွန်တော့်အနေနဲ့ Devil May Cry ဂိမ်းများကို ၃ ကစပြီး စဉ်ဆက်မပြတ်ဆော့လာခဲ့တာ အခုဆိုရင် ပဉ္စမမြောက်ဂိမ်းကို ရောက်ရှိလို့လာခဲ့ပါပြီ။ DMC ပရိသတ်အတော်များများ လုံးဝမကြိုက်ကြတဲ့ ၂၀၁၃ နှစ်ထွက် Ninja Theory က ရေးဆွဲဖန်တီးတဲ့ DmC: Devil May Cry ကိုတောင် ဆုံးခန်းတိုင်တဲ့ထိ ကျွမ်းကျင်အောင် ဆော့ကစားခဲ့တဲ့အထိပါပဲ။ ဒါပေမယ့် ဆောင်းပါးမစတင်ခင်မှာ အားလုံးကိုတင်ပြစရာလေးတစ်ခုရှိပါတယ်။ ကျွန်တော်အလုပ်လုပ်တဲ့ ဒီလက်ပ်တော့ကလေးနဲ့ Devil May Cry 5: Deluxe Edition ကိုသွင်းပြီး ဆော့ကစားပြီးစီးတာ အချိန်အတော်အတန်ကြာပါပြီ။ DMC 5 ကို Dante Must Die အထိဆော့ပြီးရုံသာမက ဂိမ်းတွင်းစုဆောင်းရမယ့် collectibles တွေ အားလုံးကိုရယူပြီး အပြင်ရောက်နေတဲ့ရက်ကလွဲလို့ နေ့တိုင်းဆော့ဖြစ်ပါတယ် 😋💻

ဒါပေမယ့် Devil May Cry 5 ဂိမ်းဟာ မျိုးဆက်သစ်ဂိမ်းတွေထဲကတစ်ခုဖြစ်တာမို့ ဒိတ်အတော်အောက်နေတဲ့ ကျွန်တော့်ရဲ့လက်ပ်တော့နဲ့ ဂိမ်း setting တွေအားလုံးကို အနိမ့်ဆုံးထိချပြီး ဆော့တာတောင် တစ်ခါတလေ framerate အရမ်းကျပြီး stutter ဖြစ်ပါတယ်။ စထွက်ကတည်းက DMC 5 ရဲ့ Playstation 4 အခွေကို ဝယ်မယ်လို့ ရည်ရွယ်ထားတာလည်း အခုထိမဝယ်ဖြစ်သေးပါဘူး။ ဒါကြောင့်မို့ ဂိမ်းပရိသတ်တွေဆီမှာ ဆော့ပြီးလို့ ဒီအတိုင်းထားထားတဲ့ Devil May Cry 5 ဂိမ်းခွေလေးများ ရှိခဲ့ရင် ကျွန်တော့်ကို second အနေနဲ့ ပြန်လည်ရောင်းချပါလို့ အသိပေးချင်တာပါ။ လက်ရှိအချိန်မှာ ခွေသစ်ကို ဈေးအပြည့်ပေးပြီး မဝယ်နိုင်သေးတာမို့ Devil May Cry 5 second ခွေလေးရရင် ကျွန်တော့်ရဲ့ PS4 Pro မှာဆော့ဖို့ အတော်လေးအဆင်ပြေမှာပါ။ အဲဒါလေးကို တင်ပြချင်တာပါ၊ ဖတ်ရှုပေးတာကျေးဇူးတင်ပါတယ်၊ ဆက်သွားဖို့ အဆင်သင့်ဖြစ်နေလောက်ပြီလို့လည်း ယူဆပါတယ်။ အခုဆိုရင်တော့ ကျွန်တော်အကြိုက်ဆုံး Devil May Cry စီးရီးရဲ့ကိုယ်တိုင်ရှာဖွေစုစည်းခဲ့တဲ့ မှတ်သားဖွယ်ရာအချက် facts ၇ ချက်ရဲ့ ဆောင်းပါးအပိုင်း ၂ စတင်ပါပြီ 🤓⬇️

1️⃣ Vergil နဲ့ Dante ရှစ်နှစ်ပြည့်မွေးနေ့မှာ ဖခင်ဖြစ်သူ Sparda က သူ့ရဲ့မျိုးဆက်ဖြစ်တဲ့ သားနှစ်ယောက်ကို အမွေဆက်ခံစေတဲ့သဘောနဲ့ Yamato နဲ့ Rebellion ဓါးနှစ်လက်ကို လက်ဆောင်ပေးခဲ့ပါတယ်။ Sparda ဟာ Eva နဲ့ရတဲ့ သူတို့ရဲ့ပထမဦးဆုံးကလေးကိုသာ အမွေဆက်ခံသူဖြစ်စေဖို့ ရည်ရွယ်ခဲ့ပေမယ့် ယောက်ျားလေးအမွှာနှစ်ယောက်ဖြစ်နေခဲ့တဲ့အတွက် ပထမဆုံးကလေးဖြစ်တဲ့ Vergil ကို နတ်ဆိုးလောကနဲ့ လူ့လောကကို ဆက်သွယ်နိုင်တဲ့အစွမ်းရှိတဲ့ Yamato ဓါးကို ပေးအပ်ခဲ့ပါတယ်။ သားနှစ်ယောက်ထဲမှာမှ အနေအေးပြီး ဗဟုသုတရှာဖွေစုဆောင်းတယ်၊ စာဖတ်ဝါသနာပါပြီး ရည်မှန်းချက်ရှိတဲ့သားဦးကို ပိုကြီးလေးတဲ့တာဝန်ပေးအပ်တာဟာ တကယ်တမ်းတော့ သဘာဝကျသလို Sparda ရဲ့အမျှော်အမြင်ကြီးတဲ့လုပ်ရပ်ပါပဲ။

2️⃣ Devil May Cry 5 မှာ Dante, Nero နဲ့ V ဆိုပြီး ဇာတ်ကောင်သုံးယောက်ရှိတဲ့အလျောက် အဲဒီသုံးယောက်စလုံးဟာ ရန်သူကိုစိန်ခေါ်ကြွားဝါတဲ့ taunt ကို လေထဲမှာလုပ်နိုင်စွမ်းရှိပါတယ်။ အဲဒီထဲကမှ Nero ရဲ့ Air Taunt လုပ်နေစဉ်အတွင်းမှာ Red Queen ဓါးရဲ့ Rev ခလုတ်ကိုနှိပ်ပြီး Exceed လုပ်နိုင်ပါတယ်။ Red Queen ဓါးကိုခြေထောက်နဲ့ ထောက်ပြီး စကိတ်စတန့်ပြနေသလိုလုပ်နေတဲ့အချိန်မှာ Rev ခလုတ်ကို နှိပ်လိုက်တာနဲ့ ဘားတစ်ခုတတ်ပြီး အလိုလို Exceed ဖြစ်သွားမှာဖြစ်ပါတယ်။ Max-act အထိဖြစ်ဖို့အတွက်ကတော့ အချိန်ကိုက်ဖို့နဲ့ ကိုယ့်ရဲ့လက်ကခလုတ်နှိပ်တဲ့အခါ တိကျမှုရှိဖို့တော့ လိုပါတယ်။

3️⃣ Devil May Cry 5 ဟာ ဟိုးအရင်နှစ်များကတည်းက DMC စီးရီးကိုတောက်လျှောက်အားပေးလာခဲ့ကြတဲ့ ပရိသတ်တွေအတွက်တော့ တကယ့်ကိုရင်ထဲစွဲညှိရတဲ့အမိုက်စားဂိမ်းတစ်ခုပါပဲ။ ဘာကြောင့်လည်းဆိုတော့ ၂၀၀၇ ခုနှစ်ကထွက်တဲ့ Devil May Cry anime, DMC 4 မထွက်ခင်က အကြိုထွက်ထားခဲ့တဲ့ ရုပ်ပြကာတွန်း novel နဲ့ ပြန့်ကျဲနေတဲ့ DMC လောကတစ်ခုလုံးက လူသိနည်းတဲ့အချက်အလက်တွေကို ဒီဂိမ်းရဲ့မူရင်းဇာတ်ကြောင်း canon ထဲမှာ ပြန်လည်ထည့်သွင်းထားလို့ပါပဲ။ ဥပမာ DMC anime မှာ Dante ရဲ့ရုံးမှာ အချိန်လပေါင်းများစွာ နေထိုင်ခဲ့တဲ့ Patty Lowell ရဲ့အသက် ၁၈ နှစ်ပြည့်မွေးနေ့မှာ အစ်ကိုလိုခင်ရတဲ့ Dante ကို ဖိတ်ကြားတာမျိုး၊ Dante ရဲ့ Ebony နဲ့ Ivory ပစ္စတိုနှစ်လက်ကိုပြုလုပ်ပေးခဲ့တဲ့ Nicolette Goldstein (Nico) ရဲ့အဖွားဖြစ်သူ Nell Goldstein ကို ဂိမ်းဒိုင်ယာလော့ထဲမှာ ပြန်လည်ထည့်သွင်းထားတာမျိုး၊ အစရှိတာတွေကို တကယ်တမ်းကြည့်မယ်ဆိုရင် သေးငယ်တယ်ထင်ရပေမယ့် DMC ပရိသတ်တွေအတွက်တော့ လုံးဝကိုကြီးမားတဲ့အသိအမှတ်ပြုမှုတွေပါပဲ။

4️⃣ ခန္ဓာကိုယ်တစ်ခုထဲမှာပေါင်းစည်းနေတဲ့ နတ်ဆိုးဖြစ်တည်မှုနဲ့ လူသားစိတ်ဝိညာဉ်ကို Yamato နဲ့ ခွဲခြားလိုက်ဖို့ Vergil ဟာ သူငယ်စဉ်ကနေထိုင်ခဲ့တဲ့ Red Grave မြို့က အိမ်ဟောင်းကို သွားရောက်ခဲ့ပါတယ်။ ကိုယ့်ကိုယ်ကို Yamato ဓါးနဲ့မထိုးခင်မှာ Vergil ဟာ Sparda, Eva နဲ့ သူတို့ညီအစ်ကိုနှစ်ယောက်ရိုက်ထားတဲ့ မိသားစုဓာတ်ပုံကို အရင်ဆုံးကျောခိုင်းလိုက်ပါတယ်။ အဲဒါဟာ ဘာကိုဆိုလိုသလဲဆိုတော့ သူ့ရဲ့ခန္ဓာကိုယ်ထဲက လူ့အသွေးအသားနဲ့ လူသားဆန်မှုအလုံးစုံကို မေ့ဖျောက်ပြီး နတ်ဆိုးဖြစ်တည်မှုကိုသာ ရာနှုန်းပြည့်လက်ခံတဲ့ သဘောကို ဆောင်ပါတယ်။ သို့ပေမယ့် Dante ကတော့ ကိုယ့်ကိုယ်ကို Rebellion ဓါးအကျိုးနဲ့ မထိုးခင်မှာ သူတို့ရဲ့မိသားစုဓာတ်ပုံကို မျက်နှာချင်းဆိုင်ထားပါတယ်၊ အဲဒါ ဘာကိုဆိုလိုသလဲဆိုတော့ သူ့အသွေးအသားထဲမှာ စီးဝင်နေတဲ့ လူသားဆန်မှုနဲ့ လူ့လောကကို ကာကွယ်ဖို့ ဘယ်လိုအရာကိုမဆိုလုပ်မယ်ဆိုတဲ့ သဘောပါပဲ။ မျဉ်းပြိုင်နှစ်ကြောင်းလို လားလားမှကို မတိုက်ဆိုင်တဲ့ Sparda ရဲ့မျိုးဆက် ညီအစ်ကိုနှစ်ယောက်ရဲ့ စိတ်သဘောထားလက္ခဏာရပ်တွေကို ဒီနေရာမှာတွေ့မြင်နိုင်ပါတယ်။

5️⃣ Dante နဲ့ Vergil တို့ရဲ့အကြီးမားဆုံးကွာခြားချက်ဟာ ဘယ်ကစသလဲဆိုတော့ Devil May Cry 5 မှာ အားလုံးတွေ့မြင်ခဲ့ရတဲ့ Eva ရဲ့နောက်ဆုံးထွက်သက် အခိုက်အတန့်မှာစခဲ့တယ်လို့ ဆိုရပါလိမ့်မယ်။ မိခင်ဖြစ်သူ Eva ဟာ Mundus လွှတ်လိုက်တဲ့ မိစ္ဆာနတ်ဆိုးတွေလက်ကနေ Dante ကိုကာကွယ်ဖို့ ဗီဒိုထဲမှာဖွက်တဲ့အချိန်မှာ Dante ရင်ထဲခံစားလိုက်ရတဲ့ စိတ်ခံစားချက်ဟာ Dante ရဲ့ဇာတ်ကောင်စရိုက်တစ်ခုလုံးကို ပုံဖော်ပေးလိုက်တဲ့အရာပါပဲ၊ အဲဒါကိုကပဲ Dante နဲ့ Vergil တို့ရဲ့ကွာခြားချက်ဖြစ်ပါတယ်။ Vergil နဲ့မတူစွာပဲ ဟိုးငယ်စဉ်အရွယ်ကတည်းက Dante နားလည်ခဲ့တာကတော့ လူသားတွေဆီမှာ နတ်ဆိုးတွေမလုပ်နိုင်၊ မဖြစ်နိုင်တဲ့ အရာတစ်ခုရှိတယ်ဆိုတာပါ။ အဲဒါကဘာလည်းဆိုတော့ ချစ်ခြင်းမေတ္တာကလာတဲ့ အသန့်စင်အရိုးရှင်းဆုံးစိတ်ခံစားချက်နဲ့ ကိုယ့်ရှင်သန်မှုကိုစတေးပြီး ကိုယ်ချစ်မြတ်နိုးရတဲ့တစ်ပါးသူအတွက် စွန့်လွှတ်အနစ်နာခံကြတဲ့ လူသားတွေရဲ့ဖြူစင်တဲ့နှလုံးသားပါပဲ။ လူသားမိခင်ဖြစ်တဲ့ Eva ဟာ သူမအသက်မဆုံးရှုံးစဉ်စက္ကန့်ပိုင်းလေးအလိုမှာ လူသားအဖြစ်ရှင်သန်ရခြင်းရဲ့အဓိပ္ပါယ်ကို Dante ကို ပြသလိုက်သလိုပါပဲ။ လူသားတွေဆီမှာ နတ်ဆိုးတွေဘယ်သောအခါမှ မပိုင်ဆိုင်နိုင်တဲ့အရာတစ်ခုရှိတယ်ဆိုတာကို Dante အမြဲတမ်းပြောပါတယ်၊ အဲဒီအရာကတော့ အကြင်နာမေတ္တာတရားတွေကို ထုတ်လွှင့်ဖြန့်ကျက်စေတဲ့ ဂုဏ်သတ္တိရှိတဲ့ လူ့နှလုံးသားပါပဲ။

6️⃣ Devil May Cry ဆိုတဲ့နာမည်ကို တိုက်ရိုက်ဘာသာပြန်ကြည့်မယ်ဆိုရင် "နတ်ဆိုးတွေလည်း ငိုကြွေးကောင်းငိုကြွေးနိုင်လိမ့်မယ်" လို့ ပြန်လို့ရပါတယ်။ အဲဒါကိုအနက်အဓိပ္ပါယ်ဖွင့်မယ်ဆိုရင်တော့ ခံစားချက်မဲ့တဲ့နတ်ဆိုးတွေတောင်မှလည်း ကိုယ်ချစ်မြတ်နိုးရတဲ့တစ်စုံတစ်ယောက်ကို ဆုံးရှုံးရတဲ့အချိန်မှာတော့ လူသားတွေလိုခံစားချက်ပြင်းထန်လာပြီး ငိုကြွေးကောင်းငိုကြွေးနိုင်လိမ့်မယ်ဆိုတဲ့ သဘောပါပဲ။ အထက်ကပြောပြခဲ့တဲ့ Eva ရဲ့လူသားဆန်တဲ့စွန့်လွှတ်အနစ်နာခံမှုကို နားလည်သဘောပေါက်ခဲ့တဲ့ Dante အတွက်ကတော့ သူရဲ့ဖြစ်တည်မှုမှာ နတ်ဆိုးနဲ့လူသားသွေးရောနှောနေပေမယ့်လည်း သူ့ရင်ဘတ်ထဲကနှလုံးသားကတော့ လူသားဆန်စွာပဲ ခံစားချက်အလုံးစုံကို ခံစားနိုင်စွမ်းရှိတယ်ဆိုတဲ့ အဓိပ္ပါယ်ကိုဆောင်ပါတယ်။ တကယ်တမ်းတော့ စီးရီးဇာတ်ကြောင်းတစ်ခုလုံးကို ခြုံငုံသိမယ်ဆိုရင်တော့ Devil May Cry ဆိုတဲ့နာမည်ဟာ လုံးဝကိုရသမြောက်အနုပညာဆန်ပြီး စီးရီးတစ်ခုလုံးကို ပြည့်ဝစွာအနှစ်ချူပ်ဆိုထားတဲ့ နာမည်တစ်ခုပါပဲ။

7️⃣ Nero ဟာ ဖခင်ဖြစ်သူ Vergil နဲ့ ဘဝမှာ တစ်ခါမှမဆုံဖူးပေမယ့် သွေးကစကားပြောတဲ့ ဖအေတူသားလို့ဆိုရလောက်အောင်ကို Vergil နဲ့ တူညီတဲ့စရိုက်လက္ခဏာတွေကို ပိုင်ဆိုင်ထားပါတယ်။ အဲဒီထဲကမှ အံ့အားသင့်လောက်စရာ တူညီနေတဲ့အချက်ကတော့ အဆုံးအစမဲ့စွမ်းအားကို ပိုင်ဆိုင်ရယူလိုစိတ်ဖြစ်ပါတယ်။ DMC 4 မှာ Yamato က အကောင်းပကတိပြန်ဖြစ်သွားပြီး Nero ရဲ့ Devil Bringer နဲ့ ချိတ်ဆက်သွားချိန်မှာ Nero ရဲ့နတ်ဆိုးအစွမ်းကို ကျွန်တော်တို့ ပထမအကြိမ်တွေ့မြင်ခဲ့ရပါတယ်။ အဲဒီမှာ Nero ပြောကြားခဲ့တဲ့ "အဲဒီနေ့ကစပြီး ငါ့လက်တစ်လျှောက် ပြောင်းလဲသွားတယ်၊ ငါ့ရဲ့အသံတွေ ပဲ့တင်ရိုက်ခတ်လာတယ်၊ စွမ်းအား ... ငါ့ကို အဆုံးအစမဲ့စွမ်းအားပေးပါ။ နတ်ဆိုးတစ်ယောက်ဖြစ်မယ်ဆိုလည်း ငါခံယူလိုက်မယ်၊ အားလုံးနဲ့ဝေးကွာအောင် နယ်နှင်ထုတ်ခဲ့လည်း ငါသည်းခံမယ်၊ သူမကို ကာကွယ်ဖို့ ဘာမဆိုငါလုပ်ဝံ့တယ်" ဆိုတဲ့စကားအရ Nero ဟာလည်း ဖခင်ဖြစ်သူ Vergil လိုပဲ နတ်ဆိုးစွမ်းအားပင်ဖြစ်လင့်ပါစေ ကြီးမားတဲ့စွမ်းအားကို ပိုင်ဆိုင်ရမယ်ဆိုရင် ဘာမဆိုလုပ်မယ့်သူမျိုးဖြစ်ပါတယ်။ DMC 5 မှာ Nero ပြောခဲ့တဲ့ "စွမ်းအားမရှိဘူးဆိုရင် ငါဘာကိုမှမကာကွယ်နိုင်ဘူး၊ ငါအဲဒါကို အကြွင်းမဲ့သိထားတယ်" ဆိုတဲ့စကားဟာ တစ်ချိန်တုန်းက Dante ကို Vergil ပြောခဲ့တဲ့စကားအတိုင်း ထပ်တူထပ်မျှတူညီနေပါတယ်။ ဒါပေမယ့် Vergil နဲ့ Nero ရဲ့အကြီးမားဆုံးကွာခြားချက်ကတော့ Nero ဟာ ငယ်စဉ်ကတည်းက မိဘမဲ့တစ်ယောက်အနေနဲ့ သူရဲ့မွေးစားမိသားစုဖြစ်တဲ့ Credo နဲ့ Kyrie တို့ မောင်နှမနဲ့အတူ ကြီးပြင်းလာတဲ့အတွက် လူသားတွေရဲ့ချစ်ခြင်းမေတ္တာတရားနဲ့ သံယောဇဉ်နှောင်ဖွဲ့မှုတို့ကို နားလည်နေခဲ့တာပါပဲ။

ကဲ Devil May Cry စီးရီးရဲ့ မှတ်သားဖွယ်ရာအချက် ၇ ချက် ဆောင်းပါးအပိုင်း ၂ ကတော့ ဒီလောက်ပါပဲ။ အားလုံးဖတ်ရှုပြီး ကိုယ်မသိရသေးတဲ့ DMC အချက်လေးတွေကို သိသွားနိုင်မယ်ဆို ရေးသားရကျိုးနပ်ပါပြီ။ ဆောင်းပါးမစတင်ခင်မှာ ပြောခဲ့တဲ့ Devil May Cry 5 ရဲ့ second PS4 အခွေလေးကို လက်လွှဲရောင်းချချင်တယ်ဆိုရင်တော့ ကျွန်တော့်ကို တစ်ချက်လောက် ဆက်သွယ်ပေးပါ။ မက်ဆေ့ချ် Inbox က လာပြောလည်း အဆင်ပြေပါတယ် (အဆင်ပြေသွားရင် ကျေးဇူးအထူးတင်မိမှာပါ)။ ဖတ်ရှုသူဂိမ်းပရိသတ်တစ်ယောက်ချင်းစီကို ကျေးဇူးအထူးတင်လျက်ပါ။ အခုလိုပဲ နောင်လာမယ့် စိတ်ဝင်စားစရာဂိမ်းဆောင်းပါးတွေမှာ ကျွန်တော်တို့ ပြန်လည်ဆုံတွေ့ကြပါမယ် 💙❤️

Yan

ရန်ခုန်စိတ်လှုပ်ရှားစရာအတိနဲ့ Ghost of Tsushima ရဲ့ဂိမ်းအကြောင်းအရာအချက်အလက်သစ်တွေကို လာမယ့် Playstation ရဲ့တိုက်ရိုက်ထုတ်လွှင့်မှု Livestream မှာထုတ်ဖော်ပြသတော့မယ် 👹⛩

ဂိမ်းပရိသတ်တွေအားလုံးပဲ မင်္ဂလာပါ။ စိတ်ဝင်စားဖို့ကောင်းတဲ့ဂိမ်းဆောင်းပါးတွေနဲ့ အားလုံးဆီတစ်ခေါက်ပြန်လို့ လာပါပြီ။ လွန်ခဲ့တဲ့နှစ်ရက်၊ သုံးရက်လောက်က သူငယ်ချင်းအိမ်စတူဒီယိုမှာ တေးသီချင်းကိစ္စတစ်ချို့နဲ့ အလုပ်များနေခဲ့လို့ အခုရက်ပိုင်းအတွင်းပေ့ချ်မှာ ဆောင်းပါးအတင်ပြတ်ခဲ့ရတာပါ။ မနေ့ညက အိမ်ရောက်ရောက်ချင်း အခုစာစောင်မှာဘယ်လိုအကြောင်းအရာတင်ဆက်ပေးရမလဲ စဉ်းစားနေရင်းကနေ မကြာခင်မှာ အသွင်သစ်နဲ့တွေ့မြင်ရတော့မယ့် Ghost of Tsushima အကြောင်းကို ရေးသားဖြစ်ခဲ့တာဖြစ်ပါတယ်။ ၂၀၂၀ ခုနှစ်၊ ဂျူလိုင်လ ၁၇ ရက်နေ့မှာ ထွက်ရှိမယ့် Ghost of Tsushima ဂိမ်းဟာ ကြမ်းတမ်းပြင်းထန်လှတဲ့ ၁၃ ရာစုတစ်ဝိုက်က ဂျပန်-မွန်ဂိုစစ်ပွဲကာလမှာ အခြေခံထားတဲ့ဇာတ်ကြောင်းဖြစ်တယ်ဆိုတာ ဂိမ်းချစ်သူတွေအနေနဲ့ အရိပ်အမြွက်လောက်တော့ သိကြမှာပါ။ အလွန့်အလွန်ကိုအင်အားကြီးပြီး စစ်ပရိယာယ်ကြွယ်ဝတဲ့ မွန်ဂိုစစ်တပ်ဟာ တစ်ချိန်တုန်းက ရုရှား၊ တရုတ်၊ ကိုရီးယား၊ အရှေ့တောင်အာရှ၊ ပါရှား၊ အိန္ဒယ၊ အရှေ့အလယ်ပိုင်းနိုင်ငံတစ်ချို့နဲ့ အရှေ့ဥရောပတစ်ဝိုက်အထိ ကြီးစိုးနိုင်ခဲ့ပြီး မွန်ဂိုတွေအုပ်ချူပ်ခဲ့တဲ့ ကမ္ဘာ့ကုန်းမြေပမာဏဟာ စတုရန်းမိုင်ပေါင်း ၁၂ သန်း (အာဖရိကတစ်တိုက်စာ) အထိရှိခဲ့ပါတယ်။ ခေတ်မှီပြီး ထိခိုက်မှုပြင်းထန်လွန်းတဲ့စစ်လက်နက်တွေ၊ ထိုးခွင်းရခက်ခဲ့တဲ့တိုက်စစ်ခံစစ်ဖွဲ့စည်းမှုပုံစံတွေ၊ မွန်ဂိုစစ်သားတစ်ယောက်ချင်းစီရဲ့ သူမတူတဲ့ကြမ်းကြုတ်နဲ့ ရဲရင့်မှုတွေဟော မွန်ဂိုအင်ပါယာကို တစ်ခေတ်တစ်ခါက ပြိုင်ဘက်မဲ့စေခဲ့တဲ့ ထင်ရှားတဲ့လက္ခဏာတွေပါပဲ 💪⚔️



ကိုယ်တိုက်ယူလိုတဲ့နယ်မြေကို ကြီးမားတဲ့အခက်အခဲမရှိဘဲ အသာတကြည်သိမ်းယူနိုင်ခဲ့တဲ့ မွန်ဂိုစစ်တပ်ဟာ နှစ်ခေါက်တိုင်တိုင် အားသွန်ခွန်စိုက်ချီတတ်တိုက်စစ်ဆင်ပေမယ့် ဆာမူရိုင်းတို့မွေးဖွားရာ ဂျပန်ပြည်ကိုတော့ ထိုးဖောက်မသိမ်းယူနိုင်ခဲ့ပါဘူး။ ကျွန်းစုနိုင်ငံဖြစ်တဲ့ ဂျပန်နိုင်ငံကို ရေကြောင်းလမ်းက လာရောက်တိုက်စစ်ဆင်တဲ့မွန်ဂိုတပ်တွေဟာ သူတို့ချီတတ်လာတဲ့အချိန်တိုင်း ပြင်းထန်လှတဲ့တိုက်ဖုန်းမုန်တိုင်းနှစ်ခုနဲ့ ကြုံခဲ့ရပြီး ပင်လယ်ပြင်ထဲမှာ အလဲလဲအကွဲကွဲ ကျဆုံးကုန်ကျလို့ပါပဲ။ အဲဒီအချိန်လောက်ကစပြီး မြင့်မြတ်တဲ့ဂျပန်နိုင်ငံကို မိခင်ရာသီဥတုကြီးကပါ ကာကွယ်ပေးနေတယ်ဆိုတဲ့အဆိုနဲ့ နတ်ဘုရားတို့ကတိုက်ခတ်တဲ့လေမုန်တိုင်း (Kamikaze) ဆိုတဲ့အသုံးအနှုန်းဟာ တွယ်ကျယ်လာခဲ့တာဖြစ်ပါတယ်။ Ghost of Tsushima ရဲ့အရင်ဆောင်းပါးနှစ်ပုဒ်ကို မဖတ်လိုက်ရတဲ့သူတွေအတွက် စိတ်အတွေးထဲပုံဖော်နိုင်အောင်လို့ ဂျပန်-မွန်ဂိုစစ်သမိုင်းကြောင်းကို အကျဉ်းချုံးပြီးပြောပြတာဖြစ်ပါတယ်။ ၂၀၁၇ ခုနှစ်ထဲကနေ ဂိမ်းပရိသတ်တွေ စောင့်မျှော်နေတဲ့ Ghost of Tsushima ဟာ မကြာတော့တဲ့အချိန်မှာ အားလုံးမတွေ့မြင်ရသေးတဲ့ ဂိမ်းအကြောင်းအရာအချက်အလက်တစ်ချို့ကို လာမယ့် Playstation Livestream တိုက်ရိုက်ထုတ်လွှင့်မှုမှာ တင်ဆက်ပြသသွားမယ်လို့ သိရပါတယ် 🌅🌳



တရားဝင်ဖော်ပြထားတဲ့အချိန်ရက်စွဲကိုအတိအကျပြောပြရမယ်ဆိုရင်တော့ ၂၀၂၀ ခုနှစ်၊ မေလ ၁၄ ရက်နေ့၊ အရှေ့စံတော်ချိန် နေ့ခင်း ၁ နာရီကနေ ပစိဖိတ်စံတော်ချိန် ညနေ ၄ နာရီ (May 14, at 4 p.m. ET/1 p.m. PT) အတွင်းဖြစ်ပြီး အဲဒီအချိန်အတွင်းမှာ Ghost of Tsushima ဂိမ်းအကြောင်းအရာသစ်ကို ထုတ်ဖော်ပြသသွားမှာဖြစ်ပါတယ်။ လွန်ခဲ့တဲ့နှစ်လက နောက်ဆုံးထွက်ရှိထားတဲ့ Story Reveal Trailer ကိုလည်း Reaction လုပ်ထားပြီးသားမို့ အခုအသစ်ထပ်လာမယ့် ဖော်ပြမှုမှာ ဘယ်လိုဂိမ်းတွင်းအကြောင်းအရာ၊ ဇာတ်လမ်းနဲ့ ဂိမ်းကစားဟန်တွေကို အသားပေးပြသထားမလဲဆိုတာ ရင်ခုန်မိပါတယ်။ ကျွန်တော်တို့လက်ရှိမှာနေထိုင်နေတဲ့ စံတော်ချိန်နဲ့တွက်မယ်ဆိုရင် အရှေ့စံတော်ချိန်နဲ့ မြန်မာစံတော်ချိန်ဟာ အချိန် ၁၀ နာရီ၊ ပစိဖိတ်စံတော်ချိန်နဲ့ဆိုရင် မြန်မာစံတော်ချိန်ဟာ အချိန် ၁၃ နာရီဝန်းကျင် ကွာဟတာမို့ ဂိမ်းချစ်သူများက ကိုယ်နဲ့အဆင်ပြေကိုက်ညီတဲ့အချိန်မှာ Ghost of Tsushima ရဲ့ဂိမ်းဗီဒီယိုအကြောင်းအရာသစ်ကို စောင့်ကြည့်နိုင်ပါတယ်။ ကဲ လတ်တလောမှာတင်ဆက်ပေးချင်တဲ့ဆောင်းပါးကတော့ ဒါပါပဲ။ သိတဲ့အတိုင်း လာမယ့်ရက်တွေမှာ အရင်လိုစိတ်ဝင်စားဖို့ကောင်းတဲ့ ဂိမ်းအကြောင်းအရာတွေကို ပုံမှန်တင်ဆက်သွားမှာပါ။ ဆောင်းပါးဖတ်ရှုသူဂိမ်းပရိသတ်များကို ကျေးဇူးတင်ကြောင်း ပြောရင်း အခု Ghost of Tsushima စာစောင်ကို အဆုံးသတ်လိုက်ချင်ပါတယ်။ နောက်ထပ်စိတ်ဝင်စားဖို့ကောင်းတဲ့ အခုလိုဂိမ်းဆောင်းပါးတွေမှာ ကျွန်တော်တို့ ပြန်လည်ဆုံတွေ့ကြပါမယ် 🤓💜

Yan

Resident Evil စီးရီးရဲ့ရက်ကွန်းမြို့ပျက်သုန်းခြင်း (Raccoon City Destruction) ဖြစ်ရပ်မှာ ဘယ်သူတွေအသက်ရှင်လွတ်မြောက်ခဲ့လဲ? (ဒုတိယပိုင်း) ☣️☣️

ရက်ကွန်းမြို့ပျက်သုန်းခြင်းကနေ အသက်ရှင်လွတ်မြောက်ခဲ့ကြသူများ ပထမပိုင်းအပြီးမှာတော့ အခုဒုတိယပိုင်းကို ထပ်မံတင်ဆက်ဖို့ အချိန်ကျရောက်လာပြန်ပါပြီ။ အရင်ပထမပိုင်းကို ဖတ်ရှုမျှဝေခဲ့ကြသူများအားလုံးကို ကျေးဇူးအထူးတင်ရှိကြောင်း ဦးစွာပထမပြောကြားလိုပါတယ်။ ကျွန်တော်ကိုယ်တိုင်လည်း လွန်စွာမှနှစ်ခြိုက်ပြီး အရမ်းစိတ်ဝင်စားတဲ့ Resident Evil ဂိမ်းစီးရီးအကြောင်းအရာတွေကို ကျွန်တော့်နည်းတူပဲ ကြိုက်နှစ်သက်ပြီး ရေးသားတင်ဆက်ပေးတဲ့ဆောင်းပါးတွေကို မျှဝေပေးခဲ့ကြတဲ့ ဂိမ်းပရိသတ်တွေကို တွေ့ရတာ တကယ့်ကိုပီတိဖြစ်မိပါတယ်။ ဂိမ်းချစ်သူတွေရဲ့အစဉ်တစိုက်ဖတ်ရှုမှုတွေ၊ အားပေးမှုတွေ၊ မျှဝေမှုတွေဟာ ဒီပေ့ချ်မှာ နောက်ထပ်ဆောင်းပါးအသစ်အသစ်တွေကို ရေးသားဖြစ်လာစေဖို့ တွန်းအားဖြစ်စေပါတယ်။ ကျွန်တော်သိထားတဲ့ဂိမ်းအကြောင်းအရာအချက်အလက်တွေကို ဆောင်းပါးတွေကနေတစ်ဆင့် ဂိမ်းပရိသတ်တွေသိရှိသွားပြီဆိုရင်ဖြင့် ကျွန်တော်ရေးသားဖန်တီးရကျိုးနပ်ပါပြီ၊ ကျွန်တော်စာစောင်တွေစတင်ရေးသားရတဲ့ ကနဦးရည်ရွယ်ချက်ကလည်း အဲဒါပါပဲ။ အဲဒီတော့ ရက်ကွန်းမြို့ပျက်သုန်းခြင်းဖြစ်စဉ်က ရှင်သန်လွတ်မြောက်ခဲ့သူများ ဒုတိယပိုင်းမှာ ဘယ်သူတွေပါလာမလဲ? နောက်ထပ်ဘယ်နှစ်ယောက် ကျန်ရှိသေးလဲ? အစရှိတဲ့မေးခွန်းတွေကို ဒီစာစောင်လေးကနေ ဖြေကြားပေးနိုင်လိမ့်မယ်လို့ ယုံကြည်ပါတယ် 🤓📚

မကြာခင်ဆောင်းပါးဒုတိယပိုင်း စတင်တော့မှာဖြစ်တာကြောင့် အားလုံးပဲအဆင်သင့်ဖြစ်ပြီလို့ ယူဆပါတယ်။ ကျွန်တော်တို့ ဆက်သွားကြပါမယ်၊ ဒုတိယပိုင်းကို တစ်ပုံချင်းစီ ထောက်ပြီး ဖတ်ရှုနိုင်ပါတယ် 📱➡️

6️⃣ Carlos Oliveira 🦸‍♂️



Carlos Oliveira ဟာ Umbrella လက်အောက်က ဇီဝလက်နက်တန်ပြန်တိုက်စစ်ဆင်ရေးတပ်ဖွဲ့ U.B.C.S (Umbrella Biohazard Countermeasure Service) မှာပါဝင်ခဲ့တဲ့ကြေးစားစစ်သည်တစ်ယောက်ဖြစ်ပြီး Resident Evil 3 မှာ Jill Valentine နဲ့အတူ ရက်ကွန်းမြို့အနုမြူဒုံးကျည်မပေါက်ကွဲမှီ လက်မတင်လေးလွတ်မြောက်ခဲ့သူဖြစ်ပါတယ်။ Carlos ဟာနွေးထွေးမှုရှိတယ်၊ ဘယ်လိုအခြေအနေမှာပဲဖြစ်ဖြစ် ပာာဒယဉာဏ်ရွှင်ပြီး ဟာသတွေအရွှန်းဖောက်တတ်တယ်၊ Jill Valentine အပေါ်မှာလေးစားမှုတစ်ခုနဲ့ ဆက်ဆံပြီး ရဲရင့်ထက်မြက်တဲ့စစ်သားတစ်ယောက်ဖြစ်ပါတယ်။ Resident Evil 3 Remake အပြီးမှာ Carlos ရဲ့ဇာတ်ကောင်ပုံစံ၊ သွင်ပြင်လက္ခဏာနဲ့ အပြုအမူစရိုက်တို့ကို ပရိသတ်တွေအားလုံးအကြိုက်တွေ့ခဲ့ပါတယ်။ လာမယ့် Resident Evil ဂိမ်းတွေထဲမှာတော့ Carlos ပါ ပြန်လည်ပါဝင်လာနိုင်ဖွယ်ရာမရှိသေးပေမယ့် Resident Evil 3 Remake မှာ အားလုံးတွေ့မြင်ခံစားခဲ့ရတဲ့ Carlos ကတော့ Resident Evil ပရိသတ်တွေအားလုံးရဲ့ စိတ်ထဲမှာအမြဲတမ်းအမှတ်ရ ထင်ကျန်နေတော့မှာဖြစ်ပါတယ် 📝

7️⃣ Ada Wong ❤️



Resident Evil 2 Remake ရဲ့ဇာတ်လမ်းအဆုံးမှာ Annatte Birkin သေနတ်နဲ့ပစ်ခတ်လိုက်တာကြောင့် ပုခုံးကိုကျည်ဆံထိမှန်ပြီး တံတားအောက်ကိုပြုတ်ကျသွားတယ်ဆိုပေမယ့် တကယ်တမ်းတော့ Ada Wong ဟာ Leon ထင်သလို မသေဆုံးခဲ့ဘဲ ရက်ကွန်းမြို့ပျက်သုန်းခြင်းကနေ လွတ်မြောက်ခဲ့သူတွေထဲက တစ်ယောက်ဖြစ်ခဲ့ပါတယ်။ Ada Wong အနေနဲ့ သေနတ်ဒဏ်ရာရရှိခဲ့တဲ့အပြင် NEST သုတေသနဓါတ်ခွဲခန်းရဲ့တံတားပေါ်ကနေ ပြုတ်ကျသွားပြီး ဘယ်လိုမျိုးနည်းနဲ့ လွတ်ြမောက်ခဲ့သလဲဆိုတာကို ၂၀၀၇ ခုနှစ်မှာထွက်ရှိခဲ့တဲ့ Umbrella Chronicles မှာ ပရိသတ်များအားလုံးတွေ့မြင်နိုင်ပါတယ်။ Ada Wong ဟာ ရက်ကွန်းမြို့ပျက်သုန်းခြင်းကနေ လက်မတင်လေးလွတ်မြောက်လာရုံသာမက ဂျီဗိုင်းရပ်စ် sample ကိုရယူနိုင်ခဲ့ပြီး Albert Wesker လက်ထဲကို ပေးအပ်နိုင်ခဲ့ပါတယ်။ Leon ဟာ Ada နဲ့ ဒီတစ်သက်မှာပြန်လည်မဆုံစည်းနိုင်လောက်တော့ဘူးလို့ ထင်မှတ်နေရာကနေ ရက်ကွန်းမြို့ပျက်သုန်းခြင်းဖြစ်ရပ်အပြီး နောက်ထပ် ၆ နှစ်အကြာမှာ Ada နဲ့ ပြန်လည်ဆုံတွေ့ခဲ့ပြီး တိုက်ဆိုင်မှုများရှိခဲ့တယ်ဆိုရင်တော့ သူတို့နှစ်ယောက်ဟာ နောင်လာမယ့် Resident Evil ဂိမ်းတွေမှာ ထပ်မံဆုံစည်းကြဖို့ RE ချစ်ပရိသတ်တွေ အားလုံးကမျှော်လင့်လို့နေပါတယ် 📝

8️⃣ Sergi Vladimir 👹

Sergi Vladimir ဟာ Umbrella Corporation ရဲ့ရာထူးမြင့်အရာရှိတစ်ယောက်ဖြစ်ပြီး Umbrella ရဲ့လုံခြုံရေးနဲ့ကြီးကြပ်ရေးဌာနရဲ့အကြီးအကဲလည်းဖြစ်ပါတယ်။ ဒါ့အပြင်သူဟာ Resident Evil စီးရီးဆိုတာကိုဖြစ်ပေါ်လာစေတဲ့ Umbrella Corporation ကိုစတင်တည်ထောင်သူ ဖခင်ကြီး Oswell E.Spencer ရဲ့သစ္စာစောင့်သိတဲ့လူယုံတော်တစ်ယောက်လည်း ဖြစ်ပြန်ပါတယ်။ သူဟာ ၁၉၇၉ ခုနှစ်ကနေ ၁၉၈၉ ခုနှစ်အထိ ဆယ်နှစ်တာကြာမြင့်ခဲ့တဲ့ ရုရှားအာဖဂန်စစ်ပွဲမှာလည်း ချွပ်ချွပ်ချုံချုံ ပါဝင်တိုက်ခိုက်ခဲ့တဲ့ ဆိုဗီယက်စစ်သားတစ်ယောက်ဖြစ်ပြီး အဲဒီနောက် Umbrella ကိုရောက်ရှိလာတဲ့အခါမှာတော့ ဖခင်ကြီး Oswell E.Spencer ရဲ့ ယုံကြည်စိတ်ချရတဲ့လက်ရုံးတော်တစ်ယောက်ဖြစ်လို့လာခဲ့ပါတယ်။ Sergi Vladimir ဟာ Resident Evil 3 မှာ ကျွန်တော်တို့တွေ့မြင်ရတဲ့ Umbrella ဇီဝလက်နက်တန်ပြန်တိုက်စစ်ဆင်ရေးတပ်ဖွဲ့ U.B.C.S (Umbrella Biohazard Countermeasure Service) ကို စတင်တည်ထောင်ခဲ့သူလည်းဖြစ်တဲ့အပြင် အဲဒီကာလတစ်လျှောက်မှာ အမေရိကန်အစိုးရနဲ့ပူးပေါင်းအလုပ်လုပ်နေခဲ့တာပါ။ Sergi Vladimir ဟာ ရက်ကွန်းမြို့ပျက်သုန်းခြင်းဖြစ်စဉ်မှာ တပ်စုခေါင်းဆောင် Mikhail Viktor ဦးဆောင်တဲ့ Carlos တို့ရဲ့ U.B.C.S တပ်ဖွဲ့ကို ရက်ကွန်းမြို့အတွင်း စေလွှတ်ခဲ့သူဖြစ်ပြီး သူကိုယ်တိုင်လည်း ဇီဝလက်နက်နဲ့သက်ဆိုင်တဲ့အချက်အလက်တွေကို မှတ်တမ်းတင်ကောက်ယူဖို့ လျှို့ဝှက်စွာပဲ ရက်ကွန်းမြို့ထဲမှာ ရှိနေခဲ့တာဖြစ်ပါတယ် 🌫

Sergi Vladimir ဟာ Resident Evil 2 နဲ့ 3 ထဲက ဖြစ်ရပ်တွေနဲ့ အခြေအနေတွေ လုံးဝမဆိုးသွမ်းလာခင်မှာ ရက်ကွန်းမြို့ကနေ စွန့်ခွာလာနိုင်ခဲ့ပါတယ်၊ သပ်သပ်ရပ်ရပ်ပါပဲ။ အားလုံးအံ့သြသွားစမေယ့်အချက်ကတော့ Resident Evil 2 မှာ Leon နဲ့ Claire တို့ အသေအလဲရင်ဆိုင်ခဲ့ရတဲ့ T-103 စူပါစစ်သားဇီဝလက်နက်ဖြစ်တဲ့ Mr.X ကို ရှိသမျှသဲလွန်စတွေအမြစ်ဖြတ်ဖို့ ရက်ကွန်းမြို့အတွင်း ဟယ်လီကော်ပတာနဲ့ ချပေးခဲ့သူဟာ Sergi Vladimir ကိုယ်တိုင်ပါပဲ၊ Mr.X ကို ရက်ကွန်းမြို့မှာချပေးအပြီး Mr.X ကိုသယ်ဆောင်လာတဲ့ ဟယ်လီကော်ပတာနဲ့ ပြန်လည်လိုက်ပါသွားခဲ့တာဖြစ်ပါတယ်။ အဲဒီတော့ သေချာစဉ်းစားကြည့်မယ်ဆိုရင် Resident Evil 2 နဲ့ 3 မှာ Sergi Vladimir ဝင်မွေခဲ့တာဟာ ကျွန်တော်တို့ကစားသူတွေအတွက် အတော်လေးကို ဒုက္ခရောက်စေခဲ့တာပါပဲ၊ ချီးကျူးရမှာလည်းဖြစ်သလို ဒေါသလည်းထွက်ရလောက်တဲ့ Sergi Vladimir ဟာ တော်တော်လေးကို အကွက်စေ့တဲ့သူပါ 😤

သို့ပေမယ့် ရက်ကွန်းမြို့ပျက်သုန်းခြင်းဖြစ်ရပ်တွေအပြီးမှာ Umbrella Corporation ပြိုလဲသွားရုံသာမက အမေရိကန်အစိုးရကနေရဲ့ တရားဥပဒေအရ အရေးယူဆောင်ရွက်ခံခဲ့ရပါတယ်။ Sergi Vladimir ဟာ တရားရုံးတင်စစ်ဆေးခြင်းကို ထွက်ပြေးတိမ်းရှောင်နိုင်ခဲ့ပြီး Twilight of Umbrella မှာ Talos ပရောဂျက်ကိုစိတ်စွဲရူးသွပ်ပြီး အစွန်းရောက်သွားရာကနေ နောက်ဆုံးမှာတော့ Albert Wesker နဲ့ အပြင်းအထန်တိုက်ခိုက်ရင်း Wesker ရဲ့လက်အောက်မှာ အသက်ဆုံးရှုံးခဲ့ရပါတယ် 📝

9️⃣ Leon Scott Kennedy 👨‍✈️

Resident Evil ဆိုရင်တစ်ကမ္ဘာလုံးက ပရိသတ်တွေပြေးပြေးမြင်ကြတာကတော့ ရွှေအိုရောင်ဆံပင်ကို မျက်နှာအရှေ့တစ်ခြမ်းမှာ ဝဲနေအောင်ချထားတဲ့ RE ရဲ့မင်းသားချောလေး Leon Scott Kennedy ပါပဲ။ Resident Evil 4 မှာ Leon ရဲ့အမေရိကန်ဆန်ဆန် ဟော့ဟော့ရမ်းရမ်းနိုင်တဲ့ ဇာတ်ကောင်ပုံစံဟာ တစ်ကမ္ဘာလုံးကို ထိုးဖောက်ပြန့်နှံ့ခဲ့တယ်ဆိုပေမယ့် တကယ်တမ်းမှာတော့ Leon ရဲ့ဘဝအစဟာ Resident Evil 2 ရဲ့ရက်ကွန်မြို့ရဲတပ်ဖွဲ့ R.P.D (Raccoon Police Department) ပါပဲ။ ပထမဦးဆုံး ရက်ကွန်းမြို့ရဲသားလေးအဖြစ် တာဝန်ထမ်းဆောင်ရမယ့်နေ့မှာ အထက်ကဖုန်းဆက်ပြီး အလုပ်လာမဆင်းဖို့ပြောပေမယ့် တာဝန်သိရဲသားတစ်ယောက်ရဲ့စိတ်ဓါတ်နဲ့ စိတ်ထဲကမတင်မကျခံစားချက်ကြောင့် Leon ဟာ ရက်ကွန်းမြို့ကို အရောက်လာခဲ့ပါတယ်။ ဒါပေမယ့် သူရောက်သွားချိန်မှာတော့ အရာအားလုံးဟာ နောက်ကျသွားခဲ့ပါပြီ၊ သူတာဝန်ကျရာဖြစ်တဲ့ ရက်ကွန်မြို့ရဲစခန်းမှာ သူတို့ရဲဘော်ရဲဘက်တွေအားလုံးဟာ အသက်မဲ့တဲ့ဇွန်ဘီတွေဖြစ်ကုန်ကြပါပြီ၊ ဒါဟာ သူ့ဘဝမှာတစ်ခါမှမဖြတ်သန်းမတွေ့ကြုံဖူးခဲ့တဲ့ အိပ်မက်ဆိုးတစ်ခုပါ။ သို့ပေမယ့် ပြန်လည်စဉ်းစားကြည့်မယ်ဆိုရင် တကယ်တမ်း Leon ရောက်မလာခင် ရက်ကွန်းမြို့မှာတီဗိုင်းရပ်စ် ပြန့်နှံ့ခြင်းကြိုဖြစ်ပွားခဲ့တာဟာ သူ့အတွက် ကံကောင်းသွားသလိုပါပဲ 🍂

အတွေ့အကြုံလည်းမရှိ၊ သနားကြင်နာတတ်ပြီး ဘာမဆိုအကောင်းဘက်တွေးတဲ့ Leon အတွက်တော့ အစောကြီးကတည်းက ရက်ကွန်းမြို့ရဲတပ်ဖွဲ့မှာရှိနေမယ်ဆိုရင် သူလည်း အသိဉာဏ်မဲ့စွာ လူ့အသားဆာလောင်နေတဲ့ သူ့ရဲဘော်ရဲဘက်တွေလို ဇွန်ဘီပဲဖြစ်သွားခဲ့မှာပါ။ အဲဒီလိုနဲ့ ရရာလက်နက်ကို ဆွဲကိုင်ပြီး Leon တစ်ယောက်ဟာ ရက်ကွန်းမြို့ရဲတပ်ဖွဲ့ကို လာရာလမ်းမှာ တွေ့ကြုံခဲ့ရတဲ့ Chris ရဲ့ညီမ Claire နဲ့အတူ ကျရောက်လာတဲ့အန္တရာယ်တွေကို ရင်ဆိုင်ကျော်ဖြတ်ရင်း နောက်ဆုံးမှာတော့ လောင်မြိုက်ပြီးမွှစာကျဲရတော့မယ့် ရက်ကွန်းမြို့ကနေ လွတ်မြောက်အောင် ထွက်ပြေးလာနိုင်ခဲ့ပါတယ်။ အခုလက်ရှိမှာတော့ Leon ဟာ အမေရိကန်ဖယ်ဒရယ်အစိုးရလက်အောက်မှာ ဇီဝလက်နက်အထူးအေးဂျင့်အနေနဲ့ စစ်ဆင်ရေးပေါင်းများစွာကို အောင်မြင်စွာ ထမ်းဆောင်နိုင်ခဲ့ပြီး Resident Evil လောကတစ်ခွင်မှာ လူသိများတဲ့ဇာတ်ကောင်တစ်ယောက်ဖြစ်လို့သွားခဲ့ပါပြီ 📝

🔟 Jill Valentine 💙

ကျွန်တော်အကြိုက်အနှစ်သက်ရဆုံး Resident Evil ဇာတ်ကောင်ဖြစ်တဲ့ Jill Valentine ဟာလည်း ရက်ကွန်မြို့ဇွန်ဘီပြန့်ပွားခြင်းဖြစ်စဉ်မှာ Leon လိုပဲ ရက်ကွန်းမြို့ရဲတပ်ဖွဲ့ရဲ့ ထိပ်သီးစစ်ဆင်ကယ်ဆယ်ရေးအဖွဲဝင့်S.T.A.R.S (Special Tactics and Rescue Services) အဖြစ် ရက်ကွန်းမြို့မှာရှိနေခဲ့ပါတယ်။ ဒါပေမယ့် Jill ကြုံတွေ့ခဲ့ရတွေဟာ Leon ရဲ့အဖြစ်အပျက်များထက် တစ်ရက်ပိုလို့စောပါတယ်။ Arklay Mansion ဖြစ်စဉ်မှာ အသက်ရှင်ကျန်ခဲ့သူတစ်ဦးဖြစ်ခဲ့တဲ့ Jill ဟာ ရက်ကွန်းမြို့ပျက်သုန်းခြင်းဖြစ်စဉ်မှာလည်း ထပ်မံရှင်သန်လွတ်ြမောက်ခဲ့သူဖြစ်တဲ့အတွက် Jill ရဲ့အတိုက်အခိုက်ကျွမ်းကျင်မှုနဲ့ survival အရည်အသွေးတို့ဟာ Resident Evil စီးရီးရဲ့အဆင့်သတ်မှတ်ချက်နဲ့ဆိုရင်တောင် လုံးဝကိုထိပ်တန်းအဆင့်မှာရှိနေတယ်ဆိုတာ သုံးသပ်ကြည့်လို့ရပါတယ်။ Jill ရဲ့မဟာရန်သူတော်ကြီးဖြစ်တဲ့ Nemesis ကိုယ်တိုင် Jill ကို အောင်မြင်စွာချေမှုန်းနိုင်တော့မယ့်အချိန်မှာ U.B.C.S က Carlos ရောက်ရှိလာခဲ့ပြီး Jill ကို ကယ်ထုတ်သွားခဲ့ပါတယ်။ အဲဒီကနေစပြီး Resident Evil 3 ဇာတ်ကြောင်းဖြစ်သွားခဲ့ပြီး ဇွန်ဘီပေါင်းများစွာအပြင် အင်အားကြီးပြီး ကြမ်းကြုတ်တဲ့ Nemesis ကိုပါ နှိမ်နင်းနိုင်ခဲ့ပြီး နောက်ဆုံးမှာတော့ U.B.C.S က ကြေးစားစစ်သည် Carlos နဲ့အတူ အနုမြူဒုံးကျည်မပေါက်ကွဲခင်မှာ ရက်ကွန်းမြို့ကနေ လွတ်ြမောက်ခဲ့ကြပါတယ် 🚁💨

Umbrella ရဲ့ဆိုးသွမ်းလှတဲ့လုပ်ရပ်တွေကို အဆုံးသတ်ဖို့အတွက် Jill နဲ့အတူ အခြားသော S.T.A.R.S အဖွဲ့ဝင်များဟာ ကမ္ဘာ့ဆေးဝါးကုမ္ပဏီအဖွဲ့ချူပ်နဲ့ပူးပေါင်းပြီး ဇီဝလက်နက်စစ်ဆင်ရေးနဲ့လုံခြုံရေးမဟာမိတ်အဖွဲ့ B.S.A.A (Bioterrorism Security Assessment Alliance) ကိုထည်ထောင်ခဲ့ပါတယ်။ အဲဒီလိုနဲ့ Umbrella ကိုစတင်တည်ထောင်သူဖခင်ကြီး Osward E.Spencer ရဲ့သတင်းအစအနကိုရခဲ့လို့ Spencer Mansion မှာ သွားရောက်ရှောဖွေရာကနေ Albert Wesker နဲ့ပြန်လည်တွေ့ဆုံပြီးနောက် သုံးနှစ်တိုင်တိုင် Wesker ရဲ့လက်အောက်က စေခိုင်းရာရုပ်သေးတစ်ရုပ် ဖြစ်ခဲ့ရပါတယ်။ ဒါပေမယ့် Resident Evil 5 မှာ Chris ရဲ့ Sheva ကြောင့် နဂိုပုံမှန်ပြန်ဖြစ်ခဲ့ပြီး Chris, Sheva, Josh တို့နဲ့အတူ Wesker ကို အဆုံးသတ်လိုက်နိုင်ခဲ့ပါတယ်။ လက်ရှိအချိန်မှာတော့ Jill ဟာ BSAA မှာပြန်လည်တာဝန်ထမ်းဆောင်လျက်ရှိပြီး ဆေးကုသမှုခံကာ အနားယူလျက်ရှိပါတယ်။ နောင်လာမယ့်ဂိမ်းတွေမှာ ပြန်ပါလာဖို့ကတော့ အခွင့်အရေးရှိပေမယ့် ပရိသတ်တို့က အချိန်အတိုင်းအတာတစ်ခုထိတော့ စောင့်မျှော်ရဦးမယ်လို့ ထင်ပါတယ် 📝

1️⃣1️⃣ Claire Redfield 🌹

ဒါကတော့ ရက်ကွန်းမြို့ကနေ လွတ်မြောက်လာခဲ့သူတွေထဲက နောက်ဆုံးမြောက်ဇာတ်ကောင်ဖြစ်သလို Ada Wong ထက် ကျွန်တော်ပိုကြိုက်တဲ့မိန်းမသားဇာတ်ကောင်လည်း ဖြစ်ပါတယ်။ ရက်ကွန်းမြို့ထိပ်သီးရဲတပ်ဖွဲ့ S.T.A.R.S ရဲ့ အဖွဲ့ဝင်ဖြစ်တဲ့ အစ်ကို Chris Redfield ကို ရက်ကွန်းမြို့မှာ လိုက်လံရှာဖွေရာကနေ Clarie ရဲ့ဇာတ်လမ်းဟာ စတင်ခဲ့တာဖြစ်ပါတယ်။ အဲဒီမှာပဲ ရက်ကွန်းမြို့ရဲတပ်ဖွဲ့ရဲ့ ရဲသားလေး Leon Scott Kennedy နဲ့ တွေ့ဆုံပြီး Annatte Birkin ရဲ့သမီးလေး Sherry နဲ့ သုံးယောက်အတူ ရက်ကွန်းမြို့အိပ်မက်ဆိုးကြီးထဲက ရုန်းထွက်လာနိုင်ခဲ့တာပါ။ Clarie ဟာ သတ္တိရှိတယ်၊ ရိုးသားတယ်၊ ကိုယ်ချင်းစာစိတ်အပြည့်ရှိပြီး မိန်းမသားတို့ရဲ့ဂုဏ်ရည်နဲ့ ပြည့်ဝတဲ့ RE စီးရီးရဲ့မိန်းမသားဇာတ်ကောင်လည်း ဖြစ်ပါတယ် 🍑

Resident Evil 2 ဇာတ်ကြောင်းအပြီး ဒါမှမဟုတ် ရက်ကွန်းမြို့ပျက်သုန်းခြင်းဖြစ်စဉ်အပြီးမှာ Leon နဲ့ Sherry ကို အမေရိကန်အစိုးရက သူတို့လက်အောက်ကို သွတ်သွင်းခဲ့ပေမယ့် Claire ကတော့ သူတို့အစ်ကိုကို ရှာပုံတော်ဖွင့်ဖို့ Leon တို့နဲ့ လမ်းခွဲပြီး တစ်ယောက်တည်းဆက်လက်ခရီးနှင်ခဲ့ပါတယ်။ အဲဒီလိုနဲ့ တောင်ဖစိဖိတ်သမုဒ္ဒရာမှာတည်ရှိတဲ့ Rockfort ကျွန်းမှာ Chris နဲ့ ပြန်လည်တွေ့ဆုံခဲ့ပြီး နှစ်ယောက်အတူ Veronica ကို အမြစ်ဖြတ်သုတ်သင်ခဲ့ပါတယ်။ လက်ရှိအချိန်မှာတော့ Claire Redfield ဟာ အစ်ကိုဖြစ်သူရဲ့ BSAA ထဲကိုလည်း မဝင်၊ Leon နဲ့ Sherry လိုမျိုး အမေရိကန်အစိုးရလက်အောက်မှာလည်း တာဝန်ထမ်းဆောင်မနေဘဲ အကျိုးအမြတ်မရယူဘဲလူသားတွေကိုကယ်တင်တဲ့ TerraSave အဖွဲ့အစည်းလက်အောက်မှာ ထင်ရှားတဲ့အဖွဲ့ဝင်တစ်ဦးအဖြစ် ဇီဝလက်နက်အကြမ်းဖက်မှုများကို ကျရာနေရာကနေ ကာကွယ်တားဆီးလို့နေပါတယ် 🤝

ကဲ ဒီဆောင်းပါးဒုတိယတွဲမှာ ဖော်ပြပေးခဲ့တာကတော့ ၁၉၉၆ ခုနှစ်ရဲ့ရက်ကွန်းမြို့ပျက်သုန်းခြင်းဖြစ်စဉ်ကနေ အောင်မြင်စွာလွတ်မြောက်လာခဲ့ကြတဲ့ အသက်ရှင်ကျန်ရစ်သူတွေနဲ့ သူတို့ရဲ့လက်ရှိအခြေအနေတွေပါပဲ။ Resident Evil ပရိသတ်များလည်း ပထမပိုင်းနဲ့ ဒုတိယပိုင်း နှစ်တွဲကို ဖတ်ရှုပြီး ရက်ကွန်းမြို့ပျက်သုန်းခြင်းဖြစ်ရပ်ရဲ့ ပိုပြီးကြီးမားတဲ့ပုံကားချပ်ကို မြင်နိုင်သွားလိမ့်မယ်လို့ မျှော်လင့်သလို ကျွန်တော်ကိုယ်တိုင်လည်း ဂိမ်းချစ်သူများအားလုံးဆီ ဒီအကြောင်းအရာကို ပြန်လည်မျှဝေခွေင့်ရခဲ့တဲ့အတွက် ဝမ်းသာပီတိဖြစ်မိပါတယ်။ နောင်လာမယ့် အခုလိုစိတ်ဝင်စားစရာအကြောင်းအရာတွေကို ပေ့ချ်မှာ အချိန်မှန်တင်ဆက်ပေးသွားမှာကြောင့် အားလုံးပဲ စောင့်စားနိုင်ကြောင်းပြောရင်း ဒီကနှုတ်ဆက်လိုက်ပါတယ်။ ဖတ်ရှုသူတစ်ယောက်ချင်းစီကို အထူးကျေးဇူးတင်ရှိကြောင်းနဲ့ နောင်လာမယ့်ဆောင်းပါးတွေမှာ ကျွန်တော်တို့ ပြန်လည်ဆုံတွေ့ကြပါမယ် 💐💜

Yan

Resident Evil စီးရီးရဲ့ရက်ကွန်းမြို့ပျက်သုန်းခြင်း (Raccoon City Destruction) ဖြစ်ရပ်မှာ ဘယ်သူတွေအသက်ရှင်လွတ်မြောက်ခဲ့လဲ? (ပထမပိုင်း) ☣️☣️

အခုဆိုရင်တော့ ဂိမ်းချစ်သူတွေအားလုံး အသည်းစွဲကြိုက်ကြတဲ့ Resident Evil စီးရီးရဲ့ ဂိမ်းလောကနဲ့ စိတ်လှုပ်ရှားဖို့ကောင်းတဲ့အချက်အလက်တွေကို ပြန်လည်တင်ဆက်ပေးဖို့ အချိန်ကျရောက်လို့ လာပြန်ပါပြီ။ တကယ်က RE စီးရီးနဲ့ပတ်သက်ပြီး ဖော်ပြချင်တဲ့အကြောင်းအရာပေါင်းများစွာ အစီအရီရှိပေမယ့် ဘယ်ဟာကိုအရင် ဆောင်းပါးအဖြစ် ရေးသားရမလဲဆိုတာ စဉ်းစားရာကနေ အခုဒီစာစောင်ကို တင်ဆက်ပေးရခြင်းဖြစ်ပါတယ်။ ဘာကြောင့်လည်းဆိုတော့ ၂၀၁၉ ခုနှစ်နဲ့ အခု ၂၀၂၀ ခုနှစ်အသီးသီးမှာ Resident Evil 2 နဲ့ 3 Remake နှစ်ခု အစီအရီထွက်ရှိခဲ့တာကြောင့် ဒီအကြောင်းအရာကို အရင်ပြောပြသွားဖို့ ရည်ရွယ်ဖြစ်တာပါ။ တိုက်ဆိုင်ချင်တော့ RE 2 နဲ့ RE 3 ဇာတ်ကြောင်းနှစ်ခုလုံးဟာ ရက်ကွန်းမြို့ပျက်သုန်းခြင်း (Raccoon City Destruction) အပေါ်မှာ အခြေခံပြီး တည်ဆောက်ထားကြလို့ပါပဲ။ ကျွန်တော်တို့ စီးရီးတစ်လျှောက်လုံးကို ပြန်လည်သုံးသပ်ကြည့်မယ်ဆိုရင် Resident Evil ဂိမ်းကို တစ်ဆစ်ချိုးပြောင်းလဲပေးခဲ့တာဟာ တီဗိုင်းရပ်ပ်စတင်ပြန့်ပွားခြင်းရဲ့ နောက်ဆက်တွဲဖြစ်တဲ့ ဇွန်ဘီ Outbreak နဲ့ အဆုံးသတ်ကတော့ ရက်ကွန်းမြို့တော်ပျက်သုန်းခြင်း (Raccoon City Destruction) ပါပဲ။ ဟိုးငယ်စဉ်အရွယ် Resident Evil 4 ကိုစဆော့တုန်းက ဂိမ်းအဝင် Prologue မှာလာတဲ့ "ရက်ကွန်းမြို့မှာ ဘယ်လိုဖြစ်ရပ်တွေဖြစ်ခဲ့တယ်၊ ဇွန်ဘီတွေပြန့်ပွားပြီး တဖြည်းဖြည်း တစ်မြို့လုံးကလူတွေ အသက်ဆုံးရှုံးခဲ့တယ်၊ နောက်ဆုံးတော့ အမေရိကန်အစိုးရက အနုမြူဒုံးကျည်နဲ့ ပစ်ခွင်းလိုက်လို့ တစ်မြို့လုံးပျက်သုန်းသွားခဲ့ရတယ်" အစရှိတဲ့ဖြစ်ရပ်တွေကို ဗီဒီယိုမှာကြည့်ခဲ့ရပါတယ်။ ပြသတဲ့ရိပ်ပုံတွေအတိုင်း ရိပ်ဖမ်းသံဖမ်းလောက်သိခဲ့ပြီး ရက်ကွန်းမြို့ပျက်သုန်းခြင်းဆိုတဲ့ ဖြစ်ရပ်က ဘာလဲဆိုတာကို အဲဒီမှာသဲလွန်စရပြီး သိချင်စိတ်တွေ လွန်စွာမှဖြစ်ခဲ့ပါတယ်။ အဲတုန်းက လွန်ရောကျွံရော အသက် ၁၁ နှစ်၊ ၁၂ နှစ်ဝန်းကျင် ၂၀၀၆၊ ၂၀၀၇ ခုနှစ်ဖြစ်တဲ့အတွက် Resident Evil 2 ဂိမ်းအကြောင်းကို သိတဲ့လူက ဂိမ်းဆိုင်မှာရှိမနေ၊ အင်တာနက်ကလည်း ဒီမှာလူအမြောက်အမြားမသုံး၊ ကိုယ်ကလည်းအင်္ဂလိပ်စာကို သိပ်မတတ်သေးတာကြောင့် သိချင်စိတ်ပြင်းပခဲ့ပေမယ့် ဒီတိုင်းပဲမြိုသိပ်ထားခဲ့ရပါတယ် 😢🎮

အင်္ဂလိပ်စာကို သေရေးရှင်ရေး အကျွမ်းတဝင်တတ်မြောက်နေချင်တာ ဗီဒီယိုဂိမ်းတွေကို ဘယ်လိုအချိန်၊ ဘယ်လိုနေရာမှာဖြစ်ဖြစ် အပြည့်အဝနားလည်ချင်တဲ့စိတ်ကြောင့်လည်း ရာခိုင်နှုန်းအတော်များများပါပါတယ်။ အဲဒီအချိန်တုန်းက Resident Evil 4 မှာ Leon သေနတ်လာဝယ်တိုင်း Merchant ပြောတဲ့ one-liner စကားတွေကို စာလုံးပေါင်းမှတ်မှတ်ပြီး အင်္ဂလိပ်-မြန်မာအဘိဓာန်နဲ့ တစ်လုံးချင်းစီဘာသာပြန်ရင်း ဘာကိုပြောနေတာလဲ သိခဲ့တယ်ဆိုပေမယ့် အဲဒီ Prologue ဗီဒီယိုကိုတွေ့နေရတိုင်းတော့ ရက်ကွန်းမြို့ပျက်သုန်းခြင်းဟာ ဘယ်လိုဖြစ်ရပ်လဲဆို စိတ်မှန်းနဲ့ပဲပုံဖော်ခဲ့ရတာပေါ့။ အခုတော့ ကျွန်တော်ကိုယ်တိုင်လည်း ကိုယ်လွန်စွာမှကြိုက်ရတဲ့ Resident Evil ဂိမ်းတစ်ခုလုံးနဲ့ ပတ်သက်လို့ သမိုင်းအစ ပစ္စပွန်အဆုံးကို ထုံးလိုမွှေရေလိုနှောက်နိုင်ပြီ၊ ကိုယ်အရမ်းကိုသိချင်စိတ်ပြင်းပတဲ့အရာတွေကိုလည်း ခရေစေ့တွင်းကျကို သိနိုင်ခဲ့ပြီဆိုတော့က ဒီတစ်ခေါက်မှာ အားလုံးကို ရက်ကွန်းမြို့ပျက်သုန်းခြင်းနဲ့ ဆက်နွယ်ပြီး လူတွေသိပ်မသိကြတဲ့အကြောင်းကို ပြန်လည်မျှဝေပေးချင်ပါတယ်။ ဘာကြောင့်မို့ ရက်ကွန်းမြို့ပျက်သုန်းရတဲ့အကြောင်းအရင်းကို မရေးသားရတာလဲဆိုတော့ ၂၀၁၉ နဲ့ ၂၀၂၀ အသီးသီးမှာ အဲဒီဖြစ်ရပ်ကို အခြေခံပြီးဂိမ်းတည်ဆောက်ထားတဲ့ အမိုက်စား RE Remake ဂိမ်းနှစ်ခု ထွက်လာတဲ့အတွက် ဂိမ်းချစ်သူတွေအားလုံးက ဒီအကြောင်းကို သိပြီးသားဖြစ်ကြလိမ့်မယ်ဆိုတာ ယုံကြည်လို့ပါ။ Resident Evil 4 ထဲကရွာငယ်လေးရဲ့အကြောင်းကိုသိရှိပြီး ပိုကြီးမားတဲ့ပုံရိပ်ကိုမြင်နိုင်သွားသလို ဒီဆောင်းပါးကိုဖတ်ရှုပြီးသွားရင်လည်း ရက်ကွန်းမြို့ပျက်သုန်းခြင်းနဲ့ Resident Evil 2 နဲ့ 3 အပြီး Aftermath မှာ ဘယ်သူတွေ ဘယ်လိုအဆုံးသတ်သွားတယ်ဆိုတာကို အပြည့်အဝသိရှိနိုင်မှာဖြစ်ပါတယ်။ ဂိမ်းပရိသတ်တွေကို ရက်ကွန်းမြို့ပျက်သုန်းခြင်းဖြစ်ရပ်အကြောင်း အပြည့်အစုံကို ပြောပြချင်တာရော၊ ဒီဖြစ်ရပ်ရဲ့အကျိုးသက်ရောက်မှုတွေကို သိစေချင်တာရော၊ ကျွန်တော့်ရဲ့ငယ်ဘဝအဖြစ်အပျက်လေးကို သတိရမိတဲ့အနေနဲ့ပါ ဒီဆောင်းပါးလေးကို ရေးသားတင်ဆက်လိုက်ပါတယ်။ ဒါကတော့ ရက်ကွန်းမြို့ပျက်သုန်းခြင်းဖြစ်ရပ် (Raccoon City Destruction Incident) ကနေ အသက်ရှင်လျက်လွတ်မြောက်ခဲ့ကြသူတွေ ဖြစ်ပါတယ်။ အဆင်သင့်ဖြစ်ပြီဆို တစ်ပုံချင်းစီထောက်ပြီး ဖတ်ရှုနိုင်ပါတယ် 🤓➡️

1️⃣ Resident Evil: Outbreak မှဇာတ်ကောင်များ (Cindy, Kevin, Mark, Yoko, Jim, George, David) 👥

Resident Evil စီးရီးရဲ့ နာမည်ကျော်လူသိများတဲ့ကြေကွဲဖွယ်ဖြစ်ရပ်ဟာ ရက်ကွန်းမြို့ပျက်သုန်းခြင်းဖြစ်ရပပ်ဖြစ်ပါတယ်။ ၁၉၉၆ ခုနှစ်မှာဖြစ်ခဲ့တဲ့ ရက်ကွန်းမြို့ဇွန်ဘီပြန့်ပွားမှုဖြစ်စဉ်မှာ ကျွန်တော်တို့ဆော့ကစားသူတွေဟာ စီးရီးရဲ့အထင်ကရဇာတ်ကောင်တွေနဲ့သာ အဲဒီဖြစ်ရပ်ကို ဖြတ်သန်းခဲ့ရလို့ အခြားသောရှုထောင့်တွေကနေ မမြင်ခဲ့ကြတာပါ။ တကယ်တမ်းမှာတော့ လူဦးရေတစ်သိန်းဝန်းကျင်ရှိပြီး လူစည်ကားတဲ့ရက်ကွန်းမြို့ပြမှာ ဒီကပ်ဘေးကိုလွတ်ြမောက်ခဲ့တဲ့ ပြည်သူတွေ လက်တစ်ဆုပ်စာရှိခဲ့ပါတယ်။ အဲဒီသူတွေကတော့ Resident Evil: Outbreak ဂိမ်းထဲက သာမန်ဇာတ်ကောင်တွေဖြစ်တဲ့ Cindy Lennox, Kevin Ryman, Mark Wirkins, Alyssa Ashcroft, Yoko Suzuki, Jim Chapman, George Hamilton နဲ့ David King အစရှိတဲ့ လူရှစ်ယောက်ပါပဲ။

ဒီဂိမ်းဟာ ၂၀၀၃ ခုနှစ်ကနေ ၂၀၀၄ ခုနှစ်အတွင်း Playstation 2 မှာသာဆော့ကစားနိုင်မယ့် အထူးသီးသန့်ဂိမ်းအဖြစ် ထွက်ရှိလာတာဖြစ်ပြီး ကိုယ်ဟာကိုယ်ခံပညာအထိုက်အလျောက်တတ်မြောက်ပြီး အန္တရာယ်ကို ခုခံကာကွယ်နိုင်တဲ့ဇာတ်ကောင်နေရာမျိုးက မဟုတ်ဘဲ ဘဝကိုပုံမှန်ဖြတ်သန်းနေတဲ့ ပြည်သူတွေနေရာကနေ ရက်ကွန်းမြို့ပျက်သုန်းခြင်းဖြစ်ရပ်က လွတ်မြောက်အောင် ထွက်ပြေးရတဲ့ဂိမ်းပါပဲ။ RE ပရိသတ်အချို့က ဒီဂိမ်းကိုလက်ရှိခေတ်ဂရပ်ဖစ်ရုပ်ထွက်တွေနဲ့ ပြန်ဖန်တီးပေးဖို့ တောင်းဆိုနေကြသလို ဒီဂိမ်းဟာ RE စီးရီးနဲ့ ရက်ကွန်းမြို့ပျက်သုန်းခြင်းကို ကွဲပြားတဲ့ရှုထောင့်ကနေ မီးမောင်းထိုးပြထားတဲ့ ဂိမ်းလည်းဖြစ်ပါတယ်။ ဒီ Outbreak ဂိမ်းထဲက လွတ်မြောက်ခဲ့သူတွေဟာ နောင်လာမယ့် Resident Evil ဂိမ်းတွေမှာ ပြန်လည်ပါဝင်လာမယ်ဆိုတာ မသေချာတော့ပေမယ့် RE 7 မှာ Ethan ဖတ်လိုက်မိတဲ့သတင်းစာအရဆိုရင် လွတ်မြောက်ခဲ့သူတစ်ဦးဖြစ်တဲ့ Alyssa Ashcroft ကိုယ်တိုင် ဒီ Outbreak အကြောင်းကို ဆောင်းပါးအဖြစ်ရေးသားပြုစုထားခဲ့တာကြောင့် ဒီ Outbreak ဂိမ်းက လွတ်ြမောက်ခဲ့သူတွေအားလုံးဟာ တကယ့် canon ဇာတ်ကြောင်းကဖြစ်ရပ်များဖြစ်တယ်လို့ မှတ်ယူနိုင်ပါတယ် 📝

2️⃣ Ricardo Irvin 🦑



Resident Evil 5 ကိုမှတ်မိကြဦးမယ်ဆိုရင်တော့ Ricardo Irvin ကို အားလုံးသိကြမှာပါ။ Ricardo Irvin ဟာ TRICELL ရဲ့ရာထူးမြင့်ဒါရိုက်တာတစ်ယောက်ဖြစ်ပြီး သူ့ကိုသင်္ဘောပေါ်မှာမဖမ်းမိချိန်အထိ Chris ကို အတော်လေးဒုက္ခရောက်အောင် အကြိမ်ကြိမ်အလီလီလုပ်ခဲ့တဲ့ ဗီလိန်တစ်ယောက်လည်းဖြစ်ပါတယ်။ သို့ပေမယ့် Ricardo Irvin ဟာ ဘယ်လောက်ပဲ TRICELL မှာအာဏာရှိပြီး ရာထူးမြင့်မြင့် တကယ်တော့ သူဟာ Albert Wesker ရဲ့အသုံးချခံစစ်တုရင်ရုပ်လေးတွေထဲက တစ်ရုပ်ဖြစ်ပါတယ်။ သူဟာ ရက်ကွန်းမြို့ပျက်သုန်းခြင်းကို လွတ်မြောက်ခဲ့သူတွေထဲက သက်သေအထောက်အထားအရ BSAA ကသံသယဝင်ခဲ့ပေမယ့် Resident Evil 5 မှာ Chris နဲ့ Sheva တို့နှစ်ယောက်နဲ့ သင်္ဘောကြီးပေါ်မှာရင်ဆိုင်တိုက်ခိုက်ရင်း ရှုံးနိမ့်သေဆုံးသွားခဲ့တဲ့အတွက် သူ့ဆီကဖြောင့်ချက်နဲ့ တကယ့်အမှန်တရားကတော့ ရက်ကွန်းမြို့ကအဖြစ်အပျက်တွေလိုပဲ လောကကြီးကနေ ပျောက်ကွယ်သွားပြီ ဖြစ်ပါတယ် 📝

3️⃣ Frederic Downing 👔

၂၀၀၈ ခုနှစ်ကထွက်တဲ့ Resident Evil: Degeneration CGI ရုပ်ရှင်ကို ကြည့်ဖူးသူများဆိုရင်တော့ အဲဒီထဲက မျက်မှန်နဲ့ သုတေသီအကြံပေးဖြစ်တဲ့ Frederic Downing ကို မှတ်မိကြမှာပါ။ သူဟာ တကယ်တော့ Umbrella Corporation ရဲ့သုတေသနပြုလုပ်သူဟောင်းတစ်ယောက်ဖြစ်ပြီး ရက်ကွန်းမြို့တစ်မြို့လုံးအနုမြူဒုံးကျည်ကြောင့် မပျက်သုန်းခင်မှာ လက်မတင်လေး လွတ်မြောက်လာခဲ့သူတစ်ဦးဖြစ်ပါတယ်။ ဒါတင်မက Frederic ဟာ Degeneration ဇာတ်ကားရဲ့အဓိကဗီလိန်ဆိုရင်လည်း မမှားပါဘူး။ ရက်ကွန်းမြို့ပျက်သုန်းပြီး ခုနှစ်အကြာမှာ Frederic ဟာ WillPharma ဆေးဝါးကုမ္ပဏီရဲ့ခေါင်းဆောင်သုတေသီဖြစ်လာခဲ့ပြီး ဖြေဆေးထုတ်ပေးတဲ့ကယ်တင်ရှင်အဖြစ် ပြန်လည်ထွက်ပေါ်လာခဲ့ပါတယ်။

တကယ်တမ်းမှာတော့ Frederic ရဲ့လက်ထဲမှာ Umbrella ကဖန်တီးပြုလုပ်ထားခဲ့တဲ့ တီဗိုင်းရပ်စ်နဲ့ ဂျီဗိုင်းရပ်စ် sample တွေ ရှိနေခဲ့ပြီး တီဗိုင်းရပ်စ်ကို လေဆိပ်မှာစတင်ပြန့်နှံ့စေခဲ့တာပါ။ တကယ်တော့ Frederic ဟာ အဲဒီလိုသေးငယ်တဲ့ outbreak ကနေ အမြတ်အစွန်းရယူဖို့ ကြံစည်ခဲ့တာဖြစ်ပါတယ်၊ သို့ပေမယ့် သူ့ရဲ့အကြံအစည်မအောင်မြင်သေးခင်မှာပဲ ဇွန်ဘီပြန့်ပွားမှုဖြစ်စဉ်မှာ အတွေ့အကြုံရှိပြီး အရည်အချင်းပြည့်ဝတဲ့ Leon, Claire နဲ့ Angela Miller တို့ရဲ့ ဖမ်းဆီးထိန်းသိမ်းခြင်းကို ခံခဲ့ရပြီး အဲဒီမှာပဲ သူ့ရဲ့ဇာတ်ကြောင်းဟာ အဆုံးသတ်ခဲ့ရပါတယ် 📝

 4️⃣ HUNK 😈

Resident Evil စီးရီးထဲမှာ ကျွန်တော်အကြိုက်ရဆုံးဇာတ်ကောင်တွေထဲက တစ်ယောက်ဖြစ်ပါတယ်။ ဂက်စ်မျက်နှာဖုံးကိုအမြဲစွပ်ထားပြီး အထူးစစ်ဆင်ရေးဝတ်စုံပြည့်နဲ့ သွေးအေးတိကျပြတ်သားလှတဲ့ HUNK ဟာ RE စီးရီးပရိသတ်များရဲ့ အသည်းစွဲဇာတ်ကောင်တွေထဲက တစ်ယောက်ဆိုရင်လည်း မမှားပါဘူး။ ၂၀၁၉ ခုနှစ်ကထွက်ခဲ့တဲ့ Resident Evil 2 Remake ကိုဆော့ခဲ့ဖူးသူများဆိုရင်တော့ HUNK ဦးဆောင်တဲ့ Umbrella တပ်စုရဲ့ ဆိုးသွမ်းလှတဲ့ကံကြမ္မာနဲ့ အဆုံးသတ်ကို သိကြမှာပါ။ HUNK နဲ့ UBCS တပ်ဖွဲ့ရဲ့ဆာဂျင်ဖြစ်တဲ့ Nikolai Zinoviev တို့ဟာ ပြိုင်ဖက်တွေဖြစ်တယ်လို့ဆိုကြပြီး နှစ်ယောက်လုံးဟာ Umbrella ရဲ့စစ်ဆင်းရေးတိုင်းအတွက် ယုံကြည်စိတ်ချရတဲ့ စစ်သားများဖြစ်ကြပါတယ်။ Resident Evil စီးရီးရဲ့သမိုင်းအစကတည်းကနေ အခုအချိန်ထိ HUNK ရဲ့နောက်ကြောင်းသမိုင်းကို မသိကြပေမယ့် HUNK ဟာ သေမင်းတမန်တော် (The Grim Reaper) ဖြစ်တယ်ဆိုတာတော့ လူတိုင်းသိကြပါတယ်။ ဘာကြောင့်လည်းဆိုတော့ HUNK ဦးဆောင်တဲ့ လျှို့ဝှက်စစ်ဆင်ရေးတိုင်းမှာ သူ့တပ်စုကတပ်ဖွဲ့ဝင်တွေအကုန်လုံး အသေဆိုးနဲ့ သေဆုံးအရေးနိမ့်ကြပြီး သူတစ်ယောက်တည်းကပဲ အသက်ရှင်ကျန်ရစ်ရင်း စစ်ဆင်ရေးကိုအောင်မြင်အောင် လုပ်ဆောင်နိုင်ခဲ့တာကြောင့်ဖြစ်ပါတယ်၊ ဒါကြောင့်ပဲ သူ့ကိုသေမင်းတမန်တော် (The Grim Reaper) လို့ လူတွေက အပြုသဘောဆောင်ခေါ်ဝေါ်ရင်း အဲနာမည်ဟာ Resident Evil လောကမှာ နာမည်ကျော်လာခဲ့တာပါ။

ရက်ကွန်းမြို့ပျက်သုန်းခြင်းဖြစ်စဉ်မှာလည်း ထိုနည်းလည်းကောင်းပါပဲ၊ သန္ဓေပြောင်းသတ္တဝါတွေ၊ လူသားစားဇွန်ဘီတွေပြည့်နှက်နေတဲ့ NEST သုတေသနဓါတ်ခွဲခန်း၊ မြေအောက်တူးမြောင်း၊ R.P.D ရဲစခန်းနဲ့ ရက်ကွန်းမြို့ကို တစ်ဆင့်ချင်းဆီ ပဝါမရှုရေမကူဘဲ ဖြတ်သန်းလာနိုင်ခဲ့ပြီး Wiliam Birkin ဆီက ဂျီဗိုင်းရပ်စ်ကို ရအောင်ယူဆောင်လာနိုင်ခဲ့လို့ပါ။ ရက်ကွန်းမြို့ပျက်သုန်းခြင်းကနေ HUNK ဘယ်လိုလွတ်မြောက်လာသလဲဆိုတာကတော့ Resident Evil 2 ရဲ့ထပ်ပေါင်း dlc ဖြစ်တဲ့ The 4th Survior မှာ ဆော့ကစားသိရှိနိုင်ပြီး လက်ရှိအချိန်မှာတော့ HUNK ဘာတွေလုပ်နေသလဲ? ဘယ်လိုစစ်ဆင်ရေးတွေဆောင်ရွက်နေသလဲ အစရှိတာတွေကတော့ မသိရသေးပါဘူး။ RE စီးရီးရဲ့လူကြိုက်များတဲ့အထင်ကရဇာတ်ကောင်ဖြစ်တဲ့ HUNK ဟာ သူရဲ့တစ်တော်ကိုယ်ဂိမ်းတစ်ခုတော့ အခုအချိန်မှာလိုအပ်နေတာ အမှန်ပါပဲ 📝

5️⃣ Sherry Birkin 💚

Wiliam Birkin နဲ့ Annette Birkin တို့ရဲ့တစ်ဦးတည်းသောသမီးဖြစ်တဲ့ Sherry Birkin ဟာ ရက်ကွန်းမြို့ပျက်သုန်းခြင်းဖြစ်ရပ်မှာ အသက် ၁၀ နှစ်အရွယ် မူကြိုကျောင်းသူလေးပဲရှိသေးတယ်။ Resident Evil 2 ထဲကဇာတ်ကြောင်းဖြစ်ရပ်အတိုင်းပဲ Sherry ဟာ Chris ကိုလိုက်ရှာနေတဲ့ သူ့ရဲ့ညီမဖြစ်သူ Claire နဲ့ တွေ့ဆုံခဲ့ပြီး ရက်ကွန်းမြို့ကထွက်ပြေးလွတ်မြောက်လာနိုင်ခဲ့တာပါ။ Resident Evil 2 ရဲ့ဇာတ်ကြောင်းကို စီးရီးပရိသတ်အတော်များများ သိရှိပြီးဖြစ်တာကြောင့် Sherry ဘယ်လိုမျိုးလွတ်မြောက်လာသလဲဆိုတာကိုတော့ အထွေအထူးပြောမနေတော့ပါဘူး။ ရက်ကွန်းမြို့ပျက်သုန်းခြင်းဖြစ်ရပ်အပြီးမှာ Leon နဲ့ Sherry ကို အမေရိကန်အစိုးရက သူတို့လက်အောက်သွတ်သွင်းခဲ့ပြီး အခုအချိန်မှာတော့ သူတို့နှစ်ယောက်လုံးဟာ အမေရိကန်ဖဒရယ်အစိုးရရဲ့ အထူးလျှို့ဝှက်ဇီဝလက်နက်စစ်ဆင်ရေးအေးဂျင့်တွေဖြစ်လို့နေပါပြီ။ Sherry ရဲ့လက်ရှိအခြေအနေကိုတော့ Resident Evil 6 မှာ တွေ့မြင်နိုင်ပြီး အနာဂတ်မှာလာမယ့် Resident Evil ဂိမ်းတွေမှာတော့ Sherry Birkin ပြန်ပါလာမလားဆိုတာကောတ့ ကျွန်တော်တို့မျှော်လင့်ရတော့မှာပါပဲ 📝

အခုဆိုရင်တော့ ရက်ကွန်းမြို့ပျက်သုန်းခြင်းဖြစ်စဉ်မှာ အသက်ရှင်လွတ်ြမောက်ခဲ့ကြသူတွေရဲ့ ပထမပိုင်းပြီးဆုံးပါပြီ။ သိပ်မကြာတော့တဲ့အချိန်မှာ အပိုင်းနှစ်ကိုထပ်မံတင်ဆက်သွားမှာမို့ စောင့်ဆိုင်းနိုင်ကြောင်းပြောရင်း ဒီကနေစာဖတ်သူများအားလုံးကို နှုတ်ဆက်လိုက်ရပါတယ် 👋

Yan