Death Stranding ချစ်သူများအတွက် အထူးသီးသန့်ဒီဇိုင်းနဲ့ Limited Edition ဖြစ်တဲ့ Playstation 4 Pro Console ထွက်ရှိမယ်

ဂိမ်းလောကတစ်ခုလုံးစောင့်မျှော်နေတဲ့ Death Stranding ဂိမ်းဟာ ၂၀၁၉ ခုနှစ်၊ နိုဝင်ဘာလ ၈ ရက်နေ့မှာ

ထွက်ရှိလာမှာဖြစ်ပြီး အဲဒီတစ်နေ့တည်းမှာပဲ Death Stranding ဂိမ်းချစ်သူများအတွက် အထူးသီးသန့်ဒီဇိုင်းနဲ့ တည်ဆောက်ဖန်တီးထားတဲ့ Playstation 4 Pro Console ကို ထုတ်ပေးသွားမှာဖြစ်ပါတယ်။ ပုံမှာတွေ့ရတဲ့အတိုင်း ထူးခြားပြီး သစ်လွင်တဲ့ဒီဇိုင်းနဲ့ လုပ်ဆောင်ချက်တွေတိုးမြှင့်ထားတဲ့ Playstation 4 Pro ကို မြင်သူတိုင်း လူချင်ကြမှာ အမှန်ပါပဲ။

ထွက်ရှိလာမယ့်ရက် နီးလာတာနဲ့အမျှ Death Stranding ဂိမ်းရဲ့အကြောင်းကို ပိုပိုပြီးသိလာရတာတော့ အမှန်ပါပဲ။ စက်တင်ဘာလအတွင်းမှာကျင်းပတဲ့ ၂၀၁၉ ခုနှစ်ရဲ့ တိုကျိုဂိမ်းပြပွဲ (Toyko Game Show) မှာ Death Stranding ဂိမ်းဖန်တီးရေးဆွဲသူနဲ့ ဒါရိုက်တာဖြစ်သူ Kojima က အကြမ်းတစ်နာရီစာရှိတဲ့ ဂိမ်းတွင်းလုပ်ဆောင်ချက်နဲ့ Death Stranding ဂိမ်းကစားဟန်ကို ကစားပြခဲ့ပါတယ်။ အဲဒီနေ့မတိုင်ခင်တစ်ရက်အလိုတုန်းကလည်း Kojima Production နဲ့ Sony တို့က Death Stranding ရဲ့ ၇ မိနစ်စာရှိတဲ့ဂိမ်းထွေလာကို ပြသခဲ့ပါသေးတယ်။

လတ်တလောကမှကျင်းပပြီးစီးသွားတဲ့ စက်တင်ဘာလရဲ့ Playstation ရဲ့ State of Play အပြီးမှာ Sony ဘက်က Death Stranding ရဲ့အထူးထုတ် Playstation 4 Pro Console နဲ့ပတ်သက်တဲ့ အသေးစိတ်အချက်အလက်တွေကို ဘလော့မှာတင်ပေးထားပါတယ်။

Yan

နှစ်ပေါင်းနှစ်ဆယ်ကျော်ကြာမြင့်ခဲ့ရတဲ့ ငယ်ဘဝဆန္ဒကိုဖြည့်ဆည်းပေးမယ့် Final Fantasy VII Remake

၂၀၁၉ ခုနှစ်၊ ဇွန်လမှာစပြီး Final Fantasy 7 Remake ထွက်လာမယ့်အကြောင်းကို တရားဝင်ကြေညာခဲ့ပေမယ့် တကယ်တမ်းမှာ Final Fantasy 7 ဂိမ်းဖန်တီးခဲ့ရမှုဟာ ထင်သလောက်တော့ မဖြောင့်ဖြူးခဲ့ပါဘူး။ Final Fantasy 7 Remake ကိုစောင့်ခဲ့ရတာဟာ နှစ်ပေါင်း ၂၀ ကျော်ပြီလို့ပြောရင် အားလုံးအံ့သြသွားရပါလိမ့်မယ်။ ဟုတ်ပါတယ်၊ Square Enix ကဖန်တီးရေးဆွဲပြီး ၁၉၉၇ ခုနှစ်မှာထုတ်လုပ်ခဲ့တဲ့ Final Fantasy စီးရီးရဲ့ သတ္တမမြောက်ဂိမ်းအနေနဲ့ ထွက်ရှိလာခဲ့တဲ့ Final Fantasy 7 ဟာ ဂျပန်နိုင်ငံမှာတင်သာမက တစ်ကမ္ဘာလုံးအတိုင်းအတာနဲ့ တစ်ဟုန်ထိုးအောင်မြင်ခဲ့တဲ့ ဂိမ်းဖြစ်ပါတယ်။ Final Fantasy 7 ရဲ့အောင်မြင်မှုဟာ ဂိမ်းဖန်တီးထုတ်လုပ်ခဲ့တဲ့ Square Enix ကိုရော Final Fantasy စီးရီးကိုပါ ကမ္ဘာတဝှမ်းကပရိသတ်တွေသိရှိသွားစေခဲ့ပြီး နည်းပညာတွေတိုးတတ်လာတာနဲ့အမျှ အသည်းစွဲကြိုက်ကြတဲ့ပရိသတ်တွေက ဂိမ်းတစ်ခုလုံးကို ပြန်လည်ပြင်ဆင်မွန်းမံပြီး အချောသတ်ထပ်မံထုတ်ပေးဖို့ တောင်းဆိုလာကြပါတယ်။ Square Enix အနေနဲ့ နောက်ထွက်မယ့် Final Fantasy ဂိမ်းတွေအပေါ် အာရုံစိုက်ခဲ့ပေမယ့် များပြားလှတဲ့တောင်းဆိုမှုတွေနဲ့ အတည်တကျမရှိတဲ့ကောလဟာလတွေကြောင့် Final Fantasy 7 ကို Remake အဖြစ် ပြန်လည်ထုတ်ပေးဖို့ စတင်ပြင်ဆင်ခဲ့ပေမယ့် အကြောင်းအမျိုးမျိုးကြောင့် ဘယ်လိုမှရှေ့မဆက်နိုင်သေးဘဲ ကျွန်တော်ဂိမ်မာတွေအနေနဲ့ စောင့်ပြီးရင်းသာစောင့်နေခဲ့ရပါတယ်။

၂၀၀၀ ခုနှစ် Playstation 2 ခေတ်ရောက်တဲ့အခါ Final Fantasy 8, 9 တို့နဲ့အတူ Final Fantasy 7 Remake ကို ထုတ်ပေးသွားမယ်လို့ ကြေညာခဲ့ပေမယ့် နှစ်အတော်ကြာသည်အထိ တိတ်ဆိတ်နေခဲ့ပြန်ပါတယ်။ အဲဒီလိုနဲ့ ၂၀၀၅ ခုနှစ် Playstation 3 ခေတ်ကို ကူးပြောင်းလာချိန်မှာ ရုပ်ထွက်ဂရပ်ဖစ်အသစ်တွေနဲ့ ပေါင်းစည်းပြီး Final Fantasy 7 Remake ထွက်ရှိလာမယ်လို့ ကောလဟာလတွေ ထွက်ခဲ့ပေမယ့်လည်း နည်းပညာအခက်အခဲတွေ ကြားခံခဲ့တာကြောင့် ထုတ်ပေးဖို့မဖြစ်နိုင်ခဲ့ပါဘူး။ အချိန်တွေဟာ တဖြည်းဖြည်းကုန်လွန်လာခဲ့ပြီး Sony ရဲ့ မျိုးဆက်သစ်ဗီဒီယိုဂိမ်းစက်ဖြစ်တဲ့ Playstation 4 ထွက်ရှိလာပါတယ်။ အဲဒီအချိန်ကာလောက်မှာ Final Fantasy စီးရီးရဲ့ပရိုဂျူဆာ Shinji Hashimoto က တစ်ချိန်မှာ Final Fantasy 7 Remake ရဲ့ ပရိုဂျူဆာဖြစ်လာမယ့် Yoshinori Kitase နဲ့ ဒါရိုက်တာ Tetsuya Nomura ကို ပရောဂျက်အကြမ်းပြရင်း “အချိန်တွေသာကုန်သွားတယ် အခုအသက်အရွယ်မှာ ငါတို့သာ Final Fantasy 7 Remake ကို တာဝန်ယူပြီး မထုတ်ဘူးဆိုရင် Square Enix က ဘယ်သူမှအဲအလုပ်ကိုလုပ်မှာမဟုတ်ဘူး၊ နောက်လာမယ့်မျိုးဆက်သစ်တွေကို တာဝန်ပေးရအောင်ကလည်း ဒီလောက်နှစ်အကြာကြီးသမိုင်းရှိခဲ့တဲ့ Final Fantasy 7 ကိုစင်းလုံးချော Remake ပြန်ထုတ်ပေးဖို့ အဆင်မပြေနိုင်ဘူး” လို့ပြောရကနေ အခုအားလုံးတွေ့မြင်နေရတဲ့ Final Fantasy 7 Remake ကိုစတင်ဖန်တီးခဲ့တာဖြစ်ပါတယ်။

ကဲ ငယ်စဉ်ဘဝကနေ စောင့်ဆိုင်းနေကြတဲ့ ဂိမ်မာများအတွက် Final Fantasy 7 Remake ကို Square Enix က ၂၀၂၀ ခုနှစ်၊ မတ်လ ၃ ရက်နေ့မှာ တရားဝင်ဖြန့်ချိသွားမှာဖြစ်ပါတယ်။ အားလုံးလွမ်းဆွတ်တမ်းဆနိုင်စေဖို့ Final Fantasy 7 Remake ရဲ့ Playstation 4 အခွေ Box Art ကို ၁၉၉၇ ခုနှစ်က Official Box Art ဖြစ်တဲ့ Cloud Strife ရဲ့ပုံကို ပြန်လည်ထားရှိပါတယ်။ သမိုင်းကြောင်းအရ ထွက်မယ်၊ ထွက်မယ်နဲ့ နှစ်နှစ်ဆယ်ကျော်အကြာ ၂၀၂၀ ခုနှစ်မှာ တကယ်ကြီးထွက်လာတဲ့အခါ Final Fantasy 7 Remake ဟာ အိပ်မက်လား၊ တကယ်လားလို့ မေးရလောက်အောင် အချိန်နှစ်ပေါင်းများစွာကြာမြင့်ခဲ့ပါတယ်။ ထွက်ရှိလာတဲ့အချိန်မှပဲ အားရပါးရဆော့ကစားကြဖို့ ဒီကနေ Final Fantasy ချစ်သူများအားလုံးကို တိုက်တွန်းလိုက်ရပါတယ်။ ဖတ်ရှုမှုများအတွက် ကျေးဇူးအထူးတင်ရှိပါတယ်။ နောက်လာမယ့်အကြောင်းအရာတွေဟာ ဘယ်လောက်ထိစိတ်ဝင်စားဖို့ကောင်းမလဲဆိုာတ စောင့်မျှော်ပေးကြပါဦးလို့ပြောရင်း နှုတ်ဆက်လိုက်ပါတယ်။

Yan

ဂိမ်းလောကတစ်ခုလုံးစောင့်မျှော်နေတဲ့ The Last of Us (Part ll) ရဲ့ ထွက်ရှိလာမယ့်ရက်စွဲကို Reveal Trailer နဲ့တကွ ဖော်ပြခဲ့

ပထမဦးဆုံးပြောချင်တာကတော့ ဝမ်းသာပီတိဖြစ်နေကြတဲ့ ဂိမ်မာတွေအားလုံးနဲ့ ထပ်တူထပ်မျှခံစားနေတဲ့အကြောင်းပါပဲ။ ကိုယ်လိုချင်တဲ့အရာကို တစ်စိုက်မတ်မတ်နဲ့ အနှောင်အဖွဲ့ကင်းကင်း ဆုတောင်းပြုရင် တစ်ချိန်မှာတကယ်ဖြစ်လာတယ်ဆိုတဲ့ Law of Attraction ဟာ အမှန်တကယ်အလုပ်လုပ်ကြောင်းကို ဒီသတင်းက သက်သေပြလိုက်တယ်လို့တောင် ခံစားမိပါတယ်။ ဘာကြောင့်လဲဆိုတော့ ဂိမ်မာတွေအားလုံးရဲ့ အသည်းထဲစွဲထင်ကျန်နေခဲ့တဲ့ The Last of Us ပထမဂိမ်းထွက်ခဲ့တာ အချိန်ခြောက်နှစ်တင်းတင်း ရှိခဲ့ပြီလေ။ ၂၀၁၃ ခုနှစ်၊ ဇွန်လ ၁၄ ရက်နေ့မှာ ထွက်ရှိခဲ့တဲ့ The Last of Us ဂိမ်းအကြောင်းကို တဖွဲ့တနွဲ့နဲ့ ညွှန်းဆိုမယ်ဆိုရင်တောင် ဘယ်လောက်ထိအနုပညာမြောက်သလဲဆိုတာ ဖော်ပြဖို့ခက်ပါတယ်။ ရှိရှိသမျှဂိမ်းမီဒီယာကြီးတွေအားလုံး review နဲ့ rating အပြည့်ပေးခဲ့ကြတဲ့ The Last of Us ဂိမ်းရဲ့ ပြောင်မြောက်မှုနဲ့ အနုပညာဆန်မှုကို ကိုယ်တိုင်ကိုယ်ကျဆော့ကြည့်ဖူးသူများမှသာ သိနိုင်ပါလိမ့်မယ်။ ၂၀၁၆-----ူစူူုE3 ပွဲမှာကတည်းက The Last of Us (Part ll) ထွက်ရှိလာမယ်ဆိုတဲ့အကြောင်း ဂိမ်းလောကတစ်ခုလုံးကို အသိပေးခဲ့တာဖြစ်ပေမယ့် မနေ့ကမတင်ခင်အထိ The Last of Us ll ရဲ့ ရေရာသေချာတဲ့သတင်းအကျအနကို မကြားသိခဲ့ရပါဘူး။

ဒါပေမယ့် နှစ်ရှည်လများစောင့်ဆိုင်းခဲ့ရတဲ့ ဂိမ်မာများအားလုံးရဲ့ဆန္ဒပြည့်ဝခဲ့ပါပြီ။ ဘာကြောင့်လည်းဆိုတော့ ၂၀၁၉ ခုနှစ်၊ စက်တင်ဘာလ ၂၄ ရက်နေ့အချိန်မှာ Playstation ရဲ့ YouTube ချန်နယ်ကနေ The Last of Us (Part ll) Reveal Trailer ကို ထွက်ရှိလာမယ့်ရက်စွဲနဲ့တကွ ဖော်ပြပေးခဲ့လို့ပါပဲ။ အဲဒီထွေလာမှာ အရင်ဂိမ်း The Last of Us ထဲကလို ဆယ်ကျော်သက်ကလေးမလေးမဟုတ်တော့ဘဲ ရဲရင့်ပြတ်သားတဲ့ မိန်းမငယ်တစ်ယောက်ဖြစ်လာတဲ့ Ellie ကို အသားပေးပြသခဲ့ပြီး ဂိမ်းအတွင်းကျင်လည်ရမယ့် ပတ်ဝန်းကျင်တချို့၊ တိုက်ခိုက်ကွက်တစ်ချို့နဲ့ ဇာတ်အိမ်ဇာတ်ကွက်တစ်ချို့ကို အချိုးကျကျရောနှောပြီး တင်ဆက်ပေးခဲ့လို့ပါပဲ။ Playstation က နှစ်စဉ်နဲ့အမျှကျေင်းပလေ့ရှိတဲ့ State of Play အစီအစဉ်မှာ ထုတ်ဖော်ပြသလိုက်တဲ့ The Last of Us (Part ll) ဂိမ်းနဲ့ Reveal Trailer မကြာတော့တဲ့အချိန်အတွင်းမှာ ဂိမ်းလောကတစ်ခုလုံးကို ဂယက်ရိုက်သွားဖို့ မြင်နေပါတယ်။ The Last of Us ဂိမ်းကိုဖန်တီးရေးဆွဲတဲ့ Naughty Dog ကဒါရိုက်တာ Neil Druckmann ရဲ့ ပြောကြားချက်အရ ကုမ္ပဏီတည်ထောင်ခဲ့တဲ့သက်တမ်း ၃၅ နှစ်အတွင်းမှာ The Last of Us ll ဂိမ်းကိုဖန်တီးတည်ဆောက်ချိန်ဟာ စုစုပေါင်းအချိန်ငါးနှစ်တာ ရှိပြီး အဲဒီအချိန်ကာလဟာ Naughty Dog အတွက်တော့ ဂိမ်းတစ်ခုကိုဖန်တီးခဲ့တဲ့ အကြာဆုံးသောအချိန်အတိုင်းအတာဖြစ်တယ်လို့ ဆိုပါတယ်။

ထွေလာမှာပြသခဲ့ပုံအရဆိုရင် The Last of Us (Part ll) ထွက်ရှိလာမယ့်နေ့စွဲကတော့ ၂၀၂၀ ခုနှစ်၊ ဖေဖော်ဝါရီလ၊ ၂၁ ရက်နေ့ဖြစ်ပြီး ကျွန်တော်တို့အားလုံး အချိန်ငါးလလောက် စောင့်ဆိုင်းရဦးမှာပါ။ Naughty Dog ရဲ့ပြောင်မြောက်တဲ့အနုစိတ်လက်ရာတစ်ခုဖြစ်တဲ့ The Last of Us ll အနေနဲ့ ဘယ်လိုမျိုးပုံစံနဲ့ အားလုံးဆီကိုရောက်ရှိလာမှာလဲ? ငါးနှစ်အကြာမှာတွေ့ရတဲ့ Ellie ရဲ့ရင့်ကျက်လာမှုတွေနဲ့ ရဲရင့်ပြတ်သားလာမှုတွေဟာ အရာအားလုံးကိုရင်ဆိုင်ကျော်ဖြတ်ဖို့ လုံလောက်ပါ့မလား? Joe ကိုယ်တိုင်ကရော ဘယ်လိုအခန်းကဏ္ဍကနေ ပါဝင်မှာလဲ? အဖြေရှာမရတဲ့သတ္တဝါတွေအပြင် ဘယ်လိုမျိုးရန်သူတွေနဲ့ ရင်ဆိုင်ရမှာလဲ? အစရှိတာတွေကိုတော့ The Last of Us (Part ll) ဂိမ်းထွက်ရှိလာတဲ့အချိန်မှာသာ ကိုယ်တိုင်ကိုယ်ကျ ဝင်ရောက်ခံစားဖို့ တိုက်တွန်းရင်း အားလုံးကိုနှုတ်ဆက်လိုက်ရပါတယ်။ နောင်လာမယ့် ဂိမ်းအကြောင်းအရာတွေမှာ ပြန်လည်ဆုံတွေ့ကြပါမယ်။ ဖတ်ရှုမှုများအားလုံးအတွက် ကျေးဇူးအထူးတင်ရှိပါကြောင်းပြောရင်း The Last of Us (Part ll) ဂိမ်းထဲက ဇာတ်ဝင်ခန်းတချို့နဲ့ အငွေ့အသက်ကိုပြန်လည်ခံစားလိုသူတွေအတွက် အောက်မှာ The Last of Us ll ဂိမ်းတွင်းဓါတ်ပုံတွေကို ဖော်ပြပေးလိုက်ပါတယ်။

Yan

ဂိမ်မာများအားလုံးရဲ့ငယ်ဘဝကို အရောင်စုံလင်စေခဲ့တဲ့ နှစ်ပေါင်း ၁၃၀ ပြည့် Nintendo ရဲ့မွေးနေ့အား ဂုဏ်ပြုဆုတောင်းရင်း

ဂိမ်မာတွေအားလုံးရဲ့ ငယ်ဘဝကို အရောင်စုံလင်စေခဲ့ပြီး ကြည်နူးဖွယ်အမှတ်တရတွေ ဖန်တီးပေးခဲ့တဲ့ Nintendo ဂိမ်းတွေဟာ ကျွန်တော်တို့ရင်ထဲ ဘယ်တော့မှ မေ့ပျောက်သွားမှာမဟုတ်တဲ့ ဖန်တီးမှုတွေပါပဲ။ မျက်မှောက်ခေတ်ရဲ့ လူငယ်ထုမျိုးဆက်သစ်တွေသာမက ကျွန်တော်တို့ကိုပြုစုပျိုးထောင်ပေးခဲ့ကြတဲ့ လူကြီးမိဘများကိုယ်တိုင်တောင် Nintendo ဂိမ်းတွေကို ဆော့ပြီး ငယ်ဘဝကို ဖြတ်သန်းခဲ့ရတာပါ။ ဘယ်လိုမျိုး မျိုးဆက်သစ်ဂိမ်းတွေနဲ့ ဗီဒီယိုဂိမ်းတွေပဲ ထွက်ပေါ်လာပါစေ၊ Nintendo ကတော့ ကမ္ဘာနဲ့အဝှမ်း လူကြီးလူငယ်မရွေးဆော့ကစားသူပေါင်းများစွာနဲ့ ဂိမ်းလောကကို ပထမဦးဆုံးချဲ့ထွင်ခဲ့သူတွေအဖြစ် ဈေးကွက်မှာထိပ်ဆုံးက ရပ်တည်လို့နေပါတယ်။ ၁၈၈၉ ခုနှစ်၊ စက်တင်ဘာလ ၂၃ ရက်နေ့မှာ ဒါရိုက်တာ ဖူဆာဂျီနို ရာမအုချီ (Fusajino Yamauchi) က စတင်တည်ထောင်ခဲ့တဲ့ Nintendo Kappai ဂိမ်းကုမ္ပဏီဟာ အခုအချိန်မှာတော့ Nintendo အဖြစ်နဲ့ နှစ်ပေါင်း ၁၃၀ တင်းတင်းပြည့်ခဲ့ပြီ ဖြစ်ပါတယ်။ Nintendo ဆိုပြီးစတင်ဖြစ်ပေါ်လာစဉ်က ကတ်ကစားနည်းများကို တစ်မူထူးတဲ့အိုင်ဒီယာများနဲ့ ဂျပန်နိုင်ငံအတွင်း ထိုးဖောက်မယ့် ကုမ္ပဏီတစ်ခုအဖြစ်နဲ့ စတင်ခဲ့ပေမယ့် ဒုတိယကမ္ဘာစစ်အပြီး ၁၉၄၇ ခုနှစ်မှာတော့ ဒါရိုက်တာဟောင်း ရာမအုချီ ရာထူးကဆင်းသွားပြီး ြမေးဖြစ်သူ ဟီရိုရှီ ရာမအုချီ (Hiroshi Yamauchi) က အရိုက်အရာကို ဆက်ခံခဲ့ပါတယ်။ အဲဒီကနေစပြီး အခုအချိန်မှာ ကျွန်တော်တို့အားလုံးသိကြတဲ့ Nintendo အဖြစ် အသွင်ပြောင်းခဲ့တယ်လို့ ဆိုရမှာဖြစ်ပါတယ်။

မြေးဖြစ်သူ ရာမအုချီရဲ့စီမံခန့်ခွဲမှုအောက်မှာ Nintendo ဟာ နိုင်ငံတကာထိထိုးဖောက်မယ့် မျှော်မှန်းချက်နဲ့ ကွဲပြားတဲ့ထုတ်ကုန်သစ်များကို ထုတ်လုပ်ပြီး စတင်ထိုးဖောက်ခဲ့တာဖြစ်ပါတယ်။ ၁၉၆၃ ခုနှစ်မှာတော့ Nintendo Co.,Ltd (နီတန်းဒိုး ကုမ္ပဏီလိမိတက်) ဆိုတဲ့အမည်ကို တရားဝင်ပြောင်းလဲခဲ့ပြီး ထူးကဲပြီးကွဲပြားတဲ့ စီးပွားရေးလုပ်ငန်းတွေကို တစ်ဟုန်ထိုးလုပ်ဆောင်ခဲ့တာဖြစ်ပါတယ်။ ဒါပေမယ့် ဘယ်လုပ်ငန်းမဆို အနိုင်၊ အရှုံးဒွန်တွဲနေတာဖြစ်တဲ့အတွက် Nintendo ရဲ့တက္ကစီဝန်ဆောင်ရေး၊ အစားအသောက်ထုတ်ကုန်များနဲ့ နာမည်ဆိုးနဲ့ကျော်ကြားခဲ့တဲ့ ချစ်ရေးချစ်ရာတည်းဆိုဆောင်များဟာ Nintendo ရဲ့ သင်ခန်းစာယူစရာ ခြေလှမ်းများဖြစ်ပါတယ်။ ဒီလိုနဲ့ ကုမ္ပဏီဒေဝါလီခံရလုနီးနီး အခြေအေနေကို ရောက်ခဲ့ရာကနေ ဂိမ်းဒီဇိုင်နာ ဂန်ပိုင်း ရိုကိုးအိ (Gunpei Yokoi) နဲ့ တွေ့ဆုံချိန်မှာတော့ အရာအားလုံးပြောင်းလဲဖို့ စတင်ခဲ့ပါတော့တယ်။ အဲဒါကတော့ ဟိုးအရင်ကတည်းက Nintendo ရဲ့အထင်ကရထုတ်ကုန်ဖြစ်တဲ့ ကတ်ကစားနည်းတွေကို ပြောင်းလဲလာတဲ့ခေတ်ပေါ်နည်းပညာနဲ့ ပေါင်းစပ်ပြီး လက်ကိုင်ဂိမ်း Game & Watch နဲ့ နာမည်ကျော် Game Boy အဖြစ်ြပောင်းလဲထုတ်လုပ်ခဲ့တာပဲဖြစ်ပါတယ်။ Game Watch နဲ့ Game Boy လက်ကိုင်ဂိမ်းတွေကြောင့် Nintendo ဟာ ၁၉၇၀ နဲ့ ၁၉၈၀ ခုနှစ်တွေအထိ နိုင်ငံတကာဈေးကွက်ကို ရရှိခဲ့ပြီး ကုမ္ပဏီရဲ့ ပထမဦးဆုံးစီးပွားရေးအောင်မြင်မှုကို ဆွတ်ခူးနိုင်ခဲ့ပါတယ်။

တစ်ကမ္ဘာလုံးအတိုင်းအတာနဲ့ တစ်ဟုန်ထိုးအာင်မြင်ဖို့ မှန်ကန်တဲ့ခြေလှမ်းကို ရွေးချယ်ဖို့လိုအပ်နေတဲ့ Nintendo ဟာ ၁၉၈၀ နောက်ပိုင်းကာလမှာတော့ ဒါရိုက်တာ ရာမအုချီရဲ့ကြီးမားတဲ့အမျှော်အမြင်နဲ့ တွန်းအားပေးမှု၊ ဂိမ်းဒီဇိုင်နာ ရိုကိုးအိရဲ့ ကျွမ်းကျင်တဲ့နည်းပညာနဲ့ ဂိမ်းရေးဆွဲမှု၊ တစ်ချိန်မှာ Mario ဇာတ်ကောင်ကိုဖန်တီးသူအဖြစ် လူသိများလာမယ့် လူငယ် ရှီဂဲယူ မီရာမိုတို (Shigeru Miyamoto) ရဲ့ ကွဲထွက်တဲ့အမြင်နဲ့ ကျွမ်းကျင်တဲ့ဂိမ်းဖန်တီးမှုတို့ ပေါင်းစည်းပြီး Game & Watch, Game Boy လက်ကိုင်ဂိမ်းတွေကနေတဆင့် တီဗီဖန်သားပြင်နဲ့ ချိတ်ဆက်ပြီးဆော့ကစားနိုင်မယ့် အီလက်ထရွှန်းနစ် ဗီဒီယိုဂိမ်းများကို စွန့်ဦးတီထွင်ထုတ်လုပ်ခဲ့ရာမှာတော့ Nintendo ဆိုတဲ့ဟာ တစ်ကမ္ဘာလုံးက ဂိမ်းလောကနဲ့ဈေးကွက်မှာ ဖျောက်ဖျက်မရလောက်အောင်ကို စွဲထင်သွားခဲ့တာဖြစ်ပါတယ်။ ကဲ ဒါကတော့ Nintendo ရဲ့အစပြုရာ သမိုင်းကြောင်းဖြစ်ပါတယ်၊ ၂၀၁၉ ခုနှစ်၊ စက်တင်ဘာလ ၂၃ ရက်နေ့မှာ နှစ်ပေါင်း ၁၃၀ ပြည့်သွားတဲ့ Nintendo ရဲ့ မွေးနေ့ကို ဂုဏ်ပြုသောအားဖြင့် အခုလိုရေးသားတင်ဆက်ပေးရခြင်းဖြစ်ပါတယ်။ ငယ်ဘဝကိုအမှတ်ရနေစေမယ့် ဂိမ်းဇာတ်ကောင်များနဲ့ ဂိမ်မာများအာလုံးကိုမွေးဖွားပေးခဲ့တဲ့ Nintendo ဂိမ်းတွေဟာ ကျွန်တော်တို့အားလုံးရဲ့ ပျော်ရွှင်မှုကိုရှာဖွေရာနေရာဖြစ်သလို စိတ်ရဲ့ထွက်ပေါက်တစ်ခုလည်းဖြစ်ပါတယ်။ ဒီတော့ နှစ်ပေါင်း ၁၃၀ ပြည့် Nintendo ကို ပျော်ရွှ့င်စရာမွေးနေ့ဖြစ်ပါစေလို့ ဆုမွန်ကောင်းတောင်းရင်း ဒီဆောင်းပါးကို အဆုံးသတ်လိုက်ရပါတယ်။ ဖတ်ရှုသူများအားလုံးကို ကျေးဇူးအထူးတင်ကြောင်းပြောရင်း နောက်လာမယ့်စိတ်ဝင်စားဖွယ် အကြောင်းအရာတွေမှာ ကျွန်တော်တို့ပြန်လည်ဆုံတွေ့ကြပါမယ်။

နှစ်ပေါင်း ၁၃၀ ပြည့်မှစ နောက်နှစ်ပေါင်းထောင်သောင်းမက မျိုးဆက်သစ်ဂိမ်မာများကိုမွေးထုတ်ပေးနိုင်ပါစေလို့ ဆုတောင်းရင်း။

Yan

မဖိတ်ခေါ်ဘဲရောက်လာတဲ့ နတ်ဆိုးကို ကြိုဆိုရမလား? တံခါးပိတ်ထားရမလား? (Annabelle Comes Home Movie Rating)

ကလေးကစားစရာအရုပ်ကလေးတစ်ရုပ် အသွင်ဆောင်ထားပေမယ့် ရက်စက်ကြမ်းကြုတ်ပြီး ထိတ်လန့်ဖွယ်ကောင်းတဲ့ Annabelle အကြောင်းကို လူတိုင်းနီးပါးသိကြပါတယ်။ Annabelle ကို ပိုင်ဆိုင်ခဲ့သူတိုင်းဟာ အသက်မဆုံးရှုံးခဲ့ရင်တောင်မှ လက်မတင်လေး အသက်လုခဲ့ရတဲ့အဖြစ်အပျက်မျိုးစုံနဲ့ တွေ့ကြုံခဲ့ပြီးမှ အဲဒီအရုပ်ရဲ့နောက်ကြောင်းရာဇဝင်နဲ့ ဘယ်လိုဖြစ်တည်မှုမျိုးက စွဲကပ်နေတာလဲဆိုတာကို သိခဲ့ရတာဖြစ်ပါတယ်။ သွေးပျက်စရာအတိနဲ့ ခြောက်ခြားဖို့ကောင်းတဲ့ ၁၉၈၀ တစ်ဝိုက်က ဖြစ်ရပ်မှန်တချို့အပေါ်မှာ မှီငြိမ်းဇာတ်အိမ်တည်ထားတဲ့ Annabelle ရုပ်ရှင်ဇာတ်ကားကို ဒါရိုက်တာ Gary Daubermen က ညွှန်ကြားဖန်တီးပြီး Warners Bros Picture ကနေ ၂၀၁၄ ခုနှစ်မှာ ဖြန့်ချိပေးခဲ့တာဖြစ်ပါတယ်။ လက်ရှိအချိန်မှာ Annabelle ဆိုတဲ့နာမည်နဲ့ ထွက်ရှိခဲ့တဲ့ဇာတ်ကားများဟာ ၂၀၁၉ ခုနှစ်ရဲ့ Annabelle Comes Home အပါအဝင်ဆိုရင် စုစုပေါင်းသုံးကားရှိခဲ့ပြီဖြစ်ပြီး Conjuring Universe ထဲမှာဆိုရင် ခုနှစ်ကားမြောက်ဖြစ်တဲ့ Annabelle Comes Home ဟာ ပြီးခဲ့တဲ့ ဇွန်လ ၂၆ ရက်နေ့မှာ ထွက်ရှိခဲ့တာဖြစ်ပါတယ်။ ကဲ ဒီတော့ ဒီတစ်ခေါက်ဆောင်းပါးမှာ Conjuring Universe ထဲက နောက်ဆုံးထွက်ရှိထားတဲ့ Annabelle Comes Home ဇာတ်ကားရဲ့ အညွှန်းနဲ့ အကဲဖြတ်သုံးသပ်ချက်ကို အားလုံးအတွက် တင်ဆက်ပေးသွားမှာဖြစ်ပါတယ်။ အားလုံးပဲ အဆင်သင့်ဖြစ်ပြီဆိုရင် စကြည့်လိုက်ရအောင်လားဗျာ။

၂၀၁၄ ခုနှစ်မှာ Annabelle၊ ၂၀၁၇ ခုနှစ်မှာ Annabelle: Creation နဲ့ ၂၀၁၉ ခုနှစ်မှာ Annabelle Comes Home ဆိုပြီးခေါင်းစဉ်အသီးသီးနဲ့ ထွက်ရှိခဲ့ကြတဲ့ဒီ horror ဇာတ်ကားတွေဟာ နတ်ဆိုးအသုံးချနေတဲ့ Annabelle အရုပ်ရဲ့ ဖြစ်ရပ်မှန်ဇာတ်ကြောင်းအပေါ်မှာ အခြေခံပြီးရိုက်ကူးထားတာ ဖြစ်ပါတယ်။ တကယ်တမ်းမှာ Annabelle ဟာ ဟိုအရင်တစ်ချိန်က သက်ရှိထင်ရှားရှိခဲ့တဲ့ ဘာသာရေးဂိုဏ်းဝင်မိန်းမသားတစ်ဦးရဲ့ အမည်ဖြစ်ပေမယ့် Annabelle ဆိုပြီး အမှောင်ထုရဲ့အရုပ်တစ်ရုပ် ဖြစ်လာခဲ့တဲ့အကြောင်းကို spoil သလိုဖြစ်သွားမှာစိုးတဲ့အတွက် အကျယ်တဝန့်တော့ မရှင်းပြတော့ပါဘူး။ ရှေ့နှစ်ကားကို ကြည့်ပြီးသွားသူတွေကတော့ Annabelle ဇာတ်ကားတွေရဲ့ ဇာတ်အိမ်ဇာတ်ကွက်၊ ဇာတ်ကောင်ဖန်တီးမှုနဲ့ ထိတ်လန့်ခြောက်ခြားစရာတွေအပေါ်မှာ တရင်းတနှီးရှိမှာမှန်ပေမယ့် Annabelle Comes Home ဇာတ်ကားကို အခုမှစကြည့်မယ့်သူများအတွက်ကတော့ ကြည့်ရှုရသမျှအရာအားလုံးဟာ သစ်လွင်နေမှာဖြစ်ပါတယ်။ ပရိသတ်အသစ်များအနေနဲ့ ရှေ့နှစ်ကားကြည့်ဖူးစရာမလိုဘဲ ဒီဇာတ်ကားကိုကြည့်ရှုနိုင်သလို ပရိသတ်ဟောင်းများအနေနဲ့လည်း Annabelle ဇာတ်ကားဟာ ထူးခြားချက်တစ်ချို့နဲ့ မျှော်လင့်မထားတဲ့ဇာတ်ကောင်တွေကို တွေ့ရမယ်ဆိုတာ အာမခံပါတယ်။ အဲဒါဘာလို့လည်းဆိုတော့ အပနှင်သူလင်မယားနှစ်ယောက်ဖြစ်တဲ့ Ed နဲ့ Lorraine တို့ကိုယ်တိုင် အခန်းတစ်ခန်းထဲမှာ စုစည်းပြီး ထိန်းချူပ်ထားတဲ့ ကျိန်စာသင့်ပစ္စည်းတွေ၊၊ နတ်ဆိုးစွဲကပ်တဲ့အသုံးအဆောင်တွေနဲ့ ပရလောကအစီအရင်တွေမှာ အသုံးပြုတဲ့ကိရိယာပေါင်းများစွာရဲ့ ကိန်းအောင်းနေတဲ့ ခြောက်ခြားဖွယ်ရာတစ်ချို့ကို Annabelle Comes Home မှာ မျက်ဝါးထင်ထင်မြင်တွေ့ရတော့မှာ မို့လို့ပါ။ ဒါဟာ Annabelle ဇာတ်ကားတွေကို ကြည့်ရှုခဲ့ဖူးတဲ့ပရိသတ်ဟောင်းများရဲ့ မျှော်လင့်ချက်ကိုဖြည့်ဆည်းပေးလိုက်တာဖြစ်သလို ပရိသတ်သစ်များအတွက်လည်း Annabelle အပြင်အခြားသော ရင်ထိတ်သည်းဖိုကဏ္ဍတွေကို ခံစားရစေမယ့် ရည်ရွယ်ချက်နဲ့ ဖန်တီးထားခြင်းဖြစ်ပါတယ်။

အဓိကကတော့ အရင် Annabelle ကားတွေနဲ့မတူဘဲ အခြားထိတ်လန့်ဖို့ကောင်းတဲ့ဖြစ်တည်မှုတွေကို ပရိသတ်နဲ့မိတ်ဆက်ပေးလိုက်ခြင်းးဟာ ထွက်ခဲ့ပြီး Annabelle ကားတွေနဲ့ကွဲထွက်ခဲ့ရတဲ့အချက်ပါ။ ကြည့်ခဲ့ပြီးသားပရိသတ်ဟောင်းတွေ ဟိုးအရင်ကတည်းကသိချင်ခဲ့တဲ့ Ed နဲ့ Lorraine တို့ရဲ့ တားမြစ်အခန်းထဲက အမှောင်ထုလွှမ်းခြုံနေတဲ့ပစ္စည်းတွေရဲ့ နောက်ကြောင်းတချို့နဲ့ ကိန်းအောင်းနေတဲဖြစ်တည်မှုတွေကို မျက်ဝါးထင်ထင်တွေ့ရမှာဖြစ်တဲ့အတွက် အနိမ့်မြင့်အတက်အကျတွေနဲ့ ရသစုံခရီးစဉ်တစ်ခုကို ဖြတ်သန်းနေရသလို ခံစားရစေမှာပါ။ ဒါတင်မက ယခင်ကားတွေကလို အဓိကဇာတ်ဆောင်ဖြစ်တဲ့ အပနှင်သူ Ed နဲ့ Lorraine တို့ရဲ့ ဇာတ်ဆောင်နေရာဟာ အားလုံးထင်မှတ်ထားသလိုမဟုတ်တဲ့အပြင် မျှော်လင့်မထားတဲ့ဇာတ်ကွက်တချို့ကိုလည်း ဒီဇာတ်ကားမှာတွေ့ရှိရမှာပါ။ ဒီတော့ ပရိသတ်အသစ်များပဲဖြစ်ဖြစ်၊ အဟောင်းများပဲဖြစ်ဖြစ် Annabelle Comes Home ဟာ ကြည့်သင့်တဲ့ဇာတ်ကားတစ်ကားဖြစ်ကြောင်း ညွှန်းပေးလိုက်ရင်း ဒီကားအပေါ်မှာသတ်မှတ်ထားတဲ့ rating က ဘယ်လောက်ရမလဲဆိုတာကတော့ အောက်ပါဖော်ပြပေးလိုက်ပါတယ်။ ဖတ်ရှုမှုများအတွက် ကျေးဇူးတင်ပါတယ်။ နောက်လာမယ့် ဆောင်းပါးတွေမှာလည်း ပြန်တွေ့ဆုံတွေ့ကြပါမယ်လို့ပြောရင်း အားလုံးကိုနှုတ်ဆက်လိုက်ရပါတယ်။

Rating: 7.5/10 (7.5 Out Of 10)
Genre: Horror
Directed By: Gary Dauberman
Written By: Gary Dauberman
Cast: Mckenna Grace, Madison Iseman, Katie Sarife, Patrick Wilson, Vera Farmiga
Studio: New Line Cinema

Yan

နော့စ်နတ်ဘုရားအားလုံးကျဆုံးပြိုလဲမယ့် နော့စ်ဒဏ္ဍာရီရဲ့နေဝင်ချိန်နိဂုံးဟာ God of War 4 မှာ ဘယ်လိုစတင်ခဲ့သလဲ? 🍂🌘

ကမ္ဘာ့ရောင်းအားအကောင်းဆုံးဂိမ်းစာရင်းဝင်သွားတဲ့ God of War 4 ဂိမ်းအကြောင်းကို အားလုံးလည်းသိတန်သလောက် သိပြီးနှင့်ပြီထင်ပါတယ်။ ထွက်ရှိပြီးပြီးချင်း အချိန်ကာလအနည်းငယ်အကြာမှာပဲ ဂိမ်းပရိသတ်တွေရဲ့ရင်ကိုလှုပ်ခတ်စေခဲ့ပြီး အတိုင်းအဆမရှိအောင်ကို တစ်ခဲနက်အားပေးခဲ့သူတွေကြောင့် အချိန်ငါးနှစ်တာကာလ မရပ်မနားဘဲဖန်တီးရကျိုးနပ်ခဲ့တဲ့ ၂၀၁၈ ခုနှစ်ရဲ့ God of War 4 ဟာ ဂိမ်းချစ်သူတွေရဲ့ရင်ထဲမှာနေရာထပ်ယူလို့ သွားပြန်ပါပြီ။ God of War 4 ဂိမ်းကို အခုအချိန်မှာ ပရိသတ်အတော်များများ ဆော့ကစားပြီးသွားသလို မဆော့ရသေးတဲ့သူတွေအနေနဲ့လည်း ဖန်တီးထားတဲ့ဂိမ်းလောက၊ တည်ထားတဲ့ဇာတ်ကြောင်းဇာတ်အိမ်၊ ကွဲပြားထူးခြားတဲ့ဂိမ်းကစားဟန်တွေနဲ့ ရင်ထဲစွဲမှတ်လောက်စရာ ဇာတ်ညွှန်း၊ ဒိုင်ယာလော့တွေ ဘယ်လောက်တောင်ပြောင်မြောက်တယ်ဆိုတာ သိကြပါတယ်။ အားလုံးရဲ့အချစ်တော် Kratos အနေနဲ့ ဒီတစ်ခေါက်မှာ နော့စ်ဒဏ္ဍာရီထဲရောက်သွားပြီး သားဖြစ်သူ Atreus နဲ့အတူ ကြမ်းတမ်းရှည်လျားတဲ့ခရီးစဉ်ကို ဖြတ်သန်းတဲ့အချိန်အတန့်တိုင်းဟာ မေ့ပျောက်ဖို့မဖြစ်နိုင်တဲ့ အထင်ကရပြကွက်ချည်းပါပဲ။

ဒါပေမယ့် အခုကျွန်တော်တို့သိပြီးသွားတဲ့ နော့စ်ဒဏ္ဍာရီထဲက Kratos ရဲ့ဇာတ်လမ်းနဲ့ ဂိမ်းတစ်လျှောက်တွေ့ကြုံခဲ့ရတဲ့ဖြစ်ရပ်တွေကို ကြည့်မယ်ဆိုရင် ကျွန်တော်တို့သိတဲ့အကြောင်းအရာတွေဟာ တကယ်တမ်းမှာ ကြီးမားလွန်းတဲ့အဖြစ်အပျက်တွေရဲ့ အစသာသာပဲရှိပါသေးတယ်။ ဘာကြောင့်လည်းဆိုတော့ နော့စ်နတ်ဘုရားတွေအနေနဲ့ အိုလံပီယာနတ်ဘုရားတွေနဲ့ ထပ်တူညီတဲ့ကံကြမ္မာဆိုးမျိုးကို မကြာတော့တဲ့အချိန်မှာ မရှုမလှကြီးကြုံတွေ့ရတော့မှာမို့ပါပဲ။ ဒါဘာတွေကိုဆိုလိုသလဲ? နောက်လာမယ့်အနာဂတ်မှာ ဖြစ်လာမယ့်အဖြစ်အပျက်တွေက ဘာတွေဖြစ်မလဲ? တကယ့်နော့စ်ဒဏ္ဍာရီသမိုင်းအစစ်အမှန်နဲ့ ဖြစ်သွားတဲ့ဖြစ်ရပ်တွေက ဘာကိုဦးတည်နေသလဲ? အစရှိတာတွေကို သိရဖို့အတွက် စိတ်ဝင်စားတယ်ဆိုရင် ဆက်သွားလိုက်ကြရအောင်ဗျာ။ တစ်ပုံချင်းစီထောက်ပြီး ဖတ်ရှုနိုင်ပါတယ် ➡➡

နော့စ်ဒဏ္ဍာရီထဲက နတ်ဘုရားတွေရဲ့နောက်ခံဇာတ်ကြောင်းနဲ့ သမိုင်းဝင်ဖြစ်ရပ်အစစ်အမှန် 📜📜

နောက်ဆက်ပြီးဘာတွေဖြစ်လာမလဲဆိုတာကို ပြောမယ်ဆိုရင် God of War 4 မှာ ကျွန်တော်တို့အားလုံးသိရှိခဲ့ရတဲ့ နော့စ်နတ်ဘုရားတွေအကြောင်းနဲ့ သူတို့ကြားကဆက်နွယ်ပုံတွေကို အရင်ဆုံးသိမှဖြစ်ပါလိမ့်မယ်။ ဂရိဒဏ္ဍာရီထဲကလာတဲ့ စစ်နတ်ဘုရားဟောင်း Kratos နဲ့ သူ့ရဲ့သွေးသားဆက်ခံသူမျိုးဆက် Atreus နှစ်ယောက်ကို ဖယ်ပြီး ဂိမ်းအတွင်းမှာပါဝင်တဲ့အခြားနော့စ်နတ်ဘုရားတွေရဲ့အကြောင်းနဲ့ နဂိုမူလနော့စ်ဒဏ္ဍာရီက နတ်ဘုရားအချို့ကို အရင်သိဖို့လိုပါတယ်။ God of War 4 ထဲမှာရော နော့စ်ဒဏ္ဍာရီမှာပါ ပါဝင်တဲ့နတ်ဘုရားတွေထဲက ပထမဆုံးသိရမှာ Kratos နဲ့ အကြိတ်အနယ်တိုက်ခိုက်ခဲ့သူဖြစ်တဲ့ နော့စ်နတ်ဘုရား Baldur ပါပဲ။ Baldur ဟာအက်စဂတ် (Asgard) ကိုအုပ်စိုးတဲ့ နတ်ဘုရား Odin နဲ့ မိခင်ဖြစ်သူ Freya တို့ရဲ့ သားဖြစ်ပြီး မှေးမှိန်ပျောက်ကွယ်ခြင်းရဲ့နတ်ဘုရားမ Nanna ရဲ့ယောကျ်ားဖြစ်သလို နတ်ဘုရား Forseti ရဲ့ဖခင်လည်းဖြစ်ပါတယ်။ Baldur ဟာ Thor နဲ့ညီအစ်ကိုတော်ပြီး Thor ရဲ့သားနှစ်ယောက်ဖြစ်တဲ့ Magni နဲ့ Modi တို့ရဲ့ ဦးလေးတော်တယ်ဆိုရင်လည်း မမှားပါဘူး။ နောက်ထပ်သိရမယ့် နော့စ်နတ်ဘုရားတွေကတော့ လှည့်ဖြားမှုပရိယာယ်တို့ရဲ့ အရှင်သခင် Loki, မြင်ကွင်းမဲ့နတ်ဘုရား Hodr, မြေအောက်ငရဲကိုအုပ်စိုးတဲ့ နတ်ဘုရားမ Herr နဲ့ Odin ရဲ့နောက်ထပ်သားဖြစ်သူ Hermod တို့ပါပဲ။ ဘာကြောင့်သူတို့ကိုသိသင့်သလဲဆိုတာ နောက်တဖြည်းဖြည်းချိတ်ဆက်မိလာပါလိမ့်မယ်။

​

သမိုင်းကြောင်းအမှန်ဆီက မှီငြိမ်းထားတဲ့ God of War 4 ထဲက Baldur ရဲ့ဇာတ်ကြောင်း 👤

ဂိမ်းကိုဆော့ဖူးတဲ့သူတွေဆို God of War မှာဖော်ပြခဲ့ပြီးသား Baldur ရဲ့အကြောင်းကို ဖန်သားပြင်မှာပြသခဲ့သလောက် သိကြမှာပါ။ ဒါပေမယ့် အားလုံးသိထားကြတဲ့ Baldur ရဲ့ဖြစ်ရပ်တွေဟာ အမှန်တကယ်မှာ နဂိုမူလနော့စ်ဒဏ္ဍာရီသမိုင်းထဲက မှီငြိမ်းပြီး ဂိမ်းနဲ့အံ့ဝင်ခွင်ကျဖြစ်အောင် ပြန်လည်ပြင်ဆင်ဖြည့်စွက်ထားတာဖြစ်တဲ့အတွက် ဒီနေရာမှာ Baldur ရဲ့သမိုင်းကြောင်းအမှန်ကိုပဲ ပြောပြရပါလိမ့်မယ်။ နတ်ဘုရားတို့ရဲ့မျိုးဆက် ဒါမှမဟုတ် နတ်ဘုရားသွေးပါတဲ့သူတွေဟာ တစ်နည်းမဟုတ်တစ်နည်းနဲ့ ကိုယ်ပိုင်စွမ်းရည်တစ်ခုခုကို ပိုင်ဆိုင်တတ်ကြပါတယ်။ Odin နဲ့ Freya ရဲ့သားဖြစ်သူ Baldur မှာလည်း ထိုနည်းလည်းကောင်းပါပဲ။ အခြားနတ်ဘုရားတွေနဲ့မတူတဲ့ Baldur ရဲ့ နတ်ဘုရားစွမ်းရည်ကတော့ ဘယ်လောက်ပဲအဖျက်စွမ်းအားကြီးကြီး၊ ဘယ်လိုမျိုးအန္တရာယ်ရှိရှိ၊ အလုံးစုံတဲ့ထိခိုက်မှုမှန်သမျှဟာ သူ့အပေါ်မှာအကျိုးအာနိသင်သက်ရောက်မှု မရှိတာပဲဖြစ်ပါတယ်။ တစ်နည်းဆိုရရင် Baldur ဟာ နာကျင်မှုဝေဒနာမခံစားရတဲ့ အပြီးသတ်ချေမှုန်းလို့မဖြစ်နိုင်တဲ့ နော့စ်နတ်ဘုရားလို့ ဆိုရမှာပါပဲ။ Baldur ငယ်စဉ်အရွယ်က သွေးသားနီးစပ်သူနော့စ်နတ်ဘုရားတွေဟာ သူ့ကိုလက်နက်မျိုးစုံနဲ့ပစ်ခတ်ပေမယ့်လည်း ထိရောက်မှုမရှိ တန်ပြန်လာတာကိုကြည့်ပြီး အပျော်ရှာတတ်ကြသလို Baldur ကိုလည်းကျီစယ်တတ်ကြတယ်လို့ ဆိုပါတယ်။

လက်တွေ့ဖြစ်လာမယ့်အိပ်မက်ဆိုးနဲ့ မိခင်ဖြစ်သူ Freya ရဲ့အစွန်းရောက်သားချစ်တဲ့စိတ် 💔

God of War 4 နဲ့နော့စ်ဒဏ္ဍာရီနှစ်ခုကြားမှာ ဇာတ်ကြောင်းကွဲလွဲမှုအနည်းငယ်ရှိပေမယ့် အဓိကကျောရိုးခံထားတဲ့အကြောင်းအရာကတော့ တစ်ခုတည်းပါပဲ။ ဂိမ်းကိုဆော့ခဲ့ပြီးသူတွေဆိုရင် Baldur အနေနဲ့ မိခင်ဖြစ်သူ Freya ကို နာနာကျည်းကျည်းကို မုန်းတီးနေတာ တွေ့ရမှာပါ။ ဒါဟာဘာကြောင့်လည်းဆိုရင် ဟိုးနှစ်များအကြာက Baldur နဲ့ Freya တို့မြင်မက်ခဲ့တဲ့ သတ်ဖို့လုံးဝမဖြစ်နိုင်တဲ့ Baldur ရဲ့သေဆုံးမှုအိပ်မက်ကြောင့်ပါပဲ။ နော့စ်နတ်ဘုရားတွေရဲ့ အယူအဆအရ နတ်ဘုရားတွေဆီမှာမြင်မက်တဲ့ အိပ်မက်ဟာ အနာဂတ်တစ်ချိန်ကဖြစ်ရပ်လို့ သတ်မှတ်တဲ့အတွက် သားကိုချစ်တဲ့ Freya ဟာ အိပ်မက်ဆိုးရဲ့လှုံ့ဆော်မှုကြောင့် ရှိရှိသမျှနတ်ဘုရားတွေအပါအဝင် နော့စ်ဒဏ္ဍာရီလောကကိုးသွယ် (The Nine Realms) ရဲ့ နေရာမှန်သမျှကိုသွားရောက်ပြီး Baldur ကိုထိခိုက်နိုင်ရန်ပြုနိုင်တဲ့အရာမှန်သမျှ ဘယ်သောအခါမှ Baldur ကို အန္တရာယ်မပြုပါစေသား ဆိုပြီး အားလုံးကို သစ္စာတိုင်တည်စေတာ ဖြစ်ပါတယ်။ ဒါပေမယ့် God of War ထဲကဇာတ်ကြောင်းမှာတော့ Baldur သေဆုံးမှာကို စိုးရွံ့တဲ့အနေနဲ့ ကြိမ်စာဆန်ဆန်မှော်ဂါထာမန္တာန်ကို အသုံးချပြီး သားဖြစ်သူကို အကာအကွယ်ပေးခဲ့တာဖြစ်ပါတယ်။ အဲဒီအချိန်မှာမှ Baldur ဟာ ဘယ်လိုထိခိုက်မှုမျိုးမှ မသက်ရောက်တဲ့စွမ်းရည်ကို ပိုင်ဆိုင်သွားခဲ့တာပါ။ ဒါပေမယ့် အဲဒီမှော်မန္တာန်ရဲ့ဆိုးကျိုးကတော့ ထိခိုက်မှုတင်သာမက ဘယ်လိုမျိုးအထိအတွေ့အာရုံခံစားမှုကိုမှ ခံစားလို့မရနိုင်တဲ့အပြင် အပြင်းအထန်စိတ်ခံစားမှုပြောင်းလဲတာမျိုး၊ စိတ်လွတ်တာမျိုးဖြစ်တာပါပဲ။ အဲဒီအချိန်ကပြီး Baldur ဟာ အမေဖြစ်သူအပေါ်မှာ အငြိုးအတေးနဲ့မုန်းတီးပြီး ဖခင် Odin ရှိရာ Asgard မှာ အနှစ်တစ်ရာတိုင်တဲ့ထိ သွားရောက်နေထိုင်ခဲ့တာဖြစ်ပါတယ်။

နော့စ်နတ်ဘုရားတွေအားလုံး မလွဲမသွေကြုံရမယ့်ကြမ္မာဆိုး သို့မဟုတ် Asgard ပျက်သုန်းပြိုလဲခြင်း Ragnärok 🌊🍃

အခုလက်ရှိမှာဆောင်းပါးဖတ်နေကြသူတွေအနေနဲ့ ဒီလိုမျိုးအတွေး တွေးကောင်းတွေးနေမှာသေချာပါတယ်။ God of War 4 ထဲက နောက်ဆုံးဗီလိန် Baltur အကြောင်း ဘာကြောင့်ဒီလောက်ထိအထွေအထူးရှင်းပြနေရတာလဲ? Kratos သတ်လိုက်လို့ အဆုံးမှာသေသွားတဲ့ Baltur ဟာ အခုပြောမယ့်အကြောင်းတွေနဲ့ ဘယ်လိုမျိုးသက်ဆိုင်လို့လဲ? ဘာကိုဆိုလိုတာလဲ? အစရှိတဲ့မေးခွန်းတွေအတွက် အဖြေပေးမယ်ဆိုတာထက် အကြောင်းအချက်ကိုပဲ ပြောပြသွားပါမယ်၊ အားလုံးလိုက်ပြီး တွေးကြည့်ရင် ကွက်ကွက်ကွင်းကွင်း သိရမှာပါ။ တကယ့်တကယ်တမ်း အားလုံးစောင့်မျှော်နေကြတဲ့ အခိုက်အတန့်က အခုမှလာပါပြီ။ လွန်ခဲ့တဲ့နှစ်နှစ်ကထွက်ခဲ့တဲ့ Marvel က Thor ရဲ့Ragnärok ကားကို အားလုံးမှတ်မိလိမ့်မယ် ထင်ပါတယ်။ အဲဒီရုပ်ရှင်ရဲ့နာမည် Ragnärok ဆိုတဲ့စကားလုံးဟာ ဟိုးနှစ်ပေါင်းများစွာကတည်းက ရှေ့ဖြစ်ဟောကိန်းဖြစ်တဲ့ Asgard ပျက်စီးပြိုလဲခြင်းနဲ့ တစ်ချိန်မှာကျရောက်လာမယ့် နော့စ်ဒဏ္ဍာရီရဲ့အဆုံးသတ်ကို ဆိုလိုခြင်းဖြစ်ပါတယ်။ အနာဂတ်မှာဖြစ်လာမယ့် Ragnärok ဟာ နတ်ဘုရားတွေ နောက်ဆုံးရေးတဲ့သမိုင်း၊ Asgard ရဲ့ကျဆုံးခြင်းနိဂုံး၊ ရှောင်လွှဲမရတဲ့ကြမ္မာဆိုးကို ဖော်ပြတဲ့စကားလုံးလည်း ဖြစ်ပါတယ်။ အနားလည်လွယ်ဆုံးနည်းနဲ့ပြောရင် Kratos ရဲ့လက်ချက်ကြောင့် အိုလံပီယာနတ်ဘုရားတွေ အရေးနိမ့်တဲ့နောက်ဆုံးတိုက်ပွဲဟာ The Fall of Olympus ဆိုရင် နော့စ်နတ်ဘုရားတွေရဲ့အဆုံးသတ်နိဂုံးဟာ Ragnärok ပါပဲ။

ဒါဆိုရင် မေးစရာကရှိလာပါပြီ၊ အထက်ကပြောခဲ့တဲ့ Baldur နဲ့ Asgard ရဲ့ကျရှုံးခြင်း Ragnärok နဲ့ ဘယ်လိုများသက်ဆိုင်နေသလဲ? သိပ်ကိုသက်ဆိုင်ပါတယ်၊ အနာဂတ်ဟောကိန်းအရ နော့စ်ဒဏ္ဍာရီတစ်ခုလုံးပျက်သုန်းခြင်း Ragnärok ရဲ့ရှေ့ပြေးလက္ခဏာ၊ အကြိုနိဒါန်းနဲ့ ပထမဦးဆုံးဖြစ်လာမယ့်ဖြစ်ရပ်ဟာ Baldur ရဲ့သေဆုံးခြင်းဖြစ်တယ်လို့ ဟောကိန်းထုတ်ခဲ့လို့ပါပဲ။ God of War 4 နောက်ဆုံးအခန်းမှာ Atreus က အိမ်ရှေ့ကို Thor လာမယ်ဆိုပြီး အိပ်မက်မက်တဲ့အကြောင်းနဲ့ သူ့ရဲ့အိပ်မက်ကဘယ်လောက်ထိ လက်တွေ့ဆန်ကြောင်း Kratos ကို ပြောပြတာ အားလုံးမှတ်မိကြမယ် ထင်ပါတယ်။ နတ်ဘုရားမျိုးနွယ်တွေရဲ့ အိပ်မက်ဟာ အမှန်တကယ်အနာဂတ်ဖြစ်ကြောင်းကို ရည်ညွှန်းတာဖြစ်ပါတယ်။ ဒါတွေအားလုံးဟာ တိုက်ဆိုင်မှုလို့ ထင်ပါသလား? အခုဆိုရင် အထက်မှာပြောခဲ့တဲ့အကြောင်းအချက်အလက်တွေ အားလုံးချိတ်ဆက်သွားနိုင်ပြီ ထင်ပါတယ်။

နော့စ်ဒဏ္ဍာရီပျက်သုန်းခြင်းကို Kratos နဲ့ Atreus တို့ ဘယ်လိုမျိုးရင်ဆိုင်ရှင်သန်မလဲ? ထပ်မံဖြည့်စွက်ချက်နဲ့ စာရေးသူအနှစ်ချူပ် 💙📝

နှစ်ဖက်စလုံးရဲ့တိကျသေချာတဲ့အကြောင်းအချက်တွေကို ထောက်ကြည့်မယ်ဆိုရင် Kratos အနေနဲ့ Baldur ကိုသတ်ခဲ့မိတာ သိပ်မှားပါတယ်။ အခုအခြေအနေက ကိုယ့်မျိုးနွယ်မဟုတ်ဘဲ ပြင်ပလောကတစ်နယ်တစ်ကျေးက သူစိမ်းကြောင့် နော့စ်ဒဏ္ဍာရီကြီးတစ်ခုလုံး ပျက်သုန်းရမယ်ဆိုတော့ နော့စ်နတ်ဘုရားတွေအနေနဲ့လည်း ဒေါသအိုးပေါက်ကွဲချင်စရာပါပဲ။ အရေးကြီးတဲ့နောက်တစ်ချက်က Baldur အနေနဲ့ Kratos က မသတ်လိုက်လည်း အနာဂတ်ဟောကိန်းအရ တစ်ချိန်မှာသေကိုသေမှာပါပဲ။ ဒါပေမယ့် Kratos လုပ်ရပ်ကြောင့် နောက်ထပ်ရာစုနှစ်တစ်ခုကျော်မှ ဖြစ်ရမယ့်ဖြစ်ရပ်တွေအနေနဲ့ ရုတ်တရတ် အမြန်နှုန်းနဲ့ အဆင့်ကျော်ပြီး ဖြစ်ခိုင်းလိုက်သလို ဖြစ်သွားတာတော့ အမှန်ပါပဲ။ တကယ့်နော့စ်ဒဏ္ဍာရီမှာ လှည့်ဖြားခြင်းပရိယာယ်တို့ရဲ့အရှင်သခင် Loki ရဲ့ကြိုးကိုင်မှုကနေတဆင့် မြင်ကွင်းမဲ့နတ် Hodr ဟာ Baldur ရဲ့တစ်ခုတည်းသော အားနည်းချက်ဖြစ်တဲ့ mistletoe ကို လက်ကိုင်လှံအဖြစ်ပြောင်းပြီး Baldur ရင်ဝတည့်တည့်ကို ပစ်ခွင်းလိုက်ခြင်းကနေ Baltur သေဆုံးရတာဖြစ်ပါတယ်။

ဘယ်လိုအချင်းအရာမျိုးပဲဖြစ်ဖြစ် Ragnärok က နတ်ဘုရားတွေကိုယ်တိုင် ရှောင်လွှဲမရတဲ့ ဟောကိန်းပါ။ မျက်နှာမှာထင်ရှားတဲ့အမှတ်အသားနဲ့ သူရဲကောင်းက တစ်ချိန်မှာ အိုလံပီယာတစ်တောင်လုံးကို မျိုးဖြုတ်ဖျက်ဆီးပစ်လိမ့်မယ်ဆိုတဲ့ ဟောကိန်းကြောင့် မျက်နှာမှာအမှတ်ပါတဲ့ Kratos ရဲ့ညီ Daimos ကို Ares နဲ့ Athena တို့က မှားယွင်းခေါ်ဆောင်သွားပေမယ့် အိုလံပီယာတောင်ပျက်တာကို မကာကွယ်နိုင်သလိုပါပဲ။ ဒီတစ်ခေါက်လည်း ဖြစ်ကိုဖြစ်မှာပါ။ အဲလိုမှမဟုတ်ရင် Kratos အနေနဲ့ မိခင်အရင်းခေါက်ခေါက်ဖြစ်တဲ့ Freya ရှေ့မှာ သားဖြစ်သူ Baldur ကို သတ်လိုက်စရာဇာတ်ကြောင်း လုံးလုံးလျားလျားမှမရှိပါဘူး။ အဲဒါအပြင် Baldur ဟာ Thor နဲ့ ညီအစ်ကိုတော်စပ်ရုံသာမက Odin ရဲ့သားလည်းဖြစ်တဲ့အပြင် နော့စ်နတ်ဘုရားအားလုံးက ချစ်ခင်နှစ်သက်ရတဲ့ အလင်းနတ်ဘုရား (God of Light) ပါ။ စာဖတ်သူတွေအနေနဲ့ အသေအချာစဉ်းစားကြည့်မယ်ဆိုရင် Kratos ကြောင့်သာလျှင် Asgard ပျက်သုန်းမှုကို ဖြစ်စေတဲ့ Ragnärok ဟာ နော့စ်ဒဏ္ဍာရီဆီ အချိန်စောပြီးရောက်လာခဲ့တာပါ။ နောက်တစ်ချက်သုံးသပ်ကြည့်ရမှာက ကိုယ်နဲ့သွေးမတော်သားမစပ်သူဖြစ်သလို နတ်ဘုရားမျိုးနွယ်ချင်းလည်းမတူတဲ့ Freya နဲ့ Baldur သားအမိနှစ်ယောက်ရဲ့ မိသားစုကိစ္စကို ဝင်ရောက်စွက်ဖက်ပြီး Baldur ကိုပါသတ်ခဲ့တဲ့အပြင် နော့စ်ဒဏ္ဍာရီနဲ့ Asgard တစ်ခုလုံးကို ပျက်ဆီးစေမယ့် ကြမ္မာဆိုးကိုဆောင်ကျဉ်းလာတဲ့အထိ လက်လွန်ခဲ့တဲ့ Kratos မှာ လာမယ့်ဖြစ်ရပ်အတွက် လုံးဝကို တာဝန်အကြီးကြီးရှိပါတယ်။ ဒီဆောင်းပါးမှာပြောချင်တာကတော့ ဒီလောက်ပါပဲ၊ ဒါပေမယ့် ပိုပြီးရင်ခုန်ဖို့ကောင်းသွားအောင် နောက်ထပ်လာမယ့် God of War မှာ ပါဝင်နိုင်ဖွယ်ရာရှိတဲ့ဖြစ်ရပ်တချို့ကို အသေအချာစီစစ်ပြီး ပြန်လည်မျှဝေလိုက်ရပါတယ်။

လာမယ့် God of War ခွေအသစ်မှာ နော့စ်ဒဏ္ဍာရီပျက်သုန်းခြင်း Ragnärok နဲ့အတူ ပါဝင်ဖို့ကြမ်းသေပါဝင်ဖို့ကြမ်းသေနေတဲ့ ဖြစ်စဉ်တွေကတော့ ⬇⬇

- Baltur ရဲ့သေဆုံးခြင်းဟာ ဟောကိန်းထဲကအဆိုအရ Ragnäork ရဲ့ ပထမဦးဆုံးအဆင့်ဖြစ်တယ်။

- အရာအားလုံးစတင်တော့မယ်ဆိုတဲ့ ရှေ့ပြေးလက္ခဏာအဖြစ် အလွန်တရာခက်ထန်ကြမ်းတမ်းတဲ့ Timbulwinter နှင်းမုန်တိုင်း သုံးနှစ်တိုင်တိုင် အဆက်မပြတ်ကျရောက်စေတယ်။

- Sköll နဲ့ Hadi တို့နှစ်ယောက်ဟာ နေနဲ့လကို အသီးသီးဝါးမြိုပြီး Asgard ရဲ့ပြိုလဲပျက်သုန်းမှု စတင်ပြီဖြစ်တယ်ဆိုတဲ့အကြောင်း နော့စ်နတ်ဘုရားတွေအားလုံးကို အသိပေးလိုက်တယ်။

- မီးနတ်ဘီလူးဖြစ်တဲ့ Suntr ဟာ သူ့ရဲ့မီးလျှံဓါးကို အသုံးပြုပြီး Asgard တစ်ပြည်လုံးကို မီးလောင်တိုက်သွင်းလိမ့်မယ်။

- နော့စ်နတ်မျိုးနွယ်နှစ်စုဖြစ်တဲ့ Aesir နဲ့ Vanir တို့ရဲ့ အဆုံးမဲ့စစ်ပွဲကြီး ပြန်လည်စတင်ခဲ့တယ်။

- Fenir နဲ့ Odin တို့ရဲ့နောက်ဆုံးတိုက်ပွဲမှာ တစ်ဖက်နဲ့တစ်ဖက် အကြိတ်အနယ်တိုက်ခိုက်ရင်း နှစ်ယောက်လုံးအသက်ဆုံးရှုံးမယ်။

- နော့စ်ဒဏ္ဍာရီတစ်ခွင်မှာ အင်အားအကြီးဆုံးနဲ့ ရဲစွမ်းသတ္တိအပြည့်ဝဆုံး Thor နဲ့ Jörmungandr တို့ရဲ့ တိုက်ပွဲဟာ အလွန်ပြင်းထန်လာခဲ့တယ်။

- Kratos နဲ့ သားဖြစ်သူ Aterus တို့နှစ်ယောက် Asgard ရဲ့နောက်ဆုံးသမိုင်း Ragnärok ကြားဝင်ရောက်ပတ်သက်ခဲ့တယ်။

ဒီအချက်တွေဟာ တစ်ကမ္ဘာလုံးက God of War ပရိသတ်တွေအနေနဲ့ ဂိမ်းရဲ့လက်ရှိဇာတ်ကြောင်းအခြေအနေ၊ နော့စ်ဒဏ္ဍာရီရဲ့အဆုံးသတ်နဲ့ သမိုင်းအချက်အလက်တွေကို အသေချာလေ့လာစူးစမ်းပြီး တစ်ဦးချင်းစီ အကျိုးပြုထားတဲ့ တရားဝင်အချက်အလက်တွေ ဖြစ်ပါတယ်။ ဆောင်းပါးနဲ့အတူ ဒီအချက်လေးတွေကိုပါ မှတ်သားဖွယ် ထည့်သွင်းဖော်ပြလိုက်ရပါတယ်။ နောက်လာမယ့်ဆောင်းပါးတွေမှာလည်း အခုလိုစိတ်ဝင်စားစရာအကြောင်းအရာတွေကို သုတ၊ ရသ အစုံအလင်နဲ့ တင်ဆက်သွားပါ့မယ်။ စာဖတ်သူများအားလုံးကို ကျေးဇူးအထူးတင်လျက်ပါ 😇🙏

Yan
Ref: Wikia, Youtube

အပြင်းထန်အကြမ်းတမ်းဆုံး Apex Legends တိုက်ပွဲတွေမှာ အသစ်ပါဝင်လာတော့မယ့် Crypto နဲ့ Meltdown Season 3

ဖေဖော်ဝါရီလ ၄ ရက်နေ့၊ ၂၀၁၉ ခုနှစ်ကတည်းက ထွက်ရှိလာတဲ့ Apex Legends ဂိမ်းဟာ Free-to-Play ဂိမ်းဖြစ်တဲ့အပြင် အချိန်အနည်းငယ်အတွင်းမှာပဲ ဆော့ကစားသူပေါင်း ၅၀ မီလီယံရှိခဲ့တာကြောင့် Fortnite ကို ယှဉ်ပြိုင်နိုင်မယ့် Battle Royale ဂိမ်းတွေထဲကတစ်ခုလို့ ဂိမ်းမီဒီယာများနဲ့ ဂိမ်းလောကက သတ်မှတ်ထားတဲ့ဂိမ်းလည်းဖြစ်ပါတယ်။ ဂိမ်းလောကထဲမှာ နှစ်ပေါင်းများစွာရပ်တည်လာခဲ့တဲ့ EA Entertainment ကထုတ်လုပ်ပေးပြီး Respawn ကဖန်တီးရေးဆွဲထားတဲ့ Apex Legends ဂိမ်းဟာ မှိုလိုပေါက်နေတဲ့ 1st Person Battle Royale ဂိမ်းတွေထဲမှာမှ စစ်မှန်တဲ့အရည်အချင်း၊ စစ်မြေပြင်အကြောင်းနားလည်မှု၊ ပုန်းခိုပစ်ခတ်တတ်မှုနဲ့ အဖွဲ့ရဲ့စည်းလုံးညီညွှတ်မှုတွေအပေါ်မှာ အခြေခံပြီးတည်ဆောက်ထားတဲ့ တစ်မူထူးခြားတဲ့ဂိမ်းလည်း ဖြစ်ပါတယ်။ ထွက်ရှိခဲ့တာ ရှစ်လအတိုင်းအတာပဲ ရှိသေးပေမယ့် Apex Legends ဂိမ်းအနေနဲ့ ကွဲပြားခြားနားတဲ့ဆုကြေးတွေပါဝင်လေ့ရှိတဲ့ ဂိမ်းရာသီ Season တွေနဲ့ လာရောက်ဆော့ကစားသူများကို စွဲဆောင်နေဆဲဖြစ်ပါတယ်။ လတ်တလောမှာကျင်းပပြီးစီးသွားတဲ့ Season တွေကတော့ မတ်လ ၁၉ ရက်နေ့ကနေ ဇွန်လ ၁၈ ရက်နေ့အထိ ကြာမြင့်ခဲ့တဲ့ Wild Frontier (Season 1) နဲ့ ဂျူလိုင်လ ၂ ရက်နေ့မှာ စတင်ပြီး အောက်တိုဘာလ ၁ ရက်နေ့မှာမှ ပြီးဆုံးမယ့် Battle Charge (Season 2) တို့ပဲဖြစ်ပါတယ်။ Apex Legends ဂိမ်းရာသီ Season တွေရဲ့ ထူးခြားချက်တွေထဲက တစ်ခုကတော့ Season တစ်ခုချင်းစီမှာ စွမ်းရည်အသစ်၊ လုပ်ဆောင်ချက်အသစ်တွေနဲ့ အားလုံးအကြိုက်တွေ့မယ့် Legend ဇာတ်ကောင်အသစ်တစ်ယောက်ကို ထည့်သွင်းပေးထားတာပါပဲ။

Apex Legends ဂိမ်းရဲ့ပြီးဆုံးသွားတဲ့ Season တွေကို ပြန်ပြောင်းကြည့်မယ်ဆိုရင် မတ်လ ၁၉ ရက်နေ့မှာစပြီး ဇွန်လ ၁၈ ရက်နေ့မှာ အဆုံးသတ်ခဲ့တဲ့ ပထမဦးဆုံးရာသီ Wild Frontier (Season 1) အတွက် အပြေးမြန်ပြီး လျင်မြန်သွက်လက်တဲ့စွမ်းရည်နဲ့ Octane ပါဝင်လာခဲ့သလို ဂျူလိုင်လ ၂ ရက်နေ့မှာ စတင်ပြီး အောက်တိုဘာလ ၁ ရက်နေ့မှာအဆုံးသတ်မယ့် Battle Charge (Season 3) အတွက်ဆိုရင်တော့ လျှပ်စစ်ထောင်ချောက်တွေကိုအသုံးပြုပြီး အဖွဲ့သားတွေရဲ့ကျည်ကာတွေ ပြန်လည်ဖြည့်တင်းပေးတဲ့ Wattson လိုမျိုး ဂိမ်မာတွေလုံးဝအကြိုက်တွေ့တဲ့ Legend သစ်တွေနဲ့ မိတ်ဆက်ပေးခဲ့တာချည်းပါပဲ။ အဲဒီတော့ မကြာတော့တဲ့ အောက်တိုဘာလ ၁ ရက်နေ့မှာ အဆုံးသတ်တော့မယ့် Battle Charge Season 2 အပြီးမှာ ဘယ်လိုမျိုးထူးခြားချက်တွေပါဝင်တဲ့ Season တွေ ဆက်လာမလဲဆိုတာ အားလုံးကရင်ခုန်စိတ်လှုပ်ရှားစွာ စောင့်မျှော်နေကြပါပြီ။ အဲဒါဆိုရင်တော့ အားလုံးအတွက် သတင်းကောင်းလေးတစ်ခုကို ပြောပြလိုက်ပါရစေ။ ဘာကြောင့်လည်းဆိုတော့ ဒီတစ်ပါတ်ထဲမှာပဲ Respawn Entertainment ကနေ နောက်လာမယ့် Season ရဲ့ခေါင်းစဉ်နဲ့ အဲဒီထဲမှာပါဝင်လာမယ့် ဇာတ်ကောင်သစ်တစ်ယောက်ကို ထုတ်ဖော်ပြသလိုက်လို့ပါပဲ။ ဒီတစ်ခေါက် Apex Legends ရဲ့ ဂိမ်းရာသီသစ် Meltdown (Season 3) မှာ Wattson နည်းတူပဲ အသစ်ပါဝင်လာမယ့်ဇာတ်ကောင်ကတော့ နည်းပညာပိုင်းမှာတစ်ဖက်ကမ်းခတ်ကျွမ်းကျင်ပြီး နာကျည်းချက်တစ်ချို့ကြောင့် Legend တစ်ယောက်ဖြစ်လာခဲ့သူ Crypto ပဲ ဖြစ်ပါတယ်။

စက်တင်ဘာလ ၁၉ ရက်နေ့က Apex Legends ရဲ့ YouTube ချန်နယ်မှာတင်ခဲ့တဲ့ ဗီဒီယိုအရ နောင်တစ်ချိန်မှာ Legend တစ်ယောက်ဖြစ်လာမယ့် Crypto နဲ့ ညီမဖြစ်သူ Mila Alexander တို့ရဲ့ ဇာတ်လမ်းအကျဉ်းကို ဖော်ပြပေးထားပါတယ်။ ဇာတ်လမ်းအရ Crypto နဲ့ Mila ဟာ အရာအားလုံးဆီက လွတ်မြောက်အောင် ရုန်းထွက်မယ့်နည်းလမ်းအပေါ်မှာ ဆွေးနွေးတိုင်ပင်နေကြပေမယ့် တိကျတဲ့အဖြေမထွက်လာခဲ့ပါဘူး။ ဒီလိုနဲ့ နောက်တစ်နေ့ရောက်တဲ့အခါ Mila ဟာရုတ်တရတ်ပျောက်ဆုံးသွားပြီး အဲဒီအဖြေရှာမရတဲ့ပျောက်ဆုံးမှုအတွက် Crypto ကို ထောင်ချောက်ဆင်လာရောက်ဖမ်းဆီးခဲ့ကြပါတယ်။ ဒါပေမယ့် ဟက်ကာတစ်ယောက်ဖြစ်သူ Crypto ဟာ သူကျွမ်းကျင်တဲ့နည်းပညာကိုအသုံးပြုပြီး လက်နက်ကိုင်တပ်ဖွဲ့ဝင်တွေလက်ကနေ လွတ်မြောက်အောင်ထွက်ပြေးလာခဲ့ပါတယ်။ အဲဒီနောက်မှာတော့ Crypto ဟာ ညီမဖြစ်သူ Mila ရဲ့ဖြစ်ရပ်မှန်က ဘာလဲဆိုတာကို ရှာဖွေဖို့အတွက် နည်းပညာဖက်မှာတစ်ဖက်ကမ်းခတ် ကျွမ်းကျင်တဲ့ Legend တစ်ယောက်အဖြစ် ကိုယ့်ကိုယ်ကိုယ် ပြောင်းလဲခဲ့ပါတော့တယ်။ ကဲ Apex Legends ဂိမ်းထဲမှာ အသစ်ပါဝင်လာမယ့် Crypto ရဲ့ဇာတ်လမ်းအကျဉ်းကတော့ ဒါပါပဲ။ Legend တစ်ယောက်ဖြစ်တဲ့ Crypto ရဲ့ တိုက်ပွဲမှာအသုံးချနိုင်တဲ့စွမ်းရည်တွေနဲ့ passive က ဘာတွေလဲဆိုတာကိုတော့ အောက်တိုဘာလ ၁ ရက်နေ့ Meltdown Season 3 စတင်ချိန်ကျမှပဲ သိရမှာဖြစ်တဲ့အတွက် အားလုံးအတူစောင့်ဆိုင်းကြဖို့ Apex Legends ပရိသတ်များကို ဒီကနေတဆင့် ပြောကြားလိုက်ရပါတယ်။ ဖတ်ရှုမှုများအတွက် ကျေးဇူးအထူးတင်ရှိပါကြောင်း။

Yan
Ref: gamesrader, engadget, cnet

နိုဝင်ဘာလမှာ စတင်ရိုက်ကူးတော့မယ့် Venom 2 ရုပ်ရှင်ကားသစ်မှာ Venom ကို Spiderman နဲ့အတူ တွေ့ရမလား?

Marvel ပရိသတ်တွေသာမက Comic ချစ်သူများကြားမှာပါ ရေပန်းစားခဲ့တဲ့ ၂၀၁၈ ခုနှစ်ရဲ့ Venom Anti-Hero ရုပ်ရှင်ဇာတ်ကားကို အားလုံးပဲမှတ်မိကြမှာပါ။ ထပ်ချည်းတလဲလဲဖြစ်နေတဲ့ Marvel ရဲ့ ထွက်ရှိခဲ့ပြီးသား လူစွမ်းကောင်းဇာတ်ကားတွေနဲ့မတူပဲ Anti-hero ဇာတ်ကားမျိုးဖြစ်မယ်လို့ အသေအချာမျှော်လင့်ချက်ပေးခဲ့ပေမယ့် တကယ်တမ်းထွက်ရှိလာတဲ့အချိန်မှာတော့ Marvel ပရိသတ်များတင်သာမက သတင်းမီဒီယာတွေရဲ့သုံးသပ်ချက်မျိုးစုံကို ရရှိခဲ့ပါတယ်။ IMDb က 6.7, Rotten Tomato က 29%, Metacritic က 35% အစရှိသဖြင့် အမျိုးစုံတဲ့ ရုပ်ရှင်မီဒီယာတချို့ရဲ့ rating တွေနဲ့အတူ ဟိုးလေးတစ်ကျော်ပေါက်မြောက်သွားတဲ့ superhero ရုပ်ရှင်တစ်ကားလို့ မဆိုနိုင်ပေမယ့် Marvel အနေနဲ့ Spiderman ရဲ့မဟာရန်သူတော်တွေထဲက တစ်ယောက်ဖြစ်တဲ့ Venom ရဲ့ တစ်ကိုယ်တော်ဇာတ်ကားကိုတော့ စောင့်မျှော်နေတဲ့ပရိသတ်တွေဆီ အရောက်ပို့ပေးနိုင်ခဲ့တာတော့ အမှန်ပါပဲ။ ယမင်နှစ် ၂၀၁၈ ကမှထွက်ရှိထားတဲ့ ရုပ်ရှင်ဖြစ်ပေမယ့် Sony အနေနဲ့ Venom ရဲ့နောက်ဆက်တွဲ အပိုင်း ၂ ကို လာမယ့်နိုဝင်ဘာလ ၂၅ ရက်နေ့မှာ စတင်ရိုက်ကူးတော့မှာဖြစ်တယ်လို့ သတင်းတင်ပြချက်များအရ သိရပါတယ်။

မျှော်လင့်ထားသလိုဖြစ်မလာတဲ့ The Amazing Spider-man 2 အနေနဲ့ ပိုမိုကျယ်ပြန့်တဲ့ပရိသတ်နဲ့ မချိတ်ဆက်နိုင်ခဲ့တဲ့အတွက် အဓိကဇာတ်ဆောင်နေရာမှာ Tom Holland ကိုအစားထိုးသရုပ်ဆောင်စေခဲ့ပြီး Marvel Universe ထဲသွတ်သွင်းလိုက်တာ အားလုံးမျက်မြင်ပါပဲ။ Marvel အနေနဲ့ သူတို့ရဲ့ Universe ကိုတိုးချဲ့ရင်း နာမည်ကျော်လူကြိုက်များတဲ့ Comic ဇာတ်ကောင်တွေကို တစ်ဦးချင်းအခြေခိုင်အောင်တည်ဆောက်လာပေမယ့် Sony ကတော့ Spider-man ရဲ့ နာမည်ကျော်အထင်ကရဗီလိန်တွေကို အားလုံးရှေ့မှောက် ချပြဖို့အတွက် ပိုအာရုံစိုက်ခဲ့တာဖြစ်ပါတယ်။ Venom ဇာတ်ကားဟာ မီဒီယာတွေဆီကနေ အကောင်းအဆိုးရောယှက်နေတဲ့ reivew နဲ့ rating တွေကို ရရှိခဲ့တာမှန်ပေမယ့် တကယ်တမ်းမှာ ရုံဝင်ငွေအမြောက်အမြားရရှိခဲ့တဲ့ superhero ဇာတ်ကားတစ်ကားဖြစ်ပြီး ၂၀၁၈ ခုနှစ်၊ အောက်တိုဘာလရဲ့ all-time opening record ကိုကျော်လွန်တဲ့အထိ ဖြစ်ခဲ့ပါတယ်။

Venom ဟာ မီဒီယာတွေဆီက review မကောင်းပေမယ့် ငွေကြေးပိုင်းကဏ္ဍမှာ အောင်မြင်ခဲ့တဲ့ရုပ်ရှင်ဖြစ်တာကြောင့် ကြိမ်းသေနောက်ဆက်တွဲဇာတ်ကားထွက်မယ်လို့ ရုပ်ရှင်လောကလေ့လာသုံးသပ်သူများက ခန့်မှန်းထားကြပါတယ်။ အခုတော့ အဲဒီကြိုတင်တွက်ဆချက်ဟာ တကယ်ကိုအကောင်အထည်ပေါ်လာပြီဖြစ်ပြီး လာမယ့်နိုဝင်ဘာလ ၂၅ ရက်နေ့မှာ Venom 2 ကို ရိုက်ကူးမှုစတင်တော့မှာဖြစ်ပါတယ်။ Venom ဟာ Spider-man ရဲ့နာမည်ကျော်ဗီလိန်တွေအထဲကတစ်ယောက်ဖြစ်တာကြောင့် သေချာတာတစ်ခုကတော့ Spider-man ကိုတောက်လျှောက်အားပေးလာခဲ့တဲ့ အနယ်နယ်အရပ်ရပ်က ချစ်ပရိသတ်များကတော့ Venom 2 ဇာတ်ကားအပေါ်မှာ စိတ်ဝင်စားကြမှာအမှန်ပါပဲ။ ဒါပေမယ့် Venom အဓိကရင်ဆိုင်ရမယ့် comic ဇာတ်ကောင် ပြည်သူ့အချစ်တော် Spider-man အနေနဲ့ Venom 2 ထဲမှာ ပါလာမှာလားဆိုတာကတော့ အခုအချိန်မှာအားလုံးကမေးခွန်းထုတ်လာကြပါပြီ။ Sony အနေနဲ့လည်း ရုပ်ရှင်လောကမှာ ပြောစမှတ်တွင်ပြီး နာမည်ကောင်းတစ်ခုရဖို့ လိုအပ်နေတဲ့အတွက် Venom ကို Spider-man နဲ့အတူ ပိတ်သားပြင်ပေါ်မှာ ပူးတွဲချပြဖို့ အခွင့်ကောင်းတစ်ခုဖြစ်ပါတယ်။ လာမယ့် Venom 2 ဇာတ်ကားမှာ Tom Hardy က Venom အဖြစ်ပြန်လည်ပါဝင်လာမှာဖြစ်ပြီး Michelle Williams က Anna Weying, Woody Harrelson က Carnage အဖြစ် အသီးသီးဝင်ရောက်အားဖြည့်ထားကြပါတယ်။ ဘာတွေပဲပြောပြောပါ၊ အနာဂတ်မှာလာမယ့် Venom 2 ဟာ ဘယ်လိုဇာတ်ကြောင်းဇာတ်ကွက်နဲ့ တစ်မူထူးတဲ့ superhero ဇာတ်ကားတစ်ကားဖြစ်မလားဆိုတာကတော့ အားလုံးစောင့်ကြည့်ရတော့မှာပါ။

Yan
Ref: wikia, screenrant

ဆယ်စုနှစ်နှစ်စုကျော်တိုင်အောင် တိတ်ဆိတ်နေခဲ့တဲ့ Mortal Kombat ရုပ်ရှင်ကို စတင်ရိုက်ကူးနေပြီဖြစ်ကြောင်း တရားဝင်ကြေညာခဲ့

ဂိမ်းလောကမှာ အချိန်ရဲ့ရိုက်စားမှုဒဏ်ကို ကျော်လွန်လာခဲ့ပြီး ကျွန်တော်တို့ငယ်စဉ်ဘဝကနေ အခုချိန်အထိလူကြီးလူငယ်မရွေး အားပေးလာခဲ့ကြတဲ့ နာမည်ကျော်ဂိမ်းပေါင်းမြောက်မြားစွာရှိပါတယ်။ အဲဒီထဲကမှ Mortal Kombat ဂိမ်းဟာလည်း ဂိမ်းချစ်သူတွေအသည်းစွဲခဲ့ရတဲ့ ဇာတ်ကောင်ပေါင်းများစွာနဲ့ ဝေဝေဆာဆာဖြစ်နေဆဲ ဂိမ်းတစ်ခုလို့ဆိုရင်လည်း မမှားပါဘူး။ နည်းပညာတွေအဆင့်မြင့်မားပြီး ဂိမ်းနဲ့ရုပ်ရှင်လောကဟာ ပိုမိုဆက်နွယ်လာတာနဲ့အမျှ နာမည်ကြီးဂိမ်းအများစုဟာ တီဗီဖန်သားပြင်တွေထက်ကို ကူးပြောင်းဖို့ကြိုးစားအားထုတ်လာကြတာကို ကျွန်တော်တို့ပရိသတ်တွေအားလုံး မျက်မြင်ကိုယ်တွေ့ပါပဲ။ ဒါပေမယ့် အဲဒီလိုအကူးအပြောင်းကာလမှာ အဆင်ပြေချောမွေ့စွာနဲ့ ဂိမ်းနဲ့တစ်ပြေးညီ ရုပ်ရှင်ကားကောင်းတစ်ကောင်းဖြစ်ဖို့ဆိုတာဟာ နာမည်ကြီးဂိမ်းအများစုအတွက်တော့ လွန်စွာမှခက်ခဲတဲ့ကိစ္စဖြစ်ပါတယ်။ အဲဒီလိုဆိုရင်တော့ ၁၉၉၅ ခုနှစ်က ထွက်ရှိခဲ့တဲ့ Mortal Kombat ရုပ်ရှင်ကိုအားလုံးပဲ မှတ်မိကြမယ်ထင်ပါတယ်။ နှစ်နှစ်ဆယ်ကျော်ကျော်ကြာခဲ့ပေမယ့် သူ့ခေတ်သူ့အခါတုန်းကတော့ အောင်မြင်မှုအတိုင်းအတာတစ်ခုရခဲ့တဲ့ Mortal Kombat Live Action ဇာတ်ကားဟာ ပထမတစ်ကားအပြီး နောက်ထပ်တစ်ကားရိုက်ကူးဖို့ ပြင်ဆင်မှုတွေရှိခဲ့ပေမယ့် ကျွန်တော်တို့ပရိသတ်တွေသာ အသက်ကြီးလာတယ် အခုအချိန်အထိ ရေရေရာရာခရီးမရောက်ခဲ့ပါဘူး။ ဒါပေမယ့် စောင့်မျှော်နေသူများရဲ့အိပ်မက်တွေကို ပရိသတ်တချို့နဲ့ရင်းနှီးပြီးသား နာမည်ကျော် ဒါရိုက်တာနဲ့ ပရိုဂျူဆာ James Wan ရဲ့တိုက်တွန်းမှုကြောင့် သြစတေးလျှဒါရိုက်တာ Simon McQuiod ကဦးဆောင်ပြီး အားလုံးလက်ထဲကိုအရောက်ထည့်ပေးတော့မှာပါ။

James Wan ဟာပေါ်မြောက်တဲ့ DC film တစ်ခုဖြစ်တဲ့ Aquaman ကိုဖန်တီးခဲ့သူ ဒါရိုက်တာလည်းဖြစ်တဲ့အပြင် အခြားသောနာမည်ကျော်ဇာတ်ကားများဖြစ်တဲ့ Saw, Billy The Puppet, Insidious, Insidious: Chapter 2, Conjuring: 1 and 2, Fast and Furious: 7 ဇာတ်ကားများကိုလည်း လက်ရာမြောက်စွာထုတ်ပေးခဲ့သူတစ်ဦးဖြစ်တဲ့အတွက် အားလုံးဟာ အခုစတင်ရိုက်ကူးနေပြီဖြစ်တဲ့ Mortal Kombat ဇာတ်ကားအပေါ်မှာ အတော့်ကိုမျှော်လင့်ထားကြပါတယ်။ ဒါပေမယ့် ဒီ Mortal Kombat ဇာတ်ကားအတွက်ကတော့ ဒါရိုက်တာ Simon McQuoid က အဓိကတာဝန်ယူသွားမှာဖြစ်ပြီး James Wan ဟာ တွဲဖက်ဖန်တီးသူဒါရိုက်တာနေရာလောက်မှာ ရှိနေပါတယ်။ တကယ်တမ်းမှာ Mortal Kombat ဂိမ်းဟာ လက်ရှိခေတ်မှာရုပ်ရှင်ဇာတ်ကားတစ်ခုအသွင်အဖြစ် ဘယ်ပရိသတ်နဲ့မှမရင်းနှီးတဲ့အတွက် လုပ်ခဲ့သမျှပရောဂျက်တွေထဲမှာ တာဝန်အကြီးဆုံးဖြစ်သလို အတော်လေးစိတ်ရောကိုယ်ပါ အားထုတ်ရမယ့်ရုပ်ရှင်လည်းဖြစ်နေပြန်ပါတယ်။ လက်ရှိအခြေအနေမှာတော့ ရုပ်ရှင်ဇာတ်ညွှန်းဆရာဖြစ်သူ Greg Russo ကနေပြီး သရုပ်ဆောင် Joe Taslim ကို Sub-Zero အဖြစ်၊ Ludi Lin ကို Liu Kung အဖြစ် ထိပ်ဆုံးမှာ အသီးသီးနေရာပေးထားပါတယ်။ နာမည်ကျော် New Line Cinema ကလည်း Mortal Kombat ဇာတ်ကားမှာပါဝင်ဖို့အတွက် ကိုက်ညီမယ့် သရုပ်ဆောင်ပေါင်းများစွာကို လူစစ်ရွေးချယ်ပြီး ရိုက်ကူးရေးစဖို့ ပြင်ဆင်နေပါပြီ။

ဇာတ်ညွှန်းဆရာ Russo ရဲ့အတည်ပြုမှုအရဆိုရင်တော့ ဒီ Mortal Kombat ဇာတ်ကားကို သြစတေးလျှမှာ ရိုက်ကူးမှုပထမဦးဆုံးရက်စတင်နေပြီလို့ ဆိုပါတယ်။ အားလုံးတက်ညီလက်ညီနဲ့ အကောင်းဆုံးတွေလုပ်ဆောင်သွားဖို့ အချိန်အလုံအလောက်ရတဲ့အတွက် ဒီဇာတ်ကားဟာ ပြောစမှတ်ပြုလောက်စရာ ဂိမ်းရုပ်ရှင်မျိုးဖြစ်မယ်လို့ ဂိမ်းနဲ့ရုပ်ရှင်ပရိသတ်များအားလုံးက စောင့်မျှော်နေကြပါတယ်။ ထွက်ရှိလာမယ့်နေ့အတိအကျသတ်မှတ်ထားပေမယ့် မတ်လ၊ ၂၀၂၀ ခုနှစ်မရောက်ခင်အထိတော့ ထုတ်ပြောခွင့်ရှိမှာမဟုတ်သေးဘဲ အဲဒီအချိန်လောက်ကျရင် ရိုက်ယူစရာရှိတာတွေအားလုံး ပြီးစီးသွားလောက်ပြီဖြစ်ပါတယ်။ ၂၀၂၁ ခုနှစ်တည်းမှာထွက်ရှိလာမယ်လို့ အားလုံးကမှန်းဆကြတဲ့အတွက် အချိန်တစ်နှစ်နီးနီး ပြန်လည်ပြင်ဆင်တည်းဖြတ်ခွင့်နဲ့ အနုပညာအမြောက်ဆုံးဖန်တီးဖွင့် အချိန်အပြည့်အဝရတယ်လို့ဆိုပါတယ်။.ကဲ ဒီတော့ နောက်ထပ်နှစ်နှစ်လောက်ထပ်စောင့်ရဦးမယ့် ဂိမ်မာများအသည်းစွဲ Mortal Kombat ဂိမ်းရုပ်ရှင်ဟာ ဘယ်လိုမျိုးဖြစ်မလဲ? R-rated fatalities တွေကို ဂိမ်းထဲကလို အထိအမိဆုံးဇာတ်ကွက်တွေအဖြစ် ဘယ်လိုဖန်တီးသွားမလဲဆိုတာကတော့ အားလုံးအတူစောင့်ဆိုင်းကြတာပေါ့လို့ တိုက်တွန်းရင်း နောက်လာမယ့်ဆောင်းပါးတွေမှာ ပြန်လည်ဆုံတွေ့ကြပါမယ်။ ဖတ်ရှုသူများအားလုံးကို ကျေးဇူးအထူးထင်ရှိပါတယ်။

Yan

Ref: screenrant

Harley Quinn အကြောင်းကို အသားပေးဖော်ပြထားတဲ့ Birds of Prey ရုပ်ရှင်နဲ့ DC ရဲ့ဦးတည်ချက်က ဘယ်ကိုမြှားဦးလှည့်နေလဲ?

၂၀၁၆ ခုနှစ်ရဲ့ Suicide Squad ထွက်ရှိအပြီးမှာ ထင်မှတ်ထားသလို ဖြစ်မလာတဲ့ DC Comic ရဲ့ live action ရုပ်ရှင်တွေကြောင့်DC အနေနဲ့ ပရိသတ်တွေကျေနပ်အားရလောက်တဲ့ ယုံကြည်မှုကိုတည်ဆောက်ဖို့ ပိုမိုခက်ခဲခဲ့ပါတယ်။ ဟိုးယခင် ၂၀ ရာစုနှစ်ကတည်းက Comic လောကမှာ ဒိတ်ဒိတ်ကြဲခေတ်ပြိုင်များဖြစ်ခဲ့တဲ့ DC နဲ့ Marvel အားချင်းယှဉ်မှုဟာ ဘယ်လိုနယ်ပယ်တိုင်းမှာမဆို တစ်ဖက်ထက်တစ်ဖက်က ပိုမိုသာလွန်ဖို့ကိုသာ တွေးခဲ့ပါတယ်။ ဒါပေမယ့် ရာစုနှစ်သက္ကရာဇ်တွေ တဖြည်းဖြည်းကုန်ဆုံးလာတာနဲ့အမျှ ရုပ်ရှင်လောကဟာလည်း ဖွံဖြိုးတိုးတတ်လို့လာတာကြောင့် DC နဲ့ Marvel ဟာ လူကြိုက်များတဲ့ သူတို့ရဲ့ နာမည်ကျော်ဇာတ်ကောင်တွေကို Comic နယ်ပယ်ကနေတဆင့် live action အဖြစ် အသက်ကိုယ်စီသွင်းလို့လာကြပါတယ်။ ရုပ်ရှင်သမိုင်းတစ်လျှောက်မှာ ပြောစမှတ်တွင်ကျန်ရစ်ပြီး နာမည်ကျော်ခဲ့ကြတဲ့ DC နဲ့ Marvel တို့ရဲ့ superhero ကား ကိုယ်စီရှိခဲ့ကြသလို ယမင်နှစ် ၂၀၁၉ အထိလည်း DC နဲ့ Marvel ဟာ သူတစ်လူကိုယ်တစ်မင်း ယှဉ်ပြိုင်နေကြဆဲဖြစ်ပါတယ်။ ၂၀၀၈ ခုနှစ်မှာထွက်ရှိခဲ့တဲ့ DC ရဲ့ Dark Knight ဟာ Marvel ကို အပြတ်အသတ်အနိုင်ယူခဲ့တဲ့ ဖန်တီးမှုတစ်ခုဖြစ်တယ်ဆိုပေမယ့် ၂၀၁၂ ခုနှစ်ကနေစပြီး အခု ၂၀၁၉ ခုနှစ်အထိ ဖန်တီးမှုနည်းပညာမြင့်မားစွာနဲ့ အချိတ်အဆက်မိမိ ပရိသတ်ကိုစွဲဆာင်လာခဲ့တဲ့ မြောက်မြားစွာသော superhero ရုပ်ရှင်ဇာတ်ကားများကြောင့် live action နဲ့ရုပ်ရှင်လောကမှာ Marvel ဟာ DC ထက် ခြေလှမ်းများစွာသာလို့ နေပါတယ်။

ဒါပေမယ့် ၂၀၁၉ ခုနှစ်ရဲ့အလွန်နောက်ပိုင်းခုနှစ်တွေမှာတော့ အနေအထားဟာ တစ်မျိုးပြောင်းလာဖွယ်ရှိတယ်လို့ နှစ်ဖက်စလုံးကိုစောင့်ကြည့်နေကြတဲ့ မီဒီယာကြီးများနဲ့ ရုပ်ရှင်လောကသုံးသပ်သူများက ခန့်မှန်းကြပါတယ်။ လွန်ခဲ့တဲ့ခုနှစ်တွေကအထိ DC ဖက်ကရိုက်ကူးခဲ့တဲ့ superhero ဇာတ်ကားတွေကို ပြန်လည်သုံးသပ်မယ်ဆိုရင် Marvel နဲ့ ဦးတည်ချက်တူစွာပဲ superhero ဒါမှမဟုတ် villain များပေါင်းစည်းထားတဲ့ live action ရုပ်ရှင်တွေကိုပဲ တောက်လျှောက်ဦးစားပေးဖန်တီးခဲ့တာပါ။ ဒါပေမယ့် နှစ်ပေါင်းများစွာ အသေအချာတည်ဆောက်လာခဲ့ပြီး လက်ရှိမှာအခြေခိုင်မြဲနေတဲ့ အင်အားကြီးမားလှတဲ့ Marvel ရဲ့ အလုံးစုံသောဖြစ်တည်မှုကို အလားတူ live action ဇာတ်ကားတွေနဲ့ ရင်ဆိုင်ဖို့ဆိုတာ ဘယ်လိုမှမဖြစ်နိုင်တဲ့ကိစ္စမှန်း အဲတုန်းက DC ဟာ မရိပ်မိခဲ့ပါဘူး။ ဒါပေမယ့် Wonder Woman, Aquaman, Shazam နဲ့ Joker ရုပ်ရှင်တွေ ထွက်ရှိလာအပြီးမှာ ပရိသတ်တွေနဲ့မီဒီယာတွေရဲ့ အတိုင်းထက်အလွန်ပေးခဲ့ကြတဲ့ review နဲ့ rating တွေကြောင့် DC ဟာ Marvel အပေါ်မှာရှိနေတဲ့ သူတို့ရဲ့အားသာချက်ကဘာလဲဆိုတာ မြင်သွားခဲပါတယ်။ အဲဒါကကတော့ ဘယ်သူမှ တီဗီဖန်သားပြင်ပေါ်မှာ မယ်မယ်ရရမမြင်ရသေးတဲ့ Comic ဇာတ်ကောင်တစ်ဦးချင်းစီရဲ့ အကြောင်းကို live action ရုပ်ရှင်ကြီးတွေအဖြစ် အနုပညာမြောက်စွာဖန်တီးလိုက်မယ်ဆိုရင် ပရိသတ်များကအသည်းခိုက်အောင် ကြိုက်ကြတယ်ဆိုတာကို သဘောပေါက်ခဲ့တာပါပဲ။

တစ်ကမ္ဘာလုံးကပရိသတ်တွေအားလုံး အစကနေအဆုံးသိမြင်ပြီးသွားတဲ့ Marvel Universe အတွက်တော့ ရှိနေပြီးဇာတ်ကောင်များကို ဘယ်လိုမှအမြင်သစ်နဲ့မြင်အောင် ဖန်တီးလို့မရနိုင်ပေမယ့် DC ဖက်ကတော့ အခုမှအစပျိုးရုံလေးတင်ရှိနေတဲ့ အနေအထားပါ။ နောက်ထပ်အားသာချက်တစ်ခုက DC ထဲကဇာတ်ကောင်တွေဟာ Marvel ဇာတ်ကောင်တွေထက် ဖြစ်တည်မှုအရရော၊ ဇာတ်ကြောင်းပုံပြင်အရရောပါ ပိုမိုလေးနက်ပြီး စိတ်ဝင်စားဖို့ကောင်းနေတာပါပဲ။ ဒါကြောင့်မို့လည်း superhero တွေစုပေါင်းထားတဲ့ live action ဇာတ်ကားတွေထက် Comic Character တစ်ဦးချင်းစီကို အသေးစိတ်ဦးတည်ထားတဲ့ ရုပ်ရှင်မျိုးကို အနုပညာအမြောက်ဆုံးပုံစံနဲ့ ဖန်တီးဖို့ DC က ရွေးချယ်ခဲ့တာပါ။ အဲဒီလိုအားသာချက်ရဲ့ရလဒ်ကို မကြာသေးခင်ကမှထွက်ရှိထားတဲ့ Shazam, ၂၀၁၈ ခုနှစ်ရဲ့ Aquaman နဲ့ အော်စကာဆုဆွတ်ခူးနိုင်လိမ့်မယ်လို့ မျှော်မှန်းထားတဲ့ ၂၀၁၉ ခုနှစ်ရဲ့ Joker ဇာတ်ကားတွေမှာ အတိုင်းသားတွေ့မြင်နေရပါတယ်။ လာမယ့် ၂၀၂၀ ခုနှစ်၊ ဖေဖော်ဝါရီလ ၄ ရက်နေ့မှာလည်း Harley Quinn ကိုအဓိကဇာတ်ကောင်နေရာမှာထားပြီး DC ရဲ့အခြားသော Comic Character များဖြစ်ကြတဲ့ Black Canary, Huntress, ဂေါ်သန်မြို့ရဲတပ်ဖွဲ့က စုံထောက် Renee Montoya, ဗီလိန် Black Mask နဲ့ Victor Zsasz တို့ကို Birds of Prey ဇာတ်ကားနဲ့အတူ ရုပ်ရှင်ပိတ်သားပြင်ထက်မှာ ပထမဦးဆုံးအကြိမ် မိတ်ဆက်ပေးသွားဦးမှာဖြစ်ပါတယ်။ နှစ်ပေါင်းတောက်လျှောက် မျှော်လင့်ချက်ရောင်ခြည်ကို မမြင်ခဲ့ရတဲ့ DC fan များရဲ့ မျက်ရည်ဝဲနေတဲ့ပီတိများကို လာမကြည့်လည်း အတိုင်းသားမြင်နေရတဲ့အတွက် စာရေးသူလည်း ထပ်တူထပ်မျှခံစားရပါတယ်။ ကဲ ဒီတော့ Harley Quinn ရဲ့သရုပ်ဆောင်ကွက်တွေနဲ့အတူ အခြားသောဇာတ်ကောင်သစ်တွေကို ချပြမိတ်ဆက်ထားတဲ့ Birds of Prey ဇာတ်ကားဟာ ဘယ်လိုဖြစ်မလဲဆိုတာကို အတူစောင့်ကြည့်ကြရင်း နောက်လာမယ့် အခုလိုစိတ်ဝင်စားစရာအကြောင်းအရာတွေမှာ ကျွန်တော်တို့ ပြန်လည်ဆုံတွေ့ကြပါမယ်။ ဖတ်ရှုသူများအားလုံးကို ကျေးဇူးအထူးတင်ရှိပါကြောင်း။



Yan

ပိုလာရွိုက်ကင်မရာဟောင်းတစ်လုံးက ကြမ္မာဆိုးတွေကို ယူဆောင်လာတဲ့အခါ (Polaroid 2019 Movie Rating)

ကြောက်ဖို့ကောင်းတဲ့ဇာတ်ကားတွေကို ကျွန်တော်တို့တတွေဟာ သရဲကားလို့သာ အလွယ်ခေါ်နေကြပေမယ့် တကယ်တမ်းမှာ သွေးပျက်ခြောက်ခြားဖွယ်စိတ်ခံစားချက်နဲ့ ထိတ်လန့်မှုရသကို ပေးစွမ်းတဲ့ ရုပ်ရှင်ဇာတ်ကားမျိုးတွေကို သရဲကား (horror film) လို့ခေါ်ဆိုကြတာဖြစ်ပါတယ်။ အဲဒီလို horror ဇာတ်ကားတွေမှာမှ ကွဲပြားတဲ့အမျိုးအစားများစွာရှိပါတယ်၊ လူတွေအသိများတဲ့ပုံစံတွေဖြစ်တဲ့ သရဲကား၊ လူသတ်ကား၊ ဖြစ်ရပ်မှန်၊ ဇာတ်လမ်းတိုရုပ်ရှင်တွေဟာ ကျွန်တော်တို့နဲ့အရင်းနှီးဆုံးဖြစ်ပြီး ဟိုးယခင်ကတည်းကနေ အခုအချိန်အထိ horror film တွေ ဈေးကွက်ထဲမှာရှိနေတာဟာ ရုပ်ရှင်ကြည့်ပရိသတ်တွေအနေနဲ့ အကြောက်တရားကိုခံစားလိုတဲ့စိတ်၊ အတည်တကျအဓိပ္ပါယ်ဖွင့်ဆိုမရတဲ့အရာအပေါ်မှာ စူးစမ်းလေ့လာချင်တဲ့စိတ်နဲ့ ကိုယ့်နားလည်မှုအတိုင်းအတာကို ကျော်လွန်သွားတဲ့ အခြားတစ်ဖက်ကအရာတွေကို ထိတ်လန့်တဲ့စိတ်တွေကြောင့်လို့

အခြေခံကျကျသတ်မှတ်နိုင်ပါတယ်။ လတ်တလောမှာ ကျွန်တော်ကြည့်ဖြစ်တဲ့ရုပ်ရှင်တွေထဲက ကောင်းနိုးရာရာတွေကို ထုတ်နှုတ်ပြီးအကဲဖြတ်သုံးသပ်ချက်ပေးဖို့ အတွေးရတာကြောင့် အခုလိုအချိန်မှန်တင်ပေးသွားမယ့် ရုပ်ရှင် review နဲ့ rating ဆောင်းပါးကို ရေးသားဖြစ်ခဲ့တာဖြစ်ပါတယ်။ ကဲ ဒီတစ်ခေါက်အားလုံးနဲ့ မိတ်ဆက်ပေးမယ့် ရုပ်ရှင်ဇာတ်ကားကတော့ ၂၀၁၇ ခုနှစ်ကတည်းက ရိုက်ကူးရေးကဏ္ဍပြီးစီးသွားခဲ့တာဖြစ်ပေမယ့် ၂၀၁၉ ခုနှစ်မှာမှ တကယ်တမ်းထွက်ရှိလာခဲ့တဲ့ Polaroid ရုပ်ရှင်ပဲဖြစ်ပါတယ်။ ပိုလာရွိုက်ကင်မရာဟောင်းတစ်လုံးက ကြမ္မာဆိုးတွေကို ယူဆောင်လာတဲ့အခါ ဘယ်လောက်ထိဆိုးသွမ်းတဲ့ဖြစ်ရပ်တွေ ဖြစ်လာမလဲ? ဒီရုပ်ရှင်ကိုအလုံးစုံအကျဉ်းချူပ်ပြီး ဘယ်လိုမြင်လဲ? Rating ဘယ်လောက်ရမလဲ? အစရှိတာတွေကို ကြည့်လိုက်ကြစို့လားဗျာ။

ဒီ Polaroid ရုပ်ရှင်ဟာ တစ်ကမ္ဘာလုံးက Horror film ချစ်သူများအားလုံး တစ်ခဲနက်ကြိုက်နှစ်သက်ခဲ့ရတဲ့ “The Ring” နဲ့ “Grudge” တို့ရဲ့ နောက်ကွယ်က ပရိုဂျူဆာ Lars Klevberg ဖန်တီးခဲ့တဲ့ နာမည်ကျော်ဇာတ်လမ်းတိုကို ရုပ်ရှင်ဇာတ်ကားတစ်ကားအနေနဲ့ အကျယ်ဖြန့်ပြီး ပြန်လည်ဖန်တီးထားခြင်းဖြစ်ပါတယ်။ ဇာတ်အကြောင်းကိုပြန်ပြောင်းပြောပြရရင် တိတ်ဆိတ်သိုသိပ်စွာ တစ်ယောက်တည်းနေလေ့ရှိတဲ့ ဆယ်ကျော်သက်ကျောင်းသူ Bird Fitcher ဟာ သူ့ရဲ့လုပ်ဖော်ကိုင်ဖက်ဖြစ်တဲ့ Tyler Young ဆီက ပိုလာရွိုက်ကင်မရာတစ်လုံးကို လက်ဆောင်ရခဲ့ရာကနေ အရာအားလုံးစတင်ခဲ့တယ်လို့ဆိုရမှာပါ။ ရုပ်ရှင်ရဲ့အဓိကဇာတ်ဆောင်ဖြစ်တဲ့ Bird ဟာ မိခင်ဖြစ်သူနဲ့နှစ်ဦးတည်းနေထိုင်သူဖြစ်ပြီး အရာဝတ္ထူတွေရဲ့ပကတိအလှတရားကို ဓါတ်ပုံရိုက်ယူခြင်းနဲ့ ပုံဖော်ရတာကြိုက်သူ ဝါသနာရှင်ကောင်မလေးတစ်ယောက်လည်းဖြစ်ပါတယ်။ Tyler ဟာ အဲဒီပိုလာရွိုက်ကင်မရာလေးကို တကူးတကအဟောင်းဆိုင်ကရှာပြီး Bird အသုံးပြုဖို့အတွက် လက်ဆောင်ပေးရင်း Bird ကိုစိတ်ဝင်စားနေတဲ့ဆိုတဲ့အကြောင်းကို ဖွင့်ဟလာခဲ့ပါတယ်။ ရုတ်တရတ်မျှော်လင့်မထားတဲ့အခြေအနေကို ကြုံလိုက်ရတဲ့ Brid ဟာ Tyler ပေးတဲ့ ပိုလာရွိုက်ကင်မရာကို လက်ကကိုင်ရင်း ရှက်တီးရှက်ပြာနဲ့ သူမ ညနေပိုင်းအလုပ်လုပ်တဲ့ဆိုင်ကနေ ခပ်သုတ်သုတ်ထွက်လာခဲ့ပါတယ်။ ဒါပေမယ့် အဲဒီပိုလာရွိုက်ကင်မရာ ကောင်းမကောင်းကို စမ်းသပ်တဲ့အနေနဲ့ Tyler ကိုရိုက်ခဲ့မိတဲ့ဓါတ်ပုံမှာ ဘာတွေမှားယွင်းနေလဲဆိုတာကိုတော့ ဘယ်သူမှသတိမထားမိခဲ့ပါဘူး။ အဲဒီညဟာ ဟောလိုးဝင်း (Holloween) ညပါ၊ ညနေစွန်းစွန်းရောက်တဲ့အခါ Bird ရဲ့ အခင်မင်ရဆုံးသူငယ်ချင်းဖြစ်တဲ့ Kasey ဟာ အိမ်ကိုအလည်လာရင်း ကျောင်းကသူငယ်ချင်း Avery ရဲ့အိမ်မှာကျင်းပတဲ့ ဟောလိုးဝင်းညပါတီကို အတူသွားဖို့ တိုက်တွန်းခဲ့ပါတယ်။ အဲဒီလိုနဲ့ Bird နဲ့ Kasey နှစ်ယောက်ရယ် Mina နဲ့ Devin သူငယ်ချင်းစုံတွဲရယ် Avery ရဲ့ဟောလိုးဝင်းပါတီကို အတူတကွ ထက်သွားပါတော့တယ်။

ပွဲကိုရောက်သွားတဲ့လူတွေနဲ့စည်ကားလို့နေပြီး လူတွေကြားထဲမှာနေရထိုင်ရကျဉ်းကျပ်နေတဲ့ Bird ဟာ အပေါ်ထပ်ကိုတက်လာခဲ့ပါတယ်။ ဒါပေမယ့် အဲဒီပိုလာရွိုက်ကင်မရာကို လမ်းတစ်လျှောက်လုံး ယူဆောင်လာခြင်းဟာ ကြီးမားတဲ့အမှားတစ်ခုမှန်း သူမကိုယ်တိုင်တောင် မခံစားမိခဲ့ပါဘူး။ အဲဒီအချိန်မှာ Bird စိတ်ဝင်စားနေတဲ့ Connor နဲ့အမှတ်မထင်ကြုံကြိုက်ပြီး နှစ်ယောက်သား စကားစမြည်ပြောနေချိန်မှာ ပွဲအတူလာတဲ့သူငယ်ချင်းတွေအပြင် ပွဲကျင်းပသူ Avery တို့ အပေါ်ထပ်ကိုရောက်လာပြီး ဟောလိုးဝင်းနေ့ အမှတ်တရဓါတ်ပုံကို အဲဒီပိုလာရွိုက်ဓါတ်ပုံနဲ့ ရိုက်ယူလိုက်မိချိန်မှာတော့ အရာအားလုံးဟာနောက်ပြန်လှည့်ဖို့ ခက်ခဲသွားခဲ့ပါပြီ။ ရုတ်တရတ်ကြီးဆိုသလို Avery တို့ရဲ့ဟောလိုးဝင်းပါတီကို ဌာနဆိုင်ရာရဲအဖွဲ့ဝင်တွေရောက်လာပြီး လူတွေကြားထဲကနေ Bird ကိုလာရောက်ခေါ်ထုတ်သွားခဲ့ပါတယ်။ ဘာအပြစ်များလုပ်ထားလဲဆိုပြီး စိုးထိတ်နေတဲ့ Bird အနေနဲ့ ရဲမှူး Pembroke ဆီက မထင်မှတ်ပဲသိလိုက်ရတဲ့အရာကြောင့် အရုပ်ကြိုးပြတ်ဖြစ်သွားခဲ့ပါတယ်။ အဲဒါကတော့ လွန်ခဲ့တဲ့နာရီပိုင်းလေးမှာတင် အတူတွေ့ပြီး သူ့ကိုပိုလာရွိုက်ကင်မရာလက်ဆောင်ပေးခဲ့တဲ့ သူငယ်ချင်းဖြစ်သူ Tyler ဟာ အဖြေရှာမရလောက်အောင် ပဟေဠိဆန်စွာ သေဆုံးသွားပြီဆိုတာပါပဲ။ ကဲ အဲဒီလိုဆိုးရွားတဲ့အဖြစ်အပျက်တွေ ဖြစ်လာအောင် ဘယ်သူကများ ကြံစည်ဖန်တီးနေတာပါလဲ? ဘယ်လိုရည်ရွယ်ချက်ကြောင့် အဲဒီပိုလာရွိုက်ကင်မရာနဲ့ ဓါတ်ပုံအရိုက်ခံလိုက်ရသူမှန်သမျှ ကြမ္မာဆိုးတွေနဲ့ ကြုံတွေ့ရတာလဲ? ပိုင်ဆိုင်သူများရှိခဲ့ရင် အဲဒါကဘယ်သူများဖြစ်မလဲ? အစရှိတာတွေကိုတော့ အားလုံးပဲကိုယ်တိုင်ကိုယ်ကျကြည့်ရှုပြီး အဖြေရှာရမှာပါ။ ဒီဇာတ်ကားမှာ အခြေခံထားတဲ့ဇာတ်ကြောင်းဟာ ရိုးရှင်းတယ်၊ ပါဝင်တဲ့သရုပ်ဆောင်တွေအားလုံးဟာ ဆယ်ကျော်သက်တွေအဖြစ်ပါဝင်ထားတဲ့အတွက် ကြည့်ရတာ လတ်ဆတ်အမြင်ကိုပေးသလို ငယ်ရွယ်သူတွေရဲ့ ဆင်ရိုင်းတောတိုးလုပ်တတ်တဲ့ အမူအကျင့်တချို့ကို တွေ့မြင်ရမယ်။ ပါဝင်တဲ့သရုပ်ဆောင်တွေရဲ့နေရာကိုယ်စီနဲ့ ဇာတ်အသွားအလာဟာ အစပ်အဟပ်တည့်တယ်၊ ပြသတဲ့ပတ်ဝန်းကျင်နဲ့ထည့်သွင်းထားတဲ့လောကဟာ မကျယ်ပြန့်ပေမယ့် ဇာတ်အိမ်အတွက်လုံလောက်မှုရှိသလို သူ့အိုးနဲ့သူ့ဆန် ကြည့်ရတာပြည့်စုံမှုရှိပါတယ်။ ကြည့်ခဲ့မြင်ခဲ့ပြီးသား ဂန္တဝင်ဆန်တဲ့ horror ကားတွေထဲကတစ်ကားလို့ သတ်မှတ်မရပေမယ့် အချိန်ပေးပြီးကြည့်ရတာတော့ တန်တယ်လို့ယူဆမိတဲ့ horror film တစ်ခုပါ။ ကဲ အကဲဖြတ်သုံးသပ်မှုတွေအပြီးမှာတော့ တစ်ကားကိုခြုံငုံပြီးဘယ်လိုမြင်လဲ၊ rating ဘယ်လောက်ပေးမှာလဲဆိုတာကတော့ အောက်မှာဖော်ပြထားတဲ့အတိုင်းပါပဲ။

Rating: 6.7/10 (6.7 Out Of 10)
Genre: Horror
Directed By: Lars Klevberg
Written By: Blair Butler Cast: Kathryn Prescott, Connor Bell, Samantha Logan, Keenan Tracey, Priscilla Quintana, Javier Botet, Mitch Pileggi, Katie Stevens, Davi Santos.
Studio: Dimension Films

Yan

Yan

Joker ဇာတ်ကားဟာ Marvel က လိုက်မရိုက်နိုင်သော ရုပ်ရှင်မျိုးဟု ဒါရိုက်တာ Todd Philips ပြောကြား

ပထမဦးဆုံး Joker ဇာတ်ကားရဲ့ထွေလာထွက်ရှိလာကတည်းက ဘယ်အချိန်မှာပိတ်သားထက်ကို ရောက်လာမှာလည်းဆိုပြီး တစ်ကမ္ဘာလုံးက ပရိသတ်များက ရင်ခုန်စိတ်လှုပ်ရှားစွာ စောင့်လို့နေကြပါတယ်။ ဒါပေမယ့် ပြင်သစ်နိုင်ငံ Venice မှာ ကျင်းပခဲ့တဲ့ ရုပ်ရှင်ပွဲတော်အပြီးမှာတော့ premiere ကြည့်ရှုပြီးသွားတဲ့ မီဒီယာကြီးများအနေနဲ့ review တွေ၊ rating တွေ အသီးသီးပေးလို့လာကြပါပြီ။ အဲ တစ်ခုရှိတာက သုံးသပ်ချက်ဆယ်ခုရှိခဲ့ရင် ဆယ်ခုစလုံးဟာ ဒီ Joker ဇာတ်ကားရဲ့ ဘယ်လောက်ထိအနုပညာမြောက်ကြောင်း၊ သရုပ်ဆောင်အသက်ဝင်ကြောင်း၊ ဇာတ်ကြောင်းဇာတ်အိမ်ခိုင်မာကြောင်း အစရှိတာတွေနဲ့ သာမန် comic ရုပ်ရှင်မျိုးမဟုတ်ဘူးလို့ ချီးမြောက်ထားတာတွေချည်းပါပဲ။ အဲဒီလိုမျိုးဇာတ်ကားကို အောင်မြင်စွာဖန်တီးနိုင်ခဲ့တဲ့ Joker ဇာတ်ကားရဲ့ ဒါရိုက်တာ Todd Philips က Disney လွှမ်းမိုးထားတဲ့ဈေးကွက်မှာ ဒီ Joker ဇာတ်ကားဟာ Marvel က လိုက်မလုပ်နိုင်တဲ့ ရုပ်ရှင်မျိုးလို့ New York Times ကို ဘယ်လိုပြောကြားခဲ့လဲဆိုတာ တစ်ချက်လောက်ကြည့်လိုက်ရအောင်။

“Marvel ကိုဘယ်လိုမှ အနိုင်ယူလို့မရဘူး။ သူတို့ကအရမ်းအောင်မြင်မှုကြီးထွားပြီး အချိန်မှန်လည်ပတ်နေတဲ့စက်ယန္တာယားကြီးတစ်ခုလိုပဲ။ အဲလိုဆိုတော့ DC အနေနဲ့ Marvel ရဲ့လုပ်ရပ်မှန်သမျှကို လိုက်တုပပြီး သူနဲ့ယှဉ်ပြိုင်ဖို့ဆိုတာ လုံးဝမဖြစ်နိုင်ဘူး။ ဒါပေမယ့် အရေးနိမ့်မှုကိုပိုက်ပြီး အိမ်ပြန်သွားမယ့်အစား DC အနေနဲ့ Marvel နဲ့ကွဲပြားတဲ့၊ Marvel က လိုက်ပြီးလုပ်လို့မရမယ့် Joker လိုဇာတ်ကားမျိုး ရိုက်သင့်တယ်” လို့ဆိုပါတယ်။ Todd Philips ရဲ့အမြင်အရ Joker ဟာ မှောင်မိုက်တယ်၊ ခက်ထန်ကြမ်းတမ်းတယ် နောက်ပြီး လူတွေစိတ်ထဲရေရေရာရာအဖြေရှာမရတဲ့ R-rated ဇာတ်ကောင်၊ Batman ရဲ့တစ်ဦးတည်းသော မဟာရန်သူတော်ဖြစ်တဲ့အပြင် ဘယ်ရှုထောင့်ကပဲကြည့်ကြည့်၊ Disney ပိုင်ဆိုင်တဲ့ Marvel စတူဒီယိုက ဘယ်လိုမှလိုက်ပြီးတုပမရတဲ့ ဇာတ်ကောင်မျိုးဖြစ်တယ်လို့ ဆိုပါတယ်။

နောက်တစ်ချက်က Marvel အနေနဲ့ လူတိုင်းကြည့်ရှုခံစားနိုင်မယ့် superhero ဇာတ်ကားမျိုးကို အတွဲရှည်လျားစွာ ရိုက်ကူးခဲ့ရာကနေ တဖြည်းဖြည်းကြီးထွားလာခဲ့တာဖြစ်ပြီး သူတို့ဆီကထွက်ခဲ့သမျှ ဇာတ်ကားတိုင်းဟာ Marvel Universe တစ်ခုတည်းအပေါ်မှာ အခြေခံထားတဲ့ဖျော်ဖြေရေးရုပ်ရှင်တွဲကြီးတစ်ခုလို ဖြစ်နေပါပြီ။ ဒါပေမယ့် အခုအသစ်ထွက်ရှိလာမယ့် Joker ဇာတ်ကားကတော့ comic ထဲကဇာတ်ကောင်ကို အမှီပြုထားရုံမှအပ အခြားဘာဆိုဘာမှ အခြေခံပြီးတည်ဆောက်ထားတာမျိုးမရှိတဲ့ အနုပညာမြောက်ရုပ်ရှင်တစ်ကားဖြစ်ပါတယ်။ 

Todd Philips ရိုက်ကူးပြီး Joaquin Phoenix အဓိကပါဝင်သရုပ်ဆောင်ထားတဲ့ ၂၀၁၉ ခုနှစ် Joker ဇာတ်ကားကို လာမယ့် အောက်တိုဘာလ ၄ ရက်နေ့မှာ နိုင်ငံတကာမှာရှိတဲ့ ရုပ်ရှင်ရုံတိုင်းမှာ သွားရောက်ကြည့်ရှုနိုင်ပြီဖြစ်ကြောင်းကိုလည်း ဒီကနေသတင်းကောင်းပါးလိုက်ပါရစေ

Yan

Ref: cinemablend

သည်းထိတ်ရင်ဖိုဂိမ်းတွေကိုမှ ကြိုက်နှစ်သက်ကြသူများအတွက် CAPCOM ကမကြာခင်ထုတ်ပေးတော့မယ့် Project Resistence ဇွန်ဘီဂိမ်း

CAPCOM လို့ဆိုလိုက်တာနဲ့ Street Fighter, Megaman, Devil May Cry နဲ့ Resident Evil ဂိမ်းစီးရီးတို့ကို ပြေးမြင်ကြတာ ဂိမ်မာတိုင်းလိုလိုပါပဲ။ ဗီဒီယိုဂိမ်းတွေရဲ့ ဆင့်ကဲပြောင်းလဲမှုသက်တမ်းတစ်လျှောက်မှာ CAPCOM ကထုတ်ပေးခဲ့တဲ့ဂိမ်းတွေကို ဆော့ကစားပြီး ငယ်ဘဝကိုဖြတ်သန်းခဲ့ရသူဂိမ်မာတွေ မနည်းပါဘူး။ အဲ မကြာသေးတဲ့အချိန်ကမှ Resident Evil 2 Remake ကိုထုတ်ပေးပြီး တစ်ကမ္ဘာလုံးက ဂိမ်းမီဒီယာကြီးတွေရဲ့ review ကောင်း၊ rating ကောင်းတွေ ရရှိခဲ့တဲ့ CAPCOM အနေနဲ့ ဂိမ်းချစ်သူပရိသတ်တွေအတွက် နောက်ခြေတစ်လှမ်းတစ်လှမ်းလိုက်ပြန်ပါပြီ။ အဲဒါကတော့ လွန်ခဲ့တဲ့တစ်ရက်ကမှ Resident Evil ဂိမ်းလောကထဲမှာ ဖန်တီးထားတဲ့ ဇွန်ဘီအတိုက်အခိုက်ဂိမ်းဖြစ်တဲ့ Project Resistence ကို ဂိမ်းထွေလာနဲ့အတူ ကြေညာခဲ့လို့ပါပဲ။ ထွေလာကိုကြည့်လိုက်မယ်ဆိုရင်တော့ အခုလာမယ့် Project Resistence ဂိမ်းဟာ CAPCOM ကထုတ်မယ့် နောက်ထပ်အကြီးစားဂိမ်းတစ်ခုခု မလာခင်အချိန်အထိ စောင့်မျှော်နေတွေ ဆော့ကစားဖို့အတွက် ရည်ရွယ်ချက်နဲ့ထုတ်ပေးထားပုံ ပေါ်ပါတယ်။

ဂိမ်းကိုသုံးသပ်ကြည့်မယ်ဆိုရင် ဒီ Project Resistence ဇွန်ဘီဂိမ်းဟာ Resident Evil လောကထဲမှာပဲ ဇာတ်အိမ်တည်ထားတဲ့ Third Person PvP ဂိမ်းအမျိုးအစားဖြစ်တယ်၊ ကစားသမားလေးယောက်ပါဝင်ပြီး တက်ညီလက်ညီ အကွက်ကျကျနဲ့ ဇွန်ဘီတွေကို တိုက်ခိုက်နှိမ်နင်းရမယ်၊ Resident Evil 2 Remake မှာ အားလုံးရင်ထိတ်သည်းဖိုဖြစ်ခဲ့တဲ့ Mr.X ကိုလည်း ပြန်လည်တွေ့ရှိရမယ့်အပြင် အခြားနောက်ထပ်လူငယ်ဇာတ်ကောင်သစ်လေးယောက်ကိုလည်း ထပ်မံထည့်သွင်းပေးထားတာကို တွေ့ရမှာပါ။ ဆော့ကစားမယ့်သူတွေအနေနဲ့ မစ်ရှင်တစ်ခုလုံးကို အောင်မြင်ဖို့ အဆင့်သုံးဆင့်ကို မတူညီတဲ့အခက်အခဲတွေနဲ့ ရင်ဆိုင်ဖြတ်ကျော်ရမှာဖြစ်ပြီး ပါဝင်တဲ့ဇာတ်ကောင်တစ်ယောက်ချင်းစီမှာ အဆင့်တစ်ဆင့်ချင်းအတွက် အသုံးဝင်တဲ့ထူးကဲတဲ့စွမ်းရည်တစ်မျိုးဆီ ပါဝင်မယ်လို့သိပါတယ်။ ဇာတ်ကောင်တွေရဲ့အမည်နဲ့ အဲဒီစွမ်းရည်တွေကို တစ်ချက်လောက်ကြည့်လိုက်တဲ့အခါမှာ

Valerie – အခြားကစားသမားတွေကို သွေးဖြည့်ပေးနိုင်စွမ်းရှိပြီး support လုပ်နိုင်တယ်။

January – လုံခြုံရေးကင်မရာများကို ပစ်ချနိုင်ပြီး နောက်ကွယ်ကကြည့်နေသူကို ခဏတာရပ်ဆိုင်းသွားအောင် ဟန့်တားနိုင်စွမ်းရှိတယ်။

Tyrone – အမာခံတစ်ယောက်ဖြစ်ပြီး ရန်သူတွေကိုပြင်းထန်တဲ့ကန်ချက်နဲ့ ပစ်လဲသွားအောင် လုပ်နိုင်စွမ်းရှိတယ်။

Samuel - ရန်သူတွေကို ပြိုကွဲသွားစေတဲ့ တိုက်ခိုက်ကွက်တွေကို အသုံးချနိုင်စွမ်းရှိတယ်။

ကဲ ပါဝင်တဲ့ဇာတ်ကောင်လေးယောက်ရဲ့ ကိုယ်စီကိုယ်စီစွမ်းရည်တွေကတော့ အထက်မှာပြောခဲ့တဲ့အတိုင်းပါပဲဗျာ။ CAPCOM အနေနဲ့ ဒီဂိမ်းကိုအစမ်းဆော့ကစားနိုင်မယ့် Project Resistence Beta ကို အောက်တိုဘာလ ၄ ရက်နေ့ကနေ ၇ ရက်နေ့အထိ ဖွင့်ပေးမှာဖြစ်ပြီး ပါဝင်ဆော့ကစားချင်သူများအနေနဲ့ စက်တင်ဘာလ ၁၂ ရက်နေ ၁၉  ရက်အထိ Project Resistence ဝက်ဘ်ဆိုဒ်မှာ လာရောက်စာရင်းသွင်းနိုင်ကြောင်းလည်း သိရပါတယ်။ Left 4 Dead ရဲ့အငွေ့အသက်ကို ပြန်လည်ခံစားရစေမယ့် ကစားဟန်တချို့လည်းပါနေတဲ့အတွက် ဒီကဂိမ်းပရိသတ်တွေနဲ့လည်း တရင်းတနှီးဖြစ်နေမှာတော့ သေချာပါတယ်။ ကဲ ဒီတော့ အောက်တိုဘာလကျမှ ဂိမ်းကစားပုံအသေးစိတ်ကို သိရှိနိုင်မယ့် CAPCOM ရဲ့ ဇွန်ဘီဂိမ်းသစ်ဖြစ်တဲ့ Project Resistence ကို ထွက်ရှိလာတဲ့အချိန်ကျမှသာ ကိုယ်တိုင်ကိုယ်ကျဆော့ကစားကြည့်ကြဖို့ ဒီကနေတိုက်တွန်းလိုက်ရပါတယ်။

Yan

Ref: ign, eurogamers

၂၁ ရာစုသမိုင်းတစ်လျှောက်မှာ ဖွဲ့စည်းခဲ့ကြတဲ့ ကမ္ဘာ့အင်အားကြီးစစ်မဟာမိတ်အဖွဲ့များ (ဒုတိယပိုင်း)

ဟိုးယခင် ၂၀ ရာစုကနေပြီး လက်ရှိမျက်မှောက်ခေတ်ရာစုနှစ်အထိ ကမ္ဘာ့နိုင်ငံအသီးသီးက ဖွဲ့စည်းတည်ဆောက်ခဲ့တဲ့ အင်အားကြီးစစ်မဟာမိတ်အဖွဲ့တွေကို စာဖတ်သူတွေဗသုသုတရစေဖို့ ဖော်ပြခဲ့ပါတယ်။ ဆောင်းပါးတစ်စောင်လုံးကို ပထမပိုင်းနဲ့ ဒုတိယပိုင်း အပိုင်းနှစ်ပိုင်းခွဲပြီး ပြုစုရေးသားခဲ့ရာကနေ အခုဆိုရင်တော့ အရင်တစ်ပိုင်းရဲ့နောက်ဆက်တွဲကို တင်ဆက်ဖို့ အချိန်ရောက်ခဲ့ပြီဖြစ်ပါတယ်။ ကမ္ဘာ့နိုင်ငံအသီးသီးရဲ့ လက်တွဲပေါင်းစည်းမှုကို ကိုယ်စားပြုတဲ့မဟာမိတ်အဖွဲ့တွေကို ဖော်ပြပေးချင်တဲ့အတွက် စစ်ရေးအရသာမက ကမ္ဘာတစ်ဝှမ်းလုံးအတိုင်းအတာမှာ လူမှုစီးပွားရေးနဲ့ သြဇာအာဏာအားကောင်းစေဖို့ ဖွဲ့စည်းခဲ့တဲ့ နိုင်ငံပေါင်းစုအသင်းအဖွဲ့တွေကိုပါ ထည့်သွင်းရေးသားထားပါတယ်။ ဒီတော့ ဒီတစ်ပိုင်းစမဖတ်ခင်မှာ ပထမတစ်ပိုင်းကို သွားရောက်ဖတ်ရှုဖို့ တိုက်တွန်းရင်းနဲ့ ဒီဆောင်းပါးကို ကြိုက်နှစ်သက်တဲ့စာဖတ်ချစ်သူတွေကိုလည်း ဖတ်ရှုပြီးရင် ကိုယ့်ရဲ့လူမှုကွန်ယက်နဲ့ မိတ်ဆွေသူငယ်ချင်းတွေဆီ တဆင့်ပြန်လည်မျှဝေပေးဖို့ ပြောလိုက်ချင်ပါတယ်။ အဆင်သင့်ဖြစ်ပြီဆို စလိုက်ကြစို့ဗျာ။

နိုင်ငံပေါင်းချုပ်အသင်းကြီး (League of Nations)

နိုင်ငံပေါင်းချုပ်အသင်းကြီးကို ၁၉၁၉ ခုနှစ်နဲ့ ၁၉၂၀ ခုနှစ်အတွင်း ဗာဆိုင်းစာချုပ်အရ ဖွဲ့စည်းတည်ထောင်ခဲ့တဲ့ အစိုးရတွေကြားက အဖွဲ့အစည်းဖြစ်ပါတယ်။ ၁၉၃၄ ခုနှစ်နဲ့ ၁၉၃၅ ခုနှစ်အထိ အဖွဲ့ဝင်နိုင်ငံ ၅၈ နိုင်ငံရှိခဲ့ပြီး နိုင်ငံပေါင်းချုပ်အသင်းကြီးရဲ့ အတိုင်းအတာ အကြီးမားဆုံး ကာလလည်းဖြစ်ခဲ့ပါတယ်။ အသင်းချုပ်၏ ရည်ရွယ်ချက်တွေကတော့ အမျိုးသမီးအခွင့်အရေး၊ စစ်သား အခွင့်အရေး၊ လူဖြူမဟုတ်သူတွေရဲ့အခွင့်အရေး အစရှိတဲ့အခြေခံ လူ့အခွင့်အရေးတွေကို မြှင့်တင်ပေးရေး၊ လက်နက်မပြန့်ပွားရေး၊ စစ်မက်တားဆီးရေး၊ နိုင်ငံများအကြား ကွာဟချက်များကို သံတမန်နည်းလမ်းအရ ညှိနှိုင်းဖြေရှင်းရေးတို့ ပါဝင်ခဲ့ပါတယ်။ ဒါပေမယ့်လည်း ဒုတိယ ကမ္ဘာစစ်ဖြစ်ပွားခဲ့ခြင်းမှာ နိုင်ငံပေါင်းချုပ် အသင်းကြီး၏ စစ်မက်တားဆီးရေး ရည်မှန်းချက် မအောင်မြင်သည့် သာဓကတစ်ရပ်ဖြစ်တာကြောင့် ဒုတိယ ကမ္ဘာစစ်ကြီးအပြီးမှာ အဖွဲ့ဝင်နိုင်ငံတွေအနေနဲ့ နိုင်ငံပေါင်းချုပ်အသင်းကြီးကို လက်ရှိကမ္ဘာ့ကုလသမဂ္ဂအဖြစ် ပြန်လည် အစားထိုးဖွဲ့စည်းခဲ့ပါတယ်။

 

ကမ္ဘာ့ကုလသမဂ္ဂအဖွဲ့ (United Nations)

ဒုတိယကမ္ဘာစစ်ကြီးအပြီး ၁၉၄၅ ခုနှစ်၊ ဇွန်လ ၂၆ ရက်မှာ ကုလသမဂ္ဂပဋိညာဉ်စာတမ်း ရေးထိုးခြင်းနဲ့အတူ သွေးသစ်လောင်းဖွဲ့စည်းခဲ့တဲ့ ကုလသမဂ္ဂအဖွဲ့ဖြစ်ပါတယ်။ အရှေ့ကဖျက်သိမ်းခဲ့တဲ့ နိုင်ငံပေါင်းချုပ်အသင်းကြီးရဲ့ အမွေအနှစ်ကို ထိန်းသိမ်းဆက်ခံထားတဲ့ အဖွဲ့အစည်းဖြစ်သလို လက်ရှိမှာကမ္ဘာ့နိုင်ငံပေါင်း ၁၉၅ နိုင်ငံနဲ့ ပါဝင်ဖွဲ့စည်းထားတာ ဖြစ်ပါတယ်။ အဖွဲ့ကြီးရဲ့အဓိကရည်ရွယ်ချက်ကတော့ နိုင်ငံတကာတရားဥပဒေ စိုးမိုးရေး၊ လုံခြုံရေး၊ စီးပွားရေးဖွံဖြိုးတိုးတက်မ၊ှု အပြည်ပြည်ဆိုင်ရာလူ့အခွင့်အရေးနဲ့ ကမ္ဘာ့ငြိမ်းချမ်းရေးတည်မြဲစေဖို့ဖြစ်ပြီး နှစ်စဉ်နှစ်တိုင်းမှာ အထွေထွေညီလာခံကျင်းပခြင်းနဲ့အတူ အဖွဲ့ဝင်နိုင်ငံတွေကိုယ်စား တက်ရောက်သူကိုယ်စားလှယ်များဟာ ကမ္ဘာ့အရေးအရာတွေကို ဆွေးနွေးတိုင်ပင်ကြပါတယ်။ ဒါ့ပြင်ကုလသမဂ္ဂအဖွဲ့ကြီးရဲ့ အမြဲတမ်းအဖွဲ့ဝင်တွေကတော့ အင်အားကြီးနိုင်ငံတွေဖြစ်ကြတဲ့ ဗြိတိန်၊ အမေရိကန်၊ ပြင်သစ်၊ တရုတ်နဲ့ ဆိုဗီယက်ရုရှားတို့ဖြစ်ပြီး ဗီတိုအာဏာကို အသုံးပြုခွင့်ရှိပါတယ်။

 

ဥရောပသမဂ္ဂအဖွဲ့ (European Union)

အီးယူလို့လည်းခေါ်တွင်ကျတဲ့ ဥရောပသမဂ္ဂဟာလည်း အဖွဲ့ဝင် ၂၈ နိုင်ငံနဲ့ ဖွဲ့စည်းတည်ဆောက်ထားတဲ့ နိုင်ငံရေး၊ စီးပွားရေးရာ ဥရောပနိုင်ငံများဆိုင်ရာ အဖွဲ့အစည်းတစ်ရပ်ဖြစ်ပါတယ်။ အဖွဲ့ဝင်နိုင်ငံတွေဟာ အဓိကအားဖြင့် ဥရောပတိုက်မှာ တည်ရှိပြီး ဥရောပသမဂ္ဂကို မက်စ်ထရစ်စာချုပ်အရ ၁၉၉၃ ခုနှစ်တွင် စတင်ထူထောင်ခဲ့တာဖြစ်ပါတယ်။ ဥရောပသမဂ္ဂဧရိယာအတွင်း နေထိုင်သူလူဦးရေမှာ ခန့်မှန်းခြေ သန်း ၅၁၀ ကျော်ခန့် ရှိတယ်လို့ စစ်တမ်းတွေအရသိရပါတယ်။ ဥရောပတိုက်နိုင်ငံတွေအနေနဲ့ ပထမကမ္ဘာစစ်နဲ့ ဒုတိယကမ္ဘာစစ်ကြီးဖြစ်ပွားခဲ့တဲ့အတွက် ကကွဲကွဲအပြားပြားဖြစ်ခဲ့ရတဲ့ ဥရောပနိုင်ငံတွေကို လူမျိုးရေး၊ ယဉ်ကျေးမှုရေး၊ နိုင်ငံရေးနဲ့ စီးပွားရေးတို့အရ စုစည်းညီညွတ်တဲ့ ဥရောပတိုက်ကြီးဖြစ်လာရေးအတွက် ဦးတည်ရည်မှန်းပြီး လှုပ်ရှားမှုတွေ စတင်ဖြစ်တည်ခဲ့တာဖြစ်ပါတယ်။ ၁၉၅၁ ခုနှစ်၊ ဧပြီလ ၁၈ရက်နေ့၊ ပြင်သစ်နိုင်ငံ၊ ပါရီမြို့မှာ လက်မှတ်ရေးထိုးခဲ့ကြတဲ့စာချုပ်နဲ့အတူ အဖွဲ့မှာ မူလပါဝင်သောနိုင်ငံ (၆) နိုင်ငံကတော့ ဘယ်လဂျီယံ၊ ပြင်သစ်၊ ဂျာမနီ၊ အီတလီ၊ လူဇင်ဘတ်နှင့် နယ်သာလန်နိုင်ငံတို့ ဖြစ်ကြပါတယ်။ အဲဒီနောက် ဒိန်းမတ်၊ အိုင်ယာလန်နဲ့ ဗြိတိန်နိုင်ငံတို့က ၁၉၇၃ ခုနှစ်၊ ဇန်နဝါရီ ၁ရက်နေ့မှာပါဝင်ခဲ့ပြီး ဂရိနိုင်ငံက ၁၉၈၁ ခုနှစ်၊ ပေါ်တူဂီနဲ့ စပိန်နိုင်ငံတို့ကလည်း ၁၉၈၆ ခုနှစ်မှာ အဖွဲ့ဝင်နိုင်ငံများ ဖြစ်လာခဲ့ကြပါတယ်။ ၁၉၉ဝပြည့်နှစ်၊ အောက်တိုဘာလမှာ နှစ်ခြမ်းကွဲနေတဲ့ အရှေ့အနောက် ဂျာမနီနိုင်ငံ ပြန်လည်ပေါင်းစည်းမိချိန်မှာတော့ ယခင်က ဂျာမန်ဒီမိုကရက်တစ်သမ္မတနိုင်ငံဟာလည်းပဲ ချက်ချင်းဆိုသလို ဥရောပသမဂ္ဂအဖွဲ့ရဲ့ အစိတ်အပိုင်းတစ်ခုဖြစ်လာခဲ့ပါတယ်။

 

အရှေ့တောင်အာရှနိုင်ငံများအဖွဲ့ (ASEAN) 

ကျွန်တော်တို့မြန်မာနိုင်ငံဟာလည်း အရှေ့တောင်အာရှနိုင်ငံတစ်နိုင်ငံဖြစ်တဲ့အပြင် အာဆီယံအဖွဲ့ထဲမှာ အသင်းဝင်ဖြစ်ကြောင်းကို အားလုံးသိရှိပြီးလောက်ပြီ ထင်ပါတယ်။ အာဆီယံအဖွဲ့ဟာ အရှေ့တောင်အာရှ ၁၀ နိုင်ငံနဲ့ ပေါင်းစည်းဖွဲ့စည်းထားတဲ့ နိုင်ငံရေးနှင့် စီးပွားရေးဆိုင်ရာအသင်းဖြစ်ပါတယ်။  အင်ဒိုနီးရှား၊ မလေးရှား၊ စင်ကာပူ၊ ထိုင်း၊ ဖိလစ်ပိုင်နိုင်ငံတို့ရဲ့ နိုင်ငံခြားရေးဝန်ကြီးများဟာ ၁၉၆၇ ခုနှစ်မှာ အာဆီယံကြေငြာချက် (ဘန်ကောတ်ကြေငြာစာတမ်း)ကို လက်မှတ်ရေးထိုးပြီး အာဆီယံအဖွဲ့ကို ဖွဲ့စည်းခဲ့ကြပါတယ်။ နောက်ထပ်ပြီး ပါဝင်လာတဲ့နိုင်ငံတွေကတော့ ဘရူနိုင်း၊ ဗီယက်နမ်၊ မြန်မာ၊ လာအို၊ ကမ္ဘောဒီးယားတို့ဖြစ်ပြီး စုစုပေါင်း ၁၀ နိုင်ငံအထိဖြစ်လာခဲ့ပါတယ်။ အာဆီယံရဲ့ အဓိကရည်ရွယ်ချက်ကတော့ ငြိမ်းချမ်းပြီး ကြွယ်ဝတဲ့ အရှေ့တောင်အာရှ အသိုင်းအဝန်းတစ်ခုအဖြစ် ရေရှည်တည်တံ့ခိုင်မြဲစွာ ရပ်တည်နိုင်ဖို့ တည်ဆောက်ရေး၊ နိုင်ငံအသီးသီး ပူးပေါင်းဆောင်ရွက်မှုနဲ့ ဖြောင့်မှန်ညီညွတ်တဲ့ စိတ်ဓာတ်များမှတဆင့် ဒေသတွင်း စီးပွားရေး၊ လူမှုရေး တိုးတက်မှု၊ ယဉ်ကျေးမှုနဲ့ ဖွံဖြိုးတိုးတက်မှုများကို အရှိန်အဟုန်ဖြင့် မြှင့်တင်ရန်တို့ပဲ ဖြစ်ကြပါတယ်။

ကဲ ဒီလောက်ဆိုရင် တစ်ကမ္ဘာလုံးအတိုင်းအတာနဲ့ ရာစုနှစ်အသီးသီးမှာ ဖွဲ့စည်းခဲ့ကြတဲ့ ငြိမ်းချမ်းရေးထိန်းသိမ်းမယ့် စစ်မဟာမိတ်အဖွဲ့တွေနဲ့ နိုင်ငံ့လူမှုစီးပွားရေးဆိုင်ရာ ရည်ရွယ်ချက်တွေကြောင့် လက်တွဲဖွဲ့စည်းခဲ့တဲ့ နိုင်ငံပေါင်းစုအသင်းအဖွဲ့တွေအကြောင်းကို ဗဟုသုတဖြစ်ဖွယ်သိရှိလောက်ပြီ ထင်ပါတယ်။ G20, G7 နဲ့ BRICS အစရှိတဲ့ အခြားအစုအဖွဲ့တွေကို ဖော်ပြပေးဖို့ ကျန်သေးမယ့် အခုတင်ဆက်ပေးခဲ့တဲ့ အဖွဲ့တွေကို အရင်ဆုံး သိသင့်သိထိုက်တယ်လို့ ယူဆတဲ့အတွက် စာစောင်မှာဖော်ပြပေးဖို့ ရွေးချယ်ထည့်သွင်းခဲ့တာ ဖြစ်ပါတယ်။ နောက်ထပ်ပြီး နိုင်ငံရေးနဲ့ စစ်ရေးစစ်ရာအကြောင်းတွေကို ရေးသားမျှဝေသွားမှာဖြစ်လို့ စောင့်ဆိုင်းနိုင်ကြောင်း ပြောကြားရင်း ဖတ်ရှုသူများအားလုံးကို ကျေးဇူးအထူးတင်ကြောင်း ပြောလိုက်ရပါတယ်။

Yan

Ref: Wikia, မြန်မာ့စွယ်စုံကျမ်း